੯. ਪਰਿਪਾਚਿਤਸਿਕ੍ਖਾਪਦਂ

੧੯੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਥੁਲ੍ਲਨਨ੍ਦਾ ਭਿਕ੍ਖੁਨੀ ਅਞ੍ਞਤਰਸ੍ਸ ਕੁਲਸ੍ਸ ਕੁਲੂਪਿਕਾ ਹੋਤਿ ਨਿਚ੍ਚਭਤ੍ਤਿਕਾ. ਤੇਨ ਚ ਗਹਪਤਿਨਾ ਥੇਰਾ ਭਿਕ੍ਖੂ ਨਿਮਨ੍ਤਿਤਾ ਹੋਨ੍ਤਿ. ਅਥ ਖੋ ਥੁਲ੍ਲਨਨ੍ਦਾ ਭਿਕ੍ਖੁਨੀ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਤਂ ਕੁਲਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਗਹਪਤਿਂ ਏਤਦਵੋਚ – ‘‘ਕਿਮਿਦਂ, ਗਹਪਤਿ, ਪਹੂਤਂ ਖਾਦਨੀਯਂ ਭੋਜਨੀਯਂ ਪਟਿਯਤ੍ਤ’’ਨ੍ਤਿ? ‘‘ਥੇਰਾ ਮਯਾ, ਅਯ੍ਯੇ, ਨਿਮਨ੍ਤਿਤਾ’’ਤਿ. ‘‘ਕੇ ਪਨ ਤੇ, ਗਹਪਤਿ, ਥੇਰਾ’’ਤਿ? ‘‘ਅਯ੍ਯੋ ਸਾਰਿਪੁਤ੍ਤੋ ਅਯ੍ਯੋ ਮਹਾਮੋਗ੍ਗਲ੍ਲਾਨੋ ਅਯ੍ਯੋ ਮਹਾਕਚ੍ਚਾਨੋ ਅਯ੍ਯੋ ਮਹਾਕੋਟ੍ਠਿਕੋ ਅਯ੍ਯੋ ਮਹਾਕਪ੍ਪਿਨੋ ਅਯ੍ਯੋ ਮਹਾਚੁਨ੍ਦੋ ਅਯ੍ਯੋ ਅਨੁਰੁਦ੍ਧੋ ਅਯ੍ਯੋ ਰੇਵਤੋ ਅਯ੍ਯੋ ਉਪਾਲਿ ਅਯ੍ਯੋ ਆਨਨ੍ਦੋ ਅਯ੍ਯੋ ਰਾਹੁਲੋ’’ਤਿ. ‘‘ਕਿਂ ਪਨ ਤ੍ਵਂ, ਗਹਪਤਿ, ਮਹਾਨਾਗੇ ਤਿਟ੍ਠਮਾਨੇ ਚੇਟਕੇ ਨਿਮਨ੍ਤੇਸੀ’’ਤਿ?

