੩. ਨਹਾਨਵਗ੍ਗੋ

੨੩੩. ਨਗ੍ਗਾ ਨਹਾਯਨ੍ਤੀ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਨਹਾਯਤਿ, ਪਯੋਗੇ ਦੁਕ੍ਕਟਂ; ਨਹਾਨਪਰਿਯੋਸਾਨੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਪਮਾਣਾਤਿਕ੍ਕਨ੍ਤਂ ਉਦਕਸਾਟਿਕਂ ਕਾਰਾਪੇਨ੍ਤੀ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਕਾਰਾਪੇਤਿ, ਪਯੋਗੇ ਦੁਕ੍ਕਟਂ; ਕਾਰਾਪਿਤੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਭਿਕ੍ਖੁਨਿਯਾ ਚੀਵਰਂ ਵਿਸਿਬ੍ਬੇਤ੍ਵਾ ਵਾ ਵਿਸਿਬ੍ਬਾਪੇਤ੍ਵਾ ਵਾ ਨੇਵ ਸਿਬ੍ਬੇਨ੍ਤੀ ਨ ਸਿਬ੍ਬਾਪਨਾਯ ਉਸ੍ਸੁਕ੍ਕਂ ਕਰੋਨ੍ਤੀ ਏਕਂ ਆਪਤ੍ਤਿਂ ਆਪਜ੍ਜਤਿ. ਪਾਚਿਤ੍ਤਿਯਂ.

ਪਞ੍ਚਾਹਿਕਂ ਸਙ੍ਘਾਟਿਚਾਰਂ ਅਤਿਕ੍ਕਾਮੇਨ੍ਤੀ ਏਕਂ ਆਪਤ੍ਤਿਂ ਆਪਜ੍ਜਤਿ. ਪਾਚਿਤ੍ਤਿਯਂ. ਚੀਵਰਸਙ੍ਕਮਨੀਯਂ ਧਾਰੇਨ੍ਤੀ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਧਾਰੇਤਿ, ਪਯੋਗੇ ਦੁਕ੍ਕਟਂ; ਧਾਰਿਤੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਗਣਸ੍ਸ ਚੀਵਰਲਾਭਂ ਅਨ੍ਤਰਾਯਂ ਕਰੋਨ੍ਤੀ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਕਰੋਤਿ, ਪਯੋਗੇ ਦੁਕ੍ਕਟਂ; ਕਤੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਧਮ੍ਮਿਕਂ ਚੀਵਰਵਿਭਙ੍ਗਂ ਪਟਿਬਾਹਨ੍ਤੀ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਪਟਿਬਾਹਤਿ, ਪਯੋਗੇ ਦੁਕ੍ਕਟਂ; ਪਟਿਬਾਹਿਤੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਅਗਾਰਿਕਸ੍ਸ ਵਾ ਪਰਿਬ੍ਬਾਜਕਸ੍ਸ ਵਾ ਪਰਿਬ੍ਬਾਜਿਕਾਯ ਵਾ ਸਮਣਚੀਵਰਂ ਦੇਨ੍ਤੀ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਦੇਤਿ, ਪਯੋਗੇ ਦੁਕ੍ਕਟਂ; ਦਿਨ੍ਨੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਦੁਬ੍ਬਲਚੀਵਰਪਚ੍ਚਾਸਾ ਚੀਵਰਕਾਲਸਮਯਂ ਅਤਿਕ੍ਕਾਮੇਨ੍ਤੀ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਅਤਿਕ੍ਕਾਮੇਤਿ, ਪਯੋਗੇ ਦੁਕ੍ਕਟਂ; ਅਤਿਕ੍ਕਾਮਿਤੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਧਮ੍ਮਿਕਂ ਕਥਿਨੁਦ੍ਧਾਰਂ ਪਟਿਬਾਹਨ੍ਤੀ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਪਟਿਬਾਹਤਿ, ਪਯੋਗੇ ਦੁਕ੍ਕਟਂ; ਪਟਿਬਾਹਿਤੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਨਹਾਨਵਗ੍ਗੋ ਤਤਿਯੋ.