੭. ਧਮ੍ਮਦੇਸਨਾਸਿਕ੍ਖਾਪਦਂ

੬੦. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਦਾਯੀ ਸਾਵਤ੍ਥਿਯਂ ਕੁਲੂਪਕੋ ਹੋਤਿ, ਬਹੁਕਾਨਿ ਕੁਲਾਨਿ ਉਪਸਙ੍ਕਮਤਿ. ਅਥ ਖੋ ਆਯਸ੍ਮਾ ਉਦਾਯੀ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਅਞ੍ਞਤਰਂ ਕੁਲਂ ਤੇਨੁਪਸਙ੍ਕਮਿ. ਤੇਨ ਖੋ ਪਨ ਸਮਯੇਨ ਘਰਣੀ ਨਿਵੇਸਨਦ੍ਵਾਰੇ ਨਿਸਿਨ੍ਨਾ ਹੋਤਿ, ਘਰਸੁਣ੍ਹਾ ਆਵਸਥਦ੍ਵਾਰੇ ਨਿਸਿਨ੍ਨਾ ਹੋਤਿ. ਅਥ ਖੋ ਆਯਸ੍ਮਾ ਉਦਾਯੀ ਯੇਨ ਘਰਣੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਘਰਣਿਯਾ ਉਪਕਣ੍ਣਕੇ ਧਮ੍ਮਂ ਦੇਸੇਸਿ. ਅਥ ਖੋ ਘਰਸੁਣ੍ਹਾਯ ਏਤਦਹੋਸਿ – ‘‘ਕਿ ਨੁ ਖੋ ਸੋ ਸਮਣੋ ਸਸ੍ਸੁਯਾ ਜਾਰੋ ਉਦਾਹੁ ਓਭਾਸਤੀ’’ਤਿ?

ਅਥ ਖੋ ਆਯਸ੍ਮਾ ਉਦਾਯੀ ਘਰਣਿਯਾ ਉਪਕਣ੍ਣਕੇ ਧਮ੍ਮਂ ਦੇਸੇਤ੍ਵਾ ਯੇਨ ਘਰਸੁਣ੍ਹਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਘਰਸੁਣ੍ਹਾਯ ਉਪਕਣ੍ਣਕੇ ਧਮ੍ਮਂ ਦੇਸੇਸਿ. ਅਥ ਖੋ ਘਰਣਿਯਾ ਏਤਦਹੋਸਿ – ‘‘ਕਿਂ ਨੁ ਖੋ ਸੋ ਸਮਣੋ ਘਰਸੁਣ੍ਹਾਯ ਜਾਰੋ ਉਦਾਹੁ ਓਭਾਸਤੀ’’ਤਿ? ਅਥ ਖੋ ਆਯਸ੍ਮਾ ਉਦਾਯੀ ਘਰਸੁਣ੍ਹਾਯ ਉਪਕਣ੍ਣਕੇ ਧਮ੍ਮਂ ਦੇਸੇਤ੍ਵਾ ਪਕ੍ਕਾਮਿ. ਅਥ ਖੋ ਘਰਣੀ ਘਰਸੁਣ੍ਹਂ ਏਤਦਵੋਚ – ‘‘ਹੇ ਜੇ, ਕਿਂ ਤੇ ਏਸੋ ਸਮਣੋ ਅਵੋਚਾ’’ਤਿ? ‘‘ਧਮ੍ਮਂ ਮੇ, ਅਯ੍ਯੇ, ਦੇਸੇਸਿ’’. ‘‘ਅਯ੍ਯਾਯ ਪਨ ਕਿਂ ਅਵੋਚਾ’’ਤਿ? ‘‘ਮਯ੍ਹਮ੍ਪਿ ਧਮ੍ਮਂ ਦੇਸੇਸੀ’’ਤਿ. ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯੋ ਉਦਾਯੀ ਮਾਤੁਗਾਮਸ੍ਸ ਉਪਕਣ੍ਣਕੇ ਧਮ੍ਮਂ ਦੇਸੇਸ੍ਸਤਿ! ਨਨੁ ਨਾਮ ਵਿਸ੍ਸਟ੍ਠੇਨ ਵਿਵਟੇਨ ਧਮ੍ਮੋ ਦੇਸੇਤਬ੍ਬੋ’’ਤਿ?

