(꧒꧓) ꧓. ꦢꦸꦕ꧀ꦕꦫꦶꦠꦮꦒ꧀ꦒꦺꦴ

꧑. ꦢꦸꦕ꧀ꦕꦫꦶꦠꦱꦸꦠ꧀ꦠꦁ

꧒꧒꧑. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦮꦕꦷꦢꦸꦕ꧀ꦕꦫꦶꦠꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦩꦸꦱꦴꦮꦴꦢꦺꦴ, ꦥꦶꦱꦸꦟꦴ ꦮꦴꦕꦴ, ꦦꦫꦸꦱꦴ ꦮꦴꦕꦴ, ꦱꦩ꧀ꦦꦥ꧀ꦥꦭꦴꦥꦺꦴ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦮꦕꦷꦢꦸꦕ꧀ꦕꦫꦶꦠꦴꦤꦶ. ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦮꦕꦷꦱꦸꦕꦫꦶꦠꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦱꦕ꧀ꦕꦮꦴꦕꦴ, ꦄꦥꦶꦱꦸꦟꦴ ꦮꦴꦕꦴ, ꦱꦟ꧀ꦲꦴ ꦮꦴꦕꦴ, ꦩꦤ꧀ꦠꦮꦴꦕꦴ [ꦩꦤ꧀ꦠꦴ ꦮꦴꦕꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦮꦕꦷꦱꦸꦕꦫꦶꦠꦴꦤꦷ’’ꦠꦶ. ꦥꦜꦩꦁ.

꧒. ꦢꦶꦛ꧀ꦜꦶꦱꦸꦠ꧀ꦠꦁ

꧒꧒꧒. ‘‘ꦕꦠꦹꦲꦶ, ꦨꦶꦏ꧀ꦑꦮꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦧꦴꦭꦺꦴ ꦄꦧ꧀ꦪꦠ꧀ꦠꦺꦴ ꦄꦱꦥ꧀ꦥꦸꦫꦶꦱꦺꦴ ꦑꦠꦁ ꦈꦥꦲꦠꦁ ꦄꦠ꧀ꦠꦴꦤꦁ ꦥꦫꦶꦲꦫꦠꦶ, ꦱꦴꦮꦗ꧀ꦗꦺꦴ ꦕ ꦲꦺꦴꦠꦶ ꦱꦴꦤꦸꦮꦗ꧀ꦗꦺꦴ ꦕ ꦮꦶꦚ꧀ꦚꦹꦤꦁ; ꦧꦲꦸꦚ꧀ꦕ ꦄꦥꦸꦚ꧀ꦚꦁ ꦥꦱꦮꦠꦶ. ꦏꦠꦩꦺꦲꦶ ꦕꦠꦹꦲꦶ? ꦏꦴꦪꦢꦸꦕ꧀ꦕꦫꦶꦠꦺꦤ, ꦮꦕꦷꦢꦸꦕ꧀ꦕꦫꦶꦠꦺꦤ, ꦩꦤꦺꦴꦢꦸꦕ꧀ꦕꦫꦶꦠꦺꦤ, ꦩꦶꦕ꧀ꦖꦴꦢꦶꦛ꧀ꦜꦶꦪꦴ – ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦕꦠꦹꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦧꦴꦭꦺꦴ ꦄꦧ꧀ꦪꦠ꧀ꦠꦺꦴ ꦄꦱꦥ꧀ꦥꦸꦫꦶꦱꦺꦴ ꦑꦠꦁ ꦈꦥꦲꦠꦁ ꦄꦠ꧀ꦠꦴꦤꦁ ꦥꦫꦶꦲꦫꦠꦶ, ꦱꦴꦮꦗ꧀ꦗꦺꦴ ꦕ ꦲꦺꦴꦠꦶ ꦱꦴꦤꦸꦮꦗ꧀ꦗꦺꦴ ꦕ ꦮꦶꦚ꧀ꦚꦹꦤꦁ, ꦧꦲꦸꦚ꧀ꦕ ꦄꦥꦸꦚ꧀ꦚꦁ ꦥꦱꦮꦠꦶ.

