꧗. ꦢꦸꦠꦶꦪꦱꦶꦏ꧀ꦑꦴꦱꦸꦠ꧀ꦠꦁ

꧘꧘. ‘‘ꦱꦴꦣꦶꦏꦩꦶꦢꦁ, ꦨꦶꦏ꧀ꦑꦮꦺ, ꦢꦶꦪꦝ꧀ꦞꦱꦶꦏ꧀ꦑꦴꦥꦢꦱꦠꦁ ꦄꦤ꧀ꦮꦢ꧀ꦣꦩꦴꦱꦁ ꦈꦢ꧀ꦢꦺꦱꦁ ꦄꦴꦒꦕ꧀ꦖꦠꦶ ꦪꦠ꧀ꦡ ꦄꦠ꧀ꦠꦏꦴꦩꦴ ꦏꦸꦭꦥꦸꦠ꧀ꦠꦴ ꦱꦶꦏ꧀ꦑꦤ꧀ꦠꦶ. ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦴ ꦪꦠ꧀ꦡꦺꦠꦁ ꦱꦧ꧀ꦧꦁ ꦱꦩꦺꦴꦣꦴꦤꦁ ꦒꦕ꧀ꦖꦠꦶ. ꦏꦠꦩꦴ ꦠꦶꦱ꧀ꦱꦺꦴ? ꦄꦣꦶꦱꦷꦭꦱꦶꦏ꧀ꦑꦴ, ꦄꦣꦶꦕꦶꦠ꧀ꦠꦱꦶꦏ꧀ꦑꦴ, ꦄꦣꦶꦥꦚ꧀ꦚꦴꦱꦶꦏ꧀ꦑꦴ – ꦆꦩꦴ ꦑꦺꦴ, ꦨꦶꦏ꧀ꦑꦮꦺ, ꦠꦶꦱ꧀ꦱꦺꦴ ꦱꦶꦏ꧀ꦑꦴ ꦪꦠ꧀ꦡꦺꦠꦁ ꦱꦧ꧀ꦧꦁ ꦱꦩꦺꦴꦣꦴꦤꦁ ꦒꦕ꧀ꦖꦠꦶ.

‘‘ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ ꦱꦩꦴꦣꦶꦱ꧀ꦩꦶꦁ ꦩꦠ꧀ꦠꦱꦺꦴ ꦏꦴꦫꦷ ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ. ꦱꦺꦴ ꦪꦴꦤꦶ ꦠꦴꦤꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦶ ꦠꦴꦤꦶ ꦄꦴꦥꦗ꧀ꦗꦠꦶꦥꦶ ꦮꦸꦛ꧀ꦜꦴꦠꦶꦥꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦤ ꦲꦶ ꦩꦺꦠ꧀ꦡ, ꦨꦶꦏ꧀ꦑꦮꦺ, ꦄꦨꦧ꧀ꦧꦠꦴ ꦮꦸꦠ꧀ꦠꦴ. ꦪꦴꦤꦶ ꦕ ꦑꦺꦴ ꦠꦴꦤꦶ ꦱꦶꦏ꧀ꦑꦴꦥꦢꦴꦤꦶ ꦄꦴꦢꦶꦧ꧀ꦫꦲ꧀ꦩꦕꦫꦶꦪꦏꦴꦤꦶ ꦧ꧀ꦫꦲ꧀ꦩꦕꦫꦶꦪꦱꦴꦫꦸꦥ꧀ꦥꦴꦤꦶ ꦠꦠ꧀ꦡ ꦣꦸꦮꦱꦷꦭꦺꦴ ꦕ ꦲꦺꦴꦠꦶ ꦜꦶꦠꦱꦷꦭꦺꦴ ꦕ, ꦱꦩꦴꦢꦴꦪ ꦱꦶꦏ꧀ꦑꦠꦶ ꦱꦶꦏ꧀ꦑꦴꦥꦢꦺꦱꦸ. ꦱꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦺꦴ ꦲꦺꦴꦠꦶ. ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦁ ꦢꦺꦮꦺ ꦕ ꦩꦤꦸꦱ꧀ꦱꦺ ꦕ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ. ꦱꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦏꦺꦴꦭꦁꦏꦺꦴꦭꦺꦴ ꦲꦺꦴꦠꦶ, ꦢ꧀ꦮꦺ ꦮꦴ ꦠꦷꦟꦶ ꦮꦴ ꦏꦸꦭꦴꦤꦶ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ. ꦱꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦌꦏꦧꦷꦗꦷ ꦲꦺꦴꦠꦶ, ꦌꦏꦁꦪꦺꦮ ꦩꦴꦤꦸꦱꦏꦁ ꦨꦮꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ. ꦱꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦫꦴꦒꦢꦺꦴꦱꦩꦺꦴꦲꦴꦤꦁ ꦠꦤꦸꦠ꧀ꦠꦴ ꦱꦏꦢꦴꦒꦴꦩꦷ ꦲꦺꦴꦠꦶ, ꦱꦏꦶꦢꦺꦮ ꦆꦩꦁ ꦭꦺꦴꦏꦁ ꦄꦴꦒꦤ꧀ꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦺꦴꦠꦶ.

