꧗. ꦱꦷꦭꦮꦤ꧀ꦠꦱꦸꦠ꧀ꦠꦁ

꧘꧗. ‘‘ꦥꦚ꧀ꦕꦲꦶ, ꦨꦶꦏ꧀ꦑꦮꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦡꦺꦫꦺꦴ ꦨꦶꦏ꧀ꦑꦸ ꦱꦧ꧀ꦫꦲ꧀ꦩꦕꦴꦫꦷꦤꦁ ꦥꦶꦪꦺꦴ ꦕ ꦲꦺꦴꦠꦶ ꦩꦤꦴꦥꦺꦴ ꦕ ꦒꦫꦸ ꦕ ꦨꦴꦮꦤꦷꦪꦺꦴ ꦕ. ꦏꦠꦩꦺꦲꦶ ꦥꦚ꧀ꦕꦲꦶ? ꦱꦷꦭꦮꦴ ꦲꦺꦴꦠꦶ, ꦥꦴꦠꦶꦩꦺꦴꦏ꧀ꦑꦱꦁꦮꦫꦱꦁꦮꦸꦠꦺꦴ ꦮꦶꦲꦫꦠꦶ. ꦄꦴꦕꦴꦫꦒꦺꦴꦕꦫꦱꦩ꧀ꦥꦤ꧀ꦤꦺꦴ ꦄꦟꦸꦩꦠ꧀ꦠꦺꦱꦸ ꦮꦗ꧀ꦗꦺꦱꦸ ꦨꦪꦢꦱ꧀ꦱꦴꦮꦷ, ꦱꦩꦴꦢꦴꦪ ꦱꦶꦏ꧀ꦑꦠꦶ ꦱꦶꦏ꧀ꦑꦴꦥꦢꦺꦱꦸ; ꦧꦲꦸꦱ꧀ꦱꦸꦠꦺꦴ ꦲꦺꦴꦠꦶ ꦱꦸꦠꦣꦫꦺꦴ ꦱꦸꦠꦱꦤ꧀ꦤꦶꦕꦪꦺꦴ, ꦪꦺ ꦠꦺ ꦣꦩ꧀ꦩꦴ ꦄꦴꦢꦶꦏꦭ꧀ꦪꦴꦟꦴ ꦩꦗ꧀ꦙꦺꦏꦭ꧀ꦪꦴꦟꦴ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦴ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ [ꦱꦴꦠ꧀ꦡꦴ ꦱꦧ꧀ꦪꦚ꧀ꦗꦤꦴ (ꦱꦷ.)] ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦄꦨꦶꦮꦢꦤ꧀ꦠꦶ, ꦠꦡꦴꦫꦹꦥꦴꦱ꧀ꦱ ꦣꦩ꧀ꦩꦴ ꦧꦲꦸꦱ꧀ꦱꦸꦠꦴ ꦲꦺꦴꦤ꧀ꦠꦶ ꦣꦴꦠꦴ [ꦣꦠꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦮꦕꦱꦴ ꦥꦫꦶꦕꦶꦠꦴ ꦩꦤꦱꦴꦤꦸꦥꦺꦏ꧀ꦑꦶꦠꦴ ꦢꦶꦛ꧀ꦜꦶꦪꦴ ꦱꦸꦥ꧀ꦥꦛꦶꦮꦶꦢ꧀ꦣꦴ; ꦏꦭ꧀ꦪꦴꦟꦮꦴꦕꦺꦴ ꦲꦺꦴꦠꦶ ꦏꦭ꧀ꦪꦴꦟꦮꦴꦏ꧀ꦏꦫꦟꦺꦴ ꦥꦺꦴꦫꦶꦪꦴ ꦮꦴꦕꦴꦪ ꦱꦩꦤ꧀ꦤꦴꦒꦠꦺꦴ ꦮꦶꦱ꧀ꦱꦛ꧀ꦜꦴꦪ ꦄꦤꦺꦭꦒꦭ꦳ꦴꦪ ꦄꦠ꧀ꦡꦱ꧀ꦱ ꦮꦶꦚ꧀ꦚꦴꦥꦤꦶꦪꦴ; ꦕꦠꦸꦤ꧀ꦤꦁ ꦙꦴꦤꦴꦤꦁ ꦄꦴꦨꦶꦕꦺꦠꦱꦶꦏꦴꦤꦁ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦴꦤꦁ ꦤꦶꦏꦴꦩꦭꦴꦨꦷ ꦲꦺꦴꦠꦶ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷ; ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦡꦺꦫꦺꦴ ꦨꦶꦏ꧀ꦑꦸ ꦱꦧ꧀ꦫꦲ꧀ꦩꦕꦴꦫꦷꦤꦁ ꦥꦶꦪꦺꦴ ꦕ ꦲꦺꦴꦠꦶ ꦩꦤꦴꦥꦺꦴ ꦕ ꦒꦫꦸ ꦕ ꦨꦴꦮꦤꦷꦪꦺꦴ ꦕꦴ’’ꦠꦶ. ꦱꦠ꧀ꦠꦩꦁ.