੧੮੭. ਕਥਿਨਾਨੁਜਾਨਨਾ

੩੦੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਤਿਂਸਮਤ੍ਤਾ ਪਾਵੇਯ੍ਯਕਾ [ਪਾਠੇਯ੍ਯਕਾ (ਸੀ. ਸ੍ਯਾ.)] ਭਿਕ੍ਖੂ, ਸਬ੍ਬੇ ਆਰਞ੍ਞਿਕਾ ਸਬ੍ਬੇ ਪਿਣ੍ਡਪਾਤਿਕਾ ਸਬ੍ਬੇ ਪਂਸੁਕੂਲਿਕਾ ਸਬ੍ਬੇ ਤੇਚੀਵਰਿਕਾ ਸਾਵਤ੍ਥਿਂ ਆਗਚ੍ਛਨ੍ਤਾ ਭਗਵਨ੍ਤਂ ਦਸ੍ਸਨਾਯ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਨਾਸਕ੍ਖਿਂਸੁ ਸਾਵਤ੍ਥਿਯਂ ਵਸ੍ਸੂਪਨਾਯਿਕਂ ਸਮ੍ਭਾਵੇਤੁਂ; ਅਨ੍ਤਰਾਮਗ੍ਗੇ ਸਾਕੇਤੇ ਵਸ੍ਸਂ ਉਪਗਚ੍ਛਿਂਸੁ. ਤੇ ਉਕ੍ਕਣ੍ਠਿਤਰੂਪਾ ਵਸ੍ਸਂ ਵਸਿਂਸੁ – ਆਸਨ੍ਨੇਵ ਨੋ ਭਗਵਾ ਵਿਹਰਤਿ ਇਤੋ ਛਸੁ ਯੋਜਨੇਸੁ, ਨ ਚ ਮਯਂ ਲਭਾਮ ਭਗਵਨ੍ਤਂ ਦਸ੍ਸਨਾਯਾਤਿ. ਅਥ ਖੋ ਤੇ ਭਿਕ੍ਖੂ ਵਸ੍ਸਂਵੁਟ੍ਠਾ, ਤੇਮਾਸਚ੍ਚਯੇਨ ਕਤਾਯ ਪਵਾਰਣਾਯ, ਦੇਵੇ ਵਸ੍ਸਨ੍ਤੇ, ਉਦਕਸਙ੍ਗਹੇ ਉਦਕਚਿਕ੍ਖਲ੍ਲੇ ਓਕਪੁਣ੍ਣੇਹਿ ਚੀਵਰੇਹਿ ਕਿਲਨ੍ਤਰੂਪਾ ਯੇਨ ਸਾਵਤ੍ਥਿ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ, ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਤ੍ਥ, ਨ ਚ ਪਿਣ੍ਡਕੇਨ ਕਿਲਮਿਤ੍ਥਾ’’ਤਿ? ‘‘ਖਮਨੀਯਂ, ਭਗਵਾ; ਯਾਪਨੀਯਂ, ਭਗਵਾ; ਸਮਗ੍ਗਾ ਚ ਮਯਂ, ਭਨ੍ਤੇ, ਸਮ੍ਮੋਦਮਾਨਾ ਅਵਿਵਦਮਾਨਾ ਵਸ੍ਸਂ ਵਸਿਮ੍ਹਾ, ਨ ਚ ਪਿਣ੍ਡਕੇਨ ਕਿਲਮਿਮ੍ਹਾ. ਇਧ ਮਯਂ, ਭਨ੍ਤੇ, ਤਿਂਸਮਤ੍ਤਾ ਪਾਵੇਯ੍ਯਕਾ ਭਿਕ੍ਖੂ ਸਾਵਤ੍ਥਿਂ ਆਗਚ੍ਛਨ੍ਤਾ ਭਗਵਨ੍ਤਂ ਦਸ੍ਸਨਾਯ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਨਾਸਕ੍ਖਿਮ੍ਹਾ ਸਾਵਤ੍ਥਿਯਂ ਵਸ੍ਸੂਪਨਾਯਿਕਂ ਸਮ੍ਭਾਵੇਤੁਂ, ਅਨ੍ਤਰਾਮਗ੍ਗੇ ਸਾਕੇਤੇ ਵਸ੍ਸਂ ਉਪਗਚ੍ਛਿਮ੍ਹਾ. ਤੇ ਮਯਂ, ਭਨ੍ਤੇ, ਉਕ੍ਕਣ੍ਠਿਤਰੂਪਾ ਵਸ੍ਸਂ ਵਸਿਮ੍ਹਾ – ‘ਆਸਨ੍ਨੇਵ ਨੋ ਭਗਵਾ ਵਿਹਰਤਿ ਇਤੋ ਛਸੁ ਯੋਜਨੇਸੁ, ਨ ਚ ਮਯਂ ਲਭਾਮ ਭਗਵਨ੍ਤਂ ਦਸ੍ਸਨਾਯਾ’ਤਿ. ਅਥ ਖੋ ਮਯਂ, ਭਨ੍ਤੇ, ਵਸ੍ਸਂਵੁਟ੍ਠਾ, ਤੇਮਾਸਚ੍ਚਯੇਨ ਕਤਾਯ ਪਵਾਰਣਾਯ, ਦੇਵੇ ਵਸ੍ਸਨ੍ਤੇ, ਉਦਕਸਙ੍ਗਹੇ ਉਦਕਚਿਕ੍ਖਲ੍ਲੇ ਓਕਪੁਣ੍ਣੇਹਿ ਚੀਵਰੇਹਿ ਕਿਲਨ੍ਤਰੂਪਾ ਅਦ੍ਧਾਨਂ ਆਗਤਾਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਕਥਿਨਂ [ਕਠਿਨਂ (ਸੀ. ਸ੍ਯਾ.)] ਅਤ੍ਥਰਿਤੁਂ. ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਪਞ੍ਚ ਕਪ੍ਪਿਸ੍ਸਨ੍ਤਿ – ਅਨਾਮਨ੍ਤਚਾਰੋ, ਅਸਮਾਦਾਨਚਾਰੋ, ਗਣਭੋਜਨਂ, ਯਾਵਦਤ੍ਥਚੀਵਰਂ, ਯੋ ਚ ਤਤ੍ਥ ਚੀਵਰੁਪ੍ਪਾਦੋ ਸੋ ਨੇਸਂ ਭਵਿਸ੍ਸਤੀਤਿ. ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਇਮਾਨਿ ਪਞ੍ਚ ਕਪ੍ਪਿਸ੍ਸਨ੍ਤਿ. ਏਵਞ੍ਚ ਪਨ, ਭਿਕ੍ਖਵੇ, ਕਥਿਨਂ ਅਤ੍ਥਰਿਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੩੦੭. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯ ਕਥਿਨਂ ਅਤ੍ਥਰਿਤੁਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ. ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਤਿ ਕਥਿਨਂ ਅਤ੍ਥਰਿਤੁਂ. ਯਸ੍ਸਾਯਸ੍ਮਤੋ ਖਮਤਿ ਇਮਸ੍ਸ ਕਥਿਨਦੁਸ੍ਸਸ੍ਸ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਾਨਂ ਕਥਿਨਂ ਅਤ੍ਥਰਿਤੁਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨਂ ਇਦਂ ਸਙ੍ਘੇਨ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕਥਿਨਂ ਅਤ੍ਥਰਿਤੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੩੦੮. ‘‘ਏਵਂ ਖੋ, ਭਿਕ੍ਖਵੇ, ਅਤ੍ਥਤਂ ਹੋਤਿ ਕਥਿਨਂ, ਏਵਂ ਅਨਤ੍ਥਤਂ. ਕਥਞ੍ਚ ਪਨ, ਭਿਕ੍ਖਵੇ, ਅਨਤ੍ਥਤਂ ਹੋਤਿ ਕਥਿਨਂ? ਨ ਉਲ੍ਲਿਖਿਤਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਧੋਵਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਚੀਵਰਵਿਚਾਰਣਮਤ੍ਤੇਨ [ਨ ਗਣ੍ਟੁਸਕਰਣਮਤ੍ਤੇਨ (ਕ.)] ਅਤ੍ਥਤਂ ਹੋਤਿ ਕਥਿਨਂ, ਨ ਛੇਦਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਬਨ੍ਧਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਓਵਟ੍ਟਿਯਕਰਣਮਤ੍ਤੇਨ [ਨ ਓਵਟ੍ਟੇਯ੍ਯਕਰਣਮਤ੍ਤੇਨ (ਸੀ. ਸ੍ਯਾ.), ਨ ਓਵਦੇਯ੍ਯਕਰਣਮਤ੍ਤੇਨ (ਕ.)] ਅਤ੍ਥਤਂ ਹੋਤਿ ਕਥਿਨਂ, ਨ ਕਣ੍ਡੁਸਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਦਲ਼੍ਹੀਕਮ੍ਮਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਨੁਵਾਤਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਪਰਿਭਣ੍ਡਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਓਵਦ੍ਧੇਯ੍ਯਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਕਮ੍ਬਲਮਦ੍ਦਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਨਿਮਿਤ੍ਤਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਪਰਿਕਥਾਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਕੁਕ੍ਕੁਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਸਨ੍ਨਿਧਿਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਨਿਸ੍ਸਗ੍ਗਿਯੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਕਪ੍ਪਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਸਙ੍ਘਾਟਿਯਾ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਉਤ੍ਤਰਾਸਙ੍ਗੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਅਨ੍ਤਰਵਾਸਕੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਪਞ੍ਚਕੇਨ ਵਾ ਅਤਿਰੇਕਪਞ੍ਚਕੇਨ ਵਾ ਤਦਹੇਵ ਸਞ੍ਛਿਨ੍ਨੇਨ ਸਮਣ੍ਡਲੀਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਪੁਗ੍ਗਲਸ੍ਸ ਅਤ੍ਥਾਰਾ ਅਤ੍ਥਤਂ ਹੋਤਿ ਕਥਿਨਂ; ਸਮ੍ਮਾ ਚੇਵ ਅਤ੍ਥਤਂ ਹੋਤਿ ਕਥਿਨਂ, ਤਞ੍ਚੇ ਨਿਸ੍ਸੀਮਟ੍ਠੋ ਅਨੁਮੋਦਤਿ, ਏਵਮ੍ਪਿ ਅਨਤ੍ਥਤਂ ਹੋਤਿ ਕਥਿਨਂ. ਏਵਂ ਖੋ, ਭਿਕ੍ਖਵੇ, ਅਨਤ੍ਥਤਂ ਹੋਤਿ ਕਥਿਨਂ.

