꧑꧑. ꦤꦶꦩꦶꦠ꧀ꦠꦱꦸꦠ꧀ꦠꦁ

꧑꧐꧓. ‘‘ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦠꦷꦟꦶ ꦤꦶꦩꦶꦠ꧀ꦠꦴꦤꦶ ꦏꦴꦭꦺꦤ ꦏꦴꦭꦁ ꦩꦤꦱꦶ ꦏꦴꦠꦧ꧀ꦧꦴꦤꦶ – ꦏꦴꦭꦺꦤ ꦏꦴꦭꦁ ꦱꦩꦴꦣꦶꦤꦶꦩꦶꦠ꧀ꦠꦁ ꦩꦤꦱꦶ ꦏꦴꦠꦧ꧀ꦧꦁ, ꦏꦴꦭꦺꦤ ꦏꦴꦭꦁ ꦥꦒ꧀ꦒꦲꦤꦶꦩꦶꦠ꧀ꦠꦁ ꦩꦤꦱꦶ ꦏꦴꦠꦧ꧀ꦧꦁ, ꦏꦴꦭꦺꦤ ꦏꦴꦭꦁ ꦈꦥꦺꦏ꧀ꦑꦴꦤꦶꦩꦶꦠ꧀ꦠꦁ ꦩꦤꦱꦶ ꦏꦴꦠꦧ꧀ꦧꦁ. ꦱꦕꦺ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦴ ꦨꦶꦏ꧀ꦑꦸ ꦌꦏꦤ꧀ꦠꦁ ꦱꦩꦴꦣꦶꦤꦶꦩꦶꦠ꧀ꦠꦁꦪꦺꦮ ꦩꦤꦱꦶ ꦏꦫꦺꦪ꧀ꦪ, ꦜꦴꦤꦁ ꦠꦁ ꦕꦶꦠ꧀ꦠꦁ ꦏꦺꦴꦱꦗ꧀ꦗꦴꦪ ꦱꦁꦮꦠ꧀ꦠꦺꦪ꧀ꦪ. ꦱꦕꦺ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦴ ꦨꦶꦏ꧀ꦑꦸ ꦌꦏꦤ꧀ꦠꦁ ꦥꦒ꧀ꦒꦲꦤꦶꦩꦶꦠ꧀ꦠꦁꦪꦺꦮ ꦩꦤꦱꦶ ꦏꦫꦺꦪ꧀ꦪ, ꦜꦴꦤꦁ ꦠꦁ ꦕꦶꦠ꧀ꦠꦁ ꦈꦢ꧀ꦣꦕ꧀ꦕꦴꦪ ꦱꦁꦮꦠ꧀ꦠꦺꦪ꧀ꦪ. ꦱꦕꦺ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦴ ꦨꦶꦏ꧀ꦑꦸ ꦌꦏꦤ꧀ꦠꦁ ꦈꦥꦺꦏ꧀ꦑꦴꦤꦶꦩꦶꦠ꧀ꦠꦁꦪꦺꦮ ꦩꦤꦱꦶ ꦏꦫꦺꦪ꧀ꦪ, ꦜꦴꦤꦁ ꦠꦁ ꦕꦶꦠ꧀ꦠꦁ ꦤ ꦱꦩ꧀ꦩꦴ ꦱꦩꦴꦣꦶꦪꦺꦪ꧀ꦪ ꦄꦴꦱꦮꦴꦤꦁ ꦑꦪꦴꦪ. ꦪꦠꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦴ ꦨꦶꦏ꧀ꦑꦸ ꦏꦴꦭꦺꦤ ꦏꦴꦭꦁ ꦱꦩꦴꦣꦶꦤꦶꦩꦶꦠ꧀ꦠꦁ ꦩꦤꦱꦶ ꦏꦫꦺꦴꦠꦶ, ꦏꦴꦭꦺꦤ ꦏꦴꦭꦁ ꦥꦒ꧀ꦒꦲꦤꦶꦩꦶꦠ꧀ꦠꦁ ꦩꦤꦱꦶ ꦏꦫꦺꦴꦠꦶ, ꦏꦴꦭꦺꦤ ꦏꦴꦭꦁ ꦈꦥꦺꦏ꧀ꦑꦴꦤꦶꦩꦶꦠ꧀ꦠꦁ ꦩꦤꦱꦶ ꦏꦫꦺꦴꦠꦶ, ꦠꦁ ꦲꦺꦴꦠꦶ ꦕꦶꦠ꧀ꦠꦁ ꦩꦸꦢꦸꦚ꧀ꦕ ꦏꦩ꧀ꦩꦤꦶꦪꦚ꧀ꦕ ꦥꦨꦱ꧀ꦱꦫꦚ꧀ꦕ, ꦤ ꦕ ꦥꦨꦔ꧀ꦒꦸ, ꦱꦩ꧀ꦩꦴ ꦱꦩꦴꦣꦶꦪꦠꦶ ꦄꦴꦱꦮꦴꦤꦁ ꦑꦪꦴꦪ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦱꦸꦮꦟ꧀ꦟꦏꦴꦫꦺꦴ ꦮꦴ ꦱꦸꦮꦟ꧀ꦟꦏꦴꦫꦤ꧀ꦠꦺꦮꦴꦱꦷ ꦮꦴ ꦈꦏ꧀ꦏꦁ ꦧꦤ꧀ꦣꦺꦪ꧀ꦪ [ꦧꦤ꧀ꦣꦠꦶ… ꦄꦴꦭꦶꦩ꧀ꦥꦠꦶ (ꦮꦶꦱꦸꦢ꧀ꦣꦶ. ꧑.꧑꧘꧑ ꦠꦁꦛꦷꦏꦴꦪꦁ ꦕ) ꦩ. ꦤꦶ. ꦄꦛ꧀ꦜ. ꧑.꧗꧖; ꦩ. ꦤꦶ. ꧓.꧓꧖꧐ ꦠꦁꦄꦛ꧀ꦜꦏꦡꦴꦛꦷꦏꦴꦱꦸ ꦕ ꦥꦱ꧀ꦱꦶꦠꦧ꧀ꦧꦁ], ꦈꦏ꧀ꦏꦁ ꦧꦤ꧀ꦣꦶꦠ꧀ꦮꦴ ꦈꦏ꧀ꦏꦴꦩꦸꦑꦁ ꦄꦴꦭꦶꦩ꧀ꦥꦺꦪ꧀ꦪ, ꦈꦏ꧀ꦏꦴꦩꦸꦑꦁ ꦄꦴꦭꦶꦩ꧀ꦥꦺꦠ꧀ꦮꦴ ꦱꦟ꧀ꦝꦴꦱꦺꦤ ꦗꦴꦠꦫꦹꦥꦁ ꦒꦲꦺꦠ꧀ꦮꦴ ꦈꦏ꧀ꦏꦴꦩꦸꦑꦺ ꦥꦏ꧀ꦑꦶꦥꦺꦪ꧀ꦪ [ꦥꦏ꧀ꦑꦶꦥꦠꦶ (ꦮꦶꦱꦸꦢ꧀ꦣꦶ. ꧑.꧑꧘꧑)], ꦈꦏ꧀ꦏꦴꦩꦸꦑꦺ ꦥꦏ꧀ꦑꦶꦥꦶꦠ꧀ꦮꦴ ꦏꦴꦭꦺꦤ ꦏꦴꦭꦁ ꦄꦨꦶꦣꦩꦠꦶ, ꦏꦴꦭꦺꦤ ꦏꦴꦭꦁ ꦈꦢꦏꦺꦤ ꦥꦫꦶꦥ꧀ꦦꦺꦴꦱꦺꦠꦶ, ꦏꦴꦭꦺꦤ ꦏꦴꦭꦁ ꦄꦗ꧀ꦙꦸꦥꦺꦏ꧀ꦑꦠꦶ. ꦱꦕꦺ, ꦨꦶꦏ꧀ꦑꦮꦺ, ꦱꦸꦮꦟ꧀ꦟꦏꦴꦫꦺꦴ ꦮꦴ ꦱꦸꦮꦟ꧀ꦟꦏꦴꦫꦤ꧀ꦠꦺꦮꦴꦱꦷ ꦮꦴ ꦠꦁ ꦗꦴꦠꦫꦹꦥꦁ ꦌꦏꦤ꧀ꦠꦁ ꦄꦨꦶꦣꦩꦺꦪ꧀ꦪ, ꦜꦴꦤꦁ ꦠꦁ ꦗꦴꦠꦫꦹꦥꦁ ꦝꦲꦺꦪ꧀ꦪ. ꦱꦕꦺ, ꦨꦶꦏ꧀ꦑꦮꦺ, ꦱꦸꦮꦟ꧀ꦟꦏꦴꦫꦺꦴ ꦮꦴ ꦱꦸꦮꦟ꧀ꦟꦏꦴꦫꦤ꧀ꦠꦺꦮꦴꦱꦷ ꦮꦴ ꦠꦁ ꦗꦴꦠꦫꦹꦥꦁ ꦌꦏꦤ꧀ꦠꦁ ꦈꦢꦏꦺꦤ ꦥꦫꦶꦥ꧀ꦦꦺꦴꦱꦺꦪ꧀ꦪ, ꦜꦴꦤꦁ ꦠꦁ ꦗꦴꦠꦫꦹꦥꦁ ꦤꦶꦧ꧀ꦧꦴꦥꦺꦪ꧀ꦪ [ꦤꦶꦧ꧀ꦧꦴꦪꦺꦪ꧀ꦪ (ꦱꦷ.)]. ꦱꦕꦺ, ꦨꦶꦏ꧀ꦑꦮꦺ, ꦱꦸꦮꦟ꧀ꦟꦏꦴꦫꦺꦴ ꦮꦴ ꦱꦸꦮꦟ꧀ꦟꦏꦴꦫꦤ꧀ꦠꦺꦮꦴꦱꦷ ꦮꦴ ꦠꦁ ꦗꦴꦠꦫꦹꦥꦁ ꦌꦏꦤ꧀ꦠꦁ ꦄꦗ꧀ꦙꦸꦥꦺꦏ꧀ꦑꦺꦪ꧀ꦪ, ꦜꦴꦤꦁ ꦠꦁ ꦗꦴꦠꦫꦹꦥꦁ ꦤ ꦱꦩ꧀ꦩꦴ ꦥꦫꦶꦥꦴꦏꦁ ꦒꦕ꧀ꦖꦺꦪ꧀ꦪ. ꦪꦠꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦱꦸꦮꦟ꧀ꦟꦏꦴꦫꦺꦴ ꦮꦴ ꦱꦸꦮꦟ꧀ꦟꦏꦴꦫꦤ꧀ꦠꦺꦮꦴꦱꦷ ꦮꦴ ꦠꦁ ꦗꦴꦠꦫꦹꦥꦁ ꦏꦴꦭꦺꦤ ꦏꦴꦭꦁ ꦄꦨꦶꦣꦩꦠꦶ, ꦏꦴꦭꦺꦤ ꦏꦴꦭꦁ ꦈꦢꦏꦺꦤ ꦥꦫꦶꦥ꧀ꦦꦺꦴꦱꦺꦠꦶ, ꦏꦴꦭꦺꦤ ꦏꦴꦭꦁ ꦄꦗ꧀ꦙꦸꦥꦺꦏ꧀ꦑꦠꦶ, ꦠꦁ ꦲꦺꦴꦠꦶ ꦗꦴꦠꦫꦹꦥꦁ ꦩꦸꦢꦸꦚ꧀ꦕ ꦏꦩ꧀ꦩꦤꦶꦪꦚ꧀ꦕ ꦥꦨꦱ꧀ꦱꦫꦚ꧀ꦕ, ꦤ ꦕ ꦥꦨꦔ꧀ꦒꦸ, ꦱꦩ꧀ꦩꦴ ꦈꦥꦺꦠꦶ ꦏꦩ꧀ꦩꦴꦪ. ꦪꦱ꧀ꦱꦴ ꦪꦱ꧀ꦱꦴ ꦕ ꦥꦶꦭꦤ꧀ꦣꦤꦮꦶꦏꦠꦶꦪꦴ ꦄꦴꦏꦔ꧀ꦑꦠꦶ – ꦪꦢꦶ ꦥꦛ꧀ꦛꦶꦏꦴꦪ, ꦪꦢꦶ ꦏꦸꦟ꧀ꦝꦭꦴꦪ, ꦪꦢꦶ ꦒꦷꦮꦺꦪ꧀ꦪꦏꦺ, ꦪꦢꦶ ꦱꦸꦮꦟ꧀ꦟꦩꦴꦭꦴꦪ – ꦠꦚ꧀ꦕꦱ꧀ꦱ ꦄꦠ꧀ꦡꦁ ꦄꦤꦸꦨꦺꦴꦠꦶ.

