੧੦. ਕੋਸਮ੍ਬਕਕ੍ਖਨ੍ਧਕੋ

੨੭੧. ਕੋਸਮ੍ਬਕਵਿਵਾਦਕਥਾ

੪੫੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿ [ਆਪਤ੍ਤਿਦਿਟ੍ਠੀ (ਸੀ.)] ਹੋਤਿ; ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾ ਪਤ੍ਤਿਦਿਟ੍ਠਿ ਹੋਤਿ; ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਅਥ ਖੋ ਤੇ ਭਿਕ੍ਖੂ ਤਂ ਭਿਕ੍ਖੁਂ ਏਤਦਵੋਚੁਂ – ‘‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’’ਨ੍ਤਿ? ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ ਯਮਹਂ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ ਤੇ ਭਿਕ੍ਖੂ ਸਾਮਗ੍ਗਿਂ ਲਭਿਤ੍ਵਾ ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ. ਸੋ ਚ ਭਿਕ੍ਖੁ ਬਹੁਸ੍ਸੁਤੋ ਹੋਤਿ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਅਥ ਖੋ ਸੋ ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਅਨਾਪਤ੍ਤਿ ਏਸਾ, ਆਵੁਸੋ, ਨੇਸਾ ਆਪਤ੍ਤਿ. ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ. ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਹੋਥ ਮੇ ਆਯਸ੍ਮਨ੍ਤੋ ਧਮ੍ਮਤੋ ਵਿਨਯਤੋ ਪਕ੍ਖਾ’’ਤਿ. ਅਲਭਿ ਖੋ ਸੋ ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ. ਜਾਨਪਦਾਨਮ੍ਪਿ ਸਨ੍ਦਿਟ੍ਠਾਨਂ ਸਮ੍ਭਤ੍ਤਾਨਂ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ਅਨਾਪਤ੍ਤਿ ਏਸਾ, ਆਵੁਸੋ, ਨੇਸਾ ਆਪਤ੍ਤਿ. ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ. ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਹੋਨ੍ਤੁ ਮੇ ਆਯਸ੍ਮਨ੍ਤੋ ਧਮ੍ਮਤੋ ਵਿਨਯਤੋ ਪਕ੍ਖਾ’’ਤਿ. ਅਲਭਿ ਖੋ ਸੋ ਭਿਕ੍ਖੁ ਜਾਨਪਦੇਪਿ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ. ਅਥ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਉਕ੍ਖੇਪਕੇ ਭਿਕ੍ਖੂ ਏਤਦਵੋਚੁਂ – ‘‘ਅਨਾਪਤ੍ਤਿ ਏਸਾ, ਆਵੁਸੋ, ਨੇਸਾ ਆਪਤ੍ਤਿ. ਅਨਾਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਆਪਨ੍ਨੋ. ਅਨੁਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਉਕ੍ਖਿਤ੍ਤੋ. ਅਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨਾ’’ਤਿ. ਏਵਂ ਵੁਤ੍ਤੇ ਉਕ੍ਖੇਪਕਾ ਭਿਕ੍ਖੂ ਉਕ੍ਖਿਤ੍ਤਾਨੁਵਤ੍ਤਕੇ ਭਿਕ੍ਖੂ ਏਤਦਵੋਚੁਂ – ‘‘ਆਪਤ੍ਤਿ ਏਸਾ ਆਵੁਸੋ, ਨੇਸਾ ਅਨਾਪਤ੍ਤਿ. ਆਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨਾਪਨ੍ਨੋ. ਉਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨੁਕ੍ਖਿਤ੍ਤੋ. ਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਮਾ ਖੋ ਤੁਮ੍ਹੇ ਆਯਸ੍ਮਨ੍ਤੋ ਏਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁਵਤ੍ਤਿਤ੍ਥ ਅਨੁਪਰਿਵਾਰੇਥਾ’’ਤਿ. ਏਵਮ੍ਪਿ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਉਕ੍ਖੇਪਕੇਹਿ ਭਿਕ੍ਖੂਹਿ ਵੁਚ੍ਚਮਾਨਾ ਤਥੇਵ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁਵਤ੍ਤਿਂਸੁ ਅਨੁਪਰਿਵਾਰੇਸੁਂ.

੪੫੨. ਅਥ ਖੋ ਅਞ੍ਞਤਰੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਇਧ, ਭਨ੍ਤੇ, ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਅਹੋਸਿ. ਸੋ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿ ਅਹੋਸਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿਨੋ ਅਹੇਸੁਂ. ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਅਹੇਸੁਂ. ਅਥ ਖੋ ਤੇ, ਭਨ੍ਤੇ, ਭਿਕ੍ਖੂ ਤਂ ਭਿਕ੍ਖੁਂ ਏਤਦਵੋਚੁਂ – ‘ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’ਨ੍ਤਿ? ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ ਯਮਹਂ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ ਤੇ, ਭਨ੍ਤੇ, ਭਿਕ੍ਖੂ ਸਾਮਗ੍ਗਿਂ ਲਭਿਤ੍ਵਾ ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ. ਸੋ ਚ, ਭਨ੍ਤੇ, ਭਿਕ੍ਖੁ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਅਥ ਖੋ ਸੋ, ਭਨ੍ਤੇ, ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘ਅਨਾਪਤ੍ਤਿ ਏਸਾ, ਆਵੁਸੋ; ਨੇਸਾ ਆਪਤ੍ਤਿ. ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ. ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਹੋਥ ਮੇ ਆਯਸ੍ਮਨ੍ਤੋ ਧਮ੍ਮਤੋ ਵਿਨਯਤੋ ਪਕ੍ਖਾ’ਤਿ. ਅਲਭਿ ਖੋ ਸੋ, ਭਨ੍ਤੇ, ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ. ਜਾਨਪਦਾਨਮ੍ਪਿ ਸਨ੍ਦਿਟ੍ਠਾਨਂ ਸਮ੍ਭਤ੍ਤਾਨਂ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ‘ਅਨਾਪਤ੍ਤਿ ਏਸਾ, ਆਵੁਸੋ; ਨੇਸਾ ਆਪਤ੍ਤਿ. ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ. ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਹੋਨ੍ਤੁ ਮੇ ਆਯਸ੍ਮਨ੍ਤੋ ਧਮ੍ਮਤੋ ਵਿਨਯਤੋ ਪਕ੍ਖਾ’ਤਿ. ਅਲਭਿ ਖੋ ਸੋ, ਭਨ੍ਤੇ, ਭਿਕ੍ਖੁ ਜਾਨਪਦੇਪਿ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ. ਅਥ ਖੋ ਤੇ, ਭਨ੍ਤੇ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਉਕ੍ਖੇਪਕੇ ਭਿਕ੍ਖੂ ਏਤਦਵੋਚੁਂ – ‘ਅਨਾਪਤ੍ਤਿ ਏਸਾ, ਆਵੁਸੋ; ਨੇਸਾ ਆਪਤ੍ਤਿ. ਅਨਾਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਆਪਨ੍ਨੋ. ਅਨੁਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਉਕ੍ਖਿਤ੍ਤੋ. ਅਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨਾ’ਤਿ. ਏਵਂ ਵੁਤ੍ਤੇ ਤੇ, ਭਨ੍ਤੇ, ਉਕ੍ਖੇਪਕਾ ਭਿਕ੍ਖੂ ਉਕ੍ਖਿਤ੍ਤਾਨੁਵਤ੍ਤਕੇ ਭਿਕ੍ਖੂ ਏਤਦਵੋਚੁਂ – ‘ਆਪਤ੍ਤਿ ਏਸਾ, ਆਵੁਸੋ; ਨੇਸਾ ਅਨਾਪਤ੍ਤਿ. ਆਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨਾਪਨ੍ਨੋ. ਉਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨੁਕ੍ਖਿਤ੍ਤੋ. ਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਮਾ ਖੋ ਤੁਮ੍ਹੇ ਆਯਸ੍ਮਨ੍ਤੋ ਏਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁਵਤ੍ਤਿਤ੍ਥ ਅਨੁਪਰਿਵਾਰੇਥਾ’ਤਿ. ਏਵਮ੍ਪਿ ਖੋ ਤੇ, ਭਨ੍ਤੇ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਉਕ੍ਖੇਪਕੇਹਿ ਭਿਕ੍ਖੂਹਿ ਵੁਚ੍ਚਮਾਨਾ ਤਥੇਵ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁਵਤ੍ਤਨ੍ਤਿ ਅਨੁਪਰਿਵਾਰੇਨ੍ਤੀ’’ਤਿ.

੪੫੩. ਅਥ ਖੋ ਭਗਵਾ ‘ਭਿਨ੍ਨੋ ਭਿਕ੍ਖੁਸਙ੍ਘੋ, ਭਿਨ੍ਨੋ ਭਿਕ੍ਖੁਸਙ੍ਘੋ’ਤਿ – ਉਟ੍ਠਾਯਾਸਨਾ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗਵਾ ਉਕ੍ਖੇਪਕੇ ਭਿਕ੍ਖੂ ਏਤਦਵੋਚ – ‘‘ਮਾ ਖੋ ਤੁਮ੍ਹੇ, ਭਿਕ੍ਖਵੇ, ‘ਪਟਿਭਾਤਿ ਨੋ, ਪਟਿਭਾਤਿ ਨੋ’ਤਿ ਯਸ੍ਮਿਂ ਵਾ ਤਸ੍ਮਿਂ ਵਾ ਭਿਕ੍ਖੁਂ ਉਕ੍ਖਿਪਿਤਬ੍ਬਂ ਮਞ੍ਞਿਤ੍ਥ’’.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਤਂ ਭਿਕ੍ਖੁਂ ਏਵਂ ਜਾਨਨ੍ਤਿ – ‘ਅਯਂ ਖੋ ਆਯਸ੍ਮਾ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਸਚੇ ਮਯਂ ਇਮਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਾਮ, ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਉਪੋਸਥਂ ਕਰਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਉਪੋਸਥਂ ਕਰਿਸ੍ਸਾਮ, ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਹਿ, ਭਿਕ੍ਖਵੇ, ਭਿਕ੍ਖੂਹਿ ਨ ਸੋ ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਤਂ ਭਿਕ੍ਖੁਂ ਏਵਂ ਜਾਨਨ੍ਤਿ – ‘ਅਯਂ ਖੋ ਆਯਸ੍ਮਾ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਸਚੇ ਮਯਂ ਇਮਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਾਮ, ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਪਵਾਰੇਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਪਵਾਰੇਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਸਙ੍ਘਕਮ੍ਮਂ ਕਰਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਸਙ੍ਘਕਮ੍ਮਂ ਕਰਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਆਸਨੇ ਨਿਸੀਦਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਆਸਨੇ ਨਿਸੀਦਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਯਾਗੁਪਾਨੇ ਨਿਸੀਦਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਯਾਗੁਪਾਨੇ ਨਿਸੀਦਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਭਤ੍ਤਗ੍ਗੇ ਨਿਸੀਦਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਭਤ੍ਤਗ੍ਗੇ ਨਿਸੀਦਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਵਸਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਏਕਚ੍ਛਨ੍ਨੇ ਵਸਿਸ੍ਸਾਮ. ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਾਮ, ਵਿਨਾ ਇਮਿਨਾ ਭਿਕ੍ਖੁਨਾ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਾਮ. ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਹਿ, ਭਿਕ੍ਖਵੇ, ਭਿਕ੍ਖੂਹਿ ਨ ਸੋ ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਤਬ੍ਬੋ’’ਤਿ.

੪੫੪. ਅਥ ਖੋ ਭਗਵਾ ਉਕ੍ਖੇਪਕਾਨਂ ਭਿਕ੍ਖੂਨਂ ਏਤਮਤ੍ਥਂ ਭਾਸਿਤ੍ਵਾ ਉਟ੍ਠਾਯਾਸਨਾ ਯੇਨ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗਵਾ ਉਕ੍ਖਿਤ੍ਤਾਨੁਵਤ੍ਤਕੇ ਭਿਕ੍ਖੂ ਏਤਦਵੋਚ – ‘‘ਮਾ ਖੋ ਤੁਮ੍ਹੇ, ਭਿਕ੍ਖਵੇ, ਆਪਤ੍ਤਿਂ ਆਪਜ੍ਜਿਤ੍ਵਾ ‘ਨਾਮ੍ਹ ਆਪਨ੍ਨਾ, ਨਾਮ੍ਹ ਆਪਨ੍ਨਾ’ਤਿ ਆਪਤ੍ਤਿਂ ਨ ਪਟਿਕਾਤਬ੍ਬਂ ਮਞ੍ਞਿਤ੍ਥ’’.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਤੇ ਭਿਕ੍ਖੂ ਏਵਂ ਜਾਨਾਤਿ – ‘ਇਮੇ ਖੋ ਆਯਸ੍ਮਨ੍ਤੋ [ਆਯਸ੍ਮਨ੍ਤਾ (ਕ.)] ਬਹੁਸ੍ਸੁਤਾ ਆਗਤਾਗਮਾ ਧਮ੍ਮਧਰਾ ਵਿਨਯਧਰਾ ਮਾਤਿਕਾਧਰਾ ਪਣ੍ਡਿਤਾ ਬ੍ਯਤ੍ਤਾ ਮੇਧਾਵਿਨੋ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ, ਨਾਲਂ ਮਮਂ ਵਾ ਕਾਰਣਾ ਅਞ੍ਞੇਸਂ ਵਾ ਕਾਰਣਾ ਛਨ੍ਦਾ ਦੋਸਾ ਮੋਹਾ ਭਯਾ ਅਗਤਿਂ ਗਨ੍ਤੁਂ. ਸਚੇ ਮਂ ਇਮੇ ਭਿਕ੍ਖੂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਨ੍ਤਿ, ਨ ਮਯਾ ਸਦ੍ਧਿਂ ਉਪੋਸਥਂ ਕਰਿਸ੍ਸਨ੍ਤਿ, ਵਿਨਾ ਮਯਾ ਉਪੋਸਥਂ ਕਰਿਸ੍ਸਨ੍ਤਿ, ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਨ, ਭਿਕ੍ਖਵੇ, ਭਿਕ੍ਖੁਨਾ ਪਰੇਸਮ੍ਪਿ ਸਦ੍ਧਾਯ ਸਾ ਆਪਤ੍ਤਿ ਦੇਸੇਤਬ੍ਬਾ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ. ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਤੇ ਭਿਕ੍ਖੂ ਏਵਂ ਜਾਨਾਤਿ – ‘ਇਮੇ ਖੋ ਆਯਸ੍ਮਨ੍ਤੋ ਬਹੁਸ੍ਸੁਤਾ ਆਗਤਾਗਮਾ ਧਮ੍ਮਧਰਾ ਵਿਨਯਧਰਾ ਮਾਤਿਕਾਧਰਾ ਪਣ੍ਡਿਤਾ ਬ੍ਯਤ੍ਤਾ ਮੇਧਾਵਿਨੋ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ, ਨਾਲਂ ਮਮਂ ਵਾ ਕਾਰਣਾ ਅਞ੍ਞੇਸਂ ਵਾ ਕਾਰਣਾ ਛਨ੍ਦਾ ਦੋਸਾ ਮੋਹਾ ਭਯਾ ਅਗਤਿਂ ਗਨ੍ਤੁਂ. ਸਚੇ ਮਂ ਇਮੇ ਭਿਕ੍ਖੂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਨ੍ਤਿ, ਨ ਮਯਾ ਸਦ੍ਧਿਂ ਪਵਾਰੇਸ੍ਸਨ੍ਤਿ, ਵਿਨਾ ਮਯਾ ਪਵਾਰੇਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ, ਵਿਨਾ ਮਯਾ ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਆਸਨੇ ਨਿਸੀਦਿਸ੍ਸਨ੍ਤਿ, ਵਿਨਾ ਮਯਾ ਆਸਨੇ ਨਿਸੀਦਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਯਾਗੁਪਾਨੇ ਨਿਸੀਦਿਸ੍ਸਨ੍ਤਿ, ਵਿਨਾ ਮਯਾ ਯਾਗੁਪਾਨੇ ਨਿਸੀਦਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਭਤ੍ਤਗ੍ਗੇ ਨਿਸੀਦਿਸ੍ਸਨ੍ਤਿ ਵਿਨਾ ਮਯਾ ਭਤ੍ਤਗ੍ਗੇ ਨਿਸੀਦਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਏਕਚ੍ਛਨ੍ਨੇ ਵਸਿਸ੍ਸਨ੍ਤਿ, ਵਿਨਾ ਮਯਾ ਏਕਚ੍ਛਨ੍ਨੇ ਵਸਿਸ੍ਸਨ੍ਤਿ. ਨ ਮਯਾ ਸਦ੍ਧਿਂ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਨ੍ਤਿ, ਵਿਨਾ ਮਯਾ ਯਥਾਵੁਡ੍ਢਂ ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਨ੍ਤਿ, ਭਵਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਨ, ਭਿਕ੍ਖਵੇ, ਭਿਕ੍ਖੁਨਾ ਪਰੇਸਮ੍ਪਿ ਸਦ੍ਧਾਯ ਸਾ ਆਪਤ੍ਤਿ ਦੇਸੇਤਬ੍ਬਾ’’ਤਿ. ਅਥ ਖੋ ਭਗਵਾ ਉਕ੍ਖਿਤ੍ਤਾਨੁਵਤ੍ਤਕਾਨਂ ਭਿਕ੍ਖੂਨਂ ਏਤਮਤ੍ਥਂ ਭਾਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

੪੫੫. ਤੇਨ ਖੋ ਪਨ ਸਮਯੇਨ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਤ੍ਥੇਵ ਅਨ੍ਤੋਸੀਮਾਯ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ. ਉਕ੍ਖੇਪਕਾ ਪਨ ਭਿਕ੍ਖੂ ਨਿਸ੍ਸੀਮਂ ਗਨ੍ਤ੍ਵਾ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ. ਅਥ ਖੋ ਅਞ੍ਞਤਰੋ ਉਕ੍ਖੇਪਕੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਤੇ, ਭਨ੍ਤੇ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਤ੍ਥੇਵ ਅਨ੍ਤੋਸੀਮਾਯ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ. ਮਯਂ ਪਨ ਉਕ੍ਖੇਪਕਾ ਭਿਕ੍ਖੂ ਨਿਸ੍ਸੀਮਂ ਗਨ੍ਤ੍ਵਾ ਉਪੋਸਥਂ ਕਰੋਮ, ਸਙ੍ਘਕਮ੍ਮਂ ਕਰੋਮਾ’’ਤਿ. ‘‘ਤੇ ਚੇ, ਭਿਕ੍ਖੁ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਤ੍ਥੇਵ ਅਨ੍ਤੋਸੀਮਾਯ ਉਪੋਸਥਂ ਕਰਿਸ੍ਸਨ੍ਤਿ, ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ, ਯਥਾ ਮਯਾ ਞਤ੍ਤਿ ਚ ਅਨੁਸ੍ਸਾਵਨਾ ਚ ਪਞ੍ਞਤ੍ਤਾ, ਤੇਸਂ ਤਾਨਿ ਕਮ੍ਮਾਨਿ ਧਮ੍ਮਿਕਾਨਿ ਕਮ੍ਮਾਨਿ ਭਵਿਸ੍ਸ’’ਨ੍ਤਿ ਅਕੁਪ੍ਪਾਨਿ ਠਾਨਾਰਹਾਨਿ. ਤੁਮ੍ਹੇ ਚੇ, ਭਿਕ੍ਖੁ, ਉਕ੍ਖੇਪਕਾ ਭਿਕ੍ਖੂ ਤਤ੍ਥੇਵ ਅਨ੍ਤੋਸੀਮਾਯ ਉਪੋਸਥਂ ਕਰਿਸ੍ਸਥ, ਸਙ੍ਘਕਮ੍ਮਂ ਕਰਿਸ੍ਸਥ, ਯਥਾ ਮਯਾ ਞਤ੍ਤਿ ਚ ਅਨੁਸ੍ਸਾਵਨਾ ਚ ਪਞ੍ਞਤ੍ਤਾ, ਤੁਮ੍ਹਾਕਮ੍ਪਿ ਤਾਨਿ ਕਮ੍ਮਾਨਿ ਧਮ੍ਮਿਕਾਨਿ ਕਮ੍ਮਾਨਿ ਭਵਿਸ੍ਸਨ੍ਤਿ ਅਕੁਪ੍ਪਾਨਿ ਠਾਨਾਰਹਾਨਿ. ਤਂ ਕਿਸ੍ਸ ਹੇਤੁ? ਨਾਨਾਸਂਵਾਸਕਾ ਏਤੇ [ਤੇ (ਸ੍ਯਾ.)] ਭਿਕ੍ਖੂ [ਭਿਕ੍ਖੁ (ਸੀ. ਸ੍ਯਾ.)] ਤੁਮ੍ਹੇਹਿ, ਤੁਮ੍ਹੇ ਚ ਤੇਹਿ ਨਾਨਾਸਂਵਾਸਕਾ.

