੧੧. ਭਦ੍ਦਵਗ੍ਗਿਯਵਤ੍ਥੁ

੩੬. ਅਥ ਖੋ ਭਗਵਾ ਬਾਰਾਣਸਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਉਰੁਵੇਲਾ ਤੇਨ ਚਾਰਿਕਂ ਪਕ੍ਕਾਮਿ. ਅਥ ਖੋ ਭਗਵਾ ਮਗ੍ਗਾ ਓਕ੍ਕਮ੍ਮ ਯੇਨ ਅਞ੍ਞਤਰੋ ਵਨਸਣ੍ਡੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਵਨਸਣ੍ਡਂ ਅਜ੍ਝੋਗਾਹੇਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਤੇਨ ਖੋ ਪਨ ਸਮਯੇਨ ਤਿਂਸਮਤ੍ਤਾ ਭਦ੍ਦਵਗ੍ਗਿਯਾ ਸਹਾਯਕਾ ਸਪਜਾਪਤਿਕਾ ਤਸ੍ਮਿਂ ਵਨਸਣ੍ਡੇ ਪਰਿਚਾਰੇਨ੍ਤਿ. ਏਕਸ੍ਸ ਪਜਾਪਤਿ ਨਾਹੋਸਿ; ਤਸ੍ਸ ਅਤ੍ਥਾਯ ਵੇਸੀ ਆਨੀਤਾ ਅਹੋਸਿ. ਅਥ ਖੋ ਸਾ ਵੇਸੀ ਤੇਸੁ ਪਮਤ੍ਤੇਸੁ ਪਰਿਚਾਰੇਨ੍ਤੇਸੁ ਭਣ੍ਡਂ ਆਦਾਯ ਪਲਾਯਿਤ੍ਥ. ਅਥ ਖੋ ਤੇ ਸਹਾਯਕਾ ਸਹਾਯਕਸ੍ਸ ਵੇਯ੍ਯਾਵਚ੍ਚਂ ਕਰੋਨ੍ਤਾ, ਤਂ ਇਤ੍ਥਿਂ ਗਵੇਸਨ੍ਤਾ, ਤਂ ਵਨਸਣ੍ਡਂ ਆਹਿਣ੍ਡਨ੍ਤਾ ਅਦ੍ਦਸਂਸੁ ਭਗਵਨ੍ਤਂ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਂ. ਦਿਸ੍ਵਾਨ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਅਪਿ, ਭਨ੍ਤੇ, ਭਗਵਾ ਏਕਂ ਇਤ੍ਥਿਂ ਪਸ੍ਸੇਯ੍ਯਾ’’ਤਿ? ‘‘ਕਿਂ ਪਨ ਵੋ, ਕੁਮਾਰਾ, ਇਤ੍ਥਿਯਾ’’ਤਿ? ‘‘ਇਧ ਮਯਂ, ਭਨ੍ਤੇ, ਤਿਂਸਮਤ੍ਤਾ ਭਦ੍ਦਵਗ੍ਗਿਯਾ ਸਹਾਯਕਾ ਸਪਜਾਪਤਿਕਾ ਇਮਸ੍ਮਿਂ ਵਨਸਣ੍ਡੇ ਪਰਿਚਾਰਿਮ੍ਹਾ. ਏਕਸ੍ਸ ਪਜਾਪਤਿ ਨਾਹੋਸਿ; ਤਸ੍ਸ ਅਤ੍ਥਾਯ ਵੇਸੀ ਆਨੀਤਾ ਅਹੋਸਿ. ਅਥ ਖੋ ਸਾ, ਭਨ੍ਤੇ, ਵੇਸੀ ਅਮ੍ਹੇਸੁ ਪਮਤ੍ਤੇਸੁ ਪਰਿਚਾਰੇਨ੍ਤੇਸੁ ਭਣ੍ਡਂ ਆਦਾਯ ਪਲਾਯਿਤ੍ਥ. ਤੇ ਮਯਂ, ਭਨ੍ਤੇ, ਸਹਾਯਕਾ ਸਹਾਯਕਸ੍ਸ ਵੇਯ੍ਯਾਵਚ੍ਚਂ ਕਰੋਨ੍ਤਾ, ਤਂ ਇਤ੍ਥਿਂ ਗਵੇਸਨ੍ਤਾ, ਇਮਂ ਵਨਸਣ੍ਡਂ ਆਹਿਣ੍ਡਾਮਾ’’ਤਿ. ‘‘ਤਂ ਕਿਂ ਮਞ੍ਞਥ ਵੋ, ਕੁਮਾਰਾ, ਕਤਮਂ ਨੁ ਖੋ ਤੁਮ੍ਹਾਕਂ ਵਰਂ – ਯਂ ਵਾ ਤੁਮ੍ਹੇ ਇਤ੍ਥਿਂ ਗਵੇਸੇਯ੍ਯਾਥ, ਯਂ ਵਾ ਅਤ੍ਤਾਨਂ ਗਵੇਸੇਯ੍ਯਾਥਾ’’ਤਿ? ‘‘ਏਤਦੇਵ, ਭਨ੍ਤੇ, ਅਮ੍ਹਾਕਂ ਵਰਂ ਯਂ ਮਯਂ ਅਤ੍ਤਾਨਂ ਗਵੇਸੇਯ੍ਯਾਮਾ’’ਤਿ. ‘‘ਤੇਨ ਹਿ ਵੋ, ਕੁਮਾਰਾ, ਨਿਸੀਦਥ, ਧਮ੍ਮਂ ਵੋ ਦੇਸੇਸ੍ਸਾਮੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਤੇ ਭਦ੍ਦਵਗ੍ਗਿਯਾ ਸਹਾਯਕਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਤੇਸਂ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ, ਯਦਾ ਤੇ ਭਗਵਾ ਅਞ੍ਞਾਸਿ ਕਲ੍ਲਚਿਤ੍ਤੇ ਮੁਦੁਚਿਤ੍ਤੇ ਵਿਨੀਵਰਣਚਿਤ੍ਤੇ ਉਦਗ੍ਗਚਿਤ੍ਤੇ ਪਸਨ੍ਨਚਿਤ੍ਤੇ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ ਦੁਕ੍ਖਂ ਸਮੁਦਯਂ ਨਿਰੋਧਂ ਮਗ੍ਗਂ, ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਤੇਸਂ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ. ਤੇ ਦਿਟ੍ਠਧਮ੍ਮਾ ਪਤ੍ਤਧਮ੍ਮਾ ਵਿਦਿਤਧਮ੍ਮਾ ਪਰਿਯੋਗਾਲ਼੍ਹਧਮ੍ਮਾ ਤਿਣ੍ਣਵਿਚਿਕਿਚ੍ਛਾ ਵਿਗਤਕਥਂਕਥਾ ਵੇਸਾਰਜ੍ਜਪ੍ਪਤ੍ਤਾ ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

ਭਦ੍ਦਵਗ੍ਗਿਯਸਹਾਯਕਾਨਂ ਵਤ੍ਥੁ ਨਿਟ੍ਠਿਤਂ.

ਦੁਤਿਯਭਾਣਵਾਰੋ.