ਖੁਦ੍ਦਕਵਤ੍ਥੂਨਿ
੨੪੩. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਨਹਾਯਮਾਨਾ ਰੁਕ੍ਖੇ ਕਾਯਂ ਉਗ੍ਘਂਸੇਨ੍ਤਿ, ਊਰੁਮ੍ਪਿ ਬਾਹੁਮ੍ਪਿ ਉਰਮ੍ਪਿ ਪਿਟ੍ਠਿਮ੍ਪਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨਹਾਯਮਾਨਾ ਰੁਕ੍ਖੇ ਕਾਯਂ ਉਗ੍ਘਂਸੇਸ੍ਸਨ੍ਤਿ, ਊਰੁਮ੍ਪਿ ਬਾਹੁਮ੍ਪਿ ਉਰਮ੍ਪਿ ਪਿਟ੍ਠਿਮ੍ਪਿ, ਸੇਯ੍ਯਥਾਪਿ ਮਲ੍ਲਮੁਟ੍ਠਿਕਾ ਗਾਮਮੋਦ੍ਦਵਾ’’ਤਿ [ਗਾਮਪੋਦ੍ਦਵਾ (ਸੀ.), ਗਾਮਪੂਤਵਾ (ਸ੍ਯਾ.)]! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਨਹਾਯਮਾਨਾ ਰੁਕ੍ਖੇ ਕਾਯਂ ਉਗ੍ਘਂਸੇਨ੍ਤਿ, ਊਰੁਮ੍ਪਿ ਬਾਹੁਮ੍ਪਿ ਉਰਮ੍ਪਿ ਪਿਟ੍ਠਿਮ੍ਪੀ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤੇਸਂ ਮੋਘਪੁਰਿਸਾਨਂ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਨਹਾਯਮਾਨਾ ਰੁਕ੍ਖੇ ਕਾਯਂ ਉਗ੍ਘਂਸੇਸ੍ਸਨ੍ਤਿ, ਊਰੁਮ੍ਪਿ ਬਾਹੁਮ੍ਪਿ ਉਰਮ੍ਪਿ ਪਿਟ੍ਠਿਮ੍ਪਿ? ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਨਹਾਯਮਾਨੇਨ ਭਿਕ੍ਖੁਨਾ ਰੁਕ੍ਖੇ ਕਾਯੋ ਉਗ੍ਘਂਸੇਤਬ੍ਬੋ. ਯੋ ਉਗ੍ਘਂਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਨਹਾਯਮਾਨਾ ਥਮ੍ਭੇ ਕਾਯਂ ਉਗ੍ਘਂਸੇਨ੍ਤਿ, ਊਰੁਮ੍ਪਿ ਬਾਹੁਮ੍ਪਿ ਉਰਮ੍ਪਿ ਪਿਟ੍ਠਿਮ੍ਪਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨਹਾਯਮਾਨਾ ਥਮ੍ਭੇ ਕਾਯਂ ਉਗ੍ਘਂਸੇਸ੍ਸਨ੍ਤਿ, ਊਰੁਮ੍ਪਿ ਬਾਹੁਮ੍ਪਿ ਉਰਮ੍ਪਿ ਪਿਟ੍ਠਿਮ੍ਪਿ, ਸੇਯ੍ਯਥਾਪਿ ਮਲ੍ਲਮੁਟ੍ਠਿਕਾ ਗਾਮਮੋਦ੍ਦਵਾ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਨਹਾਯਮਾਨੇਨ ਭਿਕ੍ਖੁਨਾ ਥਮ੍ਭੇ ਕਾਯੋ ਉਗ੍ਘਂਸੇਤਬ੍ਬੋ. ਯੋ ਉਗ੍ਘਂਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਨਹਾਯਮਾਨਾ ਕੁਟ੍ਟੇ [ਕੁਡ੍ਡੇ (ਸੀ. ਸ੍ਯਾ.)] ਕਾਯਂ ਉਗ੍ਘਂਸੇਨ੍ਤਿ, ਊਰੁਮ੍ਪਿ ਬਾਹੁਮ੍ਪਿ ਉਰਮ੍ਪਿ ਪਿਟ੍ਠਿਮ੍ਪਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨਹਾਯਮਾਨਾ ਕੁਟ੍ਟੇ ਕਾਯਂ ਉਗ੍ਘਂਸੇਸ੍ਸਨ੍ਤਿ, ਊਰੁਮ੍ਪਿ ਬਾਹੁਮ੍ਪਿ ਉਰਮ੍ਪਿ ਪਿਟ੍ਠਿਮ੍ਪਿ, ਸੇਯ੍ਯਥਾਪਿ ਮਲ੍ਲਮੁਟ੍ਠਿਕਾ ਗਾਮਮੋਦ੍ਦਵਾ’’ਤਿ…ਪੇ… ‘‘ਨ, ਭਿਕ੍ਖਵੇ, ਨਹਾਯਮਾਨੇਨ ਭਿਕ੍ਖੁਨਾ ਕੁਟ੍ਟੇ ਕਾਯੋ ਉਗ੍ਘਂਸੇਤਬ੍ਬੋ. ਯੋ ਉਗ੍ਘਂਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਅਟ੍ਟਾਨੇ [ਅਟ੍ਠਾਨੇ (ਸੀ. ਸ੍ਯਾ.)] ਨਹਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਅਟ੍ਟਾਨੇ ਨਹਾਯਿਤਬ੍ਬਂ. ਯੋ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਗਨ੍ਧਬ੍ਬਹਤ੍ਥਕੇਨ ਨਹਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਨ, ਭਿਕ੍ਖਵੇ, ਗਨ੍ਧਬ੍ਬਹਤ੍ਥਕੇਨ ਨਹਾਯਿਤਬ੍ਬਂ. ਯੋ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਕੁਰੁਵਿਨ੍ਦਕਸੁਤ੍ਤਿਯਾ ਨਹਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਕੁਰੁਵਿਨ੍ਦਕਸੁਤ੍ਤਿਯਾ ਨਹਾਯਿਤਬ੍ਬਂ. ਯੋ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਵਿਗ੍ਗਯ੍ਹ ਪਰਿਕਮ੍ਮਂ ਕਾਰਾਪੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਵਿਗ੍ਗਯ੍ਹ ਪਰਿਕਮ੍ਮਂ ਕਾਰਾਪੇਤਬ੍ਬਂ. ਯੋ ਕਾਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਮਲ੍ਲਕੇਨ ਨਹਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਮਲ੍ਲਕੇਨ ਨਹਾਯਿਤਬ੍ਬਂ. ਯੋ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੨੪੪. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਕਚ੍ਛੁਰੋਗਾਬਾਧੋ ਹੋਤਿ. ਨ ਤਸ੍ਸ ਵਿਨਾ ਮਲ੍ਲਕੇਨ ਫਾਸੁ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਅਕਤਮਲ੍ਲਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਜਰਾਦੁਬ੍ਬਲੋ ਨਹਾਯਮਾਨੋ ਨ ਸਕ੍ਕੋਤਿ ਅਤ੍ਤਨੋ ਕਾਯਂ ਉਗ੍ਘਂਸੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਕ੍ਕਾਸਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਿਟ੍ਠਿਪਰਿਕਮ੍ਮਂ ਕਾਤੁਂ ਕੁਕ੍ਕੁਚ੍ਚਾਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪੁਥੁਪਾਣਿਕ’’ਨ੍ਤਿ.
੨੪੫. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਵਲ੍ਲਿਕਂ ਧਾਰੇਨ੍ਤਿ…ਪੇ… ਪਾਮਙ੍ਗਂ ਧਾਰੇਨ੍ਤਿ…ਪੇ… ਕਣ੍ਠਸੁਤ੍ਤਕਂ ਧਾਰੇਨ੍ਤਿ…ਪੇ… ਕਟਿਸੁਤ੍ਤਕਂ ਧਾਰੇਨ੍ਤਿ…ਪੇ… ਓਵਟ੍ਟਿਕਂ ਧਾਰੇਨ੍ਤਿ…ਪੇ… ਕਾਯੁਰਂ ਧਾਰੇਨ੍ਤਿ…ਪੇ… ਹਤ੍ਥਾਭਰਣਂ ਧਾਰੇਨ੍ਤਿ…ਪੇ… ਅਙ੍ਗੁਲਿਮੁਦ੍ਦਿਕਂ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ…ਪੇ… ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਸਚ੍ਚਂ ਕਿਰ, ਭਿਕ੍ਖਵੇ, ਛਬ੍ਬਗ੍ਗਿਯਾ ਭਿਕ੍ਖੂ ਵਲ੍ਲਿਕਂ ਧਾਰੇਨ੍ਤਿ…ਪੇ… ਪਾਮਙ੍ਗਂ ਧਾਰੇਨ੍ਤਿ, ਕਣ੍ਠਸੁਤ੍ਤਕਂ ਧਾਰੇਨ੍ਤਿ, ਕਟਿਸੁਤ੍ਤਕਂ ਧਾਰੇਨ੍ਤਿ, ਓਵਟ੍ਟਿਕਂ ਧਾਰੇਨ੍ਤਿ, ਕਾਯੁਰਂ ਧਾਰੇਨ੍ਤਿ, ਹਤ੍ਥਾਭਰਣਂ ਧਾਰੇਨ੍ਤਿ, ਅਙ੍ਗੁਲਿਮੁਦ੍ਦਿਕਂ ਧਾਰੇਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਵਲ੍ਲਿਕਾ ਧਾਰੇਤਬ੍ਬਾ…ਪੇ… ਨ ਪਾਮਙ੍ਗੋ ਧਾਰੇਤਬ੍ਬੋ… ਨ ਕਣ੍ਠਸੁਤ੍ਤਕਂ ਧਾਰੇਤਬ੍ਬਂ… ਨ ਕਟਿਸੁਤ੍ਤਕਂ ਧਾਰੇਤਬ੍ਬਂ… ਨ ਓਵਟ੍ਟਿਕਂ ਧਾਰੇਤਬ੍ਬਂ… ਨ ਕਾਯੁਰਂ ਧਾਰੇਤਬ੍ਬਂ… ਨ ਹਤ੍ਥਾਭਰਣਂ ਧਾਰੇਤਬ੍ਬਂ… ਨ ਅਙ੍ਗੁਲਿਮੁਦ੍ਦਿਕਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੨੪੬. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਦੀਘੇ ਕੇਸੇ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਦੀਘਾ ਕੇਸਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਦੁਮਾਸਿਕਂ ਵਾ ਦੁਵਙ੍ਗੁਲਂ ਵਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਕੋਚ੍ਛੇਨ ਕੇਸੇ ਓਸਣ੍ਠੇਨ੍ਤਿ [ਓਸਣ੍ਹੇਨ੍ਤਿ (ਸੀ. ਸ੍ਯਾ.)] …ਪੇ… ਫਣਕੇਨ ਕੇਸੇ ਓਸਣ੍ਠੇਨ੍ਤਿ, ਹਤ੍ਥਫਣਕੇਨ ਕੇਸੇ ਓਸਣ੍ਠੇਨ੍ਤਿ, ਸਿਤ੍ਥਤੇਲਕੇਨ ਕੇਸੇ ਓਸਣ੍ਠੇਨ੍ਤਿ, ਉਦਕਤੇਲਕੇਨ ਕੇਸੇ ਓਸਣ੍ਠੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਕੋਚ੍ਛੇਨ ਕੇਸਾ ਓਸਣ੍ਠੇਤਬ੍ਬਾ…ਪੇ… ਨ ਸਿਤ੍ਥਤੇਲਕੇਨ ਕੇਸਾ ਓਸਣ੍ਠੇਤਬ੍ਬਾ… ਨ ਉਦਕਤੇਲਕੇਨ ਕੇਸਾ ਓਸਣ੍ਠੇਤਬ੍ਬਾ. ਯੋ ਓਸਣ੍ਠੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੨੪੭. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਆਦਾਸੇਪਿ ਉਦਕਪਤ੍ਤੇਪਿ ਮੁਖਨਿਮਿਤ੍ਤਂ ਓਲੋਕੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਆਦਾਸੇ ਵਾ ਉਦਕਪਤ੍ਤੇ ਵਾ ਮੁਖਨਿਮਿਤ੍ਤਂ ਓਲੋਕੇਤਬ੍ਬਂ. ਯੋ ਓਲੋਕੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਮੁਖੇ ਵਣੋ ਹੋਤਿ. ਸੋ ਭਿਕ੍ਖੂ ਪੁਚ੍ਛਿ – ‘‘ਕੀਦਿਸੋ ਮੇ, ਆਵੁਸੋ, ਵਣੋ’’ਤਿ? ਭਿਕ੍ਖੂ ਏਵਮਾਹਂਸੁ – ‘‘ਏਦਿਸੋ ਤੇ, ਆਵੁਸੋ ਵਣੋ’’ਤਿ. ਸੋ ਨ ਸਦ੍ਦਹਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਬਾਧਪ੍ਪਚ੍ਚਯਾ ਆਦਾਸੇ ਵਾ ਉਦਕਪਤ੍ਤੇ ਵਾ ਮੁਖਨਿਮਿਤ੍ਤਂ ਓਲੋਕੇਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਮੁਖਂ ਆਲਿਮ੍ਪਨ੍ਤਿ…ਪੇ… ਮੁਖਂ ਉਮ੍ਮਦ੍ਦੇਨ੍ਤਿ, ਮੁਖਂ ਚੁਣ੍ਣੇਨ੍ਤਿ, ਮਨੋਸਿਲਿਕਾਯ ਮੁਖਂ ਲਞ੍ਛੇਨ੍ਤਿ, ਅਙ੍ਗਰਾਗਂ ਕਰੋਨ੍ਤਿ, ਮੁਖਰਾਗਂ ਕਰੋਨ੍ਤਿ, ਅਙ੍ਗਰਾਗਮੁਖਰਾਗਂ ਕਰੋਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਮੁਖਂ ਆਲਿਮ੍ਪਿਤਬ੍ਬਂ…ਪੇ… ਨ ਮੁਖਂ ਉਮ੍ਮਦ੍ਦਿਤਬ੍ਬਂ, ਨ ਮੁਖਂ ਚੁਣ੍ਣੇਤਬ੍ਬਂ, ਨ ਮਨੋਸਿਲਿਕਾਯ ਮੁਖਂ ਲਞ੍ਛੇਤਬ੍ਬਂ, ਨ ਅਙ੍ਗਰਾਗੋ ਕਾਤਬ੍ਬੋ, ਨ ਮੁਖਰਾਗੋ ਕਾਤਬ੍ਬੋ, ਨ ਅਙ੍ਗਰਾਗਮੁਖਰਾਗੋ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਚਕ੍ਖੁਰੋਗਾਬਾਧੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਬਾਧਪ੍ਪਚ੍ਚਯਾ ਮੁਖਂ ਆਲਿਮ੍ਪਿਤੁ’’ਨ੍ਤਿ.
੨੪੮. ਤੇਨ ਖੋ ਪਨ ਸਮਯੇਨ ਰਾਜਗਹੇ ਗਿਰਗ੍ਗਸਮਜ੍ਜੋ [ਸਮਜ੍ਜਾ (ਅਭਿਧਾਨਗਨ੍ਥੇਸੁ)] ਹੋਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਗਿਰਗ੍ਗਸਮਜ੍ਜਂ ਦਸ੍ਸਨਾਯ ਅਗਮਂਸੁ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨਚ੍ਚਮ੍ਪਿ ਗੀਤਮ੍ਪਿ ਵਾਦਿਤਮ੍ਪਿ ਦਸ੍ਸਨਾਯ ਗਚ੍ਛਿਸ੍ਸਨ੍ਤਿ, ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋ’’ਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਨਚ੍ਚਂ ਵਾ ਗੀਤਂ ਵਾ ਵਾਦਿਤਂ ਵਾ ਦਸ੍ਸਨਾਯ ਗਨ੍ਤਬ੍ਬਂ. ਯੋ ਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੨੪੯. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਆਯਤਕੇਨ ਗੀਤਸ੍ਸਰੇਨ ਧਮ੍ਮਂ ਗਾਯਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਯਥੇਵ [ਯਥਾ ਚ (ਕ.)] ਮਯਂ ਗਾਯਾਮ, ਏਵਮੇਵਿਮੇ ਸਮਣਾ ਸਕ੍ਯਪੁਤ੍ਤਿਯਾ ਆਯਤਕੇਨ ਗੀਤਸ੍ਸਰੇਨ ਧਮ੍ਮਂ ਗਾਯਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਆਯਤਕੇਨ ਗੀਤਸ੍ਸਰੇਨ ਧਮ੍ਮਂ ਗਾਯਿਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ‘‘ਸਚ੍ਚਂ ਭਗਵਾ’’ਤਿ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਆਯਤਕੇਨ ਗੀਤਸ੍ਸਰੇਨ ਧਮ੍ਮਂ ਗਾਯਨ੍ਤਸ੍ਸ. ਅਤ੍ਤਨਾਪਿ ਤਸ੍ਮਿਂ ਸਰੇ ਸਾਰਜ੍ਜਤਿ, ਪਰੇਪਿ ਤਸ੍ਮਿਂ ਸਰੇ ਸਾਰਜ੍ਜਨ੍ਤਿ, ਗਹਪਤਿਕਾਪਿ ਉਜ੍ਝਾਯਨ੍ਤਿ, ਸਰਕੁਤ੍ਤਿਮ੍ਪਿ ਨਿਕਾਮਯਮਾਨਸ੍ਸ ਸਮਾਧਿਸ੍ਸ ਭਙ੍ਗੋ ਹੋਤਿ, ਪਚ੍ਛਿਮਾ ਜਨਤਾ ਦਿਟ੍ਠਾਨੁਗਤਿਂ ਆਪਜ੍ਜਤਿ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਆਯਤਕੇਨ ਗੀਤਸ੍ਸਰੇਨ ਧਮ੍ਮਂ ਗਾਯਨ੍ਤਸ੍ਸ. ਨ, ਭਿਕ੍ਖਵੇ, ਆਯਤਕੇਨ ਗੀਤਸ੍ਸਰੇਨ ਧਮ੍ਮੋ ਗਾਯਿਤਬ੍ਬੋ. ਯੋ ਗਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਰਭਞ੍ਞੇ ਕੁਕ੍ਕੁਚ੍ਚਾਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਰਭਞ੍ਞ’’ਨ੍ਤਿ.