‘‘ਦ੍ਵੇਮਾ, ਭਿਕ੍ਖੁ, ਨਾਨਾਸਂਵਾਸਕਭੂਮਿਯੋ – ਅਤ੍ਤਨਾ ਵਾ ਅਤ੍ਤਾਨਂ ਨਾਨਾਸਂਵਾਸਕਂ ਕਰੋਤਿ, ਸਮਗ੍ਗੋ ਵਾ ਨਂ ਸਙ੍ਘੋ ਉਕ੍ਖਿਪਤਿ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ. ਇਮਾ ਖੋ, ਭਿਕ੍ਖੁ, ਦ੍ਵੇ ਨਾਨਾਸਂਵਾਸਕਭੂਮਿਯੋ. ਦ੍ਵੇਮਾ, ਭਿਕ੍ਖੁ, ਸਮਾਨਸਂਵਾਸਕਭੂਮਿਯੋ – ਅਤ੍ਤਨਾ ਵਾ ਅਤ੍ਤਾਨਂ ਸਮਾਨਸਂਵਾਸਂ ਕਰੋਤਿ, ਸਮਗ੍ਗੋ ਵਾ ਨਂ ਸਙ੍ਘੋ ਉਕ੍ਖਿਤ੍ਤਂ ਓਸਾਰੇਤਿ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ. ਇਮਾ ਖੋ, ਭਿਕ੍ਖੁ, ਦ੍ਵੇ ਸਮਾਨਸਂਵਾਸਕਭੂਮਿਯੋ’’ਤਿ.

੪੫੬. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ ਵਚੀਕਮ੍ਮਂ ਉਪਦਂਸੇਨ੍ਤਿ, ਹਤ੍ਥਪਰਾਮਾਸਂ ਕਰੋਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ ਵਚੀਕਮ੍ਮਂ ਉਪਦਂਸੇਸ੍ਸਨ੍ਤਿ, ਹਤ੍ਥਪਰਾਮਾਸਂ ਕਰਿਸ੍ਸਨ੍ਤੀ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ ਵਚੀਕਮ੍ਮਂ ਉਪਦਂਸੇਸ੍ਸਨ੍ਤਿ, ਹਤ੍ਥਪਰਾਮਾਸਂ ਕਰਿਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ…ਪੇ… ਹਤ੍ਥਪਰਾਮਾਸਂ ਕਰੋਨ੍ਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਨ੍ਨੇ, ਭਿਕ੍ਖਵੇ, ਸਙ੍ਘੇ ਅਧਮ੍ਮਿਯਾਯਮਾਨੇ [ਅਧਮ੍ਮਿਯਮਾਨੇ (ਸੀ. ਸ੍ਯਾ. ਕਤ੍ਥਚਿ) ਅਧਮ੍ਮੀਯਮਾਨੇ (ਕ.)] ਅਸਮ੍ਮੋਦਿਕਾਯ ਵਤ੍ਤਮਾਨਾਯ [-‘‘ਅਸਮ੍ਮੋਦਿਕਾਵਤ੍ਤਮਾਨਾਯ’’ ਇਤਿ ਅਟ੍ਠਕਥਾਯਂ ਸਂਵਣ੍ਣੇਤਬ੍ਬਪਾਠੋ] ‘ਏਤ੍ਤਾਵਤਾ ਨ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ ਵਚੀਕਮ੍ਮਂ ਉਪਦਂਸੇਸ੍ਸਾਮ, ਹਤ੍ਥਪਰਾਮਾਸਂ ਕਰਿਸ੍ਸਾਮਾ’ਤਿ ਆਸਨੇ ਨਿਸੀਦਿਤਬ੍ਬਂ. ਭਿਨ੍ਨੇ, ਭਿਕ੍ਖਵੇ, ਸਙ੍ਘੇ ਧਮ੍ਮਿਯਾਯਮਾਨੇ ਸਮ੍ਮੋਦਿਕਾਯ ਵਤ੍ਤਮਾਨਾਯ ਆਸਨਨ੍ਤਰਿਕਾਯ ਨਿਸੀਦਿਤਬ੍ਬ’’ਨ੍ਤਿ.

੪੫੭. [ਮ. ਨਿ. ੩.੨੩੬ ਥੋਕਂ ਵਿਸਦਿਸਂ] ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਙ੍ਘਮਜ੍ਝੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਹਰਨ੍ਤਿ. ਤੇ ਨ ਸਕ੍ਕੋਨ੍ਤਿ ਤਂ ਅਧਿਕਰਣਂ ਵੂਪਸਮੇਤੁਂ. ਅਥ ਖੋ ਅਞ੍ਞਤਰੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਇਧ, ਭਨ੍ਤੇ, ਭਿਕ੍ਖੂ ਸਙ੍ਘਮਜ੍ਝੇ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਹਰਨ੍ਤਿ. ਤੇ ਨ ਸਕ੍ਕੋਨ੍ਤਿ ਤਂ ਅਧਿਕਰਣਂ ਵੂਪਸਮੇਤੁਂ. ਸਾਧੁ, ਭਨ੍ਤੇ, ਭਗਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਤੁ ਅਨੁਕਮ੍ਪਂ ਉਪਾਦਾਯਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਭਗਵਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਅਲਂ, ਭਿਕ੍ਖਵੇ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ. ਏਵਂ ਵੁਤ੍ਤੇ ਅਞ੍ਞਤਰੋ ਅਧਮ੍ਮਵਾਦੀ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਆਗਮੇਤੁ, ਭਨ੍ਤੇ, ਭਗਵਾ ਧਮ੍ਮਸ੍ਸਾਮੀ; ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਮਨੁਯੁਤ੍ਤੋ ਵਿਹਰਤੁ. ਮਯਮੇਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ. ਦੁਤਿਯਮ੍ਪਿ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਅਲਂ, ਭਿਕ੍ਖਵੇ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ. ਦੁਤਿਯਮ੍ਪਿ ਖੋ ਸੋ ਅਧਮ੍ਮਵਾਦੀ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਆਗਮੇਤੁ, ਭਨ੍ਤੇ, ਭਗਵਾ ਧਮ੍ਮਸ੍ਸਾਮੀ; ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਮਨੁਯੁਤ੍ਤੋ ਵਿਹਰਤੁ. ਮਯਮੇਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ.

ਕੋਸਮ੍ਬਕਵਿਵਾਦਕਥਾ ਨਿਟ੍ਠਿਤਾ.

੨੭੨. ਦੀਘਾਵੁਵਤ੍ਥੁ

੪੫੮. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭੂਤਪੁਬ੍ਬਂ, ਭਿਕ੍ਖਵੇ, ਬਾਰਾਣਸਿਯਂ [ਵਜਿਰਬੁਦ੍ਧਿਟੀਕਾ ਓਲੋਕੇਤਬ੍ਬਾ] ਬ੍ਰਹ੍ਮਦਤ੍ਤੋ ਨਾਮ ਕਾਸਿਰਾਜਾ ਅਹੋਸਿ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਮਹਬ੍ਬਲੋ ਮਹਾਵਾਹਨੋ ਮਹਾਵਿਜਿਤੋ ਪਰਿਪੁਣ੍ਣਕੋਸਕੋਟ੍ਠਾਗਾਰੋ. ਦੀਘੀਤਿ ਨਾਮ ਕੋਸਲਰਾਜਾ ਅਹੋਸਿ ਦਲਿਦ੍ਦੋ ਅਪ੍ਪਧਨੋ ਅਪ੍ਪਭੋਗੋ ਅਪ੍ਪਬਲੋ ਅਪ੍ਪਵਾਹਨੋ ਅਪ੍ਪਵਿਜਿਤੋ ਅਪਰਿਪੁਣ੍ਣਕੋਸਕੋਟ੍ਠਾਗਾਰੋ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਦੀਘੀਤਿਂ ਕੋਸਲਰਾਜਾਨਂ ਅਬ੍ਭੁਯ੍ਯਾਸਿ. ਅਸ੍ਸੋਸਿ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ – ‘‘ਬ੍ਰਹ੍ਮਦਤ੍ਤੋ ਕਿਰ ਕਾਸਿਰਾਜਾ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਮਮਂ ਅਬ੍ਭੁਯ੍ਯਾਤੋ’’ਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਏਤਦਹੋਸਿ – ‘‘ਬ੍ਰਹ੍ਮਦਤ੍ਤੋ ਖੋ ਕਾਸਿਰਾਜਾ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਮਹਬ੍ਬਲੋ ਮਹਾਵਾਹਨੋ ਮਹਾਵਿਜਿਤੋ ਪਰਿਪੁਣ੍ਣਕੋਸਕੋਟ੍ਠਾਗਾਰੋ, ਅਹਂ ਪਨਮ੍ਹਿ ਦਲਿਦ੍ਦੋ ਅਪ੍ਪਧਨੋ ਅਪ੍ਪਭੋਗੋ ਅਪ੍ਪਬਲੋ ਅਪ੍ਪਵਾਹਨੋ ਅਪ੍ਪਵਿਜਿਤੋ ਅਪਰਿਪੁਣ੍ਣਕੋਸਕੋਟ੍ਠਾਗਾਰੋ, ਨਾਹਂ ਪਟਿਬਲੋ ਬ੍ਰਹ੍ਮਦਤ੍ਤੇਨ ਕਾਸਿਰਞ੍ਞਾ ਏਕਸਙ੍ਘਾਤਮ੍ਪਿ ਸਹਿਤੁਂ. ਯਂਨੂਨਾਹਂ ਪਟਿਕਚ੍ਚੇਵ ਨਗਰਮ੍ਹਾ ਨਿਪ੍ਪਤੇਯ੍ਯ’’ਨ੍ਤਿ.

ਅਥ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਮਹੇਸਿਂ ਆਦਾਯ ਪਟਿਕਚ੍ਚੇਵ ਨਗਰਮ੍ਹਾ ਨਿਪ੍ਪਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘੀਤਿਸ੍ਸ ਕੋਸਲਰਞ੍ਞੋ ਬਲਞ੍ਚ ਵਾਹਨਞ੍ਚ ਜਨਪਦਞ੍ਚ ਕੋਸਞ੍ਚ ਕੋਟ੍ਠਾਗਾਰਞ੍ਚ ਅਭਿਵਿਜਿਯ ਅਜ੍ਝਾਵਸਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਸਪਜਾਪਤਿਕੋ ਯੇਨ ਵਾਰਾਣਸੀ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਬਾਰਾਣਸੀ ਤਦਵਸਰਿ. ਤਤ੍ਰ ਸੁਦਂ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਸਪਜਾਪਤਿਕੋ ਬਾਰਾਣਸਿਯਂ ਅਞ੍ਞਤਰਸ੍ਮਿਂ ਪਚ੍ਚਨ੍ਤਿਮੇ ਓਕਾਸੇ ਕੁਮ੍ਭਕਾਰਨਿਵੇਸਨੇ ਅਞ੍ਞਾਤਕਵੇਸੇਨ ਪਰਿਬ੍ਬਾਜਕਚ੍ਛਨ੍ਨੇਨ ਪਟਿਵਸਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਨਚਿਰਸ੍ਸੇਵ ਗਬ੍ਭਿਨੀ ਅਹੋਸਿ. ਤਸ੍ਸਾ ਏਵਰੂਪੋ ਦੋਹਲ਼ੋ ਉਪ੍ਪਨ੍ਨੋ ਹੋਤਿ – ‘‘ਇਚ੍ਛਤਿ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁਂ’’. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਦੀਘੀਤਿਂ ਕੋਸਲਰਾਜਾਨਂ ਏਤਦਵੋਚ – ‘‘ਗਬ੍ਭਿਨੀਮ੍ਹਿ, ਦੇਵ. ਤਸ੍ਸਾ ਮੇ ਏਵਰੂਪੋ ਦੋਹਲ਼ੋ ਉਪ੍ਪਨ੍ਨੋ – ਇਚ੍ਛਾਮਿ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ [ਵਮ੍ਮਿਤਂ (ਸੀ.)] ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁ’’ਨ੍ਤਿ. ‘‘ਕੁਤੋ, ਦੇਵਿ, ਅਮ੍ਹਾਕਂ ਦੁਗ੍ਗਤਾਨਂ ਚਤੁਰਙ੍ਗਿਨੀ ਸੇਨਾ ਸਨ੍ਨਦ੍ਧਾ ਵਮ੍ਮਿਕਾ ਸੁਭੂਮੇ ਠਿਤਾ, ਖਗ੍ਗਾਨਞ੍ਚ ਧੋਵਨਂ ਪਾਤੁ’’ਨ੍ਤਿ [ਖਗ੍ਗਾਨਞ੍ਚ ਧੋਵਨਨ੍ਤਿ (ਸੀ. ਸ੍ਯਾ.)] ‘‘ਸਚਾਹਂ, ਦੇਵ, ਨ ਲਭਿਸ੍ਸਾਮਿ, ਮਰਿਸ੍ਸਾਮੀ’’ਤਿ.

੪੫੯. ਤੇਨ ਖੋ ਪਨ ਸਮਯੇਨ, ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਦੀਘੀਤਿਸ੍ਸ ਕੋਸਲਰਞ੍ਞੋ ਸਹਾਯੋ ਹੋਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਯੇਨ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤਂ ਬ੍ਰਾਹ੍ਮਣਂ ਏਤਦਵੋਚ – ‘‘ਸਖੀ ਤੇ, ਸਮ੍ਮ, ਗਬ੍ਭਿਨੀ. ਤਸ੍ਸਾ ਏਵਰੂਪੋ ਦੋਹਲ਼ੋ ਉਪ੍ਪਨ੍ਨੋ – ਇਚ੍ਛਤਿ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁ’’ਨ੍ਤਿ. ‘‘ਤੇਨ ਹਿ, ਦੇਵ, ਮਯਮ੍ਪਿ ਦੇਵਿਂ ਪਸ੍ਸਾਮਾ’’ਤਿ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਯੇਨ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸਿਂ ਦੂਰਤੋਵ ਆਗਚ੍ਛਨ੍ਤਿਂ, ਦਿਸ੍ਵਾਨ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਯੇਨ ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਤੇਨਞ੍ਜਲਿਂ ਪਣਾਮੇਤ੍ਵਾ ਤਿਕ੍ਖਤ੍ਤੁਂ ਉਦਾਨਂ ਉਦਾਨੇਸਿ – ‘‘ਕੋਸਲਰਾਜਾ ਵਤ ਭੋ ਕੁਚ੍ਛਿਗਤੋ, ਕੋਸਲਰਾਜਾ ਵਤ ਭੋ ਕੁਚ੍ਛਿਗਤੋ’’ਤਿ. ਅਤ੍ਤਮਨਾ [ਅਵਿਮਨਾ (ਸੀ. ਸ੍ਯਾ. ਕਤ੍ਥਚਿ], ਦੇਵਿ, ਹੋਹਿ. ਲਚ੍ਛਸਿ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁਨ੍ਤਿ.

ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਰੋਹਿਤੋ ਬ੍ਰਾਹ੍ਮਣੋ ਯੇਨ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਤਥਾ, ਦੇਵ, ਨਿਮਿਤ੍ਤਾਨਿ ਦਿਸ੍ਸਨ੍ਤਿ, ਸ੍ਵੇ ਸੂਰਿਯੁਗ੍ਗਮਨਕਾਲੇ ਚਤੁਰਙ੍ਗਿਨੀ ਸੇਨਾ ਸਨ੍ਨਦ੍ਧਾ ਵਮ੍ਮਿਕਾ ਸੁਭੂਮੇ ਤਿਟ੍ਠਤੁ, ਖਗ੍ਗਾ ਚ ਧੋਵਿਯਨ੍ਤੂ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਮਨੁਸ੍ਸੇ ਆਣਾਪੇਸਿ – ‘‘ਯਥਾ, ਭਣੇ, ਪੁਰੋਹਿਤੋ ਬ੍ਰਾਹ੍ਮਣੋ ਆਹ ਤਥਾ ਕਰੋਥਾ’’ਤਿ. ਅਲਭਿ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਸੂਰਿਯਸ੍ਸ ਉਗ੍ਗਮਨਕਾਲੇ ਚਤੁਰਙ੍ਗਿਨਿਂ ਸੇਨਂ ਸਨ੍ਨਦ੍ਧਂ ਵਮ੍ਮਿਕਂ ਸੁਭੂਮੇ ਠਿਤਂ ਪਸ੍ਸਿਤੁਂ, ਖਗ੍ਗਾਨਞ੍ਚ ਧੋਵਨਂ ਪਾਤੁਂ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਮਹੇਸੀ ਤਸ੍ਸ ਗਬ੍ਭਸ੍ਸ ਪਰਿਪਾਕਮਨ੍ਵਾਯ ਪੁਤ੍ਤਂ ਵਿਜਾਯਿ. ਤਸ੍ਸ ਦੀਘਾਵੂਤਿ ਨਾਮਂ ਅਕਂਸੁ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਨਚਿਰਸ੍ਸੇਵ ਵਿਞ੍ਞੁਤਂ ਪਾਪੁਣਿ. ਅਥ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਏਤਦਹੋਸਿ – ‘‘ਅਯਂ ਖੋ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ, ਇਮਿਨਾ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ, ਸਚਾਯਂ ਅਮ੍ਹੇ ਜਾਨਿਸ੍ਸਤਿ, ਸਬ੍ਬੇਵ ਤਯੋ ਘਾਤਾਪੇਸ੍ਸਤਿ, ਯਂਨੂਨਾਹਂ ਦੀਘਾਵੁਂ ਕੁਮਾਰਂ ਬਹਿਨਗਰੇ ਵਾਸੇਯ੍ਯ’’ਨ੍ਤਿ. ਅਥ ਖੋ ਭਿਕ੍ਖਵੇ ਦੀਘੀਤਿ ਕੋਸਲਰਾਜਾ ਦੀਘਾਵੁਂ ਕੁਮਾਰਂ ਬਹਿਨਗਰੇ ਵਾਸੇਸਿ. ਅਥ ਖੋ ਭਿਕ੍ਖਵੇ ਦੀਘਾਵੁ ਕੁਮਾਰੋ ਬਹਿਨਗਰੇ ਪਟਿਵਸਨ੍ਤੋ ਨਚਿਰਸ੍ਸੇਵ ਸਬ੍ਬਸਿਪ੍ਪਾਨਿ ਸਿਕ੍ਖਿ.

੪੬੦. ਤੇਨ ਖੋ ਪਨ ਸਮਯੇਨ ਦੀਘੀਤਿਸ੍ਸ ਕੋਸਲਰਞ੍ਞੋ ਕਪ੍ਪਕੋ ਬ੍ਰਹ੍ਮਦਤ੍ਤੇ ਕਾਸਿਰਞ੍ਞੇ ਪਟਿਵਸਤਿ. ਅਦ੍ਦਸਾ ਖੋ, ਭਿਕ੍ਖਵੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਕਪ੍ਪਕੋ ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਬਾਰਾਣਸਿਯਂ ਅਞ੍ਞਤਰਸ੍ਮਿਂ ਪਚ੍ਚਨ੍ਤਿਮੇ ਓਕਾਸੇ ਕੁਮ੍ਭਕਾਰਨਿਵੇਸਨੇ ਅਞ੍ਞਾਤਕਵੇਸੇਨ ਪਰਿਬ੍ਬਾਜਕਚ੍ਛਨ੍ਨੇਨ ਪਟਿਵਸਨ੍ਤਂ, ਦਿਸ੍ਵਾਨ ਯੇਨ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਦੀਘੀਤਿ, ਦੇਵ, ਕੋਸਲਰਾਜਾ ਸਪਜਾਪਤਿਕੋ ਬਾਰਾਣਸਿਯਂ ਅਞ੍ਞਤਰਸ੍ਮਿਂ ਪਚ੍ਚਨ੍ਤਿਮੇ ਓਕਾਸੇ ਕੁਮ੍ਭਕਾਰਨਿਵੇਸਨੇ ਅਞ੍ਞਾਤਕਵੇਸੇਨ ਪਰਿਬ੍ਬਾਜਕਚ੍ਛਨ੍ਨੇਨ ਪਟਿਵਸਤੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਮਨੁਸ੍ਸੇ ਆਣਾਪੇਸਿ – ‘‘ਤੇਨ ਹਿ, ਭਣੇ, ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਆਨੇਥਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਆਨੇਸੁਂ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਮਨੁਸ੍ਸੇ ਆਣਾਪੇਸਿ – ‘‘ਤੇਨ ਹਿ, ਭਣੇ, ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਦਲ਼੍ਹਾਯ ਰਜ੍ਜੁਯਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਿਤ੍ਵਾ ਖੁਰਮੁਣ੍ਡਂ ਕਰਿਤ੍ਵਾ ਖਰਸ੍ਸਰੇਨ ਪਣਵੇਨ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਪਰਿਨੇਤ੍ਵਾ ਦਕ੍ਖਿਣੇਨ ਦ੍ਵਾਰੇਨ ਨਿਕ੍ਖਾਮੇਤ੍ਵਾ ਦਕ੍ਖਿਣਤੋ ਨਗਰਸ੍ਸ ਚਤੁਧਾ ਛਿਨ੍ਦਿਤ੍ਵਾ ਚਤੁਦ੍ਦਿਸਾ ਬਿਲਾਨਿ ਨਿਕ੍ਖਿਪਥਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਦਲ਼੍ਹਾਯ ਰਜ੍ਜੁਯਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਿਤ੍ਵਾ ਖੁਰਮੁਣ੍ਡਂ ਕਰਿਤ੍ਵਾ ਖਰਸ੍ਸਰੇਨ ਪਣਵੇਨ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਪਰਿਨੇਨ੍ਤਿ.

ਅਥ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਚਿਰਂਦਿਟ੍ਠਾ ਖੋ ਮੇ ਮਾਤਾਪਿਤਰੋ. ਯਂਨੂਨਾਹਂ ਮਾਤਾਪਿਤਰੋ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬਾਰਾਣਸਿਂ ਪਵਿਸਿਤ੍ਵਾ ਅਦ੍ਦਸ ਮਾਤਾਪਿਤਰੋ ਦਲ਼੍ਹਾਯ ਰਜ੍ਜੁਯਾ ਪਚ੍ਛਾਬਾਹਂ ਗਾਲ਼੍ਹਬਨ੍ਧਨਂ ਬਨ੍ਧਿਤ੍ਵਾ ਖੁਰਮੁਣ੍ਡਂ ਕਰਿਤ੍ਵਾ ਖਰਸ੍ਸਰੇਨ ਪਣਵੇਨ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਪਰਿਨੇਨ੍ਤੇ, ਦਿਸ੍ਵਾਨ ਯੇਨ ਮਾਤਾਪਿਤਰੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਦੀਘਾਵੁਂ ਕੁਮਾਰਂ ਦੂਰਤੋਵ ਆਗਚ੍ਛਨ੍ਤਂ; ਦਿਸ੍ਵਾਨ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ਏਵਂ ਵੁਤ੍ਤੇ, ਭਿਕ੍ਖਵੇ, ਤੇ ਮਨੁਸ੍ਸਾ ਦੀਘੀਤਿਂ ਕੋਸਲਰਾਜਾਨਂ ਏਤਦਵੋਚੁਂ – ‘‘ਉਮ੍ਮਤ੍ਤਕੋ ਅਯਂ ਦੀਘੀਤਿ ਕੋਸਲਰਾਜਾ ਵਿਪ੍ਪਲਪਤਿ. ਕੋ ਇਮਸ੍ਸ ਦੀਘਾਵੁ? ਕਂ ਅਯਂ ਏਵਮਾਹ – ‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ‘‘ਨਾਹਂ, ਭਣੇ, ਉਮ੍ਮਤ੍ਤਕੋ ਵਿਪ੍ਪਲਪਾਮਿ, ਅਪਿ ਚ ਯੋ ਵਿਞ੍ਞੂ ਸੋ ਵਿਭਾਵੇਸ੍ਸਤੀ’’ਤਿ. ਦੁਤਿਯਮ੍ਪਿ ਖੋ, ਭਿਕ੍ਖਵੇ…ਪੇ… ਤਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘੀਤਿ ਕੋਸਲਰਾਜਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ਤਤਿਯਮ੍ਪਿ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਦੀਘੀਤਿਂ ਕੋਸਲਰਾਜਾਨਂ ਏਤਦਵੋਚੁਂ – ‘‘ਉਮ੍ਮਤ੍ਤਕੋ ਅਯਂ ਦੀਘੀਤਿ ਕੋਸਲਰਾਜਾ ਵਿਪ੍ਪਲਪਤਿ. ਕੋ ਇਮਸ੍ਸ ਦੀਘਾਵੁ? ਕਂ ਅਯਂ ਏਵਮਾਹ – ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ‘‘ਨਾਹਂ, ਭਣੇ, ਉਮ੍ਮਤ੍ਤਕੋ ਵਿਪ੍ਪਲਪਾਮਿ, ਅਪਿ ਚ ਯੋ ਵਿਞ੍ਞੂ ਸੋ ਵਿਭਾਵੇਸ੍ਸਤੀ’’ਤਿ. ਅਥ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਦੀਘੀਤਿਂ ਕੋਸਲਰਾਜਾਨਂ ਸਪਜਾਪਤਿਕਂ ਰਥਿਕਾਯ ਰਥਿਕਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਪਰਿਨੇਤ੍ਵਾ ਦਕ੍ਖਿਣੇਨ ਦ੍ਵਾਰੇਨ ਨਿਕ੍ਖਾਮੇਤ੍ਵਾ ਦਕ੍ਖਿਣਤੋ ਨਗਰਸ੍ਸ ਚਤੁਧਾ ਛਿਨ੍ਦਿਤ੍ਵਾ ਚਤੁਦ੍ਦਿਸਾ ਬਿਲਾਨਿ ਨਿਕ੍ਖਿਪਿਤ੍ਵਾ ਗੁਮ੍ਬਂ ਠਪੇਤ੍ਵਾ ਪਕ੍ਕਮਿਂਸੁ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬਾਰਾਣਸਿਂ ਪਵਿਸਿਤ੍ਵਾ ਸੁਰਂ ਨੀਹਰਿਤ੍ਵਾ ਗੁਮ੍ਬਿਯੇ ਪਾਯੇਸਿ. ਯਦਾ ਤੇ ਮਤ੍ਤਾ ਅਹੇਸੁਂ ਪਤਿਤਾ, ਅਥ ਕਟ੍ਠਾਨਿ ਸਂਕਡ੍ਢਿਤ੍ਵਾ ਚਿਤਕਂ ਕਰਿਤ੍ਵਾ ਮਾਤਾਪਿਤੂਨਂ ਸਰੀਰਂ ਚਿਤਕਂ ਆਰੋਪੇਤ੍ਵਾ ਅਗ੍ਗਿਂ ਦਤ੍ਵਾ ਪਞ੍ਜਲਿਕੋ ਤਿਕ੍ਖਤ੍ਤੁਂ ਚਿਤਕਂ ਪਦਕ੍ਖਿਣਂ ਅਕਾਸਿ.

੪੬੧. ਤੇਨ ਖੋ ਪਨ ਸਮਯੇਨ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਉਪਰਿਪਾਸਾਦਵਰਗਤੋ ਹੋਤਿ. ਅਦ੍ਦਸਾ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਪਞ੍ਜਲਿਕਂ ਤਿਕ੍ਖਤ੍ਤੁਂ ਚਿਤਕਂ ਪਦਕ੍ਖਿਣਂ ਕਰੋਨ੍ਤਂ, ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਸੋ ਮਨੁਸ੍ਸੋ ਦੀਘੀਤਿਸ੍ਸ ਕੋਸਲਰਞ੍ਞੋ ਞਾਤਿ ਵਾ ਸਾਲੋਹਿਤੋ ਵਾ, ਅਹੋ ਮੇ ਅਨਤ੍ਥਤੋ, ਨ ਹਿ ਨਾਮ ਮੇ ਕੋਚਿ ਆਰੋਚੇਸ੍ਸਤੀ’’ਤਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਅਰਞ੍ਞਂ ਗਨ੍ਤ੍ਵਾ ਯਾਵਦਤ੍ਥਂ ਕਨ੍ਦਿਤ੍ਵਾ ਰੋਦਿਤ੍ਵਾ ਖਪ੍ਪਂ [ਬਪ੍ਪਂ (ਸੀ. ਸ੍ਯਾ.)] ਪੁਞ੍ਛਿਤ੍ਵਾ ਬਾਰਾਣਸਿਂ ਪਵਿਸਿਤ੍ਵਾ ਅਨ੍ਤੇਪੁਰਸ੍ਸ ਸਾਮਨ੍ਤਾ ਹਤ੍ਥਿਸਾਲਂ ਗਨ੍ਤ੍ਵਾ ਹਤ੍ਥਾਚਰਿਯਂ ਏਤਦਵੋਚ – ‘‘ਇਚ੍ਛਾਮਹਂ, ਆਚਰਿਯ, ਸਿਪ੍ਪਂ ਸਿਕ੍ਖਿਤੁ’’ਨ੍ਤਿ. ‘‘ਤੇਨ ਹਿ, ਭਣੇ ਮਾਣਵਕ, ਸਿਕ੍ਖਸ੍ਸੂ’’ਤਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸਿ. ਅਸ੍ਸੋਸਿ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗੀਤਂ ਵੀਣਞ੍ਚ ਵਾਦਿਤਂ, ਸੁਤ੍ਵਾਨ ਮਨੁਸ੍ਸੇ ਪੁਚ੍ਛਿ – ‘‘ਕੋ, ਭਣੇ, ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸੀ’’ਤਿ? ‘‘ਅਮੁਕਸ੍ਸ, ਦੇਵ, ਹਤ੍ਥਾਚਰਿਯਸ੍ਸ ਅਨ੍ਤੇਵਾਸੀ ਮਾਣਵਕੋ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸੀ’’ਤਿ. ‘‘ਤੇਨ ਹਿ, ਭਣੇ, ਤਂ ਮਾਣਵਕਂ ਆਨੇਥਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਤੇ ਮਨੁਸ੍ਸਾ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਦੀਘਾਵੁਂ ਕੁਮਾਰਂ ਆਨੇਸੁਂ. ‘‘ਤ੍ਵਂ ਭਣੇ ਮਾਣਵਕ, ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਹਤ੍ਥਿਸਾਲਾਯਂ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸੀ’’ਤਿ? ‘‘ਏਵਂ, ਦੇਵਾ’’ਤਿ. ‘‘ਤੇਨ ਹਿ ਤ੍ਵਂ, ਭਣੇ ਮਾਣਵਕ, ਗਾਯਸ੍ਸੁ, ਵੀਣਞ੍ਚ ਵਾਦੇਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਆਰਾਧਾਪੇਕ੍ਖੋ ਮਞ੍ਜੁਨਾ ਸਰੇਨ ਗਾਯਿ, ਵੀਣਞ੍ਚ ਵਾਦੇਸਿ. ‘‘ਤ੍ਵਂ, ਭਣੇ ਮਾਣਵਕ, ਮਂ ਉਪਟ੍ਠਹਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਚ੍ਚਸ੍ਸੋਸਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪੁਬ੍ਬੁਟ੍ਠਾਯੀ ਅਹੋਸਿ ਪਚ੍ਛਾਨਿਪਾਤੀ ਕਿਙ੍ਕਾਰਪਟਿਸ੍ਸਾਵੀ ਮਨਾਪਚਾਰੀ ਪਿਯਵਾਦੀ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਨਚਿਰਸ੍ਸੇਵ ਅਬ੍ਭਨ੍ਤਰਿਮੇ ਵਿਸ੍ਸਾਸਿਕਟ੍ਠਾਨੇ ਠਪੇਸਿ.