‘‘ꦕꦠꦹꦲꦶ, ꦨꦶꦏ꧀ꦑꦮꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦥꦟ꧀ꦝꦶꦠꦺꦴ ꦮꦶꦪꦠ꧀ꦠꦺꦴ ꦱꦥ꧀ꦥꦸꦫꦶꦱꦺꦴ ꦄꦏ꧀ꦑꦠꦁ ꦄꦤꦸꦥꦲꦠꦁ ꦄꦠ꧀ꦠꦴꦤꦁ ꦥꦫꦶꦲꦫꦠꦶ, ꦄꦤꦮꦗ꧀ꦗꦺꦴ ꦕ ꦲꦺꦴꦠꦶ ꦄꦤꦤꦸꦮꦗ꧀ꦗꦺꦴ ꦮꦶꦚ꧀ꦚꦹꦤꦁ, ꦧꦲꦸꦚ꧀ꦕ ꦥꦸꦚ꧀ꦚꦁ ꦥꦱꦮꦠꦶ. ꦏꦠꦩꦺꦲꦶ ꦕꦠꦹꦲꦶ? ꦏꦴꦪꦱꦸꦕꦫꦶꦠꦺꦤ, ꦮꦕꦷꦱꦸꦕꦫꦶꦠꦺꦤ, ꦩꦤꦺꦴꦱꦸꦕꦫꦶꦠꦺꦤ, ꦱꦩ꧀ꦩꦴꦢꦶꦛ꧀ꦜꦶꦪꦴ – ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦕꦠꦹꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦥꦟ꧀ꦝꦶꦠꦺꦴ ꦮꦶꦪꦠ꧀ꦠꦺꦴ ꦱꦥ꧀ꦥꦸꦫꦶꦱꦺꦴ ꦄꦏ꧀ꦑꦠꦁ ꦄꦤꦸꦥꦲꦠꦁ ꦄꦠ꧀ꦠꦴꦤꦁ ꦥꦫꦶꦲꦫꦠꦶ, ꦄꦤꦮꦗ꧀ꦗꦺꦴ ꦕ ꦲꦺꦴꦠꦶ ꦄꦤꦤꦸꦮꦗ꧀ꦗꦺꦴ ꦮꦶꦚ꧀ꦚꦹꦤꦁ; ꦧꦲꦸꦚ꧀ꦕ ꦥꦸꦚ꧀ꦚꦁ ꦥꦱꦮꦠꦷ’’ꦠꦶ. ꦢꦸꦠꦶꦪꦁ.

꧓. ꦄꦏꦠꦚ꧀ꦚꦸꦠꦴꦱꦸꦠ꧀ꦠꦁ

꧒꧒꧓. ‘‘ꦕꦠꦹꦲꦶ, ꦨꦶꦏ꧀ꦑꦮꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦧꦴꦭꦺꦴ ꦄꦧ꧀ꦪꦠ꧀ꦠꦺꦴ ꦄꦱꦥ꧀ꦥꦸꦫꦶꦱꦺꦴ ꦑꦠꦁ ꦈꦥꦲꦠꦁ ꦄꦠ꧀ꦠꦴꦤꦁ ꦥꦫꦶꦲꦫꦠꦶ, ꦱꦴꦮꦗ꧀ꦗꦺꦴ ꦕ ꦲꦺꦴꦠꦶ ꦱꦴꦤꦸꦮꦗ꧀ꦗꦺꦴ ꦮꦶꦚ꧀ꦚꦹꦤꦁ, ꦧꦲꦸꦚ꧀ꦕ ꦄꦥꦸꦚ꧀ꦚꦁ ꦥꦱꦮꦠꦶ. ꦏꦠꦩꦺꦲꦶ ꦕꦠꦹꦲꦶ? ꦏꦴꦪꦢꦸꦕ꧀ꦕꦫꦶꦠꦺꦤ, ꦮꦕꦷꦢꦸꦕ꧀ꦕꦫꦶꦠꦺꦤ, ꦩꦤꦺꦴꦢꦸꦕ꧀ꦕꦫꦶꦠꦺꦤ, ꦄꦏꦠꦚ꧀ꦚꦸꦠꦴ ꦄꦏꦠꦮꦺꦢꦶꦠꦴ – ꦆꦩꦺꦲꦶ…ꦥꦺ… ꦥꦟ꧀ꦝꦶꦠꦺꦴ… ꦏꦴꦪꦱꦸꦕꦫꦶꦠꦺꦤ, ꦮꦕꦷꦱꦸꦕꦫꦶꦠꦺꦤ, ꦩꦤꦺꦴꦱꦸꦕꦫꦶꦠꦺꦤ ꦏꦠꦚ꧀ꦚꦸꦠꦴꦏꦠꦮꦺꦢꦶꦠꦴ…ꦥꦺ…. ꦠꦠꦶꦪꦁ.

