੧੪੦. ਦ੍ਵੇਵਾਚਿਕਾਦਿਪਵਾਰਣਾ

੨੩੪. ਤੇਨ ਖੋ ਪਨ ਸਮਯੇਨ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਸਵਰਭਯਂ ਅਹੋਸਿ. ਭਿਕ੍ਖੂ ਨਾਸਕ੍ਖਿਂਸੁ ਤੇਵਾਚਿਕਂ ਪਵਾਰੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇਵਾਚਿਕਂ ਪਵਾਰੇਤੁਨ੍ਤਿ.

ਬਾਲ਼੍ਹਤਰਂ ਸਵਰਭਯਂ ਅਹੋਸਿ. ਭਿਕ੍ਖੂ ਨਾਸਕ੍ਖਿਂਸੁ ਦ੍ਵੇਵਾਚਿਕਂ ਪਵਾਰੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਏਕਵਾਚਿਕਂ ਪਵਾਰੇਤੁਨ੍ਤਿ.

ਬਾਲ਼੍ਹਤਰਂ ਸਵਰਭਯਂ ਅਹੋਸਿ. ਭਿਕ੍ਖੂ ਨਾਸਕ੍ਖਿਂਸੁ ਏਕਵਾਚਿਕਂ ਪਵਾਰੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਮਾਨਵਸ੍ਸਿਕਂ ਪਵਾਰੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤਿ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ ਹੋਤਿ. ਤਤ੍ਰ ਚੇ, ਭਿਕ੍ਖਵੇ, ਭਿਕ੍ਖੂਨਂ ਏਵਂ ਹੋਤਿ – ‘‘ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤੀ’’ਤਿ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਮਨੁਸ੍ਸੇਹਿ ਦਾਨਂ ਦੇਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਭਿਕ੍ਖੂਹਿ ਧਮ੍ਮਂ ਭਣਨ੍ਤੇਹਿ…ਪੇ… ਸੁਤ੍ਤਨ੍ਤਿਕੇਹਿ ਸੁਤ੍ਤਨ੍ਤਂ ਸਙ੍ਗਾਯਨ੍ਤੇਹਿ… ਵਿਨਯਧਰੇਹਿ ਵਿਨਯਂ ਵਿਨਿਚ੍ਛਿਨਨ੍ਤੇਹਿ… ਧਮ੍ਮਕਥਿਕੇਹਿ ਧਮ੍ਮਂ ਸਾਕਚ੍ਛਨ੍ਤੇਹਿ… ਭਿਕ੍ਖੂਹਿ ਕਲਹਂ ਕਰੋਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ ਹੋਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਭਿਕ੍ਖੂਹਿ ਕਲਹਂ ਕਰੋਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤੀ’’ਤਿ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਭਿਕ੍ਖੂਹਿ ਕਲਹਂ ਕਰੋਨ੍ਤੇਹਿ ਯੇਭੁਯ੍ਯੇਨ ਰਤ੍ਤਿ ਖੇਪਿਤਾ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਰਤ੍ਤਿ ਵਿਭਾਯਿਸ੍ਸਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ.

ਤੇਨ ਖੋ ਪਨ ਸਮਯੇਨ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ ਹੋਤਿ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ [ਅਨੋਵਸ੍ਸਕਂ (ਕ.)] ਹੋਤਿ, ਮਹਾ ਚ ਮੇਘੋ ਉਗ੍ਗਤੋ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਅਯਂ ਖੋ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ, ਮਹਾ ਚ ਮੇਘੋ ਉਗ੍ਗਤੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਮੇਘੋ ਪਵਸ੍ਸਿਸ੍ਸਤਿ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ ਹੋਤਿ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ ਹੋਤਿ, ਮਹਾ ਚ ਮੇਘੋ ਉਗ੍ਗਤੋ ਹੋਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ, ਮਹਾ ਚ ਮੇਘੋ ਉਗ੍ਗਤੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਮੇਘੋ ਪਵਸ੍ਸਿਸ੍ਸਤੀ’’ਤਿ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ, ਪਰਿਤ੍ਤਞ੍ਚ ਅਨੋਵਸ੍ਸਿਕਂ, ਮਹਾ ਚ ਮੇਘੋ ਉਗ੍ਗਤੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਮੇਘੋ ਪਵਸ੍ਸਿਸ੍ਸਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ.

ਇਧ ਪਨ, ਭਿਕ੍ਖਵੇ, ਅਞ੍ਞਤਰਸ੍ਮਿਂ ਆਵਾਸੇ ਤਦਹੁ ਪਵਾਰਣਾਯ ਰਾਜਨ੍ਤਰਾਯੋ ਹੋਤਿ…ਪੇ… ਚੋਰਨ੍ਤਰਾਯੋ ਹੋਤਿ… ਅਗ੍ਯਨ੍ਤਰਾਯੋ ਹੋਤਿ… ਉਦਕਨ੍ਤਰਾਯੋ ਹੋਤਿ… ਮਨੁਸ੍ਸਨ੍ਤਰਾਯੋ ਹੋਤਿ… ਅਮਨੁਸ੍ਸਨ੍ਤਰਾਯੋ ਹੋਤਿ… ਵਾਲ਼ਨ੍ਤਰਾਯੋ ਹੋਤਿ… ਸਰੀਸਪਨ੍ਤਰਾਯੋ ਹੋਤਿ… ਜੀਵਿਤਨ੍ਤਰਾਯੋ ਹੋਤਿ… ਬ੍ਰਹ੍ਮਚਰਿਯਨ੍ਤਰਾਯੋ ਹੋਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਯਂ ਖੋ, ਬ੍ਰਹ੍ਮਚਰਿਯਨ੍ਤਰਾਯੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਬ੍ਰਹ੍ਮਚਰਿਯਨ੍ਤਰਾਯੋ ਭਵਿਸ੍ਸਤੀ’’ਤਿ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਬ੍ਰਹ੍ਮਚਰਿਯਨ੍ਤਰਾਯੋ. ਸਚੇ ਸਙ੍ਘੋ ਤੇਵਾਚਿਕਂ ਪਵਾਰੇਸ੍ਸਤਿ, ਅਪ੍ਪਵਾਰਿਤੋਵ ਸਙ੍ਘੋ ਭਵਿਸ੍ਸਤਿ, ਅਥਾਯਂ ਬ੍ਰਹ੍ਮਚਰਿਯਨ੍ਤਰਾਯੋ ਭਵਿਸ੍ਸਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ, ਏਕਵਾਚਿਕਂ, ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ.

ਦ੍ਵੇਵਾਚਿਕਾਦਿਪਵਾਰਣਾ ਨਿਟ੍ਠਿਤਾ.