‘‘ꦆꦣ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ ꦱꦩꦴꦣꦶꦱ꧀ꦩꦶꦁ ꦥꦫꦶꦥꦹꦫꦏꦴꦫꦷ ꦥꦚ꧀ꦚꦴꦪ ꦩꦠ꧀ꦠꦱꦺꦴ ꦏꦴꦫꦷ. ꦱꦺꦴ ꦪꦴꦤꦶ ꦠꦴꦤꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦶ ꦠꦴꦤꦶ ꦄꦴꦥꦗ꧀ꦗꦠꦶꦥꦶ ꦮꦸꦛ꧀ꦜꦴꦠꦶꦥꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦤ ꦲꦶ ꦩꦺꦠ꧀ꦡ, ꦨꦶꦏ꧀ꦑꦮꦺ, ꦄꦨꦧ꧀ꦧꦠꦴ ꦮꦸꦠ꧀ꦠꦴ. ꦪꦴꦤꦶ ꦕ ꦑꦺꦴ ꦠꦴꦤꦶ ꦱꦶꦏ꧀ꦑꦴꦥꦢꦴꦤꦶ ꦄꦴꦢꦶꦧ꧀ꦫꦲ꧀ꦩꦕꦫꦶꦪꦏꦴꦤꦶ ꦧ꧀ꦫꦲ꧀ꦩꦕꦫꦶꦪꦱꦴꦫꦸꦥ꧀ꦥꦴꦤꦶ ꦠꦠ꧀ꦡ ꦣꦸꦮꦱꦷꦭꦺꦴ ꦕ ꦲꦺꦴꦠꦶ ꦜꦶꦠꦱꦷꦭꦺꦴ ꦕ, ꦱꦩꦴꦢꦴꦪ ꦱꦶꦏ꧀ꦑꦠꦶ ꦱꦶꦏ꧀ꦑꦴꦥꦢꦺꦱꦸ. ꦱꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦈꦢ꧀ꦣꦁꦱꦺꦴꦠꦺꦴ ꦄꦏꦤꦶꦛ꧀ꦜꦒꦴꦩꦷ. ꦱꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦱꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ. ꦱꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦄꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ. ꦱꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ. ꦱꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦄꦤ꧀ꦠꦫꦴꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ.

‘‘ꦆꦣ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦷ ꦲꦺꦴꦠꦶ ꦱꦩꦴꦣꦶꦱ꧀ꦩꦶꦁ ꦥꦫꦶꦥꦹꦫꦏꦴꦫꦷ ꦥꦚ꧀ꦚꦴꦪ ꦥꦫꦶꦥꦹꦫꦏꦴꦫꦷ. ꦱꦺꦴ ꦪꦴꦤꦶ ꦠꦴꦤꦶ ꦣꦸꦮꦱꦷꦭꦺꦴ ꦕ ꦲꦺꦴꦠꦶ ꦜꦶꦠꦱꦷꦭꦺꦴ ꦕ, ꦱꦩꦴꦢꦴꦪ ꦱꦶꦏ꧀ꦑꦠꦶ ꦱꦶꦏ꧀ꦑꦴꦥꦢꦺꦱꦸ. ꦱꦺꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ.

‘‘ꦆꦠꦶ ꦑꦺꦴ, ꦨꦶꦏ꧀ꦑꦮꦺ, ꦥꦢꦺꦱꦁ ꦥꦢꦺꦱꦏꦴꦫꦷ ꦄꦴꦫꦴꦣꦺꦠꦶ, ꦥꦫꦶꦥꦹꦫꦁ ꦥꦫꦶꦥꦹꦫꦏꦴꦫꦷ, ꦄꦮꦚ꧀ꦙꦴꦤꦶ ꦠ꧀ꦮꦺꦮꦴꦲꦁ, ꦨꦶꦏ꧀ꦑꦮꦺ, ꦱꦶꦏ꧀ꦑꦴꦥꦢꦴꦤꦶ ꦮꦢꦴꦩꦷ’’ꦠꦶ. ꦱꦠ꧀ꦠꦩꦁ.