‘‘ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਬਾਹਿਰਲੋਮਿਂ [ਬਾਹਿਯਲੋਮਿਂ (ਕ.)] ਉਣ੍ਣਿਂ ਧਾਰੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਬਾਹਿਯਲੋਮਿ ਉਣ੍ਣਿ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੨੫੦. ਤੇਨ ਖੋ ਪਨ ਸਮਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਆਰਾਮੇ ਅਮ੍ਬਾ ਫਲਿਨੋ ਹੋਨ੍ਤਿ. ਰਞ੍ਞਾ ਮਾਗਧੇਨ ਸੇਨਿਯੇਨ ਬਿਮ੍ਬਿਸਾਰੇਨ ਅਨੁਞ੍ਞਾਤਂ ਹੋਤਿ – ‘‘ਯਥਾਸੁਖਂ ਅਯ੍ਯਾ ਅਮ੍ਬਂ ਪਰਿਭੁਞ੍ਜਨ੍ਤੂ’’ਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਤਰੁਣਞ੍ਞੇਵ ਅਮ੍ਬਂ ਪਾਤਾਪੇਤ੍ਵਾ ਪਰਿਭੁਞ੍ਜਿਂਸੁ. ਰਞ੍ਞੋ ਚ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਅਮ੍ਬੇਨ ਅਤ੍ਥੋ ਹੋਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਮਨੁਸ੍ਸੇ ਆਣਾਪੇਸਿ – ‘‘ਗਚ੍ਛਥ, ਭਣੇ, ਆਰਾਮਂ ਗਨ੍ਤ੍ਵਾ ਅਮ੍ਬਂ ਆਹਰਥਾ’’ਤਿ. ‘‘ਏਵਂ ਦੇਵਾ’’ਤਿ ਖੋ ਤੇ ਮਨੁਸ੍ਸਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਤ੍ਵਾ ਆਰਾਮਂ ਗਨ੍ਤ੍ਵਾ ਆਰਾਮਪਾਲਂ ਏਤਦਵੋਚੁਂ – ‘‘ਦੇਵਸ੍ਸ, ਭਣੇ, ਅਮ੍ਬੇਨ ਅਤ੍ਥੋ, ਅਮ੍ਬਂ ਦੇਥਾ’’ਤਿ. ‘‘ਨਤ੍ਥਾਯ੍ਯਾ ਅਮ੍ਬਂ. ਤਰੁਣਞ੍ਞੇਵ ਅਮ੍ਬਂ ਪਾਤਾਪੇਤ੍ਵਾ ਭਿਕ੍ਖੂ ਪਰਿਭੁਞ੍ਜਿਂਸੂ’’ਤਿ. ਅਥ ਖੋ ਤੇ ਮਨੁਸ੍ਸਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਮਤ੍ਥਂ ਆਰੋਚੇਸੁਂ. ‘‘ਸੁਪਰਿਭੁਤ੍ਤਂ, ਭਣੇ, ਅਯ੍ਯੇਹਿ ਅਮ੍ਬਂ, ਅਪਿ ਚ ਭਗਵਤਾ ਮਤ੍ਤਾ ਵਣ੍ਣਿਤਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨ ਮਤ੍ਤਂ ਜਾਨਿਤ੍ਵਾ ਰਞ੍ਞੋ ਅਮ੍ਬਂ ਪਰਿਭੁਞ੍ਜਿਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਅਮ੍ਬਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਪੂਗਸ੍ਸ ਸਙ੍ਘਭਤ੍ਤਂ ਹੋਤਿ. ਸੂਪੇ ਅਮ੍ਬਪੇਸਿਕਾਯੋ ਪਕ੍ਖਿਤ੍ਤਾ ਹੋਨ੍ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਪ੍ਪਟਿਗ੍ਗਣ੍ਹਨ੍ਤਿ. ‘‘ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥ. ਅਨੁਜਾਨਾਮਿ, ਭਿਕ੍ਖਵੇ, ਅਮ੍ਬਪੇਸਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਪੂਗਸ੍ਸ ਸਙ੍ਘਭਤ੍ਤਂ ਹੋਤਿ. ਤੇ ਨ ਪਰਿਯਾਪੁਣਿਂਸੁ ਅਮ੍ਬਪੇਸਿਕਂ ਕਾਤੁਂ, ਭਤ੍ਤਗ੍ਗੇ ਸਕਲੇਹੇਵ ਅਮ੍ਬੇਹਿ ਦੇਨ੍ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਪ੍ਪਟਿਗ੍ਗਣ੍ਹਨ੍ਤਿ. ‘‘ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥ. ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤੁਂ – ਅਗ੍ਗਿਪਰਿਚਿਤਂ, ਸਤ੍ਥਪਰਿਚਿਤਂ, ਨਖਪਰਿਚਿਤਂ, ਅਬੀਜਂ, ਨਿਬ੍ਬਤ੍ਤਬੀਜਞ੍ਞੇਵ [ਨਿਬ੍ਬਟ੍ਟਬੀਜਂ (ਸੀ. ਸ੍ਯਾ.)] ਪਞ੍ਚਮਂ. ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤੁ’’ਨ੍ਤਿ.
੨੫੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਹਿਨਾ ਦਟ੍ਠੋ ਕਾਲਙ੍ਕਤੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ ਹਿ ਨੂਨ ਸੋ, ਭਿਕ੍ਖਵੇ, ਭਿਕ੍ਖੁ ਇਮਾਨਿ ਚਤ੍ਤਾਰਿ ਅਹਿਰਾਜਕੁਲਾਨਿ ਮੇਤ੍ਤੇਨ ਚਿਤ੍ਤੇਨ ਫਰਿ. ਸਚੇ ਹਿ ਸੋ, ਭਿਕ੍ਖਵੇ, ਭਿਕ੍ਖੁ ਇਮਾਨਿ ਚਤ੍ਤਾਰਿ ਅਹਿਰਾਜਕੁਲਾਨਿ ਮੇਤ੍ਤੇਨ ਚਿਤ੍ਤੇਨ ਫਰੇਯ੍ਯ, ਨ ਹਿ ਸੋ, ਭਿਕ੍ਖਵੇ, ਭਿਕ੍ਖੁ ਅਹਿਨਾ ਦਟ੍ਠੋ ਕਾਲਙ੍ਕਰੇਯ੍ਯ. ਕਤਮਾਨਿ ਚਤ੍ਤਾਰਿ ਅਹਿਰਾਜਕੁਲਾਨਿ? ਵਿਰੂਪਕ੍ਖਂ ਅਹਿਰਾਜਕੁਲਂ, ਏਰਾਪਥਂ ਅਹਿਰਾਜਕੁਲਂ, ਛਬ੍ਯਾਪੁਤ੍ਤਂ ਅਹਿਰਾਜਕੁਲਂ, ਕਣ੍ਹਾਗੋਤਮਂ ਅਹਿਰਾਜਕੁਲਂ. ਨ ਹਿ ਨੂਨ ਸੋ, ਭਿਕ੍ਖਵੇ, ਭਿਕ੍ਖੁ ਇਮਾਨਿ ਚਤ੍ਤਾਰਿ ਅਹਿਰਾਜਕੁਲਾਨਿ ਮੇਤ੍ਤੇਨ ਚਿਤ੍ਤੇਨ ਫਰਿ. ਸਚੇ ਹਿ ਸੋ, ਭਿਕ੍ਖਵੇ, ਭਿਕ੍ਖੁ ਇਮਾਨਿ ਚਤ੍ਤਾਰਿ ਅਹਿਰਾਜਕੁਲਾਨਿ ਮੇਤ੍ਤੇਨ ਚਿਤ੍ਤੇਨ ਫਰੇਯ੍ਯ, ਨ ਹਿ ਸੋ, ਭਿਕ੍ਖਵੇ, ਭਿਕ੍ਖੁ ਅਹਿਨਾ ਦਟ੍ਠੋ ਕਾਲਙ੍ਕਰੇਯ੍ਯ. ਅਨੁਜਾਨਾਮਿ, ਭਿਕ੍ਖਵੇ, ਇਮਾਨਿ ਚਤ੍ਤਾਰਿ ਅਹਿਰਾਜਕੁਲਾਨਿ ਮੇਤ੍ਤੇਨ ਚਿਤ੍ਤੇਨ ਫਰਿਤੁਂ, ਅਤ੍ਤਗੁਤ੍ਤਿਯਾ ਅਤ੍ਤਰਕ੍ਖਾਯ ਅਤ੍ਤਪਰਿਤ੍ਤਂ ਕਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬਂ –
[ਜਾ. ੧.੨.੧੦੫-੧੦੬; ਅ. ਨਿ. ੪.੬੭ ਇਦਂ ਵਤ੍ਥੁ ਆਗਤਂ] ‘‘ਵਿਰੂਪਕ੍ਖੇਹਿ ਮੇ ਮੇਤ੍ਤਂ, ਮੇਤ੍ਤਂ ਏਰਾਪਥੇਹਿ ਮੇ;
ਛਬ੍ਯਾਪੁਤ੍ਤੇਹਿ ਮੇ ਮੇਤ੍ਤਂ, ਮੇਤ੍ਤਂ ਕਣ੍ਹਾਗੋਤਮਕੇਹਿ ਚ.
‘‘ਅਪਾਦਕੇਹਿ ਮੇ ਮੇਤ੍ਤਂ, ਮੇਤ੍ਤਂ ਦ੍ਵਿਪਾਦਕੇਹਿ ਮੇ;
ਚਤੁਪ੍ਪਦੇਹਿ ਮੇ ਮੇਤ੍ਤਂ, ਮੇਤ੍ਤਂ ਬਹੁਪ੍ਪਦੇਹਿ ਮੇ.
‘‘ਮਾ ਮਂ ਅਪਾਦਕੋ ਹਿਂਸਿ, ਮਾ ਮਂ ਹਿਂਸਿ ਦ੍ਵਿਪਾਦਕੋ;
ਮਾ ਮਂ ਚਤੁਪ੍ਪਦੋ ਹਿਂਸਿ, ਮਾ ਮਂ ਹਿਂਸਿ ਬਹੁਪ੍ਪਦੋ.
‘‘ਸਬ੍ਬੇ ਸਤ੍ਤਾ ਸਬ੍ਬੇ ਪਾਣਾ, ਸਬ੍ਬੇ ਭੂਤਾ ਚ ਕੇਵਲਾ;
ਸਬ੍ਬੇ ਭਦ੍ਰਾਨਿ ਪਸ੍ਸਨ੍ਤੁ, ਮਾ ਕਿਞ੍ਚਿ ਪਾਪਮਾਗਮਾ.
‘‘ਅਪ੍ਪਮਾਣੋ ਬੁਦ੍ਧੋ, ਅਪ੍ਪਮਾਣੋ ਧਮ੍ਮੋ,
ਅਪ੍ਪਮਾਣੋ ਸਙ੍ਘੋ, ਪਮਾਣਵਨ੍ਤਾਨਿ ਸਰੀਸਪਾਨਿ [ਸਿਰਿਂਸਪਾਨਿ (ਸੀ. ਸ੍ਯਾ.)].
‘‘ਅਹਿ ਵਿਚ੍ਛਿਕਾ ਸਤਪਦੀ, ਉਣ੍ਣਨਾਭਿ ਸਰਬੂ ਮੂਸਿਕਾ;
ਕਤਾ ਮੇ ਰਕ੍ਖਾ ਕਤਂ ਮੇ ਪਰਿਤ੍ਤਂ, ਪਟਿਕ੍ਕਮਨ੍ਤੁ ਭੂਤਾਨਿ.
‘‘ਸੋਹਂ ਨਮੋ ਭਗਵਤੋ, ਨਮੋ ਸਤ੍ਤਨ੍ਨਂ ਸਮ੍ਮਾਸਮ੍ਬੁਦ੍ਧਾਨ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਨਭਿਰਤਿਯਾ ਪੀਲ਼ਿਤੋ ਅਤ੍ਤਨੋ ਅਙ੍ਗਜਾਤਂ ਛਿਨ੍ਦਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਞ੍ਞਮ੍ਹਿ ਸੋ, ਭਿਕ੍ਖਵੇ, ਮੋਘਪੁਰਿਸੋ ਛੇਤਬ੍ਬਮ੍ਹਿ, ਅਞ੍ਞਂ ਛਿਨ੍ਦਿ. ਨ, ਭਿਕ੍ਖਵੇ, ਅਤ੍ਤਨੋ ਅਙ੍ਗਜਾਤਂ ਛੇਤਬ੍ਬਂ. ਯੋ ਛਿਨ੍ਦੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.
੨੫੨. ਤੇਨ ਖੋ ਪਨ ਸਮਯੇਨ ਰਾਜਗਹਕਸ੍ਸ ਸੇਟ੍ਠਿਸ੍ਸ ਮਹਗ੍ਘਸ੍ਸ ਚਨ੍ਦਨਸ੍ਸ [ਚਨ੍ਦਨਸਾਰਸ੍ਸ (ਸੀ. ਸ੍ਯਾ.)] ਚਨ੍ਦਨਗਣ੍ਠਿ ਉਪ੍ਪਨ੍ਨਾ ਹੋਤਿ. ਅਥ ਖੋ ਰਾਜਗਹਕਸ੍ਸ ਸੇਟ੍ਠਿਸ੍ਸ ਏਤਦਹੋਸਿ – ‘‘ਯਂਨੂਨਾਹਂ ਇਮਾਯ ਚਨ੍ਦਨਗਣ੍ਠਿਯਾ ਪਤ੍ਤਂ ਲੇਖਾਪੇਯ੍ਯਂ. ਲੇਖਞ੍ਚ ਮੇ ਪਰਿਭੋਗਂ ਭਵਿਸ੍ਸਤਿ, ਪਤ੍ਤਞ੍ਚ ਦਾਨਂ ਦਸ੍ਸਾਮੀ’’ਤਿ. ਅਥ ਖੋ ਰਾਜਗਹਕੋ ਸੇਟ੍ਠਿ ਤਾਯ ਚਨ੍ਦਨਗਣ੍ਠਿਯਾ ਪਤ੍ਤਂ ਲੇਖਾਪੇਤ੍ਵਾ ਸਿਕ੍ਕਾਯ ਉਡ੍ਡਿਤ੍ਵਾ [ਵਾਹਿਤ੍ਵਾ (ਸੀ.)] ਵੇਲ਼ਗ੍ਗੇ ਆਲਗ੍ਗੇਤ੍ਵਾ ਵੇਲ਼ੁਪਰਮ੍ਪਰਾਯ ਬਨ੍ਧਿਤ੍ਵਾ [ਵਾਹਿਤ੍ਵਾ (ਸ੍ਯਾ.)] ਏਵਮਾਹ – ‘‘ਯੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਅਰਹਾ ਚੇਵ ਇਦ੍ਧਿਮਾ ਚ ਦਿਨ੍ਨਂਯੇਵ ਪਤ੍ਤਂ ਓਹਰਤੂ’’ਤਿ. ਅਥ ਖੋ ਪੂਰਣੋ ਕਸ੍ਸਪੋ ਯੇਨ ਰਾਜਗਹਕੋ ਸੇਟ੍ਠਿ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਗਹਕਂ ਸੇਟ੍ਠਿਂ ਏਤਦਵੋਚ – ‘‘ਅਹਞ੍ਹਿ, ਗਹਪਤਿ, ਅਰਹਾ ਚੇਵ ਇਦ੍ਧਿਮਾ ਚ, ਦੇਹਿ ਮੇ ਪਤ੍ਤ’’ਨ੍ਤਿ. ‘‘ਸਚੇ, ਭਨ੍ਤੇ, ਆਯਸ੍ਮਾ ਅਰਹਾ ਚੇਵ ਇਦ੍ਧਿਮਾ ਚ ਦਿਨ੍ਨਂਯੇਵ ਪਤ੍ਤਂ ਓਹਰਤੂ’’ਤਿ. ਅਥ ਖੋ ਮਕ੍ਖਲਿ ਗੋਸਾਲੋ… ਅਜਿਤੋ ਕੇਸਕਮ੍ਬਲੋ… ਪਕੁਧੋ ਕਚ੍ਚਾਯਨੋ… ਸਞ੍ਚਯੋ ਬੇਲਟ੍ਠਪੁਤ੍ਤੋ [ਸਞ੍ਜਯੋ ਬੇਲ੍ਲਟ੍ਠਿਪੁਤ੍ਤੋ (ਸੀ.)] … ਨਿਗਣ੍ਠੋ ਨਾਟਪੁਤ੍ਤੋ [ਨਾਥਪੁਤ੍ਤੋ (ਸੀ.)] ਯੇਨ ਰਾਜਗਹਕੋ ਸੇਟ੍ਠਿ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਰਾਜਗਹਕਂ ਸੇਟ੍ਠਿਂ ਏਤਦਵੋਚ – ‘‘ਅਹਞ੍ਹਿ, ਗਹਪਤਿ, ਅਰਹਾ ਚੇਵ ਇਦ੍ਧਿਮਾ ਚ, ਦੇਹਿ ਮੇ ਪਤ੍ਤ’’ਨ੍ਤਿ. ‘‘ਸਚੇ, ਭਨ੍ਤੇ, ਆਯਸ੍ਮਾ ਅਰਹਾ ਚੇਵ ਇਦ੍ਧਿਮਾ ਚ, ਦਿਨ੍ਨਂਯੇਵ ਪਤ੍ਤਂ ਓਹਰਤੂ’’ਤਿ.
ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨੋ ਆਯਸ੍ਮਾ ਚ ਪਿਣ੍ਡੋਲਭਾਰਦ੍ਵਾਜੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਿਣ੍ਡਾਯ ਪਵਿਸਿਂਸੁ. ਅਥ ਖੋ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਏਤਦਵੋਚ – ‘‘ਆਯਸ੍ਮਾ ਖੋ ਮਹਾਮੋਗ੍ਗਲ੍ਲਾਨੋ ਅਰਹਾ ਚੇਵ ਇਦ੍ਧਿਮਾ ਚ. ਗਚ੍ਛਾਵੁਸੋ, ਮੋਗ੍ਗਲ੍ਲਾਨ, ਏਤਂ ਪਤ੍ਤਂ ਓਹਰ. ਤੁਯ੍ਹੇਸੋ ਪਤ੍ਤੋ’’ਤਿ. ‘‘ਆਯਸ੍ਮਾ ਖੋ ਭਾਰਦ੍ਵਾਜੋ ਅਰਹਾ ਚੇਵ ਇਦ੍ਧਿਮਾ ਚ. ਗਚ੍ਛਾਵੁਸੋ, ਭਾਰਦ੍ਵਾਜ, ਏਤਂ ਪਤ੍ਤਂ ਓਹਰ. ਤੁਯ੍ਹੇਸੋ ਪਤ੍ਤੋ’’ਤਿ. ਅਥ ਖੋ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਤਂ ਪਤ੍ਤਂ ਗਹੇਤ੍ਵਾ ਤਿਕ੍ਖਤ੍ਤੁਂ ਰਾਜਗਹਂ ਅਨੁਪਰਿਯਾਯਿ.
ਤੇਨ ਖੋ ਪਨ ਸਮਯੇਨ ਰਾਜਗਹਕੋ ਸੇਟ੍ਠਿ ਸਪੁਤ੍ਤਦਾਰੋ ਸਕੇ ਨਿਵੇਸਨੇ ਠਿਤੋ ਹੋਤਿ ਪਞ੍ਜਲਿਕੋ ਨਮਸ੍ਸਮਾਨੋ – ਇਧੇਵ, ਭਨ੍ਤੇ, ਅਯ੍ਯੋ ਭਾਰਦ੍ਵਾਜੋ ਅਮ੍ਹਾਕਂ ਨਿਵੇਸਨੇ ਪਤਿਟ੍ਠਾਤੂਤਿ. ਅਥ ਖੋ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋ ਰਾਜਗਹਕਸ੍ਸ ਸੇਟ੍ਠਿਸ੍ਸ ਨਿਵੇਸਨੇ ਪਤਿਟ੍ਠਾਸਿ. ਅਥ ਖੋ ਰਾਜਗਹਕੋ ਸੇਟ੍ਠਿ ਆਯਸ੍ਮਤੋ ਪਿਣ੍ਡੋਲਭਾਰਦ੍ਵਾਜਸ੍ਸ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਮਹਗ੍ਘਸ੍ਸ ਖਾਦਨੀਯਸ੍ਸ ਪੂਰੇਤ੍ਵਾ ਆਯਸ੍ਮਤੋ ਪਿਣ੍ਡੋਲਭਾਰਦ੍ਵਾਜਸ੍ਸ ਅਦਾਸਿ. ਅਥ ਖੋ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋ ਤਂ ਪਤ੍ਤਂ ਗਹੇਤ੍ਵਾ ਆਰਾਮਂ ਅਗਮਾਸਿ. ਅਸ੍ਸੋਸੁਂ ਖੋ ਮਨੁਸ੍ਸਾ – ਅਯ੍ਯੇਨ ਕਿਰ ਪਿਣ੍ਡੋਲਭਾਰਦ੍ਵਾਜੇਨ ਰਾਜਗਹਕਸ੍ਸ ਸੇਟ੍ਠਿਸ੍ਸ ਪਤ੍ਤੋ ਓਹਾਰਿਤੋਤਿ. ਤੇ ਚ ਮਨੁਸ੍ਸਾ ਉਚ੍ਚਾਸਦ੍ਦਾ ਮਹਾਸਦ੍ਦਾ ਆਯਸ੍ਮਨ੍ਤਂ ਪਿਣ੍ਡੋਲਭਾਰਦ੍ਵਾਜਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿਂਸੁ.
