꧗. ꦕꦺꦴꦢꦤꦴꦱꦸꦠ꧀ꦠꦁ

꧑꧖꧗. ꦠꦠ꧀ꦫ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦕꦺꦴꦢꦏꦺꦤ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦴ ꦥꦫꦁ ꦕꦺꦴꦢꦺꦠꦸꦏꦴꦩꦺꦤ ꦥꦚ꧀ꦕ ꦣꦩ꧀ꦩꦺ ꦄꦗ꧀ꦙꦠ꧀ꦠꦁ ꦈꦥꦛ꧀ꦜꦴꦥꦺꦠ꧀ꦮꦴ ꦥꦫꦺꦴ ꦕꦺꦴꦢꦺꦠꦧ꧀ꦧꦺꦴ’’.

‘‘ꦏꦠꦩꦺ ꦥꦚ꧀ꦕ? ꦏꦴꦭꦺꦤ ꦮꦏ꧀ꦑꦴꦩꦶ, ꦤꦺꦴ ꦄꦏꦴꦭꦺꦤ; ꦨꦹꦠꦺꦤ ꦮꦏ꧀ꦑꦴꦩꦶ, ꦤꦺꦴ ꦄꦨꦹꦠꦺꦤ; ꦱꦟ꧀ꦲꦺꦤ ꦮꦏ꧀ꦑꦴꦩꦶ, ꦤꦺꦴ ꦦꦫꦸꦱꦺꦤ; ꦄꦠ꧀ꦡꦱꦁꦲꦶꦠꦺꦤ ꦮꦏ꧀ꦑꦴꦩꦶ, ꦤꦺꦴ ꦄꦤꦠ꧀ꦡꦱꦁꦲꦶꦠꦺꦤ; ꦩꦺꦠ꧀ꦠꦕꦶꦠ꧀ꦠꦺꦴ [ꦩꦺꦠ꧀ꦠꦕꦶꦠ꧀ꦠꦺꦤ (ꦱꦷ. ꦥꦷ. ꦏ.) ꦕꦹꦭ꦳ꦮ. ꧔꧐꧐ ꦥꦱ꧀ꦱꦶꦠꦧ꧀ꦧꦁ] ꦮꦏ꧀ꦑꦴꦩꦶ, ꦤꦺꦴ ꦢꦺꦴꦱꦤ꧀ꦠꦫꦺꦴ [ꦢꦺꦴꦱꦤ꧀ꦠꦫꦺꦤ (ꦱꦷ. ꦥꦷ. ꦏ.)]. ꦕꦺꦴꦢꦏꦺꦤ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦴ ꦥꦫꦁ ꦕꦺꦴꦢꦺꦠꦸꦏꦴꦩꦺꦤ ꦆꦩꦺ ꦥꦚ꧀ꦕ ꦣꦩ꧀ꦩꦺ ꦄꦗ꧀ꦙꦠ꧀ꦠꦁ ꦈꦥꦛ꧀ꦜꦴꦥꦺꦠ꧀ꦮꦴ ꦥꦫꦺꦴ ꦕꦺꦴꦢꦺꦠꦧ꧀ꦧꦺꦴ.

‘‘ꦆꦣꦴꦲꦁ, ꦄꦴꦮꦸꦱꦺꦴ, ꦌꦏꦕ꧀ꦕꦁ ꦥꦸꦒ꧀ꦒꦭꦁ ꦥꦱ꧀ꦱꦴꦩꦶ ꦄꦏꦴꦭꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦏꦴꦭꦺꦤ ꦏꦸꦥꦶꦠꦁ, ꦄꦨꦹꦠꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦨꦹꦠꦺꦤ ꦏꦸꦥꦶꦠꦁ, ꦦꦫꦸꦱꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦱꦟ꧀ꦲꦺꦤ ꦏꦸꦥꦶꦠꦁ, ꦄꦤꦠ꧀ꦡꦱꦁꦲꦶꦠꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦄꦠ꧀ꦡꦱꦁꦲꦶꦠꦺꦤ ꦏꦸꦥꦶꦠꦁ, ꦢꦺꦴꦱꦤ꧀ꦠꦫꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦩꦺꦠ꧀ꦠꦕꦶꦠ꧀ꦠꦺꦤ ꦏꦸꦥꦶꦠꦁ.

