੧. ਉਕ੍ਕੋਟਨਭੇਦਾਦਿ
੩੪੦. [ਚੂਲ਼ਵ. ੨੧੫; ਪਰਿ. ੨੭੫] ਚਤ੍ਤਾਰਿ ਅਧਿਕਰਣਾਨਿ. ਵਿਵਾਦਾਧਿਕਰਣਂ, ਅਨੁਵਾਦਾਧਿਕਰਣਂ, ਆਪਤ੍ਤਾਧਿਕਰਣਂ, ਕਿਚ੍ਚਾਧਿਕਰਣਂ – ਇਮਾਨਿ ਚਤ੍ਤਾਰਿ ਅਧਿਕਰਣਾਨਿ.
ਇਮੇਸਂ ਚਤੁਨ੍ਨਂ ਅਧਿਕਰਣਾਨਂ ਕਤਿ ਉਕ੍ਕੋਟਾ? ਇਮੇਸਂ ਚਤੁਨ੍ਨਂ ਅਧਿਕਰਣਾਨਂ ਦਸ ਉਕ੍ਕੋਟਾ. ਵਿਵਾਦਾਧਿਕਰਣਸ੍ਸ ਦ੍ਵੇ ਉਕ੍ਕੋਟਾ, ਅਨੁਵਾਦਾਧਿਕਰਣਸ੍ਸ ਚਤ੍ਤਾਰੋ ਉਕ੍ਕੋਟਾ, ਆਪਤ੍ਤਾਧਿਕਰਣਸ੍ਸ ਤਯੋ ਉਕ੍ਕੋਟਾ, ਕਿਚ੍ਚਾਧਿਕਰਣਸ੍ਸ ਏਕੋ ਉਕ੍ਕੋਟੋ – ਇਮੇਸਂ ਚਤੁਨ੍ਨਂ ਅਧਿਕਰਣਾਨਂ ਇਮੇ ਦਸ ਉਕ੍ਕੋਟਾ.
ਵਿਵਾਦਾਧਿਕਰਣਂ ਉਕ੍ਕੋਟੇਨ੍ਤੋ ਕਤਿ ਸਮਥੇ ਉਕ੍ਕੋਟੇਤਿ? ਅਨੁਵਾਦਾਧਿਕਰਣਂ ਉਕ੍ਕੋਟੇਨ੍ਤੋ ਕਤਿ ਸਮਥੇ ਉਕ੍ਕੋਟੇਤਿ? ਆਪਤ੍ਤਾਧਿਕਰਣਂ ਉਕ੍ਕੋਟੇਨ੍ਤੋ ਕਤਿ ਸਮਥੇ ਉਕ੍ਕੋਟੇਤਿ? ਕਿਚ੍ਚਾਧਿਕਰਣਂ ਉਕ੍ਕੋਟੇਨ੍ਤੋ ਕਤਿ ਸਮਥੇ ਉਕ੍ਕੋਟੇਤਿ?
ਵਿਵਾਦਾਧਿਕਰਣਂ ਉਕ੍ਕੋਟੇਨ੍ਤੋ ਦ੍ਵੇ ਸਮਥੇ ਉਕ੍ਕੋਟੇਤਿ. ਅਨੁਵਾਦਾਧਿਕਰਣਂ ਉਕ੍ਕੋਟੇਨ੍ਤੋ ਚਤ੍ਤਾਰੋ ਸਮਥੇ ਉਕ੍ਕੋਟੇਤਿ. ਆਪਤ੍ਤਾਧਿਕਰਣਂ ਉਕ੍ਕੋਟੇਨ੍ਤੋ ਤਯੋ ਸਮਥੇ ਉਕ੍ਕੋਟੇਤਿ. ਕਿਚ੍ਚਾਧਿਕਰਣਂ ਉਕ੍ਕੋਟੇਨ੍ਤੋ ਏਕਂ ਸਮਥਂ ਉਕ੍ਕੋਟੇਤਿ.
੩੪੧. ਕਤਿ ਉਕ੍ਕੋਟਾ? ਕਤਿਹਾਕਾਰੇਹਿ ਉਕ੍ਕੋਟਨਂ ਪਸਵਤਿ? ਕਤਿਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਧਿਕਰਣਂ ਉਕ੍ਕੋਟੇਤਿ? ਕਤਿ ਪੁਗ੍ਗਲਾ ਅਧਿਕਰਣਂ ਉਕ੍ਕੋਟੇਨ੍ਤਾ ਆਪਤ੍ਤਿਂ ਆਪਜ੍ਜਨ੍ਤਿ?
ਦ੍ਵਾਦਸ ਉਕ੍ਕੋਟਾ. ਦਸਹਾਕਾਰੇਹਿ ਉਕ੍ਕੋਟਨਂ ਪਸਵਤਿ. ਚਤੂਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਧਿਕਰਣਂ ਉਕ੍ਕੋਟੇਤਿ. ਚਤ੍ਤਾਰੋ ਪੁਗ੍ਗਲਾ ਅਧਿਕਰਣਂ ਉਕ੍ਕੋਟੇਨ੍ਤਾ ਆਪਤ੍ਤਿਂ ਆਪਜ੍ਜਨ੍ਤਿ?
