꧘. ꦩꦹꦭꦏꦱꦸꦠ꧀ꦠꦁ

꧕꧘. [ꦄ. ꦤꦶ. ꧘.꧘꧓] ‘‘ꦱꦕꦺ, ꦨꦶꦏ꧀ꦑꦮꦺ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦌꦮꦁ ꦥꦸꦕ꧀ꦖꦺꦪ꧀ꦪꦸꦁ – ‘ꦏꦶꦁꦩꦹꦭꦏꦴ, ꦄꦴꦮꦸꦱꦺꦴ, ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦱꦩ꧀ꦨꦮꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦱꦩꦸꦢꦪꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦱꦩꦺꦴꦱꦫꦟꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦥꦩꦸꦑꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦄꦣꦶꦥꦠꦺꦪ꧀ꦪꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦈꦠ꧀ꦠꦫꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦱꦴꦫꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦎꦒꦣꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦥꦫꦶꦪꦺꦴꦱꦴꦤꦴ ꦱꦧ꧀ꦧꦺ ꦣꦩ꧀ꦩꦴ’ꦠꦶ, ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦏꦶꦤ꧀ꦠꦶ ꦧ꧀ꦪꦴꦏꦫꦺꦪ꧀ꦪꦴꦡꦴ’’ꦠꦶ? ‘‘ꦨꦒꦮꦁꦩꦹꦭꦏꦴ ꦤꦺꦴ, ꦨꦤ꧀ꦠꦺ, ꦣꦩ꧀ꦩꦴ ꦨꦒꦮꦁꦤꦺꦠ꧀ꦠꦶꦏꦴ ꦨꦒꦮꦁꦥꦛꦶꦱꦫꦟꦴ. ꦱꦴꦣꦸ ꦮꦠ, ꦨꦤ꧀ꦠꦺ, ꦨꦒꦮꦤ꧀ꦠꦁꦪꦺꦮ ꦥꦛꦶꦨꦴꦠꦸ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦺꦴ. ꦨꦒꦮꦠꦺꦴ ꦱꦸꦠ꧀ꦮꦴ ꦨꦶꦏ꧀ꦑꦹ ꦣꦴꦫꦺꦱ꧀ꦱꦤ꧀ꦠꦷ’’ꦠꦶ.

‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶ ꦏꦫꦺꦴꦡ; ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦱꦕꦺ, ꦨꦶꦏ꧀ꦑꦮꦺ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦌꦮꦁ ꦥꦸꦕ꧀ꦖꦺꦪ꧀ꦪꦸꦁ – ‘ꦏꦶꦁꦩꦹꦭꦏꦴ, ꦄꦴꦮꦸꦱꦺꦴ, ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦱꦩ꧀ꦨꦮꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦱꦩꦸꦢꦪꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦱꦩꦺꦴꦱꦫꦟꦴ ꦱꦧ꧀ꦧꦺ ꦣꦩ꧀ꦩꦴ ꦏꦶꦁꦥꦩꦸꦑꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁ ꦄꦣꦶꦥꦠꦺꦪ꧀ꦪꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦈꦠ꧀ꦠꦫꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦱꦴꦫꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦎꦒꦣꦴ ꦱꦧ꧀ꦧꦺ ꦣꦩ꧀ꦩꦴ, ꦏꦶꦁꦥꦫꦶꦪꦺꦴꦱꦴꦤꦴ ꦱꦧ꧀ꦧꦺ ꦣꦩ꧀ꦩꦴ’ꦠꦶ, ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦌꦮꦁ ꦧ꧀ꦪꦴꦏꦫꦺꦪ꧀ꦪꦴꦡ – ‘ꦖꦤ꧀ꦢꦩꦹꦭꦏꦴ, ꦄꦴꦮꦸꦱꦺꦴ, ꦱꦧ꧀ꦧꦺ ꦣꦩ꧀ꦩꦴ, ꦩꦤꦱꦶꦏꦴꦫꦱꦩ꧀ꦨꦮꦴ ꦱꦧ꧀ꦧꦺ ꦣꦩ꧀ꦩꦴ, ꦦꦱ꧀ꦱꦱꦩꦸꦢꦪꦴ ꦱꦧ꧀ꦧꦺ ꦣꦩ꧀ꦩꦴ, ꦮꦺꦢꦤꦴꦱꦩꦺꦴꦱꦫꦟꦴ ꦱꦧ꧀ꦧꦺ ꦣꦩ꧀ꦩꦴ, ꦱꦩꦴꦣꦶꦥ꧀ꦥꦩꦸꦑꦴ ꦱꦧ꧀ꦧꦺ ꦣꦩ꧀ꦩꦴ, ꦱꦠꦴꦣꦶꦥꦠꦺꦪ꧀ꦪꦴ ꦱꦧ꧀ꦧꦺ ꦣꦩ꧀ꦩꦴ, ꦥꦚ꧀ꦚꦸꦠ꧀ꦠꦫꦴ ꦱꦧ꧀ꦧꦺ ꦣꦩ꧀ꦩꦴ, ꦮꦶꦩꦸꦠ꧀ꦠꦶꦱꦴꦫꦴ ꦱꦧ꧀ꦧꦺ ꦣꦩ꧀ꦩꦴ, ꦄꦩꦠꦺꦴꦒꦣꦴ ꦱꦧ꧀ꦧꦺ ꦣꦩ꧀ꦩꦴ, ꦤꦶꦧ꧀ꦧꦴꦤꦥꦫꦶꦪꦺꦴꦱꦴꦤꦴ ꦱꦧ꧀ꦧꦺ ꦣꦩ꧀ꦩꦴ’ꦠꦶ. ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦌꦮꦁ ꦧ꧀ꦪꦴꦏꦫꦺꦪ꧀ꦪꦴꦡꦴ’’ꦠꦶ. ꦄꦛ꧀ꦜꦩꦁ.