੬. ਸੁਰਾਪਾਨਵਗ੍ਗੋ
੧੦੪. ਸੁਰਾਮੇਰਯਪਾਨੇ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਕੋਸਮ੍ਬਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਸਾਗਤਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਸਾਗਤੋ ਮਜ੍ਜਂ ਪਿਵਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ – ਸਿਯਾ ਕਾਯਤੋ ਸਮੁਟ੍ਠਾਤਿ, ਨ ਵਾਚਤੋ ਨ ਚਿਤ੍ਤਤੋ; ਸਿਯਾ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ…ਪੇ….
੧੦੫. ਅਙ੍ਗੁਲਿਪਤੋਦਕੇ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਂ ਅਙ੍ਗੁਲਿਪਤੋਦਕੇਨ ਹਾਸੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ…ਪੇ….
੧੦੬. ਉਦਕੇ ਹਸਧਮ੍ਮੇ [ਹਸ੍ਸਧਮ੍ਮੇ (ਸੀ. ਸ੍ਯਾ.)] ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਸਤ੍ਤਰਸਵਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਸਤ੍ਤਰਸਵਗ੍ਗਿਯਾ ਭਿਕ੍ਖੂ ਅਚਿਰਵਤਿਯਾ ਨਦਿਯਾ ਉਦਕੇ ਕੀਲ਼ਿਂਸੁ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਾਤਿ – ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਨ ਵਾਚਤੋ…ਪੇ….
੧੦੭. ਅਨਾਦਰਿਯੇ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਕੋਸਮ੍ਬਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਛਨ੍ਨਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਛਨ੍ਨੋ ਅਨਾਦਰਿਯਂ ਅਕਾਸਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….
੧੦੮. ਭਿਕ੍ਖੁਂ ਭਿਂਸਾਪੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਂ ਭਿਂਸਾਪੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….
੧੦੯. ਜੋਤਿਂ ਸਮਾਦਹਿਤ੍ਵਾ ਵਿਸਿਬ੍ਬੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਭਗ੍ਗੇਸੁ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਸਮ੍ਬਹੁਲਾ ਭਿਕ੍ਖੂ ਜੋਤਿਂ ਸਮਾਦਹਿਤ੍ਵਾ ਵਿਸਿਬ੍ਬੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ, ਦ੍ਵੇ ਅਨੁਪਞ੍ਞਤ੍ਤਿਯੋ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….
੧੧੦. ਓਰੇਨਦ੍ਧਮਾਸਂ ਨਹਾਯਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਰਾਜਗਹੇ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਸਮ੍ਬਹੁਲਾ ਭਿਕ੍ਖੂ ਰਾਜਾਨਮ੍ਪਿ ਪਸ੍ਸਿਤ੍ਵਾ ਨ ਮਤ੍ਤਂ ਜਾਨਿਤ੍ਵਾ ਨਹਾਯਿਂਸੁ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ, ਛ ਅਨੁਪਞ੍ਞਤ੍ਤਿਯੋ. ਸਬ੍ਬਤ੍ਥਪਞ੍ਞਤ੍ਤਿ, ਪਦੇਸਪਞ੍ਞਤ੍ਤੀਤਿ? ਪਦੇਸਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ ਏਲ਼ਕਲੋਮਕੇ…ਪੇ….
੧੧੧. ਅਨਾਦਿਯਿਤ੍ਵਾ ਤਿਣ੍ਣਂ ਦੁਬ੍ਬਣ੍ਣਕਰਣਾਨਂ ਅਞ੍ਞਤਰਂ ਦੁਬ੍ਬਣ੍ਣਕਰਣਂ ਨਵਂ ਚੀਵਰਂ ਪਰਿਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਸਮ੍ਬਹੁਲਾ ਭਿਕ੍ਖੂ ਅਤ੍ਤਨੋ ਚੀਵਰਂ ਨ ਸਞ੍ਜਾਨਿਂਸੁ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ ਏਲ਼ਕਲੋਮਕੇ…ਪੇ….
੧੧੨. ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਸਿਕ੍ਖਮਾਨਾਯ ਵਾ ਸਾਮਣੇਰਸ੍ਸ ਵਾ ਸਾਮਣੇਰਿਯਾ ਵਾ ਸਾਮਂ ਚੀਵਰਂ ਵਿਕਪ੍ਪੇਤ੍ਵਾ ਅਪ੍ਪਚ੍ਚੁਦ੍ਧਾਰਣਂ ਪਰਿਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਭਿਕ੍ਖੁਸ੍ਸ ਸਾਮਂ ਚੀਵਰਂ ਵਿਕਪ੍ਪੇਤ੍ਵਾ ਅਪ੍ਪਚ੍ਚੁਦ੍ਧਾਰਣਂ ਪਰਿਭੁਞ੍ਜਿ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ ਕਥਿਨਕੇ…ਪੇ….
੧੧੩. ਭਿਕ੍ਖੁਸ੍ਸ ਪਤ੍ਤਂ ਵਾ ਚੀਵਰਂ ਵਾ ਨਿਸੀਦਨਂ ਵਾ ਸੂਚਿਘਰਂ ਵਾ ਕਾਯਬਨ੍ਧਨਂ ਵਾ ਅਪਨਿਧੇਨ੍ਤਸ੍ਸ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਨ੍ਤਿ? ਸਾਵਤ੍ਥਿਯਂ ਪਞ੍ਞਤ੍ਤਂ. ਕਂ ਆਰਬ੍ਭਾਤਿ? ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ. ਕਿਸ੍ਮਿਂ ਵਤ੍ਥੁਸ੍ਮਿਨ੍ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੂਨਂ ਪਤ੍ਤਮ੍ਪਿ ਚੀਵਰਮ੍ਪਿ ਅਪਨਿਧੇਸੁਂ, ਤਸ੍ਮਿਂ ਵਤ੍ਥੁਸ੍ਮਿਂ. ਏਕਾ ਪਞ੍ਞਤ੍ਤਿ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਤਿ…ਪੇ….
ਸੁਰਾਮੇਰਯਵਗ੍ਗੋ ਛਟ੍ਠੋ.