੮. ਸਹਧਮ੍ਮਿਕਵਗ੍ਗੋ

੧੭੨. ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ – ‘‘ਨ ਤਾਵਾਹਂ, ਆਵੁਸੋ, ਏਤਸ੍ਮਿਂ ਸਿਕ੍ਖਾਪਦੇ ਸਿਕ੍ਖਿਸ੍ਸਾਮਿ ਯਾਵ ਨ ਅਞ੍ਞਂ ਭਿਕ੍ਖੁਂ ਬ੍ਯਤ੍ਤਂ ਵਿਨਯਧਰਂ ਪਰਿਪੁਚ੍ਛਿਸ੍ਸਾਮੀ’’ਤਿ ਭਣਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਭਣਤਿ, ਪਯੋਗੇ ਦੁਕ੍ਕਟਂ; ਭਣਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਵਿਨਯਂ ਵਿਵਣ੍ਣੇਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਵਿਵਣ੍ਣੇਤਿ, ਪਯੋਗੇ ਦੁਕ੍ਕਟਂ; ਵਿਵਣ੍ਣਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਮੋਹੇਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਅਨਾਰੋਪਿਤੇ ਮੋਹੇ ਮੋਹੇਤਿ, ਆਪਤ੍ਤਿ ਦੁਕ੍ਕਟਸ੍ਸ; ਆਰੋਪਿਤੇ ਮੋਹੇ ਮੋਹੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਭਿਕ੍ਖੁਸ੍ਸ ਕੁਪਿਤੋ ਅਨਤ੍ਤਮਨੋ ਪਹਾਰਂ ਦੇਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਪਹਰਤਿ, ਪਯੋਗੇ ਦੁਕ੍ਕਟਂ; ਪਹਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਭਿਕ੍ਖੁਸ੍ਸ ਕੁਪਿਤੋ ਅਨਤ੍ਤਮਨੋ ਤਲਸਤ੍ਤਿਕਂ ਉਗ੍ਗਿਰਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਉਗ੍ਗਿਰਤਿ, ਪਯੋਗੇ ਦੁਕ੍ਕਟਂ; ਉਗ੍ਗਿਰਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਭਿਕ੍ਖੁਂ ਅਮੂਲਕੇਨ ਸਙ੍ਘਾਦਿਸੇਸੇਨ ਅਨੁਦ੍ਧਂਸੇਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਅਨੁਦ੍ਧਂਸੇਤਿ, ਪਯੋਗੇ ਦੁਕ੍ਕਟਂ; ਅਨੁਦ੍ਧਂਸਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਭਿਕ੍ਖੁਸ੍ਸ ਸਞ੍ਚਿਚ੍ਚ ਕੁਕ੍ਕੁਚ੍ਚਂ ਉਪਦਹਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਉਪਦਹਤਿ, ਪਯੋਗੇ ਦੁਕ੍ਕਟਂ; ਉਪਦਹਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਭਿਕ੍ਖੂਨਂ ਭਣ੍ਡਨਜਾਤਾਨਂ ਕਲਹਜਾਤਾਨਂ ਵਿਵਾਦਾਪਨ੍ਨਾਨਂ ਉਪਸ੍ਸੁਤਿਂ ਤਿਟ੍ਠਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ‘‘ਸੋਸ੍ਸਾਮੀ’’ਤਿ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ; ਯਤ੍ਥ ਠਿਤੋ ਸੁਣਾਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਧਮ੍ਮਿਕਾਨਂ ਕਮ੍ਮਾਨਂ ਛਨ੍ਦਂ ਦਤ੍ਵਾ ਪਚ੍ਛਾ ਖੀਯਨਧਮ੍ਮਂ ਆਪਜ੍ਜਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਖਿਯ੍ਯਤਿ, ਪਯੋਗੇ ਦੁਕ੍ਕਟਂ; ਖਿਯ੍ਯਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਸਙ੍ਘੇ ਵਿਨਿਚ੍ਛਯਕਥਾਯ ਵਤ੍ਤਮਾਨਾਯ ਛਨ੍ਦਂ ਅਦਤ੍ਵਾ ਉਟ੍ਠਾਯਾਸਨਾ ਪਕ੍ਕਮਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਪਰਿਸਾਯ ਹਤ੍ਥਪਾਸਂ ਵਿਜਹਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ; ਵਿਜਹਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਸਮਗ੍ਗੇਨ ਸਙ੍ਘੇਨ ਚੀਵਰਂ ਦਤ੍ਵਾ ਪਚ੍ਛਾ ਖੀਯਨਧਮ੍ਮਂ ਆਪਜ੍ਜਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਖਿਯ੍ਯਤਿ, ਪਯੋਗੇ ਦੁਕ੍ਕਟਂ; ਖਿਯ੍ਯਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਜਾਨਂ ਸਙ੍ਘਿਕਂ ਲਾਭਂ ਪਰਿਣਤਂ ਪੁਗ੍ਗਲਸ੍ਸ ਪਰਿਣਾਮੇਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਪਰਿਣਾਮੇਤਿ, ਪਯੋਗੇ ਦੁਕ੍ਕਟਂ; ਪਰਿਣਾਮਿਤੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਸਹਧਮ੍ਮਿਕਵਗ੍ਗੋ ਅਟ੍ਠਮੋ.