ਕਤਮੇ ਦ੍ਵਾਦਸ ਉਕ੍ਕੋਟਾ? ਅਕਤਂ ਕਮ੍ਮਂ, ਦੁਕ੍ਕਟਂ ਕਮ੍ਮਂ, ਪੁਨ ਕਾਤਬ੍ਬਂ ਕਮ੍ਮਂ, ਅਨਿਹਤਂ, ਦੁਨ੍ਨਿਹਤਂ, ਪੁਨ ਨਿਹਨਿਤਬ੍ਬਂ, ਅਵਿਨਿਚ੍ਛਿਤਂ, ਦੁਵਿਨਿਚ੍ਛਿਤਂ, ਪੁਨ ਵਿਨਿਚ੍ਛਿਤਬ੍ਬਂ, ਅਵੂਪਸਨ੍ਤਂ, ਦੁਵੂਪਸਨ੍ਤਂ, ਪੁਨ ਵੂਪਸਮੇਤਬ੍ਬਨ੍ਤਿ – ਇਮੇ ਦ੍ਵਾਦਸ ਉਕ੍ਕੋਟਾ.
ਕਤਮੇਹਿ ਦਸਹਾਕਾਰੇਹਿ ਉਕ੍ਕੋਟਨਂ ਪਸਵਤਿ? ਤਤ੍ਥ ਜਾਤਕਂ ਅਧਿਕਰਣਂ ਉਕ੍ਕੋਟੇਤਿ, ਤਤ੍ਥ ਜਾਤਕਂ ਵੂਪਸਨ੍ਤਂ ਅਧਿਕਰਣਂ ਉਕ੍ਕੋਟੇਤਿ, ਅਨ੍ਤਰਾਮਗ੍ਗੇ ਅਧਿਕਰਣਂ ਉਕ੍ਕੋਟੇਤਿ, ਅਨ੍ਤਰਾਮਗ੍ਗੇ ਵੂਪਸਨ੍ਤਂ ਅਧਿਕਰਣਂ ਉਕ੍ਕੋਟੇਤਿ, ਤਤ੍ਥ ਗਤਂ ਅਧਿਕਰਣਂ ਉਕ੍ਕੋਟੇਤਿ, ਤਤ੍ਥ ਗਤਂ ਵੂਪਸਨ੍ਤਂ ਅਧਿਕਰਣਂ ਉਕ੍ਕੋਟੇਤਿ, ਸਤਿਵਿਨਯਂ ਉਕ੍ਕੋਟੇਤਿ, ਅਮੂਲ਼੍ਹਵਿਨਯਂ ਉਕ੍ਕੋਟੇਤਿ, ਤਸ੍ਸਪਾਪਿਯਸਿਕਂ ਉਕ੍ਕੋਟੇਤਿ, ਤਿਣਵਤ੍ਥਾਰਕਂ ਉਕ੍ਕੋਟੇਤਿ – ਇਮੇਹਿ ਦਸਹਾਕਾਰੇਹਿ ਉਕ੍ਕੋਟਨਂ ਪਸਵਤਿ.
ਕਤਮੇਹਿ ਚਤੂਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਧਿਕਰਣਂ ਉਕ੍ਕੋਟੇਤਿ? ਛਨ੍ਦਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤਿ, ਦੋਸਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤਿ, ਮੋਹਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤਿ, ਭਯਾਗਤਿਂ ਗਚ੍ਛਨ੍ਤੋ ਅਧਿਕਰਣਂ ਉਕ੍ਕੋਟੇਤਿ – ਇਮੇਹਿ ਚਤੂਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਧਿਕਰਣਂ ਉਕ੍ਕੋਟੇਤਿ.
ਕਤਮੇ ਚਤ੍ਤਾਰੋ ਪੁਗ੍ਗਲਾ ਅਧਿਕਰਣਂ ਉਕ੍ਕੋਟੇਨ੍ਤਾ ਆਪਤ੍ਤਿਂ ਆਪਜ੍ਜਨ੍ਤਿ? ਤਦਹੁਪਸਮ੍ਪਨ੍ਨੋ ਉਕ੍ਕੋਟੇਤਿ ਉਕ੍ਕੋਟਨਕਂ ਪਾਚਿਤ੍ਤਿਯਂ, ਆਗਨ੍ਤੁਕੋ ਉਕ੍ਕੋਟੇਤਿ ਉਕ੍ਕੋਟਨਕਂ ਪਾਚਿਤ੍ਤਿਯਂ, ਕਾਰਕੋ ਉਕ੍ਕੋਟੇਤਿ ਉਕ੍ਕੋਟਨਕਂ ਪਾਚਿਤ੍ਤਿਯਂ, ਛਨ੍ਦਦਾਯਕੋ ਉਕ੍ਕੋਟੇਤਿ ਉਕ੍ਕੋਟਨਕਂ ਪਾਚਿਤ੍ਤਿਯਂ – ਇਮੇ ਚਤ੍ਤਾਰੋ ਪੁਗ੍ਗਲਾ ਅਧਿਕਰਣਂ ਉਕ੍ਕੋਟੇਨ੍ਤਾ ਆਪਤ੍ਤਿਂ ਆਪਜ੍ਜਨ੍ਤਿ.