(꧑꧖) ꧖. ꦄꦕꦺꦭꦏꦮꦒ꧀ꦒꦺꦴ

꧑꧕꧗-꧑꧖꧓. ‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦥꦛꦶꦥꦢꦴ. ꦏꦠꦩꦴ ꦠꦶꦱ꧀ꦱꦺꦴ? ꦄꦴꦒꦴꦭ꦳꧀ꦲꦴ ꦥꦛꦶꦥꦢꦴ, ꦤꦶꦗ꧀ꦙꦴꦩꦴ ꦥꦛꦶꦥꦢꦴ, ꦩꦗ꧀ꦙꦶꦩꦴ ꦥꦛꦶꦥꦢꦴ. ꦏꦠꦩꦴ ꦕ, ꦨꦶꦏ꧀ꦑꦮꦺ, ꦄꦴꦒꦴꦭ꦳꧀ꦲꦴ ꦥꦛꦶꦥꦢꦴ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦌꦮꦁꦮꦴꦢꦷ ꦲꦺꦴꦠꦶ ꦌꦮꦁꦢꦶꦛ꧀ꦜꦶ – ‘ꦤꦠ꧀ꦡꦶ ꦏꦴꦩꦺꦱꦸ ꦢꦺꦴꦱꦺꦴ’ꦠꦶ. ꦱꦺꦴ ꦏꦴꦩꦺꦱꦸ ꦥꦴꦠꦧ꧀ꦪꦠꦁ ꦄꦴꦥꦗ꧀ꦗꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦄꦴꦒꦴꦭ꦳꧀ꦲꦴ ꦥꦛꦶꦥꦢꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦤꦶꦗ꧀ꦙꦴꦩꦴ ꦥꦛꦶꦥꦢꦴ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦄꦕꦺꦭꦏꦺꦴ ꦲꦺꦴꦠꦶ ꦩꦸꦠ꧀ꦠꦴꦕꦴꦫꦺꦴ, ꦲꦠ꧀ꦡꦴꦥꦭꦺꦑꦤꦺꦴ [ꦲꦠ꧀ꦡꦴꦮꦭꦺꦑꦤꦺꦴ (ꦱ꧀ꦪꦴ. ꦏꦁ.) ꦢꦷ. ꦤꦶ. ꧑.꧓꧙꧔; ꦩ. ꦤꦶ. ꧑.꧑꧕꧕ ꦥꦱ꧀ꦱꦶꦠꦧ꧀ꦧꦁ], ꦤ ꦌꦲꦶꦨꦢꦤ꧀ꦠꦶꦏꦺꦴ, ꦤ ꦠꦶꦛ꧀ꦜꦨꦢꦤ꧀ꦠꦶꦏꦺꦴ, ꦤꦴꦨꦶꦲꦛꦁ ꦤ ꦈꦢ꧀ꦢꦶꦱ꧀ꦱꦏꦠꦁ ꦤ ꦤꦶꦩꦤ꧀ꦠꦤꦁ ꦱꦴꦢꦶꦪꦠꦶ. ꦱꦺꦴ ꦤ ꦏꦸꦩ꧀ꦨꦶꦩꦸꦑꦴ ꦥꦛꦶꦒ꧀ꦒꦟ꧀ꦲꦴꦠꦶ, ꦤ ꦏꦭ꦳ꦺꦴꦥꦶꦩꦸꦑꦴ [ꦑꦭ꦳ꦺꦴꦥꦶꦩꦸꦑꦴ (ꦱꦷ. ꦱ꧀ꦪꦴ. ꦏꦁ.)] ꦥꦛꦶꦒ꧀ꦒꦟ꧀ꦲꦴꦠꦶ ꦤ ꦌꦭ꦳ꦏꦩꦤ꧀ꦠꦫꦁ ꦤ ꦢꦟ꧀ꦝꦩꦤ꧀ꦠꦫꦁ ꦤ ꦩꦸꦱꦭꦩꦤ꧀ꦠꦫꦁ ꦤ ꦢ꧀ꦮꦶꦤ꧀ꦤꦁ ꦨꦸꦚ꧀ꦗꦩꦴꦤꦴꦤꦁ ꦤ ꦒꦧ꧀ꦨꦶꦤꦶꦪꦴ ꦤ ꦥꦴꦪꦩꦴꦤꦴꦪ ꦤ ꦥꦸꦫꦶꦱꦤ꧀ꦠꦫꦒꦠꦴꦪ ꦤ ꦱꦔ꧀ꦏꦶꦠ꧀ꦠꦷꦱꦸ ꦤ ꦪꦠ꧀ꦡ ꦱꦴ ꦈꦥꦛ꧀ꦜꦶꦠꦺꦴ ꦲꦺꦴꦠꦶ ꦤ ꦪꦠ꧀ꦡ ꦩꦏ꧀ꦑꦶꦏꦴ ꦱꦟ꧀ꦝꦱꦟ꧀ꦝꦕꦴꦫꦶꦤꦷ ꦤ ꦩꦕ꧀ꦖꦁ ꦤ ꦩꦁꦱꦁ ꦤ ꦱꦸꦫꦁ ꦤ ꦩꦺꦫꦪꦁ, ꦤ ꦡꦸꦱꦺꦴꦢꦏꦁ ꦥꦶꦮꦠꦶ. ꦱꦺꦴ ꦌꦏꦴꦒꦴꦫꦶꦏꦺꦴ ꦮꦴ ꦲꦺꦴꦠꦶ ꦌꦏꦴꦭꦺꦴꦥꦶꦏꦺꦴ, ꦢ꧀ꦮꦴꦒꦴꦫꦶꦏꦺꦴ ꦮꦴ ꦲꦺꦴꦠꦶ ꦢ꧀ꦮꦴꦭꦺꦴꦥꦶꦏꦺꦴ… ꦱꦠ꧀ꦠꦴꦒꦴꦫꦶꦏꦺꦴ ꦮꦴ ꦲꦺꦴꦠꦶ ꦱꦠ꧀ꦠꦴꦭꦺꦴꦥꦶꦏꦺꦴ; ꦌꦏꦶꦱ꧀ꦱꦴꦥꦶ ꦢꦠ꧀ꦠꦶꦪꦴ ꦪꦴꦥꦺꦠꦶ, ꦢ꧀ꦮꦷꦲꦶꦥꦶ ꦢꦠ꧀ꦠꦷꦲꦶ ꦪꦴꦥꦺꦠꦶ… ꦱꦠ꧀ꦠꦲꦶꦥꦶ ꦢꦠ꧀ꦠꦷꦲꦶ ꦪꦴꦥꦺꦠꦶ; ꦌꦏꦴꦲꦶꦏꦩ꧀ꦥꦶ ꦄꦴꦲꦴꦫꦁ ꦄꦴꦲꦴꦫꦺꦠꦶ, ꦢ꧀ꦮꦴꦲꦶꦏꦩ꧀ꦥꦶ ꦄꦴꦲꦴꦫꦁ ꦄꦴꦲꦴꦫꦺꦠꦶ… ꦱꦠ꧀ꦠꦴꦲꦶꦏꦩ꧀ꦥꦶ ꦄꦴꦲꦴꦫꦁ ꦄꦴꦲꦴꦫꦺꦠꦶ – ꦆꦠꦶ ꦌꦮꦫꦹꦥꦁ ꦄꦢ꧀ꦣꦩꦴꦱꦶꦏꦩ꧀ꦥꦶ ꦥꦫꦶꦪꦴꦪꦨꦠ꧀ꦠꦨꦺꦴꦗꦤꦴꦤꦸꦪꦺꦴꦒꦩꦤꦸꦪꦸꦠ꧀ꦠꦺꦴ ꦮꦶꦲꦫꦠꦶ.