ਅਸ੍ਸੇਸਿ ਖੋ ਭਗਵਾ ਉਚ੍ਚਾਸਦ੍ਦਂ ਮਹਾਸਦ੍ਦਂ; ਸੁਤ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਕਿਂ ਨੁ ਖੋ ਸੋ, ਆਨਨ੍ਦ, ਉਚ੍ਚਾਸਦ੍ਦੋ ਮਹਾਸਦ੍ਦੋ’’ਤਿ? ‘‘ਆਯਸ੍ਮਤਾ, ਭਨ੍ਤੇ, ਪਿਣ੍ਡੋਲਭਾਰਦ੍ਵਾਜੇਨ ਰਾਜਗਹਕਸ੍ਸ ਸੇਟ੍ਠਿਸ੍ਸ ਪਤ੍ਤੋ ਓਹਾਰਿਤੋ. ਅਸ੍ਸੋਸੁਂ ਖੋ, ਭਨ੍ਤੇ, ਮਨੁਸ੍ਸਾ – ਅਯ੍ਯੇਨ ਕਿਰ ਪਿਣ੍ਡੋਲਭਾਰਦ੍ਵਾਜੇਨ ਰਾਜਗਹਕਸ੍ਸ ਸੇਟ੍ਠਿਸ੍ਸ ਪਤ੍ਤੋ ਓਹਾਰਿਤੋਤਿ. ਤੇ ਚ, ਭਨ੍ਤੇ, ਮਨੁਸ੍ਸਾ ਉਚ੍ਚਾਸਦ੍ਦਾ ਮਹਾਸਦ੍ਦਾ ਆਯਸ੍ਮਨ੍ਤਂ ਪਿਣ੍ਡੋਲਭਾਰਦ੍ਵਾਜਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਾ. ਸੋ ਏਸੋ, ਭਨ੍ਤੇ, ਭਗਵਾ ਉਚ੍ਚਾਸਦ੍ਦੋ ਮਹਾਸਦ੍ਦੋ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਯਸ੍ਮਨ੍ਤਂ ਪਿਣ੍ਡੋਲਭਾਰਦ੍ਵਾਜਂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤਯਾ, ਭਾਰਦ੍ਵਾਜ, ਰਾਜਗਹਕਸ੍ਸ ਸੇਟ੍ਠਿਸ੍ਸ ਪਤ੍ਤੋ ਓਹਾਰਿਤੋ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਾਰਦ੍ਵਾਜ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਭਾਰਦ੍ਵਾਜ, ਛਵਸ੍ਸ ਦਾਰੁਪਤ੍ਤਸ੍ਸ ਕਾਰਣਾ ਗਿਹੀਨਂ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸੇਸ੍ਸਸਿ! ਸੇਯ੍ਯਥਾਪਿ, ਭਾਰਦ੍ਵਾਜ, ਮਾਤੁਗਾਮੋ ਛਵਸ੍ਸ ਮਾਸਕਰੂਪਸ੍ਸ ਕਾਰਣਾ ਕੋਪਿਨਂ ਦਸ੍ਸੇਤਿ, ਏਵਮੇਵ ਖੋ ਤਯਾ, ਭਾਰਦ੍ਵਾਜ, ਛਵਸ੍ਸ ਦਾਰੁਪਤ੍ਤਸ੍ਸ ਕਾਰਣਾ ਗਿਹੀਨਂ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸਿਤਂ. ਨੇਤਂ, ਭਾਰਦ੍ਵਾਜ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਗਿਹੀਨਂ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸੇਤਬ੍ਬਂ. ਯੋ ਦਸ੍ਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਭਿਨ੍ਦਥੇਤਂ, ਭਿਕ੍ਖਵੇ, ਦਾਰੁਪਤ੍ਤਂ ਸਕਲਿਕਂ ਸਕਲਿਕਂ ਕਤ੍ਵਾ, ਭਿਕ੍ਖੂਨਂ ਅਞ੍ਜਨੁਪਪਿਸਨਂ ਦੇਥ. ਨ ਚ, ਭਿਕ੍ਖਵੇ, ਦਾਰੁਪਤ੍ਤੋ ਧਾਰੇਤਬ੍ਬੋ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਵਚੇ ਪਤ੍ਤੇ ਧਾਰੇਨ੍ਤਿ ਸੋਵਣ੍ਣਮਯਂ ਰੂਪਿਯਮਯਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਸੋਵਣ੍ਣਮਯੋ ਪਤ੍ਤੋ ਧਾਰੇਤਬ੍ਬੋ…ਪੇ… ਨ ਰੂਪਿਯਮਯੋ ਪਤ੍ਤੋ ਧਾਰੇਤਬ੍ਬੋ… ਨ ਮਣਿਮਯੋ ਪਤ੍ਤੋ ਧਾਰੇਤਬ੍ਬੋ… ਨ ਵੇਲ਼ੁਰਿਯਮਯੋ ਪਤ੍ਤੋ ਧਾਰੇਤਬ੍ਬੋ… ਨ ਫਲਿਕਮਯੋ ਪਤ੍ਤੋ ਧਾਰੇਤਬ੍ਬੋ… ਨ ਕਂਸਮਯੋ ਪਤ੍ਤੋ ਧਾਰੇਤਬ੍ਬੋ… ਨ ਕਾਚਮਯੋ ਪਤ੍ਤੋ ਧਾਰੇਤਬ੍ਬੋ… ਨ ਤਿਪੁਮਯੋ ਪਤ੍ਤੋ ਧਾਰੇਤਬ੍ਬੋ… ਨ ਸੀਸਮਯੋ ਪਤ੍ਤੋ ਧਾਰੇਤਬ੍ਬੋ… ਨ ਤਮ੍ਬਲੋਹਮਯੋ ਪਤ੍ਤੋ ਧਾਰੇਤਬ੍ਬੋ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਪਤ੍ਤੇ – ਅਯੋਪਤ੍ਤਂ, ਮਤ੍ਤਿਕਾਪਤ੍ਤ’’ਨ੍ਤਿ.
੨੫੩. ਤੇਨ ਖੋ ਪਨ ਸਮਯੇਨ ਪਤ੍ਤਮੂਲਂ ਘਂਸਿਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਤ੍ਤਮਣ੍ਡਲ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਵਚਾਨਿ ਪਤ੍ਤਮਣ੍ਡਲਾਨਿ ਧਾਰੇਨ੍ਤਿ ਸੋਵਣ੍ਣਮਯਂ ਰੂਪਿਯਮਯਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਉਚ੍ਚਾਵਚਾਨਿ ਪਤ੍ਤਮਣ੍ਡਲਾਨਿ ਧਾਰੇਤਬ੍ਬਾਨਿ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਪਤ੍ਤਮਣ੍ਡਲਾਨਿ – ਤਿਪੁਮਯਂ, ਸੀਸਮਯ’’ਨ੍ਤਿ. ਬਹਲਾਨਿ ਮਣ੍ਡਲਾਨਿ ਨ ਅਚ੍ਛੁਪਿਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਲਿਖਿਤੁ’’ਨ੍ਤਿ. ਵਲੀ [ਚਲੀ (ਕ.)] ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਕਰਦਨ੍ਤਕਂ ਛਿਨ੍ਦਿਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਚਿਤ੍ਰਾਨਿ ਪਤ੍ਤਮਣ੍ਡਲਾਨਿ ਧਾਰੇਨ੍ਤਿ ਰੂਪਕਾਕਿਣ੍ਣਾਨਿ ਭਿਤ੍ਤਿਕਮ੍ਮਕਤਾਨਿ. ਤਾਨਿ ਰਥਿਕਾਯਪਿ ਦਸ੍ਸੇਨ੍ਤਾ ਆਹਿਣ੍ਡਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਚਿਤ੍ਰਾਨਿ ਪਤ੍ਤਮਣ੍ਡਲਾਨਿ ਧਾਰੇਤਬ੍ਬਾਨਿ ਰੂਪਕਾਕਿਣ੍ਣਾਨਿ ਭਿਤ੍ਤਿਕਮ੍ਮਕਤਾਨਿ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਕਤਿਮਣ੍ਡਲ’’ਨ੍ਤਿ.
੨੫੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸੋਦਕਂ ਪਤ੍ਤਂ ਪਟਿਸਾਮੇਨ੍ਤਿ. ਪਤ੍ਤੋ ਦੁਸ੍ਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਸੋਦਕੋ ਪਤ੍ਤੋ ਪਟਿਸਾਮੇਤਬ੍ਬੋ. ਯੋ ਪਟਿਸਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਓਤਾਪੇਤ੍ਵਾ ਪਤ੍ਤਂ ਪਟਿਸਾਮੇਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸੋਦਕਂ [ਸਉਦਕਂ (ਕ.)] ਪਤ੍ਤਂ ਓਤਾਪੇਨ੍ਤਿ. ਪਤ੍ਤੋ ਦੁਗ੍ਗਨ੍ਧੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਸੋਦਕੋ ਪਤ੍ਤੋ ਓਤਾਪੇਤਬ੍ਬੋ. ਯੋ ਓਤਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਵੋਦਕਂ ਕਤ੍ਵਾ ਓਤਾਪੇਤ੍ਵਾ ਪਤ੍ਤਂ ਪਟਿਸਾਮੇਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਉਣ੍ਹੇ ਪਤ੍ਤਂ ਨਿਦਹਨ੍ਤਿ. ਪਤ੍ਤਸ੍ਸ ਵਣ੍ਣੋ ਦੁਸ੍ਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਯੋ ਨਿਦਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਮੁਹੁਤ੍ਤਂ ਉਣ੍ਹੇ ਓਤਾਪੇਤ੍ਵਾ ਪਤ੍ਤਂ ਪਟਿਸਾਮੇਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਪਤ੍ਤਾ ਅਜ੍ਝੋਕਾਸੇ ਅਨਾਧਾਰਾ ਨਿਕ੍ਖਿਤ੍ਤਾ ਹੋਨ੍ਤਿ. ਵਾਤਮਣ੍ਡਲਿਕਾਯ ਆਵਟ੍ਟੇਤ੍ਵਾ ਪਤ੍ਤਾ ਭਿਜ੍ਜਿਂਸੁ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਤ੍ਤਾਧਾਰਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਮਿਡ੍ਢਨ੍ਤੇ ਪਤ੍ਤਂ ਨਿਕ੍ਖਿਪਨ੍ਤਿ. ਪਰਿਪਤਿਤ੍ਵਾ [ਪਰਿਵਟ੍ਟਿਤ੍ਵਾ (ਸ੍ਯਾ.)] ਪਤ੍ਤੋ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਮਿਡ੍ਢਨ੍ਤੇ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਰਿਭਣ੍ਡਨ੍ਤੇ ਪਤ੍ਤਂ ਨਿਕ੍ਖਿਪਨ੍ਤਿ. ਪਰਿਪਤਿਤ੍ਵਾ ਪਤ੍ਤੋ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਪਰਿਭਣ੍ਡਨ੍ਤੇ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਛਮਾਯ ਪਤ੍ਤਂ ਨਿਕ੍ਕੁਜ੍ਜਨ੍ਤਿ. ਓਟ੍ਠੋ ਘਂਸਿਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਣਸਨ੍ਥਾਰਕ’’ਨ੍ਤਿ. ਤਿਣਸਨ੍ਥਾਰਕੋ ਉਪਚਿਕਾਹਿ ਖਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਚੋਲ਼ਕ’’ਨ੍ਤਿ. ਚੋਲ਼ਕਂ ਉਪਚਿਕਾਹਿ ਖਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਤ੍ਤਮਾਲ਼ਕ’’ਨ੍ਤਿ. ਪਤ੍ਤਮਾਲ਼ਕੋ ਪਰਿਪਤਿਤ੍ਵਾ ਪਤ੍ਤੋ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਤ੍ਤਕੁਣ੍ਡੋਲਿਕ’’ਨ੍ਤਿ. ਪਤ੍ਤਕੁਣ੍ਡੋਲਿਕਾਯ ਪਤ੍ਤੋ ਘਂਸਿਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਤ੍ਤਥਵਿਕ’’ਨ੍ਤਿ. ਅਂਸਬਦ੍ਧਕੋ ਨ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਂਸਬਦ੍ਧਕਂ ਬਨ੍ਧਨਸੁਤ੍ਤਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਿਤ੍ਤਿਖਿਲੇਪਿ ਨਾਗਦਨ੍ਤਕੇਪਿ ਪਤ੍ਤਂ ਲਗ੍ਗੇਨ੍ਤਿ. ਪਰਿਪਤਿਤ੍ਵਾ ਪਤ੍ਤੋ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਪਤ੍ਤੋ ਲਗ੍ਗੇਤਬ੍ਬੋ. ਯੋ ਲਗ੍ਗੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਮਞ੍ਚੇ ਪਤ੍ਤਂ ਨਿਕ੍ਖਿਪਨ੍ਤਿ, ਸਤਿਸਮ੍ਮੋਸਾ ਨਿਸੀਦਨ੍ਤਾ ਓਤ੍ਥਰਿਤ੍ਵਾ ਪਤ੍ਤਂ ਭਿਨ੍ਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਮਞ੍ਚੇ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪੀਠੇ ਪਤ੍ਤਂ ਨਿਕ੍ਖਿਪਨ੍ਤਿ, ਸਤਿਸਮ੍ਮੋਸਾ ਨਿਸੀਦਨ੍ਤਾ ਓਤ੍ਥਰਿਤ੍ਵਾ ਪਤ੍ਤਂ ਭਿਨ੍ਦੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਪੀਠੇ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਙ੍ਕੇ ਪਤ੍ਤਂ ਨਿਕ੍ਖਿਪਨ੍ਤਿ, ਸਤਿਸਮ੍ਮੋਸਾ ਉਟ੍ਠਹਨ੍ਤਿ. ਪਰਿਪਤਿਤ੍ਵਾ ਪਤ੍ਤੋ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਅਙ੍ਕੇ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਛਤ੍ਤੇ ਪਤ੍ਤਂ ਨਿਕ੍ਖਿਪਨ੍ਤਿ. ਵਾਤਮਣ੍ਡਲਿਕਾਯ ਛਤ੍ਤਂ ਉਕ੍ਖਿਪਿਯਤਿ ਪਰਿਪਤਿਤ੍ਵਾ ਪਤ੍ਤੋ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਛਤ੍ਤੇ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੨੫੫. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਪਤ੍ਤਹਤ੍ਥਾ ਕਵਾਟਂ ਪਣਾਮੇਨ੍ਤਿ. ਕਵਾਟੋ ਆਵਟ੍ਟਿਤ੍ਵਾ ਪਤ੍ਤੋ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਪਤ੍ਤਹਤ੍ਥੇਨ ਕਵਾਟਂ ਪਣਾਮੇਤਬ੍ਬਂ [ਕਵਾਟੋ ਪਣਾਮੇਤਬ੍ਬੋ (ਕ.)]. ਯੋ ਪਣਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਤੁਮ੍ਬਕਟਾਹੇ ਪਿਣ੍ਡਾਯ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਤਿਤ੍ਥਿਯਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਤੁਮ੍ਬਕਟਾਹੇ ਪਿਣ੍ਡਾਯ ਚਰਿਤਬ੍ਬਂ. ਯੋ ਚਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਘਟਿਕਟਾਹੇ [ਘਟਿਕਟਾਹੇਨ (ਸ੍ਯਾ.)] ਪਿਣ੍ਡਾਯ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਤਿਤ੍ਥਿਯਾਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਘਟਿਕਟਾਹੇ ਪਿਣ੍ਡਾਯ ਚਰਿਤਬ੍ਬਂ. ਯੋ ਚਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਬ੍ਬਪਂਸੁਕੂਲਿਕੋ ਹੋਤਿ. ਸੋ ਛਵਸੀਸਸ੍ਸ ਪਤ੍ਤਂ ਧਾਰੇਤਿ. ਅਞ੍ਞਤਰਾ ਇਤ੍ਥੀ ਪਸ੍ਸਿਤ੍ਵਾ ਭੀਤਾ ਵਿਸ੍ਸਰਮਕਾਸਿ – ‘‘ਅਭੁਂ ਮੇ ਪਿਸਾਚੋ ਵਤਾਯ’’ਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਛਵਸੀਸਸ੍ਸ ਪਤ੍ਤਂ ਧਾਰੇਸ੍ਸਨ੍ਤਿ, ਸੇਯ੍ਯਥਾਪਿ ਪਿਸਾਚਿਲ੍ਲਿਕਾ’’ਤਿ! ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਛਵਸੀਸਸ੍ਸ ਪਤ੍ਤੋ ਧਾਰੇਤਬ੍ਬੋ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਸਬ੍ਬਪਂਸੁਕੂਲਿਕੇਨ ਭਵਿਤਬ੍ਬਂ. ਯੋ ਭਵੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਚਲਕਾਨਿਪਿ ਅਟ੍ਠਿਕਾਨਿਪਿ ਉਚ੍ਛਿਟ੍ਠੋਦਕਮ੍ਪਿ ਪਤ੍ਤੇਨ ਨੀਹਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਯਸ੍ਮਿਂ ਯੇਵਿਮੇ ਸਮਣਾ ਸਕ੍ਯਪੁਤ੍ਤਿਯਾ ਭੁਞ੍ਜਨ੍ਤਿ ਸੋਵ ਨੇਸਂ ਪਟਿਗ੍ਗਹੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ ਭਿਕ੍ਖਵੇ, ਚਲਕਾਨਿ ਵਾ ਅਟ੍ਠਿਕਾਨਿ ਵਾ ਉਚ੍ਛਿਟ੍ਠੋਦਕਂ ਵਾ ਪਤ੍ਤੇਨ ਨੀਹਰਿਤਬ੍ਬਂ. ਯੋ ਨੀਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਪਟਿਗ੍ਗਹ’’ਨ੍ਤਿ.
੨੫੬. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਹਤ੍ਥੇਨ ਵਿਪ੍ਫਾਲ਼ੇਤ੍ਵਾ ਚੀਵਰਂ ਸਿਬ੍ਬੇਨ੍ਤਿ. ਚੀਵਰਂ ਵਿਲੋਮਿਕਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਥਕਂ ਨਮਤਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਦਣ੍ਡਸਤ੍ਥਕਂ ਉਪ੍ਪਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਦਣ੍ਡਸਤ੍ਥਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਵਚੇ ਸਤ੍ਥਕਦਣ੍ਡੇ ਧਾਰੇਨ੍ਤਿ ਸੋਵਣ੍ਣਮਯਂ ਰੂਪਿਯਮਯਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਉਚ੍ਚਾਵਚਾ ਸਤ੍ਥਕਦਣ੍ਡਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਿਮਯਂ ਦਨ੍ਤਮਯਂ ਵਿਸਾਣਮਯਂ ਨਲ਼ਮਯਂ ਵੇਲ਼ੁਮਯਂ ਕਟ੍ਠਮਯਂ ਜਤੁਮਯਂ ਫਲਮਯਂ ਲੋਹਮਯਂ ਸਙ੍ਖਨਾਭਿਮਯ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਕੁਕ੍ਕੁਟਪਤ੍ਤੇਨਪਿ ਵੇਲ਼ੁਪੇਸਿਕਾਯਪਿ ਚੀਵਰਂ ਸਿਬ੍ਬੇਨ੍ਤਿ. ਚੀਵਰਂ ਦੁਸ੍ਸਿਬ੍ਬਿਤਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸੂਚਿ’’ਨ੍ਤਿ. ਸੂਚਿਯੋ ਕਣ੍ਣਕਿਤਾਯੋ ਹੋਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਸੂਚਿਨਾਲ਼ਿਕ’’ਨ੍ਤਿ. ਸੂਚਿਨਾਲ਼ਿਕਾਯਪਿ ਕਣ੍ਣਕਿਤਾਯੋ ਹੋਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਕਿਣ੍ਣੇਨ ਪੂਰੇਤੁ’’ਨ੍ਤਿ. ਕਿਣ੍ਣੇਪਿ ਕਣ੍ਣਕਿਤਾਯੋ ਹੋਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਤੁਯਾ ਪੂਰੇਤੁ’’ਨ੍ਤਿ. ਸਤ੍ਤੁਯਾਪਿ ਕਣ੍ਣਕਿਤਾਯੋ ਹੋਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਸਰਿਤਕ’’ਨ੍ਤਿ. ਸਰਿਤਕੇਪਿ ਕਣ੍ਣਕਿਤਾਯੋ ਹੋਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਮਧੁਸਿਤ੍ਥਕੇਨ ਸਾਰੇਤੁ’’ਨ੍ਤਿ. ਸਰਿਤਕਂ ਪਰਿਭਿਜ੍ਜਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਰਿਤਕਸਿਪਾਟਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਤਤ੍ਥ ਤਤ੍ਥ ਖਿਲਂ ਨਿਕ੍ਖਣਿਤ੍ਵਾ ਸਮ੍ਬਨ੍ਧਿਤ੍ਵਾ ਚੀਵਰਂ ਸਿਬ੍ਬੇਨ੍ਤਿ. ਚੀਵਰਂ ਵਿਕਣ੍ਣਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਕਥਿਨਂ ਕਥਿਨਰਜ੍ਜੁਂ [ਕਠਿਨਂ ਕਠਿਨਰਜ੍ਜੁਂ (ਸੀ. ਸ੍ਯਾ.)] ਤਤ੍ਥ ਤਤ੍ਥ ਓਬਨ੍ਧਿਤ੍ਵਾ ਚੀਵਰਂ ਸਿਬ੍ਬੇਤੁ’’ਨ੍ਤਿ. ਵਿਸਮੇ ਕਥਿਨਂ ਪਤ੍ਥਰਨ੍ਤਿ. ਕਥਿਨਂ ਪਰਿਭਿਜ੍ਜਤਿ…ਪੇ… ‘‘ਨ, ਭਿਕ੍ਖਵੇ, ਵਿਸਮੇ ਕਥਿਨਂ ਪਤ੍ਥਰਿਤਬ੍ਬਂ. ਯੋ ਪਤ੍ਥਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਛਮਾਯ ਕਥਿਨਂ ਪਤ੍ਥਰਨ੍ਤਿ. ਕਥਿਨਂ ਪਂਸੁਕਿਤਂ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਣਸਨ੍ਥਾਰਕ’’ਨ੍ਤਿ. ਕਥਿਨਸ੍ਸ ਅਨ੍ਤੋ ਜੀਰਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਅਨੁਵਾਤਂ ਪਰਿਭਣ੍ਡਂ ਆਰੋਪੇਤੁ’’ਨ੍ਤਿ. ਕਥਿਨਂ ਨਪ੍ਪਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਦਣ੍ਡਕਥਿਨਂ ਬਿਦਲਕਂ ਸਲਾਕਂ ਵਿਨਨ੍ਧਨਰਜ੍ਜੁਂ ਵਿਨਨ੍ਧਨਸੁਤ੍ਤਂ ਵਿਨਨ੍ਧਿਤ੍ਵਾ ਚੀਵਰਂ ਸਿਬ੍ਬੇਤੁ’’ਨ੍ਤਿ. ਸੁਤ੍ਤਨ੍ਤਰਿਕਾਯੋ ਵਿਸਮਾ ਹੋਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਕਲ਼ਿਮ੍ਭਕ’’ਨ੍ਤਿ. ਸੁਤ੍ਤਾ ਵਙ੍ਕਾ ਹੋਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਮੋਘਸੁਤ੍ਤਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਧੋਤੇਹਿ ਪਾਦੇਹਿ ਕਥਿਨਂ ਅਕ੍ਕਮਨ੍ਤਿ. ਕਥਿਨਂ ਦੁਸ੍ਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਅਧੋਤੇਹਿ ਪਾਦੇਹਿ ਕਥਿਨਂ ਅਕ੍ਕਮਿਤਬ੍ਬਂ. ਯੋ ਅਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਲ੍ਲੇਹਿ ਪਾਦੇਹਿ ਕਥਿਨਂ ਅਕ੍ਕਮਨ੍ਤਿ. ਕਥਿਨਂ ਦੁਸ੍ਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਅਲ੍ਲੇਹਿ ਪਾਦੇਹਿ ਕਥਿਨਂ ਅਕ੍ਕਮਿਤਬ੍ਬਂ. ਯੋ ਅਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਉਪਾਹਨਾ ਕਥਿਨਂ ਅਕ੍ਕਮਨ੍ਤਿ. ਕਥਿਨਂ ਦੁਸ੍ਸਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਸਉਪਾਹਨੇਨ ਕਥਿਨਂ ਅਕ੍ਕਮਿਤਬ੍ਬਂ. ਯੋ ਅਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਚੀਵਰਂ ਸਿਬ੍ਬਨ੍ਤਾ ਅਙ੍ਗੁਲਿਯਾ ਪਟਿਗ੍ਗਣ੍ਹਨ੍ਤਿ. ਅਙ੍ਗੁਲਿਯੋ ਦੁਕ੍ਖਾ ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਟਿਗ੍ਗਹ’’ਨ੍ਤਿ.
੨੫੭. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਉਚ੍ਚਾਵਚੇ ਪਟਿਗ੍ਗਹੇ ਧਾਰੇਨ੍ਤਿ ਸੋਵਣ੍ਣਮਯਂ ਰੂਪਿਯਮਯਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਉਚ੍ਚਾਵਚਾ ਪਟਿਗ੍ਗਹਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਿਮਯਂ…ਪੇ… ਸਙ੍ਖਨਾਭਿਮਯ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਸੂਚਿਯੋਪਿ ਸਤ੍ਥਕਾਪਿ ਪਟਿਗ੍ਗਹਾਪਿ ਨਸ੍ਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਵੇਸਨਵਿਤ੍ਥਕ’’ਨ੍ਤਿ. ਆਵੇਸਨਵਿਤ੍ਥਕੇ ਸਮਾਕੁਲਾ ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਟਿਗ੍ਗਹਥਵਿਕ’’ਨ੍ਤਿ. ਅਂਸਬਦ੍ਧਕੋ ਨ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਂਸਬਦ੍ਧਕਂ ਬਨ੍ਧਨਸੁਤ੍ਤਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਬ੍ਭੋਕਾਸੇ ਚੀਵਰਂ ਸਿਬ੍ਬਨ੍ਤਾ ਸੀਤੇਨਪਿ ਉਣ੍ਹੇਨਪਿ ਕਿਲਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਕਥਿਨਸਾਲਂ ਕਥਿਨਮਣ੍ਡਪ’’ਨ੍ਤਿ. ਕਥਿਨਸਾਲਾ ਨੀਚਵਤ੍ਥੁਕਾ ਹੋਤਿ, ਉਦਕੇਨ ਓਤ੍ਥਰਿਯ੍ਯਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ ਉਚ੍ਚਵਤ੍ਥੁਕਂ ਕਾਤੁ’’ਨ੍ਤਿ. ਚਯੋ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਚਿਨਿਤੁਂ ਤਯੋ ਚਯੇ – ਇਟ੍ਠਕਾਚਯਂ, ਸਿਲਾਚਯਂ, ਦਾਰੁਚਯ’’ਨ੍ਤਿ. ਆਰੋਹਨ੍ਤਾ ਵਿਹਞ੍ਞਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਤਯੋ ਸੋਪਾਨੇ – ਇਟ੍ਠਕਾਸੋਪਾਨਂ, ਸਿਲਾਸੋਪਾਨਂ, ਦਾਰੁਸੋਪਾਨ’’ਨ੍ਤਿ. ਆਰੋਹਨ੍ਤਾ ਪਰਿਪਤਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਆਲਮ੍ਬਨਬਾਹ’’ਨ੍ਤਿ. ਕਥਿਨਸਾਲਾਯ ਤਿਣਚੁਣ੍ਣਂ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਓਗੁਮ੍ਫੇਤ੍ਵਾ [ਓਗੁਮ੍ਬੇਤ੍ਵਾ (ਸੀ. ਸ੍ਯਾ.)] ਉਲ੍ਲਿਤ੍ਤਾਵਲਿਤ੍ਤਂ ਕਾਤੁਂ – ਸੇਤਵਣ੍ਣਂ ਕਾਲ਼ਵਣ੍ਣਂ ਗੇਰੁਕਪਰਿਕਮ੍ਮਂ ਮਾਲਾਕਮ੍ਮਂ ਲਤਾਕਮ੍ਮਂ ਮਕਰਦਨ੍ਤਕਂ ਪਞ੍ਚਪਟਿਕਂ ਚੀਵਰਵਂਸਂ ਚੀਵਰਰਜ੍ਜੁਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਚੀਵਰਂ ਸਿਬ੍ਬੇਤ੍ਵਾ ਤਤ੍ਥੇਵ ਕਥਿਨਂ ਉਜ੍ਝਿਤ੍ਵਾ ਪਕ੍ਕਮਨ੍ਤਿ, ਉਨ੍ਦੂਰੇਹਿਪਿ ਉਪਚਿਕਾਹਿਪਿ ਖਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਕਥਿਨਂ ਸਙ੍ਘਰਿਤੁ’’ਨ੍ਤਿ. ਕਥਿਨਂ ਪਰਿਭਿਜ੍ਜਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਗੋਘਂਸਿਕਾਯ ਕਥਿਨਂ ਸਙ੍ਘਰਿਤੁ’’ਨ੍ਤਿ. ਕਥਿਨਂ ਵਿਨਿਵੇਠਿਯਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਬਨ੍ਧਨਰਜ੍ਜੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਕੁਟ੍ਟੇਪਿ ਥਮ੍ਭੇਪਿ ਕਥਿਨਂ ਉਸ੍ਸਾਪੇਤ੍ਵਾ ਪਕ੍ਕਮਨ੍ਤਿ. ਪਰਿਪਤਿਤ੍ਵਾ ਕਥਿਨਂ ਭਿਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਿਤ੍ਤਿਖਿਲੇ ਵਾ ਨਾਗਦਨ੍ਤੇ ਵਾ ਲਗ੍ਗੇਤੁ’’ਨ੍ਤਿ.
੨੫੮. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਵੇਸਾਲੀ ਤੇਨ ਚਾਰਿਕਂ ਪਕ੍ਕਾਮਿ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸੂਚਿਕਮ੍ਪਿ ਸਤ੍ਥਕਮ੍ਪਿ ਭੇਸਜ੍ਜਮ੍ਪਿ ਪਤ੍ਤੇਨ ਆਦਾਯ ਗਚ੍ਛਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭੇਸਜ੍ਜਤ੍ਥਵਿਕ’’ਨ੍ਤਿ. ਅਂਸਬਦ੍ਧਕੋ ਨ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਅਂਸਬਦ੍ਧਕਂ ਬਨ੍ਧਨਸੁਤ੍ਤਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਉਪਾਹਨਾਯੋ ਕਾਯਬਨ੍ਧਨੇਨ ਬਨ੍ਧਿਤ੍ਵਾ ਗਾਮਂ ਪਿਣ੍ਡਾਯ ਪਾਵਿਸਿ. ਅਞ੍ਞਤਰੋ ਉਪਾਸਕੋ ਤਂ ਭਿਕ੍ਖੁਂ ਅਭਿਵਾਦੇਨ੍ਤੋ ਉਪਾਹਨਾਯੋ ਸੀਸੇਨ ਘਟ੍ਟੇਤਿ. ਸੋ ਭਿਕ੍ਖੁ ਮਙ੍ਕੁ ਅਹੋਸਿ. ਅਥ ਖੋ ਸੋ ਭਿਕ੍ਖੁ ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪਾਹਨਤ੍ਥਵਿਕ’’ਨ੍ਤਿ. ਅਂਸਬਦ੍ਧਕੋ ਨ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਅਂਸਬਦ੍ਧਕਂ ਬਨ੍ਧਨਸੁਤ੍ਤਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਨ੍ਤਰਾਮਗ੍ਗੇ ਉਦਕਂ ਅਕਪ੍ਪਿਯਂ ਹੋਤਿ. ਪਰਿਸ੍ਸਾਵਨਂ ਨ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਰਿਸ੍ਸਾਵਨ’’ਨ੍ਤਿ. ਚੋਲ਼ਕਂ ਨਪ੍ਪਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਕਟਚ੍ਛੁਪਰਿਸ੍ਸਾਵਨ’’ਨ੍ਤਿ. ਚੋਲ਼ਕਂ ਨਪ੍ਪਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਧਮ੍ਮਕਰਣ’’ਨ੍ਤਿ [ਧਮ੍ਮਕਰਣਂ (ਸੀ. ਸ੍ਯਾ.), ਧਮਕਰਣਂ (ਕ.)].
੨੫੯. ਤੇਨ ਖੋ ਪਨ ਸਮਯੇਨ ਦ੍ਵੇ ਭਿਕ੍ਖੂ ਕੋਸਲੇਸੁ ਜਨਪਦੇ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਏਕੋ ਭਿਕ੍ਖੁ ਅਨਾਚਾਰਂ ਆਚਰਤਿ. ਦੁਤਿਯੋ ਭਿਕ੍ਖੁ ਤਂ ਭਿਕ੍ਖੁਂ ਏਤਦਵੋਚ – ‘‘ਮਾ, ਆਵੁਸੋ, ਏਵਰੂਪਂ ਅਕਾਸਿ. ਨੇਤਂ ਕਪ੍ਪਤੀ’’ਤਿ. ਸੋ ਤਸ੍ਮਿਂ ਉਪਨਨ੍ਧਿ. ਅਥ ਖੋ ਸੋ ਭਿਕ੍ਖੁ ਪਿਪਾਸਾਯ ਪੀਲ਼ਿਤੋ ਉਪਨਦ੍ਧਂ ਭਿਕ੍ਖੁਂ ਏਤਦਵੋਚ – ‘‘ਦੇਹਿ ਮੇ, ਆਵੁਸੋ, ਪਰਿਸ੍ਸਾਵਨਂ, ਪਾਨੀਯਂ ਪਿਵਿਸ੍ਸਾਮੀ’’ਤਿ. ਉਪਨਦ੍ਧੋ ਭਿਕ੍ਖੁ ਨ ਅਦਾਸਿ. ਸੋ ਭਿਕ੍ਖੁ ਪਿਪਾਸਾਯ ਪੀਲ਼ਿਤੋ ਕਾਲਮਕਾਸਿ. ਅਥ ਖੋ ਸੋ ਭਿਕ੍ਖੁ ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ‘‘ਕਿਂ ਪਨ ਤ੍ਵਂ, ਆਵੁਸੋ, ਪਰਿਸ੍ਸਾਵਨਂ ਯਾਚਿਯਮਾਨੋ ਨ ਅਦਾਸੀ’’ਤਿ? ‘‘ਏਵਮਾਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁ ਪਰਿਸ੍ਸਾਵਨਂ ਯਾਚਿਯਮਾਨੋ ਨ ਦਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਤਂ ਭਿਕ੍ਖੁਂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਪਰਿਸ੍ਸਾਵਨਂ ਯਾਚਿਯਮਾਨੋ ਨ ਅਦਾਸੀ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਪਰਿਸ੍ਸਾਵਨਂ ਯਾਚਿਯਮਾਨੋ ਨ ਦਸ੍ਸਸਿ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ ਭਿਕ੍ਖਵੇ, ਅਦ੍ਧਾਨਮਗ੍ਗਪ੍ਪਟਿਪਨ੍ਨੇਨ ਭਿਕ੍ਖੁਨਾ ਪਰਿਸ੍ਸਾਵਨਂ ਯਾਚਿਯਮਾਨੇਨ ਨ ਦਾਤਬ੍ਬਂ. ਯੋ ਨ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਅਪਰਿਸ੍ਸਾਵਨਕੇਨ ਅਦ੍ਧਾਨੋ ਪਟਿਪਜ੍ਜਿਤਬ੍ਬੋ. ਯੋ ਪਟਿਪਜ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਸਚੇ ਨ ਹੋਤਿ ਪਰਿਸ੍ਸਾਵਨਂ ਵਾ ਧਮ੍ਮਕਰਣੋ ਵਾ, ਸਙ੍ਘਾਟਿਕਣ੍ਣੋਪਿ ਅਧਿਟ੍ਠਾਤਬ੍ਬੋ – ਇਮਿਨਾ ਪਰਿਸ੍ਸਾਵੇਤ੍ਵਾ ਪਿਵਿਸ੍ਸਾਮੀ’’ਤਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਵੇਸਾਲੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਨਵਕਮ੍ਮਂ ਕਰੋਨ੍ਤਿ. ਪਰਿਸ੍ਸਾਵਨਂ ਨ ਸਮ੍ਮਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਦਣ੍ਡਪਰਿਸ੍ਸਾਵਨ’’ਨ੍ਤਿ. ਦਣ੍ਡਪਰਿਸ੍ਸਾਵਨਂ ਨ ਸਮ੍ਮਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਓਤ੍ਥਰਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਮਕਸੇਹਿ ਉਬ੍ਬਾਲ਼੍ਹਾ ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਕਸਕੁਟਿਕ’’ਨ੍ਤਿ.