‘‘ਕੇ ਪਨ ਤੇ, ਅਯ੍ਯੇ, ਮਹਾਨਾਗਾ’’ਤਿ? ‘‘ਅਯ੍ਯੋ ਦੇਵਦਤ੍ਤੋ ਅਯ੍ਯੋ ਕੋਕਾਲਿਕੋ ਅਯ੍ਯੋ ਕਟਮੋਦਕਤਿਸ੍ਸਕੋ [ਕਟਮੋਰਕਤਿਸ੍ਸਕੋ (ਸੀ.) ਕਤਮੋਰਕਤਿਸ੍ਸਕੋ (ਸ੍ਯਾ.)] ਅਯ੍ਯੋ ਖਣ੍ਡਦੇਵਿਯਾ ਪੁਤ੍ਤੋ ਅਯ੍ਯੋ ਸਮੁਦ੍ਦਦਤ੍ਤੋ’’ਤਿ. ਅਯਂ ਚਰਹਿ ਥੁਲ੍ਲਨਨ੍ਦਾਯ ਭਿਕ੍ਖੁਨਿਯਾ ਅਨ੍ਤਰਾ ਕਥਾ ਵਿਪ੍ਪਕਤਾ, ਅਥ ਤੇ ਥੇਰਾ ਭਿਕ੍ਖੂ ਪਵਿਸਿਂਸੁ. ‘‘ਸਚ੍ਚਂ ਮਹਾਨਾਗਾ ਖੋ ਤਯਾ, ਗਹਪਤਿ, ਨਿਮਨ੍ਤਿਤਾ’’ਤਿ. ‘‘ਇਦਾਨੇਵ ਖੋ ਤ੍ਵਂ, ਅਯ੍ਯੇ, ਚੇਟਕੇ ਅਕਾਸਿ; ਇਦਾਨਿ ਮਹਾਨਾਗੇ’’ਤਿ. ਘਰਤੋ ਚ ਨਿਕ੍ਕਡ੍ਢਿ, ਨਿਚ੍ਚਭਤ੍ਤਞ੍ਚ ਪਚ੍ਛਿਨ੍ਦਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਦੇਵਦਤ੍ਤੋ ਜਾਨਂ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜਿਸ੍ਸਤੀ’’ਤਿ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਦੇਵਦਤ੍ਤ, ਜਾਨਂ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜਸੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਜਾਨਂ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜਿਸ੍ਸਸਿ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਜਾਨਂ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੧੯੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਰਾਜਗਹਾ ਪਬ੍ਬਜਿਤੋ ਞਾਤਿਕੁਲਂ ਅਗਮਾਸਿ. ਮਨੁਸ੍ਸਾ – ‘‘ਚਿਰਸ੍ਸਮ੍ਪਿ ਭਦਨ੍ਤੋ ਆਗਤੋ’’ਤਿ ਸਕ੍ਕਚ੍ਚਂ ਭਤ੍ਤਂ ਅਕਂਸੁ. ਤਸ੍ਸ ਕੁਲਸ੍ਸ ਕੁਲੂਪਿਕਾ ਭਿਕ੍ਖੁਨੀ ਤੇ ਮਨੁਸ੍ਸੇ ਏਤਦਵੋਚ – ‘‘ਦੇਥਯ੍ਯਸ੍ਸ, ਆਵੁਸੋ, ਭਤ੍ਤ’’ਨ੍ਤਿ. ਅਥ ਖੋ ਸੋ ਭਿਕ੍ਖੁ – ‘‘ਭਗਵਤਾ ਪਟਿਕ੍ਖਿਤ੍ਤਂ ਜਾਨਂ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜਿਤੁ’’ਨ੍ਤਿ ਕੁਕ੍ਕੁਚ੍ਚਾਯਨ੍ਤੋ ਨ ਪਟਿਗ੍ਗਹੇਸਿ. ਨਾਸਕ੍ਖਿ ਪਿਣ੍ਡਾਯ ਚਰਿਤੁਂ, ਛਿਨ੍ਨਭਤ੍ਤੋ ਅਹੋਸਿ. ਅਥ ਖੋ ਸੋ ਭਿਕ੍ਖੁ ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਪੁਬ੍ਬੇ ਗਿਹਿਸਮਾਰਮ੍ਭੇ ਜਾਨਂ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੧੯੪. ‘‘ਯੋ ਪਨ ਭਿਕ੍ਖੁ ਜਾਨਂ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜੇਯ੍ਯ, ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾ, ਪਾਚਿਤ੍ਤਿਯ’’ਨ੍ਤਿ.

੧੯੫. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਜਾਨਾਤਿ ਨਾਮ ਸਾਮਂ ਵਾ ਜਾਨਾਤਿ ਅਞ੍ਞੇ ਵਾ ਤਸ੍ਸ ਆਰੋਚੇਨ੍ਤਿ ਸਾ ਵਾ ਆਰੋਚੇਤਿ.