‘‘ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦤ ꦨꦶꦏ꧀ꦑꦸꦤꦴ ꦠꦷꦟꦶ ꦤꦶꦩꦶꦠ꧀ꦠꦴꦤꦶ ꦏꦴꦭꦺꦤ ꦏꦴꦭꦁ ꦩꦤꦱꦶ ꦏꦴꦠꦧ꧀ꦧꦴꦤꦶ – ꦏꦴꦭꦺꦤ ꦏꦴꦭꦁ ꦱꦩꦴꦣꦶꦤꦶꦩꦶꦠ꧀ꦠꦁ ꦩꦤꦱꦶ ꦏꦴꦠꦧ꧀ꦧꦁ, ꦏꦴꦭꦺꦤ ꦏꦴꦭꦁ ꦥꦒ꧀ꦒꦲꦤꦶꦩꦶꦠ꧀ꦠꦁ ꦩꦤꦱꦶ ꦏꦴꦠꦧ꧀ꦧꦁ, ꦏꦴꦭꦺꦤ ꦏꦴꦭꦁ ꦈꦥꦺꦏ꧀ꦑꦴꦤꦶꦩꦶꦠ꧀ꦠꦁ ꦩꦤꦱꦶ ꦏꦴꦠꦧ꧀ꦧꦁ. ꦱꦕꦺ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦴ ꦨꦶꦏ꧀ꦑꦸ ꦌꦏꦤ꧀ꦠꦁ ꦱꦩꦴꦣꦶꦤꦶꦩꦶꦠ꧀ꦠꦁꦪꦺꦮ ꦩꦤꦱꦶ ꦏꦫꦺꦪ꧀ꦪ, ꦜꦴꦤꦁ ꦠꦁ ꦕꦶꦠ꧀ꦠꦁ ꦏꦺꦴꦱꦗ꧀ꦗꦴꦪ ꦱꦁꦮꦠ꧀ꦠꦺꦪ꧀ꦪ. ꦱꦕꦺ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦴ ꦨꦶꦏ꧀ꦑꦸ ꦌꦏꦤ꧀ꦠꦁ ꦥꦒ꧀ꦒꦲꦤꦶꦩꦶꦠ꧀ꦠꦁꦪꦺꦮ ꦩꦤꦱꦶ ꦏꦫꦺꦪ꧀ꦪ, ꦜꦴꦤꦁ ꦠꦁ ꦕꦶꦠ꧀ꦠꦁ ꦈꦢ꧀ꦣꦕ꧀ꦕꦴꦪ ꦱꦁꦮꦠ꧀ꦠꦺꦪ꧀ꦪ. ꦱꦕꦺ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦴ ꦨꦶꦏ꧀ꦑꦸ ꦌꦏꦤ꧀ꦠꦁ ꦈꦥꦺꦏ꧀ꦑꦴꦤꦶꦩꦶꦠ꧀ꦠꦁꦪꦺꦮ ꦩꦤꦱꦶ ꦏꦫꦺꦪ꧀ꦪ, ꦜꦴꦤꦁ ꦠꦁ ꦕꦶꦠ꧀ꦠꦁ ꦤ ꦱꦩ꧀ꦩꦴ ꦱꦩꦴꦣꦶꦪꦺꦪ꧀ꦪ ꦄꦴꦱꦮꦴꦤꦁ ꦑꦪꦴꦪ. ꦪꦠꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦄꦣꦶꦕꦶꦠ꧀ꦠꦩꦤꦸꦪꦸꦠ꧀ꦠꦺꦴ ꦨꦶꦏ꧀ꦑꦸ ꦏꦴꦭꦺꦤ ꦏꦴꦭꦁ ꦱꦩꦴꦣꦶꦤꦶꦩꦶꦠ꧀ꦠꦁ ꦩꦤꦱꦶ ꦏꦫꦺꦴꦠꦶ, ꦏꦴꦭꦺꦤ ꦏꦴꦭꦁ ꦥꦒ꧀ꦒꦲꦤꦶꦩꦶꦠ꧀ꦠꦁ ꦩꦤꦱꦶ ꦏꦫꦺꦴꦠꦶ, ꦏꦴꦭꦺꦤ ꦏꦴꦭꦁ ꦈꦥꦺꦏ꧀ꦑꦴꦤꦶꦩꦶꦠ꧀ꦠꦁ ꦩꦤꦱꦶ ꦏꦫꦺꦴꦠꦶ, ꦠꦁ ꦲꦺꦴꦠꦶ ꦕꦶꦠ꧀ꦠꦁ ꦩꦸꦢꦸꦚ꧀ꦕ ꦏꦩ꧀ꦩꦤꦶꦪꦚ꧀ꦕ ꦥꦨꦱ꧀ꦱꦫꦚ꧀ꦕ, ꦤ ꦕ ꦥꦨꦔ꧀ꦒꦸ, ꦱꦩ꧀ꦩꦴ ꦱꦩꦴꦣꦶꦪꦠꦶ ꦄꦴꦱꦮꦴꦤꦁ ꦑꦪꦴꦪ. ꦪꦱ꧀ꦱ ꦪꦱ꧀ꦱ ꦕ ꦄꦨꦶꦚ꧀ꦚꦴꦱꦕ꧀ꦖꦶꦏꦫꦟꦷꦪꦱ꧀ꦱ ꦣꦩ꧀ꦩꦱ꧀ꦱ ꦕꦶꦠ꧀ꦠꦁ ꦄꦨꦶꦤꦶꦤ꧀ꦤꦴꦩꦺꦠꦶ ꦄꦨꦶꦚ꧀ꦚꦴꦱꦕ꧀ꦖꦶꦏꦶꦫꦶꦪꦴꦪ, ꦠꦠ꧀ꦫ ꦠꦠ꧀ꦫꦺꦮ ꦱꦏ꧀ꦑꦶꦨꦧ꧀ꦧꦠꦁ ꦥꦴꦥꦸꦟꦴꦠꦶ ꦱꦠꦶ ꦱꦠꦶꦄꦴꦪꦠꦤꦺ.

‘‘ꦱꦺꦴ ꦱꦕꦺ ꦄꦴꦏꦔ꧀ꦑꦠꦶ – ‘ꦄꦤꦺꦏꦮꦶꦲꦶꦠꦁ ꦆꦢ꧀ꦣꦶꦮꦶꦣꦁ ꦥꦕ꧀ꦕꦤꦸꦨꦮꦺꦪ꧀ꦪꦁ…ꦥꦺ… (ꦖ ꦄꦨꦶꦚ꧀ꦚꦴ ꦮꦶꦠ꧀ꦡꦴꦫꦺꦠꦧ꧀ꦧꦴ) ꦄꦴꦱꦮꦴꦤꦁ ꦑꦪꦴ…ꦥꦺ… ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦠꦠ꧀ꦫ ꦠꦠ꧀ꦫꦺꦮ ꦱꦏ꧀ꦑꦶꦨꦧ꧀ꦧꦠꦁ ꦥꦴꦥꦸꦟꦴꦠꦶ ꦱꦠꦶ ꦱꦠꦶꦄꦴꦪꦠꦤꦺ’’ꦠꦶ. ꦌꦏꦴꦢꦱꦩꦁ.

ꦭꦺꦴꦟꦏꦥꦭ꧀ꦭꦮꦒ꧀ꦒꦺꦴ [ꦭꦺꦴꦟꦦꦭꦮꦒ꧀ꦒꦺꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦥꦚ꧀ꦕꦩꦺꦴ.