꧖. ꦄꦛ꧀ꦜꦏꦤꦴꦒꦫꦱꦸꦠ꧀ꦠꦁ

꧑꧖. ꦌꦏꦁ ꦱꦩꦪꦁ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦧꦺꦭꦸꦮꦒꦴꦩꦏꦺ [ꦮꦺꦭ꦳ꦸꦮꦒꦴꦩꦏꦺ (ꦱ꧀ꦪꦴ. ꦏꦁ. ꦏ.)]. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦢꦱꦩꦺꦴ ꦒꦲꦥꦠꦶ ꦄꦛ꧀ꦜꦏꦤꦴꦒꦫꦺꦴ ꦥꦴꦛꦭꦶꦥꦸꦠ꧀ꦠꦁ ꦄꦤꦸꦥ꧀ꦥꦠ꧀ꦠꦺꦴ ꦲꦺꦴꦠꦶ ꦏꦺꦤꦕꦶꦢꦺꦮ ꦏꦫꦟꦷꦪꦺꦤ.

ꦄꦡ ꦑꦺꦴ ꦢꦱꦩꦺꦴ ꦒꦲꦥꦠꦶ ꦄꦛ꧀ꦜꦏꦤꦴꦒꦫꦺꦴ ꦪꦺꦤ ꦏꦸꦏ꧀ꦏꦸꦛꦴꦫꦴꦩꦺꦴ ꦪꦺꦤ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦁ ꦨꦶꦏ꧀ꦑꦸꦁ ꦌꦠꦢꦮꦺꦴꦕ – ‘‘ꦏꦲꦁ ꦤꦸ ꦑꦺꦴ, ꦨꦤ꧀ꦠꦺ, ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦌꦠꦫꦲꦶ ꦮꦶꦲꦫꦠꦶ? ꦢꦱ꧀ꦱꦤꦏꦴꦩꦴ ꦲꦶ ꦩꦪꦁ, ꦨꦤ꧀ꦠꦺ, ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢ’’ꦤ꧀ꦠꦶ. ‘‘ꦌꦱꦺꦴ, ꦒꦲꦥꦠꦶ, ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦧꦺꦭꦸꦮꦒꦴꦩꦏꦺ’’ꦠꦶ.

ꦄꦡ ꦑꦺꦴ ꦢꦱꦩꦺꦴ ꦒꦲꦥꦠꦶ ꦄꦛ꧀ꦜꦏꦤꦴꦒꦫꦺꦴ ꦥꦴꦛꦭꦶꦥꦸꦠ꧀ꦠꦺ ꦠꦁ ꦏꦫꦟꦷꦪꦁ ꦠꦷꦫꦺꦠ꧀ꦮꦴ ꦪꦺꦤ ꦮꦺꦱꦴꦭꦷ ꦧꦺꦭꦸꦮꦒꦴꦩꦏꦺꦴ ꦪꦺꦤꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦢꦱꦩꦺꦴ ꦒꦲꦥꦠꦶ ꦄꦛ꧀ꦜꦏꦤꦴꦒꦫꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕ – ‘‘ꦄꦠ꧀ꦡꦶ ꦤꦸ ꦑꦺꦴ, ꦨꦤ꧀ꦠꦺ ꦄꦴꦤꦤ꧀ꦢ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦌꦏꦣꦩ꧀ꦩꦺꦴ ꦱꦩ꧀ꦩꦢꦏ꧀ꦑꦴꦠꦺꦴ, ꦪꦠ꧀ꦡ ꦨꦶꦏ꧀ꦑꦸꦤꦺꦴ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ ꦄꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ, ꦄꦥꦫꦶꦏ꧀ꦑꦷꦟꦴ ꦮꦴ ꦄꦴꦱꦮꦴ ꦥꦫꦶꦏ꧀ꦑꦪꦁ ꦒꦕ꧀ꦖꦤ꧀ꦠꦶ, ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦷ’’ꦠꦶ? ‘‘ꦄꦠ꧀ꦡꦶ ꦑꦺꦴ, ꦒꦲꦥꦠꦶ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦌꦏꦣꦩ꧀ꦩꦺꦴ ꦱꦩ꧀ꦩꦢꦏ꧀ꦑꦴꦠꦺꦴ, ꦪꦠ꧀ꦡ ꦨꦶꦏ꧀ꦑꦸꦤꦺꦴ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ ꦄꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ, ꦄꦥꦫꦶꦏ꧀ꦑꦷꦟꦴ ꦮꦴ ꦄꦴꦱꦮꦴ ꦥꦫꦶꦏ꧀ꦑꦪꦁ ꦒꦕ꧀ꦖꦤ꧀ꦠꦶ, ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦷ’’ꦠꦶ.

