(꧑꧖) ꧑. ꦆꦤ꧀ꦢ꧀ꦫꦶꦪꦮꦒ꧀ꦒꦺꦴ

꧑. ꦆꦤ꧀ꦢ꧀ꦫꦶꦪꦱꦸꦠ꧀ꦠꦁ

꧑꧕꧑. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦆꦤ꧀ꦢ꧀ꦫꦶꦪꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦱꦢ꧀ꦣꦶꦤ꧀ꦢ꧀ꦫꦶꦪꦁ, ꦮꦷꦫꦶꦪꦶꦤ꧀ꦢ꧀ꦫꦶꦪꦁ, ꦱꦠꦶꦤ꧀ꦢ꧀ꦫꦶꦪꦁ, ꦱꦩꦴꦣꦶꦤ꧀ꦢ꧀ꦫꦶꦪꦁ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦆꦤ꧀ꦢ꧀ꦫꦶꦪꦴꦤꦷ’’ꦠꦶ. ꦥꦜꦩꦁ.

꧒. ꦱꦢ꧀ꦣꦴꦧꦭꦱꦸꦠ꧀ꦠꦁ

꧑꧕꧒. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦧꦭꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦱꦢ꧀ꦣꦴꦧꦭꦁ, ꦮꦷꦫꦶꦪꦧꦭꦁ, ꦱꦠꦶꦧꦭꦁ, ꦱꦩꦴꦣꦶꦧꦭꦁ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦧꦭꦴꦤꦷ’’ꦠꦶ. ꦢꦸꦠꦶꦪꦁ.

꧓. ꦥꦚ꧀ꦚꦴꦧꦭꦱꦸꦠ꧀ꦠꦁ

꧑꧕꧓. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦧꦭꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦥꦚ꧀ꦚꦴꦧꦭꦁ, ꦮꦷꦫꦶꦪꦧꦭꦁ, ꦄꦤꦮꦗ꧀ꦗꦧꦭꦁ, ꦱꦔ꧀ꦒꦲꦧꦭꦁ [ꦱꦔ꧀ꦒꦴꦲꦧꦭꦁ (ꦱꦷ. ꦱ꧀ꦪꦴ. ꦏꦁ. ꦥꦷ.)] – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦧꦭꦴꦤꦷ’’ꦠꦶ. ꦠꦠꦶꦪꦁ.

꧔. ꦱꦠꦶꦧꦭꦱꦸꦠ꧀ꦠꦁ

꧑꧕꧔. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦧꦭꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦱꦠꦶꦧꦭꦁ, ꦱꦩꦴꦣꦶꦧꦭꦁ, ꦄꦤꦮꦗ꧀ꦗꦧꦭꦁ, ꦱꦔ꧀ꦒꦲꦧꦭꦁ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦧꦭꦴꦤꦷ’’ꦠꦶ. ꦕꦠꦸꦠ꧀ꦡꦁ.

꧕. ꦥꦛꦶꦱꦔ꧀ꦑꦴꦤꦧꦭꦱꦸꦠ꧀ꦠꦁ

꧑꧕꧕. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦧꦭꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦥꦛꦶꦱꦔ꧀ꦑꦴꦤꦧꦭꦁ, ꦨꦴꦮꦤꦴꦧꦭꦁ, ꦄꦤꦮꦗ꧀ꦗꦧꦭꦁ, ꦱꦔ꧀ꦒꦲꦧꦭꦁ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦧꦭꦴꦤꦷ’’ꦠꦶ. ꦥꦚ꧀ꦕꦩꦁ.

꧖. ꦏꦥ꧀ꦥꦱꦸꦠ꧀ꦠꦁ

꧑꧕꧖. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦏꦥ꧀ꦥꦱ꧀ꦱ ꦄꦱꦔ꧀ꦑ꧀ꦪꦺꦪ꧀ꦪꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦪꦢꦴ, ꦨꦶꦏ꧀ꦑꦮꦺ, ꦏꦥ꧀ꦥꦺꦴ ꦱꦁꦮꦛ꧀ꦛꦠꦶ, ꦠꦁ ꦤ ꦱꦸꦏꦫꦁ ꦱꦔ꧀ꦑꦴꦠꦸꦁ – ꦌꦠ꧀ꦠꦏꦴꦤꦶ ꦮꦱ꧀ꦱꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦠꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦲꦱ꧀ꦱꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦠꦱꦲꦱ꧀ꦱꦴꦤꦷꦠꦶ ꦮꦴ.

‘‘ꦪꦢꦴ, ꦨꦶꦏ꧀ꦑꦮꦺ, ꦏꦥ꧀ꦥꦺꦴ ꦱꦁꦮꦛ꧀ꦛꦺꦴ ꦠꦶꦛ꧀ꦜꦠꦶ, ꦠꦁ ꦤ ꦱꦸꦏꦫꦁ ꦱꦔ꧀ꦑꦴꦠꦸꦁ – ꦌꦠ꧀ꦠꦏꦴꦤꦶ ꦮꦱ꧀ꦱꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦠꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦲꦱ꧀ꦱꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦠꦱꦲꦱ꧀ꦱꦴꦤꦷꦠꦶ ꦮꦴ.

‘‘ꦪꦢꦴ, ꦨꦶꦏ꧀ꦑꦮꦺ, ꦏꦥ꧀ꦥꦺꦴ ꦮꦶꦮꦛ꧀ꦛꦠꦶ, ꦠꦁ ꦤ ꦱꦸꦏꦫꦁ ꦱꦔ꧀ꦑꦴꦠꦸꦁ – ꦌꦠ꧀ꦠꦏꦴꦤꦶ ꦮꦱ꧀ꦱꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦠꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦲꦱ꧀ꦱꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦠꦱꦲꦱ꧀ꦱꦴꦤꦷꦠꦶ ꦮꦴ.

‘‘ꦪꦢꦴ, ꦨꦶꦏ꧀ꦑꦮꦺ, ꦏꦥ꧀ꦥꦺꦴ ꦮꦶꦮꦛ꧀ꦛꦺꦴ ꦠꦶꦛ꧀ꦜꦠꦶ, ꦠꦁ ꦤ ꦱꦸꦏꦫꦁ ꦱꦔ꧀ꦑꦴꦠꦸꦁ – ꦌꦠ꧀ꦠꦏꦴꦤꦶ ꦮꦱ꧀ꦱꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦠꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦲꦱ꧀ꦱꦴꦤꦷꦠꦶ ꦮꦴ, ꦌꦠ꧀ꦠꦏꦴꦤꦶ ꦮꦱ꧀ꦱꦱꦠꦱꦲꦱ꧀ꦱꦴꦤꦷꦠꦶ ꦮꦴ. ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦏꦥ꧀ꦥꦱ꧀ꦱ ꦄꦱꦔ꧀ꦑ꧀ꦪꦺꦪ꧀ꦪꦴꦤꦷ’’ꦠꦶ. ꦖꦛ꧀ꦜꦁ.