꧔. ꦥꦴꦟꦴꦠꦶꦥꦴꦠꦷꦱꦸꦠ꧀ꦠꦁ

꧒꧒꧔. … ꦥꦴꦟꦴꦠꦶꦥꦴꦠꦷ ꦲꦺꦴꦠꦶ, ꦄꦢꦶꦤ꧀ꦤꦴꦢꦴꦪꦷ ꦲꦺꦴꦠꦶ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦷ ꦲꦺꦴꦠꦶ, ꦩꦸꦱꦴꦮꦴꦢꦷ ꦲꦺꦴꦠꦶ…ꦥꦺ… ꦥꦴꦟꦴꦠꦶꦥꦴꦠꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦄꦢꦶꦤ꧀ꦤꦴꦢꦴꦤꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦩꦸꦱꦴꦮꦴꦢꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ…ꦥꦺ…. ꦕꦠꦸꦠ꧀ꦡꦁ.

꧕. ꦥꦜꦩꦩꦒ꧀ꦒꦱꦸꦠ꧀ꦠꦁ

꧒꧒꧕. … ꦩꦶꦕ꧀ꦖꦴꦢꦶꦛ꧀ꦜꦶꦏꦺꦴ ꦲꦺꦴꦠꦶ, ꦩꦶꦕ꧀ꦖꦴꦱꦔ꧀ꦏꦥ꧀ꦥꦺꦴ ꦲꦺꦴꦠꦶ, ꦩꦶꦕ꧀ꦖꦴꦮꦴꦕꦺꦴ ꦲꦺꦴꦠꦶ, ꦩꦶꦕ꧀ꦖꦴꦏꦩ꧀ꦩꦤ꧀ꦠꦺꦴ ꦲꦺꦴꦠꦶ…ꦥꦺ… ꦱꦩ꧀ꦩꦴꦢꦶꦛ꧀ꦜꦶꦏꦺꦴ ꦲꦺꦴꦠꦶ, ꦱꦩ꧀ꦩꦴꦱꦔ꧀ꦏꦥ꧀ꦥꦺꦴ ꦲꦺꦴꦠꦶ, ꦱꦩ꧀ꦩꦴꦮꦴꦕꦺꦴ ꦲꦺꦴꦠꦶ, ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ ꦲꦺꦴꦠꦶ…ꦥꦺ…. ꦥꦚ꧀ꦕꦩꦁ.

꧖. ꦢꦸꦠꦶꦪꦩꦒ꧀ꦒꦱꦸꦠ꧀ꦠꦁ

꧒꧒꧖. … ꦩꦶꦕ꧀ꦖꦴꦄꦴꦗꦷꦮꦺꦴ ꦲꦺꦴꦠꦶ, ꦩꦶꦕ꧀ꦖꦴꦮꦴꦪꦴꦩꦺꦴ ꦲꦺꦴꦠꦶ, ꦩꦶꦕ꧀ꦖꦴꦱꦠꦶ ꦲꦺꦴꦠꦶ, ꦩꦶꦕ꧀ꦖꦴꦱꦩꦴꦣꦶ ꦲꦺꦴꦠꦶ…ꦥꦺ… ꦱꦩ꧀ꦩꦴꦄꦴꦗꦷꦮꦺꦴ ꦲꦺꦴꦠꦶ, ꦱꦩ꧀ꦩꦴꦮꦴꦪꦴꦩꦺꦴ ꦲꦺꦴꦠꦶ, ꦱꦩ꧀ꦩꦴꦱꦠꦶ ꦲꦺꦴꦠꦶ, ꦱꦩ꧀ꦩꦴꦱꦩꦴꦣꦶ ꦲꦺꦴꦠꦶ…ꦥꦺ…. ꦖꦛ꧀ꦜꦁ.

