੨. ਸਙ੍ਘਾਦਿਸੇਸਕਣ੍ਡਂ

੭. ਯਂ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਉਪਕ੍ਕਮਿਤ੍ਵਾ ਅਸੁਚਿਂ ਮੋਚੇਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋ? ਕਂ ਆਰਬ੍ਭ? ਕਿਸ੍ਮਿਂ ਵਤ੍ਥੁਸ੍ਮਿਂ? ਅਤ੍ਥਿ ਤਤ੍ਥ ਪਞ੍ਞਤ੍ਤਿ, ਅਨੁਪਞ੍ਞਤ੍ਤਿ, ਅਨੁਪ੍ਪਨ੍ਨਪਞ੍ਞਤ੍ਤਿ? ਸਬ੍ਬਤ੍ਥਪਞ੍ਞਤ੍ਤਿ, ਪਦੇਸਪਞ੍ਞਤ੍ਤਿ? ਸਾਧਾਰਣਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ? ਏਕਤੋਪਞ੍ਞਤ੍ਤਿ, ਉਭਤੋਪਞ੍ਞਤ੍ਤਿ? ਪਞ੍ਚਨ੍ਨਂ ਪਾਤਿਮੋਕ੍ਖੁਦ੍ਦੇਸਾਨਂ ਕਤ੍ਥੋਗਧਂ ਕਤ੍ਥ ਪਰਿਯਾਪਨ੍ਨਂ? ਕਤਮੇਨ ਉਦ੍ਦੇਸੇਨ ਉਦ੍ਦੇਸਂ ਆਗਚ੍ਛਤਿ? ਚਤੁਨ੍ਨਂ ਵਿਪਤ੍ਤੀਨਂ ਕਤਮਾ ਵਿਪਤ੍ਤਿ? ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਕਤਮੋ ਆਪਤ੍ਤਿਕ੍ਖਨ੍ਧੋ? ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ? ਚਤੁਨ੍ਨਂ ਅਧਿਕਰਣਾਨਂ ਕਤਮਂ ਅਧਿਕਰਣਂ? ਸਤ੍ਤਨ੍ਨਂ ਸਮਥਾਨਂ ਕਤਿਹਿ ਸਮਥੇਹਿ ਸਮ੍ਮਤਿ? ਕੋ ਤਤ੍ਥ ਵਿਨਯੋ, ਕੋ ਤਤ੍ਥ ਅਭਿਵਿਨਯੋ? ਕਿਂ ਤਤ੍ਥ ਪਾਤਿਮੋਕ੍ਖਂ, ਕਿਂ ਤਤ੍ਥ ਅਧਿਪਾਤਿਮੋਕ੍ਖਂ? ਕਾ ਵਿਪਤ੍ਤਿ, ਕਾ ਸਮ੍ਪਤ੍ਤਿ, ਕਾ ਪਟਿਪਤ੍ਤਿ? ਕਤਿ ਅਤ੍ਥਵਸੇ ਪਟਿਚ੍ਚ ਭਗਵਤਾ ਉਪਕ੍ਕਮਿਤ੍ਵਾ ਅਸੁਚਿਂ ਮੋਚੇਨ੍ਤਸ੍ਸ ਸਙ੍ਘਾਦਿਸੇਸੋ ਪਞ੍ਞਤ੍ਤੋ? ਕੇ ਸਿਕ੍ਖਨ੍ਤਿ, ਕੇ ਸਿਕ੍ਖਿਤਸਿਕ੍ਖਾ? ਕਤ੍ਥ ਠਿਤਂ? ਕੇ ਧਾਰੇਨ੍ਤਿ? ਕਸ੍ਸ ਵਚਨਂ? ਕੇਨਾਭਤਨ੍ਤਿ?

