꧔. ꦄꦴꦱꦮꦱꦸꦠ꧀ꦠꦁ

꧕꧘. ‘‘ꦖꦲꦶ, ꦨꦶꦏ꧀ꦑꦮꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦨꦶꦏ꧀ꦑꦸ ꦄꦴꦲꦸꦤꦺꦪ꧀ꦪꦺꦴ ꦲꦺꦴꦠꦶ ꦥꦴꦲꦸꦤꦺꦪ꧀ꦪꦺꦴ ꦢꦏ꧀ꦑꦶꦟꦺꦪ꧀ꦪꦺꦴ ꦄꦚ꧀ꦗꦭꦶꦏꦫꦟꦷꦪꦺꦴ ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱ.

ꦏꦠꦩꦺꦲꦶ ꦖꦲꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦪꦺ ꦄꦴꦱꦮꦴ ꦱꦁꦮꦫꦴ ꦥꦲꦴꦠꦧ꧀ꦧꦴ ꦠꦺ ꦱꦁꦮꦫꦺꦤ ꦥꦲꦷꦤꦴ ꦲꦺꦴꦤ꧀ꦠꦶ, ꦪꦺ ꦄꦴꦱꦮꦴ ꦥꦛꦶꦱꦺꦮꦤꦴ ꦥꦲꦴꦠꦧ꧀ꦧꦴ ꦠꦺ ꦥꦛꦶꦱꦺꦮꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ, ꦪꦺ ꦄꦴꦱꦮꦴ ꦄꦣꦶꦮꦴꦱꦤꦴ ꦥꦲꦴꦠꦧ꧀ꦧꦴ ꦠꦺ ꦄꦣꦶꦮꦴꦱꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ, ꦪꦺ ꦄꦴꦱꦮꦴ ꦥꦫꦶꦮꦗ꧀ꦗꦤꦴ ꦥꦲꦴꦠꦧ꧀ꦧꦴ ꦠꦺ ꦥꦫꦶꦮꦗ꧀ꦗꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ, ꦪꦺ ꦄꦴꦱꦮꦴ ꦮꦶꦤꦺꦴꦢꦤꦴ ꦥꦲꦴꦠꦧ꧀ꦧꦴ ꦠꦺ ꦮꦶꦤꦺꦴꦢꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ, ꦪꦺ ꦄꦴꦱꦮꦴ ꦨꦴꦮꦤꦴ ꦥꦲꦴꦠꦧ꧀ꦧꦴ ꦠꦺ ꦨꦴꦮꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ.

‘‘ꦏꦠꦩꦺ ꦕ, ꦨꦶꦏ꧀ꦑꦮꦺ, ꦄꦴꦱꦮꦴ ꦱꦁꦮꦫꦴ ꦥꦲꦴꦠꦧ꧀ꦧꦴ ꦪꦺ ꦱꦁꦮꦫꦺꦤ ꦥꦲꦷꦤꦴ ꦲꦺꦴꦤ꧀ꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦕꦏ꧀ꦑꦸꦤ꧀ꦢ꧀ꦫꦶꦪꦱꦁꦮꦫꦱꦁꦮꦸꦠꦺꦴ ꦮꦶꦲꦫꦠꦶ. ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦕꦏ꧀ꦑꦸꦤ꧀ꦢ꧀ꦫꦶꦪꦱꦁꦮꦫꦁ ꦄꦱꦁꦮꦸꦠꦱ꧀ꦱ ꦮꦶꦲꦫꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦕꦏ꧀ꦑꦸꦤ꧀ꦢ꧀ꦫꦶꦪꦱꦁꦮꦫꦁ ꦱꦁꦮꦸꦠꦱ꧀ꦱ ꦮꦶꦲꦫꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦱꦺꦴꦠꦶꦤ꧀ꦢ꧀ꦫꦶꦪ…ꦥꦺ… ꦓꦴꦤꦶꦤ꧀ꦢ꧀ꦫꦶꦪ… ꦗꦶꦮ꧀ꦲꦶꦤ꧀ꦢ꧀ꦫꦶꦪ… ꦏꦴꦪꦶꦤ꧀ꦢ꧀ꦫꦶꦪ… ꦩꦤꦶꦤ꧀ꦢ꧀ꦫꦶꦪꦱꦁꦮꦫꦱꦁꦮꦸꦠꦺꦴ ꦮꦶꦲꦫꦠꦶ. ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦩꦤꦶꦤ꧀ꦢ꧀ꦫꦶꦪꦱꦁꦮꦫꦁ ꦄꦱꦁꦮꦸꦠꦱ꧀ꦱ ꦮꦶꦲꦫꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦩꦤꦶꦤ꧀ꦢ꧀ꦫꦶꦪꦱꦁꦮꦫꦁ ꦱꦁꦮꦸꦠꦱ꧀ꦱ ꦮꦶꦲꦫꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦱꦁꦮꦫꦴ ꦥꦲꦴꦠꦧ꧀ꦧꦴ ꦪꦺ ꦱꦁꦮꦫꦺꦤ ꦥꦲꦷꦤꦴ ꦲꦺꦴꦤ꧀ꦠꦶ.

