੩. ਚਤ੍ਤਾਲੀਸਕਂ

੧੬੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪਰਿਵਸਨ੍ਤੋ ਵਿਬ੍ਭਮਿ. ਸੋ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੂ ਉਪਸਮ੍ਪਦਂ ਯਾਚਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਰਿਵਸਨ੍ਤੋ ਵਿਬ੍ਭਮਤਿ. ਵਿਬ੍ਭਨ੍ਤਕਸ੍ਸ, ਭਿਕ੍ਖਵੇ, ਪਰਿਵਾਸੋ ਨ ਰੁਹਤਿ. ਸੋ ਚੇ ਪੁਨ ਉਪਸਮ੍ਪਜ੍ਜਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ, ਅਵਸੇਸੋ ਪਰਿਵਸਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਰਿਵਸਨ੍ਤੋ ਸਾਮਣੇਰੋ ਹੋਤਿ. ਸਾਮਣੇਰਸ੍ਸ, ਭਿਕ੍ਖਵੇ, ਪਰਿਵਾਸੋ ਨ ਰੁਹਤਿ. ਸੋ ਚੇ ਪੁਨ ਉਪਸਮ੍ਪਜ੍ਜਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ, ਅਵਸੇਸੋ ਪਰਿਵਸਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਰਿਵਸਨ੍ਤੋ ਉਮ੍ਮਤ੍ਤਕੋ ਹੋਤਿ. ਉਮ੍ਮਤ੍ਤਕਸ੍ਸ, ਭਿਕ੍ਖਵੇ, ਪਰਿਵਾਸੋ ਨ ਰੁਹਤਿ. ਸੋ ਚੇ ਪੁਨ ਅਨੁਮ੍ਮਤ੍ਤਕੋ ਹੋਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ, ਅਵਸੇਸੋ ਪਰਿਵਸਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਰਿਵਸਨ੍ਤੋ ਖਿਤ੍ਤਚਿਤ੍ਤੋ ਹੋਤਿ. ਖਿਤ੍ਤਚਿਤ੍ਤਸ੍ਸ, ਭਿਕ੍ਖਵੇ, ਪਰਿਵਾਸੋ ਨ ਰੁਹਤਿ. ਸੋ ਚੇ ਪੁਨ ਅਖਿਤ੍ਤਚਿਤ੍ਤੋ ਹੋਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪੁਰਿਵੁਤ੍ਥੋ ਸੁਪਰਿਵੁਤ੍ਥੋ, ਅਵਸੇਸੋ ਪਰਿਵਸਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਰਿਵਸਨ੍ਤੋ ਵੇਦਨਾਟ੍ਟੋ ਹੋਤਿ. ਵੇਦਨਾਟ੍ਟਸ੍ਸ, ਭਿਕ੍ਖਵੇ, ਪਰਿਵਾਸੋ ਨ ਰੁਹਤਿ. ਸੋ ਚੇ ਪੁਨ ਅਵੇਦਨਾਟ੍ਟੋ ਹੋਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ, ਅਵਸੇਸੋ ਪਰਿਵਸਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਰਿਵਸਨ੍ਤੋ, ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖਿਪਿਯ੍ਯਤਿ [ਉਕ੍ਖਿਪਿਯਤਿ (ਸ੍ਯਾ.), ਉਕ੍ਖਿਪੀਯਤਿ (ਕ.)]. ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ, ਪਰਿਵਾਸੋ ਨ ਰੁਹਤਿ. ਸੋ ਚੇ ਪੁਨ ਓਸਾਰਿਯ੍ਯਤਿ [ਓਸਾਰਿਯਤਿ (ਸ੍ਯਾ.), ਓਸਾਰੀਯਤਿ (ਕ.)], ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ, ਅਵਸੇਸੋ ਪਰਿਵਸਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਰਿਵਸਨ੍ਤੋ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ, ਉਕ੍ਖਿਪਿਯ੍ਯਤਿ. ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ, ਪਰਿਵਾਸੋ ਨ ਰੁਹਤਿ. ਸੋ ਚੇ ਪੁਨ ਓਸਾਰਿਯ੍ਯਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ, ਅਵਸੇਸੋ ਪਰਿਵਸਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਪਰਿਵਸਨ੍ਤੋ, ਪਾਪਿਕਾਯ ਦਿਟ੍ਠਿਯਾ, ਅਪ੍ਪਟਿਨਿਸ੍ਸਗ੍ਗੇ, ਉਕ੍ਖਿਪਿਯ੍ਯਤਿ. ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ, ਪਰਿਵਾਸੋ ਨ ਰੁਹਤਿ. ਸੋ ਚੇ ਪੁਨ ਓਸਾਰਿਯ੍ਯਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ, ਅਵਸੇਸੋ ਪਰਿਵਸਿਤਬ੍ਬੋ.