੮. ਯਂ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਉਪਕ੍ਕਮਿਤ੍ਵਾ ਅਸੁਚਿਂ ਮੋਚੇਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਸੇਯ੍ਯਸਕਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਸੇਯ੍ਯਸਕੋ ਹਤ੍ਥੇਨ ਉਪਕ੍ਕਮਿਤ੍ਵਾ ਅਸੁਚਿਂ ਮੋਚੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਅਤ੍ਥਿ ਤਤ੍ਥ ਪਞ੍ਞਤ੍ਤਿ, ਅਨੁਪਞ੍ਞਤ੍ਤਿ, ਅਨੁਪ੍ਪਨ੍ਨਪਞ੍ਞਤ੍ਤੀਤਿ? ਏਕਾ ਪਞ੍ਞਤ੍ਤਿ, ਏਕਾ ਅਨੁਪਞ੍ਞਤ੍ਤਿ. ਅਨੁਪ੍ਪਨ੍ਨਪਞ੍ਞਤ੍ਤਿ ਤਸ੍ਮਿਂ ਨਤ੍ਥਿ. ਸਬ੍ਬਤ੍ਥ ਪਞ੍ਞਤ੍ਤਿ, ਪਦੇਸਪਞ੍ਞਤ੍ਤੀਤਿ? ਸਬ੍ਬਤ੍ਥਪਞ੍ਞਤ੍ਤਿ. ਸਾਧਾਰਣਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤੀਤਿ? ਅਸਾਧਾਰਣਪਞ੍ਞਤ੍ਤਿ. ਏਕਤੋਪਞ੍ਞਤ੍ਤਿ, ਉਭਤੋਪਞ੍ਞਤ੍ਤੀਤਿ? ਏਕਤੋਪਞ੍ਞਤ੍ਤਿ. ਪਞ੍ਚਨ੍ਨਂ ਪਾਤਿਮੋਕ੍ਖੁਦ੍ਦੇਸਾਨਂ ਕਤ੍ਥੋਗਧਂ ਕਤ੍ਥ ਪਰਿਯਾਪਨ੍ਨਨ੍ਤਿ? ਨਿਦਾਨੋਗਧਂ ਨਿਦਾਨਪਰਿਯਾਪਨ੍ਨਂ. ਕਤਮੇਨ ਉਦ੍ਦੇਸੇਨ ਉਦ੍ਦੇਸਂ ਆਗਚ੍ਛਤੀਤਿ? ਤਤਿਯੇ ਉਦ੍ਦੇਸੇਨ ਉਦ੍ਦੇਸਂ ਆਗਚ੍ਛਤਿ. ਚਤੁਨ੍ਨਂ ਵਿਪਤ੍ਤੀਨਂ ਕਤਮਾ ਵਿਪਤ੍ਤੀਤਿ? ਸੀਲਵਿਪਤ੍ਤਿ. ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਕਤਮੋ ਆਪਤ੍ਤਿਕ੍ਖਨ੍ਧੋਤਿ? ਸਙ੍ਘਾਦਿਸੇਸੋ ਆਪਤ੍ਤਿਕ੍ਖਨ੍ਧੋ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤੀਤਿ? ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ. ਚਤੁਨ੍ਨਂ ਅਧਿਕਰਣਾਨਂ ਕਤਮਂ ਅਧਿਕਰਣਨ੍ਤਿ? ਆਪਤ੍ਤਾਧਿਕਰਣਂ. ਸਤ੍ਤਨ੍ਨਂ ਸਮਥਾਨਂ ਕਤਿਹਿ ਸਮਥੇਹਿ ਸਮ੍ਮਤੀਤਿ? ਦ੍ਵੀਹਿ ਸਮਥੇਹਿ ਸਮ੍ਮਤਿ – ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ. ਕੋ ਤਤ੍ਥ ਵਿਨਯੋ, ਕੋ ਤਤ੍ਥ ਅਭਿਵਿਨਯੋਤਿ? ਪਞ੍ਞਤ੍ਤਿ ਵਿਨਯੋ, ਵਿਭਤ੍ਤਿ ਅਭਿਵਿਨਯੋ. ਕਿਂ ਤਤ੍ਥ ਪਾਤਿਮੋਕ੍ਖਂ, ਕਿਂ ਤਤ੍ਥ ਅਧਿਪਾਤਿਮੋਕ੍ਖਨ੍ਤਿ? ਪਞ੍ਞਤ੍ਤਿ ਪਾਤਿਮੋਕ੍ਖਂ, ਵਿਭਤ੍ਤਿ ਅਧਿਪਾਤਿਮੋਕ੍ਖਂ. ਕਾ ਵਿਪਤ੍ਤੀਤਿ? ਅਸਂਵਰੋ ਵਿਪਤ੍ਤਿ. ਕਾ ਸਮ੍ਪਤ੍ਤੀਤਿ? ਸਂਵਰੋ ਸਮ੍ਪਤ੍ਤਿ. ਕਾ ਪਟਿਪਤ੍ਤੀਤਿ? ਨ ਏਵਰੂਪਂ ਕਰਿਸ੍ਸਾਮੀਤਿ ਯਾਵਜੀਵਂ ਆਪਾਣਕੋਟਿਕਂ ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੁ. [ਅ. ਨਿ. ੧੦.੩੧] ਕਤਿ ਅਤ੍ਥਵਸੇ ਪਟਿਚ੍ਚ ਭਗਵਤਾ ਉਪਕ੍ਕਮਿਤ੍ਵਾ ਅਸੁਚਿਂ ਮੋਚੇਨ੍ਤਸ੍ਸ ਸਙ੍ਘਾਦਿਸੇਸੋ ਪਞ੍ਞਤ੍ਤੋਤਿ? ਦਸ ਅਤ੍ਥਵਸੇ ਪਟਿਚ੍ਚ ਭਗਵਤਾ ਉਪਕ੍ਕਮਿਤ੍ਵਾ ਅਸੁਚਿਂ ਮੋਚੇਨ੍ਤਸ੍ਸ ਸਙ੍ਘਾਦਿਸੇਸੋ ਪਞ੍ਞਤ੍ਤੋ – ਸਙ੍ਘਸੁਟ੍ਠੁਤਾਯ, ਸਙ੍ਘਫਾਸੁਤਾਯ, ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਾਯ, ਪੇਸਲਾਨਂ ਭਿਕ੍ਖੂਨਂ ਫਾਸੁਵਿਹਾਰਾਯ, ਦਿਟ੍ਠਧਮ੍ਮਿਕਾਨਂ ਆਸਵਾਨਂ ਸਂਵਰਾਯ, ਸਮ੍ਪਰਾਯਿਕਾਨਂ ਆਸਵਾਨਂ ਪਟਿਘਾਤਾਯ, ਅਪ੍ਪਸਨ੍ਨਾਨਂ ਪਸਾਦਾਯ, ਪਸਨ੍ਨਾਨਂ ਭਿਯ੍ਯੋਭਾਵਾਯ, ਸਦ੍ਧਮ੍ਮਟ੍ਠਿਤਿਯਾ, ਵਿਨਯਾਨੁਗ੍ਗਹਾਯ. ਕੇ ਸਿਕ੍ਖਨ੍ਤੀਤਿ? ਸੇਕ੍ਖਾ ਚ ਪੁਥੁਜ੍ਜਨਕਲ੍ਯਾਣਕਾ ਚ ਸਿਕ੍ਖਨ੍ਤਿ. ਕੇ ਸਿਕ੍ਖਿਤਸਿਕ੍ਖਾਤਿ? ਅਰਹਨ੍ਤੋ ਸਿਕ੍ਖਿਤਸਿਕ੍ਖਾ. ਕਤ੍ਥ ਠਿਤਨ੍ਤਿ? ਸਿਕ੍ਖਾਕਾਮੇਸੁ ਠਿਤਂ. ਕੇ ਧਾਰੇਨ੍ਤੀਤਿ? ਯੇਸਂ ਵਤ੍ਤਤਿ, ਤੇ ਧਾਰੇਨ੍ਤਿ. ਕਸ੍ਸ ਵਚਨਨ੍ਤਿ? ਭਗਵਤੋ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ. ਕੇਨਾਭਤਨ੍ਤਿ? ਪਰਮ੍ਪਰਾਭਤਂ –

