(꧑꧑) ꧑. ꦱꦩ꧀ꦧꦺꦴꦣꦮꦒ꧀ꦒꦺꦴ

꧑. ꦥꦸꦧ꧀ꦧꦺꦮꦱꦩ꧀ꦧꦺꦴꦣꦱꦸꦠ꧀ꦠꦁ

꧑꧐꧔. ‘‘ꦥꦸꦧ꧀ꦧꦺꦮ ꦩꦺ, ꦨꦶꦏ꧀ꦑꦮꦺ, ꦱꦩ꧀ꦧꦺꦴꦣꦴ ꦄꦤꦨꦶꦱꦩ꧀ꦧꦸꦢ꧀ꦣꦱ꧀ꦱ ꦧꦺꦴꦣꦶꦱꦠ꧀ꦠꦱ꧀ꦱꦺꦮ ꦱꦠꦺꦴ ꦌꦠꦢꦲꦺꦴꦱꦶ – ‘ꦏꦺꦴ ꦤꦸ ꦑꦺꦴ ꦭꦺꦴꦏꦺ ꦄꦱ꧀ꦱꦴꦢꦺꦴ, ꦏꦺꦴ ꦄꦴꦢꦷꦤꦮꦺꦴ, ꦏꦶꦁ ꦤꦶꦱ꧀ꦱꦫꦟ’ꦤ꧀ꦠꦶ? ꦠꦱ꧀ꦱ ꦩꦪ꧀ꦲꦁ, ꦨꦶꦏ꧀ꦑꦮꦺ, ꦌꦠꦢꦲꦺꦴꦱꦶ – ‘ꦪꦁ ꦑꦺꦴ ꦭꦺꦴꦏꦁ [ꦭꦺꦴꦏꦺ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦶ ꦱꦸꦑꦁ ꦱꦺꦴꦩꦤꦱ꧀ꦱꦁ, ꦄꦪꦁ ꦭꦺꦴꦏꦺ ꦄꦱ꧀ꦱꦴꦢꦺꦴ. ꦪꦁ ꦭꦺꦴꦏꦺꦴ [ꦭꦺꦴꦏꦺ (ꦥꦷ. ꦏ.)] ꦄꦤꦶꦕ꧀ꦕꦺꦴ ꦢꦸꦏ꧀ꦑꦺꦴ ꦮꦶꦥꦫꦶꦟꦴꦩꦣꦩ꧀ꦩꦺꦴ, ꦄꦪꦁ ꦭꦺꦴꦏꦺ ꦄꦴꦢꦷꦤꦮꦺꦴ. ꦪꦺꦴ ꦭꦺꦴꦏꦺ ꦖꦤ꧀ꦢꦫꦴꦒꦮꦶꦤꦪꦺꦴ ꦖꦤ꧀ꦢꦫꦴꦒꦥ꧀ꦥꦲꦴꦤꦁ, ꦆꦢꦁ ꦭꦺꦴꦏꦺ ꦤꦶꦱ꧀ꦱꦫꦟ’ꦤ꧀ꦠꦶ [ꦭꦺꦴꦏꦤꦶꦱ꧀ꦱꦫꦟꦁ (ꦄꦛ꧀ꦜ.) ‘‘ꦭꦺꦴꦏꦺ ꦤꦶꦱ꧀ꦱꦫꦟ’’ꦤ꧀ꦠꦶ ꦥꦢꦺꦤ ꦱꦁꦱꦤ꧀ꦢꦶꦠꦧ꧀ꦧꦁ]. ꦪꦴꦮꦏꦷꦮꦚ꧀ꦕꦴꦲꦁ, ꦨꦶꦏ꧀ꦑꦮꦺ, ꦌꦮꦁ ꦭꦺꦴꦏꦱ꧀ꦱ ꦄꦱ꧀ꦱꦴꦢꦚ꧀ꦕ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦚ꧀ꦕ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦚ꧀ꦕ ꦤꦶꦱ꧀ꦱꦫꦟꦠꦺꦴ ꦪꦡꦴꦨꦹꦠꦁ ꦤꦴꦧ꧀ꦨꦚ꧀ꦚꦴꦱꦶꦁ, ꦤꦺꦮ ꦠꦴꦮꦴꦲꦁ, ꦨꦶꦏ꧀ꦑꦮꦺ, ꦱꦢꦺꦮꦏꦺ ꦭꦺꦴꦏꦺ ꦱꦩꦴꦫꦏꦺ ꦱꦧ꧀ꦫꦲ꧀ꦩꦏꦺ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪ ꦱꦢꦺꦮꦩꦤꦸꦱ꧀ꦱꦴꦪ ‘ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴ’ꦠꦶ [ꦄꦨꦶꦱꦩ꧀ꦧꦸꦢ꧀ꦣꦺꦴ (ꦱꦷ. ꦱ꧀ꦪꦴ. ꦏꦁ. ꦏ.)] ꦥꦕ꧀ꦕꦚ꧀ꦚꦴꦱꦶꦁ. ꦪꦠꦺꦴ ꦕ ꦑ꧀ꦮꦴꦲꦁ [ꦑꦺꦴ ꦄꦲꦁ (ꦱꦷ. ꦥꦷ.), ꦑꦺꦴꦲꦁ (ꦱ꧀ꦪꦴ. ꦏꦁ. ꦏ.)], ꦨꦶꦏ꧀ꦑꦮꦺ, ꦌꦮꦁ ꦭꦺꦴꦏꦱ꧀ꦱ ꦄꦱ꧀ꦱꦴꦢꦚ꧀ꦕ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦚ꧀ꦕ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦚ꧀ꦕ ꦤꦶꦱ꧀ꦱꦫꦟꦠꦺꦴ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ, ꦄꦡꦴꦲꦁ, ꦨꦶꦏ꧀ꦑꦮꦺ, ꦱꦢꦺꦮꦏꦺ ꦭꦺꦴꦏꦺ ꦱꦩꦴꦫꦏꦺ ꦱꦧ꧀ꦫꦲ꧀ꦩꦏꦺ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪ ꦱꦢꦺꦮꦩꦤꦸꦱ꧀ꦱꦴꦪ ‘ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴ’ꦠꦶ ꦥꦕ꧀ꦕꦚ꧀ꦚꦴꦱꦶꦁ. ꦚꦴꦟꦚ꧀ꦕ ꦥꦤ ꦩꦺ ꦢꦱ꧀ꦱꦤꦁ ꦈꦢꦥꦴꦢꦶ – ‘ꦄꦏꦸꦥ꧀ꦥꦴ ꦩꦺ ꦮꦶꦩꦸꦠ꧀ꦠꦶ [ꦕꦺꦠꦺꦴꦮꦶꦩꦸꦠ꧀ꦠꦶ (ꦱꦷ. ꦥꦷ. ꦏ.)], ꦄꦪꦩꦤ꧀ꦠꦶꦩꦴ ꦗꦴꦠꦶ, ꦤꦠ꧀ꦡꦶ ꦢꦴꦤꦶ ꦥꦸꦤꦧ꧀ꦨꦮꦺꦴ’’’ꦠꦶ. ꦥꦜꦩꦁ.