੪੬੨. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਤੇਨ ਹਿ, ਭਣੇ ਮਾਣਵਕ, ਰਥਂ ਯੋਜੇਹਿ, ਮਿਗਵਂ ਗਮਿਸ੍ਸਾਮਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਰਥਂ ਯੋਜੇਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਯੁਤ੍ਤੋ ਖੋ ਤੇ, ਦੇਵ, ਰਥੋ, ਯਸ੍ਸ ਦਾਨਿ ਕਾਲਂ ਮਞ੍ਞਸੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਰਥਂ ਅਭਿਰੁਹਿ. ਦੀਘਾਵੁ ਕੁਮਾਰੋ ਰਥਂ ਪੇਸੇਸਿ. ਤਥਾ ਤਥਾ ਰਥਂ ਪੇਸੇਸਿ ਯਥਾ ਯਥਾ ਅਞ੍ਞੇਨੇਵ ਸੇਨਾ ਅਗਮਾਸਿ ਅਞ੍ਞੇਨੇਵ ਰਥੋ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੂਰਂ ਗਨ੍ਤ੍ਵਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਤੇਨ ਹਿ, ਭਣੇ ਮਾਣਵਕ, ਰਥਂ ਮੁਞ੍ਚਸ੍ਸੁ, ਕਿਲਨ੍ਤੋਮ੍ਹਿ, ਨਿਪਜ੍ਜਿਸ੍ਸਾਮੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਰਥਂ ਮੁਞ੍ਚਿਤ੍ਵਾ ਪਥਵਿਯਂ ਪਲ੍ਲਙ੍ਕੇਨ ਨਿਸੀਦਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਸ੍ਸ ਕੁਮਾਰਸ੍ਸ ਉਚ੍ਛਙ੍ਗੇ ਸੀਸਂ ਕਤ੍ਵਾ ਸੇਯ੍ਯਂ ਕਪ੍ਪੇਸਿ. ਤਸ੍ਸ ਕਿਲਨ੍ਤਸ੍ਸ ਮੁਹੁਤ੍ਤਕੇਨੇਵ ਨਿਦ੍ਦਾ ਓਕ੍ਕਮਿ. ਅਥ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਅਯਂ ਖੋ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ. ਇਮਿਨਾ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ. ਇਮਿਨਾ ਚ ਮੇ ਮਾਤਾਪਿਤਰੋ ਹਤਾ. ਅਯਂ ਖ੍ਵਸ੍ਸ ਕਾਲੋ ਯੋਹਂ ਵੇਰਂ ਅਪ੍ਪੇਯ੍ਯ’’ਨ੍ਤਿ ਕੋਸਿਯਾ ਖਗ੍ਗਂ ਨਿਬ੍ਬਾਹਿ. ਅਥ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਪਿਤਾ ਖੋ ਮਂ ਮਰਣਕਾਲੇ ਅਵਚ ‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’ਤਿ. ਨ ਖੋ ਮੇਤਂ ਪਤਿਰੂਪਂ, ਯ੍ਵਾਹਂ ਪਿਤੁਵਚਨਂ ਅਤਿਕ੍ਕਮੇਯ੍ਯ’’ਨ੍ਤਿ ਕੋਸਿਯਾ ਖਗ੍ਗਂ ਪਵੇਸੇਸਿ. ਦੁਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਅਯਂ ਖੋ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ, ਇਮਿਨੋ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ, ਇਮਿਨਾ ਚ ਮੇ ਮਾਤਾਪਿਤਰੋ ਹਤਾ, ਅਯਂ ਖ੍ਵਸ੍ਸ ਕਾਲੋ ਯੋਹਂ ਵੇਰਂ ਅਪ੍ਪੇਯ੍ਯ’’ਨ੍ਤਿ ਕੋਸਿਯਾ ਖਗ੍ਗਂ ਨਿਬ੍ਬਾਹਿ. ਦੁਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਪਿਤਾ ਖੋ ਮਂ ਮਰਣਕਾਲੇ ਅਵਚ ‘ਮਾ ਖੋ ਤ੍ਵਂ ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ, ਨ ਹਿ ਤਾਤ ਦੀਘਾਵੁ ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’ਤਿ. ਨ ਖੋ ਮੇਤਂ ਪਤਿਰੂਪਂ, ਯ੍ਵਾਹਂ ਪਿਤੁਵਚਨਂ ਅਤਿਕ੍ਕਮੇਯ੍ਯ’’ਨ੍ਤਿ. ਪੁਨਦੇਵ ਕੋਸਿਯਾ ਖਗ੍ਗਂ ਪਵੇਸੇਸਿ. ਤਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਅਯਂ ਖੋ ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ. ਇਮਿਨਾ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ. ਇਮਿਨਾ ਚ ਮੇ ਮਾਤਾਪਿਤਰੋ ਹਤਾ. ਅਯਂ ਖ੍ਵਸ੍ਸ ਕਾਲੋ ਯੋਹਂ ਵੇਰਂ ਅਪ੍ਪੇਯ੍ਯ’’ਨ੍ਤਿ ਕੋਸਿਯਾ ਖਗ੍ਗਂ ਨਿਬ੍ਬਾਹਿ. ਤਤਿਯਮ੍ਪਿ ਖੋ, ਭਿਕ੍ਖਵੇ, ਦੀਘਾਵੁਸ੍ਸ ਕੁਮਾਰਸ੍ਸ ਏਤਦਹੋਸਿ – ‘‘ਪਿਤਾ ਖੋ ਮਂ ਮਰਣਕਾਲੇ ਅਵਚ ‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’ਤਿ. ਨ ਖੋ ਮੇਤਂ ਪਤਿਰੂਪਂ, ਯ੍ਵਾਹਂ ਪਿਤੁਵਚਨਂ ਅਤਿਕ੍ਕਮੇਯ੍ਯ’’’ਨ੍ਤਿ ਪੁਨਦੇਵ ਕੋਸਿਯਾ ਖਗ੍ਗਂ ਪਵੇਸੇਸਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਭੀਤੋ ਉਬ੍ਬਿਗ੍ਗੋ ਉਸ੍ਸਙ੍ਕੀ ਉਤ੍ਰਸ੍ਤੋ ਸਹਸਾ ਵੁਟ੍ਠਾਸਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਦੇਵ, ਭੀਤੋ ਉਬ੍ਬਿਗ੍ਗੋ ਉਸ੍ਸਙ੍ਕੀ ਉਤ੍ਰਸ੍ਤੋ ਸਹਸਾ ਵੁਟ੍ਠਾਸੀ’’ਤਿ? ਇਧ ਮਂ, ਭਣੇ ਮਾਣਵਕ, ਦੀਘੀਤਿਸ੍ਸ ਕੋਸਲਰਞ੍ਞੋ ਪੁਤ੍ਤੋ ਦੀਘਾਵੁ ਕੁਮਾਰੋ ਸੁਪਿਨਨ੍ਤੇਨ ਖਗ੍ਗੇਨ ਪਰਿਪਾਤੇਸਿ. ਤੇਨਾਹਂ ਭੀਤੋ ਉਬ੍ਬਿਗ੍ਗੋ ਉਸ੍ਸਙ੍ਕੀ ਉਤ੍ਰਸ੍ਤੋ ਸਹਸਾ ਵੁਟ੍ਠਾਸਿਨ੍ਤਿ. ਅਥ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਵਾਮੇਨ ਹਤ੍ਥੇਨ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਸੀਸਂ ਪਰਾਮਸਿਤ੍ਵਾ ਦਕ੍ਖਿਣੇਨ ਹਤ੍ਥੇਨ ਖਗ੍ਗਂ ਨਿਬ੍ਬਾਹੇਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਅਹਂ ਖੋ ਸੋ, ਦੇਵ, ਦੀਘੀਤਿਸ੍ਸ ਕੋਸਲਰਞ੍ਞੋ ਪੁਤ੍ਤੋ ਦੀਘਾਵੁ ਕੁਮਾਰੋ. ਬਹੁਨੋ ਤ੍ਵਂ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕੋ. ਤਯਾ ਅਮ੍ਹਾਕਂ ਬਲਞ੍ਚ ਵਾਹਨਞ੍ਚ ਜਨਪਦੋ ਚ ਕੋਸੋ ਚ ਕੋਟ੍ਠਾਗਾਰਞ੍ਚ ਅਚ੍ਛਿਨ੍ਨਂ. ਤਯਾ ਚ ਮੇ ਮਾਤਾਪਿਤਰੋ ਹਤਾ. ਅਯਂ ਖ੍ਵਸ੍ਸ ਕਾਲੋ ਯ੍ਵਾਹਂ ਵੇਰਂ ਅਪ੍ਪੇਯ੍ਯ’’ਨ੍ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਸ੍ਸ ਕੁਮਾਰਸ੍ਸ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਜੀਵਿਤਂ ਮੇ, ਤਾਤ ਦੀਘਾਵੁ, ਦੇਹਿ. ਜੀਵਿਤਂ ਮੇ, ਤਾਤ ਦੀਘਾਵੁ, ਦੇਹੀ’’ਤਿ. ‘‘ਕ੍ਯਾਹਂ ਉਸ੍ਸਹਾਮਿ ਦੇਵਸ੍ਸ ਜੀਵਿਤਂ ਦਾਤੁਂ? ਦੇਵੋ ਖੋ ਮੇ ਜੀਵਿਤਂ ਦਦੇਯ੍ਯਾ’’ਤਿ. ‘‘ਤੇਨ ਹਿ, ਤਾਤ ਦੀਘਾਵੁ, ਤ੍ਵਞ੍ਚੇਵ ਮੇ ਜੀਵਿਤਂ ਦੇਹਿ, ਅਹਞ੍ਚ ਤੇ ਜੀਵਿਤਂ ਦਮ੍ਮੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਚ ਕਾਸਿਰਾਜਾ ਦੀਘਾਵੁ ਚ ਕੁਮਾਰੋ ਅਞ੍ਞਮਞ੍ਞਸ੍ਸ ਜੀਵਿਤਂ ਅਦਂਸੁ, ਪਾਣਿਞ੍ਚ ਅਗ੍ਗਹੇਸੁਂ, ਸਪਥਞ੍ਚ ਅਕਂਸੁ ਅਦ੍ਦੂਭਾਯ [ਅਦ੍ਰੂਭਾਯ, ਅਦੁਬ੍ਭਾਯ (ਕ.)].

ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਤੇਨ ਹਿ, ਤਾਤ ਦੀਘਾਵੁ, ਰਥਂ ਯੋਜੇਹਿ, ਗਮਿਸ੍ਸਾਮਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ, ਭਿਕ੍ਖਵੇ, ਦੀਘਾਵੁ ਕੁਮਾਰੋ ਬ੍ਰਹ੍ਮਦਤ੍ਤਸ੍ਸ ਕਾਸਿਰਞ੍ਞੋ ਪਟਿਸ੍ਸੁਤ੍ਵਾ ਰਥਂ ਯੋਜੇਤ੍ਵਾ ਬ੍ਰਹ੍ਮਦਤ੍ਤਂ ਕਾਸਿਰਾਜਾਨਂ ਏਤਦਵੋਚ – ‘‘ਯੁਤ੍ਤੋ ਖੋ ਤੇ, ਦੇਵ, ਰਥੋ, ਯਸ੍ਸ ਦਾਨਿ ਕਾਲਂ ਮਞ੍ਞਸੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਰਥਂ ਅਭਿਰੁਹਿ. ਦੀਘਾਵੁ ਕੁਮਾਰੋ ਰਥਂ ਪੇਸੇਸਿ. ਤਥਾ ਤਥਾ ਰਥਂ ਪੇਸੇਸਿ ਯਥਾ ਯਥਾ ਨਚਿਰਸ੍ਸੇਵ ਸੇਨਾਯ ਸਮਾਗਞ੍ਛਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਬਾਰਾਣਸਿਂ ਪਵਿਸਿਤ੍ਵਾ ਅਮਚ੍ਚੇ ਪਾਰਿਸਜ੍ਜੇ ਸਨ੍ਨਿਪਾਤਾਪੇਤ੍ਵਾ ਏਤਦਵੋਚ – ‘‘ਸਚੇ, ਭਣੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਪੁਤ੍ਤਂ ਦੀਘਾਵੁਂ ਕੁਮਾਰਂ ਪਸ੍ਸੇਯ੍ਯਾਥ, ਕਿਨ੍ਤਿ ਨਂ ਕਰੇਯ੍ਯਾਥਾ’’ਤਿ? ਏਕਚ੍ਚੇ ਏਵਮਾਹਂਸੁ – ‘‘ਮਯਂ, ਦੇਵ, ਹਤ੍ਥੇ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਪਾਦੇ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਹਤ੍ਥਪਾਦੇ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਕਣ੍ਣੇ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਨਾਸਂ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਕਣ੍ਣਨਾਸਂ ਛਿਨ੍ਦੇਯ੍ਯਾਮ. ਮਯਂ, ਦੇਵ, ਸੀਸਂ ਛਿਨ੍ਦੇਯ੍ਯਾਮਾ’’ਤਿ. ‘‘ਅਯਂ ਖੋ, ਭਣੇ, ਦੀਘੀਤਿਸ੍ਸ ਕੋਸਲਰਞ੍ਞੋ ਪੁਤ੍ਤੋ ਦੀਘਾਵੁ ਕੁਮਾਰੋ. ਨਾਯਂ ਲਬ੍ਭਾ ਕਿਞ੍ਚਿ ਕਾਤੁਂ. ਇਮਿਨਾ ਚ ਮੇ ਜੀਵਿਤਂ ਦਿਨ੍ਨਂ, ਮਯਾ ਚ ਇਮਸ੍ਸ ਜੀਵਿਤਂ ਦਿਨ੍ਨ’’ਨ੍ਤਿ.

੪੬੩. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ ਦੀਘਾਵੁਂ ਕੁਮਾਰਂ ਏਤਦਵੋਚ – ‘‘ਯਂ ਖੋ ਤੇ, ਤਾਤ ਦੀਘਾਵੁ, ਪਿਤਾ ਮਰਣਕਾਲੇ ਅਵਚ ‘ਮਾ ਖੋ ਤ੍ਵਂ, ਤਾਤ ਦੀਘਾਵੁ, ਦੀਘਂ ਪਸ੍ਸ, ਮਾ ਰਸ੍ਸਂ. ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’ਤਿ, ਕਿਂ ਤੇ ਪਿਤਾ ਸਨ੍ਧਾਯ ਅਵਚਾ’’ਤਿ? ‘‘ਯਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ‘ਮਾ ਦੀਘ’ਨ੍ਤਿ ਮਾ ਚਿਰਂ ਵੇਰਂ ਅਕਾਸੀਤਿ. ਇਮਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ਮਾ ਦੀਘਨ੍ਤਿ. ਯਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ‘ਮਾ ਰਸ੍ਸ’ਨ੍ਤਿ ਮਾ ਖਿਪ੍ਪਂ ਮਿਤ੍ਤੇਹਿ ਭਿਜ੍ਜਿਤ੍ਥਾ’’ਤਿ. ਇਮਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ਮਾ ਰਸ੍ਸਨ੍ਤਿ. ਯਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ ‘‘ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ, ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ ਦੇਵੇਨ ਮੇ ਮਾਤਾਪਿਤਰੋ ਹਤਾਤਿ. ਸਚਾਹਂ ਦੇਵਂ ਜੀਵਿਤਾ ਵੋਰੋਪੇਯ੍ਯਂ, ਯੇ ਦੇਵਸ੍ਸ ਅਤ੍ਥਕਾਮਾ ਤੇ ਮਂ ਜੀਵਿਤਾ ਵੋਰੋਪੇਯ੍ਯੁਂ, ਯੇ ਮੇ ਅਤ੍ਥਕਾਮਾ ਤੇ ਤੇ ਜੀਵਿਤਾ ਵੋਰੋਪੇਯ੍ਯੁਂ – ਏਵਂ ਤਂ ਵੇਰਂ ਵੇਰੇਨ ਨ ਵੂਪਸਮੇਯ੍ਯ. ਇਦਾਨਿ ਚ ਪਨ ਮੇ ਦੇਵੇਨ ਜੀਵਿਤਂ ਦਿਨ੍ਨਂ, ਮਯਾ ਚ ਦੇਵਸ੍ਸ ਜੀਵਿਤਂ ਦਿਨ੍ਨਂ. ਏਵਂ ਤਂ ਵੇਰਂ ਅਵੇਰੇਨ ਵੂਪਸਨ੍ਤਂ. ਇਮਂ ਖੋ ਮੇ, ਦੇਵ, ਪਿਤਾ ਮਰਣਕਾਲੇ ਅਵਚ – ਨ ਹਿ, ਤਾਤ ਦੀਘਾਵੁ, ਵੇਰੇਨ ਵੇਰਾ ਸਮ੍ਮਨ੍ਤਿ; ਅਵੇਰੇਨ ਹਿ, ਤਾਤ ਦੀਘਾਵੁ, ਵੇਰਾ ਸਮ੍ਮਨ੍ਤੀ’’ਤਿ. ਅਥ ਖੋ, ਭਿਕ੍ਖਵੇ, ਬ੍ਰਹ੍ਮਦਤ੍ਤੋ ਕਾਸਿਰਾਜਾ – ‘‘ਅਚ੍ਛਰਿਯਂ ਵਤ ਭੋ! ਅਬ੍ਭੁਤਂ ਵਤ ਭੋ! ਯਾਵ ਪਣ੍ਡਿਤੋ ਅਯਂ ਦੀਘਾਵੁ ਕੁਮਾਰੋ, ਯਤ੍ਰ ਹਿ ਨਾਮ ਪਿਤੁਨੋ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਆਜਾਨਿਸ੍ਸਤੀ’’ਤਿ ਪੇਤ੍ਤਿਕਂ ਬਲਞ੍ਚ ਵਾਹਨਞ੍ਚ ਜਨਪਦਞ੍ਚ ਕੋਸਞ੍ਚ ਕੋਟ੍ਠਾਗਾਰਞ੍ਚ ਪਟਿਪਾਦੇਸਿ, ਧੀਤਰਞ੍ਚ ਅਦਾਸਿ. ਤੇਸਞ੍ਹਿ ਨਾਮ, ਭਿਕ੍ਖਵੇ, ਰਾਜੂਨਂ ਆਦਿਨ੍ਨਦਣ੍ਡਾਨਂ ਆਦਿਨ੍ਨਸਤ੍ਥਾਨਂ ਏਵਰੂਪਂ ਖਨ੍ਤਿਸੋਰਚ੍ਚਂ ਭਵਿਸ੍ਸਤਿ. ਇਧ ਖੋ ਪਨ ਤਂ, ਭਿਕ੍ਖਵੇ, ਸੋਭੇਥ ਯਂ ਤੁਮ੍ਹੇ ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਪਬ੍ਬਜਿਤਾ ਸਮਾਨਾ ਖਮਾ ਚ ਭਵੇਯ੍ਯਾਥ ਸੋਰਤਾ ਚਾਤਿ? ਤਤਿਯਮ੍ਪਿ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਅਲਂ, ਭਿਕ੍ਖਵੇ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ. ਤਤਿਯਮ੍ਪਿ ਖੋ ਸੋ ਅਧਮ੍ਮਵਾਦੀ ਭਿਕ੍ਖੁ ਭਗਵਨ੍ਤਂ ਏਤਦਵੋਚ – ‘‘ਆਗਮੇਤੁ, ਭਨ੍ਤੇ, ਭਗਵਾ ਧਮ੍ਮਸ੍ਸਾਮੀ; ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਭਗਵਾ ਦਿਟ੍ਠਧਮ੍ਮਸੁਖਵਿਹਾਰਮਨੁਯੁਤ੍ਤੋ ਵਿਹਰਤੁ. ਮਯਮੇਤੇਨ ਭਣ੍ਡਨੇਨ ਕਲਹੇਨ ਵਿਗ੍ਗਹੇਨ ਵਿਵਾਦੇਨ ਪਞ੍ਞਾਯਿਸ੍ਸਾਮਾ’’ਤਿ. ਅਥ ਖੋ ਭਗਵਾ – ਪਰਿਯਾਦਿਨ੍ਨਰੂਪਾ ਖੋ ਇਮੇ ਮੋਘਪੁਰਿਸਾ, ਨਯਿਮੇ ਸੁਕਰਾ ਸਞ੍ਞਾਪੇਤੁਨ੍ਤਿ – ਉਟ੍ਠਾਯਾਸਨਾ ਪਕ੍ਕਾਮਿ.

ਦੀਘਾਵੁਭਾਣਵਾਰੋ ਨਿਟ੍ਠਿਤੋ ਪਠਮੋ.

੪੬੪. [ਮ. ਨਿ. ੩.੨੩੬] ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਕੋਸਮ੍ਬਿਂ ਪਿਣ੍ਡਾਯ ਪਾਵਿਸਿ. ਕੋਸਮ੍ਬਿਯਂ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਸਙ੍ਘਮਜ੍ਝੇ ਠਿਤਕੋਵ ਇਮਾ ਗਾਥਾਯੋ ਅਭਾਸਿ –

[ਮ. ਨਿ. ੩.੨੩੭] ‘‘ਪੁਥੁਸਦ੍ਦੋ ਸਮਜਨੋ, ਨ ਬਾਲੋ ਕੋਚਿ ਮਞ੍ਞਥ;

ਸਙ੍ਘਸ੍ਮਿਂ ਭਿਜ੍ਜਮਾਨਸ੍ਮਿਂ, ਨਾਞ੍ਞਂ ਭਿਯ੍ਯੋ ਅਮਞ੍ਞਰੁਂ.

