੮. ਤਬ੍ਭਾਗਿਯਵਾਰੋ

੨੯੮. ਕਤਿ ਸਮਥਾ ਵਿਵਾਦਾਧਿਕਰਣਸ੍ਸ ਤਬ੍ਭਾਗਿਯਾ? ਕਤਿ ਸਮਥਾ ਵਿਵਾਦਾਧਿਕਰਣਸ੍ਸ ਅਞ੍ਞਭਾਗਿਯਾ? ਕਤਿ ਸਮਥਾ ਅਨੁਵਾਦਾਧਿਕਰਣਸ੍ਸ ਤਬ੍ਭਾਗਿਯਾ? ਕਤਿ ਸਮਥਾ ਅਨੁਵਾਦਾਧਿਕਰਣਸ੍ਸ ਅਞ੍ਞਭਾਗਿਯਾ? ਕਤਿ ਸਮਥਾ ਆਪਤ੍ਤਾਧਿਕਰਣਸ੍ਸ ਤਬ੍ਭਾਗਿਯਾ? ਕਤਿ ਸਮਥਾ ਆਪਤ੍ਤਾਧਿਕਰਣਸ੍ਸ ਅਞ੍ਞਭਾਗਿਯਾ? ਕਤਿ ਸਮਥਾ ਕਿਚ੍ਚਾਧਿਕਰਣਸ੍ਸ ਤਬ੍ਭਾਗਿਯਾ? ਕਤਿ ਸਮਥਾ ਕਿਚ੍ਚਾਧਿਕਰਣਸ੍ਸ ਅਞ੍ਞਭਾਗਿਯਾ?

ਦ੍ਵੇ ਸਮਥਾ ਵਿਵਾਦਾਧਿਕਰਣਸ੍ਸ ਤਬ੍ਭਾਗਿਯਾ – ਸਮ੍ਮੁਖਾਵਿਨਯੋ, ਯੇਭੁਯ੍ਯਸਿਕਾ. ਪਞ੍ਚ ਸਮਥਾ ਵਿਵਾਦਾਧਿਕਰਣਸ੍ਸ ਅਞ੍ਞਭਾਗਿਯਾ – ਸਤਿਵਿਨਯੋ, ਅਮੂਲ਼੍ਹਵਿਨਯੋ, ਪਟਿਞ੍ਞਾਤਕਰਣਂ, ਤਸ੍ਸਪਾਪਿਯਸਿਕਾ, ਤਿਣਵਤ੍ਥਾਰਕੋ.

ਚਤ੍ਤਾਰੋ ਸਮਥਾ ਅਨੁਵਾਦਾਧਿਕਰਣਸ੍ਸ ਤਬ੍ਭਾਗਿਯਾ – ਸਮ੍ਮੁਖਾਵਿਨਯੋ, ਸਤਿਵਿਨਯੋ, ਅਮੂਲ਼੍ਹਵਿਨਯੋ, ਤਸ੍ਸਪਾਪਿਯਸਿਕਾ. ਤਯੋ ਸਮਥਾ ਅਨੁਵਾਦਾਧਿਕਰਣਸ੍ਸ ਅਞ੍ਞਭਾਗਿਯਾ – ਯੇਭੁਯ੍ਯਸਿਕਾ, ਪਟਿਞ੍ਞਾਤਕਰਣਂ, ਤਿਣਵਤ੍ਥਾਰਕੋ.

ਤਯੋ ਸਮਥਾ ਆਪਤ੍ਤਾਧਿਕਰਣਸ੍ਸ ਤਬ੍ਭਾਗਿਯਾ – ਸਮ੍ਮੁਖਾਵਿਨਯੋ, ਪਟਿਞ੍ਞਾਤਕਰਣਂ, ਤਿਣਵਤ੍ਥਾਰਕੋ. ਚਤ੍ਤਾਰੋ ਸਮਥਾ ਆਪਤ੍ਤਾਧਿਕਰਣਸ੍ਸ ਅਞ੍ਞਭਾਗਿਯਾ – ਯੇਭੁਯ੍ਯਸਿਕਾ, ਸਤਿਵਿਨਯੋ, ਅਮੂਲ਼੍ਹਵਿਨਯੋ, ਤਸ੍ਸਪਾਪਿਯਸਿਕਾ.

ਏਕੋ ਸਮਥੋ ਕਿਚ੍ਚਾਧਿਕਰਣਸ੍ਸ ਤਬ੍ਭਾਗਿਯੋ – ਸਮ੍ਮੁਖਾਵਿਨਯੋ. ਛ ਸਮਥਾ ਕਿਚ੍ਚਾਧਿਕਰਣਸ੍ਸ ਅਞ੍ਞਭਾਗਿਯਾ – ਯੇਭੁਯ੍ਯਸਿਕਾ, ਸਤਿਵਿਨਯੋ, ਅਮੂਲ਼੍ਹਵਿਨਯੋ, ਪਟਿਞ੍ਞਾਤਕਰਣਂ, ਤਸ੍ਸਪਾਪਿਯਸਿਕਾ, ਤਿਣਵਤ੍ਥਾਰਕੋ.

ਤਬ੍ਭਾਗਿਯਵਾਰੋ ਨਿਟ੍ਠਿਤੋ ਅਟ੍ਠਮੋ.