ਉਪਾਲਿ ਦਾਸਕੋ ਚੇਵ, ਸੋਣਕੋ ਸਿਗ੍ਗਵੋ ਤਥਾ;

ਮੋਗ੍ਗਲਿਪੁਤ੍ਤੇਨ ਪਞ੍ਚਮਾ, ਏਤੇ ਜਮ੍ਬੁਸਿਰਿਵ੍ਹਯੇ.

ਤਤੋ ਮਹਿਨ੍ਦੋ ਇਟ੍ਟਿਯੋ, ਉਤ੍ਤਿਯੋ ਸਮ੍ਬਲੋ ਤਥਾ;

ਭਦ੍ਦਨਾਮੋ ਚ ਪਣ੍ਡਿਤੋ.

ਏਤੇ ਨਾਗਾ ਮਹਾਪਞ੍ਞਾ, ਜਮ੍ਬੁਦੀਪਾ ਇਧਾਗਤਾ;

ਵਿਨਯਂ ਤੇ ਵਾਚਯਿਂਸੁ, ਪਿਟਕਂ ਤਮ੍ਬਪਣ੍ਣਿਯਾ.

ਨਿਕਾਯੇ ਪਞ੍ਚ ਵਾਚੇਸੁਂ, ਸਤ੍ਤ ਚੇਵ ਪਕਰਣੇ;

ਤਤੋ ਅਰਿਟ੍ਠੋ ਮੇਧਾਵੀ, ਤਿਸ੍ਸਦਤ੍ਤੋ ਚ ਪਣ੍ਡਿਤੋ.

ਵਿਸਾਰਦੋ ਕਾਲ਼ਸੁਮਨੋ, ਥੇਰੋ ਚ ਦੀਘਨਾਮਕੋ;

ਦੀਘਸੁਮਨੋ ਚ ਪਣ੍ਡਿਤੋ.

ਪੁਨਦੇਵ ਕਾਲ਼ਸੁਮਨੋ, ਨਾਗਤ੍ਥੇਰੋ ਚ ਬੁਦ੍ਧਰਕ੍ਖਿਤੋ;

ਤਿਸ੍ਸਤ੍ਥੇਰੋ ਚ ਮੇਧਾਵੀ, ਦੇਵਤ੍ਥੇਰੋ ਚ ਪਣ੍ਡਿਤੋ.

ਪੁਨਦੇਵ ਸੁਮਨੋ ਮੇਧਾਵੀ, ਵਿਨਯੇ ਚ ਵਿਸਾਰਦੋ;

ਬਹੁਸ੍ਸੁਤੋ ਚੂਲ਼ਨਾਗੋ, ਗਜੋਵ ਦੁਪ੍ਪਧਂਸਿਯੋ.

ਧਮ੍ਮਪਾਲਿਤਨਾਮੋ ਚ, ਰੋਹਣੇ ਸਾਧੁਪੂਜਿਤੋ;

ਤਸ੍ਸ ਸਿਸ੍ਸੋ ਮਹਾਪਞ੍ਞੋ, ਖੇਮਨਾਮੋ ਤਿਪੇਟਕੋ.

ਦੀਪੇ ਤਾਰਕਰਾਜਾਵ, ਪਞ੍ਞਾਯ ਅਤਿਰੋਚਥ;

ਉਪਤਿਸ੍ਸੋ ਚ ਮੇਧਾਵੀ, ਫੁਸ੍ਸਦੇਵੋ ਮਹਾਕਥੀ.

ਪੁਨਦੇਵ ਸੁਮਨੋ ਮੇਧਾਵੀ, ਪੁਪ੍ਫਨਾਮੋ ਬਹੁਸ੍ਸੁਤੋ;

ਮਹਾਕਥੀ ਮਹਾਸਿਵੋ, ਪਿਟਕੇ ਸਬ੍ਬਤ੍ਥ ਕੋਵਿਦੋ.

ਪੁਨਦੇਵ ਉਪਾਲਿ ਮੇਧਾਵੀ, ਵਿਨਯੇ ਚ ਵਿਸਾਰਦੋ;

ਮਹਾਨਾਗੋ ਮਹਾਪਞ੍ਞੋ, ਸਦ੍ਧਮ੍ਮਵਂਸਕੋਵਿਦੋ.

ਪੁਨਦੇਵ ਅਭਯੋ ਮੇਧਾਵੀ, ਪਿਟਕੇ ਸਬ੍ਬਤ੍ਥ ਕੋਵਿਦੋ;

ਤਿਸ੍ਸਤ੍ਥੇਰੋ ਚ ਮੇਧਾਵੀ, ਵਿਨਯੇ ਚ ਵਿਸਾਰਦੋ.

