੬. ਅਧਿਕਰਣਪਰਿਯਾਯਵਾਰੋ
੨੯੨. ਵਿਵਾਦਾਧਿਕਰਣਸ੍ਸ – ਕਿਂ ਪੁਬ੍ਬਙ੍ਗਮਂ? ਕਤਿ ਠਾਨਾਨਿ? ਕਤਿ ਵਤ੍ਥੂਨਿ? ਕਤਿ ਭੂਮਿਯੋ? ਕਤਿ ਹੇਤੂ? ਕਤਿ ਮੂਲਾਨਿ? ਕਤਿਹਾਕਾਰੇਹਿ ਵਿਵਦਤਿ? ਵਿਵਾਦਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤਿ?
ਅਨੁਵਾਦਾਧਿਕਰਣਸ੍ਸ – ਕਿਂ ਪੁਬ੍ਬਙ੍ਗਮਂ? ਕਤਿ ਠਾਨਾਨਿ? ਕਤਿ ਵਤ੍ਥੂਨਿ? ਕਤਿ ਭੂਮਿਯੋ? ਕਤਿ ਹੇਤੂ? ਕਤਿ ਮੂਲਾਨਿ? ਕਤਿਹਾਕਾਰੇਹਿ ਅਨੁਵਦਤਿ? ਅਨੁਵਾਦਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤਿ?
ਆਪਤ੍ਤਾਧਿਕਰਣਸ੍ਸ – ਕਿਂ ਪੁਬ੍ਬਙ੍ਗਮਂ? ਕਤਿ ਠਾਨਾਨਿ? ਕਤਿ ਵਤ੍ਥੂਨਿ? ਕਤਿ ਭੂਮਿਯੋ? ਕਤਿ ਹੇਤੂ? ਕਤਿ ਮੂਲਾਨਿ? ਕਤਿਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ? ਆਪਤ੍ਤਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤਿ?
ਕਿਚ੍ਚਾਧਿਕਰਣਸ੍ਸ – ਕਿਂ ਪੁਬ੍ਬਙ੍ਗਮਂ? ਕਤਿ ਠਾਨਾਨਿ? ਕਤਿ ਵਤ੍ਥੂਨਿ? ਕਤਿ ਭੂਮਿਯੋ? ਕਤਿ ਹੇਤੂ? ਕਤਿ ਮੂਲਾਨਿ? ਕਤਿਹਾਕਾਰੇਹਿ ਕਿਚ੍ਚਂ ਜਾਯਤਿ? ਕਿਚ੍ਚਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤਿ?
੨੯੩. ਵਿਵਾਦਾਧਿਕਰਣਸ੍ਸ ਕਿਂ ਪੁਬ੍ਬਙ੍ਗਮਨ੍ਤਿ? ਲੋਭੋ ਪੁਬ੍ਬਙ੍ਗਮੋ, ਦੋਸੋ ਪੁਬ੍ਬਙ੍ਗਮੋ, ਮੋਹੋ ਪੁਬ੍ਬਙ੍ਗਮੋ, ਅਲੋਭੋ ਪੁਬ੍ਬਙ੍ਗਮੋ, ਅਦੋਸੋ ਪੁਬ੍ਬਙ੍ਗਮੋ, ਅਮੋਹੋ ਪੁਬ੍ਬਙ੍ਗਮੋ. ਕਤਿ ਠਾਨਾਨੀਤਿ? ਅਟ੍ਠਾਰਸ ਭੇਦਕਰਵਤ੍ਥੂਨਿ ਠਾਨਾਨਿ. ਕਤਿ ਵਤ੍ਥੂਨੀਤਿ? ਅਟ੍ਠਾਰਸ ਭੇਦਕਰਵਤ੍ਥੂਨਿ. ਕਤਿ ਭੂਮਿਯੋਤਿ? ਅਟ੍ਠਾਰਸ ਭੇਦਕਰਵਤ੍ਥੂਨਿ ਭੂਮਿਯੋ. ਕਤਿ ਹੇਤੂਤਿ? ਨਵ ਹੇਤੂ – ਤਯੋ ਕੁਸਲਹੇਤੂ, ਤਯੋ ਅਕੁਸਲਹੇਤੂ, ਤਯੋ ਅਬ੍ਯਾਕਤਹੇਤੂ. ਕਤਿ ਮੂਲਾਨੀਤਿ? ਦ੍ਵਾਦਸ ਮੂਲਾਨਿ. ਕਤਿਹਾਕਾਰੇਹਿ ਵਿਵਦਤੀਤਿ? ਦ੍ਵੀਹਾਕਾਰੇਹਿ ਵਿਵਦਤਿ – ਧਮ੍ਮਦਿਟ੍ਠਿ ਵਾ ਅਧਮ੍ਮਦਿਟ੍ਠਿ ਵਾ. [ਚੂਲ਼ਵ. ੨੨੮] ਵਿਵਾਦਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤੀਤਿ? ਵਿਵਾਦਾਧਿਕਰਣਂ ਦ੍ਵੀਹਿ ਸਮਥੇਹਿ ਸਮ੍ਮਤਿ – ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ.
੨੯੪. ਅਨੁਵਾਦਾਧਿਕਰਣਸ੍ਸ ਕਿਂ ਪੁਬ੍ਬਙ੍ਗਮਨ੍ਤਿ? ਲੋਭੋ ਪੁਬ੍ਬਙ੍ਗਮੋ, ਦੋਸੋ ਪੁਬ੍ਬਙ੍ਗਮੋ, ਮੋਹੋ ਪੁਬ੍ਬਙ੍ਗਮੋ, ਅਲੋਭੋ ਪੁਬ੍ਬਙ੍ਗਮੋ, ਅਦੋਸੋ ਪੁਬ੍ਬਙ੍ਗਮੋ, ਅਮੋਹੋ ਪੁਬ੍ਬਙ੍ਗਮੋ. ਕਤਿ ਠਾਨਾਨੀਤਿ? ਚਤਸ੍ਸੋ ਵਿਪਤ੍ਤਿਯੋ ਠਾਨਾਨਿ. ਕਤਿ ਵਤ੍ਥੂਨੀਤਿ? ਚਤਸ੍ਸੋ ਵਿਪਤ੍ਤਿਯੋ ਵਤ੍ਥੂਨਿ. ਕਤਿ ਭੂਮਿਯੋਤਿ? ਚਤਸ੍ਸੋ ਵਿਪਤ੍ਤਿਯੋ ਭੂਮਿਯੋ. ਕਤਿ ਹੇਤੂਤਿ? ਨਵ ਹੇਤੂ – ਤਯੋ ਕੁਸਲਹੇਤੂ, ਤਯੋ ਅਕੁਸਲਹੇਤੂ, ਤਯੋ ਅਬ੍ਯਾਕਤਹੇਤੂ. ਕਤਿ ਮੂਲਾਨੀਤਿ? ਚੁਦ੍ਦਸ ਮੂਲਾਨਿ. ਕਤਿਹਾਕਾਰੇਹਿ ਅਨੁਵਦਤੀਤਿ? ਦ੍ਵੀਹਾਕਾਰੇਹਿ ਅਨੁਵਦਤਿ – ਵਤ੍ਥੁਤੋ ਵਾ ਆਪਤ੍ਤਿਤੋ ਵਾ. [ਚੂਲ਼ਵ. ੨੩੬] ਅਨੁਵਾਦਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤੀਤਿ? ਅਨੁਵਾਦਾਧਿਕਰਣਂ ਚਤੂਹਿ ਸਮਥੇਹਿ ਸਮ੍ਮਤਿ – ਸਮ੍ਮੁਖਾਵਿਨਯੇਨ ਚ ਸਤਿਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਤਸ੍ਸਪਾਪਿਯਸਿਕਾਯ ਚ.
