(꧒꧓) ꧓. ꦢꦷꦓꦕꦴꦫꦶꦏꦮꦒ꧀ꦒꦺꦴ

꧑. ꦥꦜꦩꦢꦷꦓꦕꦴꦫꦶꦏꦱꦸꦠ꧀ꦠꦁ

꧒꧒꧑. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦢꦷꦓꦕꦴꦫꦶꦏꦁ ꦄꦤꦮꦠ꧀ꦡꦕꦴꦫꦶꦏꦁ ꦄꦤꦸꦪꦸꦠ꧀ꦠꦱ꧀ꦱ ꦮꦶꦲꦫꦠꦺꦴ. ꦏꦠꦩꦺ ꦥꦚ꧀ꦕ? ꦄꦱ꧀ꦱꦸꦠꦁ ꦤ ꦱꦸꦟꦴꦠꦶ, ꦱꦸꦠꦁ ꦤ ꦥꦫꦶꦪꦺꦴꦢꦴꦥꦺꦠꦶ, ꦱꦸꦠꦺꦤꦺꦏꦕ꧀ꦕꦺꦤ ꦄꦮꦶꦱꦴꦫꦢꦺꦴ ꦲꦺꦴꦠꦶ, ꦒꦴꦭ꦳꧀ꦲꦁ [ꦧꦴꦭ꦳꧀ꦲꦁ (ꦱ꧀ꦪꦴ.)] ꦫꦺꦴꦒꦴꦠꦔ꧀ꦏꦁ ꦦꦸꦱꦠꦶ, ꦤ ꦕ ꦩꦶꦠ꧀ꦠꦮꦴ ꦲꦺꦴꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦢꦷꦓꦕꦴꦫꦶꦏꦁ ꦄꦤꦮꦠ꧀ꦡꦕꦴꦫꦶꦏꦁ ꦄꦤꦸꦪꦸꦠ꧀ꦠꦱ꧀ꦱ ꦮꦶꦲꦫꦠꦺꦴ.

‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦤꦶꦱꦁꦱꦴ ꦱꦩꦮꦠ꧀ꦡꦕꦴꦫꦺ. ꦏꦠꦩꦺ ꦥꦚ꧀ꦕ? ꦄꦱ꧀ꦱꦸꦠꦁ ꦱꦸꦟꦴꦠꦶ, ꦱꦸꦠꦁ ꦥꦫꦶꦪꦺꦴꦢꦴꦥꦺꦠꦶ, ꦱꦸꦠꦺꦤꦺꦏꦕ꧀ꦕꦺꦤ ꦮꦶꦱꦴꦫꦢꦺꦴ ꦲꦺꦴꦠꦶ, ꦤ ꦒꦴꦭ꦳꧀ꦲꦁ ꦫꦺꦴꦒꦴꦠꦔ꧀ꦏꦁ ꦦꦸꦱꦠꦶ, ꦩꦶꦠ꧀ꦠꦮꦴ ꦕ ꦲꦺꦴꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦤꦶꦱꦁꦱꦴ ꦱꦩꦮꦠ꧀ꦡꦕꦴꦫꦺ’’ꦠꦶ. ꦥꦜꦩꦁ.

꧒. ꦢꦸꦠꦶꦪꦢꦷꦓꦕꦴꦫꦶꦏꦱꦸꦠ꧀ꦠꦁ

꧒꧒꧒. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦢꦷꦓꦕꦴꦫꦶꦏꦁ ꦄꦤꦮꦠ꧀ꦡꦕꦴꦫꦶꦏꦁ ꦄꦤꦸꦪꦸꦠ꧀ꦠꦱ꧀ꦱ ꦮꦶꦲꦫꦠꦺꦴ. ꦏꦠꦩꦺ ꦥꦚ꧀ꦕ? ꦄꦤꦣꦶꦒꦠꦁ ꦤꦴꦣꦶꦒꦕ꧀ꦖꦠꦶ, ꦄꦣꦶꦒꦠꦴ ꦥꦫꦶꦲꦴꦪꦠꦶ, ꦄꦣꦶꦒꦠꦺꦤꦺꦏꦕ꧀ꦕꦺꦤ ꦄꦮꦶꦱꦴꦫꦢꦺꦴ ꦲꦺꦴꦠꦶ, ꦒꦴꦭ꦳꧀ꦲꦁ ꦫꦺꦴꦒꦴꦠꦔ꧀ꦏꦁ ꦦꦸꦱꦠꦶ, ꦤ ꦕ ꦩꦶꦠ꧀ꦠꦮꦴ ꦲꦺꦴꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦢꦷꦓꦕꦴꦫꦶꦏꦁ ꦄꦤꦮꦠ꧀ꦡꦕꦴꦫꦶꦏꦁ ꦄꦤꦸꦪꦸꦠ꧀ꦠꦱ꧀ꦱ ꦮꦶꦲꦫꦠꦺꦴ.

‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦤꦶꦱꦁꦱꦴ ꦱꦩꦮꦠ꧀ꦡꦕꦴꦫꦺ. ꦏꦠꦩꦺ ꦥꦚ꧀ꦕ? ꦄꦤꦣꦶꦒꦠꦁ ꦄꦣꦶꦒꦕ꧀ꦖꦠꦶ, ꦄꦣꦶꦒꦠꦴ ꦤ ꦥꦫꦶꦲꦴꦪꦠꦶ, ꦄꦣꦶꦒꦠꦺꦤꦺꦏꦕ꧀ꦕꦺꦤ ꦮꦶꦱꦴꦫꦢꦺꦴ ꦲꦺꦴꦠꦶ, ꦤ ꦒꦴꦭ꦳꧀ꦲꦁ ꦫꦺꦴꦒꦴꦠꦔ꧀ꦏꦁ ꦦꦸꦱꦠꦶ, ꦩꦶꦠ꧀ꦠꦮꦴ ꦕ ꦲꦺꦴꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦤꦶꦱꦁꦱꦴ ꦱꦩꦮꦠ꧀ꦡꦕꦴꦫꦺ’’ꦠꦶ. ꦢꦸꦠꦶꦪꦁ.

꧓. ꦄꦠꦶꦤꦶꦮꦴꦱꦱꦸꦠ꧀ꦠꦁ

꧒꧒꧓. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦄꦠꦶꦤꦶꦮꦴꦱꦺ. ꦏꦠꦩꦺ ꦥꦚ꧀ꦕ? ꦧꦲꦸꦨꦟ꧀ꦝꦺꦴ ꦲꦺꦴꦠꦶ ꦧꦲꦸꦨꦟ꧀ꦝꦱꦤ꧀ꦤꦶꦕꦪꦺꦴ, ꦧꦲꦸꦨꦺꦱꦗ꧀ꦗꦺꦴ ꦲꦺꦴꦠꦶ ꦧꦲꦸꦨꦺꦱꦗ꧀ꦗꦱꦤ꧀ꦤꦶꦕꦪꦺꦴ, ꦧꦲꦸꦏꦶꦕ꧀ꦕꦺꦴ ꦲꦺꦴꦠꦶ ꦧꦲꦸꦏꦫꦟꦷꦪꦺꦴ ꦧ꧀ꦪꦠ꧀ꦠꦺꦴ ꦏꦶꦁꦏꦫꦟꦷꦪꦺꦱꦸ, ꦱꦁꦱꦛ꧀ꦜꦺꦴ ꦮꦶꦲꦫꦠꦶ ꦒꦲꦛ꧀ꦜꦥꦧ꧀ꦧꦗꦶꦠꦺꦲꦶ ꦄꦤꦤꦸꦭꦺꦴꦩꦶꦏꦺꦤ ꦒꦶꦲꦶꦱꦁꦱꦒ꧀ꦒꦺꦤ, ꦠꦩ꧀ꦲꦴ ꦕ ꦄꦴꦮꦴꦱꦴ ꦥꦏ꧀ꦏꦩꦤ꧀ꦠꦺꦴ ꦱꦴꦥꦺꦏ꧀ꦑꦺꦴ ꦥꦏ꧀ꦏꦩꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦄꦠꦶꦤꦶꦮꦴꦱꦺ.

‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦤꦶꦱꦁꦱꦴ ꦱꦩꦮꦠ꧀ꦡꦮꦴꦱꦺ. ꦏꦠꦩꦺ ꦥꦚ꧀ꦕ? ꦤ ꦧꦲꦸꦨꦟ꧀ꦝꦺꦴ ꦲꦺꦴꦠꦶ ꦤ ꦧꦲꦸꦨꦟ꧀ꦝꦱꦤ꧀ꦤꦶꦕꦪꦺꦴ, ꦤ ꦧꦲꦸꦨꦺꦱꦗ꧀ꦗꦺꦴ ꦲꦺꦴꦠꦶ ꦤ ꦧꦲꦸꦨꦺꦱꦗ꧀ꦗꦱꦤ꧀ꦤꦶꦕꦪꦺꦴ, ꦤ ꦧꦲꦸꦏꦶꦕ꧀ꦕꦺꦴ ꦲꦺꦴꦠꦶ ꦤ ꦧꦲꦸꦏꦫꦟꦷꦪꦺꦴ ꦤ ꦧ꧀ꦪꦠ꧀ꦠꦺꦴ ꦏꦶꦁꦏꦫꦟꦷꦪꦺꦱꦸ, ꦄꦱꦁꦱꦛ꧀ꦜꦺꦴ ꦮꦶꦲꦫꦠꦶ ꦒꦲꦛ꧀ꦜꦥꦧ꧀ꦧꦗꦶꦠꦺꦲꦶ ꦄꦤꦤꦸꦭꦺꦴꦩꦶꦏꦺꦤ ꦒꦶꦲꦶꦱꦁꦱꦒ꧀ꦒꦺꦤ, ꦠꦩ꧀ꦲꦴ ꦕ ꦄꦴꦮꦴꦱꦴ ꦥꦏ꧀ꦏꦩꦤ꧀ꦠꦺꦴ ꦄꦤꦥꦺꦏ꧀ꦑꦺꦴ ꦥꦏ꧀ꦏꦩꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦤꦶꦱꦁꦱꦴ ꦱꦩꦮꦠ꧀ꦡꦮꦴꦱꦺ’’ꦠꦶ. ꦠꦠꦶꦪꦁ.

꧔. ꦩꦕ꧀ꦖꦫꦷꦱꦸꦠ꧀ꦠꦁ

꧒꧒꧔. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦄꦠꦶꦤꦶꦮꦴꦱꦺ. ꦏꦠꦩꦺ ꦥꦚ꧀ꦕ? ꦄꦴꦮꦴꦱꦩꦕ꧀ꦖꦫꦷ ꦲꦺꦴꦠꦶ, ꦏꦸꦭꦩꦕ꧀ꦖꦫꦷ ꦲꦺꦴꦠꦶ, ꦭꦴꦨꦩꦕ꧀ꦖꦫꦷ ꦲꦺꦴꦠꦶ, ꦮꦟ꧀ꦟꦩꦕ꧀ꦖꦫꦷ ꦲꦺꦴꦠꦶ, ꦣꦩ꧀ꦩꦩꦕ꧀ꦖꦫꦷ ꦲꦺꦴꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦄꦠꦶꦤꦶꦮꦴꦱꦺ.

‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦤꦶꦱꦁꦱꦴ ꦱꦩꦮꦠ꧀ꦡꦮꦴꦱꦺ. ꦏꦠꦩꦺ ꦥꦚ꧀ꦕ? ꦤ ꦄꦴꦮꦴꦱꦩꦕ꧀ꦖꦫꦷ ꦲꦺꦴꦠꦶ, ꦤ ꦏꦸꦭꦩꦕ꧀ꦖꦫꦷ ꦲꦺꦴꦠꦶ, ꦤ ꦭꦴꦨꦩꦕ꧀ꦖꦫꦷ ꦲꦺꦴꦠꦶ, ꦤ ꦮꦟ꧀ꦟꦩꦕ꧀ꦖꦫꦷ ꦲꦺꦴꦠꦶ, ꦤ ꦣꦩ꧀ꦩꦩꦕ꧀ꦖꦫꦷ ꦲꦺꦴꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦤꦶꦱꦁꦱꦴ ꦱꦩꦮꦠ꧀ꦡꦮꦴꦱꦺ’’ꦠꦶ. ꦕꦠꦸꦠ꧀ꦡꦁ.