꧗. ꦫꦺꦴꦒꦱꦸꦠ꧀ꦠꦁ

꧑꧕꧗. ‘‘ꦢ꧀ꦮꦺꦩꦺ, ꦨꦶꦏ꧀ꦑꦮꦺ, ꦫꦺꦴꦒꦴ. ꦏꦠꦩꦺ ꦢ꧀ꦮꦺ? ꦏꦴꦪꦶꦏꦺꦴ ꦕ ꦫꦺꦴꦒꦺꦴ ꦕꦺꦠꦱꦶꦏꦺꦴ ꦕ ꦫꦺꦴꦒꦺꦴ. ꦢꦶꦱ꧀ꦱꦤ꧀ꦠꦶ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦏꦴꦪꦶꦏꦺꦤ ꦫꦺꦴꦒꦺꦤ ꦌꦏꦩ꧀ꦥꦶ ꦮꦱ꧀ꦱꦁ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦢ꧀ꦮꦺꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦠꦷꦟꦶꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦕꦠ꧀ꦠꦴꦫꦶꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦥꦚ꧀ꦕꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦢꦱꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦮꦷꦱꦠꦶꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦠꦶꦁꦱꦩ꧀ꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦕꦠ꧀ꦠꦴꦫꦷꦱꦩ꧀ꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦥꦚ꧀ꦚꦴꦱꦩ꧀ꦥꦶ ꦮꦱ꧀ꦱꦴꦤꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ, ꦮꦱ꧀ꦱꦱꦠꦩ꧀ꦥꦶ, ꦨꦶꦪ꧀ꦪꦺꦴꦥꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦩꦴꦤꦴ. ꦠꦺ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦱꦸꦢꦸꦭ꧀ꦭꦨꦴ [ꦢꦸꦭ꧀ꦭꦨꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦭꦺꦴꦏꦱ꧀ꦩꦶꦁ ꦪꦺ ꦕꦺꦠꦱꦶꦏꦺꦤ ꦫꦺꦴꦒꦺꦤ ꦩꦸꦲꦸꦠ꧀ꦠꦩ꧀ꦥꦶ ꦄꦴꦫꦺꦴꦒ꧀ꦪꦁ ꦥꦛꦶꦗꦴꦤꦤ꧀ꦠꦶ, ꦄꦚ꧀ꦚꦠ꧀ꦫ ꦑꦷꦟꦴꦱꦮꦺꦲꦶ.

‘‘ꦕꦠ꧀ꦠꦴꦫꦺꦴꦩꦺ, ꦨꦶꦏ꧀ꦑꦮꦺ, ꦥꦧ꧀ꦧꦗꦶꦠꦱ꧀ꦱ ꦫꦺꦴꦒꦴ. ꦏꦠꦩꦺ ꦕꦠ꧀ꦠꦴꦫꦺꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦩꦲꦶꦕ꧀ꦖꦺꦴ ꦲꦺꦴꦠꦶ ꦮꦶꦓꦴꦠꦮꦴ ꦄꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦺꦤ. ꦱꦺꦴ ꦩꦲꦶꦕ꧀ꦖꦺꦴ ꦱꦩꦴꦤꦺꦴ ꦮꦶꦓꦴꦠꦮꦴ ꦄꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦺꦤ ꦥꦴꦥꦶꦏꦁ ꦆꦕ꧀ꦖꦁ ꦥꦟꦶꦢꦲꦠꦶ ꦄꦤꦮꦚ꧀ꦚꦥ꧀ꦥꦛꦶꦭꦴꦨꦴꦪ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦥ꧀ꦥꦛꦶꦭꦴꦨꦴꦪ. ꦱꦺꦴ ꦈꦛ꧀ꦜꦲꦠꦶ ꦓꦛꦠꦶ ꦮꦴꦪꦩꦠꦶ ꦄꦤꦮꦚ꧀ꦚꦥ꧀ꦥꦛꦶꦭꦴꦨꦴꦪ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦥ꧀ꦥꦛꦶꦭꦴꦨꦴꦪ. ꦱꦺꦴ ꦱꦔ꧀ꦑꦴꦪ ꦏꦸꦭꦴꦤꦶ ꦈꦥꦱꦔ꧀ꦏꦩꦠꦶ, ꦱꦔ꧀ꦑꦴꦪ ꦤꦶꦱꦷꦢꦠꦶ, ꦱꦔ꧀ꦑꦴꦪ ꦣꦩ꧀ꦩꦁ ꦨꦴꦱꦠꦶ, ꦱꦔ꧀ꦑꦴꦪ ꦈꦕ꧀ꦕꦴꦫꦥꦱ꧀ꦱꦴꦮꦁ ꦱꦤ꧀ꦣꦴꦫꦺꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦺꦴ ꦥꦧ꧀ꦧꦗꦶꦠꦱ꧀ꦱ ꦫꦺꦴꦒꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦌꦮꦁ ꦱꦶꦏ꧀ꦑꦶꦠꦧ꧀ꦧꦁ – ‘ꦤ ꦩꦲꦶꦕ꧀ꦖꦴ ꦨꦮꦶꦱ꧀ꦱꦴꦩ ꦮꦶꦓꦴꦠꦮꦤ꧀ꦠꦺꦴ ꦄꦱꦤ꧀ꦠꦸꦛ꧀ꦜꦴ ꦆꦠꦫꦷꦠꦫꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦺꦤ, ꦤ ꦥꦴꦥꦶꦏꦁ ꦆꦕ꧀ꦖꦁ ꦥꦟꦶꦢꦲꦶꦱ꧀ꦱꦴꦩ ꦄꦤꦮꦚ꧀ꦚꦥ꧀ꦥꦛꦶꦭꦴꦨꦴꦪ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦥ꧀ꦥꦛꦶꦭꦴꦨꦴꦪ, ꦤ ꦈꦛ꧀ꦜꦲꦶꦱ꧀ꦱꦴꦩ ꦤ ꦓꦛꦺꦱ꧀ꦱꦴꦩ ꦤ ꦮꦴꦪꦩꦶꦱ꧀ꦱꦴꦩ ꦄꦤꦮꦚ꧀ꦚꦥ꧀ꦥꦛꦶꦭꦴꦨꦴꦪ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦥ꧀ꦥꦛꦶꦭꦴꦨꦴꦪ, ꦑꦩꦴ ꦨꦮꦶꦱ꧀ꦱꦴꦩ ꦱꦷꦠꦱ꧀ꦱ ꦈꦟ꧀ꦲꦱ꧀ꦱ ꦗꦶꦓꦕ꧀ꦖꦴꦪ ꦥꦶꦥꦴꦱꦴꦪ ꦝꦁꦱꦩꦏꦱꦮꦴꦠꦴꦠꦥꦱꦫꦷꦱꦥꦱꦩ꧀ꦦꦱ꧀ꦱꦴꦤꦁ ꦢꦸꦫꦸꦠ꧀ꦠꦴꦤꦁ ꦢꦸꦫꦴꦒꦠꦴꦤꦁ ꦮꦕꦤꦥꦡꦴꦤꦁ, ꦈꦥ꧀ꦥꦤ꧀ꦤꦴꦤꦁ ꦱꦴꦫꦷꦫꦶꦏꦴꦤꦁ ꦮꦺꦢꦤꦴꦤꦁ ꦢꦸꦏ꧀ꦑꦴꦤꦁ ꦠꦶꦧ꧀ꦧꦴꦤꦁ ꦑꦫꦴꦤꦁ ꦏꦛꦸꦏꦴꦤꦁ ꦄꦱꦴꦠꦴꦤꦁ ꦄꦩꦤꦴꦥꦴꦤꦁ ꦥꦴꦟꦲꦫꦴꦤꦁ ꦄꦣꦶꦮꦴꦱꦏꦗꦴꦠꦶꦏꦴ ꦨꦮꦶꦱ꧀ꦱꦴꦩꦴ’ꦠꦶ. ꦌꦮꦚ꧀ꦲꦶ ꦮꦺꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦶꦠꦧ꧀ꦧ’’ꦤ꧀ꦠꦶ. ꦱꦠ꧀ꦠꦩꦁ.

