੩੯. ਆਹੁਨ੍ਦਰਿਕਵਤ੍ਥੁ

੧੦੨. ਤੇਨ ਖੋ ਪਨ ਸਮਯੇਨ ਭਗਵਾ ਤਤ੍ਥੇਵ ਰਾਜਗਹੇ ਵਸ੍ਸਂ ਵਸਿ, ਤਤ੍ਥ ਹੇਮਨ੍ਤਂ, ਤਤ੍ਥ ਗਿਮ੍ਹਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਆਹੁਨ੍ਦਰਿਕਾ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਦਿਸਾ ਅਨ੍ਧਕਾਰਾ, ਨ ਇਮੇਸਂ ਦਿਸਾ ਪਕ੍ਖਾਯਨ੍ਤੀ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਗਚ੍ਛਾਨਨ੍ਦ, ਅਵਾਪੁਰਣਂ [ਅਪਾਪੁਰਣਂ (ਕ.)] ਆਦਾਯ ਅਨੁਪਰਿਵੇਣਿਯਂ ਭਿਕ੍ਖੂਨਂ ਆਰੋਚੇਹਿ – ‘‘ਇਚ੍ਛਤਾਵੁਸੋ ਭਗਵਾ ਦਕ੍ਖਿਣਾਗਿਰਿਂ ਚਾਰਿਕਂ ਪਕ੍ਕਮਿਤੁਂ. ਯਸ੍ਸਾਯਸ੍ਮਤੋ ਅਤ੍ਥੋ, ਸੋ ਆਗਚ੍ਛਤੂ’’ਤਿ. ਏਵਂ, ਭਨ੍ਤੇ, ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਅਵਾਪੁਰਣਂ ਆਦਾਯ ਅਨੁਪਰਿਵੇਣਿਯਂ ਭਿਕ੍ਖੂਨਂ ਆਰੋਚੇਸਿ – ‘ਇਚ੍ਛਤਾਵੁਸੋ ਭਗਵਾ ਦਕ੍ਖਿਣਾਗਿਰਿਂ ਚਾਰਿਕਂ ਪਕ੍ਕਮਿਤੁਂ. ਯਸ੍ਸਾਯਸ੍ਮਤੋ ਅਤ੍ਥੋ, ਸੋ ਆਗਚ੍ਛਤੂ’’’ਤਿ. ਭਿਕ੍ਖੂ ਏਵਮਾਹਂਸੁ – ‘‘ਭਗਵਤਾ, ਆਵੁਸੋ ਆਨਨ੍ਦ, ਪਞ੍ਞਤ੍ਤਂ ਦਸਵਸ੍ਸਾਨਿ ਨਿਸ੍ਸਾਯ ਵਤ੍ਥੁਂ, ਦਸਵਸ੍ਸੇਨ ਨਿਸ੍ਸਯਂ ਦਾਤੁਂ. ਤਤ੍ਥ ਚ ਨੋ ਗਨ੍ਤਬ੍ਬਂ ਭਵਿਸ੍ਸਤਿ, ਨਿਸ੍ਸਯੋ ਚ ਗਹੇਤਬ੍ਬੋ ਭਵਿਸ੍ਸਤਿ, ਇਤ੍ਤਰੋ ਚ ਵਾਸੋ ਭਵਿਸ੍ਸਤਿ, ਪੁਨ ਚ ਪਚ੍ਚਾਗਨ੍ਤਬ੍ਬਂ ਭਵਿਸ੍ਸਤਿ, ਪੁਨ ਚ ਨਿਸ੍ਸਯੋ ਗਹੇਤਬ੍ਬੋ ਭਵਿਸ੍ਸਤਿ. ਸਚੇ ਅਮ੍ਹਾਕਂ ਆਚਰਿਯੁਪਜ੍ਝਾਯਾ ਗਮਿਸ੍ਸਨ੍ਤਿ, ਮਯਮ੍ਪਿ ਗਮਿਸ੍ਸਾਮ; ਨੋ ਚੇ ਅਮ੍ਹਾਕਂ ਆਚਰਿਯੁਪਜ੍ਝਾਯਾ ਗਮਿਸ੍ਸਨ੍ਤਿ, ਮਯਮ੍ਪਿ ਨ ਗਮਿਸ੍ਸਾਮ. ਲਹੁਚਿਤ੍ਤਕਤਾ ਨੋ, ਆਵੁਸੋ ਆਨਨ੍ਦ, ਪਞ੍ਞਾਯਿਸ੍ਸਤੀ’’ਤਿ. ਅਥ ਖੋ ਭਗਵਾ ਓਗਣੇਨ ਭਿਕ੍ਖੁਸਙ੍ਘੇਨ ਦਕ੍ਖਿਣਾਗਿਰਿਂ ਚਾਰਿਕਂ ਪਕ੍ਕਾਮਿ.

ਆਹੁਨ੍ਦਰਿਕਵਤ੍ਥੁ ਨਿਟ੍ਠਿਤਂ.