[ਮ. ਨਿ. ੩.੨੩੭] ‘‘ਪਰਿਮੁਟ੍ਠਾ ਪਣ੍ਡਿਤਾਭਾਸਾ, ਵਾਚਾਗੋਚਰਭਾਣਿਨੋ;

ਯਾਵਿਚ੍ਛਨ੍ਤਿ ਮੁਖਾਯਾਮਂ, ਯੇਨ ਨੀਤਾ ਨ ਤਂ ਵਿਦੂ.

[ਮ. ਨਿ. ੩.੨੩੭] ‘‘ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;

ਯੇ ਚ ਤਂ ਉਪਨਯ੍ਹਨ੍ਤਿ, ਵੇਰਂ ਤੇਸਂ ਨ ਸਮ੍ਮਤਿ.

[ਮ. ਨਿ. ੩.੨੩੭] ‘‘ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ;

ਯੇ ਚ ਤਂ ਨੁਪਨਯ੍ਹਨ੍ਤਿ, ਵੇਰਂ ਤੇਸੂਪਸਮ੍ਮਤਿ.

[ਮ. ਨਿ. ੩.੨੩੭] ‘‘ਨ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨਂ;

ਅਵੇਰੇਨ ਚ ਸਮ੍ਮਨ੍ਤਿ, ਏਸਧਮ੍ਮੋ ਸਨਨ੍ਤਨੋ.

[ਮ. ਨਿ. ੩.੨੩੭] ‘‘ਪਰੇ ਚ ਨ ਵਿਜਾਨਨ੍ਤਿ, ਮਯਮੇਤ੍ਥ ਯਮਾਮਸੇ;

ਯੇ ਚ ਤਤ੍ਥ ਵਿਜਾਨਨ੍ਤਿ, ਤਤੋ ਸਮ੍ਮਨ੍ਤਿ ਮੇਧਗਾ.

[ਮ. ਨਿ. ੩.੨੩੭] ‘‘ਅਟ੍ਠਿਚ੍ਛਿਨ੍ਨਾ ਪਾਣਹਰਾ, ਗਵਾਸ੍ਸਧਨਹਾਰਿਨੋ;

ਰਟ੍ਠਂ ਵਿਲੁਮ੍ਪਮਾਨਾਨਂ, ਤੇਸਮ੍ਪਿ ਹੋਤਿ ਸਙ੍ਗਤਿ.

‘‘ਕਸ੍ਮਾ ਤੁਮ੍ਹਾਕ ਨੋ ਸਿਯਾ;

[ਮ. ਨਿ. ੩.੨੩੭] ‘‘ਸਚੇ ਲਭੇਥ ਨਿਪਕਂ ਸਹਾਯਂ;

ਸਦ੍ਧਿਂਚਰਂ ਸਾਧੁਵਿਹਾਰਿ ਧੀਰਂ;

ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨਿ;

ਚਰੇਯ੍ਯ ਤੇਨਤ੍ਤਮਨੋ ਸਤੀਮਾ.

[ਮ. ਨਿ. ੩.੨੩੭] ‘‘ਨੋ ਚੇ ਲਭੇਥ ਨਿਪਕਂ ਸਹਾਯਂ;

ਸਦ੍ਧਿਂ ਚਰਂ ਸਾਧੁਵਿਹਾਰਿ ਧੀਰਂ;

ਰਾਜਾਵ ਰਟ੍ਠਂ ਵਿਜਿਤਂ ਪਹਾਯ;

ਏਕੋ ਚਰੇ ਮਾਤਙ੍ਗਰਞ੍ਞੇਵ ਨਾਗੋ.

[ਮ. ਨਿ. ੩.੨੩੭] ‘‘ਏਕਸ੍ਸ ਚਰਿਤਂ ਸੇਯ੍ਯੋ;

ਨਤ੍ਥਿ ਬਾਲੇ ਸਹਾਯਤਾ;

ਏਕੋ ਚਰੇ ਨ ਚ ਪਾਪਾਨਿ ਕਯਿਰਾ;

ਅਪ੍ਪੋਸ੍ਸੁਕ੍ਕੋ ਮਾਤਙ੍ਗਰਞ੍ਞੇਵ ਨਾਗੋ’’ਤਿ.

ਦੀਘਾਵੁਵਤ੍ਥੁ ਨਿਟ੍ਠਿਤਂ.

੨੭੩. ਬਾਲਕਲੋਣਕਗਮਨਕਥਾ

੪੬੫. ਅਥ ਖੋ ਭਗਵਾ ਸਙ੍ਘਮਜ੍ਝੇ ਠਿਤਕੋਵ ਇਮਾ ਗਾਥਾਯੋ ਭਾਸਿਤ੍ਵਾ ਯੇਨ ਬਾਲਕਲੋਣਕਗਾਮੋ [ਬਾਲਕਲੋਣਕਾਰਗਾਮੋ (ਸੀ. ਸ੍ਯਾ.)] ਤੇਨੁਪਸਙ੍ਕਮਿ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਭਗੁ ਬਾਲਕਲੋਣਕਗਾਮੇ ਵਿਹਰਤਿ. ਅਦ੍ਦਸਾ ਖੋ ਆਯਸ੍ਮਾ ਭਗੁ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਆਸਨਂ ਪਞ੍ਞਪੇਸਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ, ਨਿਸਜ੍ਜ ਖੋ ਭਗਵਾ ਪਾਦੇ ਪਕ੍ਖਾਲੇਸਿ. ਆਯਸ੍ਮਾਪਿ ਖੋ ਭਗੁ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਭਗੁਂ ਭਗਵਾ ਏਤਦਵੋਚ – ‘‘ਕਚ੍ਚਿ, ਭਿਕ੍ਖੁ, ਖਮਨੀਯਂ; ਕਚ੍ਚਿ ਯਾਪਨੀਯਂ, ਕਚ੍ਚਿ ਪਿਣ੍ਡਕੇਨ ਨ ਕਿਲਮਸੀ’’ਤਿ? ‘‘ਖਮਨੀਯਂ, ਭਗਵਾ, ਯਾਪਨੀਯਂ, ਭਗਵਾ; ਨ ਚਾਹਂ, ਭਨ੍ਤੇ, ਪਿਣ੍ਡਕੇਨ ਕਿਲਮਾਮੀ’’ਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਭਗੁਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਯੇਨ ਪਾਚੀਨਵਂਸਦਾਯੋ ਤੇਨੁਪਸਙ੍ਕਮਿ.

ਬਾਲਕਲੋਣਕਗਮਨਕਥਾ ਨਿਟ੍ਠਿਤਾ.

੨੭੪. ਪਾਚੀਨਵਂਸਦਾਯਗਮਨਕਥਾ

੪੬੬. [ਮ. ਨਿ. ੧.੩੨੫ ਆਦਯੋ ਪਸ੍ਸਿਤਬ੍ਬਂ] ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਚ ਅਨੁਰੁਦ੍ਧੋ ਆਯਸ੍ਮਾ ਚ ਨਨ੍ਦਿਯੋ ਆਯਸ੍ਮਾ ਚ ਕਿਮਿਲੋ [ਕਿਮ੍ਬਿਲੋ (ਸੀ. ਸ੍ਯਾ.)] ਪਾਚੀਨਵਂਸਦਾਯੇ ਵਿਹਰਨ੍ਤਿ. ਅਦ੍ਦਸਾ ਖੋ ਦਾਯਪਾਲੋ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਮਾ, ਸਮਣ, ਏਤਂ ਦਾਯਂ ਪਾਵਿਸਿ. ਸਨ੍ਤੇਤ੍ਥ ਤਯੋ ਕੁਲਪੁਤ੍ਤਾ ਅਤ੍ਤਕਾਮਰੂਪਾ ਵਿਹਰਨ੍ਤਿ. ਮਾ ਤੇਸਂ ਅਫਾਸੁਮਕਾਸੀ’’ਤਿ. ਅਸ੍ਸੋਸਿ ਖੋ ਆਯਸ੍ਮਾ ਅਨੁਰੁਦ੍ਧੋ ਦਾਯਪਾਲਸ੍ਸ ਭਗਵਤਾ ਸਦ੍ਧਿਂ ਮਨ੍ਤਯਮਾਨਸ੍ਸ, ਸੁਤ੍ਵਾਨ ਦਾਯਪਾਲਂ ਏਤਦਵੋਚ – ‘‘ਮਾਵੁਸੋ, ਦਾਯਪਾਲ, ਭਗਵਨ੍ਤਂ ਵਾਰੇਸਿ. ਸਤ੍ਥਾ ਨੋ ਭਗਵਾ ਅਨੁਪ੍ਪਤ੍ਤੋ’’ਤਿ. ਅਥ ਖੋ ਆਯਸ੍ਮਾ ਅਨੁਰੁਦ੍ਧੋ ਯੇਨਾਯਸ੍ਮਾ ਚ ਨਨ੍ਦਿਯੋ ਆਯਸ੍ਮਾ ਚ ਕਿਮਿਲੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਞ੍ਚ ਨਨ੍ਦਿਯਂ ਆਯਸ੍ਮਨ੍ਤਞ੍ਚ ਕਿਮਿਲਂ ਏਤਦਵੋਚ – ‘‘ਅਭਿਕ੍ਕਮਥਾਯਸ੍ਮਨ੍ਤੋ ਅਭਿਕ੍ਕਮਥਾਯਸ੍ਮਨ੍ਤੋ, ਸਤ੍ਥਾ ਨੋ ਭਗਵਾ ਅਨੁਪ੍ਪਤ੍ਤੋ’’ਤਿ. ਅਥ ਖੋ ਆਯਸ੍ਮਾ ਚ ਅਨੁਰੁਦ੍ਧੋ ਆਯਸ੍ਮਾ ਚ ਨਨ੍ਦਿਯੋ ਆਯਸ੍ਮਾ ਚ ਕਿਮਿਲੋ ਭਗਵਨ੍ਤਂ ਪਚ੍ਚੁਗ੍ਗਨ੍ਤ੍ਵਾ ਏਕੋ ਭਗਵਤੋ ਪਤ੍ਤਚੀਵਰਂ ਪਟਿਗ੍ਗਹੇਸਿ, ਏਕੋ ਆਸਨਂ ਪਞ੍ਞਪੇਸਿ, ਏਕੋ ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ, ਨਿਸਜ੍ਜ ਖੋ ਭਗਵਾ ਪਾਦੇ ਪਕ੍ਖਾਲੇਸਿ. ਤੇਪਿ ਖੋ ਆਯਸ੍ਮਨ੍ਤੋ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਅਨੁਰੁਦ੍ਧਂ ਭਗਵਾ ਏਤਦਵੋਚ – ‘‘ਕਚ੍ਚਿ ਵੋ, ਅਨੁਰੁਦ੍ਧਾ, ਖਮਨੀਯਂ, ਕਚ੍ਚਿ ਯਾਪਨੀਯਂ; ਕਚ੍ਚਿ ਪਿਣ੍ਡਕੇਨ ਨ ਕਿਲਮਥਾ’’ਤਿ? ‘‘ਖਮਨੀਯਂ ਭਗਵਾ, ਯਾਪਨੀਯਂ ਭਗਵਾ; ਨ ਚ ਮਯਂ, ਭਨ੍ਤੇ, ਪਿਣ੍ਡਕੇਨ ਕਿਲਮਾਮਾ’’ਤਿ.

‘‘ਕਚ੍ਚਿ ਪਨ ਵੋ ਅਨੁਰੁਦ੍ਧਾ ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਖੀਰੋਦਕੀਭੂਤਾ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤਾ ਵਿਹਰਥਾ’’ਤਿ? ‘‘ਤਗ੍ਘ ਮਯਂ, ਭਨ੍ਤੇ, ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਖੀਰੋਦਕੀਭੂਤਾ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤਾ ਵਿਹਰਾਮਾ’’ਤਿ. ‘‘ਯਥਾ ਕਥਂ ਪਨ ਤੁਮ੍ਹੇ, ਅਨੁਰੁਦ੍ਧਾ, ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਖੀਰੋਦਕੀਭੂਤਾ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤਾ ਵਿਹਰਥਾ’’ਤਿ? ‘‘ਇਧ ਮਯ੍ਹਂ, ਭਨ੍ਤੇ, ਏਵਂ ਹੋਤਿ – ‘ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇ, ਯੋਹਂ ਏਵਰੂਪੇਹਿ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਹਰਾਮੀ’’’ਤਿ. ਤਸ੍ਸ ਮਯ੍ਹਂ, ਭਨ੍ਤੇ, ਇਮੇਸੁ ਆਯਸ੍ਮਨ੍ਤੇਸੁ ਮੇਤ੍ਤਂ ਕਾਯਕਮ੍ਮਂ ਪਚ੍ਚੁਪਟ੍ਠਿਤਂ ਆਵਿ ਚੇਵ ਰਹੋ ਚ; ਮੇਤ੍ਤਂ ਵਚੀਕਮ੍ਮਂ… ਮੇਤ੍ਤਂ ਮਨੋਕਮ੍ਮਂ ਪਚ੍ਚੁਪਟ੍ਠਿਤਂ ਆਵਿ ਚੇਵ ਰਹੋ ਚ. ਤਸ੍ਸ ਮਯ੍ਹਂ, ਭਨ੍ਤੇ, ਏਵਂ ਹੋਤਿ – ‘‘‘ਯਂਨੂਨਾਹਂ ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤੇਯ੍ਯ’ਨ੍ਤਿ. ਸੋ ਖੋ ਅਹਂ, ਭਨ੍ਤੇ, ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤਾਮਿ. ਨਾਨਾ ਹਿ ਖੋ ਨੋ, ਭਨ੍ਤੇ, ਕਾਯਾ, ਏਕਞ੍ਚ ਪਨ ਮਞ੍ਞੇ ਚਿਤ੍ਤ’’ਨ੍ਤਿ.

ਆਯਸ੍ਮਾਪਿ ਖੋ ਨਨ੍ਦਿਯੋ…ਪੇ… ਆਯਸ੍ਮਾਪਿ ਖੋ ਕਿਮਿਲੋ ਭਗਵਨ੍ਤਂ ਏਤਦਵੋਚ – ‘‘ਮਯ੍ਹਮ੍ਪਿ ਖੋ, ਭਨ੍ਤੇ, ਏਵਂ ਹੋਤਿ – ‘ਲਾਭਾ ਵਤ ਮੇ, ਸੁਲਦ੍ਧਂ ਵਤ ਮੇ, ਯੋਹਂ ਏਵਰੂਪੇਹਿ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਹਰਾਮੀ’ਤਿ. ਤਸ੍ਸ ਮਯ੍ਹਂ, ਭਨ੍ਤੇ, ਇਮੇਸੁ ਆਯਸ੍ਮਨ੍ਤੇਸੁ ਮੇਤ੍ਤਂ ਕਾਯਕਮ੍ਮਂ ਪਚ੍ਚੁਪਟ੍ਠਿਤਂ ਆਵਿ ਚੇਵ ਰਹੋ ਚ; ਮੇਤ੍ਤਂ ਵਚੀਕਮ੍ਮਂ ਮੇਤ੍ਤਂ ਮਨੋਕਮ੍ਮਂ ਪਚ੍ਚੁਪਟ੍ਠਿਤਂ ਆਵਿ ਚੇਵ ਰਹੋ ਚ. ਤਸ੍ਸ ਮਯ੍ਹਂ, ਭਨ੍ਤੇ, ਏਵਂ ਹੋਤਿ ‘ਯਂਨੂਨਾਹਂ ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤੇਯ੍ਯ’ਨ੍ਤਿ. ਸੋ ਖੋ ਅਹਂ, ਭਨ੍ਤੇ, ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਮੇਸਂਯੇਵ ਆਯਸ੍ਮਨ੍ਤਾਨਂ ਚਿਤ੍ਤਸ੍ਸ ਵਸੇਨ ਵਤ੍ਤਾਮਿ. ਨਾਨਾ ਹਿ ਖੋ ਨੋ, ਭਨ੍ਤੇ, ਕਾਯਾ, ਏਕਞ੍ਚ ਪਨ ਮਞ੍ਞੇ ਚਿਤ੍ਤਨ੍ਤਿ. ਏਵਂ ਖੋ ਮਯਂ, ਭਨ੍ਤੇ, ਸਮਗ੍ਗਾ ਸਮ੍ਮੋਦਮਾਨਾ ਅਵਿਵਦਮਾਨਾ ਖੀਰੋਦਕੀਭੂਤਾ ਅਞ੍ਞਮਞ੍ਞਂ ਪਿਯਚਕ੍ਖੂਹਿ ਸਮ੍ਪਸ੍ਸਨ੍ਤਾ ਵਿਹਰਾਮਾ’’ਤਿ.

‘‘ਕਚ੍ਚਿ ਪਨ ਵੋ, ਅਨੁਰੁਦ੍ਧਾ, ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਥਾ’’ਤਿ? ‘‘ਤਗ੍ਘ ਮਯਂ, ਭਨ੍ਤੇ, ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਾਮਾ’’ਤਿ. ‘‘ਯਥਾ ਕਥਂ ਪਨ ਤੁਮ੍ਹੇ, ਅਨੁਰੁਦ੍ਧਾ, ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਥਾ’’ਤਿ? ‘‘ਇਧ, ਭਨ੍ਤੇ, ਅਮ੍ਹਾਕਂ ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ ਸੋ ਆਸਨਂ ਪਞ੍ਞਪੇਤਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਤਿ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਉਪਟ੍ਠਾਪੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ. ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਸਚੇ ਹੋਤਿ ਭੁਤ੍ਤਾਵਸੇਸੋ, ਸਚੇ ਆਕਙ੍ਖਤਿ ਭੁਞ੍ਜਤਿ, ਨੋ ਚੇ ਆਕਙ੍ਖਤਿ ਅਪ੍ਪਹਰਿਤੇ ਵਾ ਛਡ੍ਡੇਤਿ. ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਤਿ. ਸੋ ਆਸਨਂ ਉਦ੍ਧਰਤਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਿ, ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਪਟਿਸਾਮੇਤਿ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਤਿ, ਭਤ੍ਤਗ੍ਗਂ ਸਮ੍ਮਜ੍ਜਤਿ. ਯੋ ਪਸ੍ਸਤਿ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ ਸੋ ਉਪਟ੍ਠਾਪੇਤਿ. ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਮ, ਨ ਤ੍ਵੇਵ ਮਯਂ, ਭਨ੍ਤੇ, ਤਪ੍ਪਚ੍ਚਯਾ ਵਾਚਂ ਭਿਨ੍ਦਾਮ. ਪਞ੍ਚਾਹਿਕਂ ਖੋ ਪਨ ਮਯਂ, ਭਨ੍ਤੇ, ਸਬ੍ਬਰਤ੍ਤਿਂ ਧਮ੍ਮਿਯਾ ਕਥਾਯ ਸਨ੍ਨਿਸੀਦਾਮ. ਏਵਂ ਖੋ ਮਯਂ, ਭਨ੍ਤੇ, ਅਪ੍ਪਮਤ੍ਤਾ ਆਤਾਪਿਨੋ ਪਹਿਤਤ੍ਤਾ ਵਿਹਰਾਮਾ’’ਤਿ.