꧘. ꦥꦫꦶꦲꦴꦤꦶꦱꦸꦠ꧀ꦠꦁ

꧑꧕꧘. ꦠꦠ꧀ꦫ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦴꦮꦸꦱꦺꦴ ꦨꦶꦏ꧀ꦑꦮꦺ’’ꦠꦶ. ‘‘ꦄꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦌꦠꦢꦮꦺꦴꦕ –

‘‘ꦪꦺꦴ ꦲꦶ ꦏꦺꦴꦕꦶ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦮꦴ ꦨꦶꦏ꧀ꦑꦸꦤꦷ ꦮꦴ ꦕꦠ꧀ꦠꦴꦫꦺꦴ ꦣꦩ꧀ꦩꦺ ꦄꦠ꧀ꦠꦤꦶ ꦱꦩꦤꦸꦥꦱ꧀ꦱꦠꦶ, ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ – ‘ꦥꦫꦶꦲꦴꦪꦴꦩꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ’. ꦥꦫꦶꦲꦴꦤꦩꦺꦠꦁ ꦮꦸꦠ꧀ꦠꦁ ꦨꦒꦮꦠꦴ. ꦏꦠꦩꦺ ꦕꦠ꧀ꦠꦴꦫꦺꦴ? ꦫꦴꦒꦮꦺꦥꦸꦭ꧀ꦭꦠ꧀ꦠꦁ [ꦫꦴꦒꦮꦺꦥꦸꦭ꧀ꦭꦠꦁ (ꦱꦷ. ꦱ꧀ꦪꦴ. ꦏꦁ. ꦥꦷ.)], ꦢꦺꦴꦱꦮꦺꦥꦸꦭ꧀ꦭꦠ꧀ꦠꦁ, ꦩꦺꦴꦲꦮꦺꦥꦸꦭ꧀ꦭꦠ꧀ꦠꦁ, ꦒꦩ꧀ꦨꦷꦫꦺꦱꦸ ꦑꦺꦴ ꦥꦤꦱ꧀ꦱ ꦜꦴꦤꦴꦜꦴꦤꦺꦱꦸ ꦥꦚ꧀ꦚꦴꦕꦏ꧀ꦑꦸ ꦤ ꦏꦩꦠꦶ. ꦪꦺꦴ ꦲꦶ ꦏꦺꦴꦕꦶ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦮꦴ ꦨꦶꦏ꧀ꦑꦸꦤꦷ ꦮꦴ ꦆꦩꦺ ꦕꦠ꧀ꦠꦴꦫꦺꦴ ꦣꦩ꧀ꦩꦺ ꦄꦠ꧀ꦠꦤꦶ ꦱꦩꦤꦸꦥꦱ꧀ꦱꦠꦶ, ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ – ‘ꦥꦫꦶꦲꦴꦪꦴꦩꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ’. ꦥꦫꦶꦲꦴꦤꦩꦺꦠꦁ ꦮꦸꦠ꧀ꦠꦁ ꦨꦒꦮꦠꦴ.

‘‘ꦪꦺꦴ ꦲꦶ ꦏꦺꦴꦕꦶ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦮꦴ ꦨꦶꦏ꧀ꦑꦸꦤꦷ ꦮꦴ ꦕꦠ꧀ꦠꦴꦫꦺꦴ ꦣꦩ꧀ꦩꦺ ꦄꦠ꧀ꦠꦤꦶ ꦱꦩꦤꦸꦥꦱ꧀ꦱꦠꦶ, ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ – ‘ꦤ ꦥꦫꦶꦲꦴꦪꦴꦩꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ’. ꦄꦥꦫꦶꦲꦴꦤꦩꦺꦠꦁ ꦮꦸꦠ꧀ꦠꦁ ꦨꦒꦮꦠꦴ. ꦏꦠꦩꦺ ꦕꦠ꧀ꦠꦴꦫꦺꦴ? ꦫꦴꦒꦠꦤꦸꦠ꧀ꦠꦁ [ꦫꦴꦒꦠꦤꦸꦠ꧀ꦠꦤꦁ (ꦏ.)], ꦢꦺꦴꦱꦠꦤꦸꦠ꧀ꦠꦁ, ꦩꦺꦴꦲꦠꦤꦸꦠ꧀ꦠꦁ, ꦒꦩ꧀ꦨꦷꦫꦺꦱꦸ ꦑꦺꦴ ꦥꦤꦱ꧀ꦱ ꦜꦴꦤꦴꦜꦴꦤꦺꦱꦸ ꦥꦚ꧀ꦚꦴꦕꦏ꧀ꦑꦸ ꦏꦩꦠꦶ. ꦪꦺꦴ ꦲꦶ ꦏꦺꦴꦕꦶ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦮꦴ ꦨꦶꦏ꧀ꦑꦸꦤꦷ ꦮꦴ ꦆꦩꦺ ꦕꦠ꧀ꦠꦴꦫꦺꦴ ꦣꦩ꧀ꦩꦺ ꦄꦠ꧀ꦠꦤꦶ ꦱꦩꦤꦸꦥꦱ꧀ꦱꦠꦶ, ꦤꦶꦛ꧀ꦜꦩꦺꦠ꧀ꦡ ꦒꦤ꧀ꦠꦧ꧀ꦧꦁ – ‘ꦤ ꦥꦫꦶꦲꦴꦪꦴꦩꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ’. ꦄꦥꦫꦶꦲꦴꦤꦩꦺꦠꦁ ꦮꦸꦠ꧀ꦠꦁ ꦨꦒꦮꦠꦴ’’ꦠꦶ. ꦄꦛ꧀ꦜꦩꦁ.

