੨੧. ਬਾਲਅਬ੍ਯਤ੍ਤਵਤ੍ਥੁ

੮੨. ਤੇਨ ਖੋ ਪਨ ਸਮਯੇਨ ਭਿਕ੍ਖੂ, ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ, ਬਾਲਾ ਅਬ੍ਯਤ੍ਤਾ ਨਿਸ੍ਸਯਂ ਦੇਨ੍ਤਿ. ਦਿਸ੍ਸਨ੍ਤਿ ਆਚਰਿਯਾ ਬਾਲਾ, ਅਨ੍ਤੇਵਾਸਿਕਾ ਪਣ੍ਡਿਤਾ. ਦਿਸ੍ਸਨ੍ਤਿ ਆਚਰਿਯਾ ਅਬ੍ਯਤ੍ਤਾ, ਅਨ੍ਤੇਵਾਸਿਕਾ ਬ੍ਯਤ੍ਤਾ. ਦਿਸ੍ਸਨ੍ਤਿ ਆਚਰਿਯਾ ਅਪ੍ਪਸ੍ਸੁਤਾ, ਅਨ੍ਤੇਵਾਸਿਕਾ ਬਹੁਸ੍ਸੁਤਾ. ਦਿਸ੍ਸਨ੍ਤਿ ਆਚਰਿਯਾ ਦੁਪ੍ਪਞ੍ਞਾ, ਅਨ੍ਤੇਵਾਸਿਕਾ ਪਞ੍ਞਵਨ੍ਤੋ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ, ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ, ਬਾਲਾ ਅਬ੍ਯਤ੍ਤਾ ਨਿਸ੍ਸਯਂ ਦਸ੍ਸਨ੍ਤਿ. ਦਿਸ੍ਸਨ੍ਤਿ ਆਚਰਿਯਾ ਬਾਲਾ ਅਨ੍ਤੇਵਾਸਿਕਾ ਪਣ੍ਡਿਤਾ, ਦਿਸ੍ਸਨ੍ਤਿ ਆਚਰਿਯਾ ਅਬ੍ਯਤ੍ਤਾ ਅਨ੍ਤੇਵਾਸਿਕਾ ਬ੍ਯਤ੍ਤਾ, ਦਿਸ੍ਸਨ੍ਤਿ ਆਚਰਿਯਾ ਅਪ੍ਪਸ੍ਸੁਤਾ ਅਨ੍ਤੇਵਾਸਿਕਾ ਬਹੁਸ੍ਸੁਤਾ, ਦਿਸ੍ਸਨ੍ਤਿ ਆਚਰਿਯਾ ਦੁਪ੍ਪਞ੍ਞਾ ਅਨ੍ਤੇਵਾਸਿਕਾ ਪਞ੍ਞਵਨ੍ਤੋ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ, ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾਤਿ, ਬਾਲਾ ਅਬ੍ਯਤ੍ਤਾ ਨਿਸ੍ਸਯਂ ਦੇਨ੍ਤਿ…ਪੇ… ਸਚ੍ਚਂ, ਭਗਵਾਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਬਾਲੇਨ ਅਬ੍ਯਤ੍ਤੇਨ ਨਿਸ੍ਸਯੋ ਦਾਤਬ੍ਬੋ. ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਦਸਵਸ੍ਸੇਨ ਵਾ ਅਤਿਰੇਕਦਸਵਸ੍ਸੇਨ ਵਾ ਨਿਸ੍ਸਯਂ ਦਾਤੁ’’ਨ੍ਤਿ.

ਬਾਲਅਬ੍ਯਤ੍ਤਵਤ੍ਥੁ ਨਿਟ੍ਠਿਤਂ.