ਅਪਰਗਾਥਾਸਙ੍ਗਣਿਕਂ

੧. ਚੋਦਨਾਦਿਪੁਚ੍ਛਾਵਿਸ੍ਸਜ੍ਜਨਾ

੩੫੯. ਚੋਦਨਾ ਕਿਮਤ੍ਥਾਯ, ਸਾਰਣਾ ਕਿਸ੍ਸ ਕਾਰਣਾ;

ਸਙ੍ਘੋ ਕਿਮਤ੍ਥਾਯ, ਮਤਿਕਮ੍ਮਂ ਪਨ ਕਿਸ੍ਸ ਕਾਰਣਾ.

ਚੋਦਨਾ ਸਾਰਣਤ੍ਥਾਯ, ਨਿਗ੍ਗਹਤ੍ਥਾਯ ਸਾਰਣਾ;

ਸਙ੍ਘੋ ਪਰਿਗ੍ਗਹਤ੍ਥਾਯ, ਮਤਿਕਮ੍ਮਂ ਪਨ ਪਾਟਿਯੇਕ੍ਕਂ.

ਮਾ ਖੋ ਤੁਰਿਤੋ ਅਭਣਿ, ਮਾ ਖੋ ਚਣ੍ਡਿਕਤੋ ਭਣਿ;

ਮਾ ਖੋ ਪਟਿਘਂ ਜਨਯਿ, ਸਚੇ ਅਨੁਵਿਜ੍ਜਕੋ ਤੁਵਂ.

ਮਾ ਖੋ ਸਹਸਾ ਅਭਣਿ, ਕਥਂ ਵਿਗ੍ਗਾਹਿਕਂ ਅਨਤ੍ਥਸਂਹਿਤਂ;

ਸੁਤ੍ਤੇ ਵਿਨਯੇ ਅਨੁਲੋਮੇ, ਪਞ੍ਞਤ੍ਤੇ ਅਨੁਲੋਮਿਕੇ.

ਅਨੁਯੋਗਵਤ੍ਤਂ ਨਿਸਾਮਯ, ਕੁਸਲੇਨ ਬੁਦ੍ਧਿਮਤਾ ਕਤਂ;

ਸੁਵੁਤ੍ਤਂ ਸਿਕ੍ਖਾਪਦਾਨੁਲੋਮਿਕਂ, ਗਤਿਂ ਨ ਨਾਸੇਨ੍ਤੋ ਸਮ੍ਪਰਾਯਿਕਂ;

ਹਿਤੇਸੀ ਅਨੁਯੁਞ੍ਜਸ੍ਸੁ, ਕਾਲੇਨਤ੍ਥੂਪਸਂਹਿਤਂ.

ਚੁਦਿਤਸ੍ਸ ਚ ਚੋਦਕਸ੍ਸ ਚ;

ਸਹਸਾ ਵੋਹਾਰਂ ਮਾ ਪਧਾਰੇਸਿ;

ਚੋਦਕੋ ਆਹ ਆਪਨ੍ਨੋਤਿ;

ਚੁਦਿਤਕੋ ਆਹ ਅਨਾਪਨ੍ਨੋਤਿ.

ਉਭੋ ਅਨੁਕ੍ਖਿਪਨ੍ਤੋ, ਪਟਿਞ੍ਞਾਨੁਸਨ੍ਧਿਤੇਨ ਕਾਰਯੇ;

ਪਟਿਞ੍ਞਾ ਲਜ੍ਜੀਸੁ ਕਤਾ, ਅਲਜ੍ਜੀਸੁ ਏਵਂ ਨ ਵਿਜ੍ਜਤਿ;

ਬਹੁਮ੍ਪਿ ਅਲਜ੍ਜੀ ਭਾਸੇਯ੍ਯ, ਵਤ੍ਤਾਨੁਸਨ੍ਧਿਤੇਨ [ਵੁਤ੍ਤਾਨੁਸਨ੍ਧਿਤੇਨ (ਸੀ. ਸ੍ਯਾ. ਕ.)] ਕਾਰਯੇ.

ਅਲਜ੍ਜੀ ਕੀਦਿਸੋ ਹੋਤਿ, ਪਟਿਞ੍ਞਾ ਯਸ੍ਸ ਨ ਰੂਹਤਿ;

ਏਤਞ੍ਚ [ਏਵਞ੍ਚ (ਕ.)] ਤਾਹਂ ਪੁਚ੍ਛਾਮਿ, ਕੀਦਿਸੋ ਵੁਚ੍ਚਤਿ ਅਲਜ੍ਜੀ ਪੁਗ੍ਗਲੋ.

ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤਿ, ਆਪਤ੍ਤਿਂ ਪਰਿਗੂਹਤਿ;

ਅਗਤਿਗਮਨਞ੍ਚ ਗਚ੍ਛਤਿ, ਏਦਿਸੋ ਵੁਚ੍ਚਤਿ ਅਲਜ੍ਜੀਪੁਗ੍ਗਲੋ.

ਸਚ੍ਚਂ ਅਹਮ੍ਪਿ ਜਾਨਾਮਿ, ਏਦਿਸੋ ਵੁਚ੍ਚਤਿ ਅਲਜ੍ਜੀਪੁਗ੍ਗਲੋ;

ਅਞ੍ਞਞ੍ਚ ਤਾਹਂ ਪੁਚ੍ਛਾਮਿ, ਕੀਦਿਸੋ ਵੁਚ੍ਚਤਿ ਲਜ੍ਜੀਪੁਗ੍ਗਲੋ.