꧙. ꦨꦶꦏ꧀ꦑꦸꦤꦷꦱꦸꦠ꧀ꦠꦁ

꧑꧕꧙. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦏꦺꦴꦱꦩ꧀ꦧꦶꦪꦁ ꦮꦶꦲꦫꦠꦶ ꦓꦺꦴꦱꦶꦠꦴꦫꦴꦩꦺ. ꦄꦡ ꦑꦺꦴ ꦄꦚ꧀ꦚꦠꦫꦴ ꦨꦶꦏ꧀ꦑꦸꦤꦷ ꦄꦚ꧀ꦚꦠꦫꦁ ꦥꦸꦫꦶꦱꦁ ꦄꦴꦩꦤ꧀ꦠꦺꦱꦶ – ‘‘ꦌꦲꦶ ꦠ꧀ꦮꦁ, ꦄꦩ꧀ꦨꦺꦴ ꦥꦸꦫꦶꦱ, ꦪꦺꦤꦪ꧀ꦪꦺꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩ; ꦈꦥꦱꦔ꧀ꦏꦩꦶꦠ꧀ꦮꦴ ꦩꦩ ꦮꦕꦤꦺꦤ ꦄꦪ꧀ꦪꦱ꧀ꦱ ꦄꦴꦤꦤ꧀ꦢꦱ꧀ꦱ ꦥꦴꦢꦺ ꦱꦶꦫꦱꦴ ꦮꦤ꧀ꦢ – ‘ꦆꦠ꧀ꦡꦤ꧀ꦤꦴꦩꦴ, ꦨꦤ꧀ꦠꦺ, ꦨꦶꦏ꧀ꦑꦸꦤꦷ ꦄꦴꦧꦴꦣꦶꦏꦶꦤꦷ ꦢꦸꦏ꧀ꦑꦶꦠꦴ ꦧꦴꦭ꦳꧀ꦲꦒꦶꦭꦴꦤꦴ. ꦱꦴ ꦄꦪ꧀ꦪꦱ꧀ꦱ ꦄꦴꦤꦤ꧀ꦢꦱ꧀ꦱ ꦥꦴꦢꦺ ꦱꦶꦫꦱꦴ ꦮꦤ꧀ꦢꦠꦷ’ꦠꦶ. ꦌꦮꦚ꧀ꦕ ꦮꦢꦺꦲꦶ – ‘ꦱꦴꦣꦸ ꦏꦶꦫ, ꦨꦤ꧀ꦠꦺ, ꦄꦪ꧀ꦪꦺꦴ ꦄꦴꦤꦤ꧀ꦢꦺꦴ ꦪꦺꦤ ꦨꦶꦏ꧀ꦑꦸꦤꦸꦥꦱ꧀ꦱꦪꦺꦴ ꦪꦺꦤ ꦱꦴ ꦨꦶꦏ꧀ꦑꦸꦤꦷ ꦠꦺꦤꦸꦥꦱꦔ꧀ꦏꦩꦠꦸ ꦄꦤꦸꦏꦩ꧀ꦥꦁ ꦈꦥꦴꦢꦴꦪꦴ’’’ꦠꦶ. ‘‘ꦌꦮꦁ, ꦄꦪ꧀ꦪꦺ’’ꦠꦶ ꦑꦺꦴ ꦱꦺꦴ ꦥꦸꦫꦶꦱꦺꦴ ꦠꦱ꧀ꦱꦴ ꦨꦶꦏ꧀ꦑꦸꦤꦶꦪꦴ ꦥꦛꦶꦱ꧀ꦱꦸꦠ꧀ꦮꦴ ꦪꦺꦤꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦱꦺꦴ ꦥꦸꦫꦶꦱꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕ –

‘‘ꦆꦠ꧀ꦡꦤ꧀ꦤꦴꦩꦴ, ꦨꦤ꧀ꦠꦺ, ꦨꦶꦏ꧀ꦑꦸꦤꦷ ꦄꦴꦧꦴꦣꦶꦏꦶꦤꦷ ꦢꦸꦏ꧀ꦑꦶꦠꦴ ꦧꦴꦭ꦳꧀ꦲꦒꦶꦭꦴꦤꦴ. ꦱꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦥꦴꦢꦺ ꦱꦶꦫꦱꦴ ꦮꦤ꧀ꦢꦠꦶ, ꦌꦮꦚ꧀ꦕ ꦮꦢꦺꦠꦶ – ‘ꦱꦴꦣꦸ ꦏꦶꦫ, ꦨꦤ꧀ꦠꦺ, ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦨꦶꦏ꧀ꦑꦸꦤꦸꦥꦱ꧀ꦱꦪꦺꦴ ꦪꦺꦤ ꦱꦴ ꦨꦶꦏ꧀ꦑꦸꦤꦷ ꦠꦺꦤꦸꦥꦱꦔ꧀ꦏꦩꦠꦸ ꦄꦤꦸꦏꦩ꧀ꦥꦁ ꦈꦥꦴꦢꦴꦪꦴ’’’ꦠꦶ. ꦄꦣꦶꦮꦴꦱꦺꦱꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦸꦟ꧀ꦲꦷꦨꦴꦮꦺꦤ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦪꦺꦤ ꦨꦶꦏ꧀ꦑꦸꦤꦸꦥꦱ꧀ꦱꦪꦺꦴ ꦪꦺꦤ ꦱꦴ ꦨꦶꦏ꧀ꦑꦸꦤꦷ ꦠꦺꦤꦸꦥꦱꦔ꧀ꦏꦩꦶ. ꦄꦢ꧀ꦢꦱꦴ ꦑꦺꦴ ꦱꦴ ꦨꦶꦏ꧀ꦑꦸꦤꦷ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ. ꦢꦶꦱ꧀ꦮꦴ ꦱꦱꦷꦱꦁ ꦥꦴꦫꦸꦥꦶꦠ꧀ꦮꦴ ꦩꦚ꧀ꦕꦏꦺ ꦤꦶꦥꦗ꧀ꦗꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦱꦴ ꦨꦶꦏ꧀ꦑꦸꦤꦷ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦤꦶꦱꦗ꧀ꦗ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦁ ꦨꦶꦏ꧀ꦑꦸꦤꦶꦁ ꦌꦠꦢꦮꦺꦴꦕ –

‘‘ꦄꦴꦲꦴꦫꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦄꦴꦲꦴꦫꦁ ꦤꦶꦱ꧀ꦱꦴꦪ. ꦄꦴꦲꦴꦫꦺꦴ ꦥꦲꦴꦠꦧ꧀ꦧꦺꦴ. ꦠꦟ꧀ꦲꦴꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦠꦟ꧀ꦲꦁ ꦤꦶꦱ꧀ꦱꦴꦪ. ꦠꦟ꧀ꦲꦴ ꦥꦲꦴꦠꦧ꧀ꦧꦴ. ꦩꦴꦤꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦩꦴꦤꦁ ꦤꦶꦱ꧀ꦱꦴꦪ. ꦩꦴꦤꦺꦴ ꦥꦲꦴꦠꦧ꧀ꦧꦺꦴ. ꦩꦺꦡꦸꦤꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ. ꦩꦺꦡꦸꦤꦺ ꦕ ꦱꦺꦠꦸꦓꦴꦠꦺꦴ ꦮꦸꦠ꧀ꦠꦺꦴ ꦨꦒꦮꦠꦴ.