੧੬੧. ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਮੂਲਾਯਪਟਿਕਸ੍ਸਨਾਰਹੋ ਵਿਬ੍ਭਮਤਿ. ਵਿਬ੍ਭਨ੍ਤਕਸ੍ਸ, ਭਿਕ੍ਖਵੇ, ਮੂਲਾਯਪਟਿਕਸ੍ਸਨਾ ਨ ਰੁਹਤਿ. ਸੋ ਚੇ ਪੁਨ ਉਪਸਮ੍ਪਜ੍ਜਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ. ਸੋ ਭਿਕ੍ਖੁ ਮੂਲਾਯ ਪਟਿਕਸ੍ਸਿਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਮੂਲਾਯਪਟਿਕਸ੍ਸਨਾਰਹੋ ਸਾਮਣੇਰੋ ਹੋਤਿ…ਪੇ… ਉਮ੍ਮਤ੍ਤਕੋ ਹੋਤਿ…ਪੇ… ਖਿਤ੍ਤਚਿਤ੍ਤੋ ਹੋਤਿ…ਪੇ… ਵੇਦਨਾਟ੍ਟੋ ਹੋਤਿ…ਪੇ… ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਯ੍ਯਤਿ…ਪੇ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਪਿਯ੍ਯਤਿ…ਪੇ… ਪਾਪਿਕਾਯ ਦਿਟ੍ਠਿਯਾ, ਅਪ੍ਪਟਿਨਿਸ੍ਸਗ੍ਗੇ, ਉਕ੍ਖਿਪਿਯ੍ਯਤਿ. ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ, ਮੂਲਾਯਪਟਿਕਸ੍ਸਨਾ ਨ ਰੁਹਤਿ. ਸੋ ਚੇ ਪੁਨ ਓਸਾਰਿਯ੍ਯਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ. ਸੋ ਭਿਕ੍ਖੁ ਮੂਲਾਯ ਪਟਿਕਸ੍ਸਿਤਬ੍ਬੋ.

੧੬੨. ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਮਾਨਤ੍ਤਾਰਹੋ ਵਿਬ੍ਭਮਤਿ. ਵਿਬ੍ਭਨ੍ਤਕਸ੍ਸ, ਭਿਕ੍ਖਵੇ, ਮਾਨਤ੍ਤਦਾਨਂ ਨ ਰੁਹਤਿ. ਸੋ ਚੇ ਪੁਨ ਉਪਸਮ੍ਪਜ੍ਜਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ. ਤਸ੍ਸ ਭਿਕ੍ਖੁਨੋ ਮਾਨਤ੍ਤਂ ਦਾਤਬ੍ਬਂ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਮਾਨਤ੍ਤਾਰਹੋ ਸਾਮਣੇਰੋ ਹੋਤਿ…ਪੇ… ਉਮ੍ਮਤ੍ਤਕੋ ਹੋਤਿ…ਪੇ… ਖਿਤ੍ਤਚਿਤ੍ਤੋ ਹੋਤਿ…ਪੇ… ਵੇਦਨਾਟ੍ਟੋ ਹੋਤਿ…ਪੇ… ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖਿਪਿਯ੍ਯਤਿ…ਪੇ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ, ਉਕ੍ਖਿਪਿਯ੍ਯਤਿ…ਪੇ… ਪਾਪਿਕਾਯ ਦਿਟ੍ਠਿਯਾ, ਅਪ੍ਪਟਿਨਿਸ੍ਸਗ੍ਗੇ, ਉਕ੍ਖਿਪਿਯ੍ਯਤਿ. ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ, ਮਾਨਤ੍ਤਦਾਨਂ ਨ ਰੁਹਤਿ. ਸੋ ਚੇ ਪੁਨ ਓਸਾਰਿਯ੍ਯਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ. ਤਸ੍ਸ ਭਿਕ੍ਖੁਨੋ ਮਾਨਤ੍ਤਂ ਦਾਤਬ੍ਬਂ.