ꦱꦺꦴ ꦱꦴꦏꦨꦏ꧀ꦑꦺꦴꦥꦶ ꦲꦺꦴꦠꦶ, ꦱꦴꦩꦴꦏꦨꦏ꧀ꦑꦺꦴꦥꦶ ꦲꦺꦴꦠꦶ, ꦤꦷꦮꦴꦫꦨꦏ꧀ꦑꦺꦴꦥꦶ ꦲꦺꦴꦠꦶ, ꦢꦢ꧀ꦢꦸꦭꦨꦏ꧀ꦑꦺꦴꦥꦶ ꦲꦺꦴꦠꦶ, ꦲꦛꦨꦏ꧀ꦑꦺꦴꦥꦶ ꦲꦺꦴꦠꦶ, ꦏꦟ꧀ꦲꦨꦏ꧀ꦑꦺꦴꦥꦶ ꦲꦺꦴꦠꦶ, ꦄꦴꦕꦴꦩꦨꦏ꧀ꦑꦺꦴꦥꦶ ꦲꦺꦴꦠꦶ, ꦥꦶꦚ꧀ꦚꦴꦏꦨꦏ꧀ꦑꦺꦴꦥꦶ ꦲꦺꦴꦠꦶ, ꦠꦶꦟꦨꦏ꧀ꦑꦺꦴꦥꦶ ꦲꦺꦴꦠꦶ, ꦒꦺꦴꦩꦪꦨꦏ꧀ꦑꦺꦴꦥꦶ ꦲꦺꦴꦠꦶ, ꦮꦤꦩꦹꦭꦦꦭꦴꦲꦴꦫꦺꦴ ꦪꦴꦥꦺꦠꦶ ꦥꦮꦠ꧀ꦠꦦꦭꦨꦺꦴꦗꦷ.