‘‘‘ꦄꦴꦲꦴꦫꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦄꦴꦲꦴꦫꦁ ꦤꦶꦱ꧀ꦱꦴꦪ. ꦄꦴꦲꦴꦫꦺꦴ ꦥꦲꦴꦠꦧ꧀ꦧꦺꦴ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦆꦣ, ꦨꦒꦶꦤꦶ, ꦨꦶꦏ꧀ꦑꦸ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴ ꦄꦴꦲꦴꦫꦁ ꦄꦴꦲꦴꦫꦺꦠꦶ – ‘ꦤꦺꦮ ꦢꦮꦴꦪ ꦤ ꦩꦢꦴꦪ ꦤ ꦩꦟ꧀ꦝꦤꦴꦪ ꦤ ꦮꦶꦨꦹꦱꦤꦴꦪ, ꦪꦴꦮꦢꦺꦮ ꦆꦩꦱ꧀ꦱ ꦏꦴꦪꦱ꧀ꦱ ꦜꦶꦠꦶꦪꦴ ꦪꦴꦥꦤꦴꦪ ꦮꦶꦲꦶꦁꦱꦹꦥꦫꦠꦶꦪꦴ ꦧ꧀ꦫꦲ꧀ꦩꦕꦫꦶꦪꦴꦤꦸꦒ꧀ꦒꦲꦴꦪ. ꦆꦠꦶ ꦥꦸꦫꦴꦟꦚ꧀ꦕ ꦮꦺꦢꦤꦁ ꦥꦛꦶꦲꦔ꧀ꦑꦴꦩꦶ, ꦤꦮꦚ꧀ꦕ ꦮꦺꦢꦤꦁ ꦤ ꦈꦥ꧀ꦥꦴꦢꦺꦱ꧀ꦱꦴꦩꦶ. ꦪꦴꦠ꧀ꦫꦴ ꦕ ꦩꦺ ꦨꦮꦶꦱ꧀ꦱꦠꦶ ꦄꦤꦮꦗ꧀ꦗꦠꦴ ꦕ ꦦꦴꦱꦸꦮꦶꦲꦴꦫꦺꦴ ꦕꦴ’ꦠꦶ. ꦱꦺꦴ ꦄꦥꦫꦺꦤ ꦱꦩꦪꦺꦤ ꦄꦴꦲꦴꦫꦁ ꦤꦶꦱ꧀ꦱꦴꦪ ꦄꦴꦲꦴꦫꦁ ꦥꦗꦲꦠꦶ. ‘ꦄꦴꦲꦴꦫꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦄꦴꦲꦴꦫꦁ ꦤꦶꦱ꧀ꦱꦴꦪ. ꦄꦴꦲꦴꦫꦺꦴ ꦥꦲꦴꦠꦧ꧀ꦧꦺꦴ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦠꦟ꧀ꦲꦴꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦠꦟ꧀ꦲꦁ ꦤꦶꦱ꧀ꦱꦴꦪ. ꦠꦟ꧀ꦲꦴ ꦥꦲꦴꦠꦧ꧀ꦧꦴ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦆꦣ, ꦨꦒꦶꦤꦶ, ꦨꦶꦏ꧀ꦑꦸ ꦱꦸꦟꦴꦠꦶ – ‘ꦆꦠ꧀ꦡꦤ꧀ꦤꦴꦩꦺꦴ ꦏꦶꦫ ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦷ’ꦠꦶ. ꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦏꦸꦢꦴꦱ꧀ꦱꦸ ꦤꦴꦩ ꦄꦲꦩ꧀ꦥꦶ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦴꦩꦷ’ꦠꦶ! ꦱꦺꦴ ꦄꦥꦫꦺꦤ ꦱꦩꦪꦺꦤ ꦠꦟ꧀ꦲꦁ ꦤꦶꦱ꧀ꦱꦴꦪ ꦠꦟ꧀ꦲꦁ ꦥꦗꦲꦠꦶ. ‘ꦠꦟ꧀ꦲꦴꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦠꦟ꧀ꦲꦁ ꦤꦶꦱ꧀ꦱꦴꦪ. ꦠꦟ꧀ꦲꦴ ꦥꦲꦴꦠꦧ꧀ꦧꦴ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦩꦴꦤꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦩꦴꦤꦁ ꦤꦶꦱ꧀ꦱꦴꦪ. ꦩꦴꦤꦺꦴ ꦥꦲꦴꦠꦧ꧀ꦧꦺꦴ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦆꦣ, ꦨꦒꦶꦤꦶ, ꦨꦶꦏ꧀ꦑꦸ ꦱꦸꦟꦴꦠꦶ – ‘ꦆꦠ꧀ꦡꦤ꧀ꦤꦴꦩꦺꦴ ꦏꦶꦫ ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦷ’ꦠꦶ. ꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦱꦺꦴ ꦲꦶ ꦤꦴꦩ ꦄꦴꦪꦱ꧀ꦩꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦠꦶ; ꦏꦶꦩꦔ꧀ꦒꦁ [ꦏꦶꦩꦔ꧀ꦒ (ꦱꦷ. ꦥꦷ.) ꦄ. ꦤꦶ. ꧕.꧑꧘꧐; ꦕꦹꦭ꦳ꦮ. ꧓꧓꧑; ꦱꦁ. ꦤꦶ. ꧕.꧑꧐꧒꧐] ꦥꦤꦴꦲ’ꦤ꧀ꦠꦶ! ꦱꦺꦴ ꦄꦥꦫꦺꦤ ꦱꦩꦪꦺꦤ ꦩꦴꦤꦁ ꦤꦶꦱ꧀ꦱꦴꦪ ꦩꦴꦤꦁ ꦥꦗꦲꦠꦶ. ‘ꦩꦴꦤꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ ꦩꦴꦤꦁ ꦤꦶꦱ꧀ꦱꦴꦪ. ꦩꦴꦤꦺꦴ ꦥꦲꦴꦠꦧ꧀ꦧꦺꦴ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘ꦩꦺꦡꦸꦤꦱꦩ꧀ꦨꦹꦠꦺꦴ ꦄꦪꦁ, ꦨꦒꦶꦤꦶ, ꦏꦴꦪꦺꦴ. ꦩꦺꦡꦸꦤꦺ ꦕ ꦱꦺꦠꦸꦓꦴꦠꦺꦴ ꦮꦸꦠ꧀ꦠꦺꦴ ꦨꦒꦮꦠꦴ’’ꦠꦶ.