‘‘ꦄꦣꦩ꧀ꦩꦕꦸꦢꦶꦠꦱ꧀ꦱ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦚ꧀ꦕꦲꦴꦏꦴꦫꦺꦲꦶ ꦄꦮꦶꦥ꧀ꦥꦛꦶꦱꦴꦫꦺꦴ ꦈꦥꦢꦲꦴꦠꦧ꧀ꦧꦺꦴ [ꦈꦥꦢꦲꦶꦠꦧ꧀ꦧꦺꦴ (ꦱꦷ. ꦱ꧀ꦪꦴ. ꦥꦷ.)] – ‘ꦄꦏꦴꦭꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦏꦴꦭꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪ; ꦄꦨꦹꦠꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦨꦹꦠꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪ; ꦦꦫꦸꦱꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦱꦟ꧀ꦲꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪ; ꦄꦤꦠ꧀ꦡꦱꦁꦲꦶꦠꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦄꦠ꧀ꦡꦱꦁꦲꦶꦠꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪ; ꦢꦺꦴꦱꦤ꧀ꦠꦫꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦩꦺꦠ꧀ꦠꦕꦶꦠ꧀ꦠꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪꦴ’ꦠꦶ. ꦄꦣꦩ꧀ꦩꦕꦸꦢꦶꦠꦱ꧀ꦱ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦆꦩꦺꦲꦶ ꦥꦚ꧀ꦕꦲꦴꦏꦴꦫꦺꦲꦶ ꦄꦮꦶꦥ꧀ꦥꦛꦶꦱꦴꦫꦺꦴ ꦈꦥꦢꦲꦴꦠꦧ꧀ꦧꦺꦴ.

‘‘ꦄꦣꦩ꧀ꦩꦕꦺꦴꦢꦏꦱ꧀ꦱ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦚ꧀ꦕꦲꦴꦏꦴꦫꦺꦲꦶ ꦮꦶꦥ꧀ꦥꦛꦶꦱꦴꦫꦺꦴ ꦈꦥꦢꦲꦴꦠꦧ꧀ꦧꦺꦴ – ‘ꦄꦏꦴꦭꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ [ꦕꦸꦢꦶꦠꦺꦴ (ꦱꦷ. ꦱ꧀ꦪꦴ. ꦥꦷ.)] ꦤꦺꦴ ꦏꦴꦭꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪ; ꦄꦨꦹꦠꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦨꦹꦠꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪ; ꦦꦫꦸꦱꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦱꦟ꧀ꦲꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪ; ꦄꦤꦠ꧀ꦡꦱꦁꦲꦶꦠꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦄꦠ꧀ꦡꦱꦁꦲꦶꦠꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪ; ꦢꦺꦴꦱꦤ꧀ꦠꦫꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦩꦺꦠ꧀ꦠꦕꦶꦠ꧀ꦠꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪꦴ’ꦠꦶ. ꦄꦣꦩ꧀ꦩꦕꦺꦴꦢꦏꦱ꧀ꦱ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦆꦩꦺꦲꦶ ꦥꦚ꧀ꦕꦲꦴꦏꦴꦫꦺꦲꦶ ꦮꦶꦥ꧀ꦥꦛꦶꦱꦴꦫꦺꦴ ꦈꦥꦢꦲꦴꦠꦧ꧀ꦧꦺꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦪꦡꦴ ꦤ ꦄꦚ꧀ꦚꦺꦴꦥꦶ ꦨꦶꦏ꧀ꦑꦸ ꦄꦨꦹꦠꦺꦤ ꦕꦺꦴꦢꦺꦠꦧ꧀ꦧꦁ ꦩꦚ꧀ꦚꦺꦪ꧀ꦪꦴꦠꦶ.

‘‘ꦆꦣ ꦥꦤꦴꦲꦁ, ꦄꦴꦮꦸꦱꦺꦴ, ꦌꦏꦕ꧀ꦕꦁ ꦥꦸꦒ꧀ꦒꦭꦁ ꦥꦱ꧀ꦱꦴꦩꦶ ꦏꦴꦭꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦄꦏꦴꦭꦺꦤ ꦏꦸꦥꦶꦠꦁ, ꦨꦹꦠꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦄꦨꦹꦠꦺꦤ ꦏꦸꦥꦶꦠꦁ, ꦱꦟ꧀ꦲꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦦꦫꦸꦱꦺꦤ ꦏꦸꦥꦶꦠꦁ, ꦄꦠ꧀ꦡꦱꦁꦲꦶꦠꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦄꦤꦠ꧀ꦡꦱꦁꦲꦶꦠꦺꦤ ꦏꦸꦥꦶꦠꦁ, ꦩꦺꦠ꧀ꦠꦕꦶꦠ꧀ꦠꦺꦤ ꦕꦺꦴꦢꦶꦪꦩꦴꦤꦁ ꦤꦺꦴ ꦢꦺꦴꦱꦤ꧀ꦠꦫꦺꦤ ꦏꦸꦥꦶꦠꦁ.

