੩. ਆਪਤ੍ਤਿਸਮੁਟ੍ਠਾਨਗਾਥਾ

੨੮੩. ਸਮੁਟ੍ਠਾਨਾ ਕਾਯਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਕਤਿ;

ਪੁਚ੍ਛਾਮਿ ਤਂ ਬ੍ਰੂਹਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਕਾਯਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਪਞ੍ਚ;

ਏਤਂ ਤੇ ਅਕ੍ਖਾਮਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਵਾਚਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਕਤਿ;

ਪੁਚ੍ਛਾਮਿ ਤਂ ਬ੍ਰੂਹਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਵਾਚਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਚਤਸ੍ਸੋ;

ਏਤਂ ਤੇ ਅਕ੍ਖਾਮਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਕਾਯਿਕਾ ਵਾਚਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਕਤਿ;

ਪੁਚ੍ਛਾਮਿ ਤਂ ਬ੍ਰੂਹਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਕਾਯਿਕਾ ਵਾਚਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਪਞ੍ਚ;

ਏਤਂ ਤੇ ਅਕ੍ਖਾਮਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਕਾਯਿਕਾ ਮਾਨਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਕਤਿ;

ਪੁਚ੍ਛਾਮਿ ਤਂ ਬ੍ਰੂਹਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਕਾਯਿਕਾ ਮਾਨਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਛ;

ਏਤਂ ਤੇ ਅਕ੍ਖਾਮਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਵਾਚਸਿਕਾ ਮਾਨਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਕਤਿ;

ਪੁਚ੍ਛਾਮਿ ਤਂ ਬ੍ਰੂਹਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਵਾਚਸਿਕਾ ਮਾਨਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਛ;

ਏਤਂ ਤੇ ਅਕ੍ਖਾਮਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਕਾਯਿਕਾ ਵਾਚਸਿਕਾ ਮਾਨਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਕਤਿ;

ਪੁਚ੍ਛਾਮਿ ਤਂ ਬ੍ਰੂਹਿ ਵਿਭਙ੍ਗਕੋਵਿਦ.

ਸਮੁਟ੍ਠਾਨਾ ਕਾਯਿਕਾ ਵਾਚਸਿਕਾ ਮਾਨਸਿਕਾ ਅਨਨ੍ਤਦਸ੍ਸਿਨਾ;

ਅਕ੍ਖਾਤਾ ਲੋਕਹਿਤੇਨ ਵਿਵੇਕਦਸ੍ਸਿਨਾ;

ਆਪਤ੍ਤਿਯੋ ਤੇਨ ਸਮੁਟ੍ਠਿਤਾ ਛ;

ਏਤਂ ਤੇ ਅਕ੍ਖਾਮਿ ਵਿਭਙ੍ਗਕੋਵਿਦਾਤਿ.

ਆਪਤ੍ਤਿਸਮੁਟ੍ਠਾਨਗਾਥਾ ਨਿਟ੍ਠਿਤਾ ਤਤਿਯਾ.