ꦄꦡ ꦑꦺꦴ ꦱꦴ ꦨꦶꦏ꧀ꦑꦸꦤꦷ ꦩꦚ꧀ꦕꦏꦴ ꦮꦸꦛ꧀ꦜꦲꦶꦠ꧀ꦮꦴ ꦌꦏꦁꦱꦁ ꦈꦠ꧀ꦠꦫꦴꦱꦔ꧀ꦒꦁ ꦏꦫꦶꦠ꧀ꦮꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦥꦴꦢꦺꦱꦸ ꦱꦶꦫꦱꦴ ꦤꦶꦥꦠꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕ – ‘‘ꦄꦕ꧀ꦕꦪꦺꦴ ꦩꦁ, ꦨꦤ꧀ꦠꦺ, ꦄꦕ꧀ꦕꦒꦩꦴ, ꦪꦡꦴꦧꦴꦭꦁ ꦪꦡꦴꦩꦹꦭ꦳꧀ꦲꦁ ꦪꦡꦴꦄꦏꦸꦱꦭꦁ, ꦪꦴꦲꦁ ꦌꦮꦩꦏꦴꦱꦶꦁ. ꦠꦱ꧀ꦱꦴ ꦩꦺ, ꦨꦤ꧀ꦠꦺ, ꦄꦪ꧀ꦪꦺꦴ ꦄꦴꦤꦤ꧀ꦢꦺꦴ ꦄꦕ꧀ꦕꦪꦁ ꦄꦕ꧀ꦕꦪꦠꦺꦴ ꦥꦛꦶꦒ꧀ꦒꦟ꧀ꦲꦴꦠꦸ, ꦄꦴꦪꦠꦶꦁ ꦱꦁꦮꦫꦴꦪꦴ’’ꦠꦶ. ‘‘ꦠꦒ꧀ꦓ ꦠꦁ [ꦠꦒ꧀ꦓ ꦠ꧀ꦮꦁ (ꦱꦷ. ꦥꦷ. ꦏ.)], ꦨꦒꦶꦤꦶ, ꦄꦕ꧀ꦕꦪꦺꦴ ꦄꦕ꧀ꦕꦒꦩꦴ, ꦪꦡꦴꦧꦴꦭꦁ ꦪꦡꦴꦩꦹꦭ꦳꧀ꦲꦁ ꦪꦡꦴꦄꦏꦸꦱꦭꦁ, ꦪꦴ ꦠ꧀ꦮꦁ ꦌꦮꦩꦏꦴꦱꦶ. ꦪꦠꦺꦴ ꦕ ꦑꦺꦴ ꦠ꧀ꦮꦁ, ꦨꦒꦶꦤꦶ, ꦄꦕ꧀ꦕꦪꦁ ꦄꦕ꧀ꦕꦪꦠꦺꦴ ꦢꦶꦱ꧀ꦮꦴ ꦪꦡꦴꦣꦩ꧀ꦩꦁ ꦥꦛꦶꦏꦫꦺꦴꦱꦶ, ꦠꦁ ꦠꦺ ꦩꦪꦁ ꦥꦛꦶꦒ꧀ꦒꦟ꧀ꦲꦴꦩ. ꦮꦸꦢ꧀ꦣꦶ ꦲꦺꦱꦴ, ꦨꦒꦶꦤꦶ, ꦄꦫꦶꦪꦱ꧀ꦱ ꦮꦶꦤꦪꦺ ꦪꦺꦴ ꦄꦕ꧀ꦕꦪꦁ ꦄꦕ꧀ꦕꦪꦠꦺꦴ ꦢꦶꦱ꧀ꦮꦴ ꦪꦡꦴꦣꦩ꧀ꦩꦁ ꦥꦛꦶꦏꦫꦺꦴꦠꦶ ꦄꦴꦪꦠꦶꦁ ꦱꦁꦮꦫꦁ ꦄꦴꦥꦗ꧀ꦗꦠꦷ’’ꦠꦶ. ꦤꦮꦩꦁ.

꧑꧐. ꦱꦸꦒꦠꦮꦶꦤꦪꦱꦸꦠ꧀ꦠꦁ

꧑꧖꧐. ‘‘ꦱꦸꦒꦠꦺꦴ ꦮꦴ, ꦨꦶꦏ꧀ꦑꦮꦺ, ꦭꦺꦴꦏꦺ ꦠꦶꦛ꧀ꦜꦩꦴꦤꦺꦴ ꦱꦸꦒꦠꦮꦶꦤꦪꦺꦴ ꦮꦴ ꦠꦢꦱ꧀ꦱ ꦧꦲꦸꦗꦤꦲꦶꦠꦴꦪ ꦧꦲꦸꦗꦤꦱꦸꦑꦴꦪ ꦭꦺꦴꦏꦴꦤꦸꦏꦩ꧀ꦥꦴꦪ ꦄꦠ꧀ꦡꦴꦪ ꦲꦶꦠꦴꦪ ꦱꦸꦑꦴꦪ ꦢꦺꦮꦩꦤꦸꦱ꧀ꦱꦴꦤꦁ.

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦱꦸꦒꦠꦺꦴ? ꦆꦣ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ ꦭꦺꦴꦏꦺ ꦈꦥ꧀ꦥꦗ꧀ꦗꦠꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ. ꦄꦪꦁ, ꦨꦶꦏ꧀ꦑꦮꦺ, ꦱꦸꦒꦠꦺꦴ.

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦱꦸꦒꦠꦮꦶꦤꦪꦺꦴ? ꦱꦺꦴ ꦣꦩ꧀ꦩꦁ ꦢꦺꦱꦺꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ, ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦠꦶ. ꦄꦪꦁ, ꦨꦶꦏ꧀ꦑꦮꦺ, ꦱꦸꦒꦠꦮꦶꦤꦪꦺꦴ. ꦌꦮꦁ ꦱꦸꦒꦠꦺꦴ ꦮꦴ, ꦨꦶꦏ꧀ꦑꦮꦺ, ꦭꦺꦴꦏꦺ ꦠꦶꦛ꧀ꦜꦩꦴꦤꦺꦴ ꦱꦸꦒꦠꦮꦶꦤꦪꦺꦴ ꦮꦴ ꦠꦢꦱ꧀ꦱ ꦧꦲꦸꦗꦤꦲꦶꦠꦴꦪ ꦧꦲꦸꦗꦤꦱꦸꦑꦴꦪ ꦭꦺꦴꦏꦴꦤꦸꦏꦩ꧀ꦥꦴꦪ ꦄꦠ꧀ꦡꦴꦪ ꦲꦶꦠꦴꦪ ꦱꦸꦑꦴꦪ ꦢꦺꦮꦩꦤꦸꦱ꧀ꦱꦴꦤꦤ꧀ꦠꦶ.

