੨. ਸਙ੍ਘਾਦਿਸੇਸਕਣ੍ਡਂ

੨੦੬. ਯਂ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਉਸ੍ਸਯਵਾਦਿਕਾਯ ਭਿਕ੍ਖੁਨਿਯਾ ਅਡ੍ਡਂ ਕਰੋਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋ? ਕਂ ਆਰਬ੍ਭ? ਕਿਸ੍ਮਿਂ ਵਤ੍ਥੁਸ੍ਮਿਂ…ਪੇ… ਕੇਨਾਭਤਨ੍ਤਿ?

੨੦੭. ਯਂ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਉਸ੍ਸਯਵਾਦਿਕਾਯ ਭਿਕ੍ਖੁਨਿਯਾ ਅਡ੍ਡਂ ਕਰੋਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਥੁਲ੍ਲਨਨ੍ਦਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਥੁਲ੍ਲਨਨ੍ਦਾ ਭਿਕ੍ਖੁਨੀ ਉਸ੍ਸਯਵਾਦਿਕਾ ਵਿਹਰਿ, ਤਸ੍ਮਿਂ ਵਤ੍ਥੁਸ੍ਮਿਂ. ਅਤ੍ਥਿ ਤਤ੍ਥ ਪਞ੍ਞਤ੍ਤਿ, ਅਨੁਪਞ੍ਞਤ੍ਤਿ, ਅਨੁਪ੍ਪਨ੍ਨਪਞ੍ਞਤ੍ਤੀਤਿ? ਏਕਾ ਪਞ੍ਞਤ੍ਤਿ. ਅਨੁਪਞ੍ਞਤ੍ਤਿ ਅਨੁਪ੍ਪਨ੍ਨਪਞ੍ਞਤ੍ਤਿ ਤਸ੍ਮਿਂ ਨਤ੍ਥਿ. ਸਬ੍ਬਤ੍ਥਪਞ੍ਞਤ੍ਤਿ, ਪਦੇਸਪਞ੍ਞਤ੍ਤੀਤਿ? ਸਬ੍ਬਤ੍ਥਪਞ੍ਞਤ੍ਤਿ. ਸਾਧਾਰਣਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤੀਤਿ? ਅਸਾਧਾਰਣਪਞ੍ਞਤ੍ਤਿ. ਏਕਤੋਪਞ੍ਞਤ੍ਤਿ, ਉਭਤੋਪਞ੍ਞਤ੍ਤੀਤਿ? ਏਕਤੋਪਞ੍ਞਤ੍ਤਿ. ਚਤੁਨ੍ਨਂ ਪਾਤਿਮੋਕ੍ਖੁਦ੍ਦੇਸਾਨਂ ਕਤ੍ਥੋਗਧਂ ਕਤ੍ਥ ਪਰਿਯਾਪਨ੍ਨਨ੍ਤਿ? ਨਿਦਾਨੋਗਧਂ ਨਿਦਾਨਪਰਿਯਾਪਨ੍ਨਂ. ਕਤਮੇਨ ਉਦ੍ਦੇਸੇਨ ਉਦ੍ਦੇਸਂ ਆਗਚ੍ਛਤੀਤਿ? ਤਤਿਯੇਨ ਉਦ੍ਦੇਸੇਨ ਉਦ੍ਦੇਸਂ ਆਗਚ੍ਛਤਿ. ਚਤੁਨ੍ਨਂ ਵਿਪਤ੍ਤੀਨਂ ਕਤਮਾ ਵਿਪਤ੍ਤੀਤਿ? ਸੀਲਵਿਪਤ੍ਤਿ. ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਕਤਮੋ ਆਪਤ੍ਤਿਕ੍ਖਨ੍ਧੋਤਿ? ਸਙ੍ਘਾਦਿਸੇਸਾਪਤ੍ਤਿਕ੍ਖਨ੍ਧੋ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤੀਤਿ? ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਕਾਯਤੋ ਚ ਵਾਚਤੋ ਚ ਸਮੁਟ੍ਠਾਤਿ, ਨ ਚਿਤ੍ਤਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ… ਕੇਨਾਭਤਨ੍ਤਿ? ਪਰਮ੍ਪਰਾਭਤਂ –

ਉਪਾਲਿ ਦਾਸਕੋ ਚੇਵ, ਸੋਣਕੋ ਸਿਗ੍ਗਵੋ ਤਥਾ;

ਮੋਗ੍ਗਲਿਪੁਤ੍ਤੇਨ ਪਞ੍ਚਮਾ, ਏਤੇ ਜਮ੍ਬੁਸਿਰਿਵ੍ਹਯੇ. …ਪੇ…;

ਏਤੇ ਨਾਗਾ ਮਹਾਪਞ੍ਞਾ, ਵਿਨਯਞ੍ਞੂ ਮਗ੍ਗਕੋਵਿਦਾ;

ਵਿਨਯਂ ਦੀਪੇ ਪਕਾਸੇਸੁਂ, ਪਿਟਕਂ ਤਮ੍ਬਪਣ੍ਣਿਯਾਤਿ.

