੯. ਰਾਜਵਗ੍ਗੋ

੧੩੬. ਪੁਬ੍ਬੇ ਅਪ੍ਪਟਿਸਂਵਿਦਿਤੇਨ ਰਞ੍ਞੋ ਅਨ੍ਤੇਪੁਰਂ ਪਵਿਸਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਆਨਨ੍ਦੋ ਪੁਬ੍ਬੇ ਅਪ੍ਪਟਿਸਂਵਿਦਿਤੋ ਰਞ੍ਞੋ ਅਨ੍ਤੇਪੁਰਂ ਪਾਵਿਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ ਕਥਿਨਕੇ…ਪੇ….

੧੩੭. ਰਤਨਂ ਉਗ੍ਗਣ੍ਹਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਅਞ੍ਞਤਰੋ ਭਿਕ੍ਖੁ ਰਤਨਂ ਉਗ੍ਗਹੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ, ਦ੍ਵੇ ਅਨੁਪਞ੍ਞਤ੍ਤਿਯੋ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੩੮. ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਵਿਕਾਲੇ ਗਾਮਂ ਪਵਿਸਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਵਿਕਾਲੇ ਗਾਮਂ ਪਵਿਸਿਂਸੁ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ, ਤਿਸ੍ਸੋ ਅਨੁਪਞ੍ਞਤ੍ਤਿਯੋ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ ਕਥਿਨਕੇ…ਪੇ….

੧੩੯. ਅਟ੍ਠਿਮਯਂ ਵਾ ਦਨ੍ਤਮਯਂ ਵਾ ਵਿਸਾਣਮਯਂ ਵਾ ਸੂਚਿਘਰਂ ਕਾਰਾਪੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਕ੍ਕੇਸੁ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਸਮ੍ਬਹੁਲਾ ਭਿਕ੍ਖੂ ਨ ਮਤ੍ਤਂ ਜਾਨਿਤ੍ਵਾ ਬਹੂ ਸੂਚਿਘਰੇ ਵਿਞ੍ਞਾਪੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੪੦. ਪਮਾਣਾਤਿਕ੍ਕਨ੍ਤਂ ਮਞ੍ਚਂ ਵਾ ਪੀਠਂ ਵਾ ਕਾਰਾਪੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਉਚ੍ਚੇ ਮਞ੍ਚੇ ਸਯਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੪੧. ਮਞ੍ਚਂ ਵਾ ਪੀਠਂ ਵਾ ਤੂਲੋਨਦ੍ਧਂ ਕਾਰਾਪੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਮਞ੍ਚਂ ਵਾ ਪੀਠਂ ਵਾ ਤੂਲੋਨਦ੍ਧਂ ਕਾਰਾਪੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੪੨. ਪਮਾਣਾਤਿਕ੍ਕਨ੍ਤਂ ਨਿਸੀਦਨਂ ਕਾਰਾਪੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਅਪ੍ਪਮਾਣਿਕਾਨਿ ਨਿਸੀਦਨਾਨਿ ਧਾਰੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ, ਏਕਾ ਅਨੁਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੪੩. ਪਮਾਣਾਤਿਕ੍ਕਨ੍ਤਂ ਕਣ੍ਡੁਪ੍ਪਟਿਚ੍ਛਾਦਿਂ ਕਾਰਾਪੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਅਪ੍ਪਮਾਣਿਕਾਯੋ ਕਣ੍ਡੁਪ੍ਪਟਿਚ੍ਛਾਦਿਯੋ ਧਾਰੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੪੪. ਪਮਾਣਾਤਿਕ੍ਕਨ੍ਤਂ ਵਸ੍ਸਿਕਸਾਟਿਕਂ ਕਾਰਾਪੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਅਪ੍ਪਮਾਣਿਕਾਯੋ ਵਸ੍ਸਿਕਸਾਟਿਕਾਯੋ ਧਾਰੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

੧੪੫. ਸੁਗਤਚੀਵਰਪ੍ਪਮਾਣਂ ਚੀਵਰਂ ਕਾਰਾਪੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਨਨ੍ਦਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਨਨ੍ਦੋ ਸੁਗਤਚੀਵਰਪ੍ਪਮਾਣਂ ਚੀਵਰਂ ਧਾਰੇਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….

ਰਾਜਵਗ੍ਗੋ ਨਵਮੋ.

ਦ੍ਵੇਨਵੁਤਿ ਪਾਚਿਤ੍ਤਿਯਾ ਨਿਟ੍ਠਿਤਾ.

ਖੁਦ੍ਦਕਂ ਸਮਤ੍ਤਂ.