ਤਸ੍ਸ ਸਿਸ੍ਸੋ ਮਹਾਪਞ੍ਞੋ, ਪੁਪ੍ਫਨਾਮੋ ਬਹੁਸ੍ਸੁਤੋ;

ਸਾਸਨਂ ਅਨੁਰਕ੍ਖਨ੍ਤੋ, ਜਮ੍ਬੁਦੀਪੇ ਪਤਿਟ੍ਠਿਤੋ.

ਚੂਲ਼ਾਭਯੋ ਚ ਮੇਧਾਵੀ, ਵਿਨਯੇ ਚ ਵਿਸਾਰਦੋ;

ਤਿਸ੍ਸਤ੍ਥੇਰੋ ਚ ਮੇਧਾਵੀ, ਸਦ੍ਧਮ੍ਮਵਂਸਕੋਵਿਦੋ.

ਚੂਲ਼ਦੇਵੋ ਚ ਮੇਧਾਵੀ, ਵਿਨਯੇ ਚ ਵਿਸਾਰਦੋ;

ਸਿਵਤ੍ਥੇਰੋ ਚ ਮੇਧਾਵੀ, ਵਿਨਯੇ ਸਬ੍ਬਤ੍ਥ ਕੋਵਿਦੋ.

ਏਤੇ ਨਾਗਾ ਮਹਾਪਞ੍ਞਾ, ਵਿਨਯਞ੍ਞੂ ਮਗ੍ਗਕੋਵਿਦੋ;

ਵਿਨਯਂ ਦੀਪੇ ਪਕਾਸੇਸੁਂ, ਪਿਟਕਂ ਤਮ੍ਬਪਣ੍ਣਿਯਾਤਿ.

੯. ਯਂ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਉਦਾਯਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਉਦਾਯੀ ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ…ਪੇ….

੧੦. ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਉਦਾਯਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਉਦਾਯੀ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ; ਸਿਯਾ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਕਾਯਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ….

੧੧. ਮਾਤੁਗਾਮਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਉਦਾਯਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਉਦਾਯੀ ਮਾਤੁਗਾਮਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਅਭਾਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ; ਸਿਯਾ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਕਾਯਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ….

੧੨. ਸਞ੍ਚਰਿਤ੍ਤਂ ਸਮਾਪਜ੍ਜਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਉਦਾਯਿਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਉਦਾਯੀ ਸਞ੍ਚਰਿਤ੍ਤਂ ਸਮਾਪਜ੍ਜਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ, ਏਕਾ ਅਨੁਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਕਾਯਤੋ ਸਮੁਟ੍ਠਾਤਿ, ਨ ਵਾਚਤੋ ਨ ਚਿਤ੍ਤਤੋ; ਸਿਯਾ ਵਾਚਤੋ ਸਮੁਟ੍ਠਾਤਿ, ਨ ਕਾਯਤੋ ਨ ਚਿਤ੍ਤਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਸਮੁਟ੍ਠਾਤਿ, ਨ ਚਿਤ੍ਤਤੋ; ਸਿਯਾ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ; ਸਿਯਾ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਕਾਯਤੋ; ਸਿਯਾ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ….

੧੩. ਸਞ੍ਞਾਚਿਕਾ ਕੁਟਿਂ ਕਾਰਾਪੇਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਆਲ਼ਵਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਆਲ਼ਵਕੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਲ਼ਵਕਾ ਭਿਕ੍ਖੂ ਸਞ੍ਞਾਚਿਕਾਯ ਕੁਟਿਯੋ ਕਾਰਾਪੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੪. ਮਹਲ੍ਲਕਂ ਵਿਹਾਰਂ ਕਾਰਾਪੇਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਕੋਸਮ੍ਬਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਛਨ੍ਨਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਛਨ੍ਨੋ ਵਿਹਾਰਵਤ੍ਥੁਂ ਸੋਧੇਨ੍ਤੋ ਅਞ੍ਞਤਰਂ ਚੇਤਿਯਰੁਕ੍ਖਂ ਛੇਦਾਪੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੫. ਭਿਕ੍ਖੁਂ ਅਮੂਲਕੇਨ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਰਾਜਗਹੇ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਮੇਤ੍ਤਿਯਭੂਮਜਕੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਮੇਤ੍ਤਿਯਭੂਮਜਕਾ ਭਿਕ੍ਖੂ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਮੂਲਕੇਨ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੬. ਭਿਕ੍ਖੁਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿ ਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਰਾਜਗਹੇ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਮੇਤ੍ਤਿਯਭੂਮਜਕੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਮੇਤ੍ਤਿਯਭੂਮਜਕਾ ਭਿਕ੍ਖੂ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿ ਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੭. ਸਙ੍ਘਭੇਦਕਸ੍ਸ ਭਿਕ੍ਖੁਨੋ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਰਾਜਗਹੇ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਦੇਵਦਤ੍ਤਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਦੇਵਦਤ੍ਤੋ ਸਮਗ੍ਗਸ੍ਸ ਸਙ੍ਘਸ੍ਸ ਭੇਦਾਯ ਪਰਕ੍ਕਮਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ….