꧒. ꦥꦜꦩꦄꦱ꧀ꦱꦴꦢꦱꦸꦠ꧀ꦠꦁ

꧑꧐꧕. ‘‘ꦭꦺꦴꦏꦱ꧀ꦱꦴꦲꦁ, ꦨꦶꦏ꧀ꦑꦮꦺ, ꦄꦱ꧀ꦱꦴꦢꦥꦫꦶꦪꦺꦱꦤꦁ ꦄꦕꦫꦶꦁ. ꦪꦺꦴ ꦭꦺꦴꦏꦺ ꦄꦱ꧀ꦱꦴꦢꦺꦴ ꦠꦢꦗ꧀ꦙꦒꦩꦁ. ꦪꦴꦮꦠꦏꦺꦴ ꦭꦺꦴꦏꦺ ꦄꦱ꧀ꦱꦴꦢꦺꦴ, ꦥꦚ꧀ꦚꦴꦪ ꦩꦺ ꦱꦺꦴ ꦱꦸꦢꦶꦛ꧀ꦜꦺꦴ. ꦭꦺꦴꦏꦱ꧀ꦱꦴꦲꦁ, ꦨꦶꦏ꧀ꦑꦮꦺ, ꦄꦴꦢꦷꦤꦮꦥꦫꦶꦪꦺꦱꦤꦁ ꦄꦕꦫꦶꦁ. ꦪꦺꦴ ꦭꦺꦴꦏꦺ ꦄꦴꦢꦷꦤꦮꦺꦴ ꦠꦢꦗ꧀ꦙꦒꦩꦁ. ꦪꦴꦮꦠꦏꦺꦴ ꦭꦺꦴꦏꦺ ꦄꦴꦢꦷꦤꦮꦺꦴ, ꦥꦚ꧀ꦚꦴꦪ ꦩꦺ ꦱꦺꦴ ꦱꦸꦢꦶꦛ꧀ꦜꦺꦴ. ꦭꦺꦴꦏꦱ꧀ꦱꦴꦲꦁ, ꦨꦶꦏ꧀ꦑꦮꦺ, ꦤꦶꦱ꧀ꦱꦫꦟꦥꦫꦶꦪꦺꦱꦤꦁ ꦄꦕꦫꦶꦁ. ꦪꦁ ꦭꦺꦴꦏꦺ ꦤꦶꦱ꧀ꦱꦫꦟꦁ ꦠꦢꦗ꧀ꦙꦒꦩꦁ. ꦪꦴꦮꦠꦏꦁ ꦭꦺꦴꦏꦺ ꦤꦶꦱ꧀ꦱꦫꦟꦁ, ꦥꦚ꧀ꦚꦴꦪ ꦩꦺ ꦠꦁ ꦱꦸꦢꦶꦛ꧀ꦜꦁ. ꦪꦴꦮꦏꦷꦮꦚ꧀ꦕꦴꦲꦁ, ꦨꦶꦏ꧀ꦑꦮꦺ, ꦭꦺꦴꦏꦱ꧀ꦱ ꦄꦱ꧀ꦱꦴꦢꦚ꧀ꦕ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦚ꧀ꦕ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦚ꧀ꦕ ꦤꦶꦱ꧀ꦱꦫꦟꦠꦺꦴ ꦪꦡꦴꦨꦹꦠꦁ ꦤꦴꦧ꧀ꦨꦚ꧀ꦚꦴꦱꦶꦁ, ꦤꦺꦮ ꦠꦴꦮꦴꦲꦁ, ꦨꦶꦏ꧀ꦑꦮꦺ, ꦱꦢꦺꦮꦏꦺ ꦭꦺꦴꦏꦺ ꦱꦩꦴꦫꦏꦺ ꦱꦧ꧀ꦫꦲ꧀ꦩꦏꦺ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪ ꦱꦢꦺꦮꦩꦤꦸꦱ꧀ꦱꦴꦪ ‘ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴ’ꦠꦶ ꦥꦕ꧀ꦕꦚ꧀ꦚꦴꦱꦶꦁ. ꦪꦠꦺꦴ ꦕ ꦑ꧀ꦮꦴꦲꦁ, ꦨꦶꦏ꧀ꦑꦮꦺ, ꦭꦺꦴꦏꦱ꧀ꦱ ꦄꦱ꧀ꦱꦴꦢꦚ꧀ꦕ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦚ꧀ꦕ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦚ꧀ꦕ ꦤꦶꦱ꧀ꦱꦫꦟꦠꦺꦴ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ, ꦄꦡꦴꦲꦁ, ꦨꦶꦏ꧀ꦑꦮꦺ, ꦱꦢꦺꦮꦏꦺ ꦭꦺꦴꦏꦺ ꦱꦩꦴꦫꦏꦺ ꦱꦧ꧀ꦫꦲ꧀ꦩꦏꦺ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪ ꦱꦢꦺꦮꦩꦤꦸꦱ꧀ꦱꦴꦪ ‘ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴ’ꦠꦶ ꦥꦕ꧀ꦕꦚ꧀ꦚꦴꦱꦶꦁ. ꦚꦴꦟꦚ꧀ꦕ ꦥꦤ ꦩꦺ ꦢꦱ꧀ꦱꦤꦁ ꦈꦢꦥꦴꦢꦶ – ‘ꦄꦏꦸꦥ꧀ꦥꦴ ꦩꦺ ꦮꦶꦩꦸꦠ꧀ꦠꦶ, ꦄꦪꦩꦤ꧀ꦠꦶꦩꦴ ꦗꦴꦠꦶ, ꦤꦠ꧀ꦡꦶ ꦢꦴꦤꦶ ꦥꦸꦤꦧ꧀ꦨꦮꦺꦴ’’’ꦠꦶ. ꦢꦸꦠꦶꦪꦁ.

꧓. ꦢꦸꦠꦶꦪꦄꦱ꧀ꦱꦴꦢꦱꦸꦠ꧀ꦠꦁ

꧑꧐꧖. ‘‘ꦤꦺꦴ ꦕꦺꦢꦁ [ꦤꦺꦴ ꦕꦺꦠꦁ (ꦱ꧀ꦪꦴ. ꦏꦁ. ꦥꦷ. ꦏ.) ꦱꦁ. ꦤꦶ. ꧓.꧒꧘ ꦥꦱ꧀ꦱꦶꦠꦧ꧀ꦧꦁ], ꦨꦶꦏ꧀ꦑꦮꦺ, ꦭꦺꦴꦏꦺ ꦄꦱ꧀ꦱꦴꦢꦺꦴ ꦄꦨꦮꦶꦱ꧀ꦱ, ꦤꦪꦶꦢꦁ ꦱꦠ꧀ꦠꦴ ꦭꦺꦴꦏꦺ ꦱꦴꦫꦗ꧀ꦗꦺꦪ꧀ꦪꦸꦁ. ꦪꦱ꧀ꦩꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦄꦠ꧀ꦡꦶ ꦭꦺꦴꦏꦺ ꦄꦱ꧀ꦱꦴꦢꦺꦴ, ꦠꦱ꧀ꦩꦴ ꦱꦠ꧀ꦠꦴ ꦭꦺꦴꦏꦺ ꦱꦴꦫꦗ꧀ꦗꦤ꧀ꦠꦶ. ꦤꦺꦴ ꦕꦺꦢꦁ, ꦨꦶꦏ꧀ꦑꦮꦺ, ꦭꦺꦴꦏꦺ ꦄꦴꦢꦷꦤꦮꦺꦴ ꦄꦨꦮꦶꦱ꧀ꦱ, ꦤꦪꦶꦢꦁ ꦱꦠ꧀ꦠꦴ ꦭꦺꦴꦏꦺ ꦤꦶꦧ꧀ꦧꦶꦤ꧀ꦢꦺꦪ꧀ꦪꦸꦁ. ꦪꦱ꧀ꦩꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦄꦠ꧀ꦡꦶ ꦭꦺꦴꦏꦺ ꦄꦴꦢꦷꦤꦮꦺꦴ, ꦠꦱ꧀ꦩꦴ ꦱꦠ꧀ꦠꦴ ꦭꦺꦴꦏꦺ ꦤꦶꦧ꧀ꦧꦶꦤ꧀ꦢꦤ꧀ꦠꦶ. ꦤꦺꦴ ꦕꦺꦢꦁ, ꦨꦶꦏ꧀ꦑꦮꦺ, ꦭꦺꦴꦏꦺ ꦤꦶꦱ꧀ꦱꦫꦟꦁ ꦄꦨꦮꦶꦱ꧀ꦱ, ꦤꦪꦶꦢꦁ ꦱꦠ꧀ꦠꦴ ꦭꦺꦴꦏꦩ꧀ꦲꦴ [ꦭꦺꦴꦏꦺ (ꦏ.)] ꦤꦶꦱ꧀ꦱꦫꦺꦪ꧀ꦪꦸꦁ. ꦪꦱ꧀ꦩꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦄꦠ꧀ꦡꦶ ꦭꦺꦴꦏꦺ ꦤꦶꦱ꧀ꦱꦫꦟꦁ, ꦠꦱ꧀ꦩꦴ ꦱꦠ꧀ꦠꦴ ꦭꦺꦴꦏꦩ꧀ꦲꦴ ꦤꦶꦱ꧀ꦱꦫꦤ꧀ꦠꦶ. ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦭꦺꦴꦏꦱ꧀ꦱ ꦄꦱ꧀ꦱꦴꦢꦚ꧀ꦕ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦚ꧀ꦕ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦚ꧀ꦕ ꦤꦶꦱ꧀ꦱꦫꦟꦠꦺꦴ ꦪꦡꦴꦨꦹꦠꦁ ꦤꦴꦧ꧀ꦨꦚ꧀ꦚꦴꦱꦸꦁ [ꦤꦴꦧ꧀ꦨꦚ꧀ꦚꦁꦱꦸ (ꦱꦁ. ꦤꦶ. ꧓.꧒꧘], ꦤꦺꦮ ꦠꦴꦮ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦱꦢꦺꦮꦏꦴ ꦭꦺꦴꦏꦴ ꦱꦩꦴꦫꦏꦴ ꦱꦧ꧀ꦫꦲ꧀ꦩꦏꦴ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪ ꦱꦢꦺꦮꦩꦤꦸꦱ꧀ꦱꦴꦪ ꦤꦶꦱ꧀ꦱꦛꦴ ꦮꦶꦱꦁꦪꦸꦠ꧀ꦠꦴ ꦮꦶꦥ꧀ꦥꦩꦸꦠ꧀ꦠꦴ [ꦮꦶꦥ꧀ꦥꦪꦸꦠ꧀ꦠꦴ (ꦏ.)] ꦮꦶꦩꦫꦶꦪꦴꦢꦷꦏꦠꦺꦤ [ꦮꦶꦩꦫꦶꦪꦴꦢꦶꦏꦠꦺꦤ (ꦱꦷ. ꦥꦷ. ꦏ.)] ꦕꦺꦠꦱꦴ ꦮꦶꦲꦫꦶꦁꦱꦸ. ꦪꦠꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦭꦺꦴꦏꦱ꧀ꦱ ꦄꦱ꧀ꦱꦴꦢꦚ꧀ꦕ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦚ꧀ꦕ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦚ꧀ꦕ ꦤꦶꦱ꧀ꦱꦫꦟꦠꦺꦴ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦸꦁ, ꦄꦡ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦱꦢꦺꦮꦏꦴ ꦭꦺꦴꦏꦴ ꦱꦩꦴꦫꦏꦴ ꦱꦧ꧀ꦫꦲ꧀ꦩꦏꦴ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪ ꦱꦢꦺꦮꦩꦤꦸꦱ꧀ꦱꦴꦪ ꦤꦶꦱ꧀ꦱꦛꦴ ꦮꦶꦱꦁꦪꦸꦠ꧀ꦠꦴ ꦮꦶꦥ꧀ꦥꦩꦸꦠ꧀ꦠꦴ ꦮꦶꦩꦫꦶꦪꦴꦢꦷꦏꦠꦺꦤ ꦕꦺꦠꦱꦴ ꦮꦶꦲꦫꦤ꧀ꦠꦷ’’ꦠꦶ. ꦠꦠꦶꦪꦁ.