꧕. ꦥꦜꦩꦏꦸꦭꦹꦥꦏꦱꦸꦠ꧀ꦠꦁ

꧒꧒꧕. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦏꦸꦭꦹꦥꦏꦺ [ꦏꦸꦭꦸꦥꦏꦺ (ꦱ꧀ꦪꦴ. ꦥꦷ.), ꦏꦸꦭꦹꦥꦒꦺ (ꦱꦷ.)]. ꦏꦠꦩꦺ ꦥꦚ꧀ꦕ? ꦄꦤꦴꦩꦤ꧀ꦠꦕꦴꦫꦺ ꦄꦴꦥꦗ꧀ꦗꦠꦶ, ꦫꦲꦺꦴ ꦤꦶꦱꦗ꧀ꦗꦴꦪ ꦄꦴꦥꦗ꧀ꦗꦠꦶ, ꦥꦛꦶꦕ꧀ꦖꦤ꧀ꦤꦺ ꦄꦴꦱꦤꦺ ꦄꦴꦥꦗ꧀ꦗꦠꦶ, ꦩꦴꦠꦸꦒꦴꦩꦱ꧀ꦱ ꦈꦠ꧀ꦠꦫꦶ ꦖꦥ꧀ꦥꦚ꧀ꦕꦮꦴꦕꦴꦲꦶ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦄꦴꦥꦗ꧀ꦗꦠꦶ, ꦏꦴꦩꦱꦔ꧀ꦏꦥ꧀ꦥꦧꦲꦸꦭꦺꦴ ꦮꦶꦲꦫꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦏꦸꦭꦹꦥꦏꦺ’’ꦠꦶ. ꦥꦚ꧀ꦕꦩꦁ.

꧖. ꦢꦸꦠꦶꦪꦏꦸꦭꦹꦥꦏꦱꦸꦠ꧀ꦠꦁ

꧒꧒꧖. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦏꦸꦭꦹꦥꦏꦱ꧀ꦱ ꦨꦶꦏ꧀ꦑꦸꦤꦺꦴ ꦄꦠꦶꦮꦺꦭꦁ ꦏꦸꦭꦺꦱꦸ ꦱꦁꦱꦛ꧀ꦜꦱ꧀ꦱ ꦮꦶꦲꦫꦠꦺꦴ. ꦏꦠꦩꦺ ꦥꦚ꧀ꦕ? ꦩꦴꦠꦸꦒꦴꦩꦱ꧀ꦱ ꦄꦨꦶꦟ꧀ꦲꦢꦱ꧀ꦱꦤꦁ, ꦢꦱ꧀ꦱꦤꦺ ꦱꦠꦶ ꦱꦁꦱꦒ꧀ꦒꦺꦴ, ꦱꦁꦱꦒ꧀ꦒꦺ ꦱꦠꦶ ꦮꦶꦱ꧀ꦱꦴꦱꦺꦴ, ꦮꦶꦱ꧀ꦱꦴꦱꦺ ꦱꦠꦶ ꦎꦠꦴꦫꦺꦴ, ꦎꦠꦶꦟ꧀ꦟꦕꦶꦠ꧀ꦠꦱ꧀ꦱꦺꦠꦁ ꦥꦴꦛꦶꦏꦔ꧀ꦑꦁ – ‘ꦄꦤꦨꦶꦫꦠꦺꦴ ꦮꦴ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦱ꧀ꦱꦠꦶ ꦄꦚ꧀ꦚꦠꦫꦁ ꦮꦴ ꦱꦁꦏꦶꦭꦶꦛ꧀ꦜꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦱ꧀ꦱꦠꦶ ꦱꦶꦏ꧀ꦑꦁ ꦮꦴ ꦥꦕ꧀ꦕꦏ꧀ꦑꦴꦪ ꦲꦷꦤꦴꦪꦴꦮꦠ꧀ꦠꦶꦱ꧀ꦱꦠꦶ’. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦏꦸꦭꦹꦥꦏꦱ꧀ꦱ ꦨꦶꦏ꧀ꦑꦸꦤꦺꦴ ꦄꦠꦶꦮꦺꦭꦁ ꦏꦸꦭꦺꦱꦸ ꦱꦁꦱꦛ꧀ꦜꦱ꧀ꦱ ꦮꦶꦲꦫꦠꦺꦴ’’ꦠꦶ. ꦖꦛ꧀ꦜꦁ.