੧੮. ਭੇਦਾਨੁਵਤ੍ਤਕਾਨਂ ਭਿਕ੍ਖੂਨਂ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤਾਨਂ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਰਾਜਗਹੇ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਸਮ੍ਬਹੁਲਾ ਭਿਕ੍ਖੂ ਦੇਵਦਤ੍ਤਸ੍ਸ ਸਙ੍ਘਭੇਦਾਯ ਪਰਕ੍ਕਮਨ੍ਤਸ੍ਸ ਅਨੁਵਤ੍ਤਕਾ ਅਹੇਸੁਂ ਵਗ੍ਗਵਾਦਕਾ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ….

੧੯. ਦੁਬ੍ਬਚਸ੍ਸ ਭਿਕ੍ਖੁਨੋ ਯਾਵਤਤਿਯਂ ਸਮਨੁਭਾਸਨਾ ਨ ਪਟਿਨਿਸ੍ਸਜ੍ਜਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਕੋਸਮ੍ਬਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਛਨ੍ਨਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਛਨ੍ਨੋ ਭਿਕ੍ਖੂਹਿ ਸਹਧਮ੍ਮਿਕਂ ਵੁਚ੍ਚਮਾਨੋ ਅਤ੍ਤਾਨਂ ਅਵਚਨੀਯਂ ਅਕਾਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ….

੨੦. ਕੁਲਦੂਸਕਸ੍ਸ ਭਿਕ੍ਖੁਨੋ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋਤਿ? ਸਾਵਤ੍ਥਿਯਂ ਪਞ੍ਞਤ੍ਤੋ. ਕਂ ਆਰਬ੍ਭਾਤਿ? ਅਸ੍ਸਜਿਪੁਨਬ੍ਬਸੁਕੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਅਸ੍ਸਜਿਪੁਨਬ੍ਬਸੁਕਾ ਭਿਕ੍ਖੂ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤਾ ਭਿਕ੍ਖੂ ਛਨ੍ਦਗਾਮਿਤਾ ਦੋਸਗਾਮਿਤਾ ਮੋਹਗਾਮਿਤਾ ਭਯਗਾਮਿਤਾ ਪਾਪੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ…ਪੇ….

ਤੇਰਸ ਸਙ੍ਘਾਦਿਸੇਸਾ ਨਿਟ੍ਠਿਤਾ.

ਤਸ੍ਸੁਦ੍ਦਾਨਂ –

ਵਿਸ੍ਸਟ੍ਠਿ ਕਾਯਸਂਸਗ੍ਗਂ, ਦੁਟ੍ਠੁਲ੍ਲਂ ਅਤ੍ਤਕਾਮਞ੍ਚ;

ਸਞ੍ਚਰਿਤ੍ਤਂ ਕੁਟੀ ਚੇਵ, ਵਿਹਾਰੋ ਚ ਅਮੂਲਕਂ.

ਕਿਞ੍ਚਿਦੇਸਞ੍ਚ ਭੇਦੋ ਚ, ਤਸ੍ਸੇਵ [ਤਥੇਵ (ਕ.)] ਅਨੁਵਤ੍ਤਕਾ;

ਦੁਬ੍ਬਚਂ ਕੁਲਦੂਸਞ੍ਚ, ਸਙ੍ਘਾਦਿਸੇਸਾ ਤੇਰਸਾਤਿ.