꧑. ꦄꦴꦮꦫꦟꦱꦸꦠ꧀ꦠꦁ

꧕꧑. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦨꦶꦏ꧀ꦑꦮꦺꦴ’’ꦠꦶ. ‘‘ꦨꦢꦤ꧀ꦠꦺ’’ꦠꦶ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦄꦴꦮꦫꦟꦴ ꦤꦷꦮꦫꦟꦴ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦴ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦴ. ꦏꦠꦩꦺ ꦥꦚ꧀ꦕ? ꦏꦴꦩꦕ꧀ꦖꦤ꧀ꦢꦺꦴ, ꦨꦶꦏ꧀ꦑꦮꦺ, ꦄꦴꦮꦫꦟꦺꦴ ꦤꦷꦮꦫꦟꦺꦴ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦺꦴ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺꦴ. ꦧ꧀ꦪꦴꦥꦴꦢꦺꦴ, ꦨꦶꦏ꧀ꦑꦮꦺ, ꦄꦴꦮꦫꦟꦺꦴ ꦤꦷꦮꦫꦟꦺꦴ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦺꦴ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺꦴ. ꦡꦶꦤꦩꦶꦢ꧀ꦣꦁ, ꦨꦶꦏ꧀ꦑꦮꦺ, ꦄꦴꦮꦫꦟꦁ ꦤꦷꦮꦫꦟꦁ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦁ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦁ. ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦁ, ꦨꦶꦏ꧀ꦑꦮꦺ, ꦄꦴꦮꦫꦟꦁ ꦤꦷꦮꦫꦟꦁ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦁ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦁ. ꦮꦶꦕꦶꦏꦶꦕ꧀ꦖꦴ, ꦨꦶꦏ꧀ꦑꦮꦺ, ꦄꦴꦮꦫꦟꦴ ꦤꦷꦮꦫꦟꦴ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦴ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦴ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦄꦴꦮꦫꦟꦴ ꦤꦷꦮꦫꦟꦴ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦴ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦴ.

‘‘ꦱꦺꦴ ꦮꦠ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦆꦩꦺ ꦥꦚ꧀ꦕ ꦄꦴꦮꦫꦟꦺ ꦤꦷꦮꦫꦟꦺ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ ꦄꦥ꧀ꦥꦲꦴꦪ, ꦄꦧꦭꦴꦪ ꦥꦚ꧀ꦚꦴꦪ ꦢꦸꦧ꧀ꦧꦭꦴꦪ ꦄꦠ꧀ꦠꦠ꧀ꦡꦁ ꦮꦴ ꦚꦱ꧀ꦱꦠꦶ ꦥꦫꦠ꧀ꦡꦁ ꦮꦴ ꦚꦱ꧀ꦱꦠꦶ ꦈꦨꦪꦠ꧀ꦡꦁ ꦮꦴ ꦚꦱ꧀ꦱꦠꦶ ꦈꦠ꧀ꦠꦫꦶ [ꦈꦠ꧀ꦠꦫꦶꦁ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦮꦴ ꦩꦤꦸꦱ꧀ꦱꦣꦩ꧀ꦩꦴ ꦄꦭꦩꦫꦶꦪꦚꦴꦟꦢꦱ꧀ꦱꦤꦮꦶꦱꦺꦱꦁ ꦱꦕ꧀ꦖꦶꦏꦫꦶꦱ꧀ꦱꦠꦷꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦤꦢꦷ ꦥꦧ꧀ꦧꦠꦺꦪ꧀ꦪꦴ ꦢꦹꦫꦔ꧀ꦒꦩꦴ [ꦢꦹꦫꦒꦩꦴ (ꦱꦷ.)] ꦱꦷꦓꦱꦺꦴꦠꦴ ꦲꦴꦫꦲꦴꦫꦶꦤꦷ. ꦠꦱ꧀ꦱꦴ ꦥꦸꦫꦶꦱꦺꦴ ꦈꦨꦠꦺꦴ ꦤꦔ꧀ꦒꦭꦩꦸꦑꦴꦤꦶ ꦮꦶꦮꦫꦺꦪ꧀ꦪ. ꦌꦮꦚ꧀ꦲꦶ ꦱꦺꦴ, ꦨꦶꦏ꧀ꦑꦮꦺ, ꦩꦗ꧀ꦙꦺ ꦤꦢꦶꦪꦴ ꦱꦺꦴꦠꦺꦴ ꦮꦶꦏ꧀ꦑꦶꦠ꧀ꦠꦺꦴ ꦮꦶꦱꦛꦺꦴ ꦧ꧀ꦪꦴꦢꦶꦟ꧀ꦟꦺꦴ ꦤꦺꦮ [ꦤ ꦕꦺꦮ (ꦏ.)] ꦢꦹꦫꦔ꧀ꦒꦩꦺꦴ ꦄꦱ꧀ꦱ ꦤ [ꦤ ꦕ (ꦏ.)] ꦱꦷꦓꦱꦺꦴꦠꦺꦴ ꦤ [ꦤ ꦕ (ꦏ.)] ꦲꦴꦫꦲꦴꦫꦷ [ꦲꦴꦫꦲꦴꦫꦶꦟꦷ (ꦱꦷ.)]. ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦱꦺꦴ ꦮꦠ ꦨꦶꦏ꧀ꦑꦸ ꦆꦩꦺ ꦥꦚ꧀ꦕ ꦄꦴꦮꦫꦟꦺ ꦤꦷꦮꦫꦟꦺ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ ꦄꦥ꧀ꦥꦲꦴꦪ, ꦄꦧꦭꦴꦪ ꦥꦚ꧀ꦚꦴꦪ ꦢꦸꦧ꧀ꦧꦭꦴꦪ ꦄꦠ꧀ꦠꦠ꧀ꦡꦁ ꦮꦴ ꦚꦱ꧀ꦱꦠꦶ ꦥꦫꦠ꧀ꦡꦁ ꦮꦴ ꦚꦱ꧀ꦱꦠꦶ ꦈꦨꦪꦠ꧀ꦡꦁ ꦮꦴ ꦚꦱ꧀ꦱꦠꦶ ꦈꦠ꧀ꦠꦫꦶ ꦮꦴ ꦩꦤꦸꦱ꧀ꦱꦣꦩ꧀ꦩꦴ ꦄꦭꦩꦫꦶꦪꦚꦴꦟꦢꦱ꧀ꦱꦤꦮꦶꦱꦺꦱꦁ ꦱꦕ꧀ꦖꦶꦏꦫꦶꦱ꧀ꦱꦠꦷꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ.

‘‘ꦱꦺꦴ ꦮꦠ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦆꦩꦺ ꦥꦚ꧀ꦕ ꦄꦴꦮꦫꦟꦺ ꦤꦷꦮꦫꦟꦺ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ ꦥꦲꦴꦪ, ꦧꦭꦮꦠꦶꦪꦴ ꦥꦚ꧀ꦚꦴꦪ ꦄꦠ꧀ꦠꦠ꧀ꦡꦁ ꦮꦴ ꦚꦱ꧀ꦱꦠꦶ ꦥꦫꦠ꧀ꦡꦁ ꦮꦴ ꦚꦱ꧀ꦱꦠꦶ ꦈꦨꦪꦠ꧀ꦡꦁ ꦮꦴ ꦚꦱ꧀ꦱꦠꦶ ꦈꦠ꧀ꦠꦫꦶ ꦮꦴ ꦩꦤꦸꦱ꧀ꦱꦣꦩ꧀ꦩꦴ ꦄꦭꦩꦫꦶꦪꦚꦴꦟꦢꦱ꧀ꦱꦤꦮꦶꦱꦺꦱꦁ ꦱꦕ꧀ꦖꦶꦏꦫꦶꦱ꧀ꦱꦠꦷꦠꦶ ꦜꦴꦤꦩꦺꦠꦁ ꦮꦶꦗ꧀ꦗꦠꦶ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦤꦢꦷ ꦥꦧ꧀ꦧꦠꦺꦪ꧀ꦪꦴ ꦢꦹꦫꦔ꧀ꦒꦩꦴ ꦱꦷꦓꦱꦺꦴꦠꦴ ꦲꦴꦫꦲꦴꦫꦶꦤꦷ. ꦠꦱ꧀ꦱꦴ ꦥꦸꦫꦶꦱꦺꦴ ꦈꦨꦠꦺꦴ ꦤꦔ꧀ꦒꦭꦩꦸꦑꦴꦤꦶ ꦥꦶꦢꦲꦺꦪ꧀ꦪ. ꦌꦮꦚ꧀ꦲꦶ ꦱꦺꦴ, ꦨꦶꦏ꧀ꦑꦮꦺ, ꦩꦗ꧀ꦙꦺ ꦤꦢꦶꦪꦴ ꦱꦺꦴꦠꦺꦴ ꦄꦮꦶꦏ꧀ꦑꦶꦠ꧀ꦠꦺꦴ ꦄꦮꦶꦱꦛꦺꦴ ꦄꦧ꧀ꦪꦴꦢꦶꦟ꧀ꦟꦺꦴ ꦢꦹꦫꦔ꧀ꦒꦩꦺꦴ ꦕꦺꦮ ꦄꦱ꧀ꦱ ꦱꦷꦓꦱꦺꦴꦠꦺꦴ ꦕ ꦲꦴꦫꦲꦴꦫꦷ ꦕ. ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦱꦺꦴ ꦮꦠ ꦨꦶꦏ꧀ꦑꦸ ꦆꦩꦺ ꦥꦚ꧀ꦕ ꦄꦴꦮꦫꦟꦺ ꦤꦷꦮꦫꦟꦺ ꦕꦺꦠꦱꦺꦴ ꦄꦗ꧀ꦙꦴꦫꦸꦲꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ ꦥꦲꦴꦪ, ꦧꦭꦮꦠꦶꦪꦴ ꦥꦚ꧀ꦚꦴꦪ ꦄꦠ꧀ꦠꦠ꧀ꦡꦁ ꦮꦴ ꦚꦱ꧀ꦱꦠꦶ ꦥꦫꦠ꧀ꦡꦁ ꦮꦴ ꦚꦱ꧀ꦱꦠꦶ ꦈꦨꦪꦠ꧀ꦡꦁ ꦮꦴ ꦚꦱ꧀ꦱꦠꦶ ꦈꦠ꧀ꦠꦫꦶ ꦮꦴ ꦩꦤꦸꦱ꧀ꦱꦣꦩ꧀ꦩꦴ ꦄꦭꦩꦫꦶꦪꦚꦴꦟꦢꦱ꧀ꦱꦤꦮꦶꦱꦺꦱꦁ ꦱꦕ꧀ꦖꦶꦏꦫꦶꦱ꧀ꦱꦠꦷꦠꦶ ꦜꦴꦤꦩꦺꦠꦁ ꦮꦶꦗ꧀ꦗꦠꦷ’’ꦠꦶ. ꦥꦜꦩꦁ.