꧗. ꦨꦺꦴꦒꦱꦸꦠ꧀ꦠꦁ

꧒꧒꧗. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦨꦺꦴꦒꦺꦱꦸ. ꦏꦠꦩꦺ ꦥꦚ꧀ꦕ? ꦄꦒ꧀ꦒꦶꦱꦴꦣꦴꦫꦟꦴ ꦨꦺꦴꦒꦴ, ꦈꦢꦏꦱꦴꦣꦴꦫꦟꦴ ꦨꦺꦴꦒꦴ, ꦫꦴꦗꦱꦴꦣꦴꦫꦟꦴ ꦨꦺꦴꦒꦴ, ꦕꦺꦴꦫꦱꦴꦣꦴꦫꦟꦴ ꦨꦺꦴꦒꦴ, ꦄꦥ꧀ꦥꦶꦪꦺꦲꦶ ꦢꦴꦪꦴꦢꦺꦲꦶ ꦱꦴꦣꦴꦫꦟꦴ ꦨꦺꦴꦒꦴ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦨꦺꦴꦒꦺꦱꦸ.

‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦤꦶꦱꦁꦱꦴ ꦨꦺꦴꦒꦺꦱꦸ. ꦏꦠꦩꦺ ꦥꦚ꧀ꦕ? ꦨꦺꦴꦒꦺ ꦤꦶꦱ꧀ꦱꦴꦪ ꦄꦠ꧀ꦠꦴꦤꦁ ꦱꦸꦑꦺꦠꦶ ꦥꦷꦟꦺꦠꦶ ꦱꦩ꧀ꦩꦴ ꦱꦸꦑꦁ ꦥꦫꦶꦲꦫꦠꦶ, ꦩꦴꦠꦴꦥꦶꦠꦫꦺꦴ ꦱꦸꦑꦺꦠꦶ ꦥꦷꦟꦺꦠꦶ ꦱꦩ꧀ꦩꦴ ꦱꦸꦑꦁ ꦥꦫꦶꦲꦫꦠꦶ, ꦥꦸꦠ꧀ꦠꦢꦴꦫꦢꦴꦱꦏꦩ꧀ꦩꦏꦫꦥꦺꦴꦫꦶꦱꦺ ꦱꦸꦑꦺꦠꦶ ꦥꦷꦟꦺꦠꦶ ꦱꦩ꧀ꦩꦴ ꦱꦸꦑꦁ ꦥꦫꦶꦲꦫꦠꦶ, ꦩꦶꦠ꧀ꦠꦴꦩꦕ꧀ꦕꦺ ꦱꦸꦑꦺꦠꦶ ꦥꦷꦟꦺꦠꦶ ꦱꦩ꧀ꦩꦴ ꦱꦸꦑꦁ ꦥꦫꦶꦲꦫꦠꦶ, ꦱꦩꦟꦧ꧀ꦫꦴꦲ꧀ꦩꦟꦺꦱꦸ ꦈꦢ꧀ꦣꦒ꧀ꦒꦶꦏꦁ ꦢꦏ꧀ꦑꦶꦟꦁ ꦥꦠꦶꦛ꧀ꦜꦴꦥꦺꦠꦶ ꦱꦺꦴꦮꦒ꧀ꦒꦶꦏꦁ ꦱꦸꦑꦮꦶꦥꦴꦏꦁ ꦱꦒ꧀ꦒꦱꦁꦮꦠ꧀ꦠꦤꦶꦏꦁ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦤꦶꦱꦁꦱꦴ ꦨꦺꦴꦒꦺꦱꦹ’’ꦠꦶ. ꦱꦠ꧀ꦠꦩꦁ.