ਭਿਕ੍ਖੁਨੀ ਨਾਮ ਉਭਤੋਸਙ੍ਘੇ ਉਪਸਮ੍ਪਨ੍ਨਾ.

ਪਰਿਪਾਚੇਤਿ ਨਾਮ ਪੁਬ੍ਬੇ ਅਦਾਤੁਕਾਮਾਨਂ ਅਕਤ੍ਤੁਕਾਮਾਨਂ – ‘‘ਅਯ੍ਯੋ ਭਾਣਕੋ, ਅਯ੍ਯੋ ਬਹੁਸ੍ਸੁਤੋ, ਅਯ੍ਯੋ ਸੁਤ੍ਤਨ੍ਤਿਕੋ, ਅਯ੍ਯੋ ਵਿਨਯਧਰੋ, ਅਯ੍ਯੋ ਧਮ੍ਮਕਥਿਕੋ, ਦੇਥ ਅਯ੍ਯਸ੍ਸ, ਕਰੋਥ ਅਯ੍ਯਸ੍ਸਾ’’ਤਿ ਏਸਾ ਪਰਿਪਾਚੇਤਿ ਨਾਮ.

ਪਿਣ੍ਡਪਾਤੋ ਨਾਮ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ.

ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾਤਿ ਠਪੇਤ੍ਵਾ ਗਿਹਿਸਮਾਰਮ੍ਭਂ.

ਗਿਹਿਸਮਾਰਮ੍ਭੋ ਨਾਮ ਞਾਤਕਾ ਵਾ ਹੋਨ੍ਤਿ ਪਵਾਰਿਤਾ ਵਾ ਪਕਤਿਪਟਿਯਤ੍ਤਂ ਵਾ.

ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾ ਭੁਞ੍ਜਿਸ੍ਸਾਮੀਤਿ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਜ੍ਝੋਹਾਰੇ ਅਜ੍ਝੋਹਾਰੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੧੯੬. ਪਰਿਪਾਚਿਤੇ ਪਰਿਪਾਚਿਤਸਞ੍ਞੀ ਭੁਞ੍ਜਤਿ, ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਪਰਿਪਾਚਿਤੇ ਵੇਮਤਿਕੋ ਭੁਞ੍ਜਤਿ, ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾ, ਆਪਤ੍ਤਿ ਦੁਕ੍ਕਟਸ੍ਸ. ਪਰਿਪਾਚਿਤੇ ਅਪਰਿਪਾਚਿਤਸਞ੍ਞੀ ਭੁਞ੍ਜਤਿ, ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾ, ਅਨਾਪਤ੍ਤਿ. ਏਕਤੋਉਪਸਮ੍ਪਨ੍ਨਾਯ ਪਰਿਪਾਚਿਤਂ ਭੁਞ੍ਜਤਿ, ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾ, ਆਪਤ੍ਤਿ ਦੁਕ੍ਕਟਸ੍ਸ. ਅਪਰਿਪਾਚਿਤੇ ਪਰਿਪਾਚਿਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਪਰਿਪਾਚਿਤ੍ਤੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਪਰਿਪਾਚਿਤੇ ਅਪਰਿਪਾਚਿਤਸਞ੍ਞੀ, ਅਨਾਪਤ੍ਤਿ.

੧੯੭. ਅਨਾਪਤ੍ਤਿ ਪੁਬ੍ਬੇ ਗਿਹਿਸਮਾਰਮ੍ਭੇ, ਸਿਕ੍ਖਮਾਨਾ ਪਰਿਪਾਚੇਤਿ, ਸਾਮਣੇਰੀ ਪਰਿਪਾਚੇਤਿ, ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ ਅਨਾਪਤ੍ਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਪਰਿਪਾਚਿਤਸਿਕ੍ਖਾਪਦਂ ਨਿਟ੍ਠਿਤਂ ਨਵਮਂ.