‘‘ꦕꦠ꧀ꦠꦴꦫꦺꦴꦩꦺ, ꦨꦶꦏ꧀ꦑꦮꦺ, ꦣꦩ꧀ꦩꦴ ꦱꦢ꧀ꦣꦩ꧀ꦩꦱ꧀ꦱ ꦱꦩ꧀ꦩꦺꦴꦱꦴꦪ ꦄꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦤ꧀ꦠꦶ. ꦏꦠꦩꦺ ꦕꦠ꧀ꦠꦴꦫꦺꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦢꦸꦒ꧀ꦒꦲꦶꦠꦁ ꦱꦸꦠ꧀ꦠꦤ꧀ꦠꦁ ꦥꦫꦶꦪꦴꦥꦸꦟꦤ꧀ꦠꦶ ꦢꦸꦤ꧀ꦤꦶꦏ꧀ꦑꦶꦠ꧀ꦠꦺꦲꦶ ꦥꦢꦧ꧀ꦪꦚ꧀ꦗꦤꦺꦲꦶ. ꦢꦸꦤ꧀ꦤꦶꦏ꧀ꦑꦶꦠ꧀ꦠꦱ꧀ꦱ, ꦨꦶꦏ꧀ꦑꦮꦺ, ꦥꦢꦧ꧀ꦪꦚ꧀ꦗꦤꦱ꧀ꦱ ꦄꦠ꧀ꦡꦺꦴꦥꦶ ꦢꦸꦤ꧀ꦤꦪꦺꦴ ꦲꦺꦴꦠꦶ. ꦄꦪꦁ, ꦨꦶꦏ꧀ꦑꦮꦺ, ꦥꦜꦩꦺꦴ ꦣꦩ꧀ꦩꦺꦴ ꦱꦢ꧀ꦣꦩ꧀ꦩꦱ꧀ꦱ ꦱꦩ꧀ꦩꦺꦴꦱꦴꦪ ꦄꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦢꦸꦧ꧀ꦧꦕꦴ ꦲꦺꦴꦤ꧀ꦠꦶ ꦢꦺꦴꦮꦕꦱ꧀ꦱꦏꦫꦟꦺꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦴ ꦄꦏ꧀ꦑꦩꦴ ꦄꦥ꧀ꦥꦢꦏ꧀ꦑꦶꦟꦒ꧀ꦒꦴꦲꦶꦤꦺꦴ ꦄꦤꦸꦱꦴꦱꦤꦶꦁ. ꦄꦪꦁ, ꦨꦶꦏ꧀ꦑꦮꦺ, ꦢꦸꦠꦶꦪꦺꦴ ꦣꦩ꧀ꦩꦺꦴ ꦱꦢ꧀ꦣꦩ꧀ꦩꦱ꧀ꦱ ꦱꦩ꧀ꦩꦺꦴꦱꦴꦪ ꦄꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦪꦺ ꦠꦺ ꦨꦶꦏ꧀ꦑꦹ ꦧꦲꦸꦱ꧀ꦱꦸꦠꦴ ꦄꦴꦒꦠꦴꦒꦩꦴ ꦣꦩ꧀ꦩꦣꦫꦴ ꦮꦶꦤꦪꦣꦫꦴ ꦩꦴꦠꦶꦏꦴꦣꦫꦴ, ꦠꦺ ꦤ ꦱꦏ꧀ꦏꦕ꧀ꦕꦁ ꦱꦸꦠ꧀ꦠꦤ꧀ꦠꦁ ꦥꦫꦁ ꦮꦴꦕꦺꦤ꧀ꦠꦶ. ꦠꦺꦱꦁ ꦄꦕ꧀ꦕꦪꦺꦤ ꦖꦶꦤ꧀ꦤꦩꦹꦭꦏꦺꦴ ꦱꦸꦠ꧀ꦠꦤ꧀ꦠꦺꦴ ꦲꦺꦴꦠꦶ ꦄꦥ꧀ꦥꦛꦶꦱꦫꦟꦺꦴ. ꦄꦪꦁ, ꦨꦶꦏ꧀ꦑꦮꦺ, ꦠꦠꦶꦪꦺꦴ ꦣꦩ꧀ꦩꦺꦴ ꦱꦢ꧀ꦣꦩ꧀ꦩꦱ꧀ꦱ ꦱꦩ꧀ꦩꦺꦴꦱꦴꦪ ꦄꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦡꦺꦫꦴ ꦨꦶꦏ꧀ꦑꦹ ꦧꦴꦲꦸꦭꦶꦏꦴ ꦲꦺꦴꦤ꧀ꦠꦶ ꦱꦴꦡꦭꦶꦏꦴ, ꦎꦏ꧀ꦏꦩꦤꦺ ꦥꦸꦧ꧀ꦧꦔ꧀ꦒꦩꦴ, ꦥꦮꦶꦮꦺꦏꦺ ꦤꦶꦏ꧀ꦑꦶꦠ꧀ꦠꦣꦸꦫꦴ, ꦤ ꦮꦷꦫꦶꦪꦁ ꦄꦴꦫꦨꦤ꧀ꦠꦶ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ. ꦠꦺꦱꦁ ꦥꦕ꧀ꦖꦶꦩꦴ ꦗꦤꦠꦴ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦠꦶ. ꦱꦴꦥꦶ ꦲꦺꦴꦠꦶ ꦧꦴꦲꦸꦭꦶꦏꦴ ꦱꦴꦡꦭꦶꦏꦴ, ꦎꦏ꧀ꦏꦩꦤꦺ ꦥꦸꦧ꧀ꦧꦔ꧀ꦒꦩꦴ, ꦥꦮꦶꦮꦺꦏꦺ ꦤꦶꦏ꧀ꦑꦶꦠ꧀ꦠꦣꦸꦫꦴ, ꦤ ꦮꦷꦫꦶꦪꦁ ꦄꦴꦫꦨꦠꦶ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ. ꦄꦪꦁ, ꦨꦶꦏ꧀ꦑꦮꦺ, ꦕꦠꦸꦠ꧀ꦡꦺꦴ ꦣꦩ꧀ꦩꦺꦴ ꦱꦢ꧀ꦣꦩ꧀ꦩꦱ꧀ꦱ ꦱꦩ꧀ꦩꦺꦴꦱꦴꦪ ꦄꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦺꦴ ꦣꦩ꧀ꦩꦴ ꦱꦢ꧀ꦣꦩ꧀ꦩꦱ꧀ꦱ ꦱꦩ꧀ꦩꦺꦴꦱꦴꦪ ꦄꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦤ꧀ꦠꦷ’’ꦠꦶ.