‘‘ꦏꦠꦩꦺ ꦕ, ꦨꦶꦏ꧀ꦑꦮꦺ, ꦄꦴꦱꦮꦴ ꦥꦛꦶꦱꦺꦮꦤꦴ ꦥꦲꦴꦠꦧ꧀ꦧꦴ ꦪꦺ ꦥꦛꦶꦱꦺꦮꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦕꦷꦮꦫꦁ ꦥꦛꦶꦱꦺꦮꦠꦶ – ‘ꦪꦴꦮꦢꦺꦮ ꦱꦷꦠꦱ꧀ꦱ ꦥꦛꦶꦓꦴꦠꦴꦪ, ꦈꦟ꧀ꦲꦱ꧀ꦱ ꦥꦛꦶꦓꦴꦠꦴꦪ, ꦝꦁꦱꦩꦏꦱꦮꦴꦠꦴꦠꦥꦱꦫꦷꦱꦥꦱꦩ꧀ꦦꦱ꧀ꦱꦴꦤꦁ [ꦝꦁꦱ… ꦱꦶꦫꦶꦁꦱꦥꦱꦩ꧀ꦦꦱ꧀ꦱꦴꦤꦁ (ꦱꦷ. ꦱ꧀ꦪꦴ. ꦏꦁ. ꦥꦷ) ꦩ. ꦤꦶ. ꧑.꧒꧓] ꦥꦛꦶꦓꦴꦠꦴꦪ, ꦪꦴꦮꦢꦺꦮ ꦲꦶꦫꦶꦏꦺꦴꦥꦷꦤꦥꦛꦶꦕ꧀ꦖꦴꦢꦤꦠ꧀ꦡꦁ’. ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦥꦶꦟ꧀ꦝꦥꦴꦠꦁ ꦥꦛꦶꦱꦺꦮꦠꦶ – ‘ꦤꦺꦮ ꦢꦮꦴꦪ ꦤ ꦩꦢꦴꦪ ꦤ ꦩꦟ꧀ꦝꦤꦴꦪ ꦤ ꦮꦶꦨꦹꦱꦤꦴꦪ, ꦪꦴꦮꦢꦺꦮ ꦆꦩꦱ꧀ꦱ ꦏꦴꦪꦱ꧀ꦱ ꦜꦶꦠꦶꦪꦴ ꦪꦴꦥꦤꦴꦪ, ꦮꦶꦲꦶꦁꦱꦹꦥꦫꦠꦶꦪꦴ ꦧ꧀ꦫꦲ꧀ꦩꦕꦫꦶꦪꦴꦤꦸꦒ꧀ꦒꦲꦴꦪ, ꦆꦠꦶ ꦥꦸꦫꦴꦟꦚ꧀ꦕ ꦮꦺꦢꦤꦁ ꦥꦛꦶꦲꦔ꧀ꦑꦴꦩꦶ, ꦤꦮꦚ꧀ꦕ ꦮꦺꦢꦤꦁ ꦤ ꦈꦥ꧀ꦥꦴꦢꦺꦱ꧀ꦱꦴꦩꦶ, ꦪꦴꦠ꧀ꦫꦴ ꦕ ꦩꦺ ꦨꦮꦶꦱ꧀ꦱꦠꦶ ꦄꦤꦮꦗ꧀ꦗꦠꦴ ꦕ ꦦꦴꦱꦸꦮꦶꦲꦴꦫꦺꦴ ꦕ’ [ꦦꦴꦱꦸꦮꦶꦲꦴꦫꦺꦴ ꦕꦴꦠꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)]. ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦱꦺꦤꦴꦱꦤꦁ ꦥꦛꦶꦱꦺꦮꦠꦶ – ‘ꦪꦴꦮꦢꦺꦮ ꦱꦷꦠꦱ꧀ꦱ ꦥꦛꦶꦓꦴꦠꦴꦪ, ꦈꦟ꧀ꦲꦱ꧀ꦱ ꦥꦛꦶꦓꦴꦠꦴꦪ, ꦝꦁꦱꦩꦏꦱꦮꦴꦠꦴꦠꦥꦱꦫꦷꦱꦥꦱꦩ꧀ꦦꦱ꧀ꦱꦴꦤꦁ ꦥꦛꦶꦓꦴꦠꦴꦪ, ꦪꦴꦮꦢꦺꦮ ꦈꦠꦸꦥꦫꦶꦱ꧀ꦱꦪꦮꦶꦤꦺꦴꦢꦤꦥꦛꦶꦱꦭ꧀ꦭꦴꦤꦴꦫꦴꦩꦠ꧀ꦡꦁ’. ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦁ ꦥꦛꦶꦱꦺꦮꦠꦶ – ‘ꦪꦴꦮꦢꦺꦮ ꦈꦥ꧀ꦥꦤ꧀ꦤꦴꦤꦁ ꦮꦺꦪ꧀ꦪꦴꦧꦴꦣꦶꦏꦴꦤꦁ ꦮꦺꦢꦤꦴꦤꦁ ꦥꦛꦶꦓꦴꦠꦴꦪ, ꦄꦧ꧀ꦪꦴꦧꦗ꧀ꦙꦥꦫꦩꦠꦴꦪꦴ’ꦠꦶ. ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦄꦥ꧀ꦥꦛꦶꦱꦺꦮꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦥꦛꦶꦱꦺꦮꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦥꦛꦶꦱꦺꦮꦤꦴ ꦥꦲꦴꦠꦧ꧀ꦧꦴ ꦪꦺ ꦥꦛꦶꦱꦺꦮꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ.