੨੬੦. ਤੇਨ ਖੋ ਪਨ ਸਮਯੇਨ ਵੇਸਾਲਿਯਂ ਪਣੀਤਾਨਂ ਭਤ੍ਤਾਨਂ ਭਤ੍ਤਪਟਿਪਾਟਿ ਅਟ੍ਠਿਤਾ ਹੋਤਿ. ਭਿਕ੍ਖੂ ਪਣੀਤਾਨਿ ਭੋਜਨਾਨਿ ਭੁਞ੍ਜਿਤ੍ਵਾ ਅਭਿਸਨ੍ਨਕਾਯਾ ਹੋਨ੍ਤਿ ਬਹ੍ਵਾਬਾਧਾ [ਬਵ੍ਹਾਬਾਧਾ (ਸੀ.)]. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਵੇਸਾਲਿਂ ਅਗਮਾਸਿ ਕੇਨਚਿਦੇਵ ਕਰਣੀਯੇਨ. ਅਦ੍ਦਸਾ ਖੋ ਜੀਵਕੋ ਕੋਮਾਰਭਚ੍ਚੋ ਭਿਕ੍ਖੂ ਅਭਿਸਨ੍ਨਕਾਯੇ ਬਹ੍ਵਾਬਾਧੇ. ਦਿਸ੍ਵਾਨ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਏਤਰਹਿ, ਭਨ੍ਤੇ, ਭਿਕ੍ਖੂ ਅਭਿਸਨ੍ਨਕਾਯਾ ਬਹ੍ਵਾਬਾਧਾ. ਸਾਧੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਚਙ੍ਕਮਞ੍ਚ ਜਨ੍ਤਾਘਰਞ੍ਚ ਅਨੁਜਾਨਾਤੁ. ਏਵਂ ਭਿਕ੍ਖੂ ਅਪ੍ਪਾਬਾਧਾ ਭਵਿਸ੍ਸਨ੍ਤੀ’’ਤਿ. ਅਥ ਖੋ ਭਗਵਾ ਜੀਵਕਂ ਕੋਮਾਰਭਚ੍ਚਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਚਙ੍ਕਮਞ੍ਚ ਜਨ੍ਤਾਘਰਞ੍ਚਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਵਿਸਮੇ ਚਙ੍ਕਮੇ ਚਙ੍ਕਮਨ੍ਤਿ. ਪਾਦਾ ਦੁਕ੍ਖਾ ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਮਂ ਕਾਤੁ’’ਨ੍ਤਿ. ਚਙ੍ਕਮੋ ਨੀਚਵਤ੍ਥੁਕੋ ਹੋਤਿ. ਉਦਕੇਨ ਓਤ੍ਥਰਿਯ੍ਯਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਚਵਤ੍ਥੁਕਂ ਕਾਤੁ’’ਨ੍ਤਿ. ਚਯੋ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਚਿਨਿਤੁਂ ਤਯੋ ਚਯੇ – ਇਟ੍ਠਕਾਚਯਂ, ਸਿਲਾਚਯਂ, ਦਾਰੁਚਯ’’ਨ੍ਤਿ. ਆਰੋਹਨ੍ਤਾ ਵਿਹਞ੍ਞਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਤਯੋ ਸੋਪਾਨੇ – ਇਟ੍ਠਕਾਸੋਪਾਨਂ, ਸਿਲਾਸੋਪਾਨਂ, ਦਾਰੁਸੋਪਾਨ’’ਨ੍ਤਿ. ਆਰੋਹਨ੍ਤਾ ਪਰਿਪਤਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਆਲਮ੍ਬਨਬਾਹ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਚਙ੍ਕਮੇ ਚਙ੍ਕਮਨ੍ਤਾ ਪਰਿਪਤਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਚਙ੍ਕਮਨਵੇਦਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਜ੍ਝੋਕਾਸੇ ਚਙ੍ਕਮਨ੍ਤਾ ਸੀਤੇਨਪਿ ਉਣ੍ਹੇਨਪਿ ਕਿਲਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਚਙ੍ਕਮਨਸਾਲ’’ਨ੍ਤਿ. ਚਙ੍ਕਮਨਸਾਲਾਯਂ ਤਿਣਚੁਣ੍ਣਂ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਓਗੁਮ੍ਫੇਤ੍ਵਾ ਉਲ੍ਲਿਤ੍ਤਾਵਲਿਤ੍ਤਂ ਕਾਤੁਂ – ਸੇਤਵਣ੍ਣਂ ਕਾਲ਼ਵਣ੍ਣਂ ਗੇਰੁਕਪਰਿਕਮ੍ਮਂ ਮਾਲਾਕਮ੍ਮਂ ਲਤਾਕਮ੍ਮਂ ਮਕਰਦਨ੍ਤਕਂ ਪਞ੍ਚਪਟਿਕਂ ਚੀਵਰਵਂਸਂ ਚੀਵਰਰਜ੍ਜੁ’’ਨ੍ਤਿ. ਜਨ੍ਤਾਘਰਂ ਨੀਚਵਤ੍ਥੁਕਂ ਹੋਤਿ, ਉਦਕੇਨ ਓਤ੍ਥਰਿਯ੍ਯਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਚਵਤ੍ਥੁਕਂ ਕਾਤੁ’’ਨ੍ਤਿ. ਚਯੋ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਚਿਨਿਤੁਂ ਤਯੋ ਚਯੇ – ਇਟ੍ਠਕਾਚਯਂ, ਸਿਲਾਚਯਂ, ਦਾਰੁਚਯ’’ਨ੍ਤਿ. ਆਰੋਹਨ੍ਤਾ ਵਿਹਞ੍ਞਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਤਯੋ ਸੋਪਾਨੇ – ਇਟ੍ਠਕਾਸੋਪਾਨਂ, ਸਿਲਾਸੋਪਾਨਂ, ਦਾਰੁਸੋਪਾਨ’’ਨ੍ਤਿ. ਆਰੋਹਨ੍ਤਾ ਪਰਿਪਤਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਆਲਮ੍ਬਨਬਾਹ’’ਨ੍ਤਿ. ਜਨ੍ਤਾਘਰਸ੍ਸ ਕਵਾਟਂ ਨ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਕਵਾਟਂ ਪਿਟ੍ਠਸਙ੍ਘਾਟਂ [ਪੀਠਸਂਘਾਟਂ (ਕ.)] ਉਦੁਕ੍ਖਲਿਕਂ ਉਤ੍ਤਰਪਾਸਕਂ ਅਗ੍ਗਲ਼ਵਟ੍ਟਿਕਂ ਕਪਿਸੀਸਕਂ ਸੂਚਿਕਂ ਘਟਿਕਂ ਤਾਲ਼ਚ੍ਛਿਦ੍ਦਂ ਆਵਿਞ੍ਛਨਛਿਦ੍ਦਂ ਆਵਿਞ੍ਛਨਰਜ੍ਜੁ’’ਨ੍ਤਿ. ਜਨ੍ਤਾਘਰਸ੍ਸ ਕੁਟ੍ਟਪਾਦੋ ਜੀਰਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਮਣ੍ਡਲਿਕਂ ਕਾਤੁ’’ਨ੍ਤਿ. ਜਨ੍ਤਾਘਰਸ੍ਸ ਧੂਮਨੇਤ੍ਤਂ ਨ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਧੂਮਨੇਤ੍ਤ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਖੁਦ੍ਦਕੇ ਜਨ੍ਤਾਘਰੇ ਮਜ੍ਝੇ ਅਗ੍ਗਿਟ੍ਠਾਨਂ ਕਰੋਨ੍ਤਿ. ਉਪਚਾਰੋ ਨ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਖੁਦ੍ਦਕੇ ਜਨ੍ਤਾਘਰੇ ਏਕਮਨ੍ਤਂ ਅਗ੍ਗਿਟ੍ਠਾਨਂ ਕਾਤੁਂ, ਮਹਲ੍ਲਕੇ ਮਜ੍ਝੇ’’ਤਿ. ਜਨ੍ਤਾਘਰੇ ਅਗ੍ਗਿ ਮੁਖਂ ਡਹਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਮੁਖਮਤ੍ਤਿਕ’’ਨ੍ਤਿ. ਹਤ੍ਥੇ ਮਤ੍ਤਿਕਂ ਤੇਮੇਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਮਤ੍ਤਿਕਾਦੋਣਿਕ’’ਨ੍ਤਿ. ਮਤ੍ਤਿਕਾ ਦੁਗ੍ਗਨ੍ਧਾ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਵਾਸੇਤੁ’’ਨ੍ਤਿ. ਜਨ੍ਤਾਘਰੇ ਅਗ੍ਗਿ ਕਾਯਂ ਡਹਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਂ ਅਤਿਹਰਿਤੁ’’ਨ੍ਤਿ. ਪਾਤਿਯਾਪਿ ਪਤ੍ਤੇਨਪਿ ਉਦਕਂ ਅਤਿਹਰਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਟ੍ਠਾਨਂ, ਉਦਕਸਰਾਵਕ’’ਨ੍ਤਿ. ਜਨ੍ਤਾਘਰਂ ਤਿਣਚ੍ਛਦਨਂ ਨ ਸੇਦੇਤਿ [ਤਿਣਚ੍ਛਾਦਨੇਨ ਛਾਦੇਤਿ (ਕ.)] …ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਓਗੁਮ੍ਫੇਤ੍ਵਾ ਉਲ੍ਲਿਤ੍ਤਾਵਲਿਤ੍ਤਂ ਕਾਤੁ’’ਨ੍ਤਿ. ਜਨ੍ਤਾਘਰਂ ਚਿਕ੍ਖਲ੍ਲਂ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਸਨ੍ਥਰਿਤੁਂ ਤਯੋ ਸਨ੍ਥਰੇ – ਇਟ੍ਠਕਾਸਨ੍ਥਰਂ, ਸਿਲਾਸਨ੍ਥਰਂ, ਦਾਰੁਸਨ੍ਥਰ’’ਨ੍ਤਿ. ਚਿਕ੍ਖਲ੍ਲਂਯੇਵ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਧੋਵਿਤੁ’’ਨ੍ਤਿ. ਉਦਕਂ ਸਨ੍ਤਿਟ੍ਠਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਨਿਦ੍ਧਮਨ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਜਨ੍ਤਾਘਰੇ ਛਮਾਯ ਨਿਸੀਦਨ੍ਤਿ, ਗਤ੍ਤਾਨਿ ਕਣ੍ਡੂਵਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਜਨ੍ਤਾਘਰਪੀਠ’’ਨ੍ਤਿ. ਤੇਨ ਖੋ ਪਨ ਸਮਯੇਨ ਜਨ੍ਤਾਘਰਂ ਅਪਰਿਕ੍ਖਿਤ੍ਤਂ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਪਰਿਕ੍ਖਿਪਿਤੁਂ ਤਯੋ ਪਾਕਾਰੇ – ਇਟ੍ਠਕਾਪਾਕਾਰਂ, ਸਿਲਾਪਾਕਾਰਂ, ਦਾਰੁਪਾਕਾਰ’’ਨ੍ਤਿ. ਕੋਟ੍ਠਕੋ ਨ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਕੋਟ੍ਠਕ’’ਨ੍ਤਿ. ਕੋਟ੍ਠਕੋ ਨੀਚਵਤ੍ਥੁਕੋ ਹੋਤਿ, ਉਦਕੇਨ ਓਤ੍ਥਰਿਯ੍ਯਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਚਵਤ੍ਥੁਕਂ ਕਾਤੁ’’ਨ੍ਤਿ. ਚਯੋ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਚਿਨਿਤੁਂ ਤਯੋ ਚਯੇ – ਇਟ੍ਠਕਾਚਯਂ, ਸਿਲਾਚਯਂ, ਦਾਰੁਚਯ’’ਨ੍ਤਿ. ਆਰੋਹਨ੍ਤਾ ਵਿਹਞ੍ਞਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਤਯੋ ਸੋਪਾਨੇ – ਇਟ੍ਠਕਾਸੋਪਾਨਂ, ਸਿਲਾਸੋਪਾਨਂ, ਦਾਰੁਸੋਪਾਨ’’ਨ੍ਤਿ. ਆਰੋਹਨ੍ਤਾ ਪਰਿਪਤਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਆਲਮ੍ਬਨਬਾਹ’’ਨ੍ਤਿ. ਕੋਟ੍ਠਕਸ੍ਸ ਕਵਾਟਂ ਨ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਕਵਾਟਂ ਪਿਟ੍ਠਸਙ੍ਘਾਟਂ ਉਦੁਕ੍ਖਲਿਕਂ ਉਤ੍ਤਰਪਾਸਕਂ ਅਗ੍ਗਲ਼ਵਟ੍ਟਿਂ ਕਪਿਸੀਸਕਂ ਸੂਚਿਕਂ ਘਟਿਕਂ ਤਾਲ਼ਚ੍ਛਿਦ੍ਦਂ ਆਵਿਞ੍ਛਨਛਿਦ੍ਦਂ ਆਵਿਞ੍ਛਨਰਜ੍ਜੁ’’ਨ੍ਤਿ. ਕੋਟ੍ਠਕੇ ਤਿਣਚੁਣ੍ਣਂ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਓਗੁਮ੍ਫੇਤ੍ਵਾ ਉਲ੍ਲਿਤ੍ਤਾਵਲਿਤ੍ਤਂ ਕਾਤੁਂ – ਸੇਤਵਣ੍ਣਂ ਕਾਲ਼ਵਣ੍ਣਂ ਗੇਰੁਕਪਰਿਕਮ੍ਮਂ ਮਾਲਾਕਮ੍ਮਂ ਲਤਾਕਮ੍ਮਂ ਮਕਰਦਨ੍ਤਕਂ ਪਞ੍ਚਪਟਿਕਨ੍ਤਿ. ਪਰਿਵੇਣਂ ਚਿਕ੍ਖਲ੍ਲਂ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਮਰੁਮ੍ਬਂ ਉਪਕਿਰਿਤੁ’’ਨ੍ਤਿ. ਨ ਪਰਿਯਾਪੁਣਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਪਦਰਸਿਲਂ ਨਿਕ੍ਖਿਪਿਤੁ’’ਨ੍ਤਿ. ਉਦਕਂ ਸਨ੍ਤਿਟ੍ਠਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਨਿਦ੍ਧਮਨ’’ਨ੍ਤਿ.
੨੬੧. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਨਗ੍ਗਾ ਨਗ੍ਗਂ ਅਭਿਵਾਦੇਨ੍ਤਿ…ਪੇ… ਨਗ੍ਗਾ ਨਗ੍ਗਂ ਅਭਿਵਾਦਾਪੇਨ੍ਤਿ, ਨਗ੍ਗਾ ਨਗ੍ਗਸ੍ਸ ਪਰਿਕਮ੍ਮਂ ਕਰੋਨ੍ਤਿ, ਨਗ੍ਗਾ ਨਗ੍ਗਸ੍ਸ ਪਰਿਕਮ੍ਮਂ ਕਾਰਾਪੇਨ੍ਤਿ, ਨਗ੍ਗਾ ਨਗ੍ਗਸ੍ਸ ਦੇਨ੍ਤਿ, ਨਗ੍ਗਾ ਪਟਿਗ੍ਗਣ੍ਹਨ੍ਤਿ, ਨਗ੍ਗਾ ਖਾਦਨ੍ਤਿ, ਨਗ੍ਗਾ ਭੁਞ੍ਜਨ੍ਤਿ, ਨਗ੍ਗਾ ਸਾਯਨ੍ਤਿ, ਨਗ੍ਗਾ ਪਿਵਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਨਗ੍ਗੇਨ [ਇਦਂ ਪਦਂ ਕਤ੍ਥਚਿ ਨਤ੍ਥਿ] ਨਗ੍ਗੋ ਅਭਿਵਾਦੇਤਬ੍ਬੋ…ਪੇ… ਨ ਨਗ੍ਗੇਨ ਅਭਿਵਾਦੇਤਬ੍ਬਂ… ਨ ਨਗ੍ਗੇਨ [ਇਦਂ ਪਦਂ ਕਤ੍ਥਚਿ ਨਤ੍ਥਿ] ਨਗ੍ਗੋ ਅਭਿਵਾਦਾਪੇਤਬ੍ਬੋ… ਨ ਨਗ੍ਗੇਨ ਅਭਿਵਾਦਾਪੇਤਬ੍ਬਂ… ਨ ਨਗ੍ਗੇਨ ਨਗ੍ਗਸ੍ਸ ਪਰਿਕਮ੍ਮਂ ਕਾਤਬ੍ਬਂ… ਨ ਨਗ੍ਗੇਨ ਨਗ੍ਗਸ੍ਸ ਪਰਿਕਮ੍ਮਂ ਕਾਰਾਪੇਤਬ੍ਬਂ… ਨ ਨਗ੍ਗੇਨ ਨਗ੍ਗਸ੍ਸ ਦਾਤਬ੍ਬਂ… ਨ ਨਗ੍ਗੇਨ ਪਟਿਗ੍ਗਹੇਤਬ੍ਬਂ… ਨ ਨਗ੍ਗੇਨ ਖਾਦਿਤਬ੍ਬਂ… ਨ ਨਗ੍ਗੇਨ ਭੁਞ੍ਜਿਤਬ੍ਬਂ… ਨ ਨਗ੍ਗੇਨ ਸਾਯਿਤਬ੍ਬਂ… ਨ ਨਗ੍ਗੇਨ ਪਾਤਬ੍ਬਂ. ਯੋ ਪਿਵੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਜਨ੍ਤਾਘਰੇ ਛਮਾਯ ਚੀਵਰਂ ਨਿਕ੍ਖਿਪਨ੍ਤਿ. ਚੀਵਰਂ ਪਂਸੁਕਿਤਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਚੀਵਰਵਂਸਂ ਚੀਵਰਰਜ੍ਜੁ’’ਨ੍ਤਿ. ਦੇਵੇ ਵਸ੍ਸਨ੍ਤੇ ਚੀਵਰਂ ਓਵਸ੍ਸਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਜਨ੍ਤਾਘਰਸਾਲ’’ਨ੍ਤਿ. ਜਨ੍ਤਾਘਰਸਾਲਾ ਨੀਚਵਤ੍ਥੁਕਾ ਹੋਤਿ, ਉਦਕੇਨ ਓਤ੍ਥਰਿਯ੍ਯਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਚਵਤ੍ਥੁਕਂ ਕਾਤੁ’’ਨ੍ਤਿ. ਚਯੋ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਚਿਨਿਤੁਂ…ਪੇ… ਆਰੋਹਨ੍ਤਾ ਵਿਹਞ੍ਞਨ੍ਤਿ…ਪੇ… ਆਰੋਹਨ੍ਤਾ ਪਰਿਪਤਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਆਲਮ੍ਬਨਬਾਹ’’ਨ੍ਤਿ. ਜਨ੍ਤਾਘਰਸਾਲਾਯ ਤਿਣਚੁਣ੍ਣਂ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਓਗੁਮ੍ਫੇਤ੍ਵਾ ਉਲ੍ਲਿਤ੍ਤਾਵਲਿਤ੍ਤਂ ਕਾਤੁਂ…ਪੇ… ਚੀਵਰਵਂਸਂ ਚੀਵਰਰਜ੍ਜੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਜਨ੍ਤਾਘਰੇਪਿ ਉਦਕੇਪਿ ਪਰਿਕਮ੍ਮਂ ਕਾਤੁਂ ਕੁਕ੍ਕੁਚ੍ਚਾਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਪਟਿਚ੍ਛਾਦਿਯੋ – ਜਨ੍ਤਾਘਰਪਟਿਚ੍ਛਾਦਿਂ, ਉਦਕਪਟਿਚ੍ਛਾਦਿਂ, ਵਤ੍ਥਪਟਿਚ੍ਛਾਦਿ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਜਨ੍ਤਾਘਰੇ ਉਦਕਂ ਨ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਪਾਨ’’ਨ੍ਤਿ. ਉਦਪਾਨਸ੍ਸ ਕੂਲਂ ਲੁਜ੍ਜਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਚਿਨਿਤੁਂ ਤਯੋ ਚਯੇ – ਇਟ੍ਠਕਾਚਯਂ, ਸਿਲਾਚਯਂ, ਦਾਰੁਚਯ’’ਨ੍ਤਿ. ਉਦਪਾਨੋ ਨੀਚਵਤ੍ਥੁਕੋ ਹੋਤਿ, ਉਦਕੇਨ ਓਤ੍ਥਰਿਯ੍ਯਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਚਵਤ੍ਥੁਕਂ ਕਾਤੁ’’ਨ੍ਤਿ. ਚਯੋ ਪਰਿਪਤਤਿ…ਪੇ… ਆਰੋਹਨ੍ਤਾ ਵਿਹਞ੍ਞਨ੍ਤਿ…ਪੇ… ਆਰੋਹਨ੍ਤਾ ਪਰਿਪਤਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਆਲਮ੍ਬਨਬਾਹ’’ਨ੍ਤਿ.
੨੬੨. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਵਲ੍ਲਿਕਾਯਪਿ ਕਾਯਬਨ੍ਧਨੇਨਪਿ ਉਦਕਂ ਵਾਹੇਨ੍ਤਿ [ਵਾਹਨ੍ਤਿ (ਕ.)]. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਵਾਹਨਰਜ੍ਜੁ’’ਨ੍ਤਿ. ਹਤ੍ਥਾ ਦੁਕ੍ਖਾ ਹੋਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਤੁਲਂ ਕਰਕਟਕਂ ਚਕ੍ਕਵਟ੍ਟਕ’’ਨ੍ਤਿ. ਭਾਜਨਾ ਬਹੂ ਭਿਜ੍ਜਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਤਯੋ ਵਾਰਕੇ – ਲੋਹਵਾਰਕਂ, ਦਾਰੁਵਾਰਕਂ, ਚਮ੍ਮਕ੍ਖਣ੍ਡ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਜ੍ਝੋਕਾਸੇ ਉਦਕਂ ਵਾਹੇਨ੍ਤਾ ਸੀਤੇਨਪਿ ਉਣ੍ਹੇਨਪਿ ਕਿਲਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਪਾਨਸਾਲ’’ਨ੍ਤਿ. ਉਦਪਾਨਸਾਲਾਯ ਤਿਣਚੁਣ੍ਣਂ ਪਰਿਪਤਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਓਗੁਮ੍ਫੇਤ੍ਵਾ ਉਲ੍ਲਿਤ੍ਤਾਵਲਿਤ੍ਤਂ ਕਾਤੁਂ – ਸੇਤਵਣ੍ਣਂ ਕਾਲ਼ਵਣ੍ਣਂ ਗੇਰੁਕਪਰਿਕਮ੍ਮਂ ਮਾਲਾਕਮ੍ਮਂ ਲਤਾਕਮ੍ਮਂ ਮਕਰਦਨ੍ਤਕਂ ਪਞ੍ਚਪਟਿਕਂ ਚੀਵਰਵਂਸਂ ਚੀਵਰਰਜ੍ਜੁ’’ਨ੍ਤਿ. ਉਦਪਾਨੋ ਅਪਾਰੁਤੋ ਹੋਤਿ, ਤਿਣਚੁਣ੍ਣੇਹਿਪਿ ਪਂਸੁਕੇਹਿਪਿ ਓਕਿਰਿਯ੍ਯਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਅਪਿਧਾਨ’’ਨ੍ਤਿ. ਉਦਕਭਾਜਨਂ ਨ ਸਂਵਿਜ੍ਜਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਦੋਣਿਂ ਉਦਕਕਟਾਹ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਆਰਾਮੇ ਤਹਂ ਤਹਂ ਨਹਾਯਨ੍ਤਿ. ਆਰਾਮੋ ਚਿਕ੍ਖਲ੍ਲੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਚਨ੍ਦਨਿਕ’’ਨ੍ਤਿ. ਚਨ੍ਦਨਿਕਾ ਪਾਕਟਾ ਹੋਤਿ. ਭਿਕ੍ਖੂ ਹਿਰਿਯਨ੍ਤਿ ਨਹਾਯਿਤੁਂ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਪਰਿਕ੍ਖਿਪਿਤੁਂ ਤਯੋ ਪਾਕਾਰੇ – ਇਟ੍ਠਕਾਪਾਕਾਰਂ, ਸਿਲਾਪਾਕਾਰਂ, ਦਾਰੁਪਾਕਾਰ’’ਨ੍ਤਿ. ਚਨ੍ਦਨਿਕਾ ਚਿਕ੍ਖਲ੍ਲਾ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਸਨ੍ਥਰਿਤੁਂ ਤਯੋ ਸਨ੍ਥਰੇ – ਇਟ੍ਠਕਾਸਨ੍ਥਰਂ, ਸਿਲਾਸਨ੍ਥਰਂ, ਦਾਰੁਸਨ੍ਥਰ’’ਨ੍ਤਿ. ਉਦਕਂ ਸਨ੍ਤਿਟ੍ਠਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਨਿਦ੍ਧਮਨ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਗਤ੍ਤਾਨਿ ਸੀਤਿਗਤਾਨਿ ਹੋਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਪੁਞ੍ਛਨਿਂ ਚੋਲ਼ਕੇਨਪਿ ਪਚ੍ਚੁਦ੍ਧਰਿਤੁ’’ਨ੍ਤਿ.
੨੬੩. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਉਪਾਸਕੋ ਸਙ੍ਘਸ੍ਸ ਅਤ੍ਥਾਯ ਪੋਕ੍ਖਰਣਿਂ ਕਾਰੇਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਪੋਕ੍ਖਰਣਿ’’ਨ੍ਤਿ. ਪੋਕ੍ਖਰਣਿਯਾ ਕੂਲਂ ਲੁਜ੍ਜਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਚਿਨਿਤੁਂ ਤਯੋ ਚਯੇ – ਇਟ੍ਠਕਾਚਯਂ, ਸਿਲਾਚਯਂ, ਦਾਰੁਚਯ’’ਨ੍ਤਿ. ਆਰੋਹਨ੍ਤਾ ਵਿਹਞ੍ਞਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਤਯੋ ਸੋਪਾਨੇ – ਇਟ੍ਠਕਾਸੋਪਾਨਂ, ਸਿਲਾਸੋਪਾਨਂ, ਦਾਰੁਸੋਪਾਨ’’ਨ੍ਤਿ. ਆਰੋਹਨ੍ਤਾ ਪਰਿਪਤਨ੍ਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਆਲਮ੍ਬਨਬਾਹ’’ਨ੍ਤਿ. ਪੋਕ੍ਖਰਣਿਯਾ ਉਦਕਂ ਪੁਰਾਣਂ ਹੋਤਿ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਉਦਕਮਾਤਿਕਂ ਉਦਕਨਿਦ੍ਧਮਨ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਙ੍ਘਸ੍ਸ ਅਤ੍ਥਾਯ ਨਿਲ੍ਲੇਖਂ ਜਨ੍ਤਾਘਰਂ ਕਤ੍ਤੁਕਾਮੋ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਅਨੁਜਾਨਾਮਿ, ਭਿਕ੍ਖਵੇ, ਨਿਲ੍ਲੇਖਂ ਜਨ੍ਤਾਘਰ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਚਾਤੁਮਾਸਂ ਨਿਸੀਦਨੇਨ ਵਿਪ੍ਪਵਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਨ, ਭਿਕ੍ਖਵੇ, ਚਾਤੁਮਾਸਂ ਨਿਸੀਦਨੇਨ ਵਿਪ੍ਪਵਸਿਤਬ੍ਬਂ. ਯੋ ਵਿਪ੍ਪਵਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੨੬੪. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਪੁਪ੍ਫਾਭਿਕਿਣ੍ਣੇਸੁ ਸਯਨੇਸੁ ਸਯਨ੍ਤਿ. ਮਨੁਸ੍ਸਾ ਵਿਹਾਰਚਾਰਿਕਂ ਆਹਿਣ੍ਡਨ੍ਤਾ ਪਸ੍ਸਿਤ੍ਵਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਪੁਪ੍ਫਾਭਿਕਿਣ੍ਣੇਸੁ ਸਯਨੇਸੁ ਸਯਿਤਬ੍ਬਂ. ਯੋ ਸਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਗਨ੍ਧਮ੍ਪਿ ਮਾਲਮ੍ਪਿ ਆਦਾਯ ਆਰਾਮਂ ਆਗਚ੍ਛਨ੍ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਨ੍ਧਂ ਗਹੇਤ੍ਵਾ ਕਵਾਟੇ ਪਞ੍ਚਙ੍ਗੁਲਿਕਂ ਦਾਤੁਂ, ਪੁਪ੍ਫਂ ਗਹੇਤ੍ਵਾ ਵਿਹਾਰੇ ਏਕਮਨ੍ਤਂ ਨਿਕ੍ਖਿਪਿਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਨਮਤਕਂ ਉਪ੍ਪਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਨਮਤਕ’’ਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਨਮਤਕਂ ਅਧਿਟ੍ਠਾਤਬ੍ਬਂ ਨੁ ਖੋ ਉਦਾਹੁ ਵਿਕਪ੍ਪੇਤਬ੍ਬ’’ਨ੍ਤਿ…ਪੇ… ‘‘ਨ, ਭਿਕ੍ਖਵੇ, ਨਮਤਕਂ ਅਧਿਟ੍ਠਾਤਬ੍ਬਂ, ਨ ਵਿਕਪ੍ਪੇਤਬ੍ਬ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਆਸਿਤ੍ਤਕੂਪਧਾਨੇ ਭੁਞ੍ਜਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਨ, ਭਿਕ੍ਖਵੇ, ਆਸਿਤ੍ਤਕੂਪਧਾਨੇ ਭੁਞ੍ਜਿਤਬ੍ਬਂ. ਯੋ ਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਸੋ ਭੁਞ੍ਜਮਾਨੋ ਨ ਸਕ੍ਕੋਤਿ ਹਤ੍ਥੇਨ ਪਤ੍ਤਂ ਸਨ੍ਧਾਰੇਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਲ਼ੋਰਿਕ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਏਕਭਾਜਨੇਪਿ ਭੁਞ੍ਜਨ੍ਤਿ…ਪੇ… ਏਕਥਾਲਕੇਪਿ ਪਿਵਨ੍ਤਿ, ਏਕਮਞ੍ਚੇਪਿ ਤੁਵਟ੍ਟੇਨ੍ਤਿ, ਏਕਤ੍ਥਰਣਾਪਿ ਤੁਵਟ੍ਟੇਨ੍ਤਿ, ਏਕਪਾਵੁਰਣਾਪਿ ਤੁਵਟ੍ਟੇਨ੍ਤਿ, ਏਕਤ੍ਥਰਣਪਾਵੁਰਣਾਪਿ ਤੁਵਟ੍ਟੇਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹੀ ਕਾਮਭੋਗਿਨੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਏਕਭਾਜਨੇ ਭੁਞ੍ਜਿਤਬ੍ਬਂ…ਪੇ… ਨ ਏਕਥਾਲਕੇ ਪਾਤਬ੍ਬਂ… ਨ ਏਕਮਞ੍ਚੇ ਤੁਵਟ੍ਟਿਤਬ੍ਬਂ… ਨ ਏਕਤ੍ਥਰਣਾ [ਨ ਏਕਤ੍ਥਰਣੇ] ਤੁਵਟ੍ਟਿਤਬ੍ਬਂ… ਨ ਏਕਪਾਵੁਰਣਾ [ਨ ਏਕਪਾਵੁਰਣੇ] ਤੁਵਟ੍ਟਿਤਬ੍ਬਂ… ਨ ਏਕਤ੍ਥਰਣਪਾਵੁਰਣਾ [ਨ ਏਕਤ੍ਥਰਣਪਾਵੁਰਣੇ (ਸ੍ਯਾ.)] ਤੁਵਟ੍ਟਿਤਬ੍ਬਂ. ਯੋ ਤੁਵਟ੍ਟੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
੨੬੫. ਤੇਨ ਖੋ ਪਨ ਸਮਯੇਨ ਵਡ੍ਢੋ ਲਿਚ੍ਛਵੀ ਮੇਤ੍ਤਿਯਭੂਮਜਕਾਨਂ ਭਿਕ੍ਖੂਨਂ ਸਹਾਯੋ ਹੋਤਿ. ਅਥ ਖੋ ਵਡ੍ਢੋ ਲਿਚ੍ਛਵੀ ਯੇਨ ਮੇਤ੍ਤਿਯਭੂਮਜਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਮੇਤ੍ਤਿਯਭੂਮਜਕੇ ਭਿਕ੍ਖੂ ਏਤਦਵੋਚ – ‘‘ਵਨ੍ਦਾਮਿ ਅਯ੍ਯਾ’’ਤਿ. ਏਵਂ ਵੁਤ੍ਤੇ ਮੇਤ੍ਤਿਯਭੂਮਜਕਾ ਭਿਕ੍ਖੂ ਨਾਲਪਿਂਸੁ. ਦੁਤਿਯਮ੍ਪਿ ਖੋ ਵਡ੍ਢੋ ਲਿਚ੍ਛਵੀ ਮੇਤ੍ਤਿਯਭੂਮਜਕੇ ਭਿਕ੍ਖੂ ਏਤਦਵੋਚ – ‘‘ਵਨ੍ਦਾਮਿ ਅਯ੍ਯਾ’’ਤਿ. ਦੁਤਿਯਮ੍ਪਿ ਖੋ ਮੇਤ੍ਤਿਯਭੂਮਜਕਾ ਭਿਕ੍ਖੂ ਨਾਲਪਿਂਸੁ. ਤਤਿਯਮ੍ਪਿ ਖੋ ਵਡ੍ਢੋ ਲਿਚ੍ਛਵੀ ਮੇਤ੍ਤਿਯਭੂਮਜਕੇ ਭਿਕ੍ਖੂ ਏਤਦਵੋਚ – ‘‘ਵਨ੍ਦਾਮਿ ਅਯ੍ਯਾ’’ਤਿ. ਤਤਿਯਮ੍ਪਿ ਖੋ ਮੇਤ੍ਤਿਯਭੂਮਜਕਾ ਭਿਕ੍ਖੂ ਨਾਲਪਿਂਸੁ. ‘‘ਕ੍ਯਾਹਂ ਅਯ੍ਯਾਨਂ ਅਪਰਜ੍ਝਾਮਿ, ਕਿਸ੍ਸ ਮਂ ਅਯ੍ਯਾ ਨਾਲਪਨ੍ਤੀ’’ਤਿ? ‘‘ਤਥਾ ਹਿ ਪਨ ਤ੍ਵਂ, ਆਵੁਸੋ ਵਡ੍ਢ, ਅਮ੍ਹੇ ਦਬ੍ਬੇਨ ਮਲ੍ਲਪੁਤ੍ਤੇਨ ਵਿਹੇਠਿਯਮਾਨੇ ਅਜ੍ਝੁਪੇਕ੍ਖਸੀ’’ਤਿ. ‘‘ਕ੍ਯਾਹਂ ਅਯ੍ਯਾ ਕਰੋਮੀ’’ਤਿ? ‘‘ਸਚੇ ਖੋ ਤ੍ਵਂ, ਆਵੁਸੋ ਵਡ੍ਢ, ਇਚ੍ਛੇਯ੍ਯਾਸਿ, ਅਜ੍ਜੇਵ ਭਗਵਾ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਨਾਸਾਪੇਯ੍ਯਾ’’ਤਿ. ‘‘ਕ੍ਯਾਹਂ ਅਯ੍ਯਾ ਕਰੋਮਿ, ਕਿਂ ਮਯਾ ਸਕ੍ਕਾ ਕਾਤੁ’’ਨ੍ਤਿ? ‘‘ਏਹਿ ਤ੍ਵਂ, ਆਵੁਸੋ ਵਡ੍ਢ, ਯੇਨ ਭਗਵਾ ਤੇਨੁਪਸਙ੍ਕਮ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਵਂ ਵਦੇਹਿ – ‘ਇਦਂ, ਭਨ੍ਤੇ, ਨਚ੍ਛਨ੍ਨਂ ਨਪ੍ਪਤਿਰੂਪਂ. ਯਾਯਂ, ਭਨ੍ਤੇ, ਦਿਸਾ ਅਭਯਾ ਅਨੀਤਿਕਾ ਅਨੁਪਦ੍ਦਵਾ ਸਾਯਂ ਦਿਸਾ ਸਭਯਾ ਸਈਤਿਕਾ ਸਉਪਦ੍ਦਵਾ; ਯਤੋ ਨਿਵਾਤਂ ਤਤੋ ਸਵਾਤਂ; ਉਦਕਂ ਮਞ੍ਞੇ ਆਦਿਤ੍ਤਂ; ਅਯ੍ਯੇਨ ਮੇ ਦਬ੍ਬੇਨ ਮਲ੍ਲਪੁਤ੍ਤੇਨ ਪਜਾਪਤਿ ਦੂਸਿਤਾ’’’ਤਿ. ‘‘ਏਵਂ ਅਯ੍ਯਾ’’ਤਿ ਖੋ ਵਡ੍ਢੋ ਲਿਚ੍ਛਵੀ ਮੇਤ੍ਤਿਯਭੂਮਜਕਾਨਂ ਭਿਕ੍ਖੂਨਂ ਪਟਿਸ੍ਸੁਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਵਡ੍ਢੋ ਲਿਚ੍ਛਵੀ ਭਗਵਨ੍ਤਂ ਏਤਦਵੋਚ – ‘‘ਇਦਂ, ਭਨ੍ਤੇ, ਨਚ੍ਛਨ੍ਨਂ ਨਪ੍ਪਤਿਰੂਪਂ. ਯਾਯਂ, ਭਨ੍ਤੇ, ਦਿਸਾ ਅਭਯਾ ਅਨੀਤਿਕਾ ਅਨੁਪਦ੍ਦਵਾ ਸਾਯਂ ਦਿਸਾ ਸਭਯਾ ਸਈਤਿਕਾ ਸਉਪਦ੍ਦਵਾ; ਯਤੋ ਨਿਵਾਤਂ ਤਤੋ ਸਵਾਤਂ; ਉਦਕਂ ਮਞ੍ਞੇ ਆਦਿਤ੍ਤਂ; ਅਯ੍ਯੇਨ ਮੇ ਦਬ੍ਬੇਨ ਮਲ੍ਲਪੁਤ੍ਤੇਨ ਪਜਾਪਤਿ ਦੂਸਿਤਾ’’ਤਿ.
ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਪਟਿਪੁਚ੍ਛਿ – ‘‘ਸਰਸਿ ਤ੍ਵਂ, ਦਬ੍ਬ, ਏਵਰੂਪਂ ਕਤ੍ਤਾ ਯਥਾਯਂ ਵਡ੍ਢੋ ਆਹਾ’’ਤਿ? ‘‘ਯਥਾ ਮਂ, ਭਨ੍ਤੇ, ਭਗਵਾ ਜਾਨਾਤੀ’’ਤਿ. ਦੁਤਿਯਮ੍ਪਿ ਖੋ ਭਗਵਾ…ਪੇ… ਤਤਿਯਮ੍ਪਿ ਖੋ ਭਗਵਾ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਏਤਦਵੋਚ – ‘‘ਸਰਸਿ ਤ੍ਵਂ, ਦਬ੍ਬ, ਏਵਰੂਪਂ ਕਤ੍ਤਾ ਯਥਾਯਂ ਵਡ੍ਢੋ ਆਹਾ’’ਤਿ? ‘‘ਯਥਾ ਮਂ, ਭਨ੍ਤੇ, ਭਗਵਾ ਜਾਨਾਤੀ’’ਤਿ. ‘‘ਨ ਖੋ, ਦਬ੍ਬ, ਦਬ੍ਬਾ ਏਵਂ ਨਿਬ੍ਬੇਠੇਨ੍ਤਿ. ਸਚੇ ਤਯਾ ਕਤਂ, ਕਤਨ੍ਤਿ ਵਦੇਹਿ; ਸਚੇ ਅਕਤਂ, ਅਕਤਨ੍ਤਿ ਵਦੇਹੀ’’ਤਿ. ‘‘ਯਤੋ ਅਹਂ, ਭਨ੍ਤੇ, ਜਾਤੋ ਨਾਭਿਜਾਨਾਮਿ ਸੁਪਿਨਨ੍ਤੇਨਪਿ ਮੇਥੁਨਂ ਧਮ੍ਮਂ ਪਟਿਸੇਵਿਤਾ, ਪਗੇਵ ਜਾਗਰੋ’’ਤਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਨਿਕ੍ਕੁਜ੍ਜਤੁ, ਅਸਮ੍ਭੋਗਂ ਸਙ੍ਘੇਨ ਕਰੋਤੁ.
‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤੋ ਨਿਕ੍ਕੁਜ੍ਜਿਤਬ੍ਬੋ – ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਨਤ੍ਥਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਵਾਸਾਯ [ਅਨਾਵਾਸਾਯ (ਸ੍ਯਾ.)] ਪਰਿਸਕ੍ਕਤਿ, ਭਿਕ੍ਖੂ ਅਕ੍ਕੋਸਤਿ ਪਰਿਭਾਸਤਿ, ਭਿਕ੍ਖੂ ਭਿਕ੍ਖੂਹਿ ਭੇਦੇਤਿ, ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ. ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤਂ ਨਿਕ੍ਕੁਜ੍ਜਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਨਿਕ੍ਕੁਜ੍ਜਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
੨੬੬. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਵਡ੍ਢੋ ਲਿਚ੍ਛਵੀ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਨਿਕ੍ਕੁਜ੍ਜੇਯ੍ਯ, ਅਸਮ੍ਭੋਗਂ ਸਙ੍ਘੇਨ ਕਰੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਵਡ੍ਢੋ ਲਿਚ੍ਛਵੀ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਿ. ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਨਿਕ੍ਕੁਜ੍ਜਤਿ, ਅਸਮ੍ਭੋਗਂ ਸਙ੍ਘੇਨ ਕਰੋਤਿ. ਯਸ੍ਸਾਯਸ੍ਮਤੋ ਖਮਤਿ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਸ੍ਸ ਨਿਕ੍ਕੁਜ੍ਜਨਾ, ਅਸਮ੍ਭੋਗਂ ਸਙ੍ਘੇਨ ਕਰਣਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਨਿਕ੍ਕੁਜ੍ਜਿਤੋ ਸਙ੍ਘੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤੋ, ਅਸਮ੍ਭੋਗੋ ਸਙ੍ਘੇਨ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
ਅਥ ਖੋ ਆਯਸ੍ਮਾ ਆਨਨ੍ਦੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਵਡ੍ਢਂ ਲਿਚ੍ਛਵਿਂ ਏਤਦਵੋਚ – ‘‘ਸਙ੍ਘੇਨ ਤੇ, ਆਵੁਸੋ ਵਡ੍ਢ, ਪਤ੍ਤੋ ਨਿਕ੍ਕੁਜ੍ਜਿਤੋ. ਅਸਮ੍ਭੋਗੋਸਿ ਸਙ੍ਘੇਨਾ’’ਤਿ. ਅਥ ਖੋ ਵਡ੍ਢੋ ਲਿਚ੍ਛਵੀ – ਸਙ੍ਘੇਨ ਕਿਰ ਮੇ ਪਤ੍ਤੋ ਨਿਕ੍ਕੁਜ੍ਜਿਤੋ, ਅਸਮ੍ਭੋਗੋਮ੍ਹਿ ਕਿਰ ਸਙ੍ਘੇਨਾਤਿ – ਤਤ੍ਥੇਵ ਮੁਚ੍ਛਿਤੋ ਪਪਤੋ. ਅਥ ਖੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਮਿਤ੍ਤਾਮਚ੍ਚਾ ਞਾਤਿਸਾਲੋਹਿਤਾ ਵਡ੍ਢਂ ਲਿਚ੍ਛਵਿਂ ਏਤਦਵੋਚੁਂ – ‘‘ਅਲਂ, ਆਵੁਸੋ ਵਡ੍ਢ, ਮਾ ਸੋਚਿ, ਮਾ ਪਰਿਦੇਵਿ. ਮਯਂ ਭਗਵਨ੍ਤਂ ਪਸਾਦੇਸ੍ਸਾਮ ਭਿਕ੍ਖੁਸਙ੍ਘਞ੍ਚਾ’’ਤਿ.
ਅਥ ਖੋ ਵਡ੍ਢੋ ਲਿਚ੍ਛਵੀ ਸਪੁਤ੍ਤਦਾਰੋ ਸਮਿਤ੍ਤਾਮਚ੍ਚੋ ਸਞਾਤਿਸਾਲੋਹਿਤੋ ਅਲ੍ਲਵਤ੍ਥੋ ਅਲ੍ਲਕੇਸੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਅਚ੍ਚਯੋ ਮਂ, ਭਨ੍ਤੇ, ਅਚ੍ਚਗਮਾ ਯਥਾਬਾਲਂ ਯਥਾਮੂਲ਼੍ਹਂ ਯਥਾਅਕੁਸਲਂ, ਯੋਹਂ ਅਯ੍ਯਂ ਦਬ੍ਬਂ ਮਲ੍ਲਪੁਤ੍ਤਂ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਸਿਂ. ਤਸ੍ਸ ਮੇ, ਭਨ੍ਤੇ, ਭਗਵਾ ਅਚ੍ਚਯਂ ਅਚ੍ਚਯਤੋ ਪਟਿਗ੍ਗਣ੍ਹਾਤੁ ਆਯਤਿਂ ਸਂਵਰਾਯਾ’’ਤਿ. ‘‘ਤਗ੍ਘ ਤ੍ਵਂ, ਆਵੁਸੋ ਵਡ੍ਢ, ਅਚ੍ਚਯੋ ਅਚ੍ਚਗਮਾ ਯਥਾਬਾਲਂ ਯਥਾਮੂਲ਼੍ਹਂ ਯਥਾਅਕੁਸਲਂ, ਯਂ ਤ੍ਵਂ ਦਬ੍ਬਂ ਮਲ੍ਲਪੁਤ੍ਤਂ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਸਿ. ਯਤੋ ਚ ਖੋ ਤ੍ਵਂ, ਆਵੁਸੋ ਵਡ੍ਢ, ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਸਿ, ਤਂ ਤੇ ਮਯਂ ਪਟਿਗ੍ਗਣ੍ਹਾਮ. ਵੁਡ੍ਢਿਹੇਸਾ, ਆਵੁਸੋ ਵਡ੍ਢ, ਅਰਿਯਸ੍ਸ ਵਿਨਯੇ ਯੋ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਤਿ, ਆਯਤਿਂ ਸਂਵਰਂ ਆਪਜ੍ਜਤੀ’’ਤਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਉਕ੍ਕੁਜ੍ਜਤੁ, ਸਮ੍ਭੋਗਂ ਸਙ੍ਘੇਨ ਕਰੋਤੁ.
‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤੋ ਉਕ੍ਕੁਜ੍ਜਿਤਬ੍ਬੋ – ਨ ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤਿ, ਨ ਭਿਕ੍ਖੂਨਂ ਅਨਤ੍ਥਾਯ ਪਰਿਸਕ੍ਕਤਿ, ਨ ਭਿਕ੍ਖੂਨਂ ਅਵਾਸਾਯ ਪਰਿਸਕ੍ਕਤਿ, ਨ ਭਿਕ੍ਖੂ ਅਕ੍ਕੋਸਤਿ ਪਰਿਭਾਸਤਿ, ਨ ਭਿਕ੍ਖੂ ਭਿਕ੍ਖੂਹਿ ਭੇਦੇਤਿ, ਨ ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਨ ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਨ ਸਙ੍ਘਸ੍ਸ ਅਵਣ੍ਣਂ ਭਾਸਤਿ. ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤਂ ਉਕ੍ਕੁਜ੍ਜਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਉਕ੍ਕੁਜ੍ਜਿਤਬ੍ਬੋ. ਤੇਨ, ਭਿਕ੍ਖਵੇ, ਵਡ੍ਢੇਨ ਲਿਚ੍ਛਵਿਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਸਙ੍ਘੇਨ ਮੇ, ਭਨ੍ਤੇ, ਪਤ੍ਤੋ ਨਿਕ੍ਕੁਜ੍ਜਿਤੋ, ਅਸਮ੍ਭੋਗੋਮ੍ਹਿ ਸਙ੍ਘੇਨ. ਸੋਹਂ, ਭਨ੍ਤੇ, ਸਮ੍ਮਾ ਵਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ ਵਤ੍ਤਾਮਿ, ਸਙ੍ਘਂ ਪਤ੍ਤੁਕ੍ਕੁਜ੍ਜਨਂ ਯਾਚਾਮੀ’ਤਿ. ਦੁਤਿਯਮ੍ਪਿ ਯਾਚਿਤਬ੍ਬੋ. ਤਤਿਯਮ੍ਪਿ ਯਾਚਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
੨੬੭. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤੋ ਨਿਕ੍ਕੁਜ੍ਜਿਤੋ, ਅਸਮ੍ਭੋਗੋ ਸਙ੍ਘੇਨ. ਸੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਸਙ੍ਘਂ ਪਤ੍ਤੁਕ੍ਕੁਜ੍ਜਨਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਉਕ੍ਕੁਜ੍ਜੇਯ੍ਯ, ਸਮ੍ਭੋਗਂ ਸਙ੍ਘੇਨ ਕਰੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤੋ ਨਿਕ੍ਕੁਜ੍ਜਿਤੋ, ਅਸਮ੍ਭੋਗੋ ਸਙ੍ਘੇਨ. ਸੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਸਙ੍ਘਂ ਪਤ੍ਤੁਕ੍ਕੁਜ੍ਜਨਂ ਯਾਚਤਿ. ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਉਕ੍ਕੁਜ੍ਜਤਿ, ਸਮ੍ਭੋਗਂ ਸਙ੍ਘੇਨ ਕਰੋਤਿ. ਯਸ੍ਸਾਯਸ੍ਮਤੋ ਖਮਤਿ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਸ੍ਸ ਉਕ੍ਕੁਜ੍ਜਨਾ, ਸਮ੍ਭੋਗਂ ਸਙ੍ਘੇਨ ਕਰਣਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਉਕ੍ਕੁਜ੍ਜਿਤੋ ਸਙ੍ਘੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤੋ, ਸਮ੍ਭੋਗੋ ਸਙ੍ਘੇਨ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
੨੬੮. ਅਥ ਖੋ ਭਗਵਾ ਵੇਸਾਲਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਭਗ੍ਗਾ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਭਗ੍ਗਾ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਭਗ੍ਗੇਸੁ ਵਿਹਰਤਿ ਸੁਸੁਮਾਰਗਿਰੇ [ਸੁਂਸੁਮਾਰਗਿਰੇ (ਸੀ. ਸ੍ਯਾ.), ਸਂਸੁਮਾਰਗਿਰੇ (ਕ.)] ਭੇਸਕਲ਼ਾਵਨੇ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਬੋਧਿਸ੍ਸ ਰਾਜਕੁਮਾਰਸ੍ਸ ਕੋਕਨਦੋ [ਕੋਕਨੁਦੋ (ਕ.)] ਨਾਮ ਪਾਸਾਦੋ ਅਚਿਰਕਾਰਿਤੋ ਹੋਤਿ, ਅਨਜ੍ਝਾਵੁਤ੍ਥੋ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਕੇਨਚਿ ਵਾ ਮਨੁਸ੍ਸਭੂਤੇਨ. ਅਥ ਖੋ ਬੋਧਿ ਰਾਜਕੁਮਾਰੋ ਸਞ੍ਜਿਕਾਪੁਤ੍ਤਂ ਮਾਣਵਂ ਆਮਨ੍ਤੇਸਿ – ‘‘ਏਹਿ ਤ੍ਵਂ, ਸਮ੍ਮ ਸਞ੍ਚਿਕਾਪੁਤ੍ਤ, ਯੇਨ ਭਗਵਾ ਤੇਨੁਪਸਙ੍ਕਮ, ਉਪਸਙ੍ਕਮਿਤ੍ਵਾ ਮਮ ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦ; ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛ – ‘ਬੋਧਿ, ਭਨ੍ਤੇ, ਰਾਜਕੁਮਾਰੋ ਭਗਵਤੋ ਪਾਦੇ ਸਿਰਸਾ ਵਨ੍ਦਤਿ, ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛਤੀ’ਤਿ. ਏਵਞ੍ਚ ਵਦੇਹਿ – ‘ਅਧਿਵਾਸੇਤੁ ਕਿਰ, ਭਨ੍ਤੇ, ਭਗਵਾ ਬੋਧਿਸ੍ਸ ਰਾਜਕੁਮਾਰਸ੍ਸ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’’ਤਿ. ‘‘ਏਵਂ ਭੋ’’ਤਿ ਖੋ ਸਞ੍ਚਿਕਾਪੁਤ੍ਤੋ ਮਾਣਵੋ ਬੋਧਿਸ੍ਸ ਰਾਜਕੁਮਾਰਸ੍ਸ ਪਟਿਸ੍ਸੁਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸਞ੍ਚਿਕਾਪੁਤ੍ਤੋ ਮਾਣਵੋ ਭਗਵਨ੍ਤਂ ਏਤਦਵੋਚ – ‘‘ਬੋਧਿ ਖੋ ਰਾਜਕੁਮਾਰੋ ਭੋਤੋ ਗੋਤਮਸ੍ਸ ਪਾਦੇ ਸਿਰਸਾ ਵਨ੍ਦਤਿ, ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛਤਿ. ਏਵਞ੍ਚ ਵਦੇਤਿ – ‘ਅਧਿਵਾਸੇਤੁ ਕਿਰ ਭਵਂ ਗੋਤਮੋ ਬੋਧਿਸ੍ਸ ਰਾਜਕੁਮਾਰਸ੍ਸ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਸਞ੍ਚਿਕਾਪੁਤ੍ਤੋ ਮਾਣਵੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਯੇਨ ਬੋਧਿ ਰਾਜਕੁਮਾਰੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਬੋਧਿਂ ਰਾਜਕੁਮਾਰਂ ਏਤਦਵੋਚ – ‘‘ਅਵੋਚੁਮ੍ਹ ਖੋ ਮਯਂ ਭੋਤੋ ਵਚਨੇਨ ਤਂ ਭਵਨ੍ਤਂ ਗੋਤਮਂ – ‘ਬੋਧਿ ਖੋ ਰਾਜਕੁਮਾਰੋ ਭੋਤੋ ਗੋਤਮਸ੍ਸ ਪਾਦੇ ਸਿਰਸਾ ਵਨ੍ਦਤਿ, ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛਤਿ. ਏਵਞ੍ਚ ਵਦੇਤਿ – ਅਧਿਵਾਸੇਤੁ ਕਿਰ ਭਵਂ ਗੋਤਮੋ ਬੋਧਿਸ੍ਸ ਰਾਜਕੁਮਾਰਸ੍ਸ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’ਤਿ. ਅਧਿਵੁਤ੍ਥਞ੍ਚ ਪਨ ਸਮਣੇਨ ਗੋਤਮੇਨਾ’’ਤਿ.
ਅਥ ਖੋ ਬੋਧਿ ਰਾਜਕੁਮਾਰੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ, ਕੋਕਨਦਞ੍ਚ ਪਾਸਾਦਂ ਓਦਾਤੇਹਿ ਦੁਸ੍ਸੇਹਿ ਸਨ੍ਥਰਾਪੇਤ੍ਵਾ ਯਾਵ ਪਚ੍ਛਿਮਸੋਪਾਨਕਲ਼ੇਵਰਾ, ਸਞ੍ਚਿਕਾਪੁਤ੍ਤਂ ਮਾਣਵਂ ਆਮਨ੍ਤੇਸਿ – ‘‘ਏਹਿ ਤ੍ਵਂ, ਸਮ੍ਮ ਸਞ੍ਚਿਕਾਪੁਤ੍ਤ, ਯੇਨ ਭਗਵਾ ਤੇਨੁਪਸਙ੍ਕਮ, ਉਪਸਙ੍ਕਮਿਤ੍ਵਾ ਭਗਵਤੋ ਕਾਲਂ ਆਰੋਚੇਹਿ – ‘ਕਾਲੋ, ਭਨ੍ਤੇ ਨਿਟ੍ਠਿਤਂ ਭਤ੍ਤ’’’ਨ੍ਤਿ. ‘‘ਏਵਂ ਭੋ’’ਤਿ ਖੋ ਸਞ੍ਚਿਕਾਪੁਤ੍ਤੋ ਮਾਣਵੋ ਬੋਧਿਸ੍ਸ ਰਾਜਕੁਮਾਰਸ੍ਸ ਪਟਿਸ੍ਸੁਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਤੋ ਕਾਲਂ ਆਰੋਚੇਸਿ – ‘‘ਕਾਲੋ, ਭੋ ਗੋਤਮ, ਨਿਟ੍ਠਿਤਂ ਭਤ੍ਤ’’ਨ੍ਤਿ.
ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਬੋਧਿਸ੍ਸ ਰਾਜਕੁਮਾਰਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ. ਤੇਨ ਖੋ ਪਨ ਸਮਯੇਨ ਬੋਧਿ ਰਾਜਕੁਮਾਰੋ ਬਹਿਦ੍ਵਾਰਕੋਟ੍ਠਕੇ ਠਿਤੋ ਹੋਤਿ, ਭਗਵਨ੍ਤਂ ਆਗਮਯਮਾਨੋ. ਅਦ੍ਦਸਾ ਖੋ ਬੋਧਿ ਰਾਜਕੁਮਾਰੋ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਤਤੋ ਪਚ੍ਚੁਗ੍ਗਨ੍ਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪੁਰੇਕ੍ਖਤ੍ਵਾ ਯੇਨ ਕੋਕਨਦੋ ਪਾਸਾਦੋ ਤੇਨੁਪਸਙ੍ਕਮਿ. ਅਥ ਖੋ ਭਗਵਾ ਪਚ੍ਛਿਮਸੋਪਾਨਕਲ਼ੇਵਰਂ ਨਿਸ੍ਸਾਯ ਅਟ੍ਠਾਸਿ. ਅਥ ਖੋ ਬੋਧਿ ਰਾਜਕੁਮਾਰੋ ਭਗਵਨ੍ਤਂ ਏਤਦਵੋਚ – ‘‘ਅਕ੍ਕਮਤੁ, ਭਨ੍ਤੇ, ਭਗਵਾ ਦੁਸ੍ਸਾਨਿ, ਅਕ੍ਕਮਤੁ ਸੁਗਤੋ ਦੁਸ੍ਸਾਨਿ, ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਏਵਂ ਵੁਤ੍ਤੇ ਭਗਵਾ ਤੁਣ੍ਹੀ ਅਹੋਸਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਬੋਧਿ ਰਾਜਕੁਮਾਰੋ ਭਗਵਨ੍ਤਂ ਏਤਦਵੋਚ – ‘‘ਅਕ੍ਕਮਤੁ, ਭਨ੍ਤੇ, ਭਗਵਾ ਦੁਸ੍ਸਾਨਿ, ਅਕ੍ਕਮਤੁ ਸੁਗਤੋ ਦੁਸ੍ਸਾਨਿ, ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਅਪਲੋਕੇਸਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਬੋਧਿਂ ਰਾਜਕੁਮਾਰਂ ਏਤਦਵੋਚ – ‘‘ਸਂਹਰਨ੍ਤੁ, ਰਾਜਕੁਮਾਰ, ਦੁਸ੍ਸਾਨਿ. ਨ ਭਗਵਾ ਚੇਲਪਟਿਕਂ [ਚੇਲਪਤ੍ਤਿਕਂ (ਸੀ.)] ਅਕ੍ਕਮਿਸ੍ਸਤਿ ਪਚ੍ਛਿਮਂ ਜਨਤਂ ਤਥਾਗਤੋ ਅਨੁਕਮ੍ਪਤੀ’’ਤਿ.