੩੦੯. ‘‘ਕਥਞ੍ਚ, ਭਿਕ੍ਖਵੇ, ਅਤ੍ਥਤਂ ਹੋਤਿ ਕਥਿਨਂ? ਅਹਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਹਤਕਪ੍ਪੇਨ ਅਤ੍ਥਤਂ ਹੋਤਿ ਕਥਿਨਂ, ਪਿਲੋਤਿਕਾਯ ਅਤ੍ਥਤਂ ਹੋਤਿ ਕਥਿਨਂ, ਪਂਸੁਕੂਲੇਨ ਅਤ੍ਥਤਂ ਹੋਤਿ ਕਥਿਨਂ, ਪਾਪਣਿਕੇਨ ਅਤ੍ਥਤਂ ਹੋਤਿ ਕਥਿਨਂ, ਅਨਿਮਿਤ੍ਤਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਪਰਿਕਥਾਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਕੁਕ੍ਕੁਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਸਨ੍ਨਿਧਿਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਨਿਸ੍ਸਗ੍ਗਿਯੇਨ ਅਤ੍ਥਤਂ ਹੋਤਿ ਕਥਿਨਂ, ਕਪ੍ਪਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਸਙ੍ਘਾਟਿਯਾ ਅਤ੍ਥਤਂ ਹੋਤਿ ਕਥਿਨਂ, ਉਤ੍ਤਰਾਸਙ੍ਗੇਨ ਅਤ੍ਥਤਂ ਹੋਤਿ ਕਥਿਨਂ, ਅਨ੍ਤਰਵਾਸਕੇਨ ਅਤ੍ਥਤਂ ਹੋਤਿ ਕਥਿਨਂ, ਪਞ੍ਚਕੇਨ ਵਾ ਅਤਿਰੇਕਪਞ੍ਚਕੇਨ ਵਾ ਤਦਹੇਵ ਸਞ੍ਛਿਨ੍ਨੇਨ ਸਮਣ੍ਡਲੀਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਪੁਗ੍ਗਲਸ੍ਸ ਅਤ੍ਥਾਰਾ ਅਤ੍ਥਤਂ ਹੋਤਿ ਕਥਿਨਂ; ਸਮ੍ਮਾ ਚੇ ਅਤ੍ਥਤਂ ਹੋਤਿ ਕਥਿਨਂ, ਤਞ੍ਚੇ ਸੀਮਟ੍ਠੋ ਅਨੁਮੋਦਤਿ, ਏਵਮ੍ਪਿ ਅਤ੍ਥਤਂ ਹੋਤਿ ਕਥਿਨਂ. ਏਵਂ ਖੋ, ਭਿਕ੍ਖਵੇ, ਅਤ੍ਥਤਂ ਹੋਤਿ ਕਥਿਨਂ.

੩੧੦. ‘‘ਕਥਞ੍ਚ, ਭਿਕ੍ਖਵੇ, ਉਬ੍ਭਤਂ ਹੋਤਿ ਕਥਿਨਂ? ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਕਥਿਨਸ੍ਸ ਉਬ੍ਭਾਰਾਯ – ਪਕ੍ਕਮਨਨ੍ਤਿਕਾ, ਨਿਟ੍ਠਾਨਨ੍ਤਿਕਾ, ਸਨ੍ਨਿਟ੍ਠਾਨਨ੍ਤਿਕਾ, ਨਾਸਨਨ੍ਤਿਕਾ, ਸਵਨਨ੍ਤਿਕਾ, ਆਸਾਵਚ੍ਛੇਦਿਕਾ, ਸੀਮਾਤਿਕ੍ਕਨ੍ਤਿਕਾ, ਸਹੁਬ੍ਭਾਰਾ’’ਤਿ [ਸਉਬ੍ਭਾਰਾਤਿ (ਕ.)].

ਕਥਿਨਾਨੁਜਾਨਨਾ ਨਿਟ੍ਠਿਤਾ.