‘‘ꦣꦩ꧀ꦩꦕꦸꦢꦶꦠꦱ꧀ꦱ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦚ꧀ꦕꦲꦴꦏꦴꦫꦺꦲꦶ ꦮꦶꦥ꧀ꦥꦛꦶꦱꦴꦫꦺꦴ ꦈꦥꦢꦲꦴꦠꦧ꧀ꦧꦺꦴ – ‘ꦏꦴꦭꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦄꦏꦴꦭꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪ; ꦨꦹꦠꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦄꦨꦹꦠꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪ; ꦱꦟ꧀ꦲꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦦꦫꦸꦱꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪ; ꦄꦠ꧀ꦡꦱꦁꦲꦶꦠꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦄꦤꦠ꧀ꦡꦱꦁꦲꦶꦠꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪ; ꦩꦺꦠ꧀ꦠꦕꦶꦠ꧀ꦠꦺꦤꦴꦪꦱ꧀ꦩꦴ ꦕꦸꦢꦶꦠꦺꦴ ꦤꦺꦴ ꦢꦺꦴꦱꦤ꧀ꦠꦫꦺꦤ, ꦄꦭꦁ ꦠꦺ ꦮꦶꦥ꧀ꦥꦛꦶꦱꦴꦫꦴꦪꦴ’ꦠꦶ. ꦣꦩ꧀ꦩꦕꦸꦢꦶꦠꦱ꧀ꦱ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦆꦩꦺꦲꦶ ꦥꦚ꧀ꦕꦲꦴꦏꦴꦫꦺꦲꦶ ꦮꦶꦥ꧀ꦥꦛꦶꦱꦴꦫꦺꦴ ꦈꦥꦢꦲꦴꦠꦧ꧀ꦧꦺꦴ.

‘‘ꦣꦩ꧀ꦩꦕꦺꦴꦢꦏꦱ꧀ꦱ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦥꦚ꧀ꦕꦲꦴꦏꦴꦫꦺꦲꦶ ꦄꦮꦶꦥ꧀ꦥꦛꦶꦱꦴꦫꦺꦴ ꦈꦥꦢꦲꦴꦠꦧ꧀ꦧꦺꦴ – ‘ꦏꦴꦭꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦄꦏꦴꦭꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪ; ꦨꦹꦠꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦄꦨꦹꦠꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪ; ꦱꦟ꧀ꦲꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦦꦫꦸꦱꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪ; ꦄꦠ꧀ꦡꦱꦁꦲꦶꦠꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦄꦤꦠ꧀ꦡꦱꦁꦲꦶꦠꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪ; ꦩꦺꦠ꧀ꦠꦕꦶꦠ꧀ꦠꦺꦤ ꦠꦺ, ꦄꦴꦮꦸꦱꦺꦴ, ꦕꦺꦴꦢꦶꦠꦺꦴ ꦤꦺꦴ ꦢꦺꦴꦱꦤ꧀ꦠꦫꦺꦤ, ꦄꦭꦁ ꦠꦺ ꦄꦮꦶꦥ꧀ꦥꦛꦶꦱꦴꦫꦴꦪꦴ’ꦠꦶ. ꦣꦩ꧀ꦩꦕꦺꦴꦢꦏꦱ꧀ꦱ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦆꦩꦺꦲꦶ ꦥꦚ꧀ꦕꦲꦴꦏꦴꦫꦺꦲꦶ ꦄꦮꦶꦥ꧀ꦥꦛꦶꦱꦴꦫꦺꦴ ꦈꦥꦢꦲꦴꦠꦧ꧀ꦧꦺꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦪꦡꦴ ꦄꦚ꧀ꦚꦺꦴꦥꦶ ꦨꦶꦏ꧀ꦑꦸ ꦨꦹꦠꦺꦤ ꦕꦺꦴꦢꦶꦠꦧ꧀ꦧꦁ ꦩꦚ꧀ꦚꦺꦪ꧀ꦪꦴꦠꦶ.