੨੯੫. ਆਪਤ੍ਤਾਧਿਕਰਣਸ੍ਸ ਕਿਂ ਪੁਬ੍ਬਙ੍ਗਮਨ੍ਤਿ? ਲੋਭੋ ਪੁਬ੍ਬਙ੍ਗਮੋ, ਦੋਸੋ ਪੁਬ੍ਬਙ੍ਗਮੋ, ਮੋਹੋ ਪੁਬ੍ਬਙ੍ਗਮੋ, ਅਲੋਭੋ ਪੁਬ੍ਬਙ੍ਗਮੋ, ਅਦੋਸੋ ਪੁਬ੍ਬਙ੍ਗਮੋ, ਅਮੋਹੋ ਪੁਬ੍ਬਙ੍ਗਮੋ. ਕਤਿ ਠਾਨਾਨੀਤਿ? ਸਤ੍ਤ ਆਪਤ੍ਤਿਕ੍ਖਨ੍ਧਾ ਠਾਨਾਨਿ. ਕਤਿ ਵਤ੍ਥੂਨੀਤਿ? ਸਤ੍ਤ ਆਪਤ੍ਤਿਕ੍ਖਨ੍ਧਾ ਵਤ੍ਥੂਨਿ. ਕਤਿ ਭੂਮਿਯੋਤਿ? ਸਤ੍ਤ ਆਪਤ੍ਤਿਕ੍ਖਨ੍ਧਾ ਭੂਮਿਯੋ. ਕਤਿ ਹੇਤੂਤਿ? ਛ ਹੇਤੂ [ਕਤਿ ਹੇਤੂਤਿ ਨਵ ਹੇਤੂ, ਤਯੋ ਕੁਸਲਹੇਤੂ (ਸੀ. ਸ੍ਯਾ.)] – ਤਯੋ ਅਕੁਸਲਹੇਤੂ, ਤਯੋ ਅਬ੍ਯਾਕਤਹੇਤੂ. ਕਤਿ ਮੂਲਾਨੀਤਿ? ਛ ਆਪਤ੍ਤਿਸਮੁਟ੍ਠਾਨਾਨਿ ਮੂਲਾਨਿ. ਕਤਿਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤੀਤਿ? ਛਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ – ਅਲਜ੍ਜਿਤਾ, ਅਞ੍ਞਾਣਤਾ, ਕੁਕ੍ਕੁਚ੍ਚਪਕਤਤਾ, ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾ, ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾ, ਸਤਿਸਮ੍ਮੋਸਾ. [ਚੂਲ਼ਵ. ੨੩੯] ਆਪਤ੍ਤਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤੀਤਿ? ਆਪਤ੍ਤਾਧਿਕਰਣਂ ਤੀਹਿ ਸਮਥੇਹਿ ਸਮ੍ਮਤਿ – ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ, ਸਮ੍ਮੁਖਾਵਿਨਯੇਨ ਚ ਤਿਣਵਤ੍ਥਾਰਕੇਨ ਚ.