‘‘ꦏꦠꦩꦺ ꦕ, ꦨꦶꦏ꧀ꦑꦮꦺ, ꦄꦴꦱꦮꦴ ꦄꦣꦶꦮꦴꦱꦤꦴ ꦥꦲꦴꦠꦧ꧀ꦧꦴ ꦪꦺ ꦄꦣꦶꦮꦴꦱꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦑꦩꦺꦴ ꦲꦺꦴꦠꦶ ꦱꦷꦠꦱ꧀ꦱ ꦈꦟ꧀ꦲꦱ꧀ꦱ, ꦗꦶꦓꦕ꧀ꦖꦴꦪ, ꦥꦶꦥꦴꦱꦴꦪ, ꦝꦁꦱꦩꦏꦱꦮꦴꦠꦴꦠꦥꦱꦫꦷꦱꦥꦱꦩ꧀ꦦꦱ꧀ꦱꦴꦤꦁ, ꦢꦸꦫꦸꦠ꧀ꦠꦴꦤꦁ ꦢꦸꦫꦴꦒꦠꦴꦤꦁ ꦮꦕꦤꦥꦡꦴꦤꦁ, ꦈꦥ꧀ꦥꦤ꧀ꦤꦴꦤꦁ ꦱꦴꦫꦷꦫꦶꦏꦴꦤꦁ ꦮꦺꦢꦤꦴꦤꦁ ꦢꦸꦏ꧀ꦑꦴꦤꦁ ꦠꦶꦧ꧀ꦧꦴꦤꦁ ꦑꦫꦴꦤꦁ ꦏꦛꦸꦏꦴꦤꦁ ꦄꦱꦴꦠꦴꦤꦁ ꦄꦩꦤꦴꦥꦴꦤꦁ ꦥꦴꦟꦲꦫꦴꦤꦁ ꦄꦣꦶꦮꦴꦱꦏꦗꦴꦠꦶꦏꦺꦴ ꦲꦺꦴꦠꦶ. ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦄꦤꦣꦶꦮꦴꦱꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦄꦣꦶꦮꦴꦱꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦄꦣꦶꦮꦴꦱꦤꦴ ꦥꦲꦴꦠꦧ꧀ꦧꦴ ꦪꦺ ꦄꦣꦶꦮꦴꦱꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ.

