꧑.ꦱꦧ꧀ꦫꦲ꧀ꦩꦏꦱꦸꦠ꧀ꦠꦁ

꧓꧑. ‘‘ꦱꦧ꧀ꦫꦲ꧀ꦩꦏꦴꦤꦶ, ꦨꦶꦏ꧀ꦑꦮꦺ, ꦠꦴꦤꦶ ꦏꦸꦭꦴꦤꦶ ꦪꦺꦱꦁ ꦥꦸꦠ꧀ꦠꦴꦤꦁ ꦩꦴꦠꦴꦥꦶꦠꦫꦺꦴ ꦄꦗ꧀ꦙꦴꦒꦴꦫꦺ ꦥꦹꦗꦶꦠꦴ ꦲꦺꦴꦤ꧀ꦠꦶ. ꦱꦥꦸꦧ꧀ꦧꦴꦕꦫꦶꦪꦏꦴꦤꦶ, ꦨꦶꦏ꧀ꦑꦮꦺ, ꦠꦴꦤꦶ ꦏꦸꦭꦴꦤꦶ ꦪꦺꦱꦁ ꦥꦸꦠ꧀ꦠꦴꦤꦁ ꦩꦴꦠꦴꦥꦶꦠꦫꦺꦴ ꦄꦗ꧀ꦙꦴꦒꦴꦫꦺ ꦥꦹꦗꦶꦠꦴ ꦲꦺꦴꦤ꧀ꦠꦶ. ꦱꦴꦲꦸꦤꦺꦪ꧀ꦪꦴꦤꦶ, ꦨꦶꦏ꧀ꦑꦮꦺ, ꦠꦴꦤꦶ ꦏꦸꦭꦴꦤꦶ ꦪꦺꦱꦁ ꦥꦸꦠ꧀ꦠꦴꦤꦁ ꦩꦴꦠꦴꦥꦶꦠꦫꦺꦴ ꦄꦗ꧀ꦙꦴꦒꦴꦫꦺ ꦥꦹꦗꦶꦠꦴ ꦲꦺꦴꦤ꧀ꦠꦶ. ‘ꦧ꧀ꦫꦲ꧀ꦩꦴ’ꦠꦶ, ꦨꦶꦏ꧀ꦑꦮꦺ, ꦩꦴꦠꦴꦥꦶꦠꦹꦤꦁ ꦌꦠꦁ ꦄꦣꦶꦮꦕꦤꦁ. ‘ꦥꦸꦧ꧀ꦧꦴꦕꦫꦶꦪꦴ’ꦠꦶ, ꦨꦶꦏ꧀ꦑꦮꦺ, ꦩꦴꦠꦴꦥꦶꦠꦹꦤꦁ ꦌꦠꦁ ꦄꦣꦶꦮꦕꦤꦁ. ‘ꦄꦴꦲꦸꦤꦺꦪ꧀ꦪꦴ’ꦠꦶ, ꦨꦶꦏ꧀ꦑꦮꦺ, ꦩꦴꦠꦴꦥꦶꦠꦹꦤꦁ ꦌꦠꦁ ꦄꦣꦶꦮꦕꦤꦁ. ꦠꦁ ꦏꦶꦱ꧀ꦱ ꦲꦺꦠꦸ? ꦧꦲꦸꦏꦴꦫꦴ, ꦨꦶꦏ꧀ꦑꦮꦺ, ꦩꦴꦠꦴꦥꦶꦠꦫꦺꦴ ꦥꦸꦠ꧀ꦠꦴꦤꦁ, ꦄꦴꦥꦴꦢꦏꦴ ꦥꦺꦴꦱꦏꦴ, ꦆꦩꦱ꧀ꦱ ꦭꦺꦴꦏꦱ꧀ꦱ ꦢꦱ꧀ꦱꦺꦠꦴꦫꦺꦴꦠꦶ.

‘‘ꦧ꧀ꦫꦲ꧀ꦩꦴꦠꦶ ꦩꦴꦠꦴꦥꦶꦠꦫꦺꦴ, ꦥꦸꦧ꧀ꦧꦴꦕꦫꦶꦪꦴꦠꦶ ꦮꦸꦕ꧀ꦕꦫꦺ;

ꦄꦴꦲꦸꦤꦺꦪ꧀ꦪꦴ ꦕ ꦥꦸꦠ꧀ꦠꦴꦤꦁ, ꦥꦗꦴꦪ ꦄꦤꦸꦏꦩ꧀ꦥꦏꦴ.

‘‘ꦠꦱ꧀ꦩꦴ ꦲꦶ ꦤꦺ ꦤꦩꦱ꧀ꦱꦺꦪ꧀ꦪ, ꦱꦏ꧀ꦏꦫꦺꦪ꧀ꦪ ꦕ ꦥꦟ꧀ꦝꦶꦠꦺꦴ;

ꦄꦤ꧀ꦤꦺꦤ ꦄꦡ ꦥꦴꦤꦺꦤ, ꦮꦠ꧀ꦡꦺꦤ ꦱꦪꦤꦺꦤ ꦕ;

ꦈꦕ꧀ꦖꦴꦢꦤꦺꦤ ꦤ꧀ꦲꦴꦥꦤꦺꦤ [ꦤꦲꦴꦥꦤꦺꦤ (ꦱꦷ.)], ꦥꦴꦢꦴꦤꦁ ꦣꦺꦴꦮꦤꦺꦤ ꦕ.

‘‘ꦠꦴꦪ ꦤꦁ ꦥꦴꦫꦶꦕꦫꦶꦪꦴꦪ, ꦩꦴꦠꦴꦥꦶꦠꦹꦱꦸ ꦥꦟ꧀ꦝꦶꦠꦴ;

ꦆꦣꦺꦮ [ꦆꦣ ꦕꦺꦮ (ꦱꦷ.)] ꦤꦁ ꦥꦱꦁꦱꦤ꧀ꦠꦶ, ꦥꦺꦕ꧀ꦕ ꦱꦒ꧀ꦒꦺ ꦥꦩꦺꦴꦢꦠꦷ’’ꦠꦶ [ꦱꦒ꧀ꦒꦺ ꦕ ꦩꦺꦴꦢꦠꦷꦠꦶ (ꦱꦷ.) ꦆꦠꦶꦮꦸ. ꧑꧐꧖ ꦆꦠꦶꦮꦸꦠ꧀ꦠꦏꦺ]. ꦥꦜꦩꦁ;