੧. ਪਾਰਾਜਿਕਕਣ੍ਡਂ

੨੪੯. ਕਾਯਸਂਸਗ੍ਗਂ ਸਾਦਿਯਨਪਚ੍ਚਯਾ ਕਤਿ ਆਪਤ੍ਤਿਯੋ ਆਪਜ੍ਜਤਿ? ਕਾਯਸਂਸਗ੍ਗਂ ਸਾਦਿਯਨਪਚ੍ਚਯਾ ਪਞ੍ਚ ਆਪਤ੍ਤਿਯੋ ਆਪਜ੍ਜਤਿ. ਅਵਸ੍ਸੁਤਾ ਭਿਕ੍ਖੁਨੀ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਗਹਣਂ ਸਾਦਿਯਤਿ, ਆਪਤ੍ਤਿ ਪਾਰਾਜਿਕਸ੍ਸ; ਭਿਕ੍ਖੁ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ; ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ; ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ; ਅਙ੍ਗੁਲਿਪਤੋਦਕੇ ਪਾਚਿਤ੍ਤਿਯਂ – ਕਾਯਸਂਸਗ੍ਗਂ ਸਾਦਿਯਨਪਚ੍ਚਯਾ ਇਮਾ ਪਞ੍ਚ ਆਪਤ੍ਤਿਯੋ ਆਪਜ੍ਜਤਿ.

ਵਜ੍ਜਪ੍ਪਟਿਚ੍ਛਾਦਨਪਚ੍ਚਯਾ ਕਤਿ ਆਪਤ੍ਤਿਯੋ ਆਪਜ੍ਜਤਿ? ਵਜ੍ਜਪ੍ਪਟਿਚ੍ਛਾਦਨਪਚ੍ਚਯਾ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤਿ. ਭਿਕ੍ਖੁਨੀ ਜਾਨਂ ਪਾਰਾਜਿਕਂ ਧਮ੍ਮਂ [ਧਮ੍ਮਂ ਅਜ੍ਝਾਪਨ੍ਨਂ (ਸ੍ਯਾ.)] ਪਟਿਚ੍ਛਾਦੇਤਿ, ਆਪਤ੍ਤਿ ਪਾਰਾਜਿਕਸ੍ਸ; ਵੇਮਤਿਕਾ ਪਟਿਚ੍ਛਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ; ਭਿਕ੍ਖੁ ਸਙ੍ਘਾਦਿਸੇਸਂ ਪਟਿਚ੍ਛਾਦੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ; ਆਚਾਰਵਿਪਤ੍ਤਿਂ ਪਟਿਚ੍ਛਾਦੇਤਿ, ਆਪਤ੍ਤਿ ਦੁਕ੍ਕਟਸ੍ਸ – ਵਜ੍ਜਪ੍ਪਟਿਚ੍ਛਾਦਨਪਚ੍ਚਯਾ ਇਮਾ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤਿ.

ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨਪਚ੍ਚਯਾ ਕਤਿ ਆਪਤ੍ਤਿਯੋ ਆਪਜ੍ਜਤਿ? ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨਪਚ੍ਚਯਾ ਪਞ੍ਚ ਆਪਤ੍ਤਿਯੋ ਆਪਜ੍ਜਤਿ. ਉਕ੍ਖਿਤ੍ਤਾਨੁਵਤ੍ਤਿਕਾ ਭਿਕ੍ਖੁਨੀ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਤਿ, ਞਤ੍ਤਿਯਾ ਦੁਕ੍ਕਟਂ; ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ; ਕਮ੍ਮਵਾਚਾਪਰਿਯੋਸਾਨੇ ਆਪਤ੍ਤਿ ਪਾਰਾਜਿਕਸ੍ਸ; ਭੇਦਕਾਨੁਵਤ੍ਤਿਕਾ ਭਿਕ੍ਖੁਨੀ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ; ਪਾਪਿਕਾਯ ਦਿਟ੍ਠਿਯਾ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ – ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨਪਚ੍ਚਯਾ ਇਮਾ ਪਞ੍ਚ ਆਪਤ੍ਤਿਯੋ ਆਪਜ੍ਜਤਿ.

ਅਟ੍ਠਮਂ ਵਤ੍ਥੁਂ ਪਰਿਪੂਰਣਪਚ੍ਚਯਾ ਕਤਿ ਆਪਤ੍ਤਿਯੋ ਆਪਜ੍ਜਤਿ? ਅਟ੍ਠਮਂ ਵਤ੍ਥੁਂ ਪਰਿਪੂਰਣਪਚ੍ਚਯਾ ਤਿਸ੍ਸੋ ਆਪਤ੍ਤਿਯੋ ਆਪਜ੍ਜਤਿ. ਪੁਰਿਸੇਨ – ‘‘ਇਤ੍ਥਨ੍ਨਾਮਂ ਓਕਾਸਂ ਆਗਚ੍ਛਾ’’ਤਿ ਵੁਤ੍ਤਾ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ; ਪੁਰਿਸਸ੍ਸ ਹਤ੍ਥਪਾਸਂ ਓਕ੍ਕਨ੍ਤਮਤ੍ਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸ; ਅਟ੍ਠਮਂ ਵਤ੍ਥੁਂ ਪਰਿਪੂਰੇਤਿ, ਆਪਤ੍ਤਿ ਪਾਰਾਜਿਕਸ੍ਸ – ਅਟ੍ਠਮਂ ਵਤ੍ਥੁਂ ਪਰਿਪੂਰਣਪਚ੍ਚਯਾ ਇਮਾ ਤਿਸ੍ਸੋ ਆਪਤ੍ਤਿਯੋ ਆਪਜ੍ਜਤਿ.

ਪਾਰਾਜਿਕਾ ਨਿਟ੍ਠਿਤਾ.