ਪਾਚਿਨਵਂਸਦਾਯਗਮਨਕਥਾ ਨਿਟ੍ਠਿਤਾ.

੨੭੫. ਪਾਲਿਲੇਯ੍ਯਕਗਮਨਕਥਾ

੪੬੭. [ਉਦਾ. ੩੫ ਆਦਯੋ ਥੋਕਂ ਵਿਸਦਿਸਂ] ਅਥ ਖੋ ਭਗਵਾ ਆਯਸ੍ਮਨ੍ਤਞ੍ਚ ਅਨੁਰੁਦ੍ਧਂ ਆਯਸ੍ਮਨ੍ਤਞ੍ਚ ਨਨ੍ਦਿਯਂ ਆਯਸ੍ਮਨ੍ਤਞ੍ਚ ਕਿਮਿਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਯੇਨ ਪਾਲਿਲੇਯ੍ਯਕਂ [ਪਾਰਿਲੇਯ੍ਯਕਂ (ਸੀ. ਸ੍ਯਾ.)] ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਪਾਲਿਲੇਯ੍ਯਕਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਪਾਲਿਲੇਯ੍ਯਕੇ ਵਿਹਰਤਿ ਰਕ੍ਖਿਤਵਨਸਣ੍ਡੇ ਭਦ੍ਦਸਾਲਮੂਲੇ. ਅਥ ਖੋ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ ਨ ਫਾਸੁ ਵਿਹਾਸਿਂ ਤੇਹਿ ਕੋਸਮ੍ਬਕੇਹਿ [ਕੋਸਬ੍ਭਿਕੇਹਿ (ਸ੍ਯਾ.)] ਭਿਕ੍ਖੂਹਿ ਭਣ੍ਡਨਕਾਰਕੇਹਿ ਕਲਹਕਾਰਕੇਹਿ ਵਿਵਾਦਕਾਰਕੇਹਿ ਭਸ੍ਸਕਾਰਕੇਹਿ ਸਙ੍ਘੇ ਅਧਿਕਰਣਕਾਰਕੇਹਿ. ਸੋਮ੍ਹਿ ਏਤਰਹਿ ਏਕੋ ਅਦੁਤਿਯੋ ਸੁਖਂ ਫਾਸੁ ਵਿਹਰਾਮਿ ਅਞ੍ਞਤ੍ਰੇਵ ਤੇਹਿ ਕੋਸਮ੍ਬਕੇਹਿ ਭਿਕ੍ਖੂਹਿ ਭਣ੍ਡਨਕਾਰਕੇਹਿ ਕਲਹਕਾਰਕੇਹਿ ਵਿਵਾਦਕਾਰਕੇਹਿ ਭਸ੍ਸਕਾਰਕੇਹਿ ਸਙ੍ਘੇ ਅਧਿਕਰਣਕਾਰਕੇਹੀ’’ਤਿ.

ਅਞ੍ਞਤਰੋਪਿ ਖੋ ਹਤ੍ਥਿਨਾਗੋ ਆਕਿਣ੍ਣੋ ਵਿਹਰਤਿ ਹਤ੍ਥੀਹਿ ਹਤ੍ਥਿਨੀਹਿ ਹਤ੍ਥਿਕਲ਼ਭੇਹਿ ਹਤ੍ਥਿਚ੍ਛਾਪੇਹਿ, ਛਿਨ੍ਨਗ੍ਗਾਨਿ ਚੇਵ ਤਿਣਾਨਿ ਖਾਦਤਿ, ਓਭਗ੍ਗੋਭਗ੍ਗਞ੍ਚਸ੍ਸ ਸਾਖਾਭਙ੍ਗਂ ਖਾਦਨ੍ਤਿ, ਆਵਿਲਾਨਿ ਚ ਪਾਨੀਯਾਨਿ ਪਿਵਤਿ, ਓਗਾਹਾ ਚਸ੍ਸ ਓਤਿਣ੍ਣਸ੍ਸ ਹਤ੍ਥਿਨਿਯੋ ਕਾਯਂ ਉਪਨਿਘਂਸਨ੍ਤਿਯੋ ਗਚ੍ਛਨ੍ਤਿ. ਅਥ ਖੋ ਤਸ੍ਸ ਹਤ੍ਥਿਨਾਗਸ੍ਸ ਏਤਦਹੋਸਿ – ‘‘ਅਹਂ ਖੋ ਆਕਿਣ੍ਣੋ ਵਿਹਰਾਮਿ ਹਤ੍ਥੀਹਿ ਹਤ੍ਥਿਨੀਹਿ ਹਤ੍ਥਿਕਲ਼ਭੇਹਿ ਹਤ੍ਥਿਚ੍ਛਾਪੇਹਿ, ਛਿਨ੍ਨਗ੍ਗਾਨਿ ਚੇਵ ਤਿਣਾਨਿ ਖਾਦਾਮਿ, ਓਭਗ੍ਗੋਭਗ੍ਗਞ੍ਚ ਮੇ ਸਾਖਾਭਙ੍ਗਂ ਖਾਦਨ੍ਤਿ, ਆਵਿਲਾਨਿ ਚ ਪਾਨੀਯਾਨਿ ਪਿਵਾਮਿ, ਓਗਾਹਾ ਚ ਮੇ ਓਤਿਣ੍ਣਸ੍ਸ ਹਤ੍ਥਿਨਿਯੋ ਕਾਯਂ ਉਪਨਿਘਂਸਨ੍ਤਿਯੋ ਗਚ੍ਛਨ੍ਤਿ. ਯਂਨੂਨਾਹਂ ਏਕੋਵ ਗਣਸ੍ਮਾ ਵੂਪਕਟ੍ਠੋ ਵਿਹਰੇਯ੍ਯ’’ਨ੍ਤਿ. ਅਥ ਖੋ ਸੋ ਹਤ੍ਥਿਨਾਗੋ ਯੂਥਾ ਅਪਕ੍ਕਮ੍ਮ ਯੇਨ ਪਾਲਿਲੇਯ੍ਯਕਂ ਰਕ੍ਖਿਤਵਨਸਣ੍ਡੋ ਭਦ੍ਦਸਾਲਮੂਲਂ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਸੋਣ੍ਡਾਯ ਭਗਵਤੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਿ, ਅਪ੍ਪਹਰਿਤਞ੍ਚ ਕਰੋਤਿ. ਅਥ ਖੋ ਤਸ੍ਸ ਹਤ੍ਥਿਨਾਗਸ੍ਸ ਏਤਦਹੋਸਿ – ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ ਨ ਫਾਸੁ ਵਿਹਾਸਿਂ ਹਤ੍ਥੀਹਿ ਹਤ੍ਥਿਨੀਹਿ ਹਤ੍ਥਿਕਲ਼ਭੇਹਿ ਹਤ੍ਥਿਚ੍ਛਾਪੇਹਿ, ਛਿਨ੍ਨਗ੍ਗਾਨਿ ਚੇਵ ਤਿਣਾਨਿ ਖਾਦਿਂ, ਓਭਗ੍ਗੋਭਗ੍ਗਞ੍ਚ ਮੇ ਸਾਖਾਭਙ੍ਗਂ ਖਾਦਿਂਸੁ, ਆਵਿਲਾਨਿ ਚ ਪਾਨੀਯਾਨਿ ਅਪਾਯਿਂ ਓਗਾਹਾ ਚ ਮੇ ਓਤਿਣ੍ਣਸ੍ਸ [ਓਗਾਹਞ੍ਚਸ੍ਸ ਓਤਿਣ੍ਣਸ੍ਸ (ਸ੍ਯਾ.), ਓਗਾਹਾ ਚਸ੍ਸ ਉਤ੍ਤਿਣ੍ਣਸ੍ਸ (ਸੀ.)] ਹਤ੍ਥਿਨਿਯੋ ਕਾਯਂ ਉਪਨਿਘਂਸਨ੍ਤਿਯੋ ਅਗਮਂਸੁ. ਸੋਮ੍ਹਿ ਏਤਰਹਿ ਏਕੋ ਅਦੁਤਿਯੋ ਸੁਖਂ ਫਾਸੁ ਵਿਹਰਾਮਿ ਅਞ੍ਞਤ੍ਰੇਵ ਹਤ੍ਥੀਹਿ ਹਤ੍ਥਿਨੀਹਿ ਹਤ੍ਥਿਕਲ਼ਭੇਹਿ ਹਤ੍ਥਿਚ੍ਛਾਪੇਹੀ’’ਤਿ.

ਅਥ ਖੋ ਭਗਵਾ ਅਤ੍ਤਨੋ ਚ ਪਵਿਵੇਕਂ ਵਿਦਿਤ੍ਵਾ ਤਸ੍ਸ ਚ ਹਤ੍ਥਿਨਾਗਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

[ਉਦਾ. ੩੫] ‘‘ਏਤਂ [ਏਵਂ (ਕ.)] ਨਾਗਸ੍ਸ ਨਾਗੇਨ, ਈਸਾਦਨ੍ਤਸ੍ਸ ਹਤ੍ਥਿਨੋ;

ਸਮੇਤਿ ਚਿਤ੍ਤਂ ਚਿਤ੍ਤੇਨ, ਯਦੇਕੋ ਰਮਤੀ ਵਨੇ’’ਤਿ.

ਅਥ ਖੋ ਭਗਵਾ ਪਾਲਿਲੇਯ੍ਯਕੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਕੋਸਮ੍ਬਕਾ ਉਪਾਸਕਾ – ‘‘ਇਮੇ ਖੋ ਅਯ੍ਯਾ ਕੋਸਮ੍ਬਕਾ ਭਿਕ੍ਖੂ ਬਹੁਨੋ ਅਮ੍ਹਾਕਂ ਅਨਤ੍ਥਸ੍ਸ ਕਾਰਕਾ. ਇਮੇਹਿ ਉਬ੍ਬਾਲ਼੍ਹੋ ਭਗਵਾ ਪਕ੍ਕਨ੍ਤੋ. ਹਨ੍ਦ ਮਯਂ ਅਯ੍ਯੇ ਕੋਸਮ੍ਬਕੇ ਭਿਕ੍ਖੂ ਨੇਵ ਅਭਿਵਾਦੇਯ੍ਯਾਮ, ਨ ਪਚ੍ਚੁਟ੍ਠੇਯ੍ਯਾਮ, ਨ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰੇਯ੍ਯਾਮ, ਨ ਸਕ੍ਕਰੇਯ੍ਯਾਮ, ਨ ਗਰੁਂ ਕਰੇਯ੍ਯਾਮ, ਨ ਮਾਨੇਯ੍ਯਾਮ, ਨ ਭਜੇਯ੍ਯਾਮ, ਨ ਪੂਜੇਯ੍ਯਾਮ, ਉਪਗਤਾਨਮ੍ਪਿ ਪਿਣ੍ਡਕਂ ਨ ਦਜ੍ਜੇਯ੍ਯਾਮ – ਏਵਂ ਇਮੇ ਅਮ੍ਹੇਹਿ ਅਸਕ੍ਕਰਿਯਮਾਨਾ ਅਗਰੁਕਰਿਯਮਾਨਾ ਅਮਾਨਿਯਮਾਨਾ ਅਭਜਿਯਮਾਨਾ ਅਪੂਜਿਯਮਾਨਾ ਅਸਕ੍ਕਾਰਪਕਤਾ ਪਕ੍ਕਮਿਸ੍ਸਨ੍ਤਿ ਵਾ ਵਿਬ੍ਭਮਿਸ੍ਸਨ੍ਤਿ ਵਾ ਭਗਵਨ੍ਤਂ ਵਾ ਪਸਾਦੇਸ੍ਸਨ੍ਤੀ’’ਤਿ. ਅਥ ਖੋ ਕੋਸਮ੍ਬਕਾ ਉਪਾਸਕਾ ਕੋਸਮ੍ਬਕੇ ਭਿਕ੍ਖੂ ਨੇਵ ਅਭਿਵਾਦੇਸੁਂ, ਨ ਪਚ੍ਚੁਟ੍ਠੇਸੁਂ, ਨ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਅਕਂਸੁ, ਨ ਸਕ੍ਕਰਿਂਸੁ, ਨ ਗਰੁਂ ਕਰਿਂਸੁ, ਨ ਮਾਨੇਸੁਂ, ਨ ਭਜੇਸੁਂ ਨ ਪੂਜੇਸੁਂ, ਉਪਗਤਾਨਮ੍ਪਿ ਪਿਣ੍ਡਕਂ ਨ ਅਦਂਸੁ. ਅਥ ਖੋ ਕੋਸਮ੍ਬਕਾ ਭਿਕ੍ਖੂ ਕੋਸਮ੍ਬਕੇਹਿ ਉਪਾਸਕੇਹਿ ਅਸਕ੍ਕਰਿਯਮਾਨਾ ਅਗਰੁਕਰਿਯਮਾਨਾ ਅਮਾਨਿਯਮਾਨਾ ਅਭਜਿਯਮਾਨਾ ਅਪੂਜਿਯਮਾਨਾ ਅਸਕ੍ਕਾਰਪਕਤਾ ਏਵਮਾਹਂਸੁ – ‘‘ਹਨ੍ਦ ਮਯਂ, ਆਵੁਸੋ, ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਸਨ੍ਤਿਕੇ ਇਮਂ ਅਧਿਕਰਣਂ ਵੂਪਸਮੇਯ੍ਯਾਮਾ’’ਤਿ.

ਪਾਲਿਲੇਯ੍ਯਕਗਮਨਕਥਾ ਨਿਟ੍ਠਿਤਾ.

੨੭੬. ਅਟ੍ਠਾਰਸਵਤ੍ਥੁਕਥਾ

੪੬੮. ਅਥ ਖੋ ਕੋਸਮ੍ਬਕਾ ਭਿਕ੍ਖੂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਸਾਵਤ੍ਥਿ ਤੇਨੁਪਸਙ੍ਕਮਿਂਸੁ. ਅਸ੍ਸੋਸਿ ਖੋ ਆਯਸ੍ਮਾ ਸਾਰਿਪੁਤ੍ਤੋ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਸਾਰਿਪੁਤ੍ਤ, ਯਥਾ ਧਮ੍ਮੋ ਤਥਾ ਤਿਟ੍ਠਾਹੀ’’ਤਿ. ‘‘ਕਥਾਹਂ, ਭਨ੍ਤੇ, ਜਾਨੇਯ੍ਯਂ ਧਮ੍ਮਂ ਵਾ ਅਧਮ੍ਮਂ ਵਾ’’ਤਿ?

ਅਟ੍ਠਾਰਸਹਿ ਖੋ, ਸਾਰਿਪੁਤ੍ਤ, ਵਤ੍ਥੂਹਿ ਅਧਮ੍ਮਵਾਦੀ ਜਾਨਿਤਬ੍ਬੋ. ਇਧ, ਸਾਰਿਪੁਤ੍ਤ, ਭਿਕ੍ਖੁ ਅਧਮ੍ਮਂ ਧਮ੍ਮੋਤਿ ਦੀਪੇਤਿ, ਧਮ੍ਮਂ ਅਧਮ੍ਮੋਤਿ ਦੀਪੇਤਿ; ਅਵਿਨਯਂ ਵਿਨਯੋਤਿ ਦੀਪੇਤਿ, ਵਿਨਯਂ ਅਵਿਨਯੋਤਿ ਦੀਪੇਤਿ; ਅਭਾਸਿਤਂ ਅਲਪਿਤਂ ਤਥਾਗਤੇਨ ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਦੀਪੇਤਿ, ਭਾਸਿਤਂ ਲਪਿਤਂ ਤਥਾਗਤੇਨ ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਚਿਣ੍ਣਂ ਤਥਾਗਤੇਨ ਆਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ, ਆਚਿਣ੍ਣਂ ਤਥਾਗਤੇਨ ਅਨਾਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ; ਅਪਞ੍ਞਤ੍ਤਂ ਤਥਾਗਤੇਨ ਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ, ਪਞ੍ਞਤ੍ਤਂ ਤਥਾਗਤੇਨ ਅਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਪਤ੍ਤਿਂ ਆਪਤ੍ਤੀਤਿ ਦੀਪੇਤਿ, ਆਪਤ੍ਤਿਂ ਅਨਾਪਤ੍ਤੀਤਿ ਦੀਪੇਤਿ; ਲਹੁਕਂ ਆਪਤ੍ਤਿਂ ਗਰੁਕਾ ਆਪਤ੍ਤੀਤਿ ਦੀਪੇਤਿ, ਗਰੁਕਂ ਆਪਤ੍ਤਿਂ ਲਹੁਕਾ ਆਪਤ੍ਤੀਤਿ ਦੀਪੇਤਿ; ਸਾਵਸੇਸਂ ਆਪਤ੍ਤਿਂ ਅਨਵਸੇਸਾ ਆਪਤ੍ਤੀਤਿ ਦੀਪੇਤਿ, ਅਨਵਸੇਸਂ ਆਪਤ੍ਤਿਂ ਸਾਵਸੇਸਾ ਆਪਤ੍ਤੀਤਿ ਦੀਪੇਤਿ; ਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ – ਇਮੇਹਿ ਖੋ, ਸਾਰਿਪੁਤ੍ਤ, ਅਟ੍ਠਾਰਸਹਿ ਵਤ੍ਥੂਹਿ ਅਧਮ੍ਮਵਾਦੀ ਜਾਨਿਤਬ੍ਬੋ.

