꧑꧐. ꦢꦸꦠꦶꦪꦏꦺꦴꦱꦭꦱꦸꦠ꧀ꦠꦁ

꧓꧐. ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦈꦪ꧀ꦪꦺꦴꦣꦶꦏꦴ ꦤꦶꦮꦠ꧀ꦠꦺꦴ ꦲꦺꦴꦠꦶ ꦮꦶꦗꦶꦠꦱꦔ꧀ꦒꦴꦩꦺꦴ ꦭꦢ꧀ꦣꦴꦣꦶꦥ꧀ꦥꦴꦪꦺꦴ. ꦄꦡ ꦑꦺꦴ ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦪꦺꦤ ꦄꦴꦫꦴꦩꦺꦴ ꦠꦺꦤ ꦥꦴꦪꦴꦱꦶ. ꦪꦴꦮꦠꦶꦏꦴ ꦪꦴꦤꦱ꧀ꦱ ꦨꦹꦩꦶ, ꦪꦴꦤꦺꦤ ꦒꦤ꧀ꦠ꧀ꦮꦴ ꦪꦴꦤꦴ ꦥꦕ꧀ꦕꦺꦴꦫꦺꦴꦲꦶꦠ꧀ꦮꦴ ꦥꦠ꧀ꦠꦶꦏꦺꦴꦮ ꦄꦴꦫꦴꦩꦁ ꦥꦴꦮꦶꦱꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦄꦧ꧀ꦨꦺꦴꦏꦴꦱꦺ ꦕꦔ꧀ꦏꦩꦤ꧀ꦠꦶ. ꦄꦡ ꦑꦺꦴ ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦪꦺꦤ ꦠꦺ ꦨꦶꦏ꧀ꦑꦹ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘‘ꦏꦲꦁ ꦤꦸ ꦑꦺꦴ, ꦨꦤ꧀ꦠꦺ, ꦨꦒꦮꦴ ꦌꦠꦫꦲꦶ ꦮꦶꦲꦫꦠꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ. ꦢꦱ꧀ꦱꦤꦏꦴꦩꦴ ꦲꦶ ꦩꦪꦁ, ꦨꦤ꧀ꦠꦺ, ꦠꦁ ꦨꦒꦮꦤ꧀ꦠꦁ ꦄꦫꦲꦤ꧀ꦠꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣ’’ꦤ꧀ꦠꦶ. ‘‘ꦌꦱꦺꦴ, ꦩꦲꦴꦫꦴꦗ, ꦮꦶꦲꦴꦫꦺꦴ ꦱꦁꦮꦸꦠꦢ꧀ꦮꦴꦫꦺꦴ. ꦠꦺꦤ ꦄꦥ꧀ꦥꦱꦢ꧀ꦢꦺꦴ ꦈꦥꦱꦔ꧀ꦏꦩꦶꦠ꧀ꦮꦴ ꦄꦠꦫꦩꦴꦤꦺꦴ ꦄꦴꦭꦶꦤ꧀ꦢꦁ ꦥꦮꦶꦱꦶꦠ꧀ꦮꦴ ꦈꦏ꧀ꦏꦴꦱꦶꦠ꧀ꦮꦴ ꦄꦒ꧀ꦒꦭ꦳ꦁ ꦄꦴꦏꦺꦴꦛꦺꦲꦶ; ꦮꦶꦮꦫꦶꦱ꧀ꦱꦠꦶ ꦠꦺ ꦨꦒꦮꦴ ꦢ꧀ꦮꦴꦫ’’ꦤ꧀ꦠꦶ.

