꧕. ꦈꦠ꧀ꦠꦶꦪꦱꦸꦠ꧀ꦠꦁ

꧙꧕. ꦄꦡ ꦑꦺꦴ ꦈꦠ꧀ꦠꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦈꦠ꧀ꦠꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’ꦤ꧀ꦠꦶ? ‘‘ꦄꦧ꧀ꦪꦴꦏꦠꦁ ꦑꦺꦴ ꦌꦠꦁ, ꦈꦠ꧀ꦠꦶꦪ, ꦩꦪꦴ – ‘ꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ꦄꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’ꦤ꧀ꦠꦶ? ‘‘ꦌꦠꦩ꧀ꦥꦶ ꦑꦺꦴ, ꦈꦠ꧀ꦠꦶꦪ, ꦄꦧ꧀ꦪꦴꦏꦠꦁ ꦩꦪꦴ – ‘ꦄꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦄꦤ꧀ꦠꦮꦴ ꦭꦺꦴꦏꦺꦴ…ꦥꦺ… ꦄꦤꦤ꧀ꦠꦮꦴ ꦭꦺꦴꦏꦺꦴ… ꦠꦁ ꦗꦷꦮꦁ ꦠꦁ ꦱꦫꦷꦫꦁ… ꦄꦚ꧀ꦚꦁ ꦗꦷꦮꦁ ꦄꦚ꧀ꦚꦁ ꦱꦫꦷꦫꦁ… ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ … ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ… ꦲꦺꦴꦠꦶ ꦕ ꦤ ꦕ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ… ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’ꦤ꧀ꦠꦶ? ‘‘ꦌꦠꦩ꧀ꦥꦶ ꦑꦺꦴ, ꦈꦠ꧀ꦠꦶꦪ, ꦄꦧ꧀ꦪꦴꦏꦠꦁ ꦩꦪꦴ – ‘ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ, ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦄꦧ꧀ꦪꦴꦏꦠꦁ ꦑꦺꦴ ꦌꦠꦁ, ꦈꦠ꧀ꦠꦶꦪ, ꦩꦪꦴ – ꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ.

‘‘‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ꦄꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ, ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ – ‘ꦌꦠꦩ꧀ꦥꦶ ꦑꦺꦴ, ꦈꦠ꧀ꦠꦶꦪ, ꦄꦧ꧀ꦪꦴꦏꦠꦁ ꦩꦪꦴ ꦄꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ.

‘‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦄꦤ꧀ꦠꦮꦴ ꦭꦺꦴꦏꦺꦴ…ꦥꦺ… ꦄꦤꦤ꧀ꦠꦮꦴ ꦭꦺꦴꦏꦺꦴ… ꦠꦁ ꦗꦷꦮꦁ ꦠꦁ ꦱꦫꦷꦫꦁ… ꦄꦚ꧀ꦚꦁ ꦗꦷꦮꦁ ꦄꦚ꧀ꦚꦁ ꦱꦫꦷꦫꦁ… ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ… ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ… ꦲꦺꦴꦠꦶ ꦕ ꦤ ꦕ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ… ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ, ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ – ‘ꦌꦠꦩ꧀ꦥꦶ ꦑꦺꦴ, ꦈꦠ꧀ꦠꦶꦪ, ꦄꦧ꧀ꦪꦴꦏꦠꦁ ꦩꦪꦴ – ‘ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ. ꦄꦡ ꦏꦶꦚ꧀ꦕꦫꦲꦶ ꦨꦺꦴꦠꦴ ꦒꦺꦴꦠꦩꦺꦤ ꦧ꧀ꦪꦴꦏꦠ’’ꦤ꧀ꦠꦶ?

‘‘ꦄꦨꦶꦚ꧀ꦚꦴꦪ ꦑꦺꦴ ꦄꦲꦁ, ꦈꦠ꧀ꦠꦶꦪ, ꦱꦴꦮꦏꦴꦤꦁ ꦣꦩ꧀ꦩꦁ ꦢꦺꦱꦺꦩꦶ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪꦴ’’ꦠꦶ.