ਅਟ੍ਠਾਰਸਹਿ ਚ ਖੋ, ਸਾਰਿਪੁਤ੍ਤ, ਵਤ੍ਥੂਹਿ ਧਮ੍ਮਵਾਦੀ ਜਾਨਿਤਬ੍ਬੋ. ਇਧ, ਸਾਰਿਪੁਤ੍ਤ, ਭਿਕ੍ਖੁ ਅਧਮ੍ਮਂ ਅਧਮ੍ਮੋਤਿ ਦੀਪੇਤਿ, ਧਮ੍ਮਂ ਧਮ੍ਮੋਤਿ ਦੀਪੇਤਿ; ਅਵਿਨਯਂ ਅਵਿਨਯੋਤਿ ਦੀਪੇਤਿ, ਵਿਨਯਂ ਵਿਨਯੋਤਿ ਦੀਪੇਤਿ; ਅਭਾਸਿਤਂ ਅਲਪਿਤਂ ਤਥਾਗਤੇਨ ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਦੀਪੇਤਿ, ਭਾਸਿਤਂ ਲਪਿਤਂ ਤਥਾਗਤੇਨ ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਚਿਣ੍ਣਂ ਤਥਾਗਤੇਨ ਅਨਾਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ, ਆਚਿਣ੍ਣਂ ਤਥਾਗਤੇਨ ਆਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ; ਅਪਞ੍ਞਤ੍ਤਂ ਤਥਾਗਤੇਨ ਅਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ, ਪਞ੍ਞਤ੍ਤਂ ਤਥਾਗਤੇਨ ਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਪਤ੍ਤਿਂ ਅਨਾਪਤ੍ਤੀਤਿ ਦੀਪੇਤਿ, ਆਪਤ੍ਤਿਂ ਆਪਤ੍ਤੀਤਿ ਦੀਪੇਤਿ; ਲਹੁਕਂ ਆਪਤ੍ਤਿਂ ਲਹੁਕਾ ਆਪਤ੍ਤੀਤਿ ਦੀਪੇਤਿ, ਗਰੁਕਂ ਆਪਤ੍ਤਿਂ ਗਰੁਕਾ ਆਪਤ੍ਤੀਤਿ ਦੀਪੇਤਿ; ਸਾਵਸੇਸਂ ਆਪਤ੍ਤਿਂ ਸਾਵਸੇਸਾ ਆਪਤ੍ਤੀਤਿ ਦੀਪੇਤਿ, ਅਨਵਸੇਸਂ ਆਪਤ੍ਤਿਂ ਅਨਵਸੇਸਾ ਆਪਤ੍ਤੀਤਿ ਦੀਪੇਤਿ; ਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ – ਇਮੇਹਿ ਖੋ, ਸਾਰਿਪੁਤ੍ਤ, ਅਟ੍ਠਾਰਸਹਿ ਵਤ੍ਥੂਹਿ ਧਮ੍ਮਵਾਦੀ ਜਾਨਿਤਬ੍ਬੋਤਿ.

੪੬੯. ਅਸ੍ਸੋਸਿ ਖੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ…ਪੇ… ਅਸ੍ਸੋਸਿ ਖੋ ਆਯਸ੍ਮਾ ਮਹਾਕਸ੍ਸਪੋ… ਅਸ੍ਸੋਸਿ ਖੋ ਆਯਸ੍ਮਾ ਮਹਾਕਚ੍ਚਾਨੋ… ਅਸ੍ਸੋਸਿ ਖੋ ਆਯਸ੍ਮਾ ਮਹਾਕੋਟ੍ਠਿਕੋ … ਅਸ੍ਸੋਸਿ ਖੋ ਆਯਸ੍ਮਾ ਮਹਾਕਪ੍ਪਿਨੋ… ਅਸ੍ਸੋਸਿ ਖੋ ਆਯਸ੍ਮਾ ਮਹਾਚੁਨ੍ਦੋ… ਅਸ੍ਸੋਸਿ ਖੋ ਆਯਸ੍ਮਾ ਅਨੁਰੁਦ੍ਧੋ… ਅਸ੍ਸੋਸਿ ਖੋ ਆਯਸ੍ਮਾ ਰੇਵਤੋ … ਅਸ੍ਸੋਸਿ ਖੋ ਆਯਸ੍ਮਾ ਉਪਾਲਿ… ਅਸ੍ਸੋਸਿ ਖੋ ਆਯਸ੍ਮਾ ਆਨਨ੍ਦੋ… ਅਸ੍ਸੋਸਿ ਖੋ ਆਯਸ੍ਮਾ ਰਾਹੁਲੋ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਆਯਸ੍ਮਾ ਰਾਹੁਲੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਰਾਹੁਲੋ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਰਾਹੁਲ, ਯਥਾ ਧਮ੍ਮੋ ਤਥਾ ਤਿਟ੍ਠਾਹੀ’’ਤਿ. ‘‘ਕਥਾਹਂ, ਭਨ੍ਤੇ, ਜਾਨੇਯ੍ਯਂ ਧਮ੍ਮਂ ਵਾ ਅਧਮ੍ਮਂ ਵਾ’’ਤਿ?

ਅਟ੍ਠਾਰਸਹਿ ਖੋ, ਰਾਹੁਲ, ਵਤ੍ਥੂਹਿ ਅਧਮ੍ਮਵਾਦੀ ਜਾਨਿਤਬ੍ਬੋ. ਇਧ, ਰਾਹੁਲ, ਭਿਕ੍ਖੁ ਅਧਮ੍ਮਂ ਧਮ੍ਮੋਤਿ ਦੀਪੇਤਿ, ਧਮ੍ਮਂ ਅਧਮ੍ਮੋਤਿ ਦੀਪੇਤਿ; ਅਵਿਨਯਂ ਵਿਨਯੋਤਿ ਦੀਪੇਤਿ, ਵਿਨਯਂ ਅਵਿਨਯੋਤਿ ਦੀਪੇਤਿ; ਅਭਾਸਿਤਂ ਅਲਪਿਤਂ ਤਥਾਗਤੇਨ ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਦੀਪੇਤਿ, ਭਾਸਿਤਂ ਲਪਿਤਂ ਤਥਾਗਤੇਨ ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਚਿਣ੍ਣਂ ਤਥਾਗਤੇਨ ਆਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ, ਆਚਿਣ੍ਣਂ ਤਥਾਗਤੇਨ ਅਨਾਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ; ਅਪਞ੍ਞਤ੍ਤਂ ਤਥਾਗਤੇਨ ਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ, ਪਞ੍ਞਤ੍ਤਂ ਤਥਾਗਤੇਨ ਅਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਪਤ੍ਤਿਂ ਆਪਤ੍ਤੀਤਿ ਦੀਪੇਤਿ, ਆਪਤ੍ਤਿਂ ਅਨਾਪਤ੍ਤੀਤਿ ਦੀਪੇਤਿ; ਲਹੁਕਂ ਆਪਤ੍ਤਿਂ ਗਰੁਕਾ ਆਪਤ੍ਤੀਤਿ ਦੀਪੇਤਿ, ਗਰੁਕਂ ਆਪਤ੍ਤਿਂ ਲਹੁਕਾ ਆਪਤ੍ਤੀਤਿ ਦੀਪੇਤਿ; ਸਾਵਸੇਸਂ ਆਪਤ੍ਤਿਂ ਅਨਵਸੇਸਾ ਆਪਤ੍ਤੀਤਿ ਦੀਪੇਤਿ, ਅਨਵਸੇਸਂ ਆਪਤ੍ਤਿਂ ਸਾਵਸੇਸਾ ਆਪਤ੍ਤੀਤਿ ਦੀਪੇਤਿ; ਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ – ਇਮੇਹਿ ਖੋ, ਰਾਹੁਲ, ਅਟ੍ਠਾਰਸਹਿ ਵਤ੍ਥੂਹਿ ਅਧਮ੍ਮਵਾਦੀ ਜਾਨਿਤਬ੍ਬੋ.

ਅਟ੍ਠਾਰਸਹਿ ਚ ਖੋ, ਰਾਹੁਲ, ਵਤ੍ਥੂਹਿ ਧਮ੍ਮਵਾਦੀ ਜਾਨਿਤਬ੍ਬੋ. ਇਧ, ਰਾਹੁਲ, ਭਿਕ੍ਖੁ ਅਧਮ੍ਮਂ ਅਧਮ੍ਮੋਤਿ ਦੀਪੇਤਿ, ਧਮ੍ਮਂ ਧਮ੍ਮੋਤਿ ਦੀਪੇਤਿ; ਅਵਿਨਯਂ ਅਵਿਨਯੋਤਿ ਦੀਪੇਤਿ, ਵਿਨਯਂ ਵਿਨਯੋਤਿ ਦੀਪੇਤਿ; ਅਭਾਸਿਤਂ ਅਲਪਿਤਂ ਤਥਾਗਤੇਨ ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਦੀਪੇਤਿ, ਭਾਸਿਤਂ ਲਪਿਤਂ ਤਥਾਗਤੇਨ ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਚਿਣ੍ਣਂ ਤਥਾਗਤੇਨ ਅਨਾਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ, ਆਚਿਣ੍ਣਂ ਤਥਾਗਤੇਨ ਆਚਿਣ੍ਣਂ ਤਥਾਗਤੇਨਾਤਿ ਦੀਪੇਤਿ; ਅਪਞ੍ਞਤ੍ਤਂ ਤਥਾਗਤੇਨ ਅਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ, ਪਞ੍ਞਤ੍ਤਂ ਤਥਾਗਤੇਨ ਪਞ੍ਞਤ੍ਤਂ ਤਥਾਗਤੇਨਾਤਿ ਦੀਪੇਤਿ; ਅਨਾਪਤ੍ਤਿਂ ਅਨਾਪਤ੍ਤੀਤਿ ਦੀਪੇਤਿ, ਆਪਤ੍ਤਿਂ ਆਪਤ੍ਤੀਤਿ ਦੀਪੇਤਿ; ਲਹੁਕਂ ਆਪਤ੍ਤਿਂ ਲਹੁਕਾ ਆਪਤ੍ਤੀਤਿ ਦੀਪੇਤਿ, ਗਰੁਕਂ ਆਪਤ੍ਤਿਂ ਗਰੁਕਾ ਆਪਤ੍ਤੀਤਿ ਦੀਪੇਤਿ; ਸਾਵਸੇਸਂ ਆਪਤ੍ਤਿਂ ਸਾਵਸੇਸਾ ਆਪਤ੍ਤੀਤਿ ਦੀਪੇਤਿ, ਅਨਵਸੇਸਂ ਆਪਤ੍ਤਿਂ ਅਨਵਸੇਸਾ ਆਪਤ੍ਤੀਤਿ ਦੀਪੇਤਿ; ਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਤਿ – ਇਮੇਹਿ ਖੋ, ਰਾਹੁਲ, ਅਟ੍ਠਾਰਸਹਿ ਵਤ੍ਥੂਹਿ ਧਮ੍ਮਵਾਦੀ ਜਾਨਿਤਬ੍ਬੋਤਿ.

੪੭੦. ਅਸ੍ਸੋਸਿ ਖੋ ਮਹਾਪਜਾਪਤਿ [ਮਹਾਪਜਾਪਤੀ (ਸੀ. ਸ੍ਯਾ.)] ਗੋਤਮੀ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਮਹਾਪਜਾਪਤਿ ਗੋਤਮੀ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਮਹਾਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਗੋਤਮਿ, ਉਭਯਤ੍ਥ ਧਮ੍ਮਂ ਸੁਣ. ਉਭਯਤ੍ਥ ਧਮ੍ਮਂ ਸੁਤ੍ਵਾ ਯੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ ਤੇਸਂ ਦਿਟ੍ਠਿਞ੍ਚ ਖਨ੍ਤਿਞ੍ਚ ਰੁਚਿਞ੍ਚ ਆਦਾਯਞ੍ਚ ਰੋਚੇਹਿ. ਯਞ੍ਚ ਕਿਞ੍ਚਿ ਭਿਕ੍ਖੁਨਿਸਙ੍ਘੇਨ ਭਿਕ੍ਖੁਸਙ੍ਘਤੋ ਪਚ੍ਚਾਸੀਸਿਤਬ੍ਬਂ ਸਬ੍ਬਂ ਤਂ ਧਮ੍ਮਵਾਦਿਤੋਵ ਪਚ੍ਚਾਸੀਸਿਤਬ੍ਬ’’ਨ੍ਤਿ.

੪੭੧. ਅਸ੍ਸੋਸਿ ਖੋ ਅਨਾਥਪਿਣ੍ਡਿਕੋ ਗਹਪਤਿ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਅਨਾਥਪਿਣ੍ਡਿਕੋ ਗਹਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਅਨਾਥਪਿਣ੍ਡਿਕੋ ਗਹਪਤਿ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਗਹਪਤਿ, ਉਭਯਤ੍ਥ ਦਾਨਂ ਦੇਹਿ. ਉਭਯਤ੍ਥ ਦਾਨਂ ਦਤ੍ਵਾ ਉਭਯਤ੍ਥ ਧਮ੍ਮਂ ਸੁਣ. ਉਭਯਤ੍ਥ ਧਮ੍ਮਂ ਸੁਤ੍ਵਾ ਯੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ ਤੇਸਂ ਦਿਟ੍ਠਿਞ੍ਚ ਖਨ੍ਤਿਞ੍ਚ ਰੁਚਿਞ੍ਚ ਆਦਾਯਞ੍ਚ ਰੋਚੇਹੀ’’ਤਿ.

੪੭੨. ਅਸ੍ਸੋਸਿ ਖੋ ਵਿਸਾਖਾ ਮਿਗਾਰਮਾਤਾ – ‘‘ਤੇ ਕਿਰ ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤੀ’’ਤਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਵਿਸਾਖਾ ਮਿਗਾਰਮਾਤਾ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਆਗਚ੍ਛਨ੍ਤਿ. ਕਥਾਹਂ, ਭਨ੍ਤੇ, ਤੇਸੁ ਭਿਕ੍ਖੂਸੁ ਪਟਿਪਜ੍ਜਾਮੀ’’ਤਿ? ‘‘ਤੇਨ ਹਿ ਤ੍ਵਂ, ਵਿਸਾਖੇ, ਉਭਯਤ੍ਥ ਦਾਨਂ ਦੇਹਿ. ਉਭਯਤ੍ਥ ਦਾਨਂ ਦਤ੍ਵਾ ਉਭਯਤ੍ਥ ਧਮ੍ਮਂ ਸੁਣ. ਉਭਯਤ੍ਥ ਧਮ੍ਮਂ ਸੁਤ੍ਵਾ ਯੇ ਤਤ੍ਥ ਭਿਕ੍ਖੂ ਧਮ੍ਮਵਾਦਿਨੋ ਤੇਸਂ ਦਿਟ੍ਠਿਞ੍ਚ ਖਨ੍ਤਿਞ੍ਚ ਰੁਚਿਞ੍ਚ ਆਦਾਯਞ੍ਚ ਰੋਚੇਹੀ’’ਤਿ.

੪੭੩. ਅਥ ਖੋ ਕੋਸਮ੍ਬਕਾ ਭਿਕ੍ਖੂ ਅਨੁਪੁਬ੍ਬੇਨ ਯੇਨ ਸਾਵਤ੍ਥਿ ਤਦਵਸਰੁਂ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਤੇ ਕਿਰ, ਭਨ੍ਤੇ, ਕੋਸਮ੍ਬਕਾ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਸਾਵਤ੍ਥਿਂ ਅਨੁਪ੍ਪਤ੍ਤਾ. ਕਥਂ ਨੁ ਖੋ, ਭਨ੍ਤੇ, ਤੇਸੁ ਭਿਕ੍ਖੂਸੁ ਸੇਨਾਸਨੇ [ਸੇਨਾਸਨੇਸੁ (ਕ.), ਸੇਨਾਸਨਂ (ਸ੍ਯਾ.)] ਪਟਿਪਜ੍ਜਿਤਬ੍ਬ’’ਨ੍ਤਿ? ‘‘ਤੇਨ ਹਿ, ਸਾਰਿਪੁਤ੍ਤ, ਵਿਵਿਤ੍ਤਂ ਸੇਨਾਸਨਂ ਦਾਤਬ੍ਬ’’ਨ੍ਤਿ. ‘‘ਸਚੇ ਪਨ, ਭਨ੍ਤੇ, ਵਿਵਿਤ੍ਤਂ ਨ ਹੋਤਿ, ਕਥਂ ਪਟਿਪਜ੍ਜਿਤਬ੍ਬ’’ਨ੍ਤਿ? ‘‘ਤੇਨ ਹਿ, ਸਾਰਿਪੁਤ੍ਤ, ਵਿਵਿਤ੍ਤਂ ਕਤ੍ਵਾਪਿ ਦਾਤਬ੍ਬਂ, ਨ ਤ੍ਵੇਵਾਹਂ, ਸਾਰਿਪੁਤ੍ਤ, ਕੇਨਚਿ ਪਰਿਯਾਯੇਨ ਵੁਡ੍ਢਤਰਸ੍ਸ ਭਿਕ੍ਖੁਨੋ ਸੇਨਾਸਨਂ ਪਟਿਬਾਹਿਤਬ੍ਬਨ੍ਤਿ ਵਦਾਮਿ. ਯੋ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

‘‘ਆਮਿਸੇ ਪਨ, ਭਨ੍ਤੇ, ਕਥਂ ਪਟਿਪਜ੍ਜਿਤਬ੍ਬ’’ਨ੍ਤਿ? ‘‘ਆਮਿਸਂ ਖੋ, ਸਾਰਿਪੁਤ੍ਤ, ਸਬ੍ਬੇਸਂ ਸਮਕਂ ਭਾਜੇਤਬ੍ਬ’’ਨ੍ਤਿ.

ਅਟ੍ਠਾਰਸਵਤ੍ਥੁਕਥਾ ਨਿਟ੍ਠਿਤਾ.

