੧੧੯. ਤਸ੍ਸੁਦ੍ਦਾਨਂ

ਉਪਗਨ੍ਤੁਂ ਕਦਾ ਚੇਵ, ਕਤਿ ਅਨ੍ਤਰਾਵਸ੍ਸ ਚ;

ਨ ਇਚ੍ਛਨ੍ਤਿ ਚ ਸਞ੍ਚਿਚ੍ਚ, ਉਕ੍ਕਡ੍ਢਿਤੁਂ ਉਪਾਸਕੋ.

ਗਿਲਾਨੋ ਮਾਤਾ ਚ ਪਿਤਾ, ਭਾਤਾ ਚ ਅਥ ਞਾਤਕੋ;

ਭਿਕ੍ਖੁਗਤਿਕੋ ਵਿਹਾਰੋ, ਵਾਲ਼ਾ ਚਾਪਿ ਸਰੀਸਪਾ.

ਚੋਰੋ ਚੇਵ ਪਿਸਾਚਾ ਚ, ਦਡ੍ਢਾ ਤਦੁਭਯੇਨ ਚ;

ਵੂਲ਼੍ਹੋਦਕੇਨ ਵੁਟ੍ਠਾਸਿ, ਬਹੁਤਰਾ ਚ ਦਾਯਕਾ.

ਲੂਖਪ੍ਪਣੀਤਸਪ੍ਪਾਯ, ਭੇਸਜ੍ਜੁਪਟ੍ਠਕੇਨ ਚ;

ਇਤ੍ਥੀ ਵੇਸੀ ਕੁਮਾਰੀ ਚ, ਪਣ੍ਡਕੋ ਞਾਤਕੇਨ ਚ.

ਰਾਜਾ ਚੋਰਾ ਧੁਤ੍ਤਾ ਨਿਧਿ, ਭੇਦਅਟ੍ਠਵਿਧੇਨ [ਭੇਦਾ ਅਟ੍ਠਵਿਧੇਨ (ਸੀ. ਸ੍ਯਾ.)] ਚ;

ਵਜਸਤ੍ਥਾ ਚ ਨਾਵਾ ਚ, ਸੁਸਿਰੇ ਵਿਟਭਿਯਾ ਚ.

ਅਜ੍ਝੋਕਾਸੇ ਵਸ੍ਸਾਵਾਸੋ, ਅਸੇਨਾਸਨਿਕੇਨ ਚ;

ਛਵਕੁਟਿਕਾ ਛਤ੍ਤੇ ਚ, ਚਾਟਿਯਾ ਚ ਉਪੇਨ੍ਤਿ ਤੇ.

ਕਤਿਕਾ ਪਟਿਸ੍ਸੁਣਿਤ੍ਵਾ, ਬਹਿਦ੍ਧਾ ਚ ਉਪੋਸਥਾ;

ਪੁਰਿਮਿਕਾ ਪਚ੍ਛਿਮਿਕਾ, ਯਥਾਞਾਯੇਨ ਯੋਜਯੇ.

ਅਕਰਣੀ ਪਕ੍ਕਮਤਿ, ਸਕਰਣੀ ਤਥੇਵ ਚ;

ਦ੍ਵੀਹਤੀਹਾ ਚ ਪੁਨ ਚ [ਦ੍ਵੀਹਤੀਹਂ ਵਸਿਤ੍ਵਾਨ (ਸੀ.)], ਸਤ੍ਤਾਹਕਰਣੀਯੇਨ ਚ.

ਸਤ੍ਤਾਹਨਾਗਤਾ ਚੇਵ, ਆਗਚ੍ਛੇਯ੍ਯ ਨ ਏਯ੍ਯ ਵਾ;

ਵਤ੍ਥੁਦ੍ਦਾਨੇ ਅਨ੍ਤਰਿਕਾ, ਤਨ੍ਤਿਮਗ੍ਗਂ ਨਿਸਾਮਯੇਤਿ.

ਇਮਮ੍ਹਿ ਖਨ੍ਧਕੇ ਵਤ੍ਥੂਨਿ ਦ੍ਵੇਪਣ੍ਣਾਸ.

ਵਸ੍ਸੂਪਨਾਯਿਕਕ੍ਖਨ੍ਧਕੋ ਨਿਟ੍ਠਿਤੋ.