‘‘ꦕꦸꦢꦶꦠꦺꦤ, ꦄꦴꦮꦸꦱꦺꦴ, ꦥꦸꦒ꧀ꦒꦭꦺꦤ ꦢ꧀ꦮꦷꦱꦸ ꦣꦩ꧀ꦩꦺꦱꦸ ꦥꦠꦶꦛ꧀ꦜꦴꦠꦧ꧀ꦧꦁ – ꦱꦕ꧀ꦕꦺ ꦕ, ꦄꦏꦸꦥ꧀ꦥꦺ ꦕ. ꦩꦁ ꦕꦺꦥꦶ [ꦥꦚ꧀ꦕꦲꦶ (ꦱ꧀ꦪꦴ. ꦏ.)], ꦄꦴꦮꦸꦱꦺꦴ, ꦥꦫꦺ ꦕꦺꦴꦢꦺꦪ꧀ꦪꦸꦁ ꦏꦴꦭꦺꦤ ꦮꦴ ꦄꦏꦴꦭꦺꦤ ꦮꦴ ꦨꦹꦠꦺꦤ ꦮꦴ ꦄꦨꦹꦠꦺꦤ ꦮꦴ ꦱꦟ꧀ꦲꦺꦤ ꦮꦴ ꦦꦫꦸꦱꦺꦤ ꦮꦴ ꦄꦠ꧀ꦡꦱꦁꦲꦶꦠꦺꦤ ꦮꦴ ꦄꦤꦠ꧀ꦡꦱꦁꦲꦶꦠꦺꦤ ꦮꦴ ꦩꦺꦠ꧀ꦠꦕꦶꦠ꧀ꦠꦴ [ꦩꦺꦠ꧀ꦠꦕꦶꦠ꧀ꦠꦺꦤ (ꦱꦷ. ꦥꦷ. ꦏ.) ꦩ. ꦤꦶ. ꧑.꧒꧒꧗ ꦥꦱ꧀ꦱꦶꦠꦧ꧀ꦧꦁ] ꦮꦴ ꦢꦺꦴꦱꦤ꧀ꦠꦫꦴ [ꦢꦺꦴꦱꦤ꧀ꦠꦫꦺꦤ (ꦱꦷ. ꦥꦷ. ꦏ.)] ꦮꦴ, ꦄꦲꦩ꧀ꦥꦶ ꦢ꧀ꦮꦷꦱꦸꦪꦺꦮ ꦣꦩ꧀ꦩꦺꦱꦸ ꦥꦠꦶꦛ꧀ꦜꦲꦺꦪ꧀ꦪꦁ – ꦱꦕ꧀ꦕꦺ ꦕ, ꦄꦏꦸꦥ꧀ꦥꦺ ꦕ. ꦱꦕꦺ ꦗꦴꦤꦺꦪ꧀ꦪꦁ – ‘ꦄꦠ꧀ꦡꦺꦱꦺꦴ ꦩꦪꦶ ꦣꦩ꧀ꦩꦺꦴ’ꦠꦶ, ‘ꦄꦠ꧀ꦡꦷ’ꦠꦶ ꦤꦁ ꦮꦢꦺꦪ꧀ꦪꦁ – ‘ꦱꦁꦮꦶꦗ꧀ꦗꦠꦺꦱꦺꦴ ꦩꦪꦶ ꦣꦩ꧀ꦩꦺꦴ’ꦠꦶ. ꦱꦕꦺ ꦗꦴꦤꦺꦪ꧀ꦪꦁ – ‘ꦤꦠ꧀ꦡꦺꦱꦺꦴ ꦩꦪꦶ ꦣꦩ꧀ꦩꦺꦴ’ꦠꦶ, ‘ꦤꦠ꧀ꦡꦷ’ꦠꦶ ꦤꦁ ꦮꦢꦺꦪ꧀ꦪꦁ – ‘ꦤꦺꦱꦺꦴ ꦣꦩ꧀ꦩꦺꦴ ꦩꦪꦶ ꦱꦁꦮꦶꦗ꧀ꦗꦠꦷ’ꦠꦶ.