ਸਞ੍ਚਿਚ੍ਚ ਆਪਤ੍ਤਿਂ ਨਾਪਜ੍ਜਤਿ, ਆਪਤ੍ਤਿਂ ਨ ਪਰਿਗੂਹਤਿ;

ਅਗਤਿਗਮਨਂ ਨ ਗਚ੍ਛਤਿ, ਏਦਿਸੋ ਵੁਚ੍ਚਤਿ ਲਜ੍ਜੀਪੁਗ੍ਗਲੋ.

ਸਚ੍ਚਂ ਅਹਮ੍ਪਿ ਜਾਨਾਮਿ, ਏਦਿਸੋ ਵੁਚ੍ਚਤਿ ਲਜ੍ਜੀਪੁਗ੍ਗਲੋ;

ਅਞ੍ਞਞ੍ਚ ਤਾਹਂ ਪੁਚ੍ਛਾਮਿ, ਕੀਦਿਸੋ ਵੁਚ੍ਚਤਿ ਅਧਮ੍ਮਚੋਦਕੋ.

ਅਕਾਲੇ ਚੋਦੇਤਿ ਅਭੂਤੇਨ;

ਫਰੁਸੇਨ ਅਨਤ੍ਥਸਂਹਿਤੇਨ;

ਦੋਸਨ੍ਤਰੋ ਚੋਦੇਤਿ ਨੋ ਮੇਤ੍ਤਾਚਿਤ੍ਤੋ;

ਏਦਿਸੋ ਵੁਚ੍ਚਤਿ ਅਧਮ੍ਮਚੋਦਕੋ.

ਸਚ੍ਚਂ ਅਹਮ੍ਪਿ ਜਾਨਾਮਿ, ਏਦਿਸੋ ਵੁਚ੍ਚਤਿ ਅਧਮ੍ਮਚੋਦਕੋ;

ਅਞ੍ਞਞ੍ਚ ਤਾਹਂ ਪੁਚ੍ਛਾਮਿ, ਕੀਦਿਸੋ ਵੁਚ੍ਚਤਿ ਧਮ੍ਮਚੋਦਕੋ.

ਕਾਲੇਨ ਚੋਦੇਤਿ ਭੂਤੇਨ, ਸਣ੍ਹੇਨ ਅਤ੍ਥਸਂਹਿਤੇਨ;

ਮੇਤ੍ਤਾਚਿਤ੍ਤੋ ਚੋਦੇਤਿ ਨੋ ਦੋਸਨ੍ਤਰੋ;

ਏਦਿਸੋ ਵੁਚ੍ਚਤਿ ਧਮ੍ਮਚੋਦਕੋ.

ਸਚ੍ਚਂ ਅਹਮ੍ਪਿ ਜਾਨਾਮਿ, ਏਦਿਸੋ ਵੁਚ੍ਚਤਿ ਧਮ੍ਮਚੋਦਕੋ;

ਅਞ੍ਞਞ੍ਚ ਤਾਹਂ ਪੁਚ੍ਛਾਮਿ, ਕੀਦਿਸੋ ਵੁਚ੍ਚਤਿ ਬਾਲਚੋਦਕੋ.

ਪੁਬ੍ਬਾਪਰਂ ਨ ਜਾਨਾਤਿ, ਪੁਬ੍ਬਾਪਰਸ੍ਸ ਅਕੋਵਿਦੋ;

ਅਨੁਸਨ੍ਧਿਵਚਨਪਥਂ ਨ ਜਾਨਾਤਿ;

ਅਨੁਸਨ੍ਧਿਵਚਨਪਥਸ੍ਸ ਅਕੋਵਿਦੋ;

ਏਦਿਸੋ ਵੁਚ੍ਚਤਿ ਬਾਲਚੋਦਕੋ.

ਸਚ੍ਚਂ ਅਹਮ੍ਪਿ ਜਾਨਾਮਿ, ਏਦਿਸੋ ਵੁਚ੍ਚਤਿ ਬਾਲਚੋਦਕੋ;

ਅਞ੍ਞਞ੍ਚ ਤਾਹਂ ਪੁਚ੍ਛਾਮਿ, ਕੀਦਿਸੋ ਵੁਚ੍ਚਤਿ ਪਣ੍ਡਿਤਚੋਦਕੋ.

ਪੁਬ੍ਬਾਪਰਮ੍ਪਿ ਜਾਨਾਤਿ, ਪੁਬ੍ਬਾਪਰਸ੍ਸ ਕੋਵਿਦੋ;

ਅਨੁਸਨ੍ਧਿਵਚਨਪਥਂ ਜਾਨਾਤਿ, ਅਨੁਸਨ੍ਧਿਵਚਨਪਥਸ੍ਸ ਕੋਵਿਦੋ;

ਏਦਿਸੋ ਵੁਚ੍ਚਤਿ ਪਣ੍ਡਿਤਚੋਦਕੋ.

ਸਚ੍ਚਂ ਅਹਮ੍ਪਿ ਜਾਨਾਮਿ, ਏਦਿਸੋ ਵੁਚ੍ਚਤਿ ਪਣ੍ਡਿਤਚੋਦਕੋ;

ਅਞ੍ਞਞ੍ਚ ਤਾਹਂ ਪੁਚ੍ਛਾਮਿ, ਚੋਦਨਾ ਕਿਨ੍ਤਿ ਵੁਚ੍ਚਤਿ.

ਸੀਲਵਿਪਤ੍ਤਿਯਾ ਚੋਦੇਤਿ, ਅਥੋ ਆਚਾਰਦਿਟ੍ਠਿਯਾ;

ਆਜੀਵੇਨਪਿ ਚੋਦੇਤਿ, ਚੋਦਨਾ ਤੇਨ ਵੁਚ੍ਚਤੀਤਿ.

ਅਪਰਂ ਗਾਥਾਸਙ੍ਗਣਿਕਂ ਨਿਟ੍ਠਿਤਂ.