꧗. ꦥꦜꦩꦮꦺꦴꦲꦴꦫꦥꦡꦱꦸꦠ꧀ꦠꦁ

꧒꧒꧗. … ꦄꦢꦶꦛ꧀ꦜꦺ ꦢꦶꦛ꧀ꦜꦮꦴꦢꦷ ꦲꦺꦴꦠꦶ, ꦄꦱꦸꦠꦺ ꦱꦸꦠꦮꦴꦢꦷ ꦲꦺꦴꦠꦶ, ꦄꦩꦸꦠꦺ ꦩꦸꦠꦮꦴꦢꦷ ꦲꦺꦴꦠꦶ, ꦄꦮꦶꦚ꧀ꦚꦴꦠꦺ ꦮꦶꦚ꧀ꦚꦴꦠꦮꦴꦢꦷ ꦲꦺꦴꦠꦶ…ꦥꦺ… ꦄꦢꦶꦛ꧀ꦜꦺ ꦄꦢꦶꦛ꧀ꦜꦮꦴꦢꦷ ꦲꦺꦴꦠꦶ, ꦄꦱꦸꦠꦺ ꦄꦱꦸꦠꦮꦴꦢꦷ ꦲꦺꦴꦠꦶ, ꦄꦩꦸꦠꦺ ꦄꦩꦸꦠꦮꦴꦢꦷ ꦲꦺꦴꦠꦶ, ꦄꦮꦶꦚ꧀ꦚꦴꦠꦺ ꦄꦮꦶꦚ꧀ꦚꦴꦠꦮꦴꦢꦷ ꦲꦺꦴꦠꦶ…ꦥꦺ…. ꦱꦠ꧀ꦠꦩꦁ.

꧘. ꦢꦸꦠꦶꦪꦮꦺꦴꦲꦴꦫꦥꦡꦱꦸꦠ꧀ꦠꦁ

꧒꧒꧘. … ꦢꦶꦛ꧀ꦜꦺ ꦄꦢꦶꦛ꧀ꦜꦮꦴꦢꦷ ꦲꦺꦴꦠꦶ, ꦱꦸꦠꦺ ꦄꦱꦸꦠꦮꦴꦢꦷ ꦲꦺꦴꦠꦶ, ꦩꦸꦠꦺ ꦄꦩꦸꦠꦮꦴꦢꦷ ꦲꦺꦴꦠꦶ, ꦮꦶꦚ꧀ꦚꦴꦠꦺ ꦄꦮꦶꦚ꧀ꦚꦴꦠꦮꦴꦢꦷ ꦲꦺꦴꦠꦶ…ꦥꦺ… ꦢꦶꦛ꧀ꦜꦺ ꦢꦶꦛ꧀ꦜꦮꦴꦢꦷ ꦲꦺꦴꦠꦶ, ꦱꦸꦠꦺ ꦱꦸꦠꦮꦴꦢꦷ ꦲꦺꦴꦠꦶ, ꦩꦸꦠꦺ ꦩꦸꦠꦮꦴꦢꦷ ꦲꦺꦴꦠꦶ, ꦮꦶꦚ꧀ꦚꦴꦠꦺ ꦮꦶꦚ꧀ꦚꦴꦠꦮꦴꦢꦷ ꦲꦺꦴꦠꦶ…ꦥꦺ…. ꦄꦛ꧀ꦜꦩꦁ.

