꧘. ꦱꦷꦭꦧ꧀ꦧꦠꦱꦸꦠ꧀ꦠꦁ

꧗꧙. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦨꦒꦮꦴ ꦌꦠꦢꦮꦺꦴꦕ – ‘‘ꦱꦧ꧀ꦧꦁ ꦤꦸ ꦑꦺꦴ, ꦄꦴꦤꦤ꧀ꦢ, ꦱꦷꦭꦧ꧀ꦧꦠꦁ ꦗꦷꦮꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦈꦥꦛ꧀ꦜꦴꦤꦱꦴꦫꦁ ꦱꦦꦭ’’ꦤ꧀ꦠꦶ? ‘‘ꦤ ꦑ꧀ꦮꦺꦠ꧀ꦡ, ꦨꦤ꧀ꦠꦺ, ꦌꦏꦁꦱꦺꦤꦴ’’ꦠꦶ. ‘‘ꦠꦺꦤ ꦲꦴꦤꦤ꧀ꦢ, ꦮꦶꦨꦗꦱ꧀ꦱꦹ’’ꦠꦶ.

‘‘ꦪꦚ꧀ꦲꦶꦱ꧀ꦱ [ꦪꦡꦴꦫꦹꦥꦁ ꦲꦶꦱ꧀ꦱ (?) ꦱꦺꦮꦶꦠꦧ꧀ꦧꦴꦱꦺꦮꦶꦠꦧ꧀ꦧꦱꦸꦠ꧀ꦠꦴꦤꦸꦫꦹꦥꦁ], ꦨꦤ꧀ꦠꦺ, ꦱꦷꦭꦧ꧀ꦧꦠꦁ ꦗꦷꦮꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦈꦥꦛ꧀ꦜꦴꦤꦱꦴꦫꦁ ꦱꦺꦮꦠꦺꦴ ꦄꦏꦸꦱꦭꦴ ꦣꦩ꧀ꦩꦴ ꦄꦨꦶꦮꦝ꧀ꦞꦤ꧀ꦠꦶ ꦏꦸꦱꦭꦴ ꦣꦩ꧀ꦩꦴ ꦥꦫꦶꦲꦴꦪꦤ꧀ꦠꦶ, ꦌꦮꦫꦹꦥꦁ ꦱꦷꦭꦧ꧀ꦧꦠꦁ ꦗꦷꦮꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦈꦥꦛ꧀ꦜꦴꦤꦱꦴꦫꦁ ꦄꦦꦭꦁ. ꦪꦚ꧀ꦕ ꦑ꧀ꦮꦴꦱ꧀ꦱ [ꦪꦚ꧀ꦲꦶꦱ꧀ꦱ (ꦏ.), ꦪꦡꦴꦫꦹꦥꦚ꧀ꦕ ꦑ꧀ꦮꦴꦱ꧀ꦱ (?)], ꦨꦤ꧀ꦠꦺ, ꦱꦷꦭꦧ꧀ꦧꦠꦁ ꦗꦷꦮꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦈꦥꦛ꧀ꦜꦴꦤꦱꦴꦫꦁ ꦱꦺꦮꦠꦺꦴ ꦄꦏꦸꦱꦭꦴ ꦣꦩ꧀ꦩꦴ ꦥꦫꦶꦲꦴꦪꦤ꧀ꦠꦶ, ꦏꦸꦱꦭꦴ ꦣꦩ꧀ꦩꦴ ꦄꦨꦶꦮꦝ꧀ꦞꦤ꧀ꦠꦶ, ꦌꦮꦫꦹꦥꦁ ꦱꦷꦭꦧ꧀ꦧꦠꦁ ꦗꦷꦮꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦈꦥꦛ꧀ꦜꦴꦤꦱꦴꦫꦁ ꦱꦦꦭ’’ꦤ꧀ꦠꦶ. ꦆꦢꦩꦮꦺꦴꦕ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ; ꦱꦩꦤꦸꦚ꧀ꦚꦺꦴ ꦱꦠ꧀ꦡꦴ ꦄꦲꦺꦴꦱꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ‘‘ꦱꦩꦤꦸꦚ꧀ꦚꦺꦴ ꦩꦺ ꦱꦠ꧀ꦡꦴ’’ꦠꦶ, ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦴꦩꦶ. ꦄꦡ ꦑꦺꦴ ꦨꦒꦮꦴ ꦄꦕꦶꦫꦥꦏ꧀ꦏꦤ꧀ꦠꦺ ꦄꦴꦪꦱ꧀ꦩꦤ꧀ꦠꦺ ꦄꦴꦤꦤ꧀ꦢꦺ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦱꦺꦑꦺꦴ, ꦨꦶꦏ꧀ꦑꦮꦺ, ꦄꦴꦤꦤ꧀ꦢꦺꦴ; ꦤ ꦕ ꦥꦤꦱ꧀ꦱ ꦱꦸꦭꦨꦫꦹꦥꦺꦴ ꦱꦩꦱꦩꦺꦴ ꦥꦚ꧀ꦚꦴꦪꦴ’’ꦠꦶ. ꦄꦛ꧀ꦜꦩꦁ.