‘‘ꦏꦠꦩꦺ ꦕ, ꦨꦶꦏ꧀ꦑꦮꦺ, ꦄꦴꦱꦮꦴ ꦥꦫꦶꦮꦗ꧀ꦗꦤꦴ ꦥꦲꦴꦠꦧ꧀ꦧꦴ ꦪꦺ ꦥꦫꦶꦮꦗ꧀ꦗꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦕꦟ꧀ꦝꦁ ꦲꦠ꧀ꦡꦶꦁ ꦥꦫꦶꦮꦗ꧀ꦗꦺꦠꦶ, ꦕꦟ꧀ꦝꦁ ꦄꦱ꧀ꦱꦁ ꦥꦫꦶꦮꦗ꧀ꦗꦺꦠꦶ, ꦕꦟ꧀ꦝꦁ ꦒꦺꦴꦟꦁ ꦥꦫꦶꦮꦗ꧀ꦗꦺꦠꦶ, ꦕꦟ꧀ꦝꦁ ꦏꦸꦏ꧀ꦏꦸꦫꦁ ꦥꦫꦶꦮꦗ꧀ꦗꦺꦠꦶ, ꦄꦲꦶꦁ ꦑꦴꦟꦸꦁ ꦏꦟ꧀ꦛꦏꦛ꧀ꦜꦴꦤꦁ ꦱꦺꦴꦧ꧀ꦨꦁ ꦥꦥꦴꦠꦁ ꦕꦤ꧀ꦢꦤꦶꦏꦁ ꦎꦭ꦳ꦶꦒꦭ꧀ꦭꦁ, ꦪꦡꦴꦫꦹꦥꦺ ꦄꦤꦴꦱꦤꦺ ꦤꦶꦱꦶꦤ꧀ꦤꦁ, ꦪꦡꦴꦫꦹꦥꦺ ꦄꦒꦺꦴꦕꦫꦺ ꦕꦫꦤ꧀ꦠꦁ, ꦪꦡꦴꦫꦹꦥꦺ ꦥꦴꦥꦏꦺ ꦩꦶꦠ꧀ꦠꦺ ꦨꦗꦤ꧀ꦠꦁ ꦮꦶꦚ꧀ꦚꦹ ꦱꦧ꧀ꦫꦲ꧀ꦩꦕꦴꦫꦷ ꦥꦴꦥꦏꦺꦱꦸ ꦜꦴꦤꦺꦱꦸ ꦎꦏꦥ꧀ꦥꦺꦪ꧀ꦪꦸꦁ, ꦱꦺꦴ ꦠꦚ꧀ꦕ ꦄꦤꦴꦱꦤꦁ ꦠꦚ꧀ꦕ ꦄꦒꦺꦴꦕꦫꦁ ꦠꦺ ꦕ ꦥꦴꦥꦏꦺ ꦩꦶꦠ꧀ꦠꦺ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦥꦫꦶꦮꦗ꧀ꦗꦺꦠꦶ. ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦄꦥꦫꦶꦮꦗ꧀ꦗꦪꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦥꦫꦶꦮꦗ꧀ꦗꦪꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦥꦫꦶꦮꦗ꧀ꦗꦤꦴ ꦥꦲꦴꦠꦧ꧀ꦧꦴ ꦪꦺ ꦥꦫꦶꦮꦗ꧀ꦗꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ.