꧙. ꦄꦲꦶꦫꦶꦏꦱꦸꦠ꧀ꦠꦁ

꧒꧒꧙. … ꦄꦱ꧀ꦱꦢ꧀ꦣꦺꦴ ꦲꦺꦴꦠꦶ, ꦢꦸꦱ꧀ꦱꦷꦭꦺꦴ ꦲꦺꦴꦠꦶ, ꦄꦲꦶꦫꦶꦏꦺꦴ ꦲꦺꦴꦠꦶ, ꦄꦤꦺꦴꦠ꧀ꦠꦥ꧀ꦥꦷ ꦲꦺꦴꦠꦶ…ꦥꦺ… ꦱꦢ꧀ꦣꦺꦴ ꦲꦺꦴꦠꦶ, ꦱꦷꦭꦮꦴ ꦲꦺꦴꦠꦶ, ꦲꦶꦫꦶꦩꦴ ꦲꦺꦴꦠꦶ, ꦎꦠ꧀ꦠꦥ꧀ꦥꦷ ꦲꦺꦴꦠꦶ…ꦥꦺ…. ꦤꦮꦩꦁ.

꧑꧐. ꦢꦸꦥ꧀ꦥꦚ꧀ꦚꦱꦸꦠ꧀ꦠꦁ

꧒꧓꧐. … ꦄꦱ꧀ꦱꦢ꧀ꦣꦺꦴ ꦲꦺꦴꦠꦶ, ꦢꦸꦱ꧀ꦱꦷꦭꦺꦴ ꦲꦺꦴꦠꦶ, ꦏꦸꦱꦷꦠꦺꦴ ꦲꦺꦴꦠꦶ, ꦢꦸꦥ꧀ꦥꦚ꧀ꦚꦺꦴ ꦲꦺꦴꦠꦶ…ꦥꦺ… ꦱꦢ꧀ꦣꦺꦴ ꦲꦺꦴꦠꦶ, ꦱꦷꦭꦮꦴ ꦲꦺꦴꦠꦶ, ꦄꦴꦫꦢ꧀ꦣꦮꦷꦫꦶꦪꦺꦴ ꦲꦺꦴꦠꦶ, ꦥꦚ꧀ꦚꦮꦴ ꦲꦺꦴꦠꦶ – ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦕꦠꦹꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦥꦟ꧀ꦝꦶꦠꦺꦴ ꦮꦶꦪꦠ꧀ꦠꦺꦴ ꦱꦥ꧀ꦥꦸꦫꦶꦱꦺꦴ ꦄꦏ꧀ꦑꦠꦁ ꦄꦤꦸꦥꦲꦠꦁ ꦄꦠ꧀ꦠꦴꦤꦁ ꦥꦫꦶꦲꦫꦠꦶ, ꦄꦤꦮꦗ꧀ꦗꦺꦴ ꦕ ꦲꦺꦴꦠꦶ ꦄꦤꦤꦸꦮꦗ꧀ꦗꦺꦴ ꦮꦶꦚ꧀ꦚꦹꦤꦁ, ꦧꦲꦸꦚ꧀ꦕ ꦥꦸꦚ꧀ꦚꦁ ꦥꦱꦮꦠꦷ’’ꦠꦶ. ꦢꦱꦩꦁ.

꧑꧑. ꦏꦮꦶꦱꦸꦠ꧀ꦠꦁ

꧒꧓꧑. ‘‘ꦕꦠ꧀ꦠꦴꦫꦺꦴꦩꦺ, ꦨꦶꦏ꧀ꦑꦮꦺ, ꦏꦮꦷ. ꦏꦠꦩꦺ ꦕꦠ꧀ꦠꦴꦫꦺꦴ? ꦕꦶꦤ꧀ꦠꦴꦏꦮꦶ, ꦱꦸꦠꦏꦮꦶ, ꦄꦠ꧀ꦡꦏꦮꦶ, ꦥꦛꦶꦨꦴꦤꦏꦮꦶ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦺꦴ ꦏꦮꦷ’’ꦠꦶ. ꦌꦏꦴꦢꦱꦩꦁ.

ꦢꦸꦕ꧀ꦕꦫꦶꦠꦮꦒ꧀ꦒꦺꦴ ꦠꦠꦶꦪꦺꦴ.