੨੦੮. ਚੋਰਿਂ ਵੁਟ੍ਠਾਪੇਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਥੁਲ੍ਲਨਨ੍ਦਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਥੁਲ੍ਲਨਨ੍ਦਾ ਭਿਕ੍ਖੁਨੀ ਚੋਰਿਂ ਵੁਟ੍ਠਾਪੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਕਾਯਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ….

੨੦੯. ਏਕਾਯ ਗਾਮਨ੍ਤਰਂ ਗਚ੍ਛਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਅਞ੍ਞਤਰਾ ਭਿਕ੍ਖੁਨੀ ਏਕਾ ਗਾਮਨ੍ਤਰਂ ਗਚ੍ਛਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ, ਤਿਸ੍ਸੋ ਅਨੁਪਞ੍ਞਤ੍ਤਿਯੋ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਪਠਮਪਾਰਾਜਿਕੇ…ਪੇ….

੨੧੦. ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਭਿਕ੍ਖੁਨਿਂ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਅਨਪਲੋਕੇਤ੍ਵਾ ਕਾਰਕਸਙ੍ਘਂ ਅਨਞ੍ਞਾਯ ਗਣਸ੍ਸ ਛਨ੍ਦਂ ਓਸਾਰੇਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਥੁਲ੍ਲਨਨ੍ਦਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਥੁਲ੍ਲਨਨ੍ਦਾ ਭਿਕ੍ਖੁਨੀ ਸਮਗ੍ਗੇਨ ਸਙ੍ਘੇਨ ਉਕ੍ਖਿਤ੍ਤਂ ਭਿਕ੍ਖੁਨਿਂ ਧਮ੍ਮੇਨ ਵਿਨਯੇਨ ਸਤ੍ਥੁਸਾਸਨੇਨ ਅਨਪਲੋਕੇਤ੍ਵਾ ਕਾਰਕਸਙ੍ਘਂ ਅਨਞ੍ਞਾਯ ਗਣਸ੍ਸ ਛਨ੍ਦਂ ਓਸਾਰੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਧੁਰਨਿਕ੍ਖੇਪੇ…ਪੇ….

੨੧੧. ਅਵਸ੍ਸੁਤਾਯ ਭਿਕ੍ਖੁਨਿਯਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਹਤ੍ਥਤੋ ਖਾਦਨੀਯਂ ਵਾ ਭੋਜਨੀਯਂ ਵਾ ਸਹਤ੍ਥਾ ਪਟਿਗ੍ਗਹੇਤ੍ਵਾ ਭੁਞ੍ਜਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਹਤ੍ਥਤੋ ਆਮਿਸਂ ਪਟਿਗ੍ਗਹੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਪਠਮਪਾਰਾਜਿਕੇ…ਪੇ….

੨੧੨. ‘‘ਕਿਂ ਤੇ, ਅਯ੍ਯੇ, ਏਸੋ ਪੁਰਿਸਪੁਗ੍ਗਲੋ ਕਰਿਸ੍ਸਤਿ ਅਵਸ੍ਸੁਤੋ ਵਾ ਅਨਵਸ੍ਸੁਤੋ ਵਾ, ਯਤੋ ਤ੍ਵਂ ਅਨਵਸ੍ਸੁਤਾ! ਇਙ੍ਘ, ਅਯ੍ਯੇ, ਯਂ ਤੇ ਏਸੋ ਪੁਰਿਸਪੁਗ੍ਗਲੋ ਦੇਤਿ ਖਾਦਨੀਯਂ ਵਾ ਭੋਜਨੀਯਂ ਵਾ, ਤਂ ਤ੍ਵਂ ਸਹਤ੍ਥਾ ਪਟਿਗ੍ਗਹੇਤ੍ਵਾ ਖਾਦ ਵਾ ਭੁਞ੍ਜ ਵਾ’’ਤਿ ਉਯ੍ਯੋਜੇਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਅਰਬ੍ਭਾਤਿ? ਅਞ੍ਞਤਰਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਅਞ੍ਞਤਰਾ ਭਿਕ੍ਖੁਨੀ –‘‘ਕਿਂ ਤੇ, ਅਯ੍ਯੇ, ਏਸੋ ਪੁਰਿਸਪੁਗ੍ਗਲੋ ਕਰਿਸ੍ਸਤਿ ਅਵਸ੍ਸੁਤੋ ਵਾ ਅਨਵਸ੍ਸੁਤੋ ਵਾ, ਯਤੋ ਤ੍ਵਂ ਅਨਵਸ੍ਸੁਤਾ! ਇਙ੍ਘ, ਅਯ੍ਯੇ, ਯਂ ਤੇ ਏਸੋ ਪੁਰਿਸਪੁਗ੍ਗਲੋ ਦੇਤਿ ਖਾਦਨੀਯਂ ਵਾ ਭੋਜਨੀਯਂ ਵਾ, ਤਂ ਤ੍ਵਂ ਸਹਤ੍ਥਾ ਪਟਿਗ੍ਗਹੇਤ੍ਵਾ ਖਾਦ ਵਾ ਭੁਞ੍ਜ ਵਾ’’ਤਿ ਉਯ੍ਯੋਜੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੨੧੩. ਕੁਪਿਤਾਯ ਅਨਤ੍ਤਮਨਾਯ ਭਿਕ੍ਖੁਨਿਯਾ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਚਣ੍ਡਕਾਲ਼ਿਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਚਣ੍ਡਕਾਲ਼ੀ ਭਿਕ੍ਖੁਨੀ ਕੁਪਿਤਾ ਅਨਤ੍ਤਮਨਾ ਏਵਂ ਅਵਚ – ‘‘ਬੁਦ੍ਧਂ ਪਚ੍ਚਾਚਿਕ੍ਖਾਮਿ, ਧਮ੍ਮਂ ਪਚ੍ਚਾਚਿਕ੍ਖਾਮਿ, ਸਙ੍ਘਂ ਪਚ੍ਚਾਚਿਕ੍ਖਾਮਿ, ਸਿਕ੍ਖਂ ਪਚ੍ਚਾਚਿਕ੍ਖਾਮੀ’’ਤਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਧੁਰਨਿਕ੍ਖੇਪੇ…ਪੇ….