‘‘ꦏꦠꦩꦺꦴ ꦥꦤ, ꦨꦤ꧀ꦠꦺ ꦄꦴꦤꦤ꧀ꦢ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦌꦏꦣꦩ꧀ꦩꦺꦴ ꦱꦩ꧀ꦩꦢꦏ꧀ꦑꦴꦠꦺꦴ, ꦪꦠ꧀ꦡ ꦨꦶꦏ꧀ꦑꦸꦤꦺꦴ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ ꦄꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ, ꦄꦥꦫꦶꦏ꧀ꦑꦷꦟꦴ ꦮꦴ ꦄꦴꦱꦮꦴ ꦥꦫꦶꦏ꧀ꦑꦪꦁ ꦒꦕ꧀ꦖꦤ꧀ꦠꦶ, ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦷ’’ꦠꦶ? ‘‘ꦆꦣ, ꦒꦲꦥꦠꦶ, ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ ꦱꦮꦶꦠꦏ꧀ꦏꦁ ꦱꦮꦶꦕꦴꦫꦁ ꦮꦶꦮꦺꦏꦗꦁ ꦥꦷꦠꦶꦱꦸꦑꦁ ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦆꦢꦩ꧀ꦥꦶ ꦑꦺꦴ ꦥꦜꦩꦁ ꦙꦴꦤꦁ ꦄꦨꦶꦱꦔ꧀ꦑꦠꦁ ꦄꦨꦶꦱꦚ꧀ꦕꦺꦠꦪꦶꦠꦁ’. ‘ꦪꦁ ꦑꦺꦴ ꦥꦤ ꦏꦶꦚ꧀ꦕꦶ ꦄꦨꦶꦱꦔ꧀ꦑꦠꦁ ꦄꦨꦶꦱꦚ꧀ꦕꦺꦠꦪꦶꦠꦁ, ꦠꦢꦤꦶꦕ꧀ꦕꦁ ꦤꦶꦫꦺꦴꦣꦣꦩ꧀ꦩ’ꦤ꧀ꦠꦶ ꦥꦗꦴꦤꦴꦠꦶ. ꦱꦺꦴ ꦠꦠ꧀ꦡ ꦜꦶꦠꦺꦴ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ; ꦤꦺꦴ ꦕꦺ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ, ꦠꦺꦤꦺꦮ ꦣꦩ꧀ꦩꦫꦴꦒꦺꦤ ꦠꦴꦪ ꦣꦩ꧀ꦩꦤꦤ꧀ꦢꦶꦪꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦄꦪꦩ꧀ꦥꦶ ꦑꦺꦴ, ꦒꦲꦥꦠꦶ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦌꦏꦣꦩ꧀ꦩꦺꦴ ꦱꦩ꧀ꦩꦢꦏ꧀ꦑꦴꦠꦺꦴ, ꦪꦠ꧀ꦡ ꦨꦶꦏ꧀ꦑꦸꦤꦺꦴ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ ꦄꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ, ꦄꦥꦫꦶꦏ꧀ꦑꦷꦟꦴ ꦮꦴ ꦄꦴꦱꦮꦴ ꦥꦫꦶꦏ꧀ꦑꦪꦁ ꦒꦕ꧀ꦖꦤ꧀ꦠꦶ, ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦶ, ꦨꦶꦏ꧀ꦑꦸ ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ…ꦥꦺ… ꦠꦠꦶꦪꦁ ꦙꦴꦤꦁ…ꦥꦺ… ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦆꦢꦩ꧀ꦥꦶ ꦑꦺꦴ ꦕꦠꦸꦠ꧀ꦡꦁ ꦙꦴꦤꦁ ꦄꦨꦶꦱꦔ꧀ꦑꦠꦁ ꦄꦨꦶꦱꦚ꧀ꦕꦺꦠꦪꦶꦠꦁ’. ‘ꦪꦁ ꦑꦺꦴ ꦥꦤ ꦏꦶꦚ꧀ꦕꦶ ꦄꦨꦶꦱꦔ꧀ꦑꦠꦁ ꦄꦨꦶꦱꦚ꧀ꦕꦺꦠꦪꦶꦠꦁ ꦠꦢꦤꦶꦕ꧀ꦕꦁ ꦤꦶꦫꦺꦴꦣꦣꦩ꧀ꦩ’ꦤ꧀ꦠꦶ ꦥꦗꦴꦤꦴꦠꦶ. ꦱꦺꦴ ꦠꦠ꧀ꦡ ꦜꦶꦠꦺꦴ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ; ꦤꦺꦴ ꦕꦺ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ, ꦠꦺꦤꦺꦮ ꦣꦩ꧀ꦩꦫꦴꦒꦺꦤ ꦠꦴꦪ ꦣꦩ꧀ꦩꦤꦤ꧀ꦢꦶꦪꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦄꦪꦩ꧀ꦥꦶ ꦑꦺꦴ, ꦒꦲꦥꦠꦶ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦌꦏꦣꦩ꧀ꦩꦺꦴ ꦱꦩ꧀ꦩꦢꦏ꧀ꦑꦴꦠꦺꦴ, ꦪꦠ꧀ꦡ ꦨꦶꦏ꧀ꦑꦸꦤꦺꦴ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ ꦄꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ ꦄꦥꦫꦶꦏ꧀ꦑꦷꦟꦴ ꦮꦴ ꦄꦴꦱꦮꦴ ꦥꦫꦶꦏ꧀ꦑꦪꦁ ꦒꦕ꧀ꦖꦤ꧀ꦠꦶ, ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦶ, ꦨꦶꦏ꧀ꦑꦸ ꦩꦺꦠ꧀ꦠꦴꦱꦲꦒꦠꦺꦤ ꦕꦺꦠꦱꦴ ꦌꦏꦁ ꦢꦶꦱꦁ ꦦꦫꦶꦠ꧀ꦮꦴ ꦮꦶꦲꦫꦠꦶ ꦠꦡꦴ ꦢꦸꦠꦶꦪꦁ ꦠꦡꦴ ꦠꦠꦶꦪꦁ ꦠꦡꦴ ꦕꦠꦸꦠ꧀ꦡꦁ. ꦆꦠꦶ ꦈꦢ꧀ꦣꦩꦣꦺꦴ ꦠꦶꦫꦶꦪꦁ ꦱꦧ꧀ꦧꦣꦶ ꦱꦧ꧀ꦧꦠ꧀ꦠꦠꦴꦪ ꦱꦧ꧀ꦧꦴꦮꦤ꧀ꦠꦁ ꦭꦺꦴꦏꦁ ꦩꦺꦠ꧀ꦠꦴꦱꦲꦒꦠꦺꦤ ꦕꦺꦠꦱꦴ ꦌꦏꦁ ꦢꦶꦱꦁ ꦦꦫꦶꦠ꧀ꦮꦴ ꦮꦶꦲꦫꦠꦶ ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦄꦥ꧀ꦥꦩꦴꦟꦺꦤ ꦄꦮꦺꦫꦺꦤ ꦄꦧ꧀ꦪꦴꦥꦗ꧀ꦗꦺꦤ ꦦꦫꦶꦠ꧀ꦮꦴ ꦮꦶꦲꦫꦠꦶ. ꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦩ꧀ꦥꦶ ꦑꦺꦴ ꦩꦺꦠ꧀ꦠꦴ ꦕꦺꦠꦺꦴꦮꦶꦩꦸꦠ꧀ꦠꦶ ꦄꦨꦶꦱꦔ꧀ꦑꦠꦴ ꦄꦨꦶꦱꦚ꧀ꦕꦺꦠꦪꦶꦠꦴ’. ‘ꦪꦁ ꦑꦺꦴ ꦥꦤ ꦏꦶꦚ꧀ꦕꦶ ꦄꦨꦶꦱꦔ꧀ꦑꦠꦁ ꦄꦨꦶꦱꦚ꧀ꦕꦺꦠꦪꦶꦠꦁ ꦠꦢꦤꦶꦕ꧀ꦕꦁ ꦤꦶꦫꦺꦴꦣꦣꦩ꧀ꦩ’ꦤ꧀ꦠꦶ ꦥꦗꦴꦤꦴꦠꦶ. ꦱꦺꦴ ꦠꦠ꧀ꦡ ꦜꦶꦠꦺꦴ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ; ꦤꦺꦴ ꦕꦺ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ, ꦠꦺꦤꦺꦮ ꦣꦩ꧀ꦩꦫꦴꦒꦺꦤ ꦠꦴꦪ ꦣꦩ꧀ꦩꦤꦤ꧀ꦢꦶꦪꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦄꦪꦩ꧀ꦥꦶ ꦑꦺꦴ, ꦒꦲꦥꦠꦶ, ꦠꦺꦤ ꦨꦒꦮꦠꦴ ꦗꦴꦤꦠꦴ…ꦥꦺ. … ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦶ, ꦨꦶꦏ꧀ꦑꦸ ꦏꦫꦸꦟꦴꦱꦲꦒꦠꦺꦤ ꦕꦺꦠꦱꦴ…ꦥꦺ… ꦩꦸꦢꦶꦠꦴꦱꦲꦒꦠꦺꦤ ꦕꦺꦠꦱꦴ…ꦥꦺ… ꦈꦥꦺꦏ꧀ꦑꦴꦱꦲꦒꦠꦺꦤ ꦕꦺꦠꦱꦴ ꦌꦏꦁ ꦢꦶꦱꦁ ꦦꦫꦶꦠ꧀ꦮꦴ ꦮꦶꦲꦫꦠꦶ ꦠꦡꦴ ꦢꦸꦠꦶꦪꦁ ꦠꦡꦴ ꦠꦠꦶꦪꦁ ꦠꦡꦴ ꦕꦠꦸꦠ꧀ꦡꦁ. ꦆꦠꦶ ꦈꦢ꧀ꦣꦩꦣꦺꦴ ꦠꦶꦫꦶꦪꦁ ꦱꦧ꧀ꦧꦣꦶ ꦱꦧ꧀ꦧꦠ꧀ꦠꦠꦴꦪ ꦱꦧ꧀ꦧꦴꦮꦤ꧀ꦠꦁ ꦭꦺꦴꦏꦁ ꦈꦥꦺꦏ꧀ꦑꦴꦱꦲꦒꦠꦺꦤ ꦕꦺꦠꦱꦴ ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦄꦥ꧀ꦥꦩꦴꦟꦺꦤ ꦄꦮꦺꦫꦺꦤ ꦄꦧ꧀ꦪꦴꦥꦗ꧀ꦗꦺꦤ ꦦꦫꦶꦠ꧀ꦮꦴ ꦮꦶꦲꦫꦠꦶ. ꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦩ꧀ꦥꦶ ꦑꦺꦴ ꦈꦥꦺꦏ꧀ꦑꦴꦕꦺꦠꦺꦴꦮꦶꦩꦸꦠ꧀ꦠꦶ ꦄꦨꦶꦱꦔ꧀ꦑꦠꦴ ꦄꦨꦶꦱꦚ꧀ꦕꦺꦠꦪꦶꦠꦴ’. ‘ꦪꦁ ꦑꦺꦴ ꦥꦤ ꦏꦶꦚ꧀ꦕꦶ ꦄꦨꦶꦱꦔ꧀ꦑꦠꦁ ꦄꦨꦶꦱꦚ꧀ꦕꦺꦠꦪꦶꦠꦁ ꦠꦢꦤꦶꦕ꧀ꦕꦁ ꦤꦶꦫꦺꦴꦣꦣꦩ꧀ꦩ’ꦤ꧀ꦠꦶ ꦥꦗꦴꦤꦴꦠꦶ. ꦱꦺꦴ ꦠꦠ꧀ꦡ ꦜꦶꦠꦺꦴ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ; ꦤꦺꦴ ꦕꦺ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ, ꦠꦺꦤꦺꦮ ꦣꦩ꧀ꦩꦫꦴꦒꦺꦤ ꦠꦴꦪ ꦣꦩ꧀ꦩꦤꦤ꧀ꦢꦶꦪꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦄꦪꦩ꧀ꦥꦶ ꦑꦺꦴ, ꦒꦲꦥꦠꦶ, ꦠꦺꦤ ꦨꦒꦮꦠꦴ ꦗꦴꦤꦠꦴ…ꦥꦺ… ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦶ, ꦨꦶꦏ꧀ꦑꦸ ꦱꦧ꧀ꦧꦱꦺꦴ ꦫꦹꦥꦱꦚ꧀ꦚꦴꦤꦁ ꦱꦩꦠꦶꦏ꧀ꦏꦩꦴ ꦥꦛꦶꦓꦱꦚ꧀ꦚꦴꦤꦁ ꦄꦠ꧀ꦡꦔ꧀ꦒꦩꦴ ꦤꦴꦤꦠ꧀ꦠꦱꦚ꧀ꦚꦴꦤꦁ ꦄꦩꦤꦱꦶꦏꦴꦫꦴ ‘ꦄꦤꦤ꧀ꦠꦺꦴ ꦄꦴꦏꦴꦱꦺꦴ’ꦠꦶ ꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦩ꧀ꦥꦶ ꦑꦺꦴ ꦄꦴꦏꦴꦱꦴꦤꦚ꧀ꦕꦴꦪꦠꦤꦱꦩꦴꦥꦠ꧀ꦠꦶ ꦄꦨꦶꦱꦔ꧀ꦑꦠꦴ ꦄꦨꦶꦱꦚ꧀ꦕꦺꦠꦪꦶꦠꦴ’. ‘ꦪꦁ ꦑꦺꦴ ꦥꦤ ꦏꦶꦚ꧀ꦕꦶ ꦄꦨꦶꦱꦔ꧀ꦑꦠꦁ ꦄꦨꦶꦱꦚ꧀ꦕꦺꦠꦪꦶꦠꦁ ꦠꦢꦤꦶꦕ꧀ꦕꦁ ꦤꦶꦫꦺꦴꦣꦣꦩ꧀ꦩ’ꦤ꧀ꦠꦶ ꦥꦗꦴꦤꦴꦠꦶ. ꦱꦺꦴ ꦠꦠ꧀ꦡ ꦜꦶꦠꦺꦴ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ; ꦤꦺꦴ ꦕꦺ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ, ꦠꦺꦤꦺꦮ ꦣꦩ꧀ꦩꦫꦴꦒꦺꦤ ꦠꦴꦪ ꦣꦩ꧀ꦩꦤꦤ꧀ꦢꦶꦪꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦄꦪꦩ꧀ꦥꦶ ꦑꦺꦴ, ꦒꦲꦥꦠꦶ, ꦠꦺꦤ ꦨꦒꦮꦠꦴ ꦗꦴꦤꦠꦴ…ꦥꦺ… ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦶ, ꦨꦶꦏ꧀ꦑꦸ ꦱꦧ꧀ꦧꦱꦺꦴ ꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ‘ꦄꦤꦤ꧀ꦠꦁ ꦮꦶꦚ꧀ꦚꦴꦟ’ꦤ꧀ꦠꦶ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ…ꦥꦺ… ꦱꦧ꧀ꦧꦱꦺꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ‘ꦤꦠ꧀ꦡꦶ ꦏꦶꦚ꧀ꦕꦷ’ꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦩ꧀ꦥꦶ ꦑꦺꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱꦩꦴꦥꦠ꧀ꦠꦶ ꦄꦨꦶꦱꦔ꧀ꦑꦠꦴ ꦄꦨꦶꦱꦚ꧀ꦕꦺꦠꦪꦶꦠꦴ’. ‘ꦪꦁ ꦑꦺꦴ ꦥꦤ ꦏꦶꦚ꧀ꦕꦶ ꦄꦨꦶꦱꦔ꧀ꦑꦠꦁ ꦄꦨꦶꦱꦚ꧀ꦕꦺꦠꦪꦶꦠꦁ ꦠꦢꦤꦶꦕ꧀ꦕꦁ ꦤꦶꦫꦺꦴꦣꦣꦩ꧀ꦩ’ꦤ꧀ꦠꦶ ꦥꦗꦴꦤꦴꦠꦶ. ꦱꦺꦴ ꦠꦠ꧀ꦡ ꦜꦶꦠꦺꦴ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ; ꦤꦺꦴ ꦕꦺ ꦄꦴꦱꦮꦴꦤꦁ ꦑꦪꦁ ꦥꦴꦥꦸꦟꦴꦠꦶ, ꦠꦺꦤꦺꦮ ꦣꦩ꧀ꦩꦫꦴꦒꦺꦤ ꦠꦴꦪ ꦣꦩ꧀ꦩꦤꦤ꧀ꦢꦶꦪꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦲꦺꦴꦠꦶ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦄꦪꦩ꧀ꦥꦶ ꦑꦺꦴ, ꦒꦲꦥꦠꦶ, ꦠꦺꦤ ꦨꦒꦮꦠꦴ ꦗꦴꦤꦠꦴ…ꦥꦺ… ꦄꦤꦤꦸꦥ꧀ꦥꦠ꧀ꦠꦁ ꦮꦴ ꦄꦤꦸꦠ꧀ꦠꦫꦁ ꦪꦺꦴꦒꦏ꧀ꦑꦺꦩꦁ ꦄꦤꦸꦥꦴꦥꦸꦟꦴꦠꦷ’’ꦠꦶ.

ꦌꦮꦁ ꦮꦸꦠ꧀ꦠꦺ ꦢꦱꦩꦺꦴ ꦒꦲꦥꦠꦶ ꦄꦛ꧀ꦜꦏꦤꦴꦒꦫꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕ – ‘‘ꦱꦺꦪ꧀ꦪꦡꦴꦥꦶ, ꦨꦤ꧀ꦠꦺ ꦄꦴꦤꦤ꧀ꦢ, ꦥꦸꦫꦶꦱꦺꦴ ꦌꦏꦁ ꦤꦶꦣꦶꦩꦸꦑꦁ ꦒꦮꦺꦱꦤ꧀ꦠꦺꦴ ꦱꦏꦶꦢꦺꦮ [ꦱꦧ꧀ꦧꦠ꧀ꦡꦥꦶ ꦌꦮꦩꦺꦮ ꦢꦶꦱ꧀ꦱꦠꦶ] ꦌꦏꦴꦢꦱ ꦤꦶꦣꦶꦩꦸꦑꦴꦤꦶ ꦄꦣꦶꦒꦕ꧀ꦖꦺꦪ꧀ꦪ; ꦌꦮꦩꦺꦮꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦌꦏꦁ ꦄꦩꦠꦢ꧀ꦮꦴꦫꦁ ꦒꦮꦺꦱꦤ꧀ꦠꦺꦴ ꦱꦏꦶꦢꦺꦮ ꦌꦏꦴꦢꦱ ꦄꦩꦠꦢ꧀ꦮꦴꦫꦴꦤꦶ [ꦌꦏꦴꦢꦱꦤ꧀ꦤꦁ ꦄꦩꦠꦢ꧀ꦮꦴꦫꦴꦤꦁ (ꦱꦧ꧀ꦧꦠ꧀ꦡ) ꦩ. ꦤꦶ. ꧒.꧒꧑ ꦥꦱ꧀ꦱꦶꦠꦧ꧀ꦧꦁ] ꦄꦭꦠ꧀ꦡꦁ ꦱꦺꦮꦤꦴꦪ [ꦱꦮꦤꦴꦪ (ꦱ꧀ꦪꦴ.) ꦱꦷ. ꦥꦷ. ꦩꦗ꧀ꦙꦶꦩꦥꦟ꧀ꦟꦴꦱꦏꦢꦸꦠꦶꦪꦱꦸꦠ꧀ꦠꦺꦥꦶ, ꦨꦴꦮꦤꦴꦪ (ꦩ. ꦤꦶ. ꧒.꧒꧑)]. ꦱꦺꦪ꧀ꦪꦡꦴꦥꦶ, ꦨꦤ꧀ꦠꦺ, ꦥꦸꦫꦶꦱꦱ꧀ꦱ ꦄꦒꦴꦫꦁ ꦌꦏꦴꦢꦱ ꦢ꧀ꦮꦴꦫꦁ. ꦱꦺꦴ ꦠꦱ꧀ꦩꦶꦁ ꦄꦒꦴꦫꦺ ꦄꦴꦢꦶꦠ꧀ꦠꦺ ꦌꦏꦩꦺꦏꦺꦤꦥꦶ ꦢ꧀ꦮꦴꦫꦺꦤ ꦱꦏ꧀ꦏꦸꦟꦺꦪ꧀ꦪ ꦄꦠ꧀ꦠꦴꦤꦁ ꦱꦺꦴꦠ꧀ꦡꦶꦁ ꦏꦴꦠꦸꦁ; ꦌꦮꦩꦺꦮꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦆꦩꦺꦱꦁ ꦌꦏꦴꦢꦱꦤ꧀ꦤꦁ ꦄꦩꦠꦢ꧀ꦮꦴꦫꦴꦤꦁ ꦌꦏꦩꦺꦏꦺꦤꦥꦶ ꦄꦩꦠꦢ꧀ꦮꦴꦫꦺꦤ ꦱꦏ꧀ꦏꦸꦟꦶꦱ꧀ꦱꦴꦩꦶ ꦄꦠ꧀ꦠꦴꦤꦁ ꦱꦺꦴꦠ꧀ꦡꦶꦁ ꦏꦴꦠꦸꦁ. ꦆꦩꦺ ꦲꦶ ꦤꦴꦩ, ꦨꦤ꧀ꦠꦺ, ꦄꦚ꧀ꦚꦠꦶꦠ꧀ꦡꦶꦪꦴ ꦄꦴꦕꦫꦶꦪꦱ꧀ꦱ ꦄꦴꦕꦫꦶꦪꦣꦤꦁ ꦥꦫꦶꦪꦺꦱꦶꦱ꧀ꦱꦤ꧀ꦠꦶ. ꦏꦶꦁ [ꦏꦶꦩꦔ꧀ꦒꦁ (ꦩ. ꦤꦶ. ꧒.꧒꧑)] ꦥꦤꦴꦲꦁ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦥꦹꦗꦁ ꦤ ꦏꦫꦶꦱ꧀ꦱꦴꦩꦷ’’ꦠꦶ!

ꦄꦡ ꦑꦺꦴ ꦢꦱꦩꦺꦴ ꦒꦲꦥꦠꦶ ꦄꦛ꧀ꦜꦏꦤꦴꦒꦫꦺꦴ ꦮꦺꦱꦴꦭꦶꦏꦚ꧀ꦕ ꦥꦴꦛꦭꦶꦥꦸꦠ꧀ꦠꦏꦚ꧀ꦕ ꦨꦶꦏ꧀ꦑꦸꦱꦔ꧀ꦓꦁ ꦱꦤ꧀ꦤꦶꦥꦴꦠꦴꦥꦺꦠ꧀ꦮꦴ ꦥꦟꦷꦠꦺꦤ ꦑꦴꦢꦤꦷꦪꦺꦤ ꦨꦺꦴꦗꦤꦷꦪꦺꦤ ꦱꦲꦠ꧀ꦡꦴ ꦱꦤ꧀ꦠꦥ꧀ꦥꦺꦱꦶ ꦱꦩ꧀ꦥꦮꦴꦫꦺꦱꦶ. ꦌꦏꦩꦺꦏꦚ꧀ꦕ ꦨꦶꦏ꧀ꦑꦸꦁ ꦥꦕ꧀ꦕꦺꦏꦁ ꦢꦸꦱ꧀ꦱꦪꦸꦒꦺꦤ ꦄꦕ꧀ꦖꦴꦢꦺꦱꦶ, ꦄꦴꦪꦱ꧀ꦩꦤ꧀ꦠꦚ꧀ꦕ ꦄꦴꦤꦤ꧀ꦢꦁ ꦠꦶꦕꦷꦮꦫꦺꦤ. ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦥꦚ꧀ꦕꦱꦠꦁ ꦮꦶꦲꦴꦫꦁ ꦏꦴꦫꦴꦥꦺꦱꦷꦠꦶ. ꦖꦛ꧀ꦜꦁ.