ਅਸ੍ਸੋਸੁਂ ਖੋ ਭਿਕ੍ਖੂ ਤਾਸਂ ਇਤ੍ਥੀਨਂ ਉਜ੍ਝਾਯਨ੍ਤੀਨਂ ਖਿਯ੍ਯਨ੍ਤੀਨਂ ਵਿਪਾਚੇਨ੍ਤੀਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਦਾਯੀ ਮਾਤੁਗਾਮਸ੍ਸ ਧਮ੍ਮਂ ਦੇਸੇਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਦਾਯਿਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਉਦਾਯਿ, ਮਾਤੁਗਾਮਸ੍ਸ ਧਮ੍ਮਂ ਦੇਸੇਸੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਮਾਤੁਗਾਮਸ੍ਸ ਧਮ੍ਮਂ ਦੇਸੇਸ੍ਸਸਿ. ਨੇਤਂ ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਮਾਤੁਗਾਮਸ੍ਸ ਧਮ੍ਮਂ ਦੇਸੇਯ੍ਯ ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੬੧. ਤੇਨ ਖੋ ਪਨ ਸਮਯੇਨ ਉਪਾਸਿਕਾ ਭਿਕ੍ਖੂ ਪਸ੍ਸਿਤ੍ਵਾ ਏਤਦਵੋਚੁਂ – ‘‘ਇਙ੍ਘਾਯ੍ਯਾ ਧਮ੍ਮਂ ਦੇਸੇਥਾ’’ਤਿ. ‘‘ਨ, ਭਗਿਨੀ, ਕਪ੍ਪਤਿ ਮਾਤੁਗਾਮਸ੍ਸ ਧਮ੍ਮਂ ਦੇਸੇਤੁ’’ਨ੍ਤਿ. ‘‘ਇਙ੍ਘਾਯ੍ਯਾ ਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਥ, ਸਕ੍ਕਾ ਏਤ੍ਤਕੇਨਪਿ ਧਮ੍ਮੋ ਅਞ੍ਞਾਤੁ’’ਨ੍ਤਿ. ‘‘ਨ, ਭਗਿਨੀ, ਕਪ੍ਪਤਿ ਮਾਤੁਗਾਮਸ੍ਸ ਧਮ੍ਮਂ ਦੇਸੇਤੁ’’ਨ੍ਤਿ. ਕੁਕ੍ਕੁਚ੍ਚਾਯਨ੍ਤਾ ਨ ਦੇਸੇਸੁਂ. ਉਪਾਸਿਕਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਅਮ੍ਹੇਹਿ ਯਾਚਿਯਮਾਨਾ ਧਮ੍ਮਂ ਨ ਦੇਸੇਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤਾਸਂ ਉਪਾਸਿਕਾਨਂ ਉਜ੍ਝਾਯਨ੍ਤੀਨਂ ਖਿਯ੍ਯਨ੍ਤੀਨਂ ਵਿਪਾਚੇਨ੍ਤੀਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਮਾਤੁਗਾਮਸ੍ਸ ਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੂ ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੬੨. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ‘‘ਭਗਵਤਾ ਅਨੁਞ੍ਞਾਤਂ ਮਾਤੁਗਾਮਸ੍ਸ ਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤੁ’’ਨ੍ਤਿ ਤੇ ਅਵਿਞ੍ਞੁਂ ਪੁਰਿਸਵਿਗ੍ਗਹਂ ਉਪਨਿਸੀਦਾਪੇਤ੍ਵਾ ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਨ੍ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਵਿਞ੍ਞੁਂ ਪੁਰਿਸਵਿਗ੍ਗਹਂ ਉਪਨਿਸੀਦਾਪੇਤ੍ਵਾ ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਸ੍ਸਨ੍ਤੀ’’ਤਿ!