꧔. ꦱꦩꦟꦧ꧀ꦫꦴꦲ꧀ꦩꦟꦱꦸꦠ꧀ꦠꦁ

꧑꧐꧗. ‘‘ꦪꦺ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦭꦺꦴꦏꦱ꧀ꦱ ꦄꦱ꧀ꦱꦴꦢꦚ꧀ꦕ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦚ꧀ꦕ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦚ꧀ꦕ ꦤꦶꦱ꧀ꦱꦫꦟꦠꦺꦴ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ, ꦤ ꦩꦺ ꦠꦺ [ꦤ ꦠꦺ (ꦏ.)], ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦱꦩꦟꦺꦱꦸ ꦮꦴ ꦱꦩꦟꦱꦩ꧀ꦩꦠꦴ ꦧ꧀ꦫꦴꦲ꧀ꦩꦟꦺꦱꦸ ꦮꦴ ꦧ꧀ꦫꦴꦲ꧀ꦩꦟꦱꦩ꧀ꦩꦠꦴ, ꦤ ꦕ ꦥꦤ ꦠꦺ ꦄꦴꦪꦱ꧀ꦩꦤ꧀ꦠꦺꦴ ꦱꦴꦩꦚ꧀ꦚꦠ꧀ꦡꦁ ꦮꦴ ꦧ꧀ꦫꦲ꧀ꦩꦚ꧀ꦚꦠ꧀ꦡꦁ ꦮꦴ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦶ. ꦪꦺ ꦕ ꦑꦺꦴ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦭꦺꦴꦏꦱ꧀ꦱ ꦄꦱ꧀ꦱꦴꦢꦚ꧀ꦕ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦚ꧀ꦕ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦚ꧀ꦕ ꦤꦶꦱ꧀ꦱꦫꦟꦠꦺꦴ ꦪꦡꦴꦨꦹꦠꦁ ꦥꦗꦴꦤꦤ꧀ꦠꦶ, ꦠꦺ ꦑꦺꦴ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦱꦩꦟꦺꦱꦸ ꦮꦴ ꦱꦩꦟꦱꦩ꧀ꦩꦠꦴ ꦧ꧀ꦫꦴꦲ꧀ꦩꦟꦺꦱꦸ ꦮꦴ ꦧ꧀ꦫꦴꦲ꧀ꦩꦟꦱꦩ꧀ꦩꦠꦴ, ꦠꦺ ꦕ ꦥꦤꦴꦪꦱ꧀ꦩꦤ꧀ꦠꦺꦴ ꦱꦴꦩꦚ꧀ꦚꦠ꧀ꦡꦚ꧀ꦕ ꦧ꧀ꦫꦲ꧀ꦩꦚ꧀ꦚꦠ꧀ꦡꦚ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’’ꦠꦶ [ꦮꦶꦲꦫꦶꦱ꧀ꦱꦤ꧀ꦠꦶ (ꦱꦷ. ꦥꦷ.)]. ꦕꦠꦸꦠ꧀ꦡꦁ.

꧕. ꦫꦸꦟ꧀ꦟꦱꦸꦠ꧀ꦠꦁ

꧑꧐꧘. ‘‘ꦫꦸꦟ꧀ꦟꦩꦶꦢꦁ, ꦨꦶꦏ꧀ꦑꦮꦺ, ꦄꦫꦶꦪꦱ꧀ꦱ ꦮꦶꦤꦪꦺ ꦪꦢꦶꦢꦁ ꦒꦷꦠꦁ. ꦈꦩ꧀ꦩꦠ꧀ꦠꦏꦩꦶꦢꦁ, ꦨꦶꦏ꧀ꦑꦮꦺ, ꦄꦫꦶꦪꦱ꧀ꦱ ꦮꦶꦤꦪꦺ ꦪꦢꦶꦢꦁ ꦤꦕ꧀ꦕꦁ. ꦏꦺꦴꦩꦴꦫꦏꦩꦶꦢꦁ, ꦨꦶꦏ꧀ꦑꦮꦺ, ꦄꦫꦶꦪꦱ꧀ꦱ ꦮꦶꦤꦪꦺ ꦪꦢꦶꦢꦁ ꦄꦠꦶꦮꦺꦭꦁ ꦢꦤ꧀ꦠꦮꦶꦢꦁꦱꦏꦲꦱꦶꦠꦁ [ꦢꦤ꧀ꦠꦮꦶꦢꦁꦱꦏꦁ ꦲꦱꦶꦠꦁ (ꦱꦷ. ꦥꦷ.)]. ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦱꦺꦠꦸꦓꦴꦠꦺꦴ ꦒꦷꦠꦺ, ꦱꦺꦠꦸꦓꦴꦠꦺꦴ ꦤꦕ꧀ꦕꦺ, ꦄꦭꦁ ꦮꦺꦴ ꦣꦩ꧀ꦩꦥ꧀ꦥꦩꦺꦴꦢꦶꦠꦴꦤꦁ ꦱꦠꦁ ꦱꦶꦠꦁ ꦱꦶꦠꦩꦠ꧀ꦠꦴꦪꦴ’’ꦠꦶ. ꦥꦚ꧀ꦕꦩꦁ.

꧖. ꦄꦠꦶꦠ꧀ꦠꦶꦱꦸꦠ꧀ꦠꦁ

꧑꧐꧙. ‘‘ꦠꦶꦟ꧀ꦟꦁ, ꦨꦶꦏ꧀ꦑꦮꦺ, ꦥꦛꦶꦱꦺꦮꦤꦴꦪ ꦤꦠ꧀ꦡꦶ ꦠꦶꦠ꧀ꦠꦶ. ꦏꦠꦩꦺꦱꦁ ꦠꦶꦟ꧀ꦟꦁ? ꦱꦺꦴꦥ꧀ꦥꦱ꧀ꦱ, ꦨꦶꦏ꧀ꦑꦮꦺ, ꦥꦛꦶꦱꦺꦮꦤꦴꦪ ꦤꦠ꧀ꦡꦶ ꦠꦶꦠ꧀ꦠꦶ. ꦱꦸꦫꦴꦩꦺꦫꦪꦥꦴꦤꦱ꧀ꦱ, ꦨꦶꦏ꧀ꦑꦮꦺ, ꦥꦛꦶꦱꦺꦮꦤꦴꦪ ꦤꦠ꧀ꦡꦶ ꦠꦶꦠ꧀ꦠꦶ. ꦩꦺꦡꦸꦤꦣꦩ꧀ꦩꦱꦩꦴꦥꦠ꧀ꦠꦶꦪꦴ, ꦨꦶꦏ꧀ꦑꦮꦺ, ꦥꦛꦶꦱꦺꦮꦤꦴꦪ ꦤꦠ꧀ꦡꦶ ꦠꦶꦠ꧀ꦠꦶ. ꦆꦩꦺꦱꦁ, ꦨꦶꦏ꧀ꦑꦮꦺ, ꦠꦶꦟ꧀ꦟꦁ ꦥꦛꦶꦱꦺꦮꦤꦴꦪ ꦤꦠ꧀ꦡꦶ ꦠꦶꦠ꧀ꦠꦷ’’ꦠꦶ. ꦖꦛ꧀ꦜꦁ.