‘‘ꦌꦮꦩ꧀ꦥꦶ ꦑꦺꦴ ꦠꦺ [ꦌꦮꦩ꧀ꦥꦶ ꦑꦺꦴ (ꦏ.)], ꦱꦴꦫꦶꦥꦸꦠ꧀ꦠ, ꦮꦸꦕ꧀ꦕꦩꦴꦤꦴ ꦄꦡ ꦕ ꦥꦤꦶꦣꦺꦏꦕ꧀ꦕꦺ ꦩꦺꦴꦓꦥꦸꦫꦶꦱꦴ ꦤ ꦥꦢꦏ꧀ꦑꦶꦟꦁ ꦒꦟ꧀ꦲꦤ꧀ꦠꦷ’’ꦠꦶ.

‘‘ꦪꦺ ꦠꦺ, ꦨꦤ꧀ꦠꦺ, ꦥꦸꦒ꧀ꦒꦭꦴ ꦄꦱ꧀ꦱꦢ꧀ꦣꦴ ꦗꦷꦮꦶꦏꦠ꧀ꦡꦴ ꦤ ꦱꦢ꧀ꦣꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦶꦠꦴ ꦱꦜꦴ ꦩꦴꦪꦴꦮꦶꦤꦺꦴ ꦏꦺꦠꦧꦶꦤꦺꦴ [ꦏꦺꦛꦸꦨꦶꦤꦺꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦈꦢ꧀ꦣꦠꦴ ꦈꦤ꧀ꦤꦭ꦳ꦴ ꦕꦥꦭꦴ ꦩꦸꦑꦫꦴ ꦮꦶꦏꦶꦟ꧀ꦟꦮꦴꦕꦴ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦴ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦸꦤꦺꦴ ꦗꦴꦒꦫꦶꦪꦁ ꦄꦤꦤꦸꦪꦸꦠ꧀ꦠꦴ ꦱꦴꦩꦚ꧀ꦚꦺ ꦄꦤꦥꦺꦏ꧀ꦑꦮꦤ꧀ꦠꦺꦴ ꦱꦶꦏ꧀ꦑꦴꦪ ꦤ ꦠꦶꦧ꧀ꦧꦒꦴꦫꦮꦴ ꦧꦴꦲꦸꦭꦶꦏꦴ ꦱꦴꦡꦭꦶꦏꦴ ꦎꦏ꧀ꦏꦩꦤꦺ ꦥꦸꦧ꧀ꦧꦔ꧀ꦒꦩꦴ ꦥꦮꦶꦮꦺꦏꦺ ꦤꦶꦏ꧀ꦑꦶꦠ꧀ꦠꦣꦸꦫꦴ ꦏꦸꦱꦷꦠꦴ ꦲꦷꦤꦮꦷꦫꦶꦪꦴ ꦩꦸꦛ꧀ꦜꦱ꧀ꦱꦠꦶꦤꦺꦴ ꦄꦱꦩ꧀ꦥꦗꦴꦤꦴ ꦄꦱꦩꦴꦲꦶꦠꦴ ꦮꦶꦧ꧀ꦨꦤ꧀ꦠꦕꦶꦠ꧀ꦠꦴ ꦢꦸꦥ꧀ꦥꦚ꧀ꦚꦴ ꦌꦭ꦳ꦩꦹꦒꦴ, ꦠꦺ ꦩꦪꦴ ꦌꦮꦁ ꦮꦸꦕ꧀ꦕꦩꦴꦤꦴ ꦤ ꦥꦢꦏ꧀ꦑꦶꦟꦁ ꦒꦟ꧀ꦲꦤ꧀ꦠꦶ.