ꦄꦡ ꦑꦺꦴ ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦪꦺꦤ ꦱꦺꦴ ꦮꦶꦲꦴꦫꦺꦴ ꦱꦁꦮꦸꦠꦢ꧀ꦮꦴꦫꦺꦴ, ꦠꦺꦤ ꦄꦥ꧀ꦥꦱꦢ꧀ꦢꦺꦴ ꦈꦥꦱꦔ꧀ꦏꦩꦶꦠ꧀ꦮꦴ ꦄꦠꦫꦩꦴꦤꦺꦴ ꦄꦴꦭꦶꦤ꧀ꦢꦁ ꦥꦮꦶꦱꦶꦠ꧀ꦮꦴ ꦈꦏ꧀ꦏꦴꦱꦶꦠ꧀ꦮꦴ ꦄꦒ꧀ꦒꦭ꦳ꦁ ꦄꦴꦏꦺꦴꦛꦺꦱꦶ. ꦮꦶꦮꦫꦶ ꦨꦒꦮꦴ ꦢ꧀ꦮꦴꦫꦁ. ꦄꦡ ꦑꦺꦴ ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦮꦶꦲꦴꦫꦁ ꦥꦮꦶꦱꦶꦠ꧀ꦮꦴ ꦨꦒꦮꦠꦺꦴ ꦥꦴꦢꦺꦱꦸ ꦱꦶꦫꦱꦴ ꦤꦶꦥꦠꦶꦠ꧀ꦮꦴ ꦨꦒꦮꦠꦺꦴ ꦥꦴꦢꦴꦤꦶ ꦩꦸꦑꦺꦤ ꦕ ꦥꦫꦶꦕꦸꦩ꧀ꦧꦠꦶ ꦥꦴꦟꦷꦲꦶ ꦕ ꦥꦫꦶꦱꦩ꧀ꦧꦴꦲꦠꦶ ꦤꦴꦩꦚ꧀ꦕ ꦱꦴꦮꦺꦠꦶ – ‘‘ꦫꦴꦗꦴꦲꦁ, ꦨꦤ꧀ꦠꦺ, ꦥꦱꦺꦤꦢꦶ ꦏꦺꦴꦱꦭꦺꦴ; ꦫꦴꦗꦴꦲꦁ, ꦨꦤ꧀ꦠꦺ, ꦥꦱꦺꦤꦢꦶ ꦏꦺꦴꦱꦭꦺꦴ’’ꦠꦶ.

‘‘ꦏꦁ ꦥꦤ ꦠ꧀ꦮꦁ, ꦩꦲꦴꦫꦴꦗ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦆꦩꦱ꧀ꦩꦶꦁ ꦱꦫꦷꦫꦺ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦱꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦱꦷ’’ꦠꦶ? ‘‘ꦏꦠꦚ꧀ꦚꦸꦠꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦏꦠꦮꦺꦢꦶꦠꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦨꦒꦮꦴ ꦲꦶ, ꦨꦤ꧀ꦠꦺ, ꦧꦲꦸꦗꦤꦲꦶꦠꦴꦪ ꦥꦛꦶꦥꦤ꧀ꦤꦺꦴ ꦧꦲꦸꦗꦤꦱꦸꦑꦴꦪ ꦧꦲꦸꦤꦺꦴ ꦗꦤꦱ꧀ꦱ ꦄꦫꦶꦪꦺ ꦚꦴꦪꦺ ꦥꦠꦶꦛ꧀ꦜꦴꦥꦶꦠꦴ ꦪꦢꦶꦢꦁ ꦏꦭ꧀ꦪꦴꦟꦣꦩ꧀ꦩꦠꦴꦪ ꦏꦸꦱꦭꦣꦩ꧀ꦩꦠꦴꦪ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦧꦲꦸꦗꦤꦲꦶꦠꦴꦪ ꦥꦛꦶꦥꦤ꧀ꦤꦺꦴ ꦧꦲꦸꦗꦤꦱꦸꦑꦴꦪ ꦧꦲꦸꦤꦺꦴ ꦗꦤꦱ꧀ꦱ ꦄꦫꦶꦪꦺ ꦚꦴꦪꦺ ꦥꦠꦶꦛ꧀ꦜꦴꦥꦶꦠꦴ ꦪꦢꦶꦢꦁ ꦏꦭ꧀ꦪꦴꦟꦣꦩ꧀ꦩꦠꦴꦪ ꦏꦸꦱꦭꦣꦩ꧀ꦩꦠꦴꦪ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦱꦷꦭꦮꦴ ꦮꦸꦢ꧀ꦣꦱꦷꦭꦺꦴ ꦄꦫꦶꦪꦱꦷꦭꦺꦴ ꦏꦸꦱꦭꦱꦷꦭꦺꦴ ꦏꦸꦱꦭꦱꦷꦭꦺꦤ ꦱꦩꦤ꧀ꦤꦴꦒꦠꦺꦴ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦱꦷꦭꦮꦴ ꦮꦸꦢ꧀ꦣꦱꦷꦭꦺꦴ ꦄꦫꦶꦪꦱꦷꦭꦺꦴ ꦏꦸꦱꦭꦱꦷꦭꦺꦴ ꦏꦸꦱꦭꦱꦷꦭꦺꦤ ꦱꦩꦤ꧀ꦤꦴꦒꦠꦺꦴ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦢꦷꦓꦫꦠ꧀ꦠꦁ ꦄꦴꦫꦚ꧀ꦚꦶꦏꦺꦴ, ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦠꦶ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦢꦷꦓꦫꦠ꧀ꦠꦁ ꦄꦴꦫꦚ꧀ꦚꦶꦏꦺꦴ, ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦠꦶ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦺꦤ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦺꦤ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ. ‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦄꦴꦲꦸꦤꦺꦪ꧀ꦪꦺꦴ ꦥꦴꦲꦸꦤꦺꦪ꧀ꦪꦺꦴ ꦢꦏ꧀ꦑꦶꦟꦺꦪ꧀ꦪꦺꦴ ꦄꦚ꧀ꦗꦭꦶꦏꦫꦟꦷꦪꦺꦴ ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦄꦴꦲꦸꦤꦺꦪ꧀ꦪꦺꦴ ꦥꦴꦲꦸꦤꦺꦪ꧀ꦪꦺꦴ ꦢꦏ꧀ꦑꦶꦟꦺꦪ꧀ꦪꦺꦴ ꦄꦚ꧀ꦗꦭꦶꦏꦫꦟꦷꦪꦺꦴ ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦪꦴꦪꦁ ꦏꦡꦴ ꦄꦨꦶꦱꦭ꧀ꦭꦺꦑꦶꦏꦴ ꦕꦺꦠꦺꦴꦮꦶꦮꦫꦟꦱꦥ꧀ꦥꦴꦪꦴ, ꦱꦺꦪ꧀ꦪꦡꦶꦢꦁ – ꦄꦥ꧀ꦥꦶꦕ꧀ꦖꦏꦡꦴ ꦱꦤ꧀ꦠꦸꦛ꧀ꦜꦶꦏꦡꦴ ꦥꦮꦶꦮꦺꦏꦏꦡꦴ ꦄꦱꦁꦱꦒ꧀ꦒꦏꦡꦴ ꦮꦷꦫꦶꦪꦴꦫꦩ꧀ꦨꦏꦡꦴ ꦱꦷꦭꦏꦡꦴ ꦱꦩꦴꦣꦶꦏꦡꦴ ꦥꦚ꧀ꦚꦴꦏꦡꦴ ꦮꦶꦩꦸꦠ꧀ꦠꦶꦏꦡꦴ ꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦏꦡꦴ, ꦌꦮꦫꦹꦥꦴꦪ ꦏꦡꦴꦪ ꦤꦶꦏꦴꦩꦭꦴꦨꦷ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦪꦴꦪꦁ ꦏꦡꦴ ꦄꦨꦶꦱꦭ꧀ꦭꦺꦑꦶꦏꦴ ꦕꦺꦠꦺꦴꦮꦶꦮꦫꦟꦱꦥ꧀ꦥꦴꦪꦴ, ꦱꦺꦪ꧀ꦪꦡꦶꦢꦁ – ꦄꦥ꧀ꦥꦶꦕ꧀ꦖꦏꦡꦴ…ꦥꦺ… ꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦏꦡꦴ, ꦌꦮꦫꦹꦥꦴꦪ ꦏꦡꦴꦪ ꦤꦶꦏꦴꦩꦭꦴꦨꦷ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦕꦠꦸꦤ꧀ꦤꦁ ꦙꦴꦤꦴꦤꦁ ꦄꦴꦨꦶꦕꦺꦠꦱꦶꦏꦴꦤꦁ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦴꦤꦁ ꦤꦶꦏꦴꦩꦭꦴꦨꦷ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦕꦠꦸꦤ꧀ꦤꦁ ꦙꦴꦤꦴꦤꦁ ꦄꦴꦨꦶꦕꦺꦠꦱꦶꦏꦴꦤꦁ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦴꦤꦁ ꦤꦶꦏꦴꦩꦭꦴꦨꦷ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ, ꦱꦺꦪ꧀ꦪꦡꦶꦢꦁ – ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ ꦠꦶꦱ꧀ꦱꦺꦴꦥꦶ ꦗꦴꦠꦶꦪꦺꦴ ꦕꦠꦱ꧀ꦱꦺꦴꦥꦶ ꦗꦴꦠꦶꦪꦺꦴ ꦥꦚ꧀ꦕꦥꦶ ꦗꦴꦠꦶꦪꦺꦴ ꦢꦱꦥꦶ ꦗꦴꦠꦶꦪꦺꦴ ꦮꦷꦱꦩ꧀ꦥꦶ ꦗꦴꦠꦶꦪꦺꦴ ꦠꦶꦁꦱꦩ꧀ꦥꦶ ꦗꦴꦠꦶꦪꦺꦴ ꦕꦠ꧀ꦠꦴꦭꦷꦱꦩ꧀ꦥꦶ ꦗꦴꦠꦶꦪꦺꦴ ꦥꦚ꧀ꦚꦴꦱꦩ꧀ꦥꦶ ꦗꦴꦠꦶꦪꦺꦴ ꦗꦴꦠꦶꦱꦠꦩ꧀ꦥꦶ ꦗꦴꦠꦶꦱꦲꦱ꧀ꦱꦩ꧀ꦥꦶ ꦗꦴꦠꦶꦱꦠꦱꦲꦱ꧀ꦱꦩ꧀ꦥꦶ ꦄꦤꦺꦏꦺꦥꦶ ꦱꦁꦮꦛ꧀ꦛꦏꦥ꧀ꦥꦺ ꦄꦤꦺꦏꦺꦥꦶ ꦮꦶꦮꦛ꧀ꦛꦏꦥ꧀ꦥꦺ ꦄꦤꦺꦏꦺꦥꦶ ꦱꦁꦮꦛ꧀ꦛꦮꦶꦮꦛ꧀ꦛꦏꦥ꧀ꦥꦺ – ‘ꦄꦩꦸꦠ꧀ꦫꦴꦱꦶꦁ ꦌꦮꦁꦤꦴꦩꦺꦴ ꦌꦮꦁꦒꦺꦴꦠ꧀ꦠꦺꦴ ꦌꦮꦁꦮꦟ꧀ꦟꦺꦴ ꦌꦮꦩꦴꦲꦴꦫꦺꦴ ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ, ꦱꦺꦴ ꦠꦠꦺꦴ ꦕꦸꦠꦺꦴ ꦄꦩꦸꦠ꧀ꦫ ꦈꦢꦥꦴꦢꦶꦁ; ꦠꦠ꧀ꦫꦴꦥꦴꦱꦶꦁ ꦌꦮꦁꦤꦴꦩꦺꦴ ꦌꦮꦁꦒꦺꦴꦠ꧀ꦠꦺꦴ ꦌꦮꦁꦮꦟ꧀ꦟꦺꦴ ꦌꦮꦩꦴꦲꦴꦫꦺꦴ ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ, ꦱꦺꦴ ꦠꦠꦺꦴ ꦕꦸꦠꦺꦴ ꦆꦣꦹꦥꦥꦤ꧀ꦤꦺꦴ’ꦠꦶ. ꦆꦠꦶ ꦱꦴꦏꦴꦫꦁ ꦱꦈꦢ꧀ꦢꦺꦱꦁ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ, ꦱꦺꦪ꧀ꦪꦡꦶꦢꦁ – ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ…ꦥꦺ… ꦆꦠꦶ ꦱꦴꦏꦴꦫꦁ ꦱꦈꦢ꧀ꦢꦺꦱꦁ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦠꦶ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ, ꦱꦸꦒꦠꦺ ꦢꦸꦒ꧀ꦒꦠꦺ ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦠꦶ – ‘ꦆꦩꦺ ꦮꦠ ꦨꦺꦴꦤ꧀ꦠꦺꦴ ꦱꦠ꧀ꦠꦴ ꦏꦴꦪꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦈꦥꦮꦴꦢꦏꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ, ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦤ꧀ꦤꦴ; ꦆꦩꦺ ꦮꦴ ꦥꦤ ꦨꦺꦴꦤ꧀ꦠꦺꦴ ꦱꦠ꧀ꦠꦴ ꦏꦴꦪꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦄꦤꦸꦥꦮꦴꦢꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ, ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦤ꧀ꦤꦴ’ꦠꦶ, ꦆꦠꦶ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦠꦶ…ꦥꦺ… ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦠꦶ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ…ꦥꦺ… ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦠꦶ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ…ꦥꦺ… ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ, ꦆꦢꦩ꧀ꦥꦶ ꦑꦺꦴ ꦄꦲꦁ, ꦨꦤ꧀ꦠꦺ, ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦨꦒꦮꦠꦶ ꦌꦮꦫꦹꦥꦁ ꦥꦫꦩꦤꦶꦥꦕ꧀ꦕꦏꦴꦫꦁ ꦏꦫꦺꦴꦩꦶ, ꦩꦺꦠ꧀ꦠꦹꦥꦲꦴꦫꦁ ꦈꦥꦢꦁꦱꦺꦩꦶ.

‘‘ꦲꦤ꧀ꦢ ꦕ ꦢꦴꦤꦶ ꦩꦪꦁ, ꦨꦤ꧀ꦠꦺ, ꦒꦕ꧀ꦖꦴꦩ. ꦧꦲꦸꦏꦶꦕ꧀ꦕꦴ ꦩꦪꦁ ꦧꦲꦸꦏꦫꦟꦷꦪꦴ’’ꦠꦶ. ‘‘ꦪꦱ꧀ꦱ ꦢꦴꦤꦶ ꦠ꧀ꦮꦁ, ꦩꦲꦴꦫꦴꦗ, ꦏꦴꦭꦁ ꦩꦚ꧀ꦚꦱꦷ’’ꦠꦶ. ꦄꦡ ꦑꦺꦴ ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦴꦩꦷꦠꦶ. ꦢꦱꦩꦁ.

ꦩꦲꦴꦮꦒ꧀ꦒꦺꦴ ꦠꦠꦶꦪꦺꦴ.