੬. ਦੁਤਿਯਪਵਾਰਣਾਸਿਕ੍ਖਾਪਦਂ

੨੪੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਦ੍ਵੇ ਭਿਕ੍ਖੂ ਕੋਸਲੇਸੁ ਜਨਪਦੇ ਸਾਵਤ੍ਥਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਏਕੋ ਭਿਕ੍ਖੁ ਅਨਾਚਾਰਂ ਆਚਰਤਿ. ਦੁਤਿਯੋ ਭਿਕ੍ਖੁ ਤਂ ਭਿਕ੍ਖੁਂ ਏਤਦਵੋਚ – ‘‘ਮਾਵੁਸੋ, ਏਵਰੂਪਮਕਾਸਿ, ਨੇਤਂ ਕਪ੍ਪਤੀ’’ਤਿ. ਸੋ ਤਸ੍ਮਿਂ ਉਪਨਨ੍ਧਿ. ਅਥ ਖੋ ਤੇ ਭਿਕ੍ਖੂ ਸਾਵਤ੍ਥਿਂ ਅਗਮਂਸੁ. ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਂ ਅਞ੍ਞਤਰਸ੍ਸ ਪੂਗਸ੍ਸ ਸਙ੍ਘਭਤ੍ਤਂ ਹੋਤਿ. ਦੁਤਿਯੋ ਭਿਕ੍ਖੁ ਭੁਤ੍ਤਾਵੀ ਪਵਾਰਿਤੋ ਹੋਤਿ. ਉਪਨਦ੍ਧੋ [ਉਪਨਨ੍ਧੋ (ਕ.)] ਭਿਕ੍ਖੁ ਞਾਤਿਕੁਲਂ ਗਨ੍ਤ੍ਵਾ ਪਿਣ੍ਡਪਾਤਂ ਆਦਾਯ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਭੁਞ੍ਜਾਹਿ, ਆਵੁਸੋ’’ਤਿ. ‘‘ਅਲਂ, ਆਵੁਸੋ, ਪਰਿਪੁਣ੍ਣੋਮ੍ਹੀ’’ਤਿ. ‘‘ਸੁਨ੍ਦਰੋ, ਆਵੁਸੋ, ਪਿਣ੍ਡਪਾਤੋ, ਭੁਞ੍ਜਾਹੀ’’ਤਿ. ਅਥ ਖੋ ਸੋ ਭਿਕ੍ਖੁ ਤੇਨ ਭਿਕ੍ਖੁਨਾ ਨਿਪ੍ਪੀਲ਼ਿਯਮਾਨੋ ਤਂ ਪਿਣ੍ਡਪਾਤਂ ਭੁਞ੍ਜਿ. ਉਪਨਦ੍ਧੋ ਭਿਕ੍ਖੁ ਤਂ ਭਿਕ੍ਖੁਂ ਏਤਦਵੋਚ – ‘‘ਤ੍ਵਮ੍ਪਿ [ਤ੍ਵਂ ਹਿ (ਸ੍ਯਾ.)] ਨਾਮ, ਆਵੁਸੋ, ਮਂ ਵਤ੍ਤਬ੍ਬਂ ਮਞ੍ਞਸਿ ਯਂ ਤ੍ਵਂ ਭੁਤ੍ਤਾਵੀ ਪਵਾਰਿਤੋ ਅਨਤਿਰਿਤ੍ਤਂ ਭੋਜਨਂ ਭੁਞ੍ਜਸੀ’’ਤਿ. ‘‘ਨਨੁ, ਆਵੁਸੋ, ਆਚਿਕ੍ਖਿਤਬ੍ਬ’’ਨ੍ਤਿ. ‘‘ਨਨੁ, ਆਵੁਸੋ, ਪੁਚ੍ਛਿਤਬ੍ਬ’’ਨ੍ਤਿ.