꧗. ꦄꦫꦏ꧀ꦑꦶꦠꦱꦸꦠ꧀ꦠꦁ

꧑꧑꧐. ꦄꦡ ꦑꦺꦴ ꦄꦤꦴꦡꦥꦶꦟ꧀ꦝꦶꦏꦺꦴ ꦒꦲꦥꦠꦶ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦄꦤꦴꦡꦥꦶꦟ꧀ꦝꦶꦏꦁ ꦒꦲꦥꦠꦶꦁ ꦨꦒꦮꦴ ꦌꦠꦢꦮꦺꦴꦕ – ‘‘ꦕꦶꦠ꧀ꦠꦺ, ꦒꦲꦥꦠꦶ, ꦄꦫꦏ꧀ꦑꦶꦠꦺ ꦏꦴꦪꦏꦩ꧀ꦩꦩ꧀ꦥꦶ ꦄꦫꦏ꧀ꦑꦶꦠꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦫꦏ꧀ꦑꦶꦠꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦫꦏ꧀ꦑꦶꦠꦁ ꦲꦺꦴꦠꦶ. ꦠꦱ꧀ꦱ ꦄꦫꦏ꧀ꦑꦶꦠꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦫꦏ꧀ꦑꦶꦠꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦫꦏ꧀ꦑꦶꦠꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦏꦴꦪꦏꦩ꧀ꦩꦩ꧀ꦥꦶ ꦄꦮꦱ꧀ꦱꦸꦠꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦮꦱ꧀ꦱꦸꦠꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦮꦱ꧀ꦱꦸꦠꦁ ꦲꦺꦴꦠꦶ. ꦠꦱ꧀ꦱ ꦄꦮꦱ꧀ꦱꦸꦠꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦮꦱ꧀ꦱꦸꦠꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦮꦱ꧀ꦱꦸꦠꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦏꦴꦪꦏꦩ꧀ꦩꦩ꧀ꦥꦶ ꦥꦹꦠꦶꦏꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦥꦹꦠꦶꦏꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦥꦹꦠꦶꦏꦁ ꦲꦺꦴꦠꦶ. ꦠꦱ꧀ꦱ ꦥꦹꦠꦶꦏꦴꦪꦏꦩ꧀ꦩꦤ꧀ꦠꦱ꧀ꦱ ꦥꦹꦠꦶꦮꦕꦷꦏꦩ꧀ꦩꦤ꧀ꦠꦱ꧀ꦱ ꦥꦹꦠꦶꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦤ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦤ ꦨꦢ꧀ꦢꦶꦏꦴ ꦏꦴꦭꦔ꧀ꦏꦶꦫꦶꦪꦴ.

‘‘ꦱꦺꦪ꧀ꦪꦡꦴꦥꦶ, ꦒꦲꦥꦠꦶ, ꦏꦹꦛꦴꦒꦴꦫꦺ ꦢꦸꦕ꧀ꦖꦤ꧀ꦤꦺ ꦏꦹꦛꦩ꧀ꦥꦶ ꦄꦫꦏ꧀ꦑꦶꦠꦁ ꦲꦺꦴꦠꦶ, ꦒꦺꦴꦥꦴꦤꦱꦶꦪꦺꦴꦥꦶ ꦄꦫꦏ꧀ꦑꦶꦠꦴ ꦲꦺꦴꦤ꧀ꦠꦶ, ꦨꦶꦠ꧀ꦠꦶꦥꦶ ꦄꦫꦏ꧀ꦑꦶꦠꦴ ꦲꦺꦴꦠꦶ; ꦏꦹꦛꦩ꧀ꦥꦶ ꦄꦮꦱ꧀ꦱꦸꦠꦁ ꦲꦺꦴꦠꦶ, ꦒꦺꦴꦥꦴꦤꦱꦶꦪꦺꦴꦥꦶ ꦄꦮꦱ꧀ꦱꦸꦠꦴ ꦲꦺꦴꦤ꧀ꦠꦶ, ꦨꦶꦠ꧀ꦠꦶꦥꦶ ꦄꦮꦱ꧀ꦱꦸꦠꦴ ꦲꦺꦴꦠꦶ; ꦏꦹꦛꦩ꧀ꦥꦶ ꦥꦹꦠꦶꦏꦁ ꦲꦺꦴꦠꦶ, ꦒꦺꦴꦥꦴꦤꦱꦶꦪꦺꦴꦥꦶ ꦥꦹꦠꦶꦏꦴ ꦲꦺꦴꦤ꧀ꦠꦶ, ꦨꦶꦠ꧀ꦠꦶꦥꦶ ꦥꦹꦠꦶꦏꦴ ꦲꦺꦴꦠꦶ.

‘‘ꦌꦮꦩꦺꦮꦁ ꦑꦺꦴ, ꦒꦲꦥꦠꦶ, ꦕꦶꦠ꧀ꦠꦺ ꦄꦫꦏ꧀ꦑꦶꦠꦺ ꦏꦴꦪꦏꦩ꧀ꦩꦩ꧀ꦥꦶ ꦄꦫꦏ꧀ꦑꦶꦠꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦫꦏ꧀ꦑꦶꦠꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦫꦏ꧀ꦑꦶꦠꦁ ꦲꦺꦴꦠꦶ. ꦠꦱ꧀ꦱ ꦄꦫꦏ꧀ꦑꦶꦠꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦫꦏ꧀ꦑꦶꦠꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦫꦏ꧀ꦑꦶꦠꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦏꦴꦪꦏꦩ꧀ꦩꦩ꧀ꦥꦶ ꦄꦮꦱ꧀ꦱꦸꦠꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦮꦱ꧀ꦱꦸꦠꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦮꦱ꧀ꦱꦸꦠꦁ ꦲꦺꦴꦠꦶ. ꦠꦱ꧀ꦱ ꦄꦮꦱ꧀ꦱꦸꦠꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦮꦱ꧀ꦱꦸꦠꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦮꦱ꧀ꦱꦸꦠꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦏꦴꦪꦏꦩ꧀ꦩꦩ꧀ꦥꦶ ꦥꦹꦠꦶꦏꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦥꦹꦠꦶꦏꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦥꦹꦠꦶꦏꦁ ꦲꦺꦴꦠꦶ. ꦠꦱ꧀ꦱ ꦥꦹꦠꦶꦏꦴꦪꦏꦩ꧀ꦩꦤ꧀ꦠꦱ꧀ꦱ ꦥꦹꦠꦶꦮꦕꦷꦏꦩ꧀ꦩꦤ꧀ꦠꦱ꧀ꦱ ꦥꦹꦠꦶꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦤ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦤ ꦨꦢ꧀ꦢꦶꦏꦴ ꦏꦴꦭꦔ꧀ꦏꦶꦫꦶꦪꦴ.

