꧕. ꦢꦸꦠꦶꦪꦑꦩꦱꦸꦠ꧀ꦠꦁ

꧑꧖꧕. ‘‘ꦕꦠꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦥꦛꦶꦥꦢꦴ. ꦏꦠꦩꦴ ꦕꦠꦱ꧀ꦱꦺꦴ? ꦄꦏ꧀ꦑꦩꦴ ꦥꦛꦶꦥꦢꦴ, ꦑꦩꦴ ꦥꦛꦶꦥꦢꦴ, ꦢꦩꦴ ꦥꦛꦶꦥꦢꦴ, ꦱꦩꦴ ꦥꦛꦶꦥꦢꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦄꦏ꧀ꦑꦩꦴ ꦥꦛꦶꦥꦢꦴ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦄꦏ꧀ꦑꦩꦺꦴ ꦲꦺꦴꦠꦶ ꦱꦷꦠꦱ꧀ꦱ ꦈꦟ꧀ꦲꦱ꧀ꦱ ꦗꦶꦓꦕ꧀ꦖꦴꦪ ꦥꦶꦥꦴꦱꦴꦪ, ꦝꦁꦱꦩꦏꦱꦮꦴꦠꦴꦠꦥꦱꦫꦷꦱꦥꦱꦩ꧀ꦦꦱ꧀ꦱꦴꦤꦁ ꦢꦸꦫꦸꦠ꧀ꦠꦴꦤꦁ ꦢꦸꦫꦴꦒꦠꦴꦤꦁ ꦮꦕꦤꦥꦡꦴꦤꦁ ꦈꦥ꧀ꦥꦤ꧀ꦤꦴꦤꦁ ꦱꦴꦫꦷꦫꦶꦏꦴꦤꦁ ꦮꦺꦢꦤꦴꦤꦁ ꦢꦸꦏ꧀ꦑꦴꦤꦁ ꦠꦶꦧ꧀ꦧꦴꦤꦁ ꦑꦫꦴꦤꦁ ꦏꦛꦸꦏꦴꦤꦁ ꦄꦱꦴꦠꦴꦤꦁ ꦄꦩꦤꦴꦥꦴꦤꦁ ꦥꦴꦟꦲꦫꦴꦤꦁ ꦄꦤꦣꦶꦮꦴꦱꦏꦗꦴꦠꦶꦏꦺꦴ ꦲꦺꦴꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦄꦏ꧀ꦑꦩꦴ ꦥꦛꦶꦥꦢꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦑꦩꦴ ꦥꦛꦶꦥꦢꦴ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦑꦩꦺꦴ ꦲꦺꦴꦠꦶ ꦱꦷꦠꦱ꧀ꦱ ꦈꦟ꧀ꦲꦱ꧀ꦱ ꦗꦶꦓꦕ꧀ꦖꦴꦪ ꦥꦶꦥꦴꦱꦴꦪ, ꦝꦁꦱꦩꦏꦱꦮꦴꦠꦴꦠꦥꦱꦫꦷꦱꦥꦱꦩ꧀ꦦꦱ꧀ꦱꦴꦤꦁ ꦢꦸꦫꦸꦠ꧀ꦠꦴꦤꦁ ꦢꦸꦫꦴꦒꦠꦴꦤꦁ ꦮꦕꦤꦥꦡꦴꦤꦁ ꦈꦥ꧀ꦥꦤ꧀ꦤꦴꦤꦁ ꦱꦴꦫꦷꦫꦶꦏꦴꦤꦁ ꦮꦺꦢꦤꦴꦤꦁ ꦢꦸꦏ꧀ꦑꦴꦤꦁ ꦠꦶꦧ꧀ꦧꦴꦤꦁ ꦑꦫꦴꦤꦁ ꦏꦛꦸꦏꦴꦤꦁ ꦄꦱꦴꦠꦴꦤꦁ ꦄꦩꦤꦴꦥꦴꦤꦁ ꦥꦴꦟꦲꦫꦴꦤꦁ ꦄꦣꦶꦮꦴꦱꦏꦗꦴꦠꦶꦏꦺꦴ ꦲꦺꦴꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦑꦩꦴ ꦥꦛꦶꦥꦢꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦢꦩꦴ ꦥꦛꦶꦥꦢꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦏ꧀ꦑꦸꦤꦴ ꦫꦹꦥꦁ ꦢꦶꦱ꧀ꦮꦴ ꦤ ꦤꦶꦩꦶꦠ꧀ꦠꦒ꧀ꦒꦴꦲꦷ ꦲꦺꦴꦠꦶ…ꦥꦺ… ꦱꦺꦴꦠꦺꦤ ꦱꦢ꧀ꦢꦁ ꦱꦸꦠ꧀ꦮꦴ… ꦓꦴꦤꦺꦤ ꦒꦤ꧀ꦣꦁ ꦓꦴꦪꦶꦠ꧀ꦮꦴ… ꦗꦶꦮ꧀ꦲꦴꦪ ꦫꦱꦁ ꦱꦴꦪꦶꦠ꧀ꦮꦴ… ꦏꦴꦪꦺꦤ ꦦꦺꦴꦛ꧀ꦜꦧ꧀ꦧꦁ ꦦꦸꦱꦶꦠ꧀ꦮꦴ… ꦩꦤꦱꦴ ꦣꦩ꧀ꦩꦁ ꦮꦶꦚ꧀ꦚꦴꦪ ꦤ ꦤꦶꦩꦶꦠ꧀ꦠꦒ꧀ꦒꦴꦲꦷ ꦲꦺꦴꦠꦶ ꦤꦴꦤꦸꦧ꧀ꦪꦚ꧀ꦗꦤꦒ꧀ꦒꦴꦲꦷ; ꦪꦠ꧀ꦮꦴꦣꦶꦏꦫꦟꦩꦺꦤꦁ ꦩꦤꦶꦤ꧀ꦢ꧀ꦫꦶꦪꦁ ꦄꦱꦁꦮꦸꦠꦁ ꦮꦶꦲꦫꦤ꧀ꦠꦁ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦺꦪ꧀ꦪꦸꦁ, ꦠꦱ꧀ꦱ ꦱꦁꦮꦫꦴꦪ ꦥꦛꦶꦥꦗ꧀ꦗꦠꦶ; ꦫꦏ꧀ꦑꦠꦶ ꦩꦤꦶꦤ꧀ꦢ꧀ꦫꦶꦪꦁ; ꦩꦤꦶꦤ꧀ꦢ꧀ꦫꦶꦪꦺ ꦱꦁꦮꦫꦁ ꦄꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦢꦩꦴ ꦥꦛꦶꦥꦢꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦱꦩꦴ ꦥꦛꦶꦥꦢꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦈꦥ꧀ꦥꦤ꧀ꦤꦁ ꦏꦴꦩꦮꦶꦠꦏ꧀ꦏꦁ ꦤꦴꦣꦶꦮꦴꦱꦺꦠꦶ ꦥꦗꦲꦠꦶ ꦮꦶꦤꦺꦴꦢꦺꦠꦶ ꦱꦩꦺꦠꦶ ꦧ꧀ꦪꦤ꧀ꦠꦷꦏꦫꦺꦴꦠꦶ ꦄꦤꦨꦴꦮꦁ ꦒꦩꦺꦠꦶ, ꦈꦥ꧀ꦥꦤ꧀ꦤꦁ ꦧ꧀ꦪꦴꦥꦴꦢꦮꦶꦠꦏ꧀ꦏꦁ…ꦥꦺ… ꦈꦥ꧀ꦥꦤ꧀ꦤꦁ ꦮꦶꦲꦶꦁꦱꦴꦮꦶꦠꦏ꧀ꦏꦁ… ꦈꦥ꧀ꦥꦤ꧀ꦤꦸꦥ꧀ꦥꦤ꧀ꦤꦺ ꦥꦴꦥꦏꦺ ꦄꦏꦸꦱꦭꦺ ꦣꦩ꧀ꦩꦺ ꦤꦴꦣꦶꦮꦴꦱꦺꦠꦶ ꦥꦗꦲꦠꦶ ꦮꦶꦤꦺꦴꦢꦺꦠꦶ ꦱꦩꦺꦠꦶ ꦧ꧀ꦪꦤ꧀ꦠꦷꦏꦫꦺꦴꦠꦶ ꦄꦤꦨꦴꦮꦁ ꦒꦩꦺꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦱꦩꦴ ꦥꦛꦶꦥꦢꦴ. ꦆꦩꦴ ꦑꦺꦴ, ꦨꦶꦏ꧀ꦑꦮꦺ, ꦕꦠꦱ꧀ꦱꦺꦴ ꦥꦛꦶꦥꦢꦴ’’ꦠꦶ. ꦥꦚ꧀ꦕꦩꦁ.