꧘. ꦈꦱ꧀ꦱꦹꦫꦨꦠ꧀ꦠꦱꦸꦠ꧀ꦠꦁ

꧒꧒꧘. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦈꦱ꧀ꦱꦹꦫꦨꦠ꧀ꦠꦺ ꦏꦸꦭꦺ. ꦏꦠꦩꦺ ꦥꦚ꧀ꦕ? ꦪꦺ ꦠꦺ ꦄꦠꦶꦡꦷ ꦥꦴꦲꦸꦤꦴ, ꦠꦺ ꦤ ꦏꦴꦭꦺꦤ ꦥꦛꦶꦥꦹꦗꦺꦤ꧀ꦠꦶ; ꦪꦴ ꦠꦴ ꦧꦭꦶꦥꦛꦶꦒ꧀ꦒꦴꦲꦶꦏꦴ ꦢꦺꦮꦠꦴ, ꦠꦴ ꦤ ꦏꦴꦭꦺꦤ ꦥꦛꦶꦥꦹꦗꦺꦤ꧀ꦠꦶ; ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦏꦨꦠ꧀ꦠꦶꦏꦴ ꦫꦠ꧀ꦠꦹꦥꦫꦠꦴ ꦮꦶꦫꦠꦴ ꦮꦶꦏꦴꦭꦨꦺꦴꦗꦤꦴ, ꦠꦺ ꦤ ꦏꦴꦭꦺꦤ ꦥꦛꦶꦥꦹꦗꦺꦤ꧀ꦠꦶ; ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦴ ꦮꦶꦩꦸꦑꦴ ꦏꦩ꧀ꦩꦁ ꦏꦫꦺꦴꦤ꧀ꦠꦶ; ꦠꦴꦮꦠꦏꦁꦪꦺꦮ ꦄꦱꦩꦪꦺꦤ ꦨꦸꦠ꧀ꦠꦁ ꦄꦤꦺꦴꦗꦮꦤ꧀ꦠꦁ ꦲꦺꦴꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦈꦱ꧀ꦱꦹꦫꦨꦠ꧀ꦠꦺ ꦏꦸꦭꦺ.

‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦤꦶꦱꦁꦱꦴ ꦱꦩꦪꦨꦠ꧀ꦠꦺ ꦏꦸꦭꦺ. ꦏꦠꦩꦺ ꦥꦚ꧀ꦕ? ꦪꦺ ꦠꦺ ꦄꦠꦶꦡꦷ ꦥꦴꦲꦸꦤꦴ, ꦠꦺ ꦏꦴꦭꦺꦤ ꦥꦛꦶꦥꦹꦗꦺꦤ꧀ꦠꦶ; ꦪꦴ ꦠꦴ ꦧꦭꦶꦥꦛꦶꦒ꧀ꦒꦴꦲꦶꦏꦴ ꦢꦺꦮꦠꦴ, ꦠꦴ ꦏꦴꦭꦺꦤ ꦥꦛꦶꦥꦹꦗꦺꦤ꧀ꦠꦶ; ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦏꦨꦠ꧀ꦠꦶꦏꦴ ꦫꦠ꧀ꦠꦹꦥꦫꦠꦴ ꦮꦶꦫꦠꦴ ꦮꦶꦏꦴꦭꦨꦺꦴꦗꦤꦴ, ꦠꦺ ꦏꦴꦭꦺꦤ ꦥꦛꦶꦥꦹꦗꦺꦤ꧀ꦠꦶ; ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦴ ꦄꦮꦶꦩꦸꦑꦴ ꦏꦩ꧀ꦩꦁ ꦏꦫꦺꦴꦤ꧀ꦠꦶ; ꦠꦴꦮꦠꦏꦁꦪꦺꦮ ꦱꦩꦪꦺꦤ ꦨꦸꦠ꧀ꦠꦁ ꦎꦗꦮꦤ꧀ꦠꦁ ꦲꦺꦴꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦤꦶꦱꦁꦱꦴ ꦱꦩꦪꦨꦠ꧀ꦠꦺ ꦏꦸꦭꦺ’’ꦠꦶ. ꦄꦛ꧀ꦜꦩꦁ.