‘‘ꦕꦶꦠ꧀ꦠꦺ, ꦒꦲꦥꦠꦶ, ꦫꦏ꧀ꦑꦶꦠꦺ ꦏꦴꦪꦏꦩ꧀ꦩꦩ꧀ꦥꦶ ꦫꦏ꧀ꦑꦶꦠꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦫꦏ꧀ꦑꦶꦠꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦫꦏ꧀ꦑꦶꦠꦁ ꦲꦺꦴꦠꦶ. ꦠꦱ꧀ꦱ ꦫꦏ꧀ꦑꦶꦠꦏꦴꦪꦏꦩ꧀ꦩꦤ꧀ꦠꦱ꧀ꦱ ꦫꦏ꧀ꦑꦶꦠꦮꦕꦷꦏꦩ꧀ꦩꦤ꧀ꦠꦱ꧀ꦱ ꦫꦏ꧀ꦑꦶꦠꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦏꦴꦪꦏꦩ꧀ꦩꦩ꧀ꦥꦶ ꦄꦤꦮꦱ꧀ꦱꦸꦠꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦤꦮꦱ꧀ꦱꦸꦠꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦤꦮꦱ꧀ꦱꦸꦠꦁ ꦲꦺꦴꦠꦶ. ꦠꦱ꧀ꦱ ꦄꦤꦮꦱ꧀ꦱꦸꦠꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦤꦮꦱ꧀ꦱꦸꦠꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦤꦮꦱ꧀ꦱꦸꦠꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦏꦴꦪꦏꦩ꧀ꦩꦩ꧀ꦥꦶ ꦄꦥꦹꦠꦶꦏꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦥꦹꦠꦶꦏꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦥꦹꦠꦶꦏꦁ ꦲꦺꦴꦠꦶ. ꦠꦱ꧀ꦱ ꦄꦥꦹꦠꦶꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦥꦹꦠꦶꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦥꦹꦠꦶꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦨꦢ꧀ꦢꦶꦏꦴ ꦏꦴꦭꦔ꧀ꦏꦶꦫꦶꦪꦴ.

‘‘ꦱꦺꦪ꧀ꦪꦡꦴꦥꦶ, ꦒꦲꦥꦠꦶ, ꦏꦹꦛꦴꦒꦴꦫꦺ ꦱꦸꦕ꧀ꦖꦤ꧀ꦤꦺ ꦏꦹꦛꦩ꧀ꦥꦶ ꦫꦏ꧀ꦑꦶꦠꦁ ꦲꦺꦴꦠꦶ, ꦒꦺꦴꦥꦴꦤꦱꦶꦪꦺꦴꦥꦶ ꦫꦏ꧀ꦑꦶꦠꦴ ꦲꦺꦴꦤ꧀ꦠꦶ, ꦨꦶꦠ꧀ꦠꦶꦥꦶ ꦫꦏ꧀ꦑꦶꦠꦴ ꦲꦺꦴꦠꦶ; ꦏꦹꦛꦩ꧀ꦥꦶ ꦄꦤꦮꦱ꧀ꦱꦸꦠꦁ ꦲꦺꦴꦠꦶ, ꦒꦺꦴꦥꦴꦤꦱꦶꦪꦺꦴꦥꦶ ꦄꦤꦮꦱ꧀ꦱꦸꦠꦴ ꦲꦺꦴꦤ꧀ꦠꦶ, ꦨꦶꦠ꧀ꦠꦶꦥꦶ ꦄꦤꦮꦱ꧀ꦱꦸꦠꦴ ꦲꦺꦴꦠꦶ; ꦏꦹꦛꦩ꧀ꦥꦶ ꦄꦥꦹꦠꦶꦏꦁ ꦲꦺꦴꦠꦶ, ꦒꦺꦴꦥꦴꦤꦱꦶꦪꦺꦴꦥꦶ ꦄꦥꦹꦠꦶꦏꦴ ꦲꦺꦴꦤ꧀ꦠꦶ, ꦨꦶꦠ꧀ꦠꦶꦥꦶ ꦄꦥꦹꦠꦶꦏꦴ ꦲꦺꦴꦠꦶ.

ꦌꦮꦩꦺꦮꦁ ꦑꦺꦴ, ꦒꦲꦥꦠꦶ, ꦕꦶꦠ꧀ꦠꦺ ꦫꦏ꧀ꦑꦶꦠꦺ ꦏꦴꦪꦏꦩ꧀ꦩꦩ꧀ꦥꦶ ꦫꦏ꧀ꦑꦶꦠꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦫꦏ꧀ꦑꦶꦠꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦫꦏ꧀ꦑꦶꦠꦁ ꦲꦺꦴꦠꦶ. ꦠꦱ꧀ꦱ ꦫꦏ꧀ꦑꦶꦠꦏꦴꦪꦏꦩ꧀ꦩꦤ꧀ꦠꦱ꧀ꦱ ꦫꦏ꧀ꦑꦶꦠꦮꦕꦷꦏꦩ꧀ꦩꦤ꧀ꦠꦱ꧀ꦱ ꦫꦏ꧀ꦑꦶꦠꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦏꦴꦪꦏꦩ꧀ꦩꦩ꧀ꦥꦶ ꦄꦤꦮꦱ꧀ꦱꦸꦠꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦤꦮꦱ꧀ꦱꦸꦠꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦤꦮꦱ꧀ꦱꦸꦠꦁ ꦲꦺꦴꦠꦶ. ꦠꦱ꧀ꦱ ꦄꦤꦮꦱ꧀ꦱꦸꦠꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦤꦮꦱ꧀ꦱꦸꦠꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦤꦮꦱ꧀ꦱꦸꦠꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦏꦴꦪꦏꦩ꧀ꦩꦩ꧀ꦥꦶ ꦄꦥꦹꦠꦶꦏꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦥꦹꦠꦶꦏꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦥꦹꦠꦶꦏꦁ ꦲꦺꦴꦠꦶ. ꦠꦱ꧀ꦱ ꦄꦥꦹꦠꦶꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦥꦹꦠꦶꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦥꦹꦠꦶꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦨꦢ꧀ꦢꦶꦏꦴ ꦏꦴꦭꦔ꧀ꦏꦶꦫꦶꦪꦴ’’ꦠꦶ. ꦱꦠ꧀ꦠꦩꦁ.

꧘. ꦧ꧀ꦪꦴꦥꦤ꧀ꦤꦱꦸꦠ꧀ꦠꦁ

꧑꧑꧑. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦄꦤꦴꦡꦥꦶꦟ꧀ꦝꦶꦏꦁ ꦒꦲꦥꦠꦶꦁ ꦨꦒꦮꦴ ꦌꦠꦢꦮꦺꦴꦕ – ‘‘ꦕꦶꦠ꧀ꦠꦺ, ꦒꦲꦥꦠꦶ, ꦧ꧀ꦪꦴꦥꦤ꧀ꦤꦺ ꦏꦴꦪꦏꦩ꧀ꦩꦩ꧀ꦥꦶ ꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦧ꧀ꦪꦴꦥꦤ꧀ꦤꦁ ꦲꦺꦴꦠꦶ. ꦠꦱ꧀ꦱ ꦧ꧀ꦪꦴꦥꦤ꧀ꦤꦏꦴꦪꦏꦩ꧀ꦩꦤ꧀ꦠꦱ꧀ꦱ ꦧ꧀ꦪꦴꦥꦤ꧀ꦤꦮꦕꦷꦏꦩ꧀ꦩꦤ꧀ꦠꦱ꧀ꦱ ꦧ꧀ꦪꦴꦥꦤ꧀ꦤꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦤ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦤ ꦨꦢ꧀ꦢꦶꦏꦴ ꦏꦴꦭꦔ꧀ꦏꦶꦫꦶꦪꦴ. ꦱꦺꦪ꧀ꦪꦡꦴꦥꦶ, ꦒꦲꦥꦠꦶ, ꦏꦹꦛꦴꦒꦴꦫꦺ ꦢꦸꦕ꧀ꦖꦤ꧀ꦤꦺ ꦏꦹꦛꦩ꧀ꦥꦶ ꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦒꦺꦴꦥꦴꦤꦱꦶꦪꦺꦴꦥꦶ ꦧ꧀ꦪꦴꦥꦤ꧀ꦤꦴ ꦲꦺꦴꦤ꧀ꦠꦶ, ꦨꦶꦠ꧀ꦠꦶꦥꦶ ꦧ꧀ꦪꦴꦥꦤ꧀ꦤꦴ ꦲꦺꦴꦠꦶ; ꦌꦮꦩꦺꦮꦁ ꦑꦺꦴ, ꦒꦲꦥꦠꦶ, ꦕꦶꦠ꧀ꦠꦺ ꦧ꧀ꦪꦴꦥꦤ꧀ꦤꦺ ꦏꦴꦪꦏꦩ꧀ꦩꦩ꧀ꦥꦶ ꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦧ꧀ꦪꦴꦥꦤ꧀ꦤꦁ ꦲꦺꦴꦠꦶ. ꦠꦱ꧀ꦱ ꦧ꧀ꦪꦴꦥꦤ꧀ꦤꦏꦴꦪꦏꦩ꧀ꦩꦤ꧀ꦠꦱ꧀ꦱ ꦧ꧀ꦪꦴꦥꦤ꧀ꦤꦮꦕꦷꦏꦩ꧀ꦩꦤ꧀ꦠꦱ꧀ꦱ ꦧ꧀ꦪꦴꦥꦤ꧀ꦤꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦤ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦤ ꦨꦢ꧀ꦢꦶꦏꦴ ꦏꦴꦭꦔ꧀ꦏꦶꦫꦶꦪꦴ.