ꦱꦺꦴ ꦱꦴꦟꦴꦤꦶꦥꦶ ꦣꦴꦫꦺꦠꦶ, ꦩꦱꦴꦟꦴꦤꦶꦥꦶ ꦣꦴꦫꦺꦠꦶ, ꦖꦮꦢꦸꦱ꧀ꦱꦴꦤꦶꦥꦶ ꦣꦴꦫꦺꦠꦶ, ꦥꦁꦱꦸꦏꦹꦭꦴꦤꦶꦥꦶ ꦣꦴꦫꦺꦠꦶ, ꦠꦶꦫꦷꦛꦴꦤꦶꦥꦶ ꦣꦴꦫꦺꦠꦶ, ꦄꦗꦶꦤꦩ꧀ꦥꦶ ꦣꦴꦫꦺꦠꦶ, ꦄꦗꦶꦤꦏ꧀ꦑꦶꦥꦩ꧀ꦥꦶ ꦣꦴꦫꦺꦠꦶ, ꦏꦸꦱꦕꦷꦫꦩ꧀ꦥꦶ ꦣꦴꦫꦺꦠꦶ, ꦮꦴꦏꦕꦷꦫꦩ꧀ꦥꦶ ꦣꦴꦫꦺꦠꦶ, ꦦꦭꦏꦕꦷꦫꦩ꧀ꦥꦶ ꦣꦴꦫꦺꦠꦶ, ꦏꦺꦱꦏꦩ꧀ꦧꦭꦩ꧀ꦥꦶ ꦣꦴꦫꦺꦠꦶ, ꦮꦴꦭ꦳ꦏꦩ꧀ꦧꦭꦩ꧀ꦥꦶ ꦣꦴꦫꦺꦠꦶ, ꦈꦭꦹꦏꦥꦏ꧀ꦑꦶꦏꦩ꧀ꦥꦶ ꦣꦴꦫꦺꦠꦶ, ꦏꦺꦱꦩꦱ꧀ꦱꦸꦭꦺꦴꦕꦏꦺꦴꦥꦶ ꦲꦺꦴꦠꦶ ꦏꦺꦱꦩꦱ꧀ꦱꦸꦭꦺꦴꦕꦤꦴꦤꦸꦪꦺꦴꦒꦩꦤꦸꦪꦸꦠ꧀ꦠꦺꦴ, ꦈꦧ꧀ꦨꦛ꧀ꦜꦏꦺꦴꦥꦶ ꦲꦺꦴꦠꦶ ꦄꦴꦱꦤꦥꦛꦶꦏ꧀ꦑꦶꦠ꧀ꦠꦺꦴ, ꦈꦏ꧀ꦏꦸꦛꦶꦏꦺꦴꦥꦶ ꦲꦺꦴꦠꦶ ꦈꦏ꧀ꦏꦸꦛꦶꦏꦥ꧀ꦥꦣꦴꦤꦩꦤꦸꦪꦸꦠ꧀ꦠꦺꦴ, ꦏꦟ꧀ꦛꦏꦴꦥꦱ꧀ꦱꦪꦶꦏꦺꦴꦥꦶ ꦲꦺꦴꦠꦶ ꦏꦟ꧀ꦛꦏꦴꦥꦱ꧀ꦱꦪꦺ ꦱꦺꦪ꧀ꦪꦁ ꦏꦥ꧀ꦥꦺꦠꦶ, ꦱꦴꦪꦠꦠꦶꦪꦏꦩ꧀ꦥꦶ ꦈꦢꦏꦺꦴꦫꦺꦴꦲꦤꦴꦤꦸꦪꦺꦴꦒꦩꦤꦸꦪꦸꦠ꧀ꦠꦺꦴ ꦮꦶꦲꦫꦠꦶ – ꦆꦠꦶ ꦌꦮꦫꦹꦥꦁ ꦄꦤꦺꦏꦮꦶꦲꦶꦠꦁ ꦏꦴꦪꦱ꧀ꦱ ꦄꦴꦠꦴꦥꦤꦥꦫꦶꦠꦴꦥꦤꦴꦤꦸꦪꦺꦴꦒꦩꦤꦸꦪꦸꦠ꧀ꦠꦺꦴ ꦮꦶꦲꦫꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦗ꧀ꦙꦴꦩꦴ ꦥꦛꦶꦥꦢꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦩꦗ꧀ꦙꦶꦩꦴ ꦥꦛꦶꦥꦢꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦏꦴꦪꦺ ꦏꦴꦪꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ; ꦮꦺꦢꦤꦴꦱꦸ…ꦥꦺ… ꦕꦶꦠ꧀ꦠꦺ…ꦥꦺ… ꦣꦩ꧀ꦩꦺꦱꦸ ꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦩꦗ꧀ꦙꦶꦩꦴ ꦥꦛꦶꦥꦢꦴ. ꦆꦩꦴ ꦑꦺꦴ, ꦨꦶꦏ꧀ꦑꦮꦺ, ꦠꦶꦱ꧀ꦱꦺꦴ ꦥꦛꦶꦥꦢꦴ’’ꦠꦶ.

‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦥꦛꦶꦥꦢꦴ. ꦏꦠꦩꦴ ꦠꦶꦱ꧀ꦱꦺꦴ? ꦄꦴꦒꦴꦭ꦳꧀ꦲꦴ ꦥꦛꦶꦥꦢꦴ, ꦤꦶꦗ꧀ꦙꦴꦩꦴ ꦥꦛꦶꦥꦢꦴ, ꦩꦗ꧀ꦙꦶꦩꦴ ꦥꦛꦶꦥꦢꦴ. ꦏꦠꦩꦴ ꦕ, ꦨꦶꦏ꧀ꦑꦮꦺ, ꦄꦴꦒꦴꦭ꦳꧀ꦲꦴ ꦥꦛꦶꦥꦢꦴ…ꦥꦺ… ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦄꦴꦒꦴꦭ꦳꧀ꦲꦴ ꦥꦛꦶꦥꦢꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦤꦶꦗ꧀ꦙꦴꦩꦴ ꦥꦛꦶꦥꦢꦴ…ꦥꦺ… ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦗ꧀ꦙꦴꦩꦴ ꦥꦛꦶꦥꦢꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦩꦗ꧀ꦙꦶꦩꦴ ꦥꦛꦶꦥꦢꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦤꦸꦥ꧀ꦥꦤ꧀ꦤꦴꦤꦁ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦄꦤꦸꦥ꧀ꦥꦴꦢꦴꦪ ꦖꦤ꧀ꦢꦁ ꦗꦤꦺꦠꦶ ꦮꦴꦪꦩꦠꦶ ꦮꦷꦫꦶꦪꦁ ꦄꦴꦫꦨꦠꦶ ꦕꦶꦠ꧀ꦠꦁ ꦥꦒ꧀ꦒꦟ꧀ꦲꦴꦠꦶ ꦥꦢꦲꦠꦶ; ꦈꦥ꧀ꦥꦤ꧀ꦤꦴꦤꦁ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦖꦤ꧀ꦢꦁ ꦗꦤꦺꦠꦶ ꦮꦴꦪꦩꦠꦶ ꦮꦷꦫꦶꦪꦁ ꦄꦴꦫꦨꦠꦶ ꦕꦶꦠ꧀ꦠꦁ ꦥꦒ꧀ꦒꦟ꧀ꦲꦴꦠꦶ ꦥꦢꦲꦠꦶ; ꦄꦤꦸꦥ꧀ꦥꦤ꧀ꦤꦴꦤꦁ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦈꦥ꧀ꦥꦴꦢꦴꦪ ꦖꦤ꧀ꦢꦁ ꦗꦤꦺꦠꦶ ꦮꦴꦪꦩꦠꦶ ꦮꦷꦫꦶꦪꦁ ꦄꦴꦫꦨꦠꦶ ꦕꦶꦠ꧀ꦠꦁ ꦥꦒ꧀ꦒꦟ꧀ꦲꦴꦠꦶ ꦥꦢꦲꦠꦶ; ꦈꦥ꧀ꦥꦤ꧀ꦤꦴꦤꦁ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦜꦶꦠꦶꦪꦴ ꦄꦱꦩ꧀ꦩꦺꦴꦱꦴꦪ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ ꦖꦤ꧀ꦢꦁ ꦗꦤꦺꦠꦶ ꦮꦴꦪꦩꦠꦶ ꦮꦷꦫꦶꦪꦁ ꦄꦴꦫꦨꦠꦶ ꦕꦶꦠ꧀ꦠꦁ ꦥꦒ꧀ꦒꦟ꧀ꦲꦴꦠꦶ ꦥꦢꦲꦠꦶ….