ਤਸ੍ਸੁਦ੍ਦਾਨਂ –

ਮੁਸਾ ਓਮਸਪੇਸੁਞ੍ਞਂ, ਪਦਸੇਯ੍ਯਾ ਚ ਇਤ੍ਥਿਯਾ;

ਅਞ੍ਞਤ੍ਰ ਵਿਞ੍ਞੁਨਾ ਭੂਤਾ [ਦੇਸਨਾਰੋਚਨਾ ਚੇਵ (ਸੀ. ਸ੍ਯਾ.)], ਦੁਟ੍ਠੁਲ੍ਲਾਪਤ੍ਤਿ ਖਣਨਾ.

ਭੂਤਂ ਅਞ੍ਞਾਯ ਉਜ੍ਝਾਯਿ [ਭੂਤਞ੍ਞਵਾਦਉਜ੍ਝਾਯਿ (ਸੀ.)], ਮਞ੍ਚੋ ਸੇਯ੍ਯੋ ਚ ਵੁਚ੍ਚਤਿ;

ਪੁਬ੍ਬੇ ਨਿਕ੍ਕਡ੍ਢਨਾਹਚ੍ਚ, ਦ੍ਵਾਰਂ ਸਪ੍ਪਾਣਕੇਨ ਚ.

ਅਸਮ੍ਮਤਾ ਅਤ੍ਥਙ੍ਗਤੇ, ਉਪਸ੍ਸਯਾਮਿਸੇਨ ਚ;

ਦਦੇ ਸਿਬ੍ਬੇ ਵਿਧਾਨੇਨ, ਨਾਵਾ ਭੁਞ੍ਜੇਯ੍ਯ ਏਕਤੋ.

ਪਿਣ੍ਡਂ ਗਣਂ ਪਰਂ ਪੂਵਂ, ਪਵਾਰਿਤੋ ਪਵਾਰਿਤਂ;

ਵਿਕਾਲਂ ਸਨ੍ਨਿਧਿ ਖੀਰਂ, ਦਨ੍ਤਪੋਨੇਨ ਤੇ ਦਸ.

ਅਚੇਲਕਂ ਉਯ੍ਯੋਖਜ੍ਜ [ਅਚੇਲਕਾਨੁਪਖਜ੍ਜ (ਕ.)], ਪਟਿਚ੍ਛਨ੍ਨਂ ਰਹੇਨ ਚ;

ਨਿਮਨ੍ਤਿਤੋ ਪਚ੍ਚਯੇਹਿ, ਸੇਨਾਵਸਨੁਯ੍ਯੋਧਿਕਂ.

ਸੁਰਾ ਅਙ੍ਗੁਲਿ ਹਾਸੋ ਚ, ਅਨਾਦਰਿਯਞ੍ਚ ਭਿਂਸਨਂ;

ਜੋਤਿ ਨਹਾਨ ਦੁਬ੍ਬਣ੍ਣਂ, ਸਾਮਂ ਅਪਨਿਧੇਨ ਚ.

ਸਞ੍ਚਿਚ੍ਚੁਦਕਕਮ੍ਮਾ ਚ, ਦੁਟ੍ਠੁਲ੍ਲਂ ਊਨਵੀਸਤਿ;

ਥੇਯ੍ਯਇਤ੍ਥਿਅਵਦੇਸਂ [ਅਰਿਟ੍ਠਕਂ (ਵਿਭਙ੍ਗੇ)], ਸਂਵਾਸੇ ਨਾਸਿਤੇਨ ਚ.

ਸਹਧਮ੍ਮਿਕਵਿਲੇਖਾ, ਮੋਹੋ ਪਹਾਰੇਨੁਗ੍ਗਿਰੇ;

ਅਮੂਲਕਞ੍ਚ ਸਞ੍ਚਿਚ੍ਚ, ਸੋਸ੍ਸਾਮਿ ਖਿਯ੍ਯਪਕ੍ਕਮੇ.

ਸਙ੍ਘੇਨ ਚੀਵਰਂ ਦਤ੍ਵਾ, ਪਰਿਣਾਮੇਯ੍ਯ ਪੁਗ੍ਗਲੇ;

ਰਞ੍ਞਞ੍ਚ ਰਤਨਂ ਸਨ੍ਤਂ, ਸੂਚਿ ਮਞ੍ਚੋ ਚ ਤੂਲਿਕਾ;

ਨਿਸੀਦਨਂ ਕਣ੍ਡੁਚ੍ਛਾਦਿ, ਵਸ੍ਸਿਕਾ ਸੁਗਤੇਨ ਚਾਤਿ.

ਤੇਸਂ ਵਗ੍ਗਾਨਂ ਉਦ੍ਦਾਨਂ –

ਮੁਸਾ ਭੂਤਾ ਚ ਓਵਾਦੋ, ਭੋਜਨਾਚੇਲਕੇਨ ਚ;

ਸੁਰਾ ਸਪ੍ਪਾਣਕਾ ਧਮ੍ਮੋ, ਰਾਜਵਗ੍ਗੇਨ ਤੇ ਨਵਾਤਿ.