੧੧੭. ਅਧਮ੍ਮਿਕਕਤਿਕਾ

੨੦੫. ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਾ ਸਙ੍ਘੇਨ ਏਵਰੂਪਾ ਕਤਿਕਾ ਕਤਾ ਹੋਤਿ – ਅਨ੍ਤਰਾਵਸ੍ਸਂ ਨ ਪਬ੍ਬਾਜੇਤਬ੍ਬਨ੍ਤਿ. ਵਿਸਾਖਾਯ ਮਿਗਾਰਮਾਤੁਯਾ ਨਤ੍ਤਾ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਭਿਕ੍ਖੂ ਏਵਮਾਹਂਸੁ – ‘‘ਸਙ੍ਘੇਨ ਖੋ, ਆਵੁਸੋ, ਏਵਰੂਪਾ ਕਤਿਕਾ ਕਤਾ ‘ਅਨ੍ਤਰਾਵਸ੍ਸਂ ਨ ਪਬ੍ਬਾਜੇਤਬ੍ਬ’ਨ੍ਤਿ. ਆਗਮੇਹਿ, ਆਵੁਸੋ, ਯਾਵ ਭਿਕ੍ਖੂ ਵਸ੍ਸਂ ਵਸਨ੍ਤਿ. ਵਸ੍ਸਂਵੁਟ੍ਠਾ ਪਬ੍ਬਾਜੇਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਵਸ੍ਸਂਵੁਟ੍ਠਾ ਵਿਸਾਖਾਯ ਮਿਗਾਰਮਾਤੁਯਾ ਨਤ੍ਤਾਰਂ ਏਤਦਵੋਚੁਂ – ‘‘ਏਹਿ, ਦਾਨਿ, ਆਵੁਸੋ, ਪਬ੍ਬਜਾਹੀ’’ਤਿ. ਸੋ ਏਵਮਾਹ – ‘‘ਸਚਾਹਂ, ਭਨ੍ਤੇ, ਪਬ੍ਬਜਿਤੋ ਅਸ੍ਸਂ, ਅਭਿਰਮੇਯ੍ਯਾਮਹਂ [ਅਭਿਰਮੇਯ੍ਯਂ ਚਾਹਂ (ਸੀ.)]. ਨ ਦਾਨਾਹਂ, ਭਨ੍ਤੇ, ਪਬ੍ਬਜਿਸ੍ਸਾਮੀ’’ਤਿ. ਵਿਸਾਖਾ ਮਿਗਾਰਮਾਤਾ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਏਵਰੂਪਂ ਕਤਿਕਂ ਕਰਿਸ੍ਸਨ੍ਤਿ ‘ਨ ਅਨ੍ਤਰਾਵਸ੍ਸਂ ਪਬ੍ਬਾਜੇਤਬ੍ਬ’ਨ੍ਤਿ. ਕਂ ਕਾਲਂ ਧਮ੍ਮੋ ਨ ਚਰਿਤਬ੍ਬੋ’’ਤਿ? ਅਸ੍ਸੋਸੁਂ ਖੋ ਭਿਕ੍ਖੂ ਵਿਸਾਖਾਯ ਮਿਗਾਰਮਾਤੁਯਾ ਉਜ੍ਝਾਯਨ੍ਤਿਯਾ ਖਿਯ੍ਯਨ੍ਤਿਯਾ ਵਿਪਾਚੇਨ੍ਤਿਯਾ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਏਵਰੂਪਾ ਕਤਿਕਾ ਕਾਤਬ੍ਬਾ – ‘ਨ ਅਨ੍ਤਰਾਵਸ੍ਸਂ ਪਬ੍ਬਾਜੇਤਬ੍ਬ’ਨ੍ਤਿ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਅਧਮ੍ਮਿਕਕਤਿਕਾ ਨਿਟ੍ਠਿਤਾ.