‘‘ꦕꦠ꧀ꦠꦴꦫꦺꦴꦩꦺ, ꦨꦶꦏ꧀ꦑꦮꦺ, ꦣꦩ꧀ꦩꦴ ꦱꦢ꧀ꦣꦩ꧀ꦩꦱ꧀ꦱ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦄꦤꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦤ꧀ꦠꦶ. ꦏꦠꦩꦺ ꦕꦠ꧀ꦠꦴꦫꦺꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦱꦸꦒ꧀ꦒꦲꦶꦠꦁ ꦱꦸꦠ꧀ꦠꦤ꧀ꦠꦁ ꦥꦫꦶꦪꦴꦥꦸꦟꦤ꧀ꦠꦶ ꦱꦸꦤꦶꦏ꧀ꦑꦶꦠ꧀ꦠꦺꦲꦶ ꦥꦢꦧ꧀ꦪꦚ꧀ꦗꦤꦺꦲꦶ. ꦱꦸꦤꦶꦏ꧀ꦑꦶꦠ꧀ꦠꦱ꧀ꦱ, ꦨꦶꦏ꧀ꦑꦮꦺ, ꦥꦢꦧ꧀ꦪꦚ꧀ꦗꦤꦱ꧀ꦱ ꦄꦠ꧀ꦡꦺꦴꦥꦶ ꦱꦸꦤꦪꦺꦴ ꦲꦺꦴꦠꦶ. ꦄꦪꦁ, ꦨꦶꦏ꧀ꦑꦮꦺ, ꦥꦜꦩꦺꦴ ꦣꦩ꧀ꦩꦺꦴ ꦱꦢ꧀ꦣꦩ꧀ꦩꦱ꧀ꦱ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦄꦤꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦱꦸꦮꦕꦴ ꦲꦺꦴꦤ꧀ꦠꦶ ꦱꦺꦴꦮꦕꦱ꧀ꦱꦏꦫꦟꦺꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦴ ꦑꦩꦴ ꦥꦢꦏ꧀ꦑꦶꦟꦒ꧀ꦒꦴꦲꦶꦤꦺꦴ ꦄꦤꦸꦱꦴꦱꦤꦶꦁ. ꦄꦪꦁ, ꦨꦶꦏ꧀ꦑꦮꦺ, ꦢꦸꦠꦶꦪꦺꦴ ꦣꦩ꧀ꦩꦺꦴ ꦱꦢ꧀ꦣꦩ꧀ꦩꦱ꧀ꦱ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦄꦤꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦪꦺ ꦠꦺ ꦨꦶꦏ꧀ꦑꦹ ꦧꦲꦸꦱ꧀ꦱꦸꦠꦴ ꦄꦴꦒꦠꦴꦒꦩꦴ ꦣꦩ꧀ꦩꦣꦫꦴ ꦮꦶꦤꦪꦣꦫꦴ ꦩꦴꦠꦶꦏꦴꦣꦫꦴ, ꦠꦺ ꦱꦏ꧀ꦏꦕ꧀ꦕꦁ ꦱꦸꦠ꧀ꦠꦤ꧀ꦠꦁ ꦥꦫꦁ ꦮꦴꦕꦺꦤ꧀ꦠꦶ. ꦠꦺꦱꦁ ꦄꦕ꧀ꦕꦪꦺꦤ ꦤꦕ꧀ꦖꦶꦤ꧀ꦤꦩꦹꦭꦏꦺꦴ [ꦄꦕ꧀ꦖꦶꦤ꧀ꦤꦩꦹꦭꦏꦺꦴ (ꦱ꧀ꦪꦴ. ꦏꦁ.) ꦄ. ꦤꦶ. ꧕.꧑꧕꧖] ꦱꦸꦠ꧀ꦠꦤ꧀ꦠꦺꦴ ꦲꦺꦴꦠꦶ ꦱꦥ꧀ꦥꦛꦶꦱꦫꦟꦺꦴ. ꦄꦪꦁ, ꦨꦶꦏ꧀ꦑꦮꦺ, ꦠꦠꦶꦪꦺꦴ ꦣꦩ꧀ꦩꦺꦴ ꦱꦢ꧀ꦣꦩ꧀ꦩꦱ꧀ꦱ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦄꦤꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦡꦺꦫꦴ ꦨꦶꦏ꧀ꦑꦹ ꦤ ꦧꦴꦲꦸꦭꦶꦏꦴ ꦲꦺꦴꦤ꧀ꦠꦶ ꦤ ꦱꦴꦡꦭꦶꦏꦴ, ꦎꦏ꧀ꦏꦩꦤꦺ ꦤꦶꦏ꧀ꦑꦶꦠ꧀ꦠꦣꦸꦫꦴ, ꦥꦮꦶꦮꦺꦏꦺ ꦥꦸꦧ꧀ꦧꦔ꧀ꦒꦩꦴ, ꦮꦷꦫꦶꦪꦁ ꦄꦴꦫꦨꦤ꧀ꦠꦶ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ. ꦠꦺꦱꦁ ꦥꦕ꧀ꦖꦶꦩꦴ ꦗꦤꦠꦴ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦠꦶ. ꦱꦴꦥꦶ ꦲꦺꦴꦠꦶ ꦤ ꦧꦴꦲꦸꦭꦶꦏꦴ ꦤ ꦱꦴꦡꦭꦶꦏꦴ, ꦎꦏ꧀ꦏꦩꦤꦺ ꦤꦶꦏ꧀ꦑꦶꦠ꧀ꦠꦣꦸꦫꦴ, ꦥꦮꦶꦮꦺꦏꦺ ꦥꦸꦧ꧀ꦧꦔ꧀ꦒꦩꦴ, ꦮꦷꦫꦶꦪꦁ ꦄꦴꦫꦨꦠꦶ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ. ꦄꦪꦁ, ꦨꦶꦏ꧀ꦑꦮꦺ, ꦕꦠꦸꦠ꧀ꦡꦺꦴ ꦣꦩ꧀ꦩꦺꦴ ꦱꦢ꧀ꦣꦩ꧀ꦩꦱ꧀ꦱ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦄꦤꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦺꦴ ꦣꦩ꧀ꦩꦴ ꦱꦢ꧀ꦣꦩ꧀ꦩꦱ꧀ꦱ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦄꦤꦤ꧀ꦠꦫꦣꦴꦤꦴꦪ ꦱꦁꦮꦠ꧀ꦠꦤ꧀ꦠꦷ’’ꦠꦶ. ꦢꦱꦩꦁ.

ꦆꦤ꧀ꦢ꧀ꦫꦶꦪꦮꦒ꧀ꦒꦺꦴ ꦥꦜꦩꦺꦴ.