੩੫. ਕਮ੍ਮਾਰਭਣ੍ਡੁਵਤ੍ਥੁ

੯੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਕਮ੍ਮਾਰਭਣ੍ਡੁ ਮਾਤਾਪਿਤੂਹਿ ਸਦ੍ਧਿਂ ਭਣ੍ਡਿਤ੍ਵਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਅਥ ਖੋ ਤਸ੍ਸ ਕਮ੍ਮਾਰਭਣ੍ਡੁਸ੍ਸ ਮਾਤਾਪਿਤਰੋ ਤਂ ਕਮ੍ਮਾਰਭਣ੍ਡੁਂ ਵਿਚਿਨਨ੍ਤਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂ ਪੁਚ੍ਛਿਂਸੁ – ‘‘ਅਪਿ, ਭਨ੍ਤੇ, ਏਵਰੂਪਂ ਦਾਰਕਂ ਪਸ੍ਸੇਯ੍ਯਾਥਾ’’ਤਿ? ਭਿਕ੍ਖੂ ਅਜਾਨਂਯੇਵ ਆਹਂਸੁ – ‘‘ਨ ਜਾਨਾਮਾ’’ਤਿ, ਅਪਸ੍ਸਂਯੇਵ ਆਹਂਸੁ – ‘‘ਨ ਪਸ੍ਸਾਮਾ’’ਤਿ. ਅਥ ਖੋ ਤਸ੍ਸ ਕਮ੍ਮਾਰਭਣ੍ਡੁਸ੍ਸ ਮਾਤਾਪਿਤਰੋ ਤਂ ਕਮ੍ਮਾਰਭਣ੍ਡੁਂ ਵਿਚਿਨਨ੍ਤਾ ਭਿਕ੍ਖੂਸੁ ਪਬ੍ਬਜਿਤਂ ਦਿਸ੍ਵਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ, ਦੁਸ੍ਸੀਲਾ ਮੁਸਾਵਾਦਿਨੋ. ਜਾਨਂਯੇਵ ਆਹਂਸੁ – ‘ਨ ਜਾਨਾਮਾ’ਤਿ, ਪਸ੍ਸਂਯੇਵ ਆਹਂਸੁ – ‘ਨ ਪਸ੍ਸਾਮਾ’ਤਿ. ਅਯਂ ਦਾਰਕੋ ਭਿਕ੍ਖੂਸੁ ਪਬ੍ਬਜਿਤੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਕਮ੍ਮਾਰਭਣ੍ਡੁਸ੍ਸ ਮਾਤਾਪਿਤੂਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਂ ਅਪਲੋਕੇਤੁਂ ਭਣ੍ਡੁਕਮ੍ਮਾਯਾਤਿ.

ਕਮ੍ਮਾਰਭਣ੍ਡੁਵਤ੍ਥੁ ਨਿਟ੍ਠਿਤਂ.