੨੯੬. ਕਿਚ੍ਚਾਧਿਕਰਣਸ੍ਸ ਕਿਂ ਪੁਬ੍ਬਙ੍ਗਮਨ੍ਤਿ? ਲੋਭੋ ਪੁਬ੍ਬਙ੍ਗਮੋ, ਦੋਸੋ ਪੁਬ੍ਬਙ੍ਗਮੋ, ਮੋਹੋ ਪੁਬ੍ਬਙ੍ਗਮੋ, ਅਲੋਭੋ ਪੁਬ੍ਬਙ੍ਗਮੋ, ਅਦੋਸੋ ਪੁਬ੍ਬਙ੍ਗਮੋ, ਅਮੋਹੋ ਪੁਬ੍ਬਙ੍ਗਮੋ. ਕਤਿ ਠਾਨਾਨੀਤਿ? ਚਤ੍ਤਾਰਿ ਕਮ੍ਮਾਨਿ ਠਾਨਾਨਿ. ਕਤਿ ਵਤ੍ਥੂਨੀਤਿ? ਚਤ੍ਤਾਰਿ ਕਮ੍ਮਾਨਿ ਵਤ੍ਥੂਨਿ. ਕਤਿ ਭੂਮਿਯੋਤਿ? ਚਤ੍ਤਾਰਿ ਕਮ੍ਮਾਨਿ ਭੂਮਿਯੋ. ਕਤਿ ਹੇਤੂਤਿ? ਨਵ ਹੇਤੂ – ਤਯੋ ਕੁਸਲਹੇਤੂ, ਤਯੋ ਅਕੁਸਲਹੇਤੂ, ਤਯੋ ਅਬ੍ਯਾਕਤਹੇਤੂ. ਕਤਿ ਮੂਲਾਨੀਤਿ? ਏਕਂ ਮੂਲਂ – ਸਙ੍ਘੋ. ਕਤਿਹਾਕਾਰੇਹਿ ਕਿਚ੍ਚਂ ਜਾਯਤੀਤਿ? ਦ੍ਵੀਹਾਕਾਰੇਹਿ ਕਿਚ੍ਚਂ ਜਾਯਤਿ – ਞਤ੍ਤਿਤੋ ਵਾ ਅਪਲੋਕਨਤੋ ਵਾ. [ਚੂਲ਼ਵ. ੨੪੨] ਕਿਚ੍ਚਾਧਿਕਰਣਂ ਕਤਿਹਿ ਸਮਥੇਹਿ ਸਮ੍ਮਤੀਤਿ? ਕਿਚ੍ਚਾਧਿਕਰਣਂ ਏਕੇਨ ਸਮਥੇਨ ਸਮ੍ਮਤਿ – ਸਮ੍ਮੁਖਾਵਿਨਯੇਨ.
ਕਤਿ ਸਮਥਾ? ਸਤ੍ਤ ਸਮਥਾ. ਸਮ੍ਮੁਖਾਵਿਨਯੋ, ਸਤਿਵਿਨਯੋ, ਅਮੂਲ਼੍ਹਵਿਨਯੋ, ਪਟਿਞ੍ਞਾਤਕਰਣਂ, ਯੇਭੁਯ੍ਯਸਿਕਾ, ਤਸ੍ਸਪਾਪਿਯਸਿਕਾ, ਤਿਣਵਤ੍ਥਾਰਕੋ – ਇਮੇ ਸਤ੍ਤ ਸਮਥਾ.
ਸਿਯਾ ਇਮੇ ਸਤ੍ਤ ਸਮਥਾ ਦਸ ਸਮਥਾ ਹੋਨ੍ਤਿ, ਦਸ ਸਮਥਾ ਸਤ੍ਤ ਸਮਥਾ ਹੋਨ੍ਤਿ ਵਤ੍ਥੁਵਸੇਨ ਪਰਿਯਾਯੇਨ ਸਿਯਾਤਿ.
ਕਥਞ੍ਚ ਸਿਯਾ? ਵਿਵਾਦਾਧਿਕਰਣਸ੍ਸ ਦ੍ਵੇ ਸਮਥਾ, ਅਨੁਵਾਦਾਧਿਕਰਣਸ੍ਸ ਚਤ੍ਤਾਰੋ ਸਮਥਾ, ਆਪਤ੍ਤਾਧਿਕਰਣਸ੍ਸ ਤਯੋ ਸਮਥਾ, ਕਿਚ੍ਚਾਧਿਕਰਣਸ੍ਸ ਏਕੋ ਸਮਥੋ. ਏਵਂ ਇਮੇ ਸਤ੍ਤ ਸਮਥਾ ਦਸ ਸਮਥਾ ਹੋਨ੍ਤਿ, ਦਸ ਸਮਥਾ ਸਤ੍ਤ ਸਮਥਾ ਹੋਨ੍ਤਿ ਵਤ੍ਥੁਵਸੇਨ ਪਰਿਯਾਯੇਨ.
ਪਰਿਯਾਯਵਾਰੋ ਨਿਟ੍ਠਿਤੋ ਛਟ੍ਠੋ.