‘‘ꦕꦶꦠ꧀ꦠꦺ, ꦒꦲꦥꦠꦶ, ꦄꦧ꧀ꦪꦴꦥꦤ꧀ꦤꦺ ꦏꦴꦪꦏꦩ꧀ꦩꦩ꧀ꦥꦶ ꦄꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦧ꧀ꦪꦴꦥꦤ꧀ꦤꦁ ꦲꦺꦴꦠꦶ. ꦠꦱ꧀ꦱ ꦄꦧ꧀ꦪꦴꦥꦤ꧀ꦤꦏꦴꦪꦏꦩ꧀ꦩꦤ꧀ꦠꦱ꧀ꦱ ꦄꦧ꧀ꦪꦴꦥꦤ꧀ꦤꦮꦕꦷꦏꦩ꧀ꦩꦤ꧀ꦠꦱ꧀ꦱ ꦄꦧ꧀ꦪꦴꦥꦤ꧀ꦤꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦨꦢ꧀ꦢꦶꦏꦴ ꦏꦴꦭꦔ꧀ꦏꦶꦫꦶꦪꦴ. ꦱꦺꦪ꧀ꦪꦡꦴꦥꦶ, ꦒꦲꦥꦠꦶ, ꦏꦹꦛꦴꦒꦴꦫꦺ ꦱꦸꦕ꧀ꦖꦤ꧀ꦤꦺ ꦏꦹꦛꦩ꧀ꦥꦶ ꦄꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦒꦺꦴꦥꦴꦤꦱꦶꦪꦺꦴꦥꦶ ꦄꦧ꧀ꦪꦴꦥꦤ꧀ꦤꦴ ꦲꦺꦴꦤ꧀ꦠꦶ, ꦨꦶꦠ꧀ꦠꦶꦥꦶ ꦄꦧ꧀ꦪꦴꦥꦤ꧀ꦤꦴ ꦲꦺꦴꦠꦶ; ꦌꦮꦩꦺꦮꦁ ꦑꦺꦴ, ꦒꦲꦥꦠꦶ, ꦕꦶꦠ꧀ꦠꦺ ꦄꦧ꧀ꦪꦴꦥꦤ꧀ꦤꦺ ꦏꦴꦪꦏꦩ꧀ꦩꦩ꧀ꦥꦶ ꦄꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦮꦕꦷꦏꦩ꧀ꦩꦩ꧀ꦥꦶ ꦄꦧ꧀ꦪꦴꦥꦤ꧀ꦤꦁ ꦲꦺꦴꦠꦶ, ꦩꦤꦺꦴꦏꦩ꧀ꦩꦩ꧀ꦥꦶ ꦄꦧ꧀ꦪꦴꦥꦤ꧀ꦤꦁ ꦲꦺꦴꦠꦶ. ꦠꦱ꧀ꦱ ꦄꦧ꧀ꦪꦴꦥꦤ꧀ꦤꦏꦴꦪꦏꦩ꧀ꦩꦤ꧀ꦠꦱ꧀ꦱ…ꦥꦺ… ꦄꦧ꧀ꦪꦴꦥꦤ꧀ꦤꦩꦤꦺꦴꦏꦩ꧀ꦩꦤ꧀ꦠꦱ꧀ꦱ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦨꦢ꧀ꦢꦶꦏꦴ ꦏꦴꦭꦔ꧀ꦏꦶꦫꦶꦪꦴ’’ꦠꦶ. ꦄꦛ꧀ꦜꦩꦁ.

꧙. ꦥꦜꦩꦤꦶꦢꦴꦤꦱꦸꦠ꧀ꦠꦁ

꧑꧑꧒. ‘‘ꦠꦷꦟꦶꦩꦴꦤꦶ, ꦨꦶꦏ꧀ꦑꦮꦺ, ꦤꦶꦢꦴꦤꦴꦤꦶ ꦏꦩ꧀ꦩꦴꦤꦁ ꦱꦩꦸꦢꦪꦴꦪ. ꦏꦠꦩꦴꦤꦶ ꦠꦷꦟꦶ? ꦭꦺꦴꦨꦺꦴ ꦤꦶꦢꦴꦤꦁ ꦏꦩ꧀ꦩꦴꦤꦁ ꦱꦩꦸꦢꦪꦴꦪ, ꦢꦺꦴꦱꦺꦴ ꦤꦶꦢꦴꦤꦁ ꦏꦩ꧀ꦩꦴꦤꦁ ꦱꦩꦸꦢꦪꦴꦪ, ꦩꦺꦴꦲꦺꦴ ꦤꦶꦢꦴꦤꦁ ꦏꦩ꧀ꦩꦴꦤꦁ ꦱꦩꦸꦢꦪꦴꦪ. ꦪꦁ, ꦨꦶꦏ꧀ꦑꦮꦺ, ꦭꦺꦴꦨꦥꦏꦠꦁ ꦏꦩ꧀ꦩꦁ ꦭꦺꦴꦨꦗꦁ ꦭꦺꦴꦨꦤꦶꦢꦴꦤꦁ ꦭꦺꦴꦨꦱꦩꦸꦢꦪꦁ, ꦠꦁ ꦏꦩ꧀ꦩꦁ ꦄꦏꦸꦱꦭꦁ ꦠꦁ ꦏꦩ꧀ꦩꦁ ꦱꦴꦮꦗ꧀ꦗꦁ ꦠꦁ ꦏꦩ꧀ꦩꦁ ꦢꦸꦏ꧀ꦑꦮꦶꦥꦴꦏꦁ, ꦠꦁ ꦏꦩ꧀ꦩꦁ ꦏꦩ꧀ꦩꦱꦩꦸꦢꦪꦴꦪ ꦱꦁꦮꦠ꧀ꦠꦠꦶ, ꦤ ꦠꦁ ꦏꦩ꧀ꦩꦁ ꦏꦩ꧀ꦩꦤꦶꦫꦺꦴꦣꦴꦪ ꦱꦁꦮꦠ꧀ꦠꦠꦶ. ꦪꦁ, ꦨꦶꦏ꧀ꦑꦮꦺ, ꦢꦺꦴꦱꦥꦏꦠꦁ ꦏꦩ꧀ꦩꦁ ꦢꦺꦴꦱꦗꦁ ꦢꦺꦴꦱꦤꦶꦢꦴꦤꦁ ꦢꦺꦴꦱꦱꦩꦸꦢꦪꦁ, ꦠꦁ ꦏꦩ꧀ꦩꦁ ꦄꦏꦸꦱꦭꦁ ꦠꦁ ꦏꦩ꧀ꦩꦁ ꦱꦴꦮꦗ꧀ꦗꦁ ꦠꦁ ꦏꦩ꧀ꦩꦁ ꦢꦸꦏ꧀ꦑꦮꦶꦥꦴꦏꦁ, ꦠꦁ ꦏꦩ꧀ꦩꦁ ꦏꦩ꧀ꦩꦱꦩꦸꦢꦪꦴꦪ ꦱꦁꦮꦠ꧀ꦠꦠꦶ, ꦤ ꦠꦁ ꦏꦩ꧀ꦩꦁ ꦏꦩ꧀ꦩꦤꦶꦫꦺꦴꦣꦴꦪ ꦱꦁꦮꦠ꧀ꦠꦠꦶ. ꦪꦁ, ꦨꦶꦏ꧀ꦑꦮꦺ, ꦩꦺꦴꦲꦥꦏꦠꦁ ꦏꦩ꧀ꦩꦁ ꦩꦺꦴꦲꦗꦁ ꦩꦺꦴꦲꦤꦶꦢꦴꦤꦁ ꦩꦺꦴꦲꦱꦩꦸꦢꦪꦁ, ꦠꦁ ꦏꦩ꧀ꦩꦁ ꦄꦏꦸꦱꦭꦁ ꦠꦁ ꦏꦩ꧀ꦩꦁ ꦱꦴꦮꦗ꧀ꦗꦁ ꦠꦁ ꦏꦩ꧀ꦩꦁ ꦢꦸꦏ꧀ꦑꦮꦶꦥꦴꦏꦁ, ꦠꦁ ꦏꦩ꧀ꦩꦁ ꦏꦩ꧀ꦩꦱꦩꦸꦢꦪꦴꦪ ꦱꦁꦮꦠ꧀ꦠꦠꦶ, ꦤ ꦠꦁ ꦏꦩ꧀ꦩꦁ ꦏꦩ꧀ꦩꦤꦶꦫꦺꦴꦣꦴꦪ ꦱꦁꦮꦠ꧀ꦠꦠꦶ. ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦠꦷꦟꦶ ꦤꦶꦢꦴꦤꦴꦤꦶ ꦏꦩ꧀ꦩꦴꦤꦁ ꦱꦩꦸꦢꦪꦴꦪ.