ਅਥ ਖੋ ਸੋ ਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁ ਭਿਕ੍ਖੁਂ ਭੁਤ੍ਤਾਵਿਂ ਪਵਾਰਿਤਂ ਅਨਤਿਰਿਤ੍ਤੇਨ ਭੋਜਨੇਨ ਅਭਿਹਟ੍ਠੁਂ ਪਵਾਰੇਸ੍ਸਤੀ’’ ਤਿ…ਪੇ… ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਭਿਕ੍ਖੁਂ ਭੁਤ੍ਤਾਵਿਂ ਪਵਾਰਿਤਂ ਅਨਤਿਰਿਤ੍ਤੇਨ ਭੋਜਨੇਨ ਅਭਿਹਟ੍ਠੁਂ ਪਵਾਰੇਸੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਭਿਕ੍ਖੁਂ ਭੁਤ੍ਤਾਵਿਂ ਪਵਾਰਿਤਂ ਅਨਤਿਰਿਤ੍ਤੇਨ ਭੋਜਨੇਨ ਅਭਿਹਟ੍ਠੁਂ ਪਵਾਰੇਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ ਭਿਕ੍ਖਵੇ ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੪੩. ‘‘ਯੋ ਪਨ ਭਿਕ੍ਖੁ ਭਿਕ੍ਖੁਂ ਭੁਤ੍ਤਾਵਿਂ ਪਵਾਰਿਤਂ ਅਨਤਿਰਿਤ੍ਤੇਨ ਖਾਦਨੀਯੇਨ ਵਾ ਭੋਜਨੀਯੇਨ ਵਾ ਅਭਿਹਟ੍ਠੁਂ ਪਵਾਰੇਯ੍ਯ – ‘ਹਨ੍ਦ, ਭਿਕ੍ਖੁ, ਖਾਦ ਵਾ ਭੁਞ੍ਜ ਵਾ’ਤਿ, ਜਾਨਂ ਆਸਾਦਨਾਪੇਕ੍ਖੋ, ਭੁਤ੍ਤਸ੍ਮਿਂ, ਪਾਚਿਤ੍ਤਿਯ’’ਨ੍ਤਿ.

੨੪੪. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਭਿਕ੍ਖੁਨ੍ਤਿ ਅਞ੍ਞਂ ਭਿਕ੍ਖੁਂ.

ਭੁਤ੍ਤਾਵੀ ਨਾਮ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ, ਅਨ੍ਤਮਸੋ ਕੁਸਗ੍ਗੇਨਪਿ ਭੁਤ੍ਤਂ ਹੋਤਿ.

ਪਵਾਰਿਤੋ ਨਾਮ ਅਸਨਂ ਪਞ੍ਞਾਯਤਿ, ਭੋਜਨਂ ਪਞ੍ਞਾਯਤਿ, ਹਤ੍ਥਪਾਸੇ ਠਿਤੋ ਅਭਿਹਰਤਿ, ਪਟਿਕ੍ਖੇਪੋ ਪਞ੍ਞਾਯਤਿ.

ਅਨਤਿਰਿਤ੍ਤਂ ਨਾਮ ਅਕਪ੍ਪਿਯਕਤਂ ਹੋਤਿ, ਅਪ੍ਪਟਿਗ੍ਗਹਿਤਕਤਂ ਹੋਤਿ, ਅਨੁਚ੍ਚਾਰਿਤਕਤਂ ਹੋਤਿ, ਅਹਤ੍ਥਪਾਸੇ ਕਤਂ ਹੋਤਿ, ਅਭੁਤ੍ਤਾਵਿਨਾ ਕਤਂ ਹੋਤਿ, ਭੁਤ੍ਤਾਵਿਨਾ ਪਵਾਰਿਤੇਨ ਆਸਨਾ ਵੁਟ੍ਠਿਤੇਨ ਕਤਂ ਹੋਤਿ, ‘‘ਅਲਮੇਤਂ ਸਬ੍ਬ’’ਨ੍ਤਿ ਅਵੁਤ੍ਤਂ ਹੋਤਿ, ਨ ਗਿਲਾਨਾਤਿਰਿਤ੍ਤਂ ਹੋਤਿ – ਏਤਂ ਅਨਤਿਰਿਤ੍ਤਂ ਨਾਮ.

ਖਾਦਨੀਯਂ ਨਾਮ ਪਞ੍ਚ ਭੋਜਨਾਨਿ – ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਠਪੇਤ੍ਵਾ ਅਵਸੇਸਂ ਖਾਦਨੀਯਂ ਨਾਮ.

ਭੋਜਨੀਯਂ ਨਾਮ ਪਞ੍ਚ ਭੋਜਨਾਨਿ – ਓਦਨੋ, ਕੁਮ੍ਮਾਸੋ, ਸਤ੍ਤੁ, ਮਚ੍ਛੋ, ਮਂਸਂ.

ਅਭਿਹਟ੍ਠੁਂ ਪਵਾਰੇਯ੍ਯਾਤਿ ਯਾਵਤਕਂ ਇਚ੍ਛਸਿ ਤਾਵਤਕਂ ਗਣ੍ਹਾਹੀਤਿ.

