੧. ਪਾਰਾਜਿਕਂ

੪੭੦. ਅਤ੍ਥਾਪਤ੍ਤਿ ਅਚਿਤ੍ਤਕੋ ਆਪਜ੍ਜਤਿ, ਸਚਿਤ੍ਤਕੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਸਚਿਤ੍ਤਕੋ ਆਪਜ੍ਜਤਿ, ਅਚਿਤ੍ਤਕੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਚਿਤ੍ਤਕੋ ਆਪਜ੍ਜਤਿ, ਅਚਿਤ੍ਤਕੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਸਚਿਤ੍ਤਕੋ ਆਪਜ੍ਜਤਿ, ਸਚਿਤ੍ਤਕੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਕੁਸਲਚਿਤ੍ਤੋ ਆਪਜ੍ਜਤਿ, ਕੁਸਲਚਿਤ੍ਤੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਕੁਸਲਚਿਤ੍ਤੋ ਆਪਜ੍ਜਤਿ, ਅਕੁਸਲਚਿਤ੍ਤੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਕੁਸਲਚਿਤ੍ਤੋ ਆਪਜ੍ਜਤਿ, ਅਬ੍ਯਾਕਤਚਿਤ੍ਤੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਕੁਸਲਚਿਤ੍ਤੋ ਆਪਜ੍ਜਤਿ, ਕੁਸਲਚਿਤ੍ਤੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਕੁਸਲਚਿਤ੍ਤੋ ਆਪਜ੍ਜਤਿ, ਅਕੁਸਲਚਿਤ੍ਤੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਕੁਸਲਚਿਤ੍ਤੋ ਆਪਜ੍ਜਤਿ, ਅਬ੍ਯਾਕਤਚਿਤ੍ਤੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਬ੍ਯਾਕਤਚਿਤ੍ਤੋ ਆਪਜ੍ਜਤਿ, ਕੁਸਲਚਿਤ੍ਤੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਬ੍ਯਾਕਤਚਿਤ੍ਤੋ ਆਪਜ੍ਜਤਿ, ਅਕੁਸਲਚਿਤ੍ਤੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਬ੍ਯਾਕਤਚਿਤ੍ਤੋ ਆਪਜ੍ਜਤਿ, ਅਬ੍ਯਾਕਤਚਿਤ੍ਤੋ ਵੁਟ੍ਠਾਤਿ.

ਪਠਮਂ ਪਾਰਾਜਿਕਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ? ਪਠਮਂ ਪਾਰਾਜਿਕਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ. ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ.

ਦੁਤਿਯਂ ਪਾਰਾਜਿਕਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ? ਦੁਤਿਯਂ ਪਾਰਾਜਿਕਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ; ਸਿਯਾ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਕਾਯਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ.

ਤਤਿਯਂ ਪਾਰਾਜਿਕਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ? ਤਤਿਯਂ ਪਾਰਾਜਿਕਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ; ਸਿਯਾ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਕਾਯਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ.

ਚਤੁਤ੍ਥਂ ਪਾਰਾਜਿਕਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ? ਚਤੁਤ੍ਥਂ ਪਾਰਾਜਿਕਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ; ਸਿਯਾ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਕਾਯਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ.

ਚਤ੍ਤਾਰੋ ਪਾਰਾਜਿਕਾ ਨਿਟ੍ਠਿਤਾ.