‘‘ꦖꦤ꧀ꦢꦱꦩꦴꦣꦶꦥꦣꦴꦤꦱꦔ꧀ꦑꦴꦫꦱꦩꦤ꧀ꦤꦴꦒꦠꦁ ꦆꦢ꧀ꦣꦶꦥꦴꦢꦁ ꦨꦴꦮꦺꦠꦶ ꦮꦷꦫꦶꦪꦱꦩꦴꦣꦶ…ꦥꦺ… ꦕꦶꦠ꧀ꦠꦱꦩꦴꦣꦶ…ꦥꦺ… ꦮꦷꦩꦁꦱꦴꦱꦩꦴꦣꦶꦥꦣꦴꦤꦱꦔ꧀ꦑꦴꦫꦱꦩꦤ꧀ꦤꦴꦒꦠꦁ ꦆꦢ꧀ꦣꦶꦥꦴꦢꦁ ꦨꦴꦮꦺꦠꦶ…ꦥꦺ….

‘‘ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ… ꦮꦷꦫꦶꦪꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ… ꦱꦠꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ… ꦱꦩꦴꦣꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ… ꦥꦚ꧀ꦚꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ….

‘‘ꦱꦢ꧀ꦣꦴꦧꦭꦁ ꦨꦴꦮꦺꦠꦶ… ꦮꦷꦫꦶꦪꦧꦭꦁ ꦨꦴꦮꦺꦠꦶ… ꦱꦠꦶꦧꦭꦁ ꦨꦴꦮꦺꦠꦶ… ꦱꦩꦴꦣꦶꦧꦭꦁ ꦨꦴꦮꦺꦠꦶ… ꦥꦚ꧀ꦚꦴꦧꦭꦁ ꦨꦴꦮꦺꦠꦶ….

‘‘ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ… ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ….

‘‘ꦱꦩ꧀ꦩꦴꦢꦶꦛ꧀ꦜꦶꦁ ꦨꦴꦮꦺꦠꦶ… ꦱꦩ꧀ꦩꦴꦱꦔ꧀ꦏꦥ꧀ꦥꦁ ꦨꦴꦮꦺꦠꦶ… ꦱꦩ꧀ꦩꦴꦮꦴꦕꦁ ꦨꦴꦮꦺꦠꦶ… ꦱꦩ꧀ꦩꦴꦏꦩ꧀ꦩꦤ꧀ꦠꦁ ꦨꦴꦮꦺꦠꦶ … ꦱꦩ꧀ꦩꦴꦄꦴꦗꦷꦮꦁ ꦨꦴꦮꦺꦠꦶ… ꦱꦩ꧀ꦩꦴꦮꦴꦪꦴꦩꦁ ꦨꦴꦮꦺꦠꦶ… ꦱꦩ꧀ꦩꦴꦱꦠꦶꦁ ꦨꦴꦮꦺꦠꦶ… ꦱꦩ꧀ꦩꦴꦱꦩꦴꦣꦶꦁ ꦨꦴꦮꦺꦠꦶ…. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦩꦗ꧀ꦙꦶꦩꦴ ꦥꦛꦶꦥꦢꦴ. ꦆꦩꦴ ꦑꦺꦴ, ꦨꦶꦏ꧀ꦑꦮꦺ, ꦠꦶꦱ꧀ꦱꦺꦴ ꦥꦛꦶꦥꦢꦴ’’ꦠꦶ.

ꦄꦕꦺꦭꦏꦮꦒ꧀ꦒꦺꦴ ꦖꦛ꧀ꦜꦺꦴ.