੧੬੩. ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਮਾਨਤ੍ਤਂ ਚਰਨ੍ਤੋ ਵਿਬ੍ਭਮਤਿ. ਵਿਬ੍ਭਨ੍ਤਕਸ੍ਸ, ਭਿਕ੍ਖਵੇ, ਮਾਨਤ੍ਤਚਰਿਯਾ ਨ ਰੁਹਤਿ. ਸੋ ਚੇ ਪੁਨ ਉਪਸਮ੍ਪਜ੍ਜਤਿ ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ; ਯਂ ਮਾਨਤ੍ਤਂ ਦਿਨ੍ਨਂ ਸੁਦਿਨ੍ਨਂ, ਯਂ ਮਾਨਤ੍ਤਂ ਚਿਣ੍ਣਂ ਸੁਚਿਣ੍ਣਂ, ਅਵਸੇਸਂ ਚਰਿਤਬ੍ਬਂ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਮਾਨਤ੍ਤਂ ਚਰਨ੍ਤੋ ਸਾਮਣੇਰੋ ਹੋਤਿ…ਪੇ… ਉਮ੍ਮਤ੍ਤਕੋ ਹੋਤਿ…ਪੇ… ਖਿਤ੍ਤਚਿਤ੍ਤੋ ਹੋਤਿ…ਪੇ… ਵੇਦਨਾਟ੍ਟੋ ਹੋਤਿ…ਪੇ… ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖਿਪਿਯ੍ਯਤਿ…ਪੇ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ, ਉਕ੍ਖਿਪਿਯ੍ਯਤਿ…ਪੇ… ਪਾਪਿਕਾਯ ਦਿਟ੍ਠਿਯਾ, ਅਪ੍ਪਟਿਨਿਸ੍ਸਗ੍ਗੇ, ਉਕ੍ਖਿਪਿਯ੍ਯਤਿ. ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ, ਮਾਨਤ੍ਤਚਰਿਯਾ ਨ ਰੁਹਤਿ. ਸੋ ਚੇ ਪੁਨ ਓਸਾਰਿਯ੍ਯਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪੁਰਿਵੁਤ੍ਥੋ ਸੁਪਰਿਵੁਤ੍ਥੋ; ਯਂ ਮਾਨਤ੍ਤਂ ਦਿਨ੍ਨਂ ਸੁਦਿਨ੍ਨਂ, ਯਂ ਮਾਨਤ੍ਤਂ ਚਿਣ੍ਣਂ ਸੁਚਿਣ੍ਣਂ, ਅਵਸੇਸਂ ਚਰਿਤਬ੍ਬਂ.

੧੬੪. ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਅਬ੍ਭਾਨਾਰਹੋ ਵਿਬ੍ਭਮਤਿ. ਵਿਬ੍ਭਨ੍ਤਕਸ੍ਸ, ਭਿਕ੍ਖਵੇ, ਅਬ੍ਭਾਨਂ ਨ ਰੁਹਤਿ. ਸੋ ਚੇ ਪੁਨ ਉਪਸਮ੍ਪਜ੍ਜਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ; ਯਂ ਮਾਨਤ੍ਤਂ ਦਿਨ੍ਨਂ ਸੁਦਿਨ੍ਨਂ, ਯਂ ਮਾਨਤ੍ਤਂ ਚਿਣ੍ਣਂ ਸੁਚਿਣ੍ਣਂ. ਸੋ ਭਿਕ੍ਖੁ ਅਬ੍ਭੇਤਬ੍ਬੋ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਅਬ੍ਭਾਨਾਰਹੋ ਸਾਮਣੇਰੋ ਹੋਤਿ…ਪੇ… ਉਮ੍ਮਤ੍ਤਕੋ ਹੋਤਿ…ਪੇ…

ਖਿਤ੍ਤਚਿਤ੍ਤੋ ਹੋਤਿ…ਪੇ… ਵੇਦਨਾਟ੍ਟੋ ਹੋਤਿ…ਪੇ… ਆਪਤ੍ਤਿਯਾ ਅਦਸ੍ਸਨੇ, ਉਕ੍ਖਿਪਿਯ੍ਯਤਿ…ਪੇ… ਆਪਤ੍ਤਿਯਾ ਅਪ੍ਪਟਿਕਮ੍ਮੇ, ਉਕ੍ਖਿਪਿਯ੍ਯਤਿ…ਪੇ… ਪਾਪਿਕਾਯ ਦਿਟ੍ਠਿਯਾ, ਅਪ੍ਪਟਿਨਿਸ੍ਸਗ੍ਗੇ, ਉਕ੍ਖਿਪਿਯ੍ਯਤਿ. ਉਕ੍ਖਿਤ੍ਤਕਸ੍ਸ, ਭਿਕ੍ਖਵੇ, ਅਬ੍ਭਾਨਂ ਨ ਰੁਹਤਿ. ਸੋ ਚੇ ਪੁਨ ਓਸਾਰਿਯ੍ਯਤਿ, ਤਸ੍ਸ ਤਦੇਵ ਪੁਰਿਮਂ ਪਰਿਵਾਸਦਾਨਂ. ਯੋ ਪਰਿਵਾਸੋ ਦਿਨ੍ਨੋ ਸੁਦਿਨ੍ਨੋ, ਯੋ ਪਰਿਵੁਤ੍ਥੋ ਸੁਪਰਿਵੁਤ੍ਥੋ; ਯਂ ਮਾਨਤ੍ਤਂ ਦਿਨ੍ਨਂ ਸੁਦਿਨ੍ਨਂ, ਯਂ ਮਾਨਤ੍ਤਂ ਚਿਣ੍ਣਂ ਸੁਚਿਣ੍ਣਂ. ਸੋ ਭਿਕ੍ਖੁ ਅਬ੍ਭੇਤਬ੍ਬੋ.

ਚਤ੍ਤਾਲੀਸਕਂ ਸਮਤ੍ਤਂ.