꧓. ꦩꦲꦴꦕꦺꦴꦫꦱꦸꦠ꧀ꦠꦁ

꧑꧐꧓. ‘‘ꦥꦚ꧀ꦕꦲꦶ, ꦨꦶꦏ꧀ꦑꦮꦺ, ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦲꦴꦕꦺꦴꦫꦺꦴ ꦱꦤ꧀ꦣꦶꦩ꧀ꦥꦶ ꦖꦶꦤ꧀ꦢꦠꦶ, ꦤꦶꦭ꧀ꦭꦺꦴꦥꦩ꧀ꦥꦶ ꦲꦫꦠꦶ, ꦌꦏꦴꦒꦴꦫꦶꦏꦩ꧀ꦥꦶ ꦏꦫꦺꦴꦠꦶ, ꦥꦫꦶꦥꦤ꧀ꦡꦺꦥꦶ ꦠꦶꦛ꧀ꦜꦠꦶ. ꦏꦠꦩꦺꦲꦶ ꦥꦚ꧀ꦕꦲꦶ? ꦆꦣ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦮꦶꦱꦩꦤꦶꦱ꧀ꦱꦶꦠꦺꦴ ꦕ ꦲꦺꦴꦠꦶ, ꦒꦲꦤꦤꦶꦱ꧀ꦱꦶꦠꦺꦴ ꦕ, ꦧꦭꦮꦤꦶꦱ꧀ꦱꦶꦠꦺꦴ ꦕ, ꦨꦺꦴꦒꦕꦴꦒꦷ ꦕ, ꦌꦏꦕꦴꦫꦷ ꦕ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦮꦶꦱꦩꦤꦶꦱ꧀ꦱꦶꦠꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦤꦢꦷꦮꦶꦢꦸꦒ꧀ꦒꦁ ꦮꦴ ꦤꦶꦱ꧀ꦱꦶꦠꦺꦴ ꦲꦺꦴꦠꦶ ꦥꦧ꧀ꦧꦠꦮꦶꦱꦩꦁ ꦮꦴ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦮꦶꦱꦩꦤꦶꦱ꧀ꦱꦶꦠꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦒꦲꦤꦤꦶꦱ꧀ꦱꦶꦠꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦠꦶꦟꦒꦲꦤꦁ ꦮꦴ ꦤꦶꦱ꧀ꦱꦶꦠꦺꦴ ꦲꦺꦴꦠꦶ ꦫꦸꦏ꧀ꦑꦒꦲꦤꦁ ꦮꦴ ꦫꦺꦴꦣꦁ [ꦒꦺꦣꦁ (ꦱꦷ.) ꦄ. ꦤꦶ. ꧓.꧕꧑] ꦮꦴ ꦩꦲꦴꦮꦤꦱꦟ꧀ꦝꦁ ꦮꦴ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦒꦲꦤꦤꦶꦱ꧀ꦱꦶꦠꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦧꦭꦮꦤꦶꦱ꧀ꦱꦶꦠꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦫꦴꦗꦴꦤꦁ ꦮꦴ ꦫꦴꦗꦩꦲꦴꦩꦠ꧀ꦠꦴꦤꦁ ꦮꦴ ꦤꦶꦱ꧀ꦱꦶꦠꦺꦴ ꦲꦺꦴꦠꦶ. ꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦱꦕꦺ ꦩꦁ ꦏꦺꦴꦕꦶ ꦏꦶꦚ꧀ꦕꦶ ꦮꦏ꧀ꦑꦠꦶ, ꦆꦩꦺ ꦩꦺ ꦫꦴꦗꦴꦤꦺꦴ ꦮꦴ ꦫꦴꦗꦩꦲꦴꦩꦠ꧀ꦠꦴ ꦮꦴ ꦥꦫꦶꦪꦺꦴꦣꦴꦪ ꦄꦠ꧀ꦡꦁ ꦨꦟꦶꦱ꧀ꦱꦤ꧀ꦠꦷ’ꦠꦶ. ꦱꦕꦺ ꦤꦁ ꦏꦺꦴꦕꦶ ꦏꦶꦚ꧀ꦕꦶ ꦄꦴꦲ, ꦠ꧀ꦪꦱ꧀ꦱ ꦫꦴꦗꦴꦤꦺꦴ ꦮꦴ ꦫꦴꦗꦩꦲꦴꦩꦠ꧀ꦠꦴ ꦮꦴ ꦥꦫꦶꦪꦺꦴꦣꦴꦪ ꦄꦠ꧀ꦡꦁ ꦨꦟꦤ꧀ꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦧꦭꦮꦤꦶꦱ꧀ꦱꦶꦠꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦨꦺꦴꦒꦕꦴꦒꦷ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦄꦝ꧀ꦞꦺꦴ ꦲꦺꦴꦠꦶ ꦩꦲꦢ꧀ꦣꦤꦺꦴ ꦩꦲꦴꦨꦺꦴꦒꦺꦴ. ꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦱꦕꦺ ꦩꦁ ꦏꦺꦴꦕꦶ ꦏꦶꦚ꧀ꦕꦶ ꦮꦏ꧀ꦑꦠꦶ, ꦆꦠꦺꦴ ꦨꦺꦴꦒꦺꦤ ꦥꦛꦶꦱꦤ꧀ꦡꦫꦶꦱ꧀ꦱꦴꦩꦷ’ꦠꦶ. ꦱꦕꦺ ꦤꦁ ꦏꦺꦴꦕꦶ ꦏꦶꦚ꧀ꦕꦶ ꦄꦴꦲ, ꦠꦠꦺꦴ ꦨꦺꦴꦒꦺꦤ ꦥꦛꦶꦱꦤ꧀ꦡꦫꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦨꦺꦴꦒꦕꦴꦒꦷ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦌꦏꦕꦴꦫꦷ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦌꦏꦏꦺꦴꦮ ꦒꦲꦟꦴꦤꦶ [ꦤꦶꦒ꧀ꦒꦲꦟꦴꦤꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦏꦠ꧀ꦠꦴ ꦲꦺꦴꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ‘ꦩꦴ ꦩꦺ ꦒꦸꦪ꧀ꦲꦩꦤ꧀ꦠꦴ ꦧꦲꦶꦢ꧀ꦣꦴ ꦱꦩ꧀ꦨꦺꦢꦁ ꦄꦒꦩꦁꦱꦹ’ꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦩꦲꦴꦕꦺꦴꦫꦺꦴ ꦌꦏꦕꦴꦫꦷ ꦲꦺꦴꦠꦶ.

‘‘ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦩꦲꦴꦕꦺꦴꦫꦺꦴ ꦱꦤ꧀ꦣꦶꦩ꧀ꦥꦶ ꦖꦶꦤ꧀ꦢꦠꦶ ꦤꦶꦭ꧀ꦭꦺꦴꦥꦩ꧀ꦥꦶ ꦲꦫꦠꦶ ꦌꦏꦴꦒꦴꦫꦶꦏꦩ꧀ꦥꦶ ꦏꦫꦺꦴꦠꦶ ꦥꦫꦶꦥꦤ꧀ꦡꦺꦥꦶ ꦠꦶꦛ꧀ꦜꦠꦶ.

‘‘ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦥꦴꦥꦨꦶꦏ꧀ꦑꦸ ꦑꦠꦁ ꦈꦥꦲꦠꦁ ꦄꦠ꧀ꦠꦴꦤꦁ ꦥꦫꦶꦲꦫꦠꦶ, ꦱꦴꦮꦗ꧀ꦗꦺꦴ ꦕ ꦲꦺꦴꦠꦶ ꦱꦴꦤꦸꦮꦗ꧀ꦗꦺꦴ ꦮꦶꦚ꧀ꦚꦹꦤꦁ, ꦧꦲꦸꦚ꧀ꦕ ꦄꦥꦸꦚ꧀ꦚꦁ ꦥꦱꦮꦠꦶ. ꦏꦠꦩꦺꦲꦶ ꦥꦚ꧀ꦕꦲꦶ? ꦆꦣ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦮꦶꦱꦩꦤꦶꦱ꧀ꦱꦶꦠꦺꦴ ꦕ ꦲꦺꦴꦠꦶ, ꦒꦲꦤꦤꦶꦱ꧀ꦱꦶꦠꦺꦴ ꦕ, ꦧꦭꦮꦤꦶꦱ꧀ꦱꦶꦠꦺꦴ ꦕ, ꦨꦺꦴꦒꦕꦴꦒꦷ ꦕ, ꦌꦏꦕꦴꦫꦷ ꦕ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦮꦶꦱꦩꦤꦶꦱ꧀ꦱꦶꦠꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦮꦶꦱꦩꦺꦤ ꦏꦴꦪꦏꦩ꧀ꦩꦺꦤ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ, ꦮꦶꦱꦩꦺꦤ ꦮꦕꦷꦏꦩ꧀ꦩꦺꦤ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ, ꦮꦶꦱꦩꦺꦤ ꦩꦤꦺꦴꦏꦩ꧀ꦩꦺꦤ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦮꦶꦱꦩꦤꦶꦱ꧀ꦱꦶꦠꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦒꦲꦤꦤꦶꦱ꧀ꦱꦶꦠꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦩꦶꦕ꧀ꦖꦴꦢꦶꦛ꧀ꦜꦶꦏꦺꦴ ꦲꦺꦴꦠꦶ ꦄꦤ꧀ꦠꦒ꧀ꦒꦴꦲꦶꦏꦴꦪ ꦢꦶꦛ꧀ꦜꦶꦪꦴ ꦱꦩꦤ꧀ꦤꦴꦒꦠꦺꦴ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦒꦲꦤꦤꦶꦱ꧀ꦱꦶꦠꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦧꦭꦮꦤꦶꦱ꧀ꦱꦶꦠꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦫꦴꦗꦴꦤꦁ ꦮꦴ ꦫꦴꦗꦩꦲꦴꦩꦠ꧀ꦠꦴꦤꦁ ꦮꦴ ꦤꦶꦱ꧀ꦱꦶꦠꦺꦴ ꦲꦺꦴꦠꦶ. ꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦱꦕꦺ ꦩꦁ ꦏꦺꦴꦕꦶ ꦏꦶꦚ꧀ꦕꦶ ꦮꦏ꧀ꦑꦠꦶ, ꦆꦩꦺ ꦩꦺ ꦫꦴꦗꦴꦤꦺꦴ ꦮꦴ ꦫꦴꦗꦩꦲꦴꦩꦠ꧀ꦠꦴ ꦮꦴ ꦥꦫꦶꦪꦺꦴꦣꦴꦪ ꦄꦠ꧀ꦡꦁ ꦨꦟꦶꦱ꧀ꦱꦤ꧀ꦠꦷ’ꦠꦶ. ꦱꦕꦺ ꦤꦁ ꦏꦺꦴꦕꦶ ꦏꦶꦚ꧀ꦕꦶ ꦄꦴꦲ, ꦠ꧀ꦪꦱ꧀ꦱ ꦫꦴꦗꦴꦤꦺꦴ ꦮꦴ ꦫꦴꦗꦩꦲꦴꦩꦠ꧀ꦠꦴ ꦮꦴ ꦥꦫꦶꦪꦺꦴꦣꦴꦪ ꦄꦠ꧀ꦡꦁ ꦨꦟꦤ꧀ꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦧꦭꦮꦤꦶꦱ꧀ꦱꦶꦠꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦨꦺꦴꦒꦕꦴꦒꦷ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦭꦴꦨꦷ ꦲꦺꦴꦠꦶ ꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦴꦤꦁ. ꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦱꦕꦺ ꦩꦁ ꦏꦺꦴꦕꦶ ꦏꦶꦚ꧀ꦕꦶ ꦮꦏ꧀ꦑꦠꦶ, ꦆꦠꦺꦴ ꦭꦴꦨꦺꦤ ꦥꦛꦶꦱꦤ꧀ꦡꦫꦶꦱ꧀ꦱꦴꦩꦷ’ꦠꦶ. ꦱꦕꦺ ꦤꦁ ꦏꦺꦴꦕꦶ ꦏꦶꦚ꧀ꦕꦶ ꦄꦴꦲ, ꦠꦠꦺꦴ ꦭꦴꦨꦺꦤ ꦥꦛꦶꦱꦤ꧀ꦡꦫꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦨꦺꦴꦒꦕꦴꦒꦷ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦌꦏꦕꦴꦫꦷ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦌꦏꦏꦺꦴꦮ ꦥꦕ꧀ꦕꦤ꧀ꦠꦶꦩꦺꦱꦸ ꦗꦤꦥꦢꦺꦱꦸ ꦤꦶꦮꦴꦱꦁ ꦏꦥ꧀ꦥꦺꦠꦶ. ꦱꦺꦴ ꦠꦠ꧀ꦡ ꦏꦸꦭꦴꦤꦶ ꦈꦥꦱꦔ꧀ꦏꦩꦤ꧀ꦠꦺꦴ ꦭꦴꦨꦁ ꦭꦨꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦴꦥꦨꦶꦏ꧀ꦑꦸ ꦌꦏꦕꦴꦫꦷ ꦲꦺꦴꦠꦶ.

‘‘ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦥꦴꦥꦨꦶꦏ꧀ꦑꦸ ꦑꦠꦁ ꦈꦥꦲꦠꦁ ꦄꦠ꧀ꦠꦴꦤꦁ ꦥꦫꦶꦲꦫꦠꦶ, ꦱꦴꦮꦗ꧀ꦗꦺꦴ ꦕ ꦲꦺꦴꦠꦶ ꦱꦴꦤꦸꦮꦗ꧀ꦗꦺꦴ ꦮꦶꦚ꧀ꦚꦹꦤꦁ, ꦧꦲꦸꦚ꧀ꦕ ꦄꦥꦸꦚ꧀ꦚꦁ ꦥꦱꦮꦠꦷ’’ꦠꦶ. ꦠꦠꦶꦪꦁ.