੨੭੭. ਓਸਾਰਣਾਨੁਜਾਨਨਾ

੪੭੪. ਅਥ ਖੋ ਤਸ੍ਸ ਉਕ੍ਖਿਤ੍ਤਕਸ੍ਸ ਭਿਕ੍ਖੁਨੋ ਧਮ੍ਮਞ੍ਚ ਵਿਨਯਞ੍ਚ ਪਚ੍ਚਵੇਕ੍ਖਨ੍ਤਸ੍ਸ ਏਤਦਹੋਸਿ – ‘‘ਆਪਤ੍ਤਿ ਏਸਾ, ਨੇਸਾ ਅਨਾਪਤ੍ਤਿ. ਆਪਨ੍ਨੋਮ੍ਹਿ, ਨਮ੍ਹਿ ਅਨਾਪਨ੍ਨੋ. ਉਕ੍ਖਿਤ੍ਤੋਮ੍ਹਿ, ਨਮ੍ਹਿ ਅਨੁਕ੍ਖਿਤ੍ਤੋ. ਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨਾ’’ਤਿ. ਅਥ ਖੋ ਸੋ ਉਕ੍ਖਿਤ੍ਤਕੋ ਭਿਕ੍ਖੁ ਯੇਨ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਉਕ੍ਖਿਤ੍ਤਾਨੁਵਤ੍ਤਕੇ ਭਿਕ੍ਖੂ ਏਤਦਵੋਚ – ‘‘ਆਪਤ੍ਤਿ ਏਸਾ, ਆਵੁਸੋ; ਨੇਸਾ ਅਨਾਪਤ੍ਤਿ. ਆਪਨ੍ਨੋਮ੍ਹਿ, ਨਮ੍ਹਿ ਅਨਾਪਨ੍ਨੋ. ਉਕ੍ਖਿਤ੍ਤੋਮ੍ਹਿ, ਨਮ੍ਹਿ ਅਨੁਕ੍ਖਿਤ੍ਤੋ. ਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਏਥ ਮਂ ਆਯਸ੍ਮਨ੍ਤੋ ਓਸਾਰੇਥਾ’’ਤਿ. ਅਥ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਅਯਂ, ਭਨ੍ਤੇ, ਉਕ੍ਖਿਤ੍ਤਕੋ ਭਿਕ੍ਖੁ ਏਵਮਾਹ – ‘ਆਪਤ੍ਤਿ ਏਸਾ, ਆਵੁਸੋ; ਨੇਸਾ ਅਨਾਪਤ੍ਤਿ. ਆਪਨ੍ਨੋਮ੍ਹਿ, ਨਮ੍ਹਿ ਅਨਾਪਨ੍ਨੋ. ਉਕ੍ਖਿਤ੍ਤੋਮ੍ਹਿ, ਨਮ੍ਹਿ ਅਨੁਕ੍ਖਿਤ੍ਤੋ. ਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਏਥ ਮਂ ਆਯਸ੍ਮਨ੍ਤੋ ਓਸਾਰੇਥਾ’ਤਿ. ਕਥਂ ਨੁ ਖੋ, ਭਨ੍ਤੇ, ਪਟਿਪਜ੍ਜਿਤਬ੍ਬ’’ਨ੍ਤਿ? ‘‘ਆਪਤ੍ਤਿ ਏਸਾ, ਭਿਕ੍ਖਵੇ; ਨੇਸਾ ਅਨਾਪਤ੍ਤਿ. ਆਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨਾਪਨ੍ਨੋ. ਉਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨੁਕ੍ਖਿਤ੍ਤੋ. ਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ. ਯਤੋ ਚ ਖੋ ਸੋ, ਭਿਕ੍ਖਵੇ, ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਤਿ ਚ, ਤੇਨ ਹਿ, ਭਿਕ੍ਖਵੇ, ਤਂ ਭਿਕ੍ਖੁਂ ਓਸਾਰੇਥਾ’’ਤਿ.

ਓਸਾਰਣਾਨੁਜਾਨਨਾ ਨਿਟ੍ਠਿਤਾ.

੨੭੮. ਸਙ੍ਘਸਾਮਗ੍ਗੀਕਥਾ

੪੭੫. ਅਥ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਓਸਾਰੇਤ੍ਵਾ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਉਕ੍ਖੇਪਕੇ ਭਿਕ੍ਖੂ ਏਤਦਵੋਚੁਂ – ‘‘ਯਸ੍ਮਿਂ, ਆਵੁਸੋ, ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ [ਪਸ੍ਸੀ (ਇਤਿਪਿ)] ਚ ਓਸਾਰਿਤੋ ਚ. ਹਨ੍ਦ ਮਯਂ, ਆਵੁਸੋ, ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਮਾ’’ਤਿ.

ਅਥ ਖੋ ਤੇ ਉਕ੍ਖੇਪਕਾ ਭਿਕ੍ਖੂ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਤੇ, ਭਨ੍ਤੇ, ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਏਵਮਾਹਂਸੁ – ‘ਯਸ੍ਮਿਂ, ਆਵੁਸੋ, ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ. ਹਨ੍ਦ ਮਯਂ, ਆਵੁਸੋ, ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਮਾ’ਤਿ. ਕਥਂ ਨੁ ਖੋ, ਭਨ੍ਤੇ, ਪਟਿਪਜ੍ਜਿਤਬ੍ਬ’’ਨ੍ਤਿ? ਯਤੋ ਚ ਖੋ ਸੋ, ਭਿਕ੍ਖਵੇ, ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ, ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਤੁ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਾ. ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬਂ ਗਿਲਾਨੇਹਿ ਚ ਅਗਿਲਾਨੇਹਿ ਚ. ਨ ਕੇਹਿਚਿ ਛਨ੍ਦੋ ਦਾਤਬ੍ਬੋ. ਸਨ੍ਨਿਪਤਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਸ੍ਮਿਂ ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਸ੍ਮਿਂ ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ. ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਤਿ. ਯਸ੍ਸਾਯਸ੍ਮਤੋ ਖਮਤਿ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਯਾ ਕਰਣਂ, ਸੋ ਤੁਣ੍ਹਸ੍ਸ, ਯਸ੍ਸ ਨਕ੍ਖਮਤਿ ਸੋ ਭਾਸੇਯ੍ਯ.

‘‘ਕਤਾ ਸਙ੍ਘੇਨ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗੀ. ਨਿਹਤੋ ਸਙ੍ਘਭੇਦੋ, ਨਿਹਤਾ ਸਙ੍ਘਰਾਜਿ, ਨਿਹਤਂ ਸਙ੍ਘਵਵਤ੍ਥਾਨਂ, ਨਿਹਤਂ ਸਙ੍ਘਨਾਨਾਕਰਣਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤਾਵਦੇਵ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਨ੍ਤਿ.

ਸਙ੍ਘਸਾਮਗ੍ਗੀਕਥਾ ਨਿਟ੍ਠਿਤਾ.

੨੭੯. ਉਪਾਲਿਸਙ੍ਘਸਾਮਗ੍ਗੀਪੁਚ੍ਛਾ

੪੭੬. ਅਥ ਖੋ ਆਯਸ੍ਮਾ ਉਪਾਲਿ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਉਪਾਲਿ ਭਗਵਨ੍ਤਂ ਏਤਦਵੋਚ – ‘‘ਯਸ੍ਮਿਂ, ਭਨ੍ਤੇ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਅਵਿਨਿਚ੍ਛਿਨਿਤ੍ਵਾ ਅਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਧਮ੍ਮਿਕਾ ਨੁ ਖੋ ਸਾ, ਭਨ੍ਤੇ, ਸਙ੍ਘਸਾਮਗ੍ਗੀ’’ਤਿ? ‘‘ਯਸ੍ਮਿਂ, ਉਪਾਲਿ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਅਵਿਨਿਚ੍ਛਿਨਿਤ੍ਵਾ ਅਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਅਧਮ੍ਮਿਕਾ ਸਾ, ਉਪਾਲਿ, ਸਙ੍ਘਸਾਮਗ੍ਗੀ’’ਤਿ.

‘‘ਯਸ੍ਮਿਂ ਪਨ, ਭਨ੍ਤੇ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਵਿਨਿਚ੍ਛਿਨਿਤ੍ਵਾ ਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਧਮ੍ਮਿਕਾ ਨੁ ਖੋ ਸਾ, ਭਨ੍ਤੇ, ਸਙ੍ਘਸਾਮਗ੍ਗੀ’’ਤਿ? ‘‘ਯਸ੍ਮਿਂ, ਉਪਾਲਿ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਵਿਨਿਚ੍ਛਿਨਿਤ੍ਵਾ ਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਧਮ੍ਮਿਕਾ ਸਾ, ਉਪਾਲਿ, ਸਙ੍ਘਸਾਮਗ੍ਗੀ’’ਤਿ.

‘‘ਕਤਿ ਨੁ ਖੋ, ਭਨ੍ਤੇ, ਸਙ੍ਘਸਾਮਗ੍ਗਿਯੋ’’ਤਿ? ‘‘ਦ੍ਵੇਮਾ, ਉਪਾਲਿ, ਸਙ੍ਘਸਾਮਗ੍ਗਿਯੋ – ਅਤ੍ਥੁਪਾਲਿ, ਸਙ੍ਘਸਾਮਗ੍ਗੀ ਅਤ੍ਥਾਪੇਤਾ ਬ੍ਯਞ੍ਜਨੁਪੇਤਾ; ਅਤ੍ਥੁਪਾਲਿ, ਸਙ੍ਘਸਾਮਗ੍ਗੀ ਅਤ੍ਥੁਪੇਤਾ ਚ ਬ੍ਯਞ੍ਜਨੁਪੇਤਾ ਚ. ਕਤਮਾ ਚ, ਉਪਾਲਿ, ਸਙ੍ਘਸਾਮਗ੍ਗੀ ਅਤ੍ਥਾਪੇਤਾ ਬ੍ਯਞ੍ਜਨੁਪੇਤਾ? ਯਸ੍ਮਿਂ, ਉਪਾਲਿ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਅਵਿਨਿਚ੍ਛਿਨਿਤ੍ਵਾ ਅਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਅਯਂ ਵੁਚ੍ਚਤਿ, ਉਪਾਲਿ, ਸਙ੍ਘਸਾਮਗ੍ਗੀ ਅਤ੍ਥਾਪੇਤਾ ਬ੍ਯਞ੍ਜਨੁਪੇਤਾ. ਕਤਮਾ ਚ, ਉਪਾਲਿ, ਸਙ੍ਘਸਾਮਗ੍ਗੀ ਅਤ੍ਥੁਪੇਤਾ ਚ ਬ੍ਯਞ੍ਜਨੁਪੇਤਾ ਚ? ਯਸ੍ਮਿਂ, ਉਪਾਲਿ, ਵਤ੍ਥੁਸ੍ਮਿਂ ਹੋਤਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸਙ੍ਘੋ ਤਂ ਵਤ੍ਥੁਂ ਵਿਨਿਚ੍ਛਿਨਿਤ੍ਵਾ ਮੂਲਾ ਮੂਲਂ ਗਨ੍ਤ੍ਵਾ ਸਙ੍ਘਸਾਮਗ੍ਗਿਂ ਕਰੋਤਿ, ਅਯਂ ਵੁਚ੍ਚਤਿ, ਉਪਾਲਿ, ਸਙ੍ਘਸਾਮਗ੍ਗੀ ਅਤ੍ਥੁਪੇਤਾ ਚ ਬ੍ਯਞ੍ਜਨੁਪੇਤਾ ਚ. ਇਮਾ ਖੋ, ਉਪਾਲਿ, ਦ੍ਵੇ ਸਙ੍ਘਸਾਮਗ੍ਗਿਯੋ’’ਤਿ.

੪੭੭. ਅਥ ਖੋ ਆਯਸ੍ਮਾ ਉਪਾਲਿ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਸਙ੍ਘਸ੍ਸ ਕਿਚ੍ਚੇਸੁ ਚ ਮਨ੍ਤਨਾਸੁ ਚ;

ਅਤ੍ਥੇਸੁ ਜਾਤੇਸੁ ਵਿਨਿਚ੍ਛਯੇਸੁ ਚ;

ਕਥਂਪਕਾਰੋਧ ਨਰੋ ਮਹਤ੍ਥਿਕੋ;

ਭਿਕ੍ਖੁ ਕਥਂ ਹੋਤਿਧ ਪਗ੍ਗਹਾਰਹੋਤਿ.

‘‘ਅਨਾਨੁਵਜ੍ਜੋ ਪਠਮੇਨ ਸੀਲਤੋ;

ਅਵੇਕ੍ਖਿਤਾਚਾਰੋ ਸੁਸਂਵੁਤਿਨ੍ਦ੍ਰਿਯੋ;

ਪਚ੍ਚਤ੍ਥਿਕਾ ਨੂਪਵਦਨ੍ਤਿ ਧਮ੍ਮਤੋ;

ਨ ਹਿਸ੍ਸ ਤਂ ਹੋਤਿ ਵਦੇਯ੍ਯੁ ਯੇਨ ਨਂ.

‘‘ਸੋ ਤਾਦਿਸੋ ਸੀਲਵਿਸੁਦ੍ਧਿਯਾ ਠਿਤੋ;

ਵਿਸਾਰਦੋ ਹੋਤਿ ਵਿਸਯ੍ਹ ਭਾਸਤਿ;

ਨਚ੍ਛਮ੍ਭਤਿ ਪਰਿਸਗਤੋ ਨ ਵੇਧਤਿ;

ਅਤ੍ਥਂ ਨ ਹਾਪੇਤਿ ਅਨੁਯ੍ਯੁਤਂ ਭਣਂ.

‘‘ਤਥੇਵ ਪਞ੍ਹਂ ਪਰਿਸਾਸੁ ਪੁਚ੍ਛਿਤੋ;

ਨ ਚੇਵ ਪਜ੍ਝਾਯਤਿ ਨ ਮਙ੍ਕੁ ਹੋਤਿ;

ਸੋ ਕਾਲਾਗਤਂ ਬ੍ਯਾਕਰਣਾਰਹਂ ਵਚੋ;

ਰਞ੍ਜੇਤਿ ਵਿਞ੍ਞੂਪਰਿਸਂ ਵਿਚਕ੍ਖਣੋ.

‘‘ਸਗਾਰਵੋ ਵੁਡ੍ਢਤਰੇਸੁ ਭਿਕ੍ਖੁਸੁ;

ਆਚੇਰਕਮ੍ਹਿ ਚ ਸਕੇ ਵਿਸਾਰਦੋ;

ਅਲਂ ਪਮੇਤੁਂ ਪਗੁਣੋ ਕਥੇਤਵੇ;

ਪਚ੍ਚਤ੍ਥਿਕਾਨਞ੍ਚ ਵਿਰਦ੍ਧਿਕੋਵਿਦੋ.

‘‘ਪਚ੍ਚਤ੍ਥਿਕਾ ਯੇਨ ਵਜਨ੍ਤਿ ਨਿਗ੍ਗਹਂ;

ਮਹਾਜਨੋ ਸਞ੍ਞਪਨਞ੍ਚ ਗਚ੍ਛਤਿ;

ਸਕਞ੍ਚ ਆਦਾਯਮਯਂ ਨ ਰਿਞ੍ਚਤਿ;

ਵਿਯਾਕਰਂ [ਸੋ ਬ੍ਯਾਕਰਂ (ਸੀ.), ਵੇਯ੍ਯਾਕਰਂ (ਸ੍ਯਾ.)] ਪਞ੍ਹਮਨੂਪਘਾਤਿਕਂ.

‘‘ਦੂਤੇਯ੍ਯਕਮ੍ਮੇਸੁ ਅਲਂ ਸਮੁਗ੍ਗਹੋ;

ਸਙ੍ਘਸ੍ਸ ਕਿਚ੍ਚੇਸੁ ਚ ਆਹੁ ਨਂ ਯਥਾ;

ਕਰਂ ਵਚੋ ਭਿਕ੍ਖੁਗਣੇਨ ਪੇਸਿਤੋ;

ਅਹਂ ਕਰੋਮੀਤਿ ਨ ਤੇਨ ਮਞ੍ਞਤਿ.

‘‘ਆਪਜ੍ਜਤਿ ਯਾਵਤਕੇਸੁ ਵਤ੍ਥੁਸੁ;

ਆਪਤ੍ਤਿਯਾ ਹੋਤਿ ਯਥਾ ਚ ਵੁਟ੍ਠਿਤਿ;

ਏਤੇ ਵਿਭਙ੍ਗਾ ਉਭਯਸ੍ਸ ਸ੍ਵਾਗਤਾ;

ਆਪਤ੍ਤਿ ਵੁਟ੍ਠਾਨਪਦਸ੍ਸ ਕੋਵਿਦੋ.

‘‘ਨਿਸ੍ਸਾਰਣਂ ਗਚ੍ਛਤਿ ਯਾਨਿ ਚਾਚਰਂ;

ਨਿਸ੍ਸਾਰਿਤੋ ਹੋਤਿ ਯਥਾ ਚ ਵਤ੍ਤਨਾ [ਵਤ੍ਥੁਨਾ (ਸੀ. ਸ੍ਯਾ.)];

ਓਸਾਰਣਂ ਤਂਵੁਸਿਤਸ੍ਸ ਜਨ੍ਤੁਨੋ;

ਏਤਮ੍ਪਿ ਜਾਨਾਤਿ ਵਿਭਙ੍ਗਕੋਵਿਦੋ.

‘‘ਸਗਾਰਵੋ ਵੁਡ੍ਢਤਰੇਸੁ ਭਿਕ੍ਖੁਸੁ;

ਨਵੇਸੁ ਥੇਰੇਸੁ ਚ ਮਜ੍ਝਿਮੇਸੁ ਚ;

ਮਹਾਜਨਸ੍ਸਤ੍ਥਚਰੋਧ ਪਣ੍ਡਿਤੋ;

ਸੋ ਤਾਦਿਸੋ ਭਿਕ੍ਖੁ ਇਧ ਪਗ੍ਗਹਾਰਹੋ’’ਤਿ.

ਉਪਾਲਿਸਙ੍ਘਸਾਮਗ੍ਗੀਪੁਚ੍ਛਾ ਨਿਟ੍ਠਿਤਾ.

ਕੋਸਮ੍ਬਕਕ੍ਖਨ੍ਧਕੋ ਦਸਮੋ.

੨੮੦. ਤਸ੍ਸੁਦ੍ਦਾਨਂ

ਕੋਸਮ੍ਬਿਯਂ ਜਿਨਵਰੋ, ਵਿਵਾਦਾਪਤ੍ਤਿਦਸ੍ਸਨੇ;

ਨੁਕ੍ਖਿਪੇਯ੍ਯ ਯਸ੍ਮਿਂ ਤਸ੍ਮਿਂ, ਸਦ੍ਧਾਯਾਪਤ੍ਤਿ ਦੇਸਯੇ.

ਅਨ੍ਤੋਸੀਮਾਯਂ ਤਤ੍ਥੇਵ, ਬਾਲਕਞ੍ਚੇਵ ਵਂਸਦਾ;

ਪਾਲਿਲੇਯ੍ਯਾ ਚ ਸਾਵਤ੍ਥਿ, ਸਾਰਿਪੁਤ੍ਤੋ ਚ ਕੋਲਿਤੋ.

ਮਹਾਕਸ੍ਸਪਕਚ੍ਚਾਨਾ, ਕੋਟ੍ਠਿਕੋ ਕਪ੍ਪਿਨੇਨ ਚ;