੧੦੭. ਵਸ੍ਸੂਪਨਾਯਿਕਾਨੁਜਾਨਨਾ

੧੮੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਭਗਵਤਾ ਭਿਕ੍ਖੂਨਂ ਵਸ੍ਸਾਵਾਸੋ ਅਪਞ੍ਞਤ੍ਤੋ ਹੋਤਿ. ਤੇਇਧ ਭਿਕ੍ਖੂ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਿਸ੍ਸਨ੍ਤਿ, ਹਰਿਤਾਨਿ ਤਿਣਾਨਿ ਸਮ੍ਮਦ੍ਦਨ੍ਤਾ, ਏਕਿਨ੍ਦ੍ਰਿਯਂ ਜੀਵਂ ਵਿਹੇਠੇਨ੍ਤਾ, ਬਹੂ ਖੁਦ੍ਦਕੇ ਪਾਣੇ ਸਙ੍ਘਾਤਂ ਆਪਾਦੇਨ੍ਤਾ. ਇਮੇ ਹਿ ਨਾਮ ਅਞ੍ਞਤਿਤ੍ਥਿਯਾ ਦੁਰਕ੍ਖਾਤਧਮ੍ਮਾ ਵਸ੍ਸਾਵਾਸਂ ਅਲ੍ਲੀਯਿਸ੍ਸਨ੍ਤਿ ਸਙ੍ਕਸਾਯਿਸ੍ਸਨ੍ਤਿ. ਇਮੇ ਹਿ ਨਾਮ ਸਕੁਨ੍ਤਕਾ ਰੁਕ੍ਖਗ੍ਗੇਸੁ ਕੁਲਾਵਕਾਨਿ ਕਰਿਤ੍ਵਾ ਵਸ੍ਸਾਵਾਸਂ ਅਲ੍ਲੀਯਿਸ੍ਸਨ੍ਤਿ ਸਙ੍ਕਸਾਯਿਸ੍ਸਨ੍ਤਿ [ਸਙ੍ਕਾਸਯਿਸ੍ਸਨ੍ਤਿ (ਸੀ. ਸ੍ਯਾ.)]. ਇਮੇ ਪਨ ਸਮਣਾ ਸਕ੍ਯਪੁਤ੍ਤਿਯਾ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਨ੍ਤਿ, ਹਰਿਤਾਨਿ ਤਿਣਾਨਿ ਸਮ੍ਮਦ੍ਦਨ੍ਤਾ, ਏਕਿਨ੍ਦ੍ਰਿਯਂ ਜੀਵਂ ਵਿਹੇਠੇਨ੍ਤਾ, ਬਹੂ ਖੁਦ੍ਦਕੇ ਪਾਣੇ ਸਙ੍ਘਾਤਂ ਆਪਾਦੇਨ੍ਤਾ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤੁ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਦਾ ਨੁ ਖੋ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਾਨੇ ਵਸ੍ਸਂ ਉਪਗਨ੍ਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਤਿ ਨੁ ਖੋ ਵਸ੍ਸੂਪਨਾਯਿਕਾ’’ਤਿ? ਭਗਵਤੋ ਏਤਮਤ੍ਥਂ

ਆਰੋਚੇਸੁਂ. ਦ੍ਵੇਮਾ, ਭਿਕ੍ਖਵੇ, ਵਸ੍ਸੂਪਨਾਯਿਕਾ – ਪੁਰਿਮਿਕਾ, ਪਚ੍ਛਿਮਿਕਾ. ਅਪਰਜ੍ਜੁਗਤਾਯ ਆਸਾਲ਼੍ਹਿਯਾ ਪੁਰਿਮਿਕਾ ਉਪਗਨ੍ਤਬ੍ਬਾ, ਮਾਸਗਤਾਯ ਆਸਾਲ਼੍ਹਿਯਾ ਪਚ੍ਛਿਮਿਕਾ ਉਪਗਨ੍ਤਬ੍ਬਾ – ਇਮਾ ਖੋ, ਭਿਕ੍ਖਵੇ, ਦ੍ਵੇ ਵਸ੍ਸੂਪਨਾਯਿਕਾਤਿ.

ਵਸ੍ਸੂਪਨਾਯਿਕਾਨੁਜਾਨਨਾ ਨਿਟ੍ਠਿਤਾ.