꧗. ꦄꦴꦫꦏ꧀ꦑꦱꦸꦠ꧀ꦠꦁ

꧑꧑꧗. ‘‘ꦕꦠꦹꦱꦸ, ꦨꦶꦏ꧀ꦑꦮꦺ, ꦜꦴꦤꦺꦱꦸ ꦄꦠ꧀ꦠꦫꦹꦥꦺꦤ ꦄꦥ꧀ꦥꦩꦴꦢꦺꦴ ꦱꦠꦶ ꦕꦺꦠꦱꦺꦴ ꦄꦴꦫꦏ꧀ꦑꦺꦴ ꦏꦫꦟꦷꦪꦺꦴ. ꦏꦠꦩꦺꦱꦸ ꦕꦠꦹꦱꦸ? ‘ꦩꦴ ꦩꦺ ꦫꦗꦤꦷꦪꦺꦱꦸ ꦣꦩ꧀ꦩꦺꦱꦸ ꦕꦶꦠ꧀ꦠꦁ ꦫꦗ꧀ꦗꦷ’ꦠꦶ ꦄꦠ꧀ꦠꦫꦹꦥꦺꦤ ꦄꦥ꧀ꦥꦩꦴꦢꦺꦴ ꦱꦠꦶ ꦕꦺꦠꦱꦺꦴ ꦄꦴꦫꦏ꧀ꦑꦺꦴ ꦏꦫꦟꦷꦪꦺꦴ; ‘ꦩꦴ ꦩꦺ ꦢꦺꦴꦱꦤꦷꦪꦺꦱꦸ ꦣꦩ꧀ꦩꦺꦱꦸ ꦕꦶꦠ꧀ꦠꦁ ꦢꦸꦱ꧀ꦱꦷ’ꦠꦶ ꦄꦠ꧀ꦠꦫꦹꦥꦺꦤ ꦄꦥ꧀ꦥꦩꦴꦢꦺꦴ ꦱꦠꦶ ꦕꦺꦠꦱꦺꦴ ꦄꦴꦫꦏ꧀ꦑꦺꦴ ꦏꦫꦟꦷꦪꦺꦴ; ‘ꦩꦴ ꦩꦺ ꦩꦺꦴꦲꦤꦷꦪꦺꦱꦸ ꦣꦩ꧀ꦩꦺꦱꦸ ꦕꦶꦠ꧀ꦠꦁ ꦩꦸꦪ꧀ꦲꦷ’ꦠꦶ ꦄꦠ꧀ꦠꦫꦹꦥꦺꦤ ꦄꦥ꧀ꦥꦩꦴꦢꦺꦴ ꦱꦠꦶ ꦕꦺꦠꦱꦺꦴ ꦄꦴꦫꦏ꧀ꦑꦺꦴ ꦏꦫꦟꦷꦪꦺꦴ; ‘ꦩꦴ ꦩꦺ ꦩꦢꦤꦷꦪꦺꦱꦸ ꦣꦩ꧀ꦩꦺꦱꦸ ꦕꦶꦠ꧀ꦠꦁ ꦩꦗ꧀ꦗꦷ’ꦠꦶ ꦄꦠ꧀ꦠꦫꦹꦥꦺꦤ ꦄꦥ꧀ꦥꦩꦴꦢꦺꦴ ꦱꦠꦶ ꦕꦺꦠꦱꦺꦴ ꦄꦴꦫꦏ꧀ꦑꦺꦴ ꦏꦫꦟꦷꦪꦺꦴ.

‘‘ꦪꦠꦺꦴ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦫꦗꦤꦷꦪꦺꦱꦸ ꦣꦩ꧀ꦩꦺꦱꦸ ꦕꦶꦠ꧀ꦠꦁ ꦤ ꦫꦗ꧀ꦗꦠꦶ ꦮꦷꦠꦫꦴꦒꦠ꧀ꦠꦴ, ꦢꦺꦴꦱꦤꦷꦪꦺꦱꦸ ꦣꦩ꧀ꦩꦺꦱꦸ ꦕꦶꦠ꧀ꦠꦁ ꦤ ꦢꦸꦱ꧀ꦱꦠꦶ ꦮꦷꦠꦢꦺꦴꦱꦠ꧀ꦠꦴ, ꦩꦺꦴꦲꦤꦷꦪꦺꦱꦸ ꦣꦩ꧀ꦩꦺꦱꦸ ꦕꦶꦠ꧀ꦠꦁ ꦤ ꦩꦸꦪ꧀ꦲꦠꦶ ꦮꦷꦠꦩꦺꦴꦲꦠ꧀ꦠꦴ, ꦩꦢꦤꦷꦪꦺꦱꦸ ꦣꦩ꧀ꦩꦺꦱꦸ ꦕꦶꦠ꧀ꦠꦁ ꦤ ꦩꦗ꧀ꦗꦠꦶ ꦮꦷꦠꦩꦢꦠ꧀ꦠꦴ, ꦱꦺꦴ ꦤ ꦖꦩ꧀ꦨꦠꦶ ꦤ ꦏꦩ꧀ꦥꦠꦶ ꦤ ꦮꦺꦣꦠꦶ ꦤ ꦱꦤ꧀ꦠꦴꦱꦁ ꦄꦴꦥꦗ꧀ꦗꦠꦶ, ꦤ ꦕ ꦥꦤ ꦱꦩꦟꦮꦕꦤꦲꦺꦠꦸꦥꦶ ꦒꦕ꧀ꦖꦠꦷ’’ꦠꦶ. ꦱꦠ꧀ꦠꦩꦁ.