‘‘ꦪꦺ ꦥꦤ ꦠꦺ, ꦨꦤ꧀ꦠꦺ, ꦏꦸꦭꦥꦸꦠ꧀ꦠꦴ ꦱꦢ꧀ꦣꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦶꦠꦴ ꦄꦱꦜꦴ ꦄꦩꦴꦪꦴꦮꦶꦤꦺꦴ ꦄꦏꦺꦠꦧꦶꦤꦺꦴ ꦄꦤꦸꦢ꧀ꦣꦠꦴ ꦄꦤꦸꦤ꧀ꦤꦭ꦳ꦴ ꦄꦕꦥꦭꦴ ꦄꦩꦸꦑꦫꦴ ꦄꦮꦶꦏꦶꦟ꧀ꦟꦮꦴꦕꦴ ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦴ ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦤꦺꦴ ꦗꦴꦒꦫꦶꦪꦁ ꦄꦤꦸꦪꦸꦠ꧀ꦠꦴ ꦱꦴꦩꦚ꧀ꦚꦺ ꦄꦥꦺꦏ꧀ꦑꦮꦤ꧀ꦠꦺꦴ ꦱꦶꦏ꧀ꦑꦴꦪ ꦠꦶꦧ꧀ꦧꦒꦴꦫꦮꦴ ꦤ ꦧꦴꦲꦸꦭꦶꦏꦴ ꦤ ꦱꦴꦡꦭꦶꦏꦴ ꦎꦏ꧀ꦏꦩꦤꦺ ꦤꦶꦏ꧀ꦑꦶꦠ꧀ꦠꦣꦸꦫꦴ ꦥꦮꦶꦮꦺꦏꦺ ꦥꦸꦧ꧀ꦧꦔ꧀ꦒꦩꦴ ꦄꦴꦫꦢ꧀ꦣꦮꦷꦫꦶꦪꦴ ꦥꦲꦶꦠꦠ꧀ꦠꦴ ꦈꦥꦛ꧀ꦜꦶꦠꦱ꧀ꦱꦠꦶꦤꦺꦴ ꦱꦩ꧀ꦥꦗꦴꦤꦴ ꦱꦩꦴꦲꦶꦠꦴ ꦌꦏꦒ꧀ꦒꦕꦶꦠ꧀ꦠꦴ ꦥꦚ꧀ꦚꦮꦤ꧀ꦠꦺꦴ ꦄꦤꦺꦭ꦳ꦩꦹꦒꦴ, ꦠꦺ ꦩꦪꦴ ꦌꦮꦁ ꦮꦸꦕ꧀ꦕꦩꦴꦤꦴ ꦥꦢꦏ꧀ꦑꦶꦟꦁ ꦒꦟ꧀ꦲꦤ꧀ꦠꦷꦠꦶ.

‘‘ꦪꦺ ꦠꦺ, ꦱꦴꦫꦶꦥꦸꦠ꧀ꦠ, ꦥꦸꦒ꧀ꦒꦭꦴ ꦄꦱ꧀ꦱꦢ꧀ꦣꦴ ꦗꦷꦮꦶꦏꦠ꧀ꦡꦴ ꦤ ꦱꦢ꧀ꦣꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦶꦠꦴ ꦱꦜꦴ ꦩꦴꦪꦴꦮꦶꦤꦺꦴ ꦏꦺꦠꦧꦶꦤꦺꦴ ꦈꦢ꧀ꦣꦠꦴ ꦈꦤ꧀ꦤꦭ꦳ꦴ ꦕꦥꦭꦴ ꦩꦸꦑꦫꦴ ꦮꦶꦏꦶꦟ꧀ꦟꦮꦴꦕꦴ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦴ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦸꦤꦺꦴ ꦗꦴꦒꦫꦶꦪꦁ ꦄꦤꦤꦸꦪꦸꦠ꧀ꦠꦴ ꦱꦴꦩꦚ꧀ꦚꦺ ꦄꦤꦥꦺꦏ꧀ꦑꦮꦤ꧀ꦠꦺꦴ ꦱꦶꦏ꧀ꦑꦴꦪ ꦤ ꦠꦶꦧ꧀ꦧꦒꦴꦫꦮꦴ ꦧꦴꦲꦸꦭꦶꦏꦴ ꦱꦴꦡꦭꦶꦏꦴ ꦎꦏ꧀ꦏꦩꦤꦺ ꦥꦸꦧ꧀ꦧꦔ꧀ꦒꦩꦴ ꦥꦮꦶꦮꦺꦏꦺ ꦤꦶꦏ꧀ꦑꦶꦠ꧀ꦠꦣꦸꦫꦴ ꦏꦸꦱꦷꦠꦴ ꦲꦷꦤꦮꦷꦫꦶꦪꦴ ꦩꦸꦛ꧀ꦜꦱ꧀ꦱꦠꦶꦤꦺꦴ ꦄꦱꦩ꧀ꦥꦗꦴꦤꦴ ꦄꦱꦩꦴꦲꦶꦠꦴ ꦮꦶꦧ꧀ꦨꦤ꧀ꦠꦕꦶꦠ꧀ꦠꦴ ꦢꦸꦥ꧀ꦥꦚ꧀ꦚꦴ ꦌꦭ꦳ꦩꦹꦒꦴ, ꦠꦶꦛ꧀ꦜꦤ꧀ꦠꦸ ꦠꦺ.

