੫੮. ਅਲਜ੍ਜੀਨਿਸ੍ਸਯਵਤ੍ਥੂਨਿ

੧੨੦. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਲਜ੍ਜੀਨਂ ਨਿਸ੍ਸਯਂ ਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਲਜ੍ਜੀਨਂ ਨਿਸ੍ਸਯੋ ਦਾਤਬ੍ਬੋ. ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਲਜ੍ਜੀਨਂ ਨਿਸ੍ਸਾਯ ਵਸਨ੍ਤਿ. ਤੇਪਿ ਨਚਿਰਸ੍ਸੇਵ ਅਲਜ੍ਜਿਨੋ ਹੋਨ੍ਤਿ ਪਾਪਕਾਭਿਕ੍ਖੂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਅਲਜ੍ਜੀਨਂ ਨਿਸ੍ਸਾਯ ਵਤ੍ਥਬ੍ਬਂ. ਯੋ ਵਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਭਗਵਤਾ ਪਞ੍ਞਤ੍ਤਂ ‘ਨ ਅਲਜ੍ਜੀਨਂ ਨਿਸ੍ਸਯੋ ਦਾਤਬ੍ਬੋ, ਨ ਅਲਜ੍ਜੀਨਂ ਨਿਸ੍ਸਾਯ ਵਤ੍ਥਬ੍ਬ’ਨ੍ਤਿ. ਕਥਂ ਨੁ ਖੋ ਮਯਂ ਜਾਨੇਯ੍ਯਾਮ ਲਜ੍ਜਿਂ ਵਾ ਅਲਜ੍ਜਿਂ ਵਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਚਤੂਹਪਞ੍ਚਾਹਂ ਆਗਮੇਤੁਂ ਯਾਵ ਭਿਕ੍ਖੁਸਭਾਗਤਂ ਜਾਨਾਮੀਤਿ.