ਜਾਨਾਤਿ ਨਾਮ ਸਾਮਂ ਵਾ ਜਾਨਾਤਿ, ਅਞ੍ਞੇ ਵਾ ਤਸ੍ਸ ਆਰੋਚੇਨ੍ਤਿ, ਸੋ ਵਾ ਆਰੋਚੇਤਿ.

ਆਸਾਦਨਾਪੇਕ੍ਖੋਤਿ ‘‘ਇਮਿਨਾ ਇਮਂ ਚੋਦੇਸ੍ਸਾਮਿ ਸਾਰੇਸ੍ਸਾਮਿ ਪਟਿਚੋਦੇਸ੍ਸਾਮਿ ਪਟਿਸਾਰੇਸ੍ਸਾਮਿ ਮਙ੍ਕੁ ਕਰਿਸ੍ਸਾਮੀ’’ਤਿ ਅਭਿਹਰਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਸ੍ਸ ਵਚਨੇਨ ‘‘ਖਾਦਿਸ੍ਸਾਮਿ ਭੁਞ੍ਜਿਸ੍ਸਾਮੀ’’ਤਿ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਜ੍ਝੋਹਾਰੇ ਅਜ੍ਝੋਹਾਰੇ ਆਪਤ੍ਤਿ ਦੁਕ੍ਕਟਸ੍ਸ. ਭੋਜਨਪਰਿਯੋਸਾਨੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

੨੪੫. ਪਵਾਰਿਤੇ ਪਵਾਰਿਤਸਞ੍ਞੀ ਅਨਤਿਰਿਤ੍ਤੇਨ ਖਾਦਨੀਯੇਨ ਵਾ ਭੋਜਨੀਯੇਨ ਵਾ ਅਭਿਹਟ੍ਠੁਂ ਪਵਾਰੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਪਵਾਰਿਤੇ ਵੇਮਤਿਕੋ ਅਨਤਿਰਿਤ੍ਤੇਨ ਖਾਦਨੀਯੇਨ ਵਾ ਭੋਜਨੀਯੇਨ ਵਾ ਅਭਿਹਟ੍ਠੁਂ ਪਵਾਰੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਪਵਾਰਿਤੇ ਅਪ੍ਪਵਾਰਿਤਸਞ੍ਞੀ ਅਨਤਿਰਿਤ੍ਤੇਨ ਖਾਦਨੀਯੇਨ ਵਾ ਭੋਜਨੀਯੇਨ ਵਾ ਅਭਿਹਟ੍ਠੁਂ ਪਵਾਰੇਤਿ, ਅਨਾਪਤ੍ਤਿ. ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਆਹਾਰਤ੍ਥਾਯ ਅਭਿਹਰਤਿ, ਆਪਤ੍ਤਿ ਦੁਕ੍ਕਟਸ੍ਸ. ਤਸ੍ਸ ਵਚਨੇਨ ‘‘ਖਾਦਿਸ੍ਸਾਮਿ ਭੁਞ੍ਜਿਸ੍ਸਾਮੀ’’ਤਿ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਜ੍ਝੋਹਾਰੇ ਅਜ੍ਝੋਹਾਰੇ ਆਪਤ੍ਤਿ ਦੁਕ੍ਕਟਸ੍ਸ. ਅਪ੍ਪਵਾਰਿਤੇ ਪਵਾਰਿਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਪ੍ਪਵਾਰਿਤੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਪ੍ਪਵਾਰਿਤੇ ਅਪ੍ਪਵਾਰਿਤਸਞ੍ਞੀ, ਅਨਾਪਤ੍ਤਿ.

੨੪੬. ਅਨਾਪਤ੍ਤਿ ਅਤਿਰਿਤ੍ਤਂ ਕਾਰਾਪੇਤ੍ਵਾ ਦੇਤਿ, ‘‘ਅਤਿਰਿਤ੍ਤਂ ਕਾਰਾਪੇਤ੍ਵਾ ਭੁਞ੍ਜਾਹੀ’’ਤਿ ਦੇਤਿ, ਅਞ੍ਞਸ੍ਸਤ੍ਥਾਯ ਹਰਨ੍ਤੋ ਗਚ੍ਛਾਹੀਤਿ ਦੇਤਿ, ਗਿਲਾਨਸ੍ਸ ਸੇਸਕਂ ਦੇਤਿ, ‘‘ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਸਤਿ ਪਚ੍ਚਯੇ ਪਰਿਭੁਞ੍ਜਾ’’ਤਿ ਦੇਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਦੁਤਿਯਪਵਾਰਣਾਸਿਕ੍ਖਾਪਦਂ ਨਿਟ੍ਠਿਤਂ ਛਟ੍ਠਂ.