‘‘ꦪꦺ ꦥꦤ, ꦠꦺ ꦱꦴꦫꦶꦥꦸꦠ꧀ꦠ, ꦏꦸꦭꦥꦸꦠ꧀ꦠꦴ ꦱꦢ꧀ꦣꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦶꦠꦴ ꦄꦱꦜꦴ ꦄꦩꦴꦪꦴꦮꦶꦤꦺꦴ ꦄꦏꦺꦠꦧꦶꦤꦺꦴ ꦄꦤꦸꦢ꧀ꦣꦠꦴ ꦄꦤꦸꦤ꧀ꦤꦭ꦳ꦴ ꦄꦕꦥꦭꦴ ꦄꦩꦸꦑꦫꦴ ꦄꦮꦶꦏꦶꦟ꧀ꦟꦮꦴꦕꦴ ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦴ ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦤꦺꦴ ꦗꦴꦒꦫꦶꦪꦁ ꦄꦤꦸꦪꦸꦠ꧀ꦠꦴ ꦱꦴꦩꦚ꧀ꦚꦺ ꦄꦥꦺꦏ꧀ꦑꦮꦤ꧀ꦠꦺꦴ ꦱꦶꦏ꧀ꦑꦴꦪ ꦠꦶꦧ꧀ꦧꦒꦴꦫꦮꦴ ꦤ ꦧꦴꦲꦸꦭꦶꦏꦴ ꦤ ꦱꦴꦡꦭꦶꦏꦴ ꦎꦏ꧀ꦏꦩꦤꦺ ꦤꦶꦏ꧀ꦑꦶꦠ꧀ꦠꦣꦸꦫꦴ ꦥꦮꦶꦮꦺꦏꦺ ꦥꦸꦧ꧀ꦧꦔ꧀ꦒꦩꦴ ꦄꦴꦫꦢ꧀ꦣꦮꦷꦫꦶꦪꦴ ꦥꦲꦶꦠꦠ꧀ꦠꦴ ꦈꦥꦛ꧀ꦜꦶꦠꦱ꧀ꦱꦠꦶꦤꦺꦴ ꦱꦩ꧀ꦥꦗꦴꦤꦴ ꦱꦩꦴꦲꦶꦠꦴ ꦌꦏꦒ꧀ꦒꦕꦶꦠ꧀ꦠꦴ ꦥꦚ꧀ꦚꦮꦤ꧀ꦠꦺꦴ ꦄꦤꦺꦭ꦳ꦩꦹꦒꦴ, ꦠꦺ ꦠ꧀ꦮꦁ, ꦱꦴꦫꦶꦥꦸꦠ꧀ꦠ, ꦮꦢꦺꦪ꧀ꦪꦴꦱꦶ. ꦎꦮꦢ, ꦱꦴꦫꦶꦥꦸꦠ꧀ꦠ, ꦱꦧ꧀ꦫꦲ꧀ꦩꦕꦴꦫꦷ; ꦄꦤꦸꦱꦴꦱ, ꦱꦴꦫꦶꦥꦸꦠ꧀ꦠ, ꦱꦧ꧀ꦫꦲ꧀ꦩꦕꦴꦫꦷ – ‘ꦄꦱꦢ꧀ꦣꦩ꧀ꦩꦴ ꦮꦸꦛ꧀ꦜꦴꦥꦺꦠ꧀ꦮꦴ ꦱꦢ꧀ꦣꦩ꧀ꦩꦺ ꦥꦠꦶꦛ꧀ꦜꦴꦥꦺꦱ꧀ꦱꦴꦩꦶ ꦱꦧ꧀ꦫꦲ꧀ꦩꦕꦴꦫꦷ’ꦠꦶ. ꦌꦮꦚ꧀ꦲꦶ ꦠꦺ, ꦱꦴꦫꦶꦥꦸꦠ꧀ꦠ, ꦱꦶꦏ꧀ꦑꦶꦠꦧ꧀ꦧ’’ꦤ꧀ꦠꦶ. ꦱꦠ꧀ꦠꦩꦁ.