ਅਥ ਖੋ ਬੋਧਿ ਰਾਜਕੁਮਾਰੋ ਦੁਸ੍ਸਾਨਿ ਸਂਹਰਾਪੇਤ੍ਵਾ ਉਪਰਿਕੋਕਨਦੇ ਪਾਸਾਦੇ ਆਸਨਂ ਪਞ੍ਞਪੇਸਿ. ਅਥ ਖੋ ਭਗਵਾ ਕੋਕਨਦਂ ਪਾਸਾਦਂ ਅਭਿਰੁਹਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਬੋਧਿ ਰਾਜਕੁਮਾਰੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ, ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ, ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਬੋਧਿਂ ਰਾਜਕੁਮਾਰਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਚੇਲਪਟਿਕਾ ਅਕ੍ਕਮਿਤਬ੍ਬਾ. ਯੋ ਅਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਅਪਗਤਗਬ੍ਭਾ ਭਿਕ੍ਖੂ ਨਿਮਨ੍ਤੇਤ੍ਵਾ ਦੁਸ੍ਸਂ ਪਞ੍ਞਪੇਤ੍ਵਾ ਏਤਦਵੋਚ – ‘‘ਅਕ੍ਕਮਥ, ਭਨ੍ਤੇ, ਦੁਸ੍ਸ’’ਨ੍ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਅਕ੍ਕਮਨ੍ਤਿ. ‘‘ਅਕ੍ਕਮਥ, ਭਨ੍ਤੇ, ਦੁਸ੍ਸਂ ਮਙ੍ਗਲਤ੍ਥਾਯਾ’’ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਅਕ੍ਕਮਿਂਸੁ. ਅਥ ਖੋ ਸਾ ਇਤ੍ਥੀ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਮਙ੍ਗਲਤ੍ਥਾਯ ਯਾਚਿਯਮਾਨਾ ਚੇਲਪ੍ਪਟਿਕਂ ਨ ਅਕ੍ਕਮਿਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸਾ ਇਤ੍ਥਿਯਾ ਉਜ੍ਝਾਯਨ੍ਤਿਯਾ ਖਿਯ੍ਯਨ੍ਤਿਯਾ ਵਿਪਾਚੇਨ੍ਤਿਯਾ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਗਿਹੀ, ਭਿਕ੍ਖਵੇ, ਮਙ੍ਗਲਿਕਾ. ਅਨੁਜਾਨਾਮਿ, ਭਿਕ੍ਖਵੇ, ਗਿਹੀਨਂ ਮਙ੍ਗਲਤ੍ਥਾਯ ਯਾਚਿਯਮਾਨੇਨ ਚੇਲਪ੍ਪਟਿਕਂ ਅਕ੍ਕਮਿਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਧੋਤਪਾਦਕਂ ਅਕ੍ਕਮਿਤੁਂ ਕੁਕ੍ਕੁਚ੍ਚਾਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਧੋਤਪਾਦਕਂ ਅਕ੍ਕਮਿਤੁ’’ਨ੍ਤਿ.
ਦੁਤਿਯਭਾਣਵਾਰੋ ਨਿਟ੍ਠਿਤੋ.
੨੬੯. ਅਥ ਖੋ ਭਗਵਾ ਭਗ੍ਗੇਸੁ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾਵਤ੍ਥਿ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਘਟਕਞ੍ਚ ਕਤਕਞ੍ਚ ਸਮ੍ਮਜ੍ਜਨਿਞ੍ਚ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਵਿਸਾਖਾ ਮਿਗਾਰਮਾਤਾ ਭਗਵਨ੍ਤਂ ਏਤਦਵੋਚ – ‘‘ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਘਟਕਞ੍ਚ ਕਤਕਞ੍ਚ ਸਮ੍ਮਜ੍ਜਨਿਞ੍ਚ, ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਪਟਿਗ੍ਗਹੇਸਿ ਭਗਵਾ ਘਟਕਞ੍ਚ ਸਮ੍ਮਜ੍ਜਨਿਞ੍ਚ. ਨ ਭਗਵਾ ਕਤਕਂ ਪਟਿਗ੍ਗਹੇਸਿ. ਅਥ ਖੋ ਭਗਵਾ ਵਿਸਾਖਂ ਮਿਗਾਰਮਾਤਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.
ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਘਟਕਞ੍ਚ ਸਮ੍ਮਜ੍ਜਨਿਞ੍ਚ. ਨ, ਭਿਕ੍ਖਵੇ, ਕਤਕਂ ਪਰਿਭੁਞ੍ਜਿਤਬ੍ਬਂ. ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਪਾਦਘਂਸਨਿਯੋ – ਸਕ੍ਖਰਂ, ਕਥਲਂ, ਸਮੁਦ੍ਦਫੇਣਕ’’ਨ੍ਤਿ.
ਅਥ ਖੋ ਵਿਸਾਖਾ ਮਿਗਾਰਮਾਤਾ ਵਿਧੂਪਨਞ੍ਚ ਤਾਲਵਣ੍ਟਞ੍ਚ [ਤਾਲਵਣ੍ਡਞ੍ਚ (ਕ.)] ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਵਿਸਾਖਾ ਮਿਗਾਰਮਾਤਾ ਭਗਵਨ੍ਤਂ ਏਤਦਵੋਚ – ‘‘ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਵਿਧੂਪਨਞ੍ਚ ਤਾਲਵਣ੍ਟਞ੍ਚ, ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਪਟਿਗ੍ਗਹੇਸਿ ਭਗਵਾ ਵਿਧੂਪਨਞ੍ਚ ਤਾਲਵਣ੍ਟਞ੍ਚ.
ਅਥ ਖੋ ਭਗਵਾ ਵਿਸਾਖਂ ਮਿਗਾਰਮਾਤਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ…ਪੇ… ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਿਧੂਪਨਞ੍ਚ ਤਾਲਵਣ੍ਟਞ੍ਚਾ’’ਤਿ.
ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਮਕਸਬੀਜਨੀ ਉਪ੍ਪਨ੍ਨਾ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਕਸਬੀਜਨਿ’’ਨ੍ਤਿ. ਚਾਮਰਿਬੀਜਨੀ ਉਪ੍ਪਨ੍ਨਾ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਨ, ਭਿਕ੍ਖਵੇ, ਚਾਮਰਿਬੀਜਨੀ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਬੀਜਨਿਯੋ – ਵਾਕਮਯਂ, ਉਸੀਰਮਯਂ, ਮੋਰਪਿਞ੍ਛਮਯ’’ਨ੍ਤਿ.
੨੭੦. ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਛਤ੍ਤਂ ਉਪ੍ਪਨ੍ਨਂ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਛਤ੍ਤ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਛਤ੍ਤਪ੍ਪਗ੍ਗਹਿਤਾ [ਛਤ੍ਤਂ ਪਗ੍ਗਹੇਤ੍ਵਾ (ਕ.)] ਆਹਿਣ੍ਡਨ੍ਤਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਉਪਾਸਕੋ ਸਮ੍ਬਹੁਲੇਹਿ ਆਜੀਵਕਸਾਵਕੇਹਿ ਸਦ੍ਧਿਂ ਉਯ੍ਯਾਨਂ ਅਗਮਾਸਿ. ਅਦ੍ਦਸਾਸੁਂ ਖੋ ਤੇ ਆਜੀਵਕਸਾਵਕਾ ਛਬ੍ਬਗ੍ਗਿਯੇ ਭਿਕ੍ਖੂ ਦੂਰਤੋਵ ਛਤ੍ਤਪ੍ਪਗ੍ਗਹਿਤੇ ਆਗਚ੍ਛਨ੍ਤੇ. ਦਿਸ੍ਵਾਨ ਤਂ ਉਪਾਸਕਂ ਏਤਦਵੋਚੁਂ – ‘‘ਏਤੇ ਖੋ, ਅਯ੍ਯਾ [ਅਯ੍ਯੋ (ਕ.)], ਤੁਮ੍ਹਾਕਂ ਭਦਨ੍ਤਾ ਛਤ੍ਤਪ੍ਪਗ੍ਗਹਿਤਾ ਆਗਚ੍ਛਨ੍ਤਿ, ਸੇਯ੍ਯਥਾਪਿ ਗਣਕਮਹਾਮਤ੍ਤਾ’’ਤਿ. ‘‘ਨਾਯ੍ਯਾ ਏਤੇ ਭਿਕ੍ਖੂ, ਪਰਿਬ੍ਬਾਜਕਾ’’ਤਿ. ‘ਭਿਕ੍ਖੂ ਨ ਭਿਕ੍ਖੂ’ਤਿ ਅਬ੍ਭੁਤਂ ਅਕਂਸੁ. ਅਥ ਖੋ ਸੋ ਉਪਾਸਕੋ ਉਪਗਤੇ ਸਞ੍ਜਾਨਿਤ੍ਵਾ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ ਛਤ੍ਤਪ੍ਪਗ੍ਗਹਿਤਾ ਆਹਿਣ੍ਡਿਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਉਪਾਸਕਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਛਤ੍ਤਂ ਧਾਰੇਤਬ੍ਬਂ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਤਸ੍ਸ ਭਿਕ੍ਖੁਨੋ ਵਿਨਾ ਛਤ੍ਤਂ ਨ ਫਾਸੁ ਹੋਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਛਤ੍ਤਂ ਧਾਰੇਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ਗਿਲਾਨਸ੍ਸੇਵ ਭਗਵਤਾ ਛਤ੍ਤਂ ਅਨੁਞ੍ਞਾਤਂ ਨੋ ਅਗਿਲਾਨਸ੍ਸਾਤਿ – ਆਰਾਮੇ ਆਰਾਮੂਪਚਾਰੇ ਛਤ੍ਤਂ ਧਾਰੇਤੁਂ ਕੁਕ੍ਕੁਚ੍ਚਾਯਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਗਿਲਾਨੇਨਪਿ ਆਰਾਮੇ ਆਰਾਮੂਪਚਾਰੇ ਛਤ੍ਤਂ ਧਾਰੇਤੁ’’ਨ੍ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਿਕ੍ਕਾਯ ਪਤ੍ਤਂ ਉਟ੍ਟਿਤ੍ਵਾ ਦਣ੍ਡੇ ਆਲਗ੍ਗਿਤ੍ਵਾ ਵਿਕਾਲੇ ਅਞ੍ਞਤਰੇਨ ਗਾਮਦ੍ਵਾਰੇਨ ਅਤਿਕ੍ਕਮਤਿ. ਮਨੁਸ੍ਸਾ – ‘ਏਸਯ੍ਯੋ ਚੋਰੋ ਗਚ੍ਛਤਿ, ਅਸਿਸ੍ਸ ਵਿਜ੍ਜੋਤਲਤੀ’ਤਿ ਅਨੁਪਤਿਤ੍ਵਾ ਗਹੇਤ੍ਵਾ ਸਞ੍ਜਾਨਿਤ੍ਵਾ ਮੁਞ੍ਚਿਂਸੁ. ਅਥ ਖੋ ਸੋ ਭਿਕ੍ਖੁ ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ‘‘ਕਿਂ ਪਨ ਤ੍ਵਂ, ਆਵੁਸੋ, ਦਣ੍ਡਸਿਕ੍ਕਂ ਧਾਰੇਸੀ’’ਤਿ? ‘‘ਏਵਮਾਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁ ਦਣ੍ਡਸਿਕ੍ਕਂ ਧਾਰੇਸ੍ਸਸੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਭਗਵਾ’’ਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਦਣ੍ਡਸਿਕ੍ਕਾ ਧਾਰੇਤਬ੍ਬਾ. ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ, ਨ ਸਕ੍ਕੋਤਿ ਵਿਨਾ ਦਣ੍ਡੇਨ ਆਹਿਣ੍ਡਿਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਭਿਕ੍ਖੁਨੋ ਦਣ੍ਡਸਮ੍ਮੁਤਿਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬਾ. ਤੇਨ ਗਿਲਾਨੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ, ਭਨ੍ਤੇ, ਗਿਲਾਨੋ; ਨ ਸਕ੍ਕੋਮਿ ਵਿਨਾ ਦਣ੍ਡੇਨ ਆਹਿਣ੍ਡਿਤੁਂ. ਸੋਹਂ, ਭਨ੍ਤੇ, ਸਙ੍ਘਂ ਦਣ੍ਡਸਮ੍ਮੁਤਿਂ ਯਾਚਾਮੀ’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਗਿਲਾਨੋ, ਨ ਸਕ੍ਕੋਤਿ ਵਿਨਾ ਦਣ੍ਡੇਨ ਆਹਿਣ੍ਡਿਤੁਂ. ਸੋ ਸਙ੍ਘਂ ਦਣ੍ਡਸਮ੍ਮੁਤਿਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਣ੍ਡਸਮ੍ਮੁਤਿਂ ਦਦੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਗਿਲਾਨੋ, ਨ ਸਕ੍ਕੋਤਿ ਵਿਨਾ ਦਣ੍ਡੇਨ ਆਹਿਣ੍ਡਿਤੁਂ. ਸੋ ਸਙ੍ਘਂ ਦਣ੍ਡਸਮ੍ਮੁਤਿਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਣ੍ਡਸਮ੍ਮੁਤਿਂ ਦੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਣ੍ਡਸਮ੍ਮੁਤਿਯਾ ਦਾਨਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਦਿਨ੍ਨਾ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਣ੍ਡਸਮ੍ਮੁਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
੨੭੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ, ਨ ਸਕ੍ਕੋਤਿ ਵਿਨਾ ਸਿਕ੍ਕਾਯ ਪਤ੍ਤਂ ਪਰਿਹਰਿਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਭਿਕ੍ਖੁਨੋ ਸਿਕ੍ਕਾਸਮ੍ਮੁਤਿਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬਾ. ਤੇਨ ਗਿਲਾਨੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ, ਭਨ੍ਤੇ, ਗਿਲਾਨੋ; ਨ ਸਕ੍ਕੋਮਿ ਵਿਨਾ ਸਿਕ੍ਕਾਯ ਪਤ੍ਤਂ ਪਰਿਹਰਿਤੁਂ. ਸੋਹਂ, ਭਨ੍ਤੇ, ਸਙ੍ਘਂ ਸਿਕ੍ਕਾਸਮ੍ਮੁਤਿਂ ਯਾਚਾਮੀ’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਗਿਲਾਨੋ, ਨ ਸਕ੍ਕੋਤਿ ਵਿਨਾ ਸਿਕ੍ਕਾਯ ਪਤ੍ਤਂ ਪਰਿਹਰਿਤੁਂ. ਸੋ ਸਙ੍ਘਂ ਸਿਕ੍ਕਾਸਮ੍ਮੁਤਿਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸਿਕ੍ਕਾਸਮ੍ਮੁਤਿਂ ਦਦੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਗਿਲਾਨੋ, ਨ ਸਕ੍ਕੋਤਿ ਵਿਨਾ ਸਿਕ੍ਕਾਯ ਪਤ੍ਤਂ ਪਰਿਹਰਿਤੁਂ. ਸੋ ਸਙ੍ਘਂ ਸਿਕ੍ਕਾਸਮ੍ਮੁਤਿਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸਿਕ੍ਕਾਸਮ੍ਮੁਤਿਂ ਦੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸਿਕ੍ਕਾਸਮ੍ਮੁਤਿਯਾ ਦਾਨਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਦਿਨ੍ਨਾ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਸਿਕ੍ਕਾਸਮ੍ਮੁਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
੨੭੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ, ਨ ਸਕ੍ਕੋਤਿ ਵਿਨਾ ਦਣ੍ਡੇਨ ਆਹਿਣ੍ਡਿਤੁਂ, ਨ ਸਕ੍ਕੋਤਿ ਵਿਨਾ ਸਿਕ੍ਕਾਯ ਪਤ੍ਤਂ ਪਰਿਹਰਿਤੁਂ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਭਿਕ੍ਖੁਨੋ ਦਣ੍ਡਸਿਕ੍ਕਾਸਮ੍ਮੁਤਿਂ ਦਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬਾ. ਤੇਨ ਗਿਲਾਨੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਹਂ, ਭਨ੍ਤੇ, ਗਿਲਾਨੋ; ਨ ਸਕ੍ਕੋਮਿ ਵਿਨਾ ਦਣ੍ਡੇਨ ਆਹਿਣ੍ਡਿਤੁਂ; ਨ ਸਕ੍ਕੋਮਿ ਵਿਨਾ ਸਿਕ੍ਕਾਯ ਪਤ੍ਤਂ ਪਰਿਹਰਿਤੁਂ. ਸੋਹਂ, ਭਨ੍ਤੇ, ਸਙ੍ਘਂ ਦਣ੍ਡਸਿਕ੍ਕਾਸਮ੍ਮੁਤਿਂ ਯਾਚਾਮੀ’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਗਿਲਾਨੋ, ਨ ਸਕ੍ਕੋਤਿ ਵਿਨਾ ਦਣ੍ਡੇਨ ਆਹਿਣ੍ਡਿਤੁਂ, ਨ ਸਕ੍ਕੋਤਿ ਵਿਨਾ ਸਿਕ੍ਕਾਯ ਪਤ੍ਤਂ ਪਰਿਹਰਿਤੁਂ. ਸੋ ਸਙ੍ਘਂ ਦਣ੍ਡਸਿਕ੍ਕਾਸਮ੍ਮੁਤਿਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਣ੍ਡਸਿਕ੍ਕਾਸਮ੍ਮੁਤਿਂ ਦਦੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਗਿਲਾਨੋ ਨ ਸਕ੍ਕੋਤਿ ਵਿਨਾ ਦਣ੍ਡੇਨ ਆਹਿਣ੍ਡਿਤੁਂ, ਨ ਸਕ੍ਕੋਤਿ ਵਿਨਾ ਸਿਕ੍ਕਾਯ ਪਤ੍ਤਂ ਪਰਿਹਰਿਤੁਂ. ਸੋ ਸਙ੍ਘਂ ਦਣ੍ਡਸਿਕ੍ਕਾਸਮ੍ਮੁਤਿਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਣ੍ਡਸਿਕ੍ਕਾਸਮ੍ਮੁਤਿਂ ਦੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਣ੍ਡਸਿਕ੍ਕਾਸਮ੍ਮੁਤਿਯਾ ਦਾਨਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਦਿਨ੍ਨਾ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਣ੍ਡਸਿਕ੍ਕਾਸਮ੍ਮੁਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.