‘‘ꦪꦁ ꦥꦤꦺꦠꦁ ꦨꦮꦁ ꦒꦺꦴꦠꦩꦺꦴ ꦄꦨꦶꦚ꧀ꦚꦴꦪ ꦱꦴꦮꦏꦴꦤꦁ ꦣꦩ꧀ꦩꦁ ꦢꦺꦱꦺꦱꦶ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦱꦧ꧀ꦧꦺꦴ ꦮꦴ [ꦱꦧ꧀ꦧꦺꦴ ꦕ (ꦏ.)] ꦠꦺꦤ ꦭꦺꦴꦏꦺꦴ ꦤꦷꦪꦠꦶ [ꦤꦷꦪꦶꦱ꧀ꦱꦠꦶ (ꦱꦷ.), ꦤꦶꦪ꧀ꦪꦴꦱ꧀ꦱꦠꦶ (ꦱ꧀ꦪꦴ.), ꦤꦶꦪ꧀ꦪꦁꦱ꧀ꦱꦠꦶ (ꦥꦷ.)] ꦈꦥꦝ꧀ꦞꦺꦴ ꦮꦴ ꦠꦶꦨꦴꦒꦺꦴ ꦮꦴ’’ꦠꦶ [ꦠꦶꦨꦴꦒꦺꦴ ꦮꦴꦠꦶ ꦥꦢꦺꦲꦶ (ꦏ.)]? ꦌꦮꦁ ꦮꦸꦠ꧀ꦠꦺ ꦨꦒꦮꦴ ꦠꦸꦟ꧀ꦲꦷ ꦄꦲꦺꦴꦱꦶ.

ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦌꦠꦢꦲꦺꦴꦱꦶ – ‘‘ꦩꦴ ꦲꦺꦮꦁ ꦑꦺꦴ ꦈꦠ꧀ꦠꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦥꦴꦥꦏꦁ ꦢꦶꦛ꧀ꦜꦶꦒꦠꦁ ꦥꦛꦶꦭꦨꦶ – ‘ꦱꦧ꧀ꦧꦱꦴꦩꦸꦏ꧀ꦏꦁꦱꦶꦏꦁ ꦮꦠ ꦩꦺ ꦱꦩꦟꦺꦴ ꦒꦺꦴꦠꦩꦺꦴ ꦥꦚ꧀ꦲꦁ ꦥꦸꦛ꧀ꦜꦺꦴ ꦱꦁꦱꦴꦢꦺꦠꦶ, ꦤꦺꦴ ꦮꦶꦱ꧀ꦱꦗ꧀ꦗꦺꦠꦶ, ꦤ ꦤꦹꦤ ꦮꦶꦱꦲꦠꦷ’ꦠꦶ. ꦠꦢꦱ꧀ꦱ ꦈꦠ꧀ꦠꦶꦪꦱ꧀ꦱ ꦥꦫꦶꦧ꧀ꦧꦴꦗꦏꦱ꧀ꦱ ꦢꦷꦓꦫꦠ꧀ꦠꦁ ꦄꦲꦶꦠꦴꦪ ꦢꦸꦏ꧀ꦑꦴꦪꦴ’’ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦈꦠ꧀ꦠꦶꦪꦁ ꦥꦫꦶꦧ꧀ꦧꦴꦗꦏꦁ ꦌꦠꦢꦮꦺꦴꦕ – ‘‘ꦠꦺꦤꦲꦴꦮꦸꦱꦺꦴ ꦈꦠ꧀ꦠꦶꦪ, ꦈꦥꦩꦁ ꦠꦺ ꦏꦫꦶꦱ꧀ꦱꦴꦩꦶ. ꦈꦥꦩꦴꦪ ꦩꦶꦣꦺꦏꦕ꧀ꦕꦺ ꦮꦶꦚ꧀ꦚꦹ ꦥꦸꦫꦶꦱꦴ ꦨꦴꦱꦶꦠꦱ꧀ꦱ ꦄꦠ꧀ꦡꦁ ꦄꦴꦗꦴꦤꦤ꧀ꦠꦶ. ꦱꦺꦪ꧀ꦪꦡꦴꦥꦶ, ꦄꦴꦮꦸꦱꦺꦴ ꦈꦠ꧀ꦠꦶꦪ, ꦫꦚ꧀ꦚꦺꦴ ꦥꦕ꧀ꦕꦤ꧀ꦠꦶꦩꦁ ꦤꦒꦫꦁ ꦢꦭ꦳꧀ꦲꦸꦢ꧀ꦣꦴꦥꦁ [ꦢꦭ꦳꧀ꦲꦸꦢ꧀ꦢꦴꦥꦁ (ꦱꦷ. ꦥꦷ.)] ꦢꦭ꦳꧀ꦲꦥꦴꦏꦴꦫꦠꦺꦴꦫꦟꦁ ꦌꦏꦢ꧀ꦮꦴꦫꦁ. ꦠꦠ꧀ꦫꦱ꧀ꦱ ꦢꦺꦴꦮꦴꦫꦶꦏꦺꦴ ꦥꦟ꧀ꦝꦶꦠꦺꦴ ꦧ꧀ꦪꦠ꧀ꦠꦺꦴ ꦩꦺꦣꦴꦮꦷ ꦄꦚ꧀ꦚꦴꦠꦴꦤꦁ ꦤꦶꦮꦴꦫꦺꦠꦴ ꦚꦴꦠꦴꦤꦁ ꦥꦮꦺꦱꦺꦠꦴ. ꦱꦺꦴ ꦠꦱ꧀ꦱ ꦤꦒꦫꦱ꧀ꦱ ꦱꦩꦤ꧀ꦠꦴ ꦄꦤꦸꦥꦫꦶꦪꦴꦪꦥꦡꦁ ꦄꦤꦸꦏ꧀ꦏꦩꦠꦶ. ꦄꦤꦸꦥꦫꦶꦪꦴꦪꦥꦡꦁ ꦄꦤꦸꦏ꧀ꦏꦩꦩꦴꦤꦺꦴ ꦤ ꦥꦱ꧀ꦱꦺꦪ꧀ꦪ ꦥꦴꦏꦴꦫꦱꦤ꧀ꦣꦶꦁ ꦮꦴ ꦥꦴꦏꦴꦫꦮꦶꦮꦫꦁ ꦮꦴ, ꦄꦤ꧀ꦠꦩꦱꦺꦴ ꦧꦶꦭ꦳ꦴꦫꦤꦶꦏ꧀ꦑꦩꦤꦩꦠ꧀ꦠꦩ꧀ꦥꦶ. ꦤꦺꦴ ꦕ ꦑ꧀ꦮꦱ꧀ꦱ ꦌꦮꦁ ꦚꦴꦟꦁ ꦲꦺꦴꦠꦶ – ‘ꦌꦠ꧀ꦠꦏꦴ ꦥꦴꦟꦴ ꦆꦩꦁ ꦤꦒꦫꦁ ꦥꦮꦶꦱꦤ꧀ꦠꦶ ꦮꦴ ꦤꦶꦏ꧀ꦑꦩꦤ꧀ꦠꦶ ꦮꦴ’ꦠꦶ. ꦄꦡ ꦑ꧀ꦮꦱ꧀ꦱ ꦌꦮꦩꦺꦠ꧀ꦡ ꦲꦺꦴꦠꦶ – ‘ꦪꦺ ꦑꦺꦴ ꦏꦺꦕꦶ ꦎꦭ꦳ꦴꦫꦶꦏꦴ ꦥꦴꦟꦴ ꦆꦩꦁ ꦤꦒꦫꦁ ꦥꦮꦶꦱꦤ꧀ꦠꦶ ꦮꦴ ꦤꦶꦏ꧀ꦑꦩꦤ꧀ꦠꦶ ꦮꦴ, ꦱꦧ꧀ꦧꦺ ꦠꦺ ꦆꦩꦶꦤꦴ ꦢ꧀ꦮꦴꦫꦺꦤ ꦥꦮꦶꦱꦤ꧀ꦠꦶ ꦮꦴ ꦤꦶꦏ꧀ꦑꦩꦤ꧀ꦠꦶ ꦮꦴ’ꦠꦶ.