੨੧੪. ਕਿਸ੍ਮਿਞ੍ਚਿਦੇਵ ਅਧਿਕਰਣੇ ਪਚ੍ਚਾਕਤਾਯ ਭਿਕ੍ਖੁਨਿਯਾ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਚਣ੍ਡਕਾਲ਼ਿਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਚਣ੍ਡਕਾਲ਼ੀ ਭਿਕ੍ਖੁਨੀ ਕਿਸ੍ਮਿਞ੍ਚਿਦੇਵ ਅਧਿਕਰਣੇ ਪਚ੍ਚਾਕਤਾ ਕੁਪਿਤਾ ਅਨਤ੍ਤਮਨਾ ਏਵਂ ਅਵਚ – ‘‘ਛਨ੍ਦਗਾਮਿਨਿਯੋ ਚ ਭਿਕ੍ਖੁਨਿਯੋ, ਦੋਸਗਾਮਿਨਿਯੋ ਚ ਭਿਕ੍ਖੁਨਿਯੋ, ਮੋਹਗਾਮਿਨਿਯੋ ਚ ਭਿਕ੍ਖੁਨਿਯੋ, ਭਯਗਾਮਿਨਿਯੋ ਚ ਭਿਕ੍ਖੁਨਿਯੋ’’ਤਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਧੁਰਨਿਕ੍ਖੇਪੇ…ਪੇ….

੨੧੫. ਸਂਸਟ੍ਠਾਨਂ ਭਿਕ੍ਖੁਨੀਨਂ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤੀਨਂ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਸਮ੍ਬਹੁਲਾ ਭਿਕ੍ਖੁਨਿਯੋ ਸਂਸਟ੍ਠਾ ਵਿਹਰਿਂਸੁ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਧੁਰਨਿਕ੍ਖੇਪੇ…ਪੇ….

੨੧੬. ‘‘ਸਂਸਟ੍ਠਾਵ, ਅਯ੍ਯੇ, ਤੁਮ੍ਹੇ ਵਿਹਰਥ. ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥਾ’’ਤਿ ਉਯ੍ਯੋਜੇਨ੍ਤਿਯਾ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤਿਯਾ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਥੁਲ੍ਲਨਨ੍ਦਂ ਭਿਕ੍ਖੁਨਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਥੁਲ੍ਲਨਨ੍ਦਾ ਭਿਕ੍ਖੁਨੀ – ‘‘ਸਂਸਟ੍ਠਾਵ ਅਯ੍ਯੇ, ਤੁਮ੍ਹੇ ਵਿਹਰਥ, ਮਾ ਤੁਮ੍ਹੇ ਨਾਨਾ ਵਿਹਰਿਤ੍ਥਾ’’ਤਿ ਉਯ੍ਯੋਜੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਧੁਰਨਿਕ੍ਖੇਪੇ…ਪੇ….

ਦਸ ਸਙ੍ਘਾਦਿਸੇਸਾ ਨਿਟ੍ਠਿਤਾ.

ਤਸ੍ਸੁਦ੍ਦਾਨਂ –

ਉਸ੍ਸਯਚੋਰਿ ਗਾਮਨ੍ਤਂ, ਉਕ੍ਖਿਤ੍ਤਂ ਖਾਦਨੇਨ ਚ;

ਕਿਂ ਤੇ ਕੁਪਿਤਾ ਕਿਸ੍ਮਿਞ੍ਚਿ, ਸਂਸਟ੍ਠਾ ਞਾਯਤੇ ਦਸਾਤਿ.