‘‘ꦏꦠꦩꦺ ꦕ, ꦨꦶꦏ꧀ꦑꦮꦺ, ꦄꦴꦱꦮꦴ ꦮꦶꦤꦺꦴꦢꦤꦴ ꦥꦲꦴꦠꦧ꧀ꦧꦴ ꦪꦺ ꦮꦶꦤꦺꦴꦢꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦈꦥ꧀ꦥꦤ꧀ꦤꦁ ꦏꦴꦩꦮꦶꦠꦏ꧀ꦏꦁ ꦤꦴꦣꦶꦮꦴꦱꦺꦠꦶ ꦥꦗꦲꦠꦶ ꦮꦶꦤꦺꦴꦢꦺꦠꦶ ꦧ꧀ꦪꦤ꧀ꦠꦷꦏꦫꦺꦴꦠꦶ ꦄꦤꦨꦴꦮꦁ ꦒꦩꦺꦠꦶ, ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦈꦥ꧀ꦥꦤ꧀ꦤꦁ ꦧ꧀ꦪꦴꦥꦴꦢꦮꦶꦠꦏ꧀ꦏꦁ…ꦥꦺ… ꦈꦥ꧀ꦥꦤ꧀ꦤꦁ ꦮꦶꦲꦶꦁꦱꦴꦮꦶꦠꦏ꧀ꦏꦁ… ꦈꦥ꧀ꦥꦤ꧀ꦤꦸꦥ꧀ꦥꦤ꧀ꦤꦺ ꦥꦴꦥꦏꦺ ꦄꦏꦸꦱꦭꦺ ꦣꦩ꧀ꦩꦺ ꦤꦴꦣꦶꦮꦴꦱꦺꦠꦶ ꦥꦗꦲꦠꦶ ꦮꦶꦤꦺꦴꦢꦺꦠꦶ ꦧ꧀ꦪꦤ꧀ꦠꦷꦏꦫꦺꦴꦠꦶ ꦄꦤꦨꦴꦮꦁ ꦒꦩꦺꦠꦶ. ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦄꦮꦶꦤꦺꦴꦢꦪꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦮꦶꦤꦺꦴꦢꦪꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦮꦶꦤꦺꦴꦢꦤꦴ ꦥꦲꦴꦠꦧ꧀ꦧꦴ ꦪꦺ ꦮꦶꦤꦺꦴꦢꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ.

‘‘ꦏꦠꦩꦺ ꦕ, ꦨꦶꦏ꧀ꦑꦮꦺ, ꦄꦴꦱꦮꦴ ꦨꦴꦮꦤꦴ ꦥꦲꦴꦠꦧ꧀ꦧꦴ ꦪꦺ ꦨꦴꦮꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ ꦮꦶꦮꦺꦏꦤꦶꦱ꧀ꦱꦶꦠꦁ ꦮꦶꦫꦴꦒꦤꦶꦱ꧀ꦱꦶꦠꦁ ꦤꦶꦫꦺꦴꦣꦤꦶꦱ꧀ꦱꦶꦠꦁ ꦮꦺꦴꦱ꧀ꦱꦒ꧀ꦒꦥꦫꦶꦟꦴꦩꦶꦁ, ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ…ꦥꦺ… ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ ꦮꦶꦮꦺꦏꦤꦶꦱ꧀ꦱꦶꦠꦁ ꦮꦶꦫꦴꦒꦤꦶꦱ꧀ꦱꦶꦠꦁ ꦤꦶꦫꦺꦴꦣꦤꦶꦱ꧀ꦱꦶꦠꦁ ꦮꦺꦴꦱ꧀ꦱꦒ꧀ꦒꦥꦫꦶꦟꦴꦩꦶꦁ. ꦪꦁ ꦲꦶꦱ꧀ꦱ, ꦨꦶꦏ꧀ꦑꦮꦺ, ꦄꦨꦴꦮꦪꦠꦺꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ, ꦨꦴꦮꦪꦠꦺꦴ ꦌꦮꦁꦱ ꦠꦺ ꦄꦴꦱꦮꦴ ꦮꦶꦓꦴꦠꦥꦫꦶꦭ꦳ꦴꦲꦴ ꦤ ꦲꦺꦴꦤ꧀ꦠꦶ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦄꦴꦱꦮꦴ ꦨꦴꦮꦤꦴ ꦥꦲꦴꦠꦧ꧀ꦧꦴ ꦪꦺ ꦨꦴꦮꦤꦴꦪ ꦥꦲꦷꦤꦴ ꦲꦺꦴꦤ꧀ꦠꦶ.

‘‘ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦖꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦨꦶꦏ꧀ꦑꦸ ꦄꦴꦲꦸꦤꦺꦪ꧀ꦪꦺꦴ ꦲꦺꦴꦠꦶ ꦥꦴꦲꦸꦤꦺꦪ꧀ꦪꦺꦴ ꦢꦏ꧀ꦑꦶꦟꦺꦪ꧀ꦪꦺꦴ ꦄꦚ꧀ꦗꦭꦶꦏꦫꦟꦷꦪꦺꦴ ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱꦴ’’ꦠꦶ. ꦕꦠꦸꦠ꧀ꦡꦁ.