੬੫. ਚਤ੍ਤਾਰਿ ਅਕਰਣੀਯਾਨਿ

੧੨੯. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਞ੍ਞਤਰਂ ਭਿਕ੍ਖੁਂ ਉਪਸਮ੍ਪਾਦੇਤ੍ਵਾ ਏਕਕਂ ਓਹਾਯ ਪਕ੍ਕਮਿਂਸੁ. ਸੋ ਪਚ੍ਛਾ ਏਕਕੋਵ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਪੁਰਾਣਦੁਤਿਯਿਕਾਯ ਸਮਾਗਞ੍ਛਿ. ਸਾ ਏਵਮਾਹ – ‘‘ਕਿਂਦਾਨਿ ਪਬ੍ਬਜਿਤੋਸੀ’’ਤਿ? ‘‘ਆਮ, ਪਬ੍ਬਜਿਤੋਮ੍ਹੀ’’ਤਿ. ‘‘ਦੁਲ੍ਲਭੋ ਖੋ ਪਬ੍ਬਜਿਤਾਨਂ ਮੇਥੁਨੋ ਧਮ੍ਮੋ; ਏਹਿ, ਮੇਥੁਨਂ ਧਮ੍ਮਂ ਪਟਿਸੇਵਾ’’ਤਿ. ਸੋ ਤਸ੍ਸਾ ਮੇਥੁਨਂ ਧਮ੍ਮਂ ਪਟਿਸੇਵਿਤ੍ਵਾ ਚਿਰੇਨ ਅਗਮਾਸਿ. ਭਿਕ੍ਖੂ ਏਵਮਾਹਂਸੁ – ‘‘ਕਿਸ੍ਸ ਤ੍ਵਂ, ਆਵੁਸੋ, ਏਵਂ ਚਿਰਂ ਅਕਾਸੀ’’ਤਿ? ਅਥ ਖੋ ਸੋ ਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਉਪਸਮ੍ਪਾਦੇਤ੍ਵਾ ਦੁਤਿਯਂ ਦਾਤੁਂ, ਚਤ੍ਤਾਰਿ ਚ ਅਕਰਣੀਯਾਨਿ ਆਚਿਕ੍ਖਿਤੁਂ –

‘‘ਉਪਸਮ੍ਪਨ੍ਨੇਨ ਭਿਕ੍ਖੁਨਾ ਮੇਥੁਨੋ ਧਮ੍ਮੋ ਨ ਪਟਿਸੇਵਿਤਬ੍ਬੋ, ਅਨ੍ਤਮਸੋ ਤਿਰਚ੍ਛਾਨਗਤਾਯਪਿ. ਯੋ ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵਤਿ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਸੇਯ੍ਯਥਾਪਿ ਨਾਮ ਪੁਰਿਸੋ ਸੀਸਚ੍ਛਿਨ੍ਨੋ ਅਭਬ੍ਬੋ ਤੇਨ ਸਰੀਰਬਨ੍ਧਨੇਨ ਜੀਵਿਤੁਂ, ਏਵਮੇਵ ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵਿਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤਂ ਤੇ ਯਾਵਜੀਵਂ ਅਕਰਣੀਯਂ.

‘‘ਉਪਸਮ੍ਪਨ੍ਨੇਨ ਭਿਕ੍ਖੁਨਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਨ ਆਦਾਤਬ੍ਬਂ, ਅਨ੍ਤਮਸੋ ਤਿਣਸਲਾਕਂ ਉਪਾਦਾਯ. ਯੋ ਭਿਕ੍ਖੁ ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯਤਿ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਸੇਯ੍ਯਥਾਪਿ ਨਾਮ ਪਣ੍ਡੁਪਲਾਸੋ ਬਨ੍ਧਨਾ ਪਮੁਤ੍ਤੋ ਅਭਬ੍ਬੋ ਹਰਿਤਤ੍ਥਾਯ, ਏਵਮੇਵ ਭਿਕ੍ਖੁ ਪਾਦਂ ਵਾ ਪਾਦਾਰਹਂ ਵਾ ਅਤਿਰੇਕਪਾਦਂ ਵਾ ਅਦਿਨ੍ਨਂ ਥੇਯ੍ਯਸਙ੍ਖਾਤਂ ਆਦਿਯਿਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤਂ ਤੇ ਯਾਵਜੀਵਂ ਅਕਰਣੀਯਂ.