ਅਥ ਖੋ ਤੇ ਭਿਕ੍ਖੂ ਛਬ੍ਬਗ੍ਗਿਯੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਅਵਿਞ੍ਞੁਂ ਪੁਰਿਸਵਿਗ੍ਗਹਂ ਉਪਨਿਸੀਦਾਪੇਤ੍ਵਾ ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਥਾ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਅਵਿਞ੍ਞੁਂ ਪੁਰਿਸਵਿਗ੍ਗਹਂ ਉਪਨਿਸੀਦਾਪੇਤ੍ਵਾ ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੬੩. ‘‘ਯੋ ਪਨ ਭਿਕ੍ਖੁ ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਯ੍ਯ, ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨ, ਪਾਚਿਤ੍ਤਿਯ’’ਨ੍ਤਿ.

੬੪. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ; ਨ ਯਕ੍ਖੀ ਨ ਪੇਤੀ ਨ ਤਿਰਚ੍ਛਾਨਗਤਾ; ਵਿਞ੍ਞੂ, ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁਂ.

ਉਤ੍ਤਰਿਛਪ੍ਪਞ੍ਚਵਾਚਾਹੀਤਿ ਅਤਿਰੇਕਛਪ੍ਪਞ੍ਚਵਾਚਾਹਿ.

ਧਮ੍ਮੋ ਨਾਮ ਬੁਦ੍ਧਭਾਸਿਤੋ, ਸਾਵਕਭਾਸਿਤੋ, ਇਸਿਭਾਸਿਤੋ, ਦੇਵਤਾਭਾਸਿਤੋ, ਅਤ੍ਥੂਪਸਞ੍ਹਿਤੋ, ਧਮ੍ਮੂਪਸਞ੍ਹਿਤੋ.

ਦੇਸੇਯ੍ਯਾਤਿ ਪਦੇਨ ਦੇਸੇਤਿ, ਪਦੇ ਪਦੇ ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਕ੍ਖਰਾਯ ਦੇਸੇਤਿ, ਅਕ੍ਖਰਕ੍ਖਰਾਯ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨਾਤਿ ਠਪੇਤ੍ਵਾ ਵਿਞ੍ਞੁਂ ਪੁਰਿਸਵਿਗ੍ਗਹਂ. ਵਿਞ੍ਞੂ ਨਾਮ ਪੁਰਿਸਵਿਗ੍ਗਹੋ, ਪਟਿਬਲੋ ਹੋਤਿ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁਂ.

੬੫. ਮਾਤੁਗਾਮੇ ਮਾਤੁਗਾਮਸਞ੍ਞੀ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤਿ, ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਮਾਤੁਗਾਮੇ ਵੇਮਤਿਕੋ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤਿ, ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਮਾਤੁਗਾਮੇ ਅਮਾਤੁਗਾਮਸਞ੍ਞੀ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤਿ, ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਯਕ੍ਖਿਯਾ ਵਾ ਪੇਤਿਯਾ ਵਾ ਪਣ੍ਡਕਸ੍ਸ ਵਾ ਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹਿਤ੍ਥਿਯਾ ਵਾ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤਿ, ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਮਾਤੁਗਾਮਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਅਮਾਤੁਗਾਮਸਞ੍ਞੀ, ਅਨਾਪਤ੍ਤਿ.

੬੬. ਅਨਾਪਤ੍ਤਿ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨ, ਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤਿ, ਊਨਕਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਤਿ, ਉਟ੍ਠਹਿਤ੍ਵਾ ਪੁਨ ਨਿਸੀਦਿਤ੍ਵਾ ਦੇਸੇਤਿ, ਮਾਤੁਗਾਮੋ ਉਟ੍ਠਹਿਤ੍ਵਾ ਪੁਨ ਨਿਸੀਦਤਿ ਤਸ੍ਮਿਂ ਦੇਸੇਤਿ, ਅਞ੍ਞਸ੍ਸ ਮਾਤੁਗਾਮਸ੍ਸ ਦੇਸੇਤਿ, ਪਞ੍ਹਂ ਪੁਚ੍ਛਤਿ, ਪਞ੍ਹਂ ਪੁਟ੍ਠੋ ਕਥੇਤਿ, ਅਞ੍ਞਸ੍ਸਤ੍ਥਾਯ ਭਣਨ੍ਤਂ ਮਾਤੁਗਾਮੋ ਸੁਣਾਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਧਮ੍ਮਦੇਸਨਾਸਿਕ੍ਖਾਪਦਂ ਨਿਟ੍ਠਿਤਂ ਸਤ੍ਤਮਂ.