꧙. ꦥꦜꦩꦏꦟ꧀ꦲꦱꦥ꧀ꦥꦱꦸꦠ꧀ꦠꦁ

꧒꧒꧙. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦏꦟ꧀ꦲꦱꦥ꧀ꦥꦺ. ꦏꦠꦩꦺ ꦥꦚ꧀ꦕ? ꦄꦱꦸꦕꦶ, ꦢꦸꦒ꧀ꦒꦤ꧀ꦣꦺꦴ, ꦱꦨꦷꦫꦸ, ꦱꦥ꧀ꦥꦛꦶꦨꦪꦺꦴ, ꦩꦶꦠ꧀ꦠꦢꦸꦧ꧀ꦨꦷ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦏꦟ꧀ꦲꦱꦥ꧀ꦥꦺ. ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦶꦩꦺ ꦄꦴꦢꦷꦤꦮꦴ ꦩꦴꦠꦸꦒꦴꦩꦺ. ꦏꦠꦩꦺ ꦥꦚ꧀ꦕ? ꦄꦱꦸꦕꦶ, ꦢꦸꦒ꧀ꦒꦤ꧀ꦣꦺꦴ, ꦱꦨꦷꦫꦸ, ꦱꦥ꧀ꦥꦛꦶꦨꦪꦺꦴ, ꦩꦶꦠ꧀ꦠꦢꦸꦧ꧀ꦨꦷ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦩꦴꦠꦸꦒꦴꦩꦺ’’ꦠꦶ. ꦤꦮꦩꦁ.

꧑꧐. ꦢꦸꦠꦶꦪꦏꦟ꧀ꦲꦱꦥ꧀ꦥꦱꦸꦠ꧀ꦠꦁ

꧒꧓꧐. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦢꦷꦤꦮꦴ ꦏꦟ꧀ꦲꦱꦥ꧀ꦥꦺ. ꦏꦠꦩꦺ ꦥꦚ꧀ꦕ? ꦏꦺꦴꦣꦤꦺꦴ, ꦈꦥꦤꦴꦲꦷ, ꦓꦺꦴꦫꦮꦶꦱꦺꦴ, ꦢꦸꦗ꧀ꦗꦶꦮ꧀ꦲꦺꦴ, ꦩꦶꦠ꧀ꦠꦢꦸꦧ꧀ꦨꦷ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦏꦟ꧀ꦲꦱꦥ꧀ꦥꦺ.

‘‘ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦶꦩꦺ ꦄꦴꦢꦷꦤꦮꦴ ꦩꦴꦠꦸꦒꦴꦩꦺ. ꦏꦠꦩꦺ ꦥꦚ꧀ꦕ? ꦏꦺꦴꦣꦤꦺꦴ, ꦈꦥꦤꦴꦲꦷ, ꦓꦺꦴꦫꦮꦶꦱꦺꦴ, ꦢꦸꦗ꧀ꦗꦶꦮ꧀ꦲꦺꦴ, ꦩꦶꦠ꧀ꦠꦢꦸꦧ꧀ꦨꦷ. ꦠꦠ꧀ꦫꦶꦢꦁ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦱ꧀ꦱ ꦓꦺꦴꦫꦮꦶꦱꦠꦴ – ꦪꦺꦨꦸꦪ꧀ꦪꦺꦤ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦠꦶꦧ꧀ꦧꦫꦴꦒꦺꦴ. ꦠꦠ꧀ꦫꦶꦢꦁ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦱ꧀ꦱ ꦢꦸꦗ꧀ꦗꦶꦮ꧀ꦲꦠꦴ – ꦪꦺꦨꦸꦪ꧀ꦪꦺꦤ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦥꦶꦱꦸꦟꦮꦴꦕꦺꦴ. ꦠꦠ꧀ꦫꦶꦢꦁ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦱ꧀ꦱ ꦩꦶꦠ꧀ꦠꦢꦸꦧ꧀ꦨꦶꦠꦴ – ꦪꦺꦨꦸꦪ꧀ꦪꦺꦤ, ꦨꦶꦏ꧀ꦑꦮꦺ, ꦩꦴꦠꦸꦒꦴꦩꦺꦴ ꦄꦠꦶꦕꦴꦫꦶꦤꦷ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦢꦷꦤꦮꦴ ꦩꦴꦠꦸꦒꦴꦩꦺ’’ꦠꦶ. ꦢꦱꦩꦁ.

ꦢꦷꦓꦕꦴꦫꦶꦏꦮꦒ꧀ꦒꦺꦴ ꦠꦠꦶꦪꦺꦴ.