‘‘ꦠꦷꦟꦶꦩꦴꦤꦶ, ꦨꦶꦏ꧀ꦑꦮꦺ, ꦤꦶꦢꦴꦤꦴꦤꦶ ꦏꦩ꧀ꦩꦴꦤꦁ ꦱꦩꦸꦢꦪꦴꦪ. ꦏꦠꦩꦴꦤꦶ ꦠꦷꦟꦶ? ꦄꦭꦺꦴꦨꦺꦴ ꦤꦶꦢꦴꦤꦁ ꦏꦩ꧀ꦩꦴꦤꦁ ꦱꦩꦸꦢꦪꦴꦪ, ꦄꦢꦺꦴꦱꦺꦴ ꦤꦶꦢꦴꦤꦁ ꦏꦩ꧀ꦩꦴꦤꦁ ꦱꦩꦸꦢꦪꦴꦪ, ꦄꦩꦺꦴꦲꦺꦴ ꦤꦶꦢꦴꦤꦁ ꦏꦩ꧀ꦩꦴꦤꦁ ꦱꦩꦸꦢꦪꦴꦪ. ꦪꦁ, ꦨꦶꦏ꧀ꦑꦮꦺ, ꦄꦭꦺꦴꦨꦥꦏꦠꦁ ꦏꦩ꧀ꦩꦁ ꦄꦭꦺꦴꦨꦗꦁ ꦄꦭꦺꦴꦨꦤꦶꦢꦴꦤꦁ ꦄꦭꦺꦴꦨꦱꦩꦸꦢꦪꦁ, ꦠꦁ ꦏꦩ꧀ꦩꦁ ꦏꦸꦱꦭꦁ ꦠꦁ ꦏꦩ꧀ꦩꦁ ꦄꦤꦮꦗ꧀ꦗꦁ ꦠꦁ ꦏꦩ꧀ꦩꦁ ꦱꦸꦑꦮꦶꦥꦴꦏꦁ, ꦠꦁ ꦏꦩ꧀ꦩꦁ ꦏꦩ꧀ꦩꦤꦶꦫꦺꦴꦣꦴꦪ ꦱꦁꦮꦠ꧀ꦠꦠꦶ, ꦤ ꦠꦁ ꦏꦩ꧀ꦩꦁ ꦏꦩ꧀ꦩꦱꦩꦸꦢꦪꦴꦪ ꦱꦁꦮꦠ꧀ꦠꦠꦶ. ꦪꦁ, ꦨꦶꦏ꧀ꦑꦮꦺ, ꦄꦢꦺꦴꦱꦥꦏꦠꦁ ꦏꦩ꧀ꦩꦁ ꦄꦢꦺꦴꦱꦗꦁ ꦄꦢꦺꦴꦱꦤꦶꦢꦴꦤꦁ ꦄꦢꦺꦴꦱꦱꦩꦸꦢꦪꦁ, ꦠꦁ ꦏꦩ꧀ꦩꦁ ꦏꦸꦱꦭꦁ ꦠꦁ ꦏꦩ꧀ꦩꦁ ꦄꦤꦮꦗ꧀ꦗꦁ ꦠꦁ ꦏꦩ꧀ꦩꦁ ꦱꦸꦑꦮꦶꦥꦴꦏꦁ, ꦠꦁ ꦏꦩ꧀ꦩꦁ ꦏꦩ꧀ꦩꦤꦶꦫꦺꦴꦣꦴꦪ ꦱꦁꦮꦠ꧀ꦠꦠꦶ, ꦤ ꦠꦁ ꦏꦩ꧀ꦩꦁ ꦏꦩ꧀ꦩꦱꦩꦸꦢꦪꦴꦪ ꦱꦁꦮꦠ꧀ꦠꦠꦶ. ꦪꦁ, ꦨꦶꦏ꧀ꦑꦮꦺ, ꦄꦩꦺꦴꦲꦥꦏꦠꦁ ꦏꦩ꧀ꦩꦁ ꦄꦩꦺꦴꦲꦗꦁ ꦄꦩꦺꦴꦲꦤꦶꦢꦴꦤꦁ ꦄꦩꦺꦴꦲꦱꦩꦸꦢꦪꦁ, ꦠꦁ ꦏꦩ꧀ꦩꦁ ꦏꦸꦱꦭꦁ ꦠꦁ ꦏꦩ꧀ꦩꦁ ꦄꦤꦮꦗ꧀ꦗꦁ ꦠꦁ ꦏꦩ꧀ꦩꦁ ꦱꦸꦑꦮꦶꦥꦴꦏꦁ, ꦠꦁ ꦏꦩ꧀ꦩꦁ ꦏꦩ꧀ꦩꦤꦶꦫꦺꦴꦣꦴꦪ ꦱꦁꦮꦠ꧀ꦠꦠꦶ, ꦤ ꦠꦁ ꦏꦩ꧀ꦩꦁ ꦏꦩ꧀ꦩꦱꦩꦸꦢꦪꦴꦪ ꦱꦁꦮꦠ꧀ꦠꦠꦶ. ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦠꦷꦟꦶ ꦤꦶꦢꦴꦤꦴꦤꦶ ꦏꦩ꧀ꦩꦴꦤꦁ ꦱꦩꦸꦢꦪꦴꦪꦴ’’ꦠꦶ. ꦤꦮꦩꦁ.