‘‘ਉਪਸਮ੍ਪਨ੍ਨੇਨ ਭਿਕ੍ਖੁਨਾ ਸਞ੍ਚਿਚ੍ਚ ਪਾਣੋ ਜੀਵਿਤਾ ਨ ਵੋਰੋਪੇਤਬ੍ਬੋ, ਅਨ੍ਤਮਸੋ ਕੁਨ੍ਥਕਿਪਿਲ੍ਲਿਕਂ ਉਪਾਦਾਯ. ਯੋ ਭਿਕ੍ਖੁ ਸਞ੍ਚਿਚ੍ਚ ਮਨੁਸ੍ਸਵਿਗ੍ਗਹਂ ਜੀਵਿਤਾ ਵੋਰੋਪੇਤਿ, ਅਨ੍ਤਮਸੋ ਗਬ੍ਭਪਾਤਨਂ ਉਪਾਦਾਯ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਸੇਯ੍ਯਥਾਪਿ ਨਾਮ ਪੁਥੁਸਿਲਾ ਦ੍ਵੇਧਾ ਭਿਨ੍ਨਾ ਅਪ੍ਪਟਿਸਨ੍ਧਿਕਾ ਹੋਤਿ, ਏਵਮੇਵ ਭਿਕ੍ਖੁ ਸਞ੍ਚਿਚ੍ਚ ਮਨੁਸ੍ਸਵਿਗ੍ਗਹਂ ਜੀਵਿਤਾ ਵੋਰੋਪੇਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤਂ ਤੇ ਯਾਵਜੀਵਂ ਅਕਰਣੀਯਂ.

‘‘ਉਪਸਮ੍ਪਨ੍ਨੇਨ ਭਿਕ੍ਖੁਨਾ ਉਤ੍ਤਰਿਮਨੁਸ੍ਸਧਮ੍ਮੋ ਨ ਉਲ੍ਲਪਿਤਬ੍ਬੋ, ਅਨ੍ਤਮਸੋ ‘ਸੁਞ੍ਞਾਗਾਰੇ ਅਭਿਰਮਾਮੀ’ਤਿ. ਯੋ ਭਿਕ੍ਖੁ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ ਝਾਨਂ ਵਾ ਵਿਮੋਕ੍ਖਂ ਵਾ ਸਮਾਧਿਂ ਵਾ ਸਮਾਪਤ੍ਤਿਂ ਵਾ ਮਗ੍ਗਂ ਵਾ ਫਲਂ ਵਾ, ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਸੇਯ੍ਯਥਾਪਿ ਨਾਮ ਤਾਲੋ ਮਤ੍ਥਕਚ੍ਛਿਨ੍ਨੋ ਅਭਬ੍ਬੋ ਪੁਨ ਵਿਰੁਲ਼੍ਹਿਯਾ, ਏਵਮੇਵ ਭਿਕ੍ਖੁ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਿਤ੍ਵਾ ਅਸ੍ਸਮਣੋ ਹੋਤਿ ਅਸਕ੍ਯਪੁਤ੍ਤਿਯੋ. ਤਂ ਤੇ ਯਾਵਜੀਵਂ ਅਕਰਣੀਯ’’ਨ੍ਤਿ.

ਚਤ੍ਤਾਰਿ ਅਕਰਣੀਯਾਨਿ ਨਿਟ੍ਠਿਤਾਨਿ.