‘‘ꦌꦮꦩꦺꦮꦁ ꦑꦺꦴ, ꦄꦴꦮꦸꦱꦺꦴ ꦈꦠ꧀ꦠꦶꦪ, ꦤ ꦠꦡꦴꦒꦠꦱ꧀ꦱ ꦌꦮꦁ ꦈꦱ꧀ꦱꦸꦏ꧀ꦏꦁ ꦲꦺꦴꦠꦶ – ‘ꦱꦧ꧀ꦧꦺꦴ ꦮꦴ ꦠꦺꦤ ꦭꦺꦴꦏꦺꦴ ꦤꦷꦪꦠꦶ, ꦈꦥꦝ꧀ꦞꦺꦴ ꦮꦴ, ꦠꦶꦨꦴꦒꦺꦴ ꦮꦴ’ꦠꦶ. ꦄꦡ ꦑꦺꦴ ꦌꦮꦩꦺꦠ꧀ꦡ ꦠꦡꦴꦒꦠꦱ꧀ꦱ ꦲꦺꦴꦠꦶ – ‘ꦪꦺ ꦑꦺꦴ ꦏꦺꦕꦶ ꦭꦺꦴꦏꦩ꧀ꦲꦴ ꦤꦷꦪꦶꦁꦱꦸ ꦮꦴ ꦤꦷꦪꦤ꧀ꦠꦶ ꦮꦴ ꦤꦷꦪꦶꦱ꧀ꦱꦤ꧀ꦠꦶ ꦮꦴ, ꦱꦧ꧀ꦧꦺ ꦠꦺ ꦥꦚ꧀ꦕ ꦤꦷꦮꦫꦟꦺ ꦥꦲꦴꦪ ꦕꦺꦠꦱꦺꦴ ꦈꦥꦏ꧀ꦏꦶꦭꦺꦱꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ, ꦕꦠꦹꦱꦸ ꦱꦠꦶꦥꦛ꧀ꦜꦴꦤꦺꦱꦸ ꦱꦸꦥ꧀ꦥꦠꦶꦛ꧀ꦜꦶꦠꦕꦶꦠ꧀ꦠꦴ, ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦺ ꦪꦡꦴꦨꦹꦠꦁ ꦨꦴꦮꦺꦠ꧀ꦮꦴ. ꦌꦮꦩꦺꦠꦺ [ꦌꦮꦩꦺꦠꦺꦤ (ꦏ.)] ꦭꦺꦴꦏꦩ꧀ꦲꦴ ꦤꦷꦪꦶꦁꦱꦸ ꦮꦴ ꦤꦷꦪꦤ꧀ꦠꦶ ꦮꦴ ꦤꦷꦪꦶꦱ꧀ꦱꦤ꧀ꦠꦶ ꦮꦴ’ꦠꦶ. ꦪꦢꦺꦮ ꦑꦺꦴ ꦠ꧀ꦮꦁ [ꦪꦢꦺꦮ ꦑ꧀ꦮꦺꦠ꧀ꦡ (ꦏ.)], ꦄꦴꦮꦸꦱꦺꦴ ꦈꦠ꧀ꦠꦶꦪ, ꦨꦒꦮꦤ꧀ꦠꦁ ꦥꦚ꧀ꦲꦁ [ꦆꦩꦁ ꦥꦚ꧀ꦲꦁ (ꦱ꧀ꦪꦴ. ꦏ.)] ꦄꦥꦸꦕ꧀ꦖꦶ ꦠꦢꦺꦮꦺꦠꦁ ꦥꦚ꧀ꦲꦁ ꦨꦒꦮꦤ꧀ꦠꦁ ꦄꦚ꧀ꦚꦺꦤ ꦥꦫꦶꦪꦴꦪꦺꦤ ꦄꦥꦸꦕ꧀ꦖꦶ. ꦠꦱ꧀ꦩꦴ ꦠꦺ ꦠꦁ ꦨꦒꦮꦴ ꦤ ꦧ꧀ꦪꦴꦏꦴꦱꦷ’’ꦠꦶ. ꦥꦚ꧀ꦕꦩꦁ.