꧑꧐. ꦢꦸꦠꦶꦪꦤꦶꦢꦴꦤꦱꦸꦠ꧀ꦠꦁ

꧑꧑꧓. ‘‘ꦠꦷꦟꦶꦩꦴꦤꦶ, ꦨꦶꦏ꧀ꦑꦮꦺ, ꦤꦶꦢꦴꦤꦴꦤꦶ ꦏꦩ꧀ꦩꦴꦤꦁ ꦱꦩꦸꦢꦪꦴꦪ. ꦏꦠꦩꦴꦤꦶ ꦠꦷꦟꦶ? ꦄꦠꦷꦠꦺ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ; ꦄꦤꦴꦒꦠꦺ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ; ꦥꦕ꧀ꦕꦸꦥ꧀ꦥꦤ꧀ꦤꦺ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ. ꦏꦡꦚ꧀ꦕ, ꦨꦶꦏ꧀ꦑꦮꦺ, ꦄꦠꦷꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ? ꦄꦠꦷꦠꦺ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦕꦺꦠꦱꦴ ꦄꦤꦸꦮꦶꦠꦏ꧀ꦏꦺꦠꦶ ꦄꦤꦸꦮꦶꦕꦴꦫꦺꦠꦶ. ꦠꦱ꧀ꦱ ꦄꦠꦷꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦕꦺꦠꦱꦴ ꦄꦤꦸꦮꦶꦠꦏ꧀ꦏꦪꦠꦺꦴ ꦄꦤꦸꦮꦶꦕꦴꦫꦪꦠꦺꦴ ꦖꦤ꧀ꦢꦺꦴ ꦗꦴꦪꦠꦶ. ꦖꦤ꧀ꦢꦗꦴꦠꦺꦴ ꦠꦺꦲꦶ ꦣꦩ꧀ꦩꦺꦲꦶ ꦱꦁꦪꦸꦠ꧀ꦠꦺꦴ ꦲꦺꦴꦠꦶ. ꦌꦠꦩꦲꦁ, ꦨꦶꦏ꧀ꦑꦮꦺ, ꦱꦁꦪꦺꦴꦗꦤꦁ ꦮꦢꦴꦩꦶ ꦪꦺꦴ ꦕꦺꦠꦱꦺꦴ ꦱꦴꦫꦴꦒꦺꦴ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦄꦠꦷꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦄꦤꦴꦒꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ? ꦄꦤꦴꦒꦠꦺ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦕꦺꦠꦱꦴ ꦄꦤꦸꦮꦶꦠꦏ꧀ꦏꦺꦠꦶ ꦄꦤꦸꦮꦶꦕꦴꦫꦺꦠꦶ. ꦠꦱ꧀ꦱ ꦄꦤꦴꦒꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦕꦺꦠꦱꦴ ꦄꦤꦸꦮꦶꦠꦏ꧀ꦏꦪꦠꦺꦴ ꦄꦤꦸꦮꦶꦕꦴꦫꦪꦠꦺꦴ ꦖꦤ꧀ꦢꦺꦴ ꦗꦴꦪꦠꦶ. ꦖꦤ꧀ꦢꦗꦴꦠꦺꦴ ꦠꦺꦲꦶ ꦣꦩ꧀ꦩꦺꦲꦶ ꦱꦁꦪꦸꦠ꧀ꦠꦺꦴ ꦲꦺꦴꦠꦶ. ꦌꦠꦩꦲꦁ, ꦨꦶꦏ꧀ꦑꦮꦺ, ꦱꦁꦪꦺꦴꦗꦤꦁ ꦮꦢꦴꦩꦶ ꦪꦺꦴ ꦕꦺꦠꦱꦺꦴ ꦱꦴꦫꦴꦒꦺꦴ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦄꦤꦴꦒꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦥꦕ꧀ꦕꦸꦥ꧀ꦥꦤ꧀ꦤꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ? ꦥꦕ꧀ꦕꦸꦥ꧀ꦥꦤ꧀ꦤꦺ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦕꦺꦠꦱꦴ ꦄꦤꦸꦮꦶꦠꦏ꧀ꦏꦺꦠꦶ ꦄꦤꦸꦮꦶꦕꦴꦫꦺꦠꦶ. ꦠꦱ꧀ꦱ ꦥꦕ꧀ꦕꦸꦥ꧀ꦥꦤ꧀ꦤꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦕꦺꦠꦱꦴ ꦄꦤꦸꦮꦶꦠꦏ꧀ꦏꦪꦠꦺꦴ ꦄꦤꦸꦮꦶꦕꦴꦫꦪꦠꦺꦴ ꦖꦤ꧀ꦢꦺꦴ ꦗꦴꦪꦠꦶ. ꦖꦤ꧀ꦢꦗꦴꦠꦺꦴ ꦠꦺꦲꦶ ꦣꦩ꧀ꦩꦺꦲꦶ ꦱꦁꦪꦸꦠ꧀ꦠꦺꦴ ꦲꦺꦴꦠꦶ. ꦌꦠꦩꦲꦁ, ꦨꦶꦏ꧀ꦑꦮꦺ, ꦱꦁꦪꦺꦴꦗꦤꦁ ꦮꦢꦴꦩꦶ ꦪꦺꦴ ꦕꦺꦠꦱꦺꦴ ꦱꦴꦫꦴꦒꦺꦴ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦕ꧀ꦕꦸꦥ꧀ꦥꦤ꧀ꦤꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦗꦴꦪꦠꦶ. ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦠꦷꦟꦶ ꦤꦶꦢꦴꦤꦴꦤꦶ ꦏꦩ꧀ꦩꦴꦤꦁ ꦱꦩꦸꦢꦪꦴꦪ.

‘‘ꦠꦷꦟꦶꦩꦴꦤꦶ, ꦨꦶꦏ꧀ꦑꦮꦺ, ꦤꦶꦢꦴꦤꦴꦤꦶ ꦏꦩ꧀ꦩꦴꦤꦁ ꦱꦩꦸꦢꦪꦴꦪ. ꦏꦠꦩꦴꦤꦶ ꦠꦷꦟꦶ? ꦄꦠꦷꦠꦺ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ; ꦄꦤꦴꦒꦠꦺ ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ; ꦥꦕ꧀ꦕꦸꦥ꧀ꦥꦤ꧀ꦤꦺ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ. ꦏꦡꦚ꧀ꦕ, ꦨꦶꦏ꧀ꦑꦮꦺ, ꦄꦠꦷꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ? ꦄꦠꦷꦠꦴꦤꦁ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦴꦤꦁ ꦣꦩ꧀ꦩꦴꦤꦁ ꦄꦴꦪꦠꦶꦁ ꦮꦶꦥꦴꦏꦁ ꦥꦗꦴꦤꦴꦠꦶ. ꦄꦴꦪꦠꦶꦁ ꦮꦶꦥꦴꦏꦁ ꦮꦶꦢꦶꦠ꧀ꦮꦴ ꦠꦢꦨꦶꦤꦶꦮꦠ꧀ꦠꦺꦠꦶ. ꦠꦢꦨꦶꦤꦶꦮꦠ꧀ꦠꦺꦠ꧀ꦮꦴ [ꦠꦢꦨꦶꦤꦶꦮꦗ꧀ꦗꦺꦠꦶ, ꦠꦢꦨꦶꦤꦶꦮꦗ꧀ꦗꦺꦠ꧀ꦮꦴ (ꦱꦷ. ꦱ꧀ꦪꦴ. ꦏꦁ.)] ꦕꦺꦠꦱꦴ ꦄꦨꦶꦤꦶꦮꦶꦗ꧀ꦙꦶꦠ꧀ꦮꦴ [ꦄꦨꦶꦮꦶꦫꦴꦗꦺꦠ꧀ꦮꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦥꦚ꧀ꦚꦴꦪ ꦄꦠꦶꦮꦶꦗ꧀ꦙ [ꦄꦨꦶꦤꦶꦮꦶꦗ꧀ꦙ (ꦏ.)] ꦥꦱ꧀ꦱꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦄꦠꦷꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦄꦤꦴꦒꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ? ꦄꦤꦴꦒꦠꦴꦤꦁ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦴꦤꦁ ꦣꦩ꧀ꦩꦴꦤꦁ ꦄꦴꦪꦠꦶꦁ ꦮꦶꦥꦴꦏꦁ ꦥꦗꦴꦤꦴꦠꦶ. ꦄꦴꦪꦠꦶꦁ ꦮꦶꦥꦴꦏꦁ ꦮꦶꦢꦶꦠ꧀ꦮꦴ ꦠꦢꦨꦶꦤꦶꦮꦠ꧀ꦠꦺꦠꦶ. ꦠꦢꦨꦶꦤꦶꦮꦠ꧀ꦠꦺꦠ꧀ꦮꦴ ꦕꦺꦠꦱꦴ ꦄꦨꦶꦤꦶꦮꦶꦗ꧀ꦙꦶꦠ꧀ꦮꦴ ꦥꦚ꧀ꦚꦴꦪ ꦄꦠꦶꦮꦶꦗ꧀ꦙ ꦥꦱ꧀ꦱꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦄꦤꦴꦒꦠꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦥꦕ꧀ꦕꦸꦥ꧀ꦥꦤ꧀ꦤꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ? ꦥꦕ꧀ꦕꦸꦥ꧀ꦥꦤ꧀ꦤꦴꦤꦁ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦛ꧀ꦜꦴꦤꦶꦪꦴꦤꦁ ꦣꦩ꧀ꦩꦴꦤꦁ ꦄꦴꦪꦠꦶꦁ ꦮꦶꦥꦴꦏꦁ ꦥꦗꦴꦤꦴꦠꦶ, ꦄꦴꦪꦠꦶꦁ ꦮꦶꦥꦴꦏꦁ ꦮꦶꦢꦶꦠ꧀ꦮꦴ ꦠꦢꦨꦶꦤꦶꦮꦠ꧀ꦠꦺꦠꦶ, ꦠꦢꦨꦶꦤꦶꦮꦠ꧀ꦠꦺꦠ꧀ꦮꦴ ꦕꦺꦠꦱꦴ ꦄꦨꦶꦤꦶꦮꦶꦗ꧀ꦙꦶꦠ꧀ꦮꦴ ꦥꦚ꧀ꦚꦴꦪ ꦄꦠꦶꦮꦶꦗ꧀ꦙ ꦥꦱ꧀ꦱꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦥꦕ꧀ꦕꦸꦥ꧀ꦥꦤ꧀ꦤꦺ ꦖꦤ꧀ꦢꦫꦴꦒꦛ꧀ꦜꦴꦤꦶꦪꦺ ꦣꦩ꧀ꦩꦺ ꦄꦴꦫꦧ꧀ꦨ ꦖꦤ꧀ꦢꦺꦴ ꦤ ꦗꦴꦪꦠꦶ. ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦠꦷꦟꦶ ꦤꦶꦢꦴꦤꦴꦤꦶ ꦏꦩ꧀ꦩꦴꦤꦁ ꦱꦩꦸꦢꦪꦴꦪꦴ’’ꦠꦶ. ꦢꦱꦩꦁ.

ꦱꦩ꧀ꦧꦺꦴꦣꦮꦒ